Tuolsung
HAA in Dr Pudaite an sun thu an puong
CCPur: October 10, 2015 nia fam lo chang tah Rev. Dr Rochunga Pudaite (88) chu Hmar hlamihai (Artistes) po po aiawin Pu Lalsuong Famhoite, Gen. Secy. Hmar Artistes Association (HAA) GHQ, CCPur Manipur chun an sun thu a puong. A thina hi channa nasa tak a ni thu; Hmar bungpui, Hmar Arasi lien, Hmar Thu­le Hla khawvela vawrdartu ropui tak, Ziektu ropui, Fahra le rimsi hai dawmsangtu a ni thu hrilin, 1950 ­60 laia dai taa Gramaphone hmnga Hmar hlahai sukdartu a ni thu hai an zieklang. A theina hai inro lova ram le hnam ta dinga inhlan hlaktu, hlaphuok rawn, hlaphuok thiem, hlasak thiem hai chawimawina hun ropui tak a buotsai pekna hai ropui a tiin HAA chun a theinghil ngainaw ding thu hai an zieklang a, a maksan a nuhmei, a nauhai le a tu le te hai lusunna HAA in an tuopui takzet thu a zieklang bawk.

JPO kutah Rs. 17,600/­ le JAC kutah Rs. 46,100/­
CCPur: Tribal Martyrs hai ralna dinga JAC Finance Committee in In tina Rs. 100/­ an dawl chu zanikhan khuo 6 haia inthawk Rs. 17,600/­ a lut belsa nawk. Zanita JAC kuta ralna sum petu hai chu­ Henglep block hnuoia Nungsai Rs.2,500/­; N. Leitan Rs.1,000/­; Munpi Rs.6,600/­; Santing (L) Rs.5,000/­; Suangpha Rs.1,000/­ le Lamka block a T. Lhangnuam Rs.1,500/­ hai an nih.
     
Chun, JPO kutah zanikhan mimal le organisations 7 han martyrs hai ralna Rs. 46,100/­; Jumpin 20, Mask 200 an pek. Zanita ralna le thangpuina sum petu hai chu­ Miss Cicily Zou, Delhi Mask 200; EBC Thanlon Division 26,500/­; Rev Dino & Family le Rev Gintneithang & Family, Chiangmai, Thailand 10,000/­; Miss Zamzachiin, Gouchinkhup Veng, New Lamka 1,000/­; P.Nengkhanlian of Bungmual in JPO hmang ding Rs.500/­; B. Muan Ngaihte in Jumpin 20 le  SSA Primary Teacher Assn./CCPur in Rs.8,100/­ a nih.

Kerala Bamboo Fest 2015 a thang thei
CCPur: Department of Industries & C ommerce, Govt. of Kerala chun December 4­8, 2015 sung khin Marine Drive, Ernakulam (Kochi) hmuna “Kerala Bamboo Fest 2015” a huoihawt ding a ni a, Manipur state­a inthawk hi Fest a thang nuom hai chun Oct. 28, 2015 chen khin Director, Commerce & Industries, Manipur office­ah thu chieng lem hriet thei le hnina pek thei ning a tih. A thang hai TA/DA pek ning an tih.

Dr Pudaite phumna ding cho mek a nih
CCPur: October 10, 2015 nia Colorado Springs, US­a fam lo chang tah Bibles For the World founder le president hlui Rev. Dr Rochunga Pudaite ruong Sielmat, CCPur­a vui dinga hung phur a ni ding le inzawmin Sielmat Val Upa hai inrawinain tulai hin ama (Dr Pudaite) Bunglow tlangah tlangval­nunghak han thlan an cho mek. Thlan hi ft. 9 a sei, ft. 5 a lien le Feet 12 a inthuk a cho tum niin ei thu dawngna chun a hril. A ruong sunna le inthlana October 17, 2015 hin US­ah BFW in an nei ding a ni a, hi zo tieng hin a ruong hung phur a ni ding a ni a, hung phurtlung a ni ding hun ruok chu hril thei a la ni nawh. A ruong hung phur ding le inzawm hin Sielmat le Khawmawi khuo haiah Welcome gate siem tum a nih tiin ei thu dawngna chun a hril.

St. Peter’s School thangpuina an pek
CCPur: PTC GHQ,YPA GHQ le  SSPP GHQ chun zani 11:00AM khan Vengnuam, New Lamka­a St. Peter’s School an va kan a, an school meiin a kang leia thangpuinain L. Nenglianlal kuomah Chini kg. 50 le Bawngnene (everyday) box 1 an inhlan. PTC GHQ President L. Pumlianpau chun October 13, 2015 zana school meiin a kang chu hieng pawl pathum hai hin an tuorpui hle thu hi huna hin a hril. Student hai hi zinga ei khawtlang, ram le hnam thuoitu la hung ni ding an ni leiin anni hai lekha inchuknain rawa a um chu thil tha lo tak a ni thu le hiengang thil  tlung nawk tanaw sien a nuom thu a hril.


Ladies Grace Camp zo a ni tah
CCPur: Ladies Prayer Fellowship (LPF)/CCPur huoihawtnain October 12, 2015 a inthawk October 15, 2015 inkar sung khan Gilead Prayer Mountain, Kawnpui hmuna “Ladies Grace Camp 2015” a vawi 6­na nei a nih. Zani zantieng khan Rev. Lalthantluanga chun Gilead Prayer Mountain­ah tawngtainain camp hi a khar. Camp hun sung hin Rev.Dr.Kh. Khaizakham le Ms Chingngaihlun han thu an hril a, Camp­a hin nunghak kum 30 le a chungtieng mi 27 an thang.

T.  Vaiphei Gauhati High Court Chief Justice thar dinga ruot
New Delhi: Ministry of Law and Justice (Department of Justice), Govt. of India in October 14, 2015 nia thusuok a siem dungzuiin Justice Tinlianthang Vaiphei @ T. Vaiphei chu Gauhati High Court Chief Justice thar dinga ruot a nih. Tuta Gauhati High Court Acting Chief Justice ni lai mek Justice Karanam Sreedhar chu October 21, 2015 hin a pension ta ding a ni a, hi le inzawma T. Vaiphei hi Gauhati High Court Chief Justice thar dinga ruot a nih. T. Vaiphei hin February 28, 2018 chen service hun a la nei a nih.
           
T. Vaiphei hi kum 1976­a Nowrosjee Wadia College, University of Poona hnuoia BA zo, kum 1979­a Campus Law Centre, University of Delhi­a inthawk LLB degree la a ni a. August 22, 1980 khan Bar Council of Assam­ah inzieklutin law a practice tan a, CJM, Munsiff le Dy. Commissioner/District Magistrate, CCPur, Manipur hai 1980 khan a lo chel ta a nih. Kum 1990 khan Gauhati High Court, Imphal bench ah practice tanin, service dang dang a thaw hnungin 1997 khan Mizoram­a in sawnin October 16, 1998 khan Defene Pleader in a um a, February 12, 1999 khan Asst. Advocate General of Mizoram; March 8, 1999 in Public Prosecutor hai a chel a, September 15, 2000 khan Addl. Advocate  General, Mizoram a ruot a ni a, February 9, 2001 khan Legal Adviser, Mizoram Co­Oprative Apex Bank a ruot niin July 17, 2003 khan Addl. Judge, Gauhati High Court a ruot le February 28, 2005 a inthawk khan Permanent Judge a hung ni ta a nih.

Heart patients 9 kuomah thangpuina Rs. 25,000/­ seng pek
Imphal: Manipur Heart Foundation sponsored­nain zanikhan Classic Hotel, North AOC, Imphal hmuna Sky Hospital le thangruolin Financial Assistance distribution function hmang a nih.
   
Hi huna CM O.Ibobi Singh in thu a hrilnaa chun, ei khawtlanga health sector­a harsatna hi state sawrkar khata a enkawl le hmasawn zo ding a ninaw a, sawrkar le private sectors han Health le Education sector­a harsatna hi ei ei dotlang a tul a nih tiin  a hril. Ieng anga him le muongna hmuna um hai khawmin nikhat chu an hmangai an sung le kuo hai an la maksan tho ding, a var le thiem tak hai khawmin thina hi an pumpel thei lo a nih tiin CM chun a hril.
   
Manipur mipui hmakhuo ngaina leia London maksana Manipur­a sin hung thaw Dr L. Shyamkishore inpekna le a hmalakna lawmum a ti thu; riengvai le chanhai, BPL sungkuo Manipur puotienga damdawi pan thei lo hai sawmdawltu philanthropist hai chungah lawmthu a hril bawk.
   
Hi huna hin CM chun BPL sungkuoa mi heart patients 9 hai kuomah financial assistance Rs. 25,000/­ sengin a sem a, CM chun a discretionary fund a inthawk Manipur Heart Foundation  kuomah Rs. 1 lakh an hlan.
   
Hi huna hin President, Manipur Heart Foundation Chairman le Chief Cardiologist, Sky Group of Hospital Dr L. Shyamkishore;PHED, Labour and Employment Minister I. Hemochandra Singh hai functional president le guest of honour in an thang.
   
Manipur Hearth Foundation hi March 3, 2013 a indin a ni a, tuchena hin district tum tum haiah seminers hai an huoihawt ta bakah Full fledged Heart Hospital indinin state sunga pasie le BPL sungkuoa lung tiengpang (heart) natna nei hai enkawlin kum 13 le a hnuoitieng naupang hai ta dingin district levels free heart camps hai an huoihawt hlak a nih.

NSCN(IM) in demand points 50 an siem
Imphal: NSCN(IM) chun sawrkar le Framework Agreement an ziekna le inzawma meeting hmasa tak an nei huna phar dingin thil ngen points 50 an siem. Chu hai chun Naga Inhabited Areas (NIA) haiah election system hran; Nagas ram sungah village patta ti lo Govt. Patta land bandi annawleh order system um lo ding; villages le tribal level­ah Naga Customary Laws hmang zawm pei ding; Naga ni lo NIA hnuoia um han Naga Customary Laws an zawm ding; NIA hnuoia dan dang um lo ding; Naga Trial headquarters tinah Naga Customary  Court a um ding;  an history 1951 based a Republic day hran nei ding le a dang dang bakah NSCN(IM) chun Naga areas sungah Christianity ti lo sakhuo dang um lo ding; Naga helpawl inpe hai a bik taka sawmdawlna dingin Naