Tuolsung
ICI Kohran Upa le Pastor han tawngtai camp
CCPur: Hungtlung ding October 2729, 2015 inkar sung khin Independent Church of India (ICI), Tuithaphai Presbytery sunga Kohran Upa po po le Pastor han tulaia ei ram boruok le inzawma Pathienin hun zalen a mi pek nawk vat theina dingin Tawngtai Camp NPT tlangah nei an tih.
State Malaria Officer a hung
CCPur: Dr Zamkhokam Kuki, State Malaria Officer chu zanikhan CCPurah a hung a, District Malaria Officer Dr Liankhozam Guite inrawinain Thingkangphai V/A House a Dengue awareness programme an va uop. Dr Zamkhokam hi Dr Krishna, Antomologist, N. Gopa Kishore Singh, IEC Consultant han an hung zui. Dengue cell chun Thingkangphai khuoah breeding site an hmu bakah hi Thingkangphai khaw mi 1 Dengue positive hmu a nita bawk.
Tuivai a Nga mannaah changsuolin a tla hlum
CCPur: Mr Chinsuanmuan (18) s/o Thanglung of Mualnuam chu October 24, 2015 nia a ruolhai mi 5 le Tuivai vadunga Nga mana an fenaah tuia changsuolin tui sungah an tlumhmang sawng a, ZYA Mualnuam Unit inrawinain a ruong nasa taka zawng a ni hnungin zanikhan hmu a ni a, zani ma khan a ruong hi vui nghal a nih. Bieltu MDC Langkhanpau Guite, Chairman, ADCC chun Oct. 25, 2015 khan a tulna naa hmang dingin motor pakhat a tirsuk a, tuilut thiem mi iemanizat thuoiin zanikhan Mr Guite hin Mualnuam khuo zanikhan a pan bawk a nih.
Ruong enkawltu hai thangpuina an pek
CCPur: YPA GHQ inrawinaa YPA New Lamka Block le Lamka block han zanikhan District Hospital morguea martyrs 9 hai ruong le kuong sukfaitu Joseph Muan Khuptong s/o K.Thiangin of Pearsonmun,Pausonlian Khuptong s/o K.Thangzakap of Lailam Veng le Thangzamuan Hangluah s/o Pauhau Hangluah of HQ Veng hai Bufai half bag 1 seng an pek. Chun, YPA Imphal block le YPA Lamphel Unit in a tul anga sem dingin YPA GHQ kutah bufai bag 21 an pek bawk.
DTCah training nei
CCPur: ZAni 9AM a inthawk khan NEICRORD huoihawtnain District Training Centre (DTC) Tuibuongah District level Govt. Officers and Vilalge Authority Training prog. hmang a nih. Hi huna hin Khaihao, Dist. Coordinator, NEICRORD chun Lamka le Tuibuong TD Block hnuoia Lal hi huna thang hai JSSK, ICDS, MDM, TPDS, RKVY haiah hrilhrietna a nei a, Oct. 27 in IAY, NBA, NSAP, RGGVY, MGNREGA training nei nawk an tih.
HSA GHQ inrawinain meeting nei
CCPur: Oct. 25, 2015 khan HSA GHQ inrawinain HSA CCPur Jt. Hqrts le HSA Unit han HSA office, Rengkaiah joint meeting an nei. Hi huna hin AntiTribal bills 3 hai dodalna leia buoina fe mek le inzawma report ngaithlak le hriltlang a ni a. JAC hmalakna inpakum an ti thu hrilin Delhia sawrkar thlungpui thuoitu hai inhmupui dinga fe ve HSA representativea Pu Richard Laltanpuia le Rev. Benjamin Shakum hai tlawmngaina le inpekna lawmum an ti thu an hril.
Tribal martyrs hai ralna
CCPur: Oct. 23, 2015 khan Singngat block hnuoia New Laijang VA chun in tina Rs. 100 tribal martyrs ralna dinga an dawl Rs. 1,200/ JACa Finance SubCommittee kutah an inhlan bakah zanikhan Singngat Blocka S. Belbing village VA in Rs. 800 le Henglep blocka Chongkhojou VA in Rs. 5,100 an inhlan.
Chun, District Hospitala JPO kutah tribal martyrs hai ralna le thangpuina dingin zanikhan mimal le organisation 6 han Rs. 39,700 an inhlan. A petu hai chu Mrs Hahat of Tengnoupal, Chandel Dist Rs.100/; HQ Assembly of Yahweh, North East India Rs.,10,000/; G.Laijom Society, Manipur India Rs.10,000/ Dr Liankhozam Guite, Secy G.Laijom Society, Manipur India in JPO hmang dingin Rs.500/; Tuijang Vaichong Khosung miho, IT Road, Sadar Hills in Rs.9100/; Agape Mission Cooperattive Credit Society Ltd in Rs 5000/ bakah JPO thangpuina dingin Rs.5000/ an pek. Chun, Oct. 25, 2015 khan Mrs Chingngaihvung of Shillong in Rs. 1500 le JPO ta dingin Rs. 500; Salvation Army, Lamka Corpts Rs. 10,000/; C. Lalrambuatsaiha, Editor, Aizawl Post, Mizoram Rs. 1000/ le Upa Tunzathawn, Lamphelpat in Rs. 200 an pek bawk.
Afghanistan, Pakistan le North India haia simkhawlei inhning leiin mi 180 vel an thi
Kabul/Islamabad/New Delhi: October 26, 2015 zantieng 2:40PM vel khan Afghanistan hmarsak tieng richter scale 7.5a hratin simkhawlei an hning a, Pakistana khawm second 40 sung zet an hning bakah India rama Jammu and Kashmir, DelhiNational Capital Region (NCR), Punjab, Uttar Pradesh, Uttarakhand, Rajasthan hai khawm a sawihning. US Geological Survey hril dan chun simkhawlei inhning tanna hi Hindu Kush Mountain Rangea Feyzabad simsak tieng km. 82 a hla hnuoi sung km. 196 a inthuk niin a hril. Hi thu ei sut chena hin Pakistan le Afghanistan haia simkhawlei inhning leia thina tuok mi 180 vel ni tain ei thu dawngna chun a hril a, tuchena mihriem thi tamna tak chu Pakistan a nih.
Pakistana chun simkhawlei inhning lei hin mi naupang 8 thangin mi 147 vel an thi bakah building chim, mimkei le tia tlanse hai innekbuoina leiin mi tam takin hliemna an tuok. Report kimchang taka hriet thei a la ninaw leiin mithi hi tuta nek hin an tam ring a nih tiin ei thu dawngna chun a hril. Peshawar a chun hliem 200 chuong admit an ni a, hospital lien haia chun emergency puong a nih.
Afghanistan a chun school naupang 12 thangin mi 33 in thina an tuok. School naupang hai hi Taluqan khawpuia an school chim in a del ding tia an tlansietnaa innekbuoina tlunga chil hlum an nih. Simkhawlei inhning leia hliemna tuok hi mi sang an chuong bawk.
India rama Jammu and Kashmir state sung Baramulla districta chun simkhawlei inhning leia bunker chim in Army personnel pahni a del hliem a, hospital panpui an nih. Srinagar hmuna Jehangir Chowk hmuna flyover khawm a sawikak a, motor inlawn vel iemanichen sukchawl pha a ni bakah Delhi Metro hai khawm iemanichen sukchawl pha an nih. Mipui hai chu tithawngin tuolah an tlandawk tawl. Himachal Pradesh a chun simkhawlei inhning lei hin hmun tam takah electric power supply a sukbuoi a, sienkhawm thi le hliemna tuok an um thu hriet a ni nawh.
Mi that ching Chotta Ranjan Indonesia rama man a nih
New Delhi: Misuol turu le mi that hmang, India mi tam tak thattu Rajendra Sadashiv Nikalje, alias Chhota Rajan chu Indonesia Police han an man niin zanita media report chun a hril a, CBI Director Anil Sinha khawmin Chhota Rajan man a ni thu hi a sukchieng tah. Chota Rajan hi ‘Cynaide Mohan’ tia khawma ko a ni bawk a nih. Chhota Rajan hi Rajan hi Mumbai hmuna pieng, Primary teacher lo ni hlak, nuhmei 20 zet a that leia thi dinga thiemnaw inchangtir a nih. October 25, 2015 nia Sydney a inthawk Bali island resort a hungtlung huna an man niin Indonesia police chun an hril.
Rajan (55) hi kum 20032009 inkara cynide hmanga nuhmei 20 vel thattua intum, Mangalore Corut in December 2013a kha thi dinga thiemnaw a lo inchangtir tah, kum 20 laizet man dinga zawng ta a nih. Tuolthatna le tuolthat tumna cases dang dang, sawrkar thil khapa sumdangna le a dang dang haia criminal case tam tak awr mek a nih.
Bali police spokesman Heri Wiyanto chun, Interpol le Indian authorities hai le an inrawntuo mek thu hrilin Rajan hi India ram tienga hun thawn ni dingin a hril. Rajan Nair ‘Bada Rajan’ tia hrietlar hnuoia ruk inrukna le thil khap zawrna sin thaw tana, Nair that a ni hnunga hi Ganga leader hung ni, Dubaia a tlanhmang hmain Dawood Ibrahim hnuoia khawm sin lo thaw a nih.
Chhota man a nina thuah CBI director Anil Sinha chun Australia le Indonesia kuoma lawmthu a hril a, Union Home Minister Rajnath Singh chun Interpol le Indonesia sawrkar chungah lawmthu a hril bawk.
Assam Rifle pakhat kap hlum nawk
Imphal: 44 Assam Rifles hai chu zani zingkar 9AM vel khan PLA ni dinga ringhla han silai tha tak tak hmangin Ukhrul district, Kamjong SubDivision sunga Phukai Kuki Village lai an lo lambun a, Assam Rifle pakhat a thi niin ei thu dawngna chun a hril. IED bomb an sukpuok zoin silaiin nasa takin an kap a, Assam Rifles hai khawmin an kaplet ve leiin iemanichen zet an inkaptuo a nih. Kap hluma um hi JCO niin ei thu dawngna chun a hril. Revolutionary Peoples Front (RPF) chun Ukhrul districta Khoikhai Lamkhai hmuna Assam Rifles hai lambuntu chu anni pawl a ni thu RPF a Secy. Publicity Roben Khuman in zanikhan a puong.
Zani hmasa khawm khan MPA/UNLF han 24Assam Rifles hai Satang village, Chandel districtah an lo lambun a, AR personnel Paokholet Baite s/o Jamsei Baite of Moreh an lo kap hlum ta bawk.
Pong Lambi JAC in protest neiin JNIMS OPD an khar
Imphal: Manipur sawrkarin in Pong Lambi khar an tum le inzawma JAC indina um chun zanikhan hi lampui khar dodalnain JNIMS OPD, Casualty le main gate hai kharin protest an nei. JAC hin hi lai lampui hi Oct. 25, 2015 chena hawng a ninaw chun OPD le Casualty hai an khar ding thu tuta hma khan an lo puong ta a nih. JAC hin JNIMS Director room lutchil an tum a, sienkhawm security guard han gateah dangin silai khawm an hmetpuok. A hnungin JAC hotu pahni hai chu Director an inhmupui phal pek an ni a, Manipur CM kuoma an thil ngen an thlun ding thu hrilin an thilthaw chawlsan dingin a ngen a. Sienkhawm Pong Lambi hawng a ni hma khat protest an sunzawm ding thu an hril.
OC 6 sawnkuol an nih
Imphal: Manipur Police department chun Officer in charge (OCs) hai hai a sawnkuol. DGP Manipur in transfer order an suo dungzui hin OC Imphal AK Shantikumar chu Porompat OC ding le OC Porompat Th. Dinesh chu OC Imphal sin chel a ta; AK Premjit chun OC Pallel; A.Khelendro chu Inspector, MPTC dinga ruot a nih. Tengnoupal OC Umar Alam chu Moreh OC ding le tuta OC Moreh sin chel lai Kh Dilipkumar chu OC Tengnoupal dinga sawn a nih.
Nuhmei suolluitu slippera hlap
Imphal: Nuhmei naupang kum 12 mi suolluia intum Sagolsem Ranabir (39) s/o Khahemba of Mayang Imphal chu zanikhan Special Court for Protection of Child from Sexual Abuse, Uripok Cheirap Court Complexah inlangtir a ni a, Court rooma inthawk a hung suok huna nuhmei pakhatin slipper hmangin an lo hlap. Sagolsem Ranabir hi Mayang Imphal Konchak hmuna Student Guidance Centre neitu a ni a, a boardinga um Class V inchuklai a suollui tia intum leia Police han an man a nih.
AR han KYKL cadre an man
Imphal:October 25, 2015 khan 16Assam Rifles han Taretkhul hmuna dappui an thawnaah KYKL cadre Sanassam Tenden Metei (28) S/o Sanassam Manglemjao, of Tumukhong Awang Lekai, Imphal East district an man a, Sagolmang Police Stationah an peklut niin zanita PRO Assam Rifles thusuok chun a hril.
Chun, zani hmsa khan 2Assam Rifles han Rul in a chuk hliem Mitesh Kumar (9) of Khekman, Thoubal district chu rul tur thatna damdawi kapin an sanhim.
Congress le JD(U) in PM chunga complaint
New Delhi: Congress le Janata Dal (United) chun zanikhan PM Narendra Modi chunga Model Code of conduct bawsiea intumin Election Commission (EC) kuomah complaint an peklut. Congress le JD(U) chun, Bihar Assembly election fe lai mek laia PM Narendra Modi in kum thara inthawk Central government hnuoia Group D,C le B nongazetted post lakna haiah interview thaw ni tanaw nih tia AIR a Mann Ki Baat programa a hril hin model code of conduct a bawsiet a nih tiin an intum a nih.
Mizoram Congress candidate in Lalthanzara
Aizawl: November 21, 2015 nia Mizorama Aizawl NorthIII Assembly seata byelection hung um dinga hin Mizoram Health minister hlui le Mizoram CM Lalthanhawla sangpa Lalthanzara chu Congress candidate dinga ruot a ni thu MPCC Vice President R. Lalzirliana in zanikhan a puong. Lalthanzara hih hi biela MLA a ni a, construction companyah 21 percent share a nei tia intumna leia August 18, 2015a inban, ama inbanna leia hung ruok le tuta byelection nei dinga ti a nih.
Group D,C,B postah interview um talo ding
New Delhi: Prime Minister Narendra Modi chun Pathienni zan khan monthly radio programme “Maan Ki Baat’a thu a hril naah January 1, 2016 a inthawk chun Central Govermment hnuoia Group D,C le B nongazetted post lakna haiah interview a um tanaw ding thu a hrilin hi thil hi sawrkar sin laknaa corruption sukbona dinga thaw tum a ni thu PM chun a hril. Hi thil hin sawrkar sin zawngna kawnga mirethei le pasie, recommend tu ding nei lo le pawisa nei lo hai nasa takin a thangpui ding a nih tiin PM chun a hril. Hi thil ding le inzawm hin tulai hnai khan Minister for Personnel Jitendra Singh chun states le UTs tina Chief Minister hai lekha thawnin interview in a huom lo ding post hai identify dingin a lo inhriettir ta a nih. Sawrkar thlungpui chun personality le skill assessment tul lona post haia junior level post haiah interview hi tul a tinaw a nih.
Dimapura kangmei suokin In 200 chuong a kang
Dimapur: October 25, 2015 zantieng dar 5 vel khan Dimapura K.K. Colony hmuna kangmei nasa takel a suok a, In 215 vel a kangsiet vawng a, sungkuo 240 hai chu chengna ding In nei lovin an um pha. LPG Cylinder 9 lai zet a puokdar leiin kangmei suok hi a hrat hle nia hril a nih. Kangmei theltu motors 8 han theitawp suoa an thel darkar 4 hnungin kangmei suok hi an thelmit thei chau. Kangmei suok hin 66KV Power House feeder khawm a kangsiet niin EE, Dimapur transmission division chun a hril.
LAEF Chairman le Secretary man
Shillong: Assam Police hai thangpuinain Meghalaya Police chun October 22, 2015 khan Garo Hills helpawl LAEF Chairman Kelwin Sangma le General secretary Sengman D. Momin @ Walma hai chu Paharkata Agia hmuna an man a, an kuta inthawk demand note sutnaa hmang laptop an mansa. Chun, Oct. 24, 2015 khan LAEF selfstyle sergeant Sengrik Marak alias Rik bakah LAEF cadres Rangsil Sangma @ Nido le Kenu Marak @ Kiljang hai chu North Garo Hills SP le Indian Armya 65 GR of Red Horn Divsion Commandant hai kutah an inpe a, foreign made 7.65mm Pistol 1, magazine 1, a mu 4, local country made pistol 2, China siem grenade 1 le 7.62mm silaimu 5 an inpeklutpui.
Bank a rawkna thuah Police Officer man
Rangia: October 20, 2015 nia Assam ram National Higway31a private bank ATM pawisa ding phura um suom a, Rs. 19 zet lakhmang a ninaa inrawlna neia intumin Police Officer Bhupen Chandra Das chu Police han an man. Pawisa hi Baihata Chariali hmuna ATM –a sie dinga phur a ni a, Pawisa phurna vengtu, agency thawktu dang Taijuddin Ahmed le a unaupa Prasur Ali le Iftikar Saikia hai le thangruola pawisa hi an inrukhmang a nih. Bhupen Chandra hi thila an rawl thu hi Saikia man a nia inthawk hrietsuoka hung um a ni a, Paban, Taijuddin le Prasur hai khawm man an ni tah. Pawisa inrukhmang hi hmukir vat ni tang a tih tiin Kamrup SP Indrani Barua chun a hril.
Thuoihmanga um IB official a thisaa hmu
Tura: September 24, 2015 nia ASAK helpawl han an thuoihmang Central Intelligence official Bikash Kumar le puon sumdawngtu Kamal Saha hai thisa ruong chu Oct. 24, 2015 khan Dambuk Aga areaa Bochugre villageah thlan pakhat sunga phuma hmu an nih. Bikash Singh hi a thuomhnaw hak haia inthawka hriet le finfie a nih. Hieng mi pahni hai taksaa hin hliemna be tam tak hmu ding a um leiin an sawisak hlum hnunga an vui ni dinga ring a nih. Garo Hills Police han October 23, 2015 nia Tura hmuna ASAK commander Senbat unaupa Sengran D. Shira man a nia inthawk hi thil hi hrietsuoka hung um le Senbat hi hieng mi pahni hai thuoihmangna le thatnaa hin an rawl ngei thu Sengran D. Shira chun a puong a nih. ASAK helpawl hai hin an mi thuoihmang hai Bangladesh ram lutpui an tum a, sienkhawm BSF han ramri khau taka an veng leia lut thei lova an um lai police han nasa taka an zawng zing bawk leiin an mi thuoihmang hai hi thata, an phum hnunga tlanhmang an nih.
