Tuolsung
Thanglianpau in ZRO President a chel sung ZRO fund pek lo dingin ZMA in an rel
CCPur: Zomi Nuhmei Pawl chu zani 12:00noon han CCPur Public Ground­ah an fekhawm a, October 13, 2015 nia Chairman, Zomi Council kuoma ZRO President Thanglianpau Guite inbantir dinga ngenna lekha an pek chungthu an hriltlang bakah Tawngtairuolna an nei. Hi huna hin Oct. 13, 2015 nia ZC Chairman kuoma lekha an pek chu mipui hriet dingin an tiemlang bakah Oct. 17, 2015 nia Bungmual khuoa meeting nei hunah Sia Pau in ZRO president a chel sung ZRO fund tukhawma pek ta lo dingin an rel a, hi thutlukna khawm hi huna hin tiemlang a nih. 
   

Nuhmei Pawl hai hin tukhawm hotu an um biknaw thu le ZC kuoma lekha an peka khawm hming ziek bik an umnaw thu an hril a, ZC Chairman in a lo tawng khum dana khawm an lungawinaw thu an hrilin ZRO President an dit tanaw na thua inban raw seh tiin an khek.  Hi huna fekhawm hai chun ZRO President Thanglianpau Guite ZRO President a ni sung chun  ZRO fund pek ta lo ding le ZMA fund khawm pek ta lo dingin thutlukna an siem. An thutlukna siem namdetnain nuhmei fekhawm hai chu an thungna hmuna inthawk ngirin kut an ben. Hi baka hin Kadangband a Khupneilal Neihsial le Robert Hesei Assam Rifles han an kap hlumna le inzawma JAC in bandh an thaw mek chu nuhmei han full support pek dingin an puong bawk.
   
ZC Chairman hi ZRO President thuah October 18, 2015 chen hun an pek a, an hun pek a tawp le inzawm hin hi hmuna hun an hmang zovin Vengnuam, Hiangtam Lamka­ah ZC Chairman an van hmupui. An lekha pek chungthua dawnna tuchena an la hmunaw nasan ZC Chairman an indawn.  ZC Chairman i/c Vungsuanthang chun, Nuhmei Pawl hai dit dan anga ZRO President chu inban dinga lekha a pek theinaw thu hrilin, ZRO­ah thil umdan an tlun a tul ding thu a hril. Mipuiin Sia Pau an ditnaw chun hnam thuoitu hai khawmin mipui ditdan an pawmpui ding thu a hril.

SP Office­ah Delhi Police Spl. Recruitment form
CCPur:“Special Recruitment Drive for the post of Temporary Constable (Executive) Male/Female in Delhi Police­2015” a thang nuom hai ta dingin Application form October 20, 2015 a inthawk office hour sungin SP, CCPur Office­ah lak thei ning a tih tiin SP, CCPur chun inhriettirna a siem. Application peklut theina hun nuhnung tak chu November 11, 2015 a nih. Hun tiem pel hnunga peklut hai chu pawm ni tanaw nih tiin SP thusuok chun a hril.

JPO kuta ralna Rs. 20,503/­ le JAC kutah Rs. 10,500/­
CCPur: Zanikhan Tribal martyrs hai ralna le thangpuina dingin JPO kutah mimal le pawl 8 han Ralna Rs. 20,503/­ le Maibal pum 5 an pek. Zania ralna le thangpuina petuhai chu­ TS Shonkhomang of B.Vengnom maibal 3; Thangkhovung of Mission Veng, Hiangtam Lamka in maibal pum 2; LT Ngaihte & Family, New York, USA Rs.10,000/­; Zamnu of Bungmual in Rs.500/­; ECA, D.Phailen Rs.5,000/­; Zogam.Com Rs.3,000/­; Khopijang Baptist Church, Chandel Dist. Rs.1,000/­; Students CCPur Area  Rs.1,003/­ an nih. Chun, Oct 10, 2015 khan Singngat Presbytery, Presbyterian Church in India (Reformed) chun Rs.5,000/­ an pek. Oct 20, 2015 hin ZYA in Dist Hospital­ah thingpui inlum an tih.
   
Chun, JAC hnuoia Finance Sub­Committee kutah zanikhan khuo 2 han in tina ralna Rs. 100/­ pei an dawl hai Rs. 10,500/­ an peklut. Zanita JAC kuta ralna petu khuo hai chu­ Singngat block a Allusingtam Rs.2,500/­; Suongphuh Rs.4,300/­ le Thanlon block a L.Phungchongjiang Rs.3,700/­ hai an nih.

HWA in sukdikna an siem
CCPur: Manipur Tlangmi (Tribal)hai hnawchêpna dinga Bill pathumhai tia hmar tawnga inlet suksuok a um phêk tâwpna tak(last page) The Manipur Shops & Establishments 22nd Amendment Bill, 2015 hai an nih. A hnuoia Hmar tawng hmanghai ti kha Tribalhai ti lem ding a nih. Press hai lo thawsuol pal ani a lo hre thiem dingin ngên ei nih tiin HWA General Hqrts. Chun zanikhan sukdikna a siem.

Dr Pudaite ruong zawnna ding siem
CCPur: October 10, 2015 nia fam lo chang tah Rev. Dr Rochunga Pudaite ruong Churachandpur hung phurtlung a ni hnuna Sielmat kawtsuo­a inthawk a ruong zawnna ding ruoa ‘Hlâng’ siem a ni a, zanikhan Bungalow, Sielmat chenin  nunghak­tlangval han ensinna an nei.  Chun, Dr Pudaite ralna reception duty khawm zanita inthawk khan Sielmat Christian Hospital­ah hawng tan a ni tah.

HWA khuo tina ruong thungpui ding hai hun
CCPur: Hmar Women Association (HWA) GHQ chun District Hospital­a martyrs 9 hai ruong nghaktu dingin a hnuoi­a ang hin khuo tina HWA hai hun ding a ruot thar nawk a, a tlawm takah Unit/Khuo tina members 30 bek fe khawm a ruong thungpui nawk dingin HWA GHQ chun inhriettirna le ngenna a siem.
   
October 19, 2015 Ngurte; October 20,2015­Saikot; October 21, 2015­ Valpakot le Khawpuibung; October 22, 2015­ Muolvaiphei; October 23, 2015­ Muolbem le Thenmuol; October 14, 2015­ Rengkai; October 25, 2015 - Sielmat; October 26, 2015­ Khawmawi, Bethel le M. Ramthar; October 27, 2015­ Saidan le Thingchom; October 28, 2015­ Hmarveng le October 29, 2015­ Lamka.

DMO charge a lak
CCPur: District Malaria Officer dinga ruot thar Dr Liankhozam Guite chun zanikhan DMO/CCPur sin chel tanin office a kai tan. DMO Dr Liankhozam Guite hi Rev. Stephen Chinzathang, Executive Secretary, ZPCS in Pathien kuoma tawngtaipekna a nei.

Bandh in nundan pangngai a sukbuoi
CCPur: January 28, 2015 nia 8­Assam Rifles han Kadangband a Khupneilal Neihsial le Robert Hesei an kap hlumna le inzawma JAC indina um chun Oct. 18, 2015 zanril­a inthawk Manipur tlangram district pumpui huopin darkar 48 an thaw tan. Bandh hi KSO GHQ; KSO/CCPur; ZSF GHQ; HSA Jt. HQ/CCPur hai khawma an thlawp leiin CCPur khawpui sunga khawm nundan pangngai a sukbuoi a, dawr le bazar hai hawng an ni nawh. Bandh hin inchuknain, power, water supply, sakhuona thil le media hai a huom nawh. Bandh hi October 20, 2015 chen aw ding a nih. Bandh leia buoina suok hriet a ni nawh.

HYA GHQ in sunnna
CCPur: October 18, 2015, 2:00PM khan Hmar Youth Association (HYA) GHQ thuoitu han an Office, Rengkai­ah famtah Rev. Dr Rochunga Pudaite inzana insang tak pein sunna hun minute hni sung to tawkin hun an hmang.

HSA CCPur College Unit thuoitu thar ding
CCPur: Zanikhan HSA CCPur Jt. HQ inrawinain kum 2015­16 sunga HSA CCPur College Unit thuoitu ding thlangna nei a nih. President in John Banyan Songate; Vice President in Hosea Lalremruot; Secretary in Jeneth Hrilrohnem, Asst. Secy. in Michael Paugoulian, Fin. Secy in Florence Lalthazuol le Treasurer in Edenmawi hai thlangtling an nih. Thlangtling thar hai hi Tv Lalthanzau, Vice President, HSA CCPur Jt. Hqrts in intiemkamna an neitir.

Thanlon GDS Employee Welfare Assn.
CCPur: October 17, 2015 khan Thanlon GDS Employee Welfare Association Office Bearer ding thlangna nei a ni a. Chairman in Pauminthang Guite, EDDA Hanship BO; V. Chairman in T. Langchinpau, BPM Bukpi BO; Secretary­ Samuel,  EDMC, Senvon BO; Asst. Secy. Lienboi, BPM, Leijangphai BO; Fin. Secy. in T. Ngaihau, BPM Hanship BO; Treasurer­cum­Infl. Secy. in Niangngaihlian,GDS Packer (Thanlon GDS); Member in Lalnghakzing (EDDA Pherzawl BO); Thongsuanthang (EDMC Sinzawl BO); T. Minlien (EDMC Pherzawl BO) le All BPM’s not mentioned above.

Dr Rochunga Pudaite sunna Taithu­ah
Tarik 11­-10-­2015 (Sunday) khan Mithi dar inriin, Taithu EFCI Biekin ah mipui fekhawmin Dr Rochunga Pudaite sunna hunser hmang a ni a, chu huna chun, hmangaitu’n Rouina ram tieng a lo inlawisan el ta chu, ngaiin mipuiruol nasa takin an tap a, chu chu hunser dittawk el lovin Tarik 19­-10 -­2015 (Thawleni) khan a vawihnina chu khawtlangin umni khamin SUNNA hunser ursun taka hmang nawk a nih.
   
Suntu mipui thahnem tak Taithu Community Hall kenglo rakin an fe khawm a, Pu Ro­chunga Pudaite’n mipui hmangaina leia English Modern School Taithu­ah an din thu le chu school­a inthawka naupang a zatel sukpuitling an ni thu le thang la hung thar pei ding h ai ta dinga hmasawnna le dawmkangtu a lo tlingzie hai hrilin, ralna sum le Taithu khawtlang, Taithu EFCI, NTP le Pu Chella haiin a ruong chunga inkhum dingin Thangsuopuon an pek bawk.Dr  Rochunga Pudaite in Taithu mipui a lo hmangaina le an ta dinga Mautam tampui hunah khawm fakding petu a nizie hai  mi tam takin tap uma inzawtin, dit khawplo takin sunna hunser chu suktawp a nih.
                                                                       
Manipur Police 124th Raising Day hmang
Imphal: Zanikhan 1st Battalion Manipur Rifles parade ground, Imphal­ah Manipur Police 124th Raising Day hmang a nih. Hi huna hin Manipur Dy. CM le Home Minister khuollienin a thang.
   
Hi huna Mr Shahid Ahmad, Director General of Police (DGP) Manipur in thu a hrilnaah, Manipur Police hi October 19,1892­a  Political Agent Crawford command­na hnuoia force chite chau State Military Police tia indin a ni a, kha huna khan personnel 463 chau an um a, chite­a intan nisienkhawm tuhin chu sanction strength 33,700 vel hung niin  India rama Police Forces tha tak hai laia mi a hung ni ta a nih tiin a hril.
   
Criminal and Criminal tracking network and system (CCTNS) hmangin India rama police station haia criminal record hai hmu thei a ni ta a, hi system hi nikum khan Manipur­ah MHA sponsored­na hnuoia hawng a lo ni ta a, Jiribam hmuna counter insurgency and anti­terrorism (CIAT) school hmang thei a ni ta ding thu; Police motor 150 haiah Vehicle tracking GPS device inbuk a ni ding thu a hril. Imphal Municipal area sunga suol dona dingin duty points 105 sie dingin department chun action plan a a siem mek a, hi taka ding hin police personnel 2500 hmang a ni ding thu; bazar area­ah CCTV 100 vel inthut a ni ta thu; Singjamei le Imphal east district market area haia CCTV tamlem inbunna dingin tender insuo vat a ni ta ding thu DGP Manipur chun a hril. 
   
Hi hun hmangnaa hin Cabinet ministers, Rajya Sabha MP, Parliamentary secretaries, MLAs,  Chief Secretary Manipur le Police Officers hai an thang tawl a, Police officers le constables sin thaw tha 33 hai kuomah Commendation le certificates inhlan an ni a, band pahni thangin  contingents 22 han march past an nei.

Nuhmei nau nei a thi leiin Hospital an suosam
Imphal: Zani zingkar khan Shija Hospital & research Centre­ah Ms Salam Ongbi Meenashwori Devi (30) w/o Salam Joy of Moirang Lamkai chun nau pasalte a nei a, sienkhawm nau a neizo hin Ms Meenashwori hi a thi a. Hospital thuneitu hai fimkhur naw lei a nih tia intumin nuhmei nau neinu sung hai chun zanikhan hospital OPD counter­a flower pot le thil dang dang an suksiet a, sienkhawm Police hai hungin buoina suok ding an control. 

EC in Bihar election fe meka inbuotsaina a ennawn
Patna: Chief Election Commissioner Naseem Zaidi chu Bihar­a inzinin Assembly election fe mek le inzawma 4th le 5th phase election hung um dinga insingsatna a ennawn. Mr Zaidi chun electio nei dinga insingsat danah a lungawi tawk thu a hrilin tuchena hin Expenditure monitoring Committee han Rs.38 crore an man ta thu a hril. November 1, 2015 khin Assembly Constituencies 55 le 4th phase election um a ta, November 5, 2015 in assembly seats 57 haiah 5th phase­ah election  um a ta, votes tla hai November 8, 2015 in tiem ning a tih. Tuta Bihar Assembly hi November 29, 2015 a tawp ding a nih.

J&K MLA Rashid pentui thekhum
New Delhi: Jammu and Kashmir Independent MLA Engineer Rashid chu zanikhan Delhi Press Club­ah tu ti hrietlo 3 han a hmaiah pentui an thekhum. Hindu Sena chun Rashid hmaia pentui thekhumtu hi anni pawl niin an hril. Rashid hi tuta thla bul laia Srinagar hmuna beef party a buotsai leia sawiselna nasa tak lo tuok ta le BJP MLA pakhatin Assembly sunga a lo bei met ta hnung a nih. Rashid pentui thekhum a ni le inzawm hin mi pahni Deepak le Dev Indra Singh hai chu hrentang an ni a, October 7, 2015 nia Srinagar hmuna Beef party a huoihawt leia Rashid chunga lungsen an ni thu an hril. 
   
Tuta hma met khawm khan columnist Sudheendra Kulkarni chu Pakistan foreign minister  Khurshid Mahmud Kasuri in lekhabu a tlangzar ding a buotsai pek leiin Shiv Sena workers han a hmaiah pentui an lo thekhum ta bawk.

Md. Akhlaq thattu hai man vawng
Lucknow: September 28, 2015 nia Uttar Pradesh­a Dadri hmuna Muslim hnama mi Mohammad Akhlaq (50) Bawngsa faa intum leia vuok hlum a nina le inzawma tuolthattua intum mi 10 hai laia a 9­na Hari Ram chu zani hmasa khan Sardhana town, UP­ah man a ni leiin hi tuolthatnaa intum mi 10 hai chu an engin man vawng an ni tah tiin zanita Police thusuok chun a hril.

Assam election hmain ULFA leh Accord
New Delhi: Assam Assembly election nei hma ngeiin ULFA (pro­talk) hai chun Accord an ziek hman tum a nih tiin sawrkar thusuok chun a hril. Central Goverment Interlocutor PC Halder le ULFA faction­a an chairman Arabinda Rajkhowa hai chun ULFA thil ngen hai thuah kartin deuthaw inhmuin an hriltlang mek a nih. November thla tawp chena an thil ngen hai sukpuitling pek an ninaw a, inbiekremna a um theinaw chun inbiekna fe mek chu an suktawp ta dingin ULFA tuta hma khan sawrkar an lo inhriettir ta a nih. Assam Assembly seats 126 haia inthlangna chu April­May, 2015 vela nei beisei a nih.

Colombia­a vuongna chin tla thlaah mi 4 an thi
Bogota: Zanikhan Colombia rama Bogota hmuna vuongna chin chi changsuolin a tla thla a, mi 4 an thi bakah midang tam tak an hliem niin Civil Aviation official thusuok chun a hril. Hi vuongna hi Bogota­a El Dorado airport­a inthawka vuongsuok niin a vuongsuok­a inthawk sawtnawte hnunga tla thla a nih. Hi thil tlunga hliem 12 hai chu bakery sunga um, vuongna tla thla in a del leia kangmei suokin a kang hliem an nih.

Slum area­ah In le dar tam tak a kang
New Delhi: Zani zingkar inhmatak khan outer Delhi­a Mongolpuri hmuna slum area lai kangmei nasa tak a suok a In le dawr tam tak a kang a, mihriem thi le hliem ruok chu an um nawh. Hi thil hi zani 2AM vela kha tlung a ni a, Delhi Fire service motor 28 han kangmei hi nasa taka an thel hnungin zani 7AM khan an thelmit. LPG cylinder puokdar leiin kangmei suok hi a suk hrat zuol nia hril a ni a, kangmei suokna san hriet a la ni nawh.

Meth le Heroin Rs. 308,00,000 manhu an man
Aizawl: Mizoram CID (Crime) hnuoia Narcotic PS staff hai chun Central YMA hnuoia SRS hai leh October 16­17, 2015 sung khan Methamphetamine Rs. 308,00,000 manhu ding CID (Crime) hnuaia Narcotic PS staff­te leh Central YMA hnuaia SRS­te chuan October 16­17, 2015 chhung khan Methamphetamine Rs. 308,00,000 manhu le Heroin Rs. 2,10,000 manhu ding an man. Meth hi Myanmar mi nia inhril Sanaung (47) s/o Liankunga, Phunthanga (37) s/o Marchiauva, Vanling (52) s/o Lianthup hai kuta inthawka an man a nih. Heroin hi Lalrinliana (31) s/o Zakhuma, Champhai Bethel Veng, tuta Bawngkawna um kuta inthawka an man a nih.

AR Headquarters thar March thla chena zo ding
Aizawl: Mizoram­a Assam Rifles headquarter thar ding chu March 31, 2016 vela zo hman beisei a nih tiin Mizoram Home Minister Lalzirliana chun zanikhan Mizoram Assembly an hriettir a, tuchena hin 92% zo a ni tah tiin a hril. Aizawl khawpui­a inthawk Assam Rifles hai sawndawk hun ding chu Ministry of Home Affairs kuta um a ni thu a hril bawk.
-------------------------------------------------------------------
VAWISUN THUPUI
Ieng lem Lalpa hmaa chun hung ka ta, Pathien chunghnung hmaa chun kun ka ta? Pumrawhmang thilinhlanhai, bawngte kum khat mihai leh a hmaa chun ka hung ding am a nih?   ­-Mika 6:6

Editorial
A sietna lai siemthatna hun tha

Sawrkar rorelna indiknaw lei le corruption leia mi pasie, harsa, hmelhriet tha le ruoltha nei lo han kawng iengkima harsatna le beidawngna tawpkhawk tawng a, ‘sepui ruo tuor’ an hril ang ela mani chanvo le dikna khawm inchu ngam khawpa hnawchep ei ni laiin Manipur Assembly in  Anti­Tribal Bills pathum a hung passed leiin chawp­le­chilin Tribal movement a hung suok a. Movement ei fepui mup mup mek hin ra tha hung insuo ngei sien, ei ram ro inrelna kawnga le politics thila siemthat a tulna lai siemthatna hunin hmang thei ngei inla nuom a um takzet. Hiengang hun tha hi ei tawng nawk tanaw el thei.
   
Sawrkar thlungpui chun Schemes le project tum tum fethlengin ei rama hmasawnna sin thawna dingin  kum tin sum a vaibelsie tel a hung pek a, sienkhawm sawrkarin sum le pai an seng (invest) ang hu chun ei rama hmasawnna hmel hmu ding a um naw bakah a umsun hai khawm a ni ding ang taka an sawr theilo deu vawng MLA hai sumbawm an chang deu vawng a nih. Entirna dingin cheng vaibelsie tel sengin CCPur khawpui sunga inthawk hnaite­ah Khuga Dam (multi­purpose) bawl a ni a, sum seng le tuchena mipuiin ei sawr tangkai dan chu an phu naw hle. Hiengang bawk hin project le scheme chi tum tum thawa um hai khawm an ni vawng ti inla ei hrilsuol ring a um nawh. CCPur khawpui sunga water supply scheme a ding khawmin sum vaibelsie tel seng a nita a, sienkhawm tui thienghlim chu hril lo, tuchen hin mipui chun insawpna le hmang ding tui mamaw tawk an la hmu theinaw zing a nih.
   
Sin zawngna kawnga ei ti le hlak chu thiemna neka Poltical fitness an lal lem leiin MLA mi le sa annawleh sawrkar­a che thei hai chau chan le beisei phak a hung ni a. Department tinah thiemna nekin political fitness a tling an tamlem a, pawisa in thil a thaw thei hle bawk. Hi lei hin lekhathiem, mipasie, ruoltha le hmelhriet tha nei lo hai chun sepui ruo tuorin an tuor tlawk tlawk el a nih. Ieng party le sawrkar khawmin an mi le sa hai an niphawt chun an tlin le tlinnaw an ngaituo nawh. Entirna dingin Police Department hnuoia sin lakna hai khawm ei hang en a, venghimna sin thaw tu dinga ringzo ding le zuk inhnempui ding um der lo tam tak, an mawng taksa an bieka intawl ta dam an nitawl. Hiengang bawk hin Education tienga khawm teacher sin thaw dinga inmawi lo tam tak teacher sinthawa thla tina a sing tel hlaw la tam tak ei um. Hieng hin chu sawrkar hin iengangin sawrkar school hai siem­that tumin hma la sienkhawm that hun nei ngainaw nih.
   
Sipai lakna, Police personnel lakna, education tieng nileh department dang danga sin lakna haia hin a thiem le tlin lak lo um hlak de hai sienla khawm a tam lem hi chu an thiem le tlin lei ni lo, political fitness a tling an ni tlangpui ti inla ei hrilsuol taluo ring a um nawh. Sin lakna chau ni lo, schemes dang danga hnuoia sin thawna le sawrkara hamthatna chi tum tum um hai khawm hi  a hmu ding awm le a chang ding awm hai nekin, MLA mi le sa hai ngei a changtu an ni nawk pei. Mi pasie le ruoltha nei lo hai ta ding chun hril a hai hle. Indiklo taka thil thawtu officials hai khawm an thilthaw suolna pholang theilo dinga thup puitu chu thlanglala um MLA hai bawk an ni nawk pei. Hi lei hin Department annawleh officials indiklo taka thawtu hai khawmin ti an nei naw a, huoisen takin mipui sum le mipui chan ai chu an mansa ah an thun ik ik el a nih. Media hai ta ding khawmin a harsa, silai dawt (a mu suokna tieng) chang ei nuomnaw a ni chun hre lo uma um kha a damdawi tak a hung ni el ta a nih. Thil hrim hrim hi a ni ding ang le a fe ding angin a fe tanaw hrim hrim ni takin an lang. Ei rama roinrelna indiknaw le corruption dang dang sukre a ni theina ding hin siemthat ding tam tak a um a, mimal annawleh pawl pakhat thaw el thei ding a ninaw a, mipui thahratna (peoples movement) a bei a ngai a nih.
   
Khawvela history ei en chun mipui harna am ei ti ding sawrkar rorelna indiknaw leia mipui helna tam tak hmu ding a um a, chu laia  inlar em em chu French Revolution kha a ni el  awm ie. French revolution hung intanna san kha iengdang lei ni lovin sawrkar rorelna indiknaw lei, mipui in an chanvo le dikna chang thei lo hiel khawpa sawisak le tax tam tak tak mipui laia dawl ani hlak leia mipui lungsen hung puokdar a ni tak.
           

Ei ram sietna lai siemthatna dingin tuta tribal movement annawleh peoples movement ei fepui mek hi hmang tangkai a tha el naw dim a nih! Movement ei tan hlima inthawk khan thil indiklo thawtu hai chu hril ngai lovin an hung inlang uor uor a, ei hmalakna sunzawm pei inla, thil indiklo le indiknaw taka thawtu, thamna latu, mipui zawrtu le a zawrtu hai popo a zunga inthawk  ei phawidawk vawng thei ngei beisei a um. People movement annawleh tribal revolution ei ti dim hrat taka a fepui lai hih  thil indiklo um hai a zunga inthawka phawidawkna hun tha a nih.  Bills 3 hai hnukkir a ni theina ding chau ni lovin ei rama corruption le thil indiklo hai a zunga inthawk phawidawkna huna ei hmang thei chun ei movement annawleh tribal revolution hi a hlawtling hlea ngai thei ning a tih. Tu hi huoisen tak le hrat taka thil thalo hai beiletna huntha le hun lawmum niin an lang.

Post a Comment

Powered by Blogger.