Hmasawnna Thar | 18 October, 2015

Dr Pudaite Funeral Committee in chanchinbumihai an inhmupui

A ruong sukchawl nuom khuo/VA han Oct. 21 chen hnina peklut thei

CCPur: Rev. C. Kawldinglien Joute, Chairman; Rev. Jessai L. Neitham, Secretary le Rev. Rohminglien Pakhuongte, Executive Member, Rev. Dr. Rochunga Pudaite Funeral Committee  han zani zantieng 2:30PM khan Rev. Dr. Rouchunga Pudaite Bungalow, Sielmat ­ah Dr Pudaite ruong hung phur le Sielmat­a vuina ding thuah tuolsung chanchinbumi hai an inhmupui.

   

Rev. Dr Rochunga Puidate ruong hi USA a inthawk CCPur hung phurtlung hun ding le a vui ni ding la hril thei naw hai sienkhawm a ropui thei ang taka vuiliem a ni theina dingin Funeral Committee le mipui chun PMS Bungalow, Sielmat­ah a vuina ding hmun an buotsai mek a, funeral programm Sielmat Christian Hr. Secondary School campus hmang dinga buotsai mek a nih tiin Rev. C. Kawldinglien Joute le Rev. Jesai Neitham han an hril. A ruong hung tlung hnungah zankhat ruong la sie ni dingin an hril bawk.

   

A tuom nuomtu hai ta dingin Sielmat Christian Hospital (PMS Bookroom) ah information­cum­Registration Centre hawng ning a ta, ralna thilpek inhlan nuom mimal le Organisation han October 21, 2015, 12:00 chenin zieka peklut thei ning a ta, hi thila ding hin Drop­Box khawm siem ning a tih.

   

Chun, Imphal le Sielmat inkara a ruong hung phur huna sukchawl nuom khuo hai chun khuo hming le sukchawlna ding hmun (contact persons mobile number leh) ziekin October 21, 2015, 12:00noon chenin peklut thei ning a ta, hi thila ding hin Drop­box siem ning a tih.

           

Sielmat Christian Hr. Sec. School campus­a sunna hunser hmang huna Joint Halleluijah Chorus  sak dinga riruong siem a ni a, hi thila ding hin Thalai Pawl le Choirs ieng kohran le hnam khawm  thang dinga fiel an ni a, incharge in Mr Bobby R. Songate (98627­41514); Upa Lalchelzing (8794574374) le Lalnghaisan Intoate (9774710755) hai ruot an nih.

KNO in martyrs hai Rs. 1 lakh in an ral

CCPur: P.S. Haokip, President, KNA/KNO chun zanikhan District Hospital­a JPO kutah martyrs hai ralna dingin Rs. 1 lakh le Saipikhup puon 9 an hlan.

   

P.S. Haokip chun martyrs sungkuo hai a tuorpui thu hrilin nuhmeihai hmalakna lawmum a ti thu a hril a, a thaw thei sun Rs. 1 lakh ralna a hung pek el a ni thu a hril.

           

UPF le KNO in Sept. 26, 2015 khan Grace Bible College­a Separate State ngen dinga thutlukna an siem hmain H. Calvin le T.S. Haokip (KNO/UPF delegation team) in New Delhi an inzin a, chu hnunga Separate State ngen dingin thutlukna an siem  a ni thu a hril. State hrana ei um hma tlangmi han hmasawnna ei hmunaw ding thu hrilin A­Z in inthe inla khawm tukhawm mihran ei um nawh tiin Haokip chun a hril.

NGMF in inhriettirna a siem

CCPur: Rev. Dr Rochunga Pudaite Funeral Committee in Dr Rochunga Pudaite ruong funeral programme­ah joint­a Halleluijah Chorus sak dinga Nationwide Gospel Music Festival (NGMF) mawphurna a pek le inzawmin October 21, 2015, 10:00AM khin Rev. Chawnga Memorial Chapel, Sielmat Christian Hr. Sec. School campus, Sielmat­ah Rehearsal nei dingin a ruot a. Hi huna hin NGMF in Choir Badge a lo pek ta hai khan mani badge bela kim taka thang seng dingin ngenna le inhriettirna a siem.

Sukdanglam a um nawh

CCPur: Joint Action Committee (JAC) against Anti­Tribal Bills chun October 19, 2015 a inthawk thuthar um nawk hmakhata hmang dingin aggitation schedule an insuo nawn nawk. Bandh inthlazal hun sukdanglam a ni naw a, 5AM­2PM la ninging a ta, Kangvai, Monglenphai, Lighthouse/Sielmat, Lamka Police Station, District Hospital, New Lamka Dorcas Road Junction haiah 2PM­5PM sung Dharna inthung ding, Total bandh/public curfew is from 5.00 pm to 5.00 am; School hai 12:00Noon chen hawng ding; band hin medical, electricity, telecom, water supply (excluding private service providers), media, bank le treasury hai huom naw nih.

WPF inrawinain tawngtairuolna

CCPur: October 20, 2015 (Thawleni) 7:00AM­12:00PM inkar sung khin Women Prayer  Fellowship (WPF)/CCPur hai hmalaknain­ “ Ka  hming put ka mi hai insukhnuoi a, ka kuoma an tawngtai chun a ram sukdam ka tih’ (II Chronicle 7:14) ti thupuia hmangin Public Ground, CCPur­ah  ram le hnam ta dingin tawng­tairuolna u m a tih. Hi huna thang ding hin WPCF chun mitin a fiel. Presider Miss May  Rose, President, WPFC ning a ta, tawngtairuolna inrawitu ding hai chu­ Rev. S. Vung Minthang, Gen. Secy, EBC; Pastor Lalropuia, Presbyterian, Saikawt area; Evan Lhunkhosei, Missionary promoter, ECA le Pastor Lalpienglawm, Evan­At Large, AG hai ning an ta, Pastor T. Remthang, Lamka ICI in tawngtainain hun khar a tih.

October thla sung Mortuary cabinet inthut hman beisei

CCPur:  District Hospital, CCPur Morgue­a mithiruong sawt tak vawng that theina dina Cold Storage/ Body Mortuary Cabinet inthut a ni theina dinga JPO in September 25, 2015 nia CMO/CCPur kuoma ngenna an pek chu CMO in October 1, 2015 khan State Mission Directorate (NHM), Directorate of Health Services, Lamphel, Imphal kuomah a peksawng a, Mr P.K. Singh, Commissioner (Health & FW), Govt of Manipur chun October 16, 2015 khan approved a thaw tah. Cold Storage hin Unit 2 um a ta, Unit 1 ah mithiruong 6 pei sie thei a ni ding a nih.

     

Mr Laldawnlien Varte, President, HYA GHQ chun, JPO in thlutlukna um dungzuia office tum tum sira an buoipui hnunga CMO le Imphal tienga Tribal Office hai hmalakna leia Cold Storage Unit 2 hmu thei dinga ei um na thuah lawmum a ti thu hrilin Sawrkar tienga intahwk hi thila ding hin Rs. 16,24,750/­ sanctioned a ni tah tiin a hril. 

           

Cold Storage/Cooler Machine hi , M/s Blue Star Limited, Guwahati a inthawk authorized dealer M/s R.S Cooling Appliances fethlenga lak dinga um a ni ta a. JNIMS le RIMS ti lo District hospital dang hiengang Cooler storage nei an la um naw a, process dan indik taka lak ding ni sien kum 3/4 hun a lut ding a ni a. Sienkhawm tribal martyrs hai ruong siethat theina dinga peoples movement fethlenga inrang taka hmu thei dinga um a ni a. October 2015 sung hin inthut hman beisei a nih tiin Pu Laldawnlien Varte chun a hril.

DC in M/s Vangsei Indane Gramin Vitrak a hawng

CCPur: Mr Lunminthang Haokip, IAS, DC/CCPur chun zani 8:00AM khan K. Salbung­a  M/s Vangsei Indane Gramin Vitrak Godown a hawng a, REv. Thangjakap Chongloi, Director, Youth & Music ECA in tawngtainain an hlan a, Stephen Chinkhanson Guite, Dy. Manager (LPGS, Indane Oil Corporation Ltd IOCL) in office a hawng.

           

M/s Vangsei Indane Gramin Vitrak, K. Salbung hin Tuibuong Kangvai area sung huop a ta, October 19, 2015 khin Booking Counter hawng ning a tih.

Tuilawng phum in Broadband a sukbuoi

CCPur: Tulai hin Churachandpur khawpui sung Tiddim Road zula chun JCB hmangin tuilawng (pipe) phum a ni a, tuilawng phumnaa hin BSNL Broadband connection nasa taka a sukbuoi hlak leiin Broadband hmangtu han harsatna nasa tak an tuok pha. Hi lei hin thuneitu han a sietna hmun zawngsuokin siemthat zung zung hai sien tiin BSNL broadband hmangtuhan an ngen.

Malaria positive 3

CCPur: District Malaria Department chun October 1­15, 2015 inkar sung khan damnaw mi 337 hai lain en enfel a, Malaria positive 3 an hmu a, Malaria PF an um nawh. Chun, zanikhan NVBDCP/CCPur chun Dengue ni dinga ring mi 10 chuong hai thisen enfel dingin an lak.

DMO thar dingin Dr Liankhozam Guite

CCPur: Thanlon PHC a i/c Medical Officer sin chel lai mek Dr Liankhozam Guite chu  District Malaria Officer (DMO)/CCPur dinga ruot a ni a, October 19, 2015 khin a sin thar ding hi chel tan a tih.

Tribals martyrs hai ralna a la lut pei

CCPur: Tribal Martyrs hai ralna sum a la lut pei a, zanikhan JAC hnuoia Finance Sub­Committe kutah khuo 2 haia inthawk ralna Rs. 7,800/­ a lut a, a petu hai chu Tipaimukh block­a Tuolbung Rs. 6,100 le Nagaland­a Kohima a inthawk Rs. 1,700/­ a nih.

           

 Chun, District Hospital­a JPO kutah Tribal martyrs hai ralna le thangpuina mimal le pawl 14 han Rs. 1,81,090/­ ; Puon 36 le Maibal pum 17 an inhlan. Zanita JPO kuta ralna petuhai chu Mrs. Nuamvung of Ngahthal Maibal 5, Mrs. Zenkhanneng of Ngathal Maibal pum 5, EBCC Dinthar, Aizawl, Mizoram Rs.20,000/­; Eimi IDBI Bank staff Rs.23,000/­; (L) Rev.Paulianthang Campus a um Numei tawngtai pawl (South Point) Rs.3,000/­; All Tribal Chief & Public Grivances Forum, Chandel Rs.10,000/­ le puon 8; Unau khat ihi (Whatsapp Group) 3,000/­; Kuki National Organisation Rs. 1 lakh le saipikhup 9; BDF EBCC Vengnuam, New Lamka in JPO hmang dingin Rs.1,000/­; Phailengmol Area Chief Assn.Saikul, Sadar Hills 14,000/­; Kolkota (Barackpur) a um Zomi sipai hai Rs. 6,040/­; Kuki Women Union, Koite Lui Block puon 18; Babupara/Jiribam Central Church, Tamenglong Dist 1,050/­ le Mary Baite of S.Munnuam maibal 7  a nih.

Tuilien le mimkei sawmdawlna Rs. Rs. 4, 46, 507/- hmu

CCPur: Zomi Relief Committe (ZoREC) in August thlaa tuilien le mimkei tlung leia harsatna tuortu hai thangpuina dinga mipui kuoma thangpuina sum an hmu chu Rs. 4, 09,007/­ le Bank Account­a lut Rs. 37, 500/­ niin a rengin Rs. 4, 46, 507/­ a ni a, hi laia ZoREC in sinthawnaa a hmang chu Rs. 1, 48, 841/­ a nih. Thangpuina petu hai kuomah ZOREC chun lawmthu a hril. Remchang dinga ngai leiin thuomhnaw khawnkhawm bag 60 le bufai bag 100 hai chu Manipur­a mi hai kuoma pek ding le pawisa sum hmu hai chu Myanmar­a Zohnathlak hai sawmdawlna dinga pek dingin ZOREC chun a rel bakah KKL le thangruola hieng thil hai hi sem dingin an rel bawk.

Headline

CM in Imphal-ah RBI Sub-Office a hawng:  RBI in NE states 5 haiah office a nei tah

Imphal: Manipur Chief Minister O.Ibobi Singh chun khuolliena thangin zanikhan Manipur Legislative Assembly Office bul, Thangmeiband Lilasing Khongangkhong hmuna Reserve Bank of India (RBI) Sub­Office a hawng. RBI Sub­Office permanent building ding hi Mantripukhri hmuna ram acres 5­a lienah bawl mek a ni a, bawlzo a ni hma po Chairman, HAC, Manipur Office bungalow­ah office hi lo hawng phawt a nih.

   

CM in RBI Sub­Office a hawngnaa thu a hril hunah, state sawrkar chun Manipur ­a RBI Office hawng dingin kum 4 liemtaa inthawka kha sawrkar thlungpui kuoma a lo ngen ta a ni thu hrilin   RBI Sub­Office hawnga um hin state sunga banking system nasa taka a hung siemtha ding bakah non­banking financial corporation hai khawm a hun taka enfel thei an hung ni ta ding a nih tiin a hril a, Manipur state sunga tlangram biel haia khawm Bank tamlem hawng dingin RBI a ngen. Hi huna hin Manipur CM chun RBI website a hawng nghal bawk.

   

RBI Sub­Office hawngna hi RBI Deputy Governor HR Khan khawmin a hung uop ve a, RBI Sub­Office hawnga um hin financial literacy le financial inclusion tiengpang a ngaipawimaw zuol ding thu a hril. Farming sector, handloom sector le a dang dang haia mipui tamlemin an sawr theina dingin RBI chun Bank tamlem hawng a ni theina dinga hma a lak ding thu a hril.

   

RBI sub­office hawngna hi Chief Secretary O Nabakishore; Executive Director RBI Dr. Deepali Pant Joshi, Regional Director RBI North Eastern Region SS Barik; Hauzel General Manager (Imphal Branch) le midang dang khawmin an uop ve. Imphal hmuna sub­office hawng a ni le inzawm hin RBI chun tuchena hin NE states 5 haiah office an nei ta a nih.

Aadhar Card siempek ding tia mi hlemtu man

Imphal: Zani zingkar khan Porompat SDO office thawktu hai chun Aadhar Card siem pek ding tia mi kuoma pawisa latu Md. Jamir Alam (35) s/o Md. Moinudin of Minuthong Hapta Mana Inkhol of Imphal East chu an man a, Porompat Police kutah an peklut.

   

Md. Jamir hin Census officer nia inhrilin Aadhar Card siem pek ding tiin mi thenkhat kuomah Rs. 300­ Rs. 1000 inkar a lakpek hlak niin SDO Imphal East L. Delina chun a hril. Md Jamir hi Lamlong Hr. Sec. School­a Aadhar Card le inzawma awareness buotsaia pawisa lak a tum laia man niin a hril.

MSS Officer thenkhat sin chel ding

Imphal: Manipur sawrkar chun MSS Officer thenkhat sin chel a sukdanglam. Hienghai lai hin Vanlalfel chu Under Secretary (Power); R. Lalthanliana chu Under Secretary (GAD); Ms Zarzokim, Under Secretary (Hr. & Tech Education) sin chel dinga ruot an nih.

Delhi­ah kum 2 le kum 5 mi suollui

New Delhi: New Delhi a chun zani hmasa khan Nangloi area hmuna nuhmeite kum 2 mi le kum 5 mi hai chu an ina inthawk thuoihmangin suollui an nih. Nuhmeite pahni hai hi park pakhata khaw hre loa uma an va hmu an nih. Hi thil tlung le inzawm hin Delhi CM Arvind Kejriwal chun vawisun hin Lt. Governor Najeeb Jung inhmupui a tih.

