Tuolsung
Rev. Dr Rochunga Pudaite ruong ropui taka lo hmuok ; Vawisun vui ning a tih
CCPUR: October 10, 2015­a Colorado Springs, US­a fam lo chang tah Pasaltha Rev. Dr Rochunga Pudaite, Founder President Bibles For The World le Moderator EFCI  ruong chu zani zantieng 2:30PM vel khan Churachandpur­a lutpui a ni a, sielmat kawtsuo­a inthawk a ruong hi Hlâng 60X12 feet­a seia siem hmangin Sielmat Val Upa le tlangval han chengna Sielmat PMS Bungalow chen an sawm a, an hnungah mipuiin an zui. Delhi­a inthawk Imphal a hungtlung huna hin HYA Imphal JHQ inrawinain Imphal Airport­ah ruong lo tuok a ni a, HYA Imphal JHQ inrawina bawkin Sielmat, CCPur chen a ruong hi phur a ni a, Sielmat kawtsuoa inthawk Sielmat khawtlang thuoitu le mipuiin a Bungalow chen an sawmtung a nih. Ruong lo tuoktu mipui an tam hle.
    
Dr Pudaite ruong hi Imphal le kar hmun iemanizata sukchawl le inzana pek a ni bakah CCPur PMS Office lutpui a ni zovin Sielmat Christian Hr. Sec. School lutpui a ni a, hi zo hin Sielmat Christian Hospital lutpui a nih. Hieng hun haia hin staff han inzana pein ruong puon an lo inkhum tawl. Sielmat Christian Hr. School student hai chun an school a inthawk Hmarveng chenah lampui sirtuoka ngirin ruong hi an lo tuok a nih. Chun, Trinity College and Seminary (TCS) hai khawmin a ruong hi lo sukchawlin puon an inkhum bakah Gun Salute an lo pek.
    
Zani zan khan PMS Bungalow­ah ruong mengpui pangngai ang bawkin nunghak­tlangval le mipui han khawvarpui a ni a vawisun hin a vuina hunser Sielmat Christian Hr.  Sec. School campus­a hmang ning a ta, a ruong chu PMS Bungalow, Sielmat­a a thlan hmuna ropui taka vuiliem ning a tih.
    
Dr Pudaite ruong tuok le zuia fe motor an tam hle bakah Sielmat kawtsuo­a khawm mipui tam takin a ruong hi nghakin an lo tuok a, traffic khawm hun iemanichen zet sukchawl a nih.
    
Dr Rochunga Pudaite ruong lo hmuokna hi Camera vuong thei (flyng Camera) hmanga tha taka thla lak a nih.

Chandel ADC in an  Chairman rawiin Martyrs hai an hung ral
CCPUR: Zanikhan Chandel  Distrit ADC Chairman Sesei Zou inrawinain Chandel MDC 7 hai chu CCPur­ah an hung a, Mr Langkhanpau Guite, Chairman, ADCC; Ms Mannuamching, CEO/ADCC le MDC member thenkhatin an lo tuok. Chandel ADC member hai hin District Hospital­a Tribal martyrs hai ralna an nei bakah ruong an en. Hi zo hin JPO kuomah pasaltha hai ralna in Rs. 1,10,000/­ an inhlan.
    

Chandel ADC Chairman Sesei Zou chun, ram le hnam humhimna dinga hringna inhlantu martyrs hai inzana pein anni hai leiin Manipur­a tlangmi hai pumkhatin ei um pha a nih tiin a hril a, Martyrs sungkuo hai lusunna a sunpui thu le hliem hai a tuorpui thu a hril.

Tribal Martyrs ralna petu hai
CCPUR: Zanikhan District Hospital­a JPO kutah mimal le organisation 3 han Tribal martyrs hai ralna le thangpuina dingin Rs. 1,20,350 an pek. JPO kuta ralna petu hai chu ­ ADC Chandel Rs.1,10,000/­; Lelen Doungel, Zion Veng, Tuibuong Rs350/­; Ex CNLA (Chin National Liberation Army)  ralna le Damnaw hai enna in Rs.7,500/­; Morgue enkawltu pasal 3 hai thangpuinain Rs 1,500/­ le JPO thangpuinain Rs.1,000/­  an pek. Chun, JAC hnuoia Finance Sub­Committee kuta Singgat Block­a New Laijang village han tribal martyrs hai ralna dinga In tina Rs. 100/­ pei an dawl khawm Rs. 1,200/­ an peklut.

CWC a inthawk LB Sona le G. Vungsuanthang suspended
CCPUR:  Zani 11:00AM khan Paite Tribe Council­a Central Working Committee chun LT Juan Tonsing inrawinain PTC Office, Hiangtam Lamka hmuna CWC member 10th special meeting an nei. Hi huna hin CWC sunga member post ruok hai le Executive Committee a key post ruok hai sukbit dan ding chungthuah Denominations/Church le Paite hnam sunga Organisation um hai le hriltlng a tha dim?; CWC meeting hmasaa pasal tha hai ral dan ding thutlukna laka lo um tasa ennawn a tul dim ti hai thangin thu pawimaw tum tum an hriltlang.
   
Hi meeting chun PTC President dingin L. Pumlianpau; Vice Presient dingin GK Zalal; Secy (Internal) in H. Pauzalal; CWC member in K. Chinkhansuan hai an ruot.
   
Hi baka hin CWC meeting chun LB Sona le G. Vungsuanthang hai chu hnam pui hmusit le inza lo tiin PTC­a CWC member an ninaa inthawk kum 1 sunga dingin an hnawtdawk (suspended).  CWC hnuoia um vawng an ni a, CWC rawn hmasa lova ZC Chairman haia an inban leia suspended niin ei thu dawngna chun a hril.

National Pension System form Treasury office­ah
CCPUR:   National Pension (NPS) Assessment le implementation thawna ding le inzawmin DDO hnuoia Department tin hai chu mani  Department senga ding  NPS form District Treasury Office ah October 24, 2015 a inthawk lak thei le October, 2015 thla sung ngeia hi hmuna bawk pelut dinga inhriettir an nih

Monitoring meeting an nei
CCPUR: Zani 10:30AM khan New Lamka­a Sauliim Restaurant­ah National Bank for Agriculture &  Rural Development (NABARD) inrawinain Project Implementation & Monitoring Committee (PIMC) meeting nei a nih. Meeting hi PIMC Chairman Lead Dist Manager (LDM) in an rawi. Hi huna hin PIMC a member Bank tum tuma Manager hai le Special invitee in S. Khaikhopau a thang.
   
Meeting huna hin Rural Aids Service han Women Self Help Group an thaw hai chungthu, Project Co­Ordinator, Anchor NGO in Women Self Help Group (WSHG) chungthu, saving le Credit linkage progress report an pek. July 31, 2015 chen khan Block 10­a Relief & Development Deptt. of EAC; DD­Reform Presbyterian Church; Rural Aid Service le Rural Women Upliftment Society fethelnga WSHG han Bank tum tuma saving linked an nei chu 414, credit linked 76 bakah percentage 16 a tling.

HM Rajnath in party leaders hai an thuhrilah fimkhur dingin an cha
NEW DELHI: Tulai hnaia BJP leader le Union minister thenkhatin tawngkam mawilo an saksuok vetna thuah Union Home Minister Rajnath Singh chun party leader hai chu tawngkam uluk le fimkhur dingin an hriettir.
   
Union External Affairs Minister V.K. Singh chun tulai hnaia Haryana­a Faridabad hmuna hnam hnuoihnung Dalit Dalit naupang pahni meia raw hlum an ni chungchangah khan   sawrkar thlungpuiin inrawlna a neinaw thu le, hi thil hi state sawrkar mawphurna a ni thu hril a ‘Mi tuin amani lungin Ui deng ta sien, sawrkar maw inphurtir ringawt thei ninaw nih’ tia a hril leiin  political party tum tum han V.K. Singh tawngkam hi awm an tinaw bakah nasa taka  an sawisel leia Home Minister in hi thu hi a hril a nih.
   
Home Minister chun, VK Singh khakin tawngkam saksuok leia, a thuhril hrietsuol a nih tia an hrilhlip el thei ding a ninaw thu hrilin tawngkam hmang uluk le fimkhur a tul thu hrilin BJP leaders hai chu lakkawi thei ding zawnga tawngkam nei lo dinga fimkhur dingin an cha. Tuta hma met khawm khan Minister of State for Home Kiren Rijiju in North India mi han dan bawsiet inhawi tih tia a lo hril khawmin sawisel a hlaw hle a nih.
   
Bihar­a BJP inthlawppui hindustani Awam Morcha (HAM) Chief Jitan Ram Manjhi khawmin V.K. Singh tawngkam hi a ngaimaw hle a, hiengang tawngkam mawi lo leader han an saksuok nawk ta nawna dingin PM Narendra Modi chu V.K. Singh chunga action na tak la dingin a ngen. 
   
National Commission for Scheduled Castes chun, SSP Ghaziabad chu Union minister le retired General V.K. Singh chu SC/ST Prevention of Atrocities Act hnuoiah a chunga action la dingin an ngen.
   
Commission Chairman PL Punia chun SSP Ghaziabad le DGP Uttar Pradesh hai chu November 2, 2015 a Commission hmaa inlanga hi chungthua an hmalakna report le dawnna pe dingin an hriettir.

Kum 5 sung Manipur­ah nuhmei suolluina case 165
IMPHAL: Zanikhan Classic Hotel, Imphal­ah One Day Consultation Workshop on Gender, Human Rights and Violence Against Women nei a nih. Hi huna Dr AK Jhalajit, IPS, SP, Imphal West in thu a hrilnaah, kum 2011 khan nuhmei chunga suolna cases 165, kum 2014 in cases 316 le tukum 2015 sung hin nuhmei chunga suolna (crime against women) cases 207 a um. Report dungzuiin kum 5 liemta sung khan nuhmei inhmangna report cases 284; sukhliem le suknatna case 194 le nuhmei suolluina cases 165 a um niin Dr AK. Jhalajit chun a hril.
   
United NGOs Mission Manipur (UNM­M) Secretary U. Nobokishore chun ei society siemthatna dingin Criminal Justice System and Corruption siemthat a tul thu hrilin hi thua hin CM bakah national le international level chenah UCM in an tlun ding thu a hril.

UNC bandh in leiin motor an intang
IMPHAL:  Manipur Assembly in August 31, 2015 nia Anti­Tribal Bills 3 a passed hai dodalnaa United Naga Council (UNC) October 22, 2015 zanrila inthawk Manipur Hill Districts haia darkar 48 aw ding Bandh an tahw chun National Highways haia traffic nasa takin a sukbuoi a, Jiribam­a chun Bufai phurtu Truck 10 vel an intang bawk niin ei thu dawngna chun a hril. Kuki Peoples’ Liberation Front/Army (KPLF/KPLA) khawmin Anti­Tribal Bills chungthu lei bawk hin October 21, 2015 a inthawk Oct. 31, 2015 chen aw dingin hill district haiah bandh an thaw bawk a nih. Bandh lei hin NH­2 Imphal­Dimapur Road a khawm passenger phur motor le thil phurtu motor inlawn hmu ding an um nawh. Senapati district headquarters a chun dawr le bazar hai khar vawng an ni bakah sawrkar thawktu hai khawm office kai an tlawm hle.

AR han duma siem thil tam tak an man
IMPHAL: 20­ Assam Rifles chun October 21, 2015 khan NH­102­a Bongyang Road­ah Moreh pana tlan Mahindra DI MN­01­ 6792 sukchawla an dapnaah sawrkar thil khap duma siem thil 350 Zarda tin 9300, Rs. 28,83,000 manhu; Baba Black (50 gm) tin 4800, Rs. 3,69,600 manhu; Golden Khaini tin 43200 Rs. 2,80,800 manhu; Baba Black (10 gm) 39600, Rs. 27,72,000 manhu; Talab Pan Massala Rs. 24,960 manhu; Royal Chewing Tobacco Rs. 1560 manhu dapdawkin a neitu Sanjay Kumar (30) s/o Mr Suresh Kumar of Minuthong Hatta Telipati, Imphal East District leh an man. An thil man hai hi Food Safety Officer, Chandel kutah an peklut niin zanita PRO, Assam Rifles thusuok chun a hril.

KCP in Tender mipui hrieta puong dingin
IMPHAL: Kangleipak Communist Party (KCP) Poirei Meitei Lup chun November 21­30, 2015 inkar sunga Manipur Sangai Festival hung um ding le inzawmin Tourism Department chu tender details mipui hmu le hriet thei dinga puong dingin an inhriettir. Department of Tourism chun Contractors le private firms haia intahwk ten percent an lak ti report an dawng bawk niin KCP(Poirei) chun an hril a. Sangai festival ding le inzawma tender hai chu Oct. 23, 2015 a inthawk ni 5 sung mipui hmu thei dinga notice boards haia tardawk dingin an inhriettir bawk.

Nongstoin byelection Nov. 21­ah
SHILLONG: Meghalaya­a Nongstoin assembly byelection chu November 21, 2015 a nei dingin Election Commission in a puong. September 26, 2015 nia HSPDP chief Hoping Stone Lyngdoh thina leia Nongstoin biel hi ruok a nih. Meghalaya­a political parties hai chun hi biela byelection kum thar tienga nei an beisei lai EC in election nei dinga a hung puong thut hin political party han mak an ti hle. 
   
November 21, 2015 hin Manipur­a Assembly seats pahni Thangmeiband le Thongju; Madhya Pradesh a Ratlam Lok Sabha seat le Telangana a Warrangal; Jharkhand­a Lohardaga Assembly constituency; Madhya Pradesh a Devas A/C le Mizorama Aizawl North haia khawm byelection a ruola nei a ni ding a nih.

Dist. thar siemna dingin Miz. in Rs. 75.83 crore a ngen
AIZAWL: Mizoram Finance Minister Lalsawta chun district thar siemna dingin 14th Finance Commission a inthawk Rs. 75.83 crores ngen a nih tiin zani hmasaa Mizoram Assembly­a Opposition MNF MLA Lalruatkima indawnna dawnin a hril a, district hming ruok chu Lalsawta hin a hrillang nawh. Lokayukta indinna dingin state sawrkar chun 14th Finance Commission kuomah Rs. 122.20 crores a ngen bawk tiin Lalsawta chun a hril bawk.

Hrentanga um mi 69 sansuok, IS 20 kap hlum
HAWIJA:  US le Iraq sipai thangruol hai chun zani hmasa khan Iraq rama Kurdistan Region­a Hawija hmuna special operation an thaw a, Islamic State terrorist 20 an kap hlum a, midang 6 damin an man a, Islamic State (IS) han an hrentang mi 69 zet an sansuok. Special operation thawnaa hin US sipai pakhatin thina a tuok bawk niin US Central Command thusuok chun a hril.
---------------------------------------------------------------------------------
VAWISUN THUPUI
Lalpa zainemna ruok chu a tituhai chunga chun chatuona inthawka chatuon chenin um a ta, A felna khawm an thlahai thlahai chenin; A thuthlung zawm taphawt le, A thuhrilhai awi tuma hre zinghai taphawt chunga chun.  ­ Sâm 103:17­18

Editorial
Inchawimawi le inpak
Khawvel­a mihriem hai nun suk inhawitu le mi sukhlimtu chu chawimawi le inpak hai hi a ni awm ie. Mitin, a chin a lienin inpak le chawimawi hi inhawi ei ti a, a tak nilova min an mi hang inpakder chang dam hin a der/a lem a nih ti ei hriet zing khawmin ei lungril a suklawmin ei nun a sukinhawi em em hlak. Hi chau ni lovin inchawimawi, inpak le ei thilthawna haia hang inlawm tawn hai dam hi nun sukinhawitu le mi sukhlimtu an ni chau ni lovin, mihai sukphur theitu, chau le ngui hai suk har­a thahrui thar pe theitu an ni bawk. Hieng khawpa mitinin ei lawm le thil thaw thei a ni lai zing hin a bik takin ei ni Tlangmi hai hin inchawimawi le inpak tawn hi harsa ei ti em em. Tam tak chun mi’n thil an thaw thatna nekin an sietna le an tlin nawna  ei zawng hmasa lem rawp hlak. Hi hi ei thil ching le mizie tha lo tak, bansan hmak dinga tha em  em chu a nih.
   
Chun, mi an dam laia chawimawi, inpak le ngainatna suklang nekin an thi hnung le an ruong chunga inpak hluom ei ching hi a that lai zingin a tha famkim naw deu chu a nih. Mi an dam laia an thil thaw that sun sun haiah inpakin lo chawimawiin lo ngaihlu thiem inla chu a neka thil ropui le thil tha tak tak khawm an thaw el thei a nih. A san chu, inchawimawi le inpak hai hi mitinin ei lawm a, chu thil chun mi a suk thatho a, a neka tha le ropui lema thil thaw nuomna le tumruna an nei tir hlak leiin. An dam lai inkhingpuia, theida em em siin an thi hnungin an ruong chunga an fel zie, an thatzie le mi ropui an ni zie dam ei insam kur nguoi hlak. Hi thil hi a tha naw chu a ni chuong hran naw a, lawm khawm a um, an sung­le­kuo, u­le­nau le ruoltha hai ta ding lem chun lawm a umin a thlamuong thlak hle hlak a nih.
   
Chawimawina hi damlai le thi hnunga dingin lawm a umin dit a um veve bawk. Sienkhawm, an hriet ding khawm nita hlei lo, an sung le kuo le mipui hmaa hmai manna ding am ei ti ding a mawi zawnga inchawimawi rak nek hin, ei damlaini haia hin inchawimawi le inngainat tawn thiem inla chu mihriem hai kara hin inhmangaina le inlainatna kawnga dam a thathnem ngei ring a um bakah, mihriem nun khawm nasa takin a tha tieng a keihruoi lem ngei ring a um.
   
Chawimawina le inchawimawi hi mitinin ei lawma, nun suk inhawitu le sukphurtu a ni thei leiin insawisel le dem nekin inpak le inchawimawi tawn uor inla chu ei nitin nun, sinthawna le thil thawna haia hlawtlingna nasa le ropui lem intlunin, ram le hnam, kohran le khawtlang ta dinga thaw hlawk le ropui ei pung lem ngei ring a um. Insawisel le indemna tha (constructive criticism) a ni ngawt naw chun indemna le insawiselna hin thiltha nekin thil tha lo an tlun lem rawp hlak. Ei ni laia ei ching tha lo tak chu mi sukphurna neka suk thazawi ngawi ngawi ding khawpa a siet zawng le a thanaw zawnga insawiselna (destructive criticism) ei ching hi a nih. Hi hi ei ram le hnam, khawtlang le kohran ta dinga hri tha lo takel, hma ei sawn ding anga ei sawn thei nawna san pakhat a nih.

             
Hieng a ni lei hin thi hnunga ruong chunga inchawimawi rak nek hin ei damlaini ngeia hin inchawimawi tawn thiem inla, mi thil thaw siet nekin an thatna hmu rawn lem tum inla, an tlin nawna nekin an tlinna le felna tiengpang zawng lem  bawk inla chu miriem hai kara hin inremnawna, intheidana le inhmelmakna hi um ngainaw ni a; mi tam tak sukphurin suk thatho a ta, ei hringnun hlimumin inhawi lem bawk a tih. Chu chu ei Pathien dit dan a nih. Nuhmei uire lunga deng hlum el ta ding lai Isu’n ‘suolna nei lo in deng hmasa tak raw se’ a ti khan, tukhawm a deng ngam um lova pakhat khata an inrel hmang ang khan. Mihriem hai hi suola insieng ei ni leiin tukhawm a tha famkim le a fel famkim ei um nawh. Inrem le inhmangai taka ei um tlang theina ding chun ei thatna tieng inzawng tawn a, inchawimawi tawn hi ei thaw ding a nih. Chawimawi thlak le inpak thlak hai chu an thi hnung chau ni lovin an damlai, an thuok la um lai khawma inpak le chawimawi ding ei nih.


Post a Comment

Powered by Blogger.