Night bus eksidenah mi 10 an thi
Aizawl: October 24, 2015 zan dar 9 vel khan Aizawla inthawk Lawngtlai pana tlan Lai Night Super Bus mi 21 chuongna chu Ramlaitui le Kangmun South inkara changsuolin lamthlangah a tlan liem a, mi 10 an thi. Hi bus eksidena hin mi 8 an hliem a, mi 2 hai ruok chu an hliem naw niin ei thu dawngna chun a hril. Motor dang le an inpelnaa bus hi eksiden niin hliemna tuok pakhat chun a hril. Bus hi lamthlang feet 400 vela insanga inhlumthla a ni a, a se nasa hle.
Hi bus eksidena thi hai chu Ramchullova Hmar (36) s/o Thangzova (L) Zemabawk, Aizawl; PB Vanlalrosangpuia (37) s/o PC VL Pianga New Saiha; F Lalnunpuii (44) d/o Satinmana (L) Chanmari IV, Lawngtlai;Suilenmawii (38) d/o Biakhnuna ElectricVeng,Lawngtlai; Malsawmtluangi (49) d/o Zohleithanga ITI Veng, Aizawl; Lalrinkimi (25) d/o Lalchhandama Bethel Veng, Lawngtlai; Rualzachhinga (26) s/o R Zokhuma Hualngohmun; Nozzim Uddin (20) s/0 Abdul Kabir Patharkandi; VL Mawia (38) s/o Lala AOC Veng, Lawngtlai; Thansanga (35) s/o Biakliana Champhai hai an nih.
OROP Diwali hmaa puong hman beisei
New Delhi: Defence Minister Manohar Parrikar chun, One Rank One Pension (OROP) Scheme thua notification insuo vat a ni ta ding thu New Delhi hmuna Biannual Naval Commanders’ Conference huna reporter hai kuoma a hril. Bihar Assembly Election fe mek zo a ni hnunga Election Commission in Model Code of conduct a hlip pha, Diwali hma ngeia sawrkarin puong a tum a nih tiin a hril.
Kum 13 Pakistana an tang hnungin a hungkir
New Delhi: Kum 7/8 mi vel a ni laia Pakistan Rangers han Lahore railway stationa Samjhauta Express Rela ama khat chaua uma an va hmu le Pakistan in a enkawl India mi Naset, Geeta chu kum 15 lai zet Pakistan rama an tang hnungin zani zingkar khan Pakistan International Airlines vuongnaa chuongin Delhi Airport a hung tum tah. Geeta hi Edhi Foundation members han an hung zui. Ms Geeta chun Pakistan rama an tang sunga tha taka enkawltu Pakistan mipui hai chunga lawmthu a hril. Geeta hi tuhin kum 23 mi a ni tah. Indian High Commission in Islamabad kuoma thlalak a thawna inthawka Geeta hin a sunghai a finfie a ni a, Bihara um nia hril an ni a, sienkhawm DNA test thawzo a ni hnunga a sunghai kuoma inhlan chau ning a tih. DNA leh an inmil naw chun Delhi annawleh Indore pakhat lem lem haia sie le enkawl ning a tih tiin External Affairs Ministry thusuok chun a hril.
Hieng laizing hin Pakistan high Commissioner, Abdul Basit chun Geeta India ram hung thuoitlung a ni le inzawm hin India rama jaila intang Pakistan mi 459 hai chu India sawrkarin an suo zalen ngei a beisei thu a hril.
----------------------------------------------------------------------
VAWISUN THUPUI
Ka chunga a thil thaw that po po hi, Lalpa kuomah ieng am pe ve thung ka ta aw? Sandamna lo lang ka ta, Lalpa hming chu ko ka tih. Sâm 116:1213
Editorial
3 Bills le tlangram kilkhawr a chenghai
Manipur Assemblyin August 31, 2015 nia Manipur tlangmi hai hnawchepna ding, an dikna le chanvo lakpekna dinga Bills pathum Protection of Manipur People Bill, 2015; Manipur Land Revenue and Land Reforms (Seventh amendment) Bill, 2015 le Manipur Shops and Establishments (Second Amendment) Bill, 2015 a passed dodalnain a hung rasuok Tribal movement nasa taka ei fepui mek chu vawisun hi ni 58 a tlingna a nitah. Hieng Bills pathum hai chungthuah khawpui sung le a sevela cheng mipui hai lai chun hrilhrietna ei nei tha tawk ta khawm niin an lang a. Chu laizing chun tlangram kilkhawra cheng mipui hai lai awareness ei pek tha tawk naw mani ding aw! ti theiin a um. Khawpui sunga cheng le um hai chu a tlangpuiin lekhathiem tak tak dam le thil hrietthiemna tha tak tak nei dam ei ni tawl deu fur a, hi lei hin a mawl tak hai ta ding khawmin ei hrietchiengnaw hai indawn thei ding tam tak an um leiin Bill hi a pumpuiin hre chieng vawngnaw inla khawm a awm tawk le a kakhawk ding hai chu ei hriet thiem tawl fir fer tain an lang.
Hieng laizing hin, lekhathiem lo, mimawl tak tak, hieng Bills pathum hai hrilfietu ding mumal um lona; tienlai mi han Pathienthu mawl taka an lo pawm le zawm el anga, a hril thlum thiem thiem hai tieng awna mawl taka zawm el hlak hai umna tlangram kilkhawra cheng mipui lai chun hieng Bills pathum hai chungthu le ei palai dinga ei thlang MLAs hai chunga ei nuorna le lungawinawna san, tribal movements ei fepui nasan hai chieng taka la hre lo tam tak an um niin an lang a; Tribal movement ei fepui mek le inzawma awareness thawtu thenkhat lem chun tulaia ei buoipui tak Bills 3 hai chungthu nekin election nawk ding hmathlir neiin vote campaign an thaw nia hriet a ni bawk. Mi tam tak chun, MLA hai inban dinga ei phut nasan khawm an hrietnaw a, fak le dawn thu el chau bakah lampui thatnaw leia an MLA hai an pur thei tanaw chun an lung a sukzing a, ‘anni thlang khawm ni lo’ tiin Tuithaphai (CCPur) a cheng hai chunga lungawinaw tawk khawm an um nia hriet a nih.
Hi chungthua hin awareness petu han an hrilfie dan an diknaw lei le thenkhatin party ang zawnga mipui laia campaign an nei lei ni ngei dingin ring a um. Ei movement hi iengchen am ei la fepui ding ti ei hriet naw leiin khawpui sunga cheng hai chau ni lo, tlangram kilkhawr tak taka cheng mipui hai khawma ei movementah an chieng theina dingin hrilhrietna (awareness) chungthuah a ram mi hai dande el lovin AntiTribal Bills le inzawma indin JAC hin Tuithaphai mi ngei mipui hai hrilfiena petu dinga ruotin an rang thei angin team tir ngei sienla thiltha ning a tih. Asan chu, ei movement fepui thangsana hmangin mi thenkhatin party (Congress) kal zawng ringawta campaign thaw pawl an um niin mi ringum taka inthawk thu ei dawng. Ei movement hi Congress amani le political parties dang dang annawleh mimal intheidana le dodalna movement ni lovin, ei chanvo le dikna ei chang zing theina ding, ei ram le leilung ei humhal zing theina ding thil a ni lem zie chieng taka hrilfie an tul a nih.
Chun, ei movement fe mek le inzawm hin mimal le pawl ta dinga political advantage lak tumnaw inla thiltha ning a tih. Political advantage laa campaign thaw tu ei lo um a ni ei tawpsan hmak thiltha ning a tih. Mipui chu lo thuoikawiin ei lo hlem thei khawm a ni thei, Pathien ruok chu hlem thei a ni nawh. Hi lei hin mimawl tak takhai ei lo hlem thei a ni khawmin, Pathien bek hi inza ding a nih. Politics ei lo khel nuom a ni khawmin Indikna le ringumna thangsanin khel tum ei tiu a, advantage ei lo lak nuom a ni khawmin thudik hmangin ni raw seh.