Non­ Gazetted thawktu hai bonus

New Delhi: Sawrkar thlungpui chun Central Government thawktu Group C and D le non­gazeted (Group B) hai kuomah 30 days emolument “ad­hoc bonus” pek dingin a puong. Ad­hoc bonus hi Central Para­Military forces le armed forces hnuoia thawktu hai khawmin an dawng ve thei ding a nih tiin Finance Ministry thusuok chun a hril.

MHA in enquiry thaw dingin CAG an hriettir

New Delhi: Tulai hnaia Income Tax le Enforcement Directorate han lottery scam le inzawma inzawma Kolkata le Siliguri haia hmun tum tum an dapnaah Rs. 50 crore zet an dap dawkna le inzawmin Sikkim, Mizoram le Nagaland state hai khawm inhnamhnawina an nei nia hril le inzawmin Union Home Ministry chun Comptroller and Auditor General (C&AG) chu inquiry thaw dingin an hriettir. Hieng sum mana um hai hi Bihar election huna vote inchawknaa hmang tum niin hi scam suizuitu hai chun an hril.

MLPLC hmang hnungin tax Rs. 24,82,82,107/­

Aizawl: Mizoram Liquor (Control & Prohibhition) Act hmang a na inthawk hi dan bawsetu mi 1,495 hremna pek an ni ta thu le hi Act hmang hnung hin Mizoram­ah Zu zawrna dawr 22 a um tiin Mizoram Excise & Narcotic minister R. Lalzirliana chun a hril. Chun, Zu inchawk theina permit mi 56,631 pek an ni ta thu a hril bawk. Permit siemna ding hin Rs. 520 seng a tul a, permit hmangsuol leiin mi 507 man an ni ta a, Zu zawr phalna dan hmang a nia inthawk Zu­ah tax (sie) Rs. 24,82,82,107 sawrkarin a hmu tah tiin Lalzirliana chun a hril bawk.

Conrad Sangma in GHADC CEM

Tura: Tulai hnaia Meghalaya­a Garo Hills Autonomous District Council (GHADC) inthlangnaah National People’s Party (NPP) chu party mala tling rawn tak an ni a, NPP chun   PA Sangma naupa Conrad K. Sangma (unelected MDC) chu GHADC Chief Executive Member (CEM) dingin an ruot. GHADC election­a khan seats 30 umah NPP in seat 10 an lak a, Garo National Council (GNC) 3, BJP 1 le Independent MDC 3 han sawrkarna siem tumin zani hmasa khan Garo Hills Progressive Alliance an indin a nih.

Heroin kg. 14 le Ganja kg. 134 an man

Amritsar/Ramnathapuram: Border Security Force (BSF) chun Pakistan le ramri­a Channmulla sector­ah Heroin kg. 14, market rate­ah Rs. 70 crores manhu zet ding an man. Heroin hi BSF night patrolling­a fe han an man a ni a, Drugs a sumdawngtu han Pakistan rama inthawk India ram fencing sungah an hung denglut nia hril a nih. Hi thil le inzawm hin mi man ruok chu an nei nawh.

   

Chun, zani hmasa zan khan Police­a ‘Q’ branch patrolling­a fe han S. Pattinam hmunah Ganja kg. 134, Rs. 80 lakh manhu vel ding Sri Lanka rama phurlut tum an man. Ganja hi In pakhat compound sunga an va man a nih. Hi le inzawm hin In neitu an man bawk.

AP CM in minister 5 a ban

Itanagar: Arunachal Pradesh Chief Minister Nabam Tuki chun zani hmasa khan ‘absentee’ le ‘non­performing’ minister 5 hai a ban. Minister a ban hai lai hin thla 17­a upa a ministry­a a ruoltha Chowna Mein (Agri & Hort minister) khawm a thangsa. Minister­a inthawka ban dang hai chu Social Welfare, Women & Child Development Minister Wanglin Lowangdong, Panchayati Raj & Cooperation Minister Kumar Waii, Food & Civil Supplies Minister Kamlung Mossang  le Civil Aviation Minister Thangwang Wangham hai an nih.

   

Minister 5 ban an ni le inruol hin Jomde Kena, Phurpa Tsering le Tirong Aboh hai chu minister in a laklut a, Governor JP Rajkhowa hmaah sesamna an nei nghal. Minister bana um hai hi New Dehi­a inkul mek an ni a, thla khat lai zet an sin thaw ta lova um an nih tiin Tuki chun a hril.

Tiffin bomb pahni dapdawk

Berhampur: Zanikhan Gajapati district­a Maoist hai hratna biel Adava hmuna Security forces han tiffin bomb pahni an dapdawk. Tiffin bomb hai hi Kattama­Baliganda lampui­a CRPF  han dappui an thaw huna dapdawk an ni a, Maoist helpawl hai kam ni dinga ringhla a nih. Tiffin bomb pahni haia bomb um hi kg. 47 zeta rik a ni a, meihrui, detonators le batteries hai le intlungzawm vawng an nih. Bomb hai hi inrang taka puok theilo dinga siem an nih.

--------------------------------------------------------------------------------------------------------

VAWISUN THUPUI

Kei ruk chun lawmthu hrilna rawl leh i kuomah inthawina inhlan ka ta; Thu ka tiem ta chu hlen ka ta, Sandamna chu Lalpa ta a nih,” tiin    ­Jona 2:9

Editorial

Thangpui ngaihai sawmdawl

Khawvel mihriem hai hin hri­le­hrai le tampui hai ei tuor hlak ang bawkin khuonu rel sietna (natural calamities) hieng thlisie, mimkei, tuilien le a dang dang ei tuok hlak a. A la tuok ngailo hai ta ding chun a rinum le harsatzie hrietthiem thil harsa tak a lo ni el thei. Sienkhawm, khawvel hun nuhnung tienga um ei nita lei amani ding khuorel sietna hi a pung tuol tuol a, hi lei hin mitinin ei tuok ve thei zing thil an nih ti ruok hi chu ei hrietthiem nuom a um. Khawvel a tha tanaw a, ni danga thil la tlung ngailo le ei hmu ngai lo mimkei, tuilien le thlisie hai ei tawng tan mek a nih. Khawvel boruok sik le sa inher danglam dan en hin nidang ang kha a ni ta nawh ti chu chieng taka hriet thei a nih. Boruok Sik le sa inthlakthleng (Climate Change), Global Warming (khawvel lumna zuol pei) leia khawvel boruok sik le sa hi nasa taka hung inthlakdanglam a nih.  Hieng Climate Change le Global Warming hai leiin ni danga ruo sur huna sur ta lova thal rum ei tawng rawn takzie dam hi ngaituo tham tak a tling ta a nih. Ei la tuok ngailo thlisie, ruopui le tuilien hai dam hi ei inringnaw huna tlung le tuok thei ei nih.

   

Hi lei hin sietna le harsatna tuok ei um chang hin thei ang anga ei inthangpui le insawmdawltuo zung zung a tul. Mi tuok ang khah eini chunga khawm tlung thei a ni leiin in enliem el ding ei ni naw a, thaw thei ei nei ang anga inthangpui le insawmdawltuo hlak ding ei nih. Hiengang khuorel sietna tlung leia harsatna thu chau ni lovin mani sinthawna hmun annawleh thil dang danga harsa hai thangpui le sawmdawl rawp hi Kristien hai thaw ding hrim a ni bawk. Mi thenkhat chun thil chinchang hre rak lo hai chu an hrietnawna hrilfiea thangpui nekin mani mimal hlawkna dinga remchanga hmang nuom ei um hlak. Hi hi thil thalo tak a ni a, sim ngei dinga tha a nih. Mi’n ei thangpuina an mamaw huna thangpuina ei pek hai hi Pathienin a hriet a, chuongang bawkin thangpuina hai hi a dawngtu han an theinghil el ngai naw a, malsawmna an min phur hlak. Chuleiin ei thangpuina kut hai kha thlawnin a bo el naw a, a hun takah a hung inlang hlak. Hieng a ni lei hin thangpui ngaihai thangpui le sawmdawlna pek hi mi ta ding ni lovin mani ta dinga thaw ei nih ti ei hrie a, phur taka thaw ding a nih.

   

Thangpui ngai  siet tuok hai chu Kristien an ni am, an ni naw am; ei sung le ei hnam chanpui an ni am, an ninaw am; an vangduoina le siet tuokna haia thangpui le sawmdawlna pek chu ei mawphurna a nih. Ringnawtu an lo ni lem chun sawmdawlna le thangpuina pek hi Kristien hai chun ei ching dinga mawi, Missionary sin ropui tak ei thawna a nih ti hi ei hriet thar nuom a um bawk. Ramthim, ringnawtu hai chengna rama missionary tir chau hi Pathien ram suklienna dinga ei ngai a ni chun ei ngaidan chu an diknaw hulhuol ning a tih. Chun, mitin ramthimah rawngbawl dingin ei fe thei naw a. Sienkhawm mani um hmuna khawm rawngbawlna ding annawleh missionary sin thawna ding tam tak a um. Ringnawtu han ei chetzie le nundana inthawk Kristien ni an nuom a, an inlamlet theina ding khawpa Kristien hai hi nundan tha ei nei a ngai.

   

Thangpui ngai hai sawmdawlnaa kawnga inphalna hi hausak le pasiet thu a ni nawh. Khawvela hin mi hausa tawntaw tam tak an um a, an inphal vawng kher nawh. CCPur district a ngei khawm mi hausa iemanizat ei um a, sienkhawm an inphal dan an chen naw tawl hle ang bawkin mi ngaihlut le inza an ni dan khawm an thlau hle. Khawvela mi hausa tak Bill Gates dam hi a hausak leia inlar le mi inza ni lovin thangpui ngaihai sawmdawlna kawnga sum le pai senga Philanthropic sin nasa taka a thaw leia ngainat hlaw le inlar a ni lem ti inla ei hril suol taluo ring a um nawh. Ama chau ni lovin Hollywood stars Angelina Jolie le Brad Pitt hai le celebrities dang danghai khawmin mihriemhai ngirhmun dawmsangna ding le harsa le riengvai hai sawmdawlna dingin sum le pai sengin Philanthropic sin an thaw nasa em em. Anni hai rawi sum thawlawm leiin ei rama khawm NGO tam tak hung piengin mi tam takin ei sawr tangkai zing a nih. An inphalna leiin an tlase chuong naw a, chu nekin mi inza le ngaisang an hlawin an inlarna a pung tuol tuol lem a nih.

   

Mi inphal, thanpui ngai le sawmdawl ngai hai chunga mi tiktlai hai hi mi thangpuina an mamaw huna theinghil an ni ngainaw a, nasa taka sawmdawl an ni hlak ang bawkin Pathien khawmin a theinghil naw a, an mamaw le tul huna thangpuitu ding a pek ngei hlak. Hiengang hun hi mi tam tak chun ei tuok ta ngei khawm ring a um. Hi lei hin mi harsat le sawmdawl an ngai huna sawmdawl hi rin ding a ni nawh. Mi i va thangpui le sawmdawl hai khan an chunga thil i thawna kha an thungrul kher che a tul naw a, khaw laia inthawkin amani thangpuina kut Pathienin a hung rawl ding a nih. Ei kut rawlna ding chu mimal, pawl, kohran le a dang dang khawm a ni thei. Mi chunga that ei insuona hai leia annia inthawk beisei nei ngai ding a ni naw a, hmangaina indik a ni nawa, Pathien dit dan a ni naw bawk. Phut let annawleh annia inthawka beisei let ve ei nei chun ei beisei anga thil a hung tlung naw huna ei lungril a na hlak. Chuleiin beisei let nei ngai ding a ni nawh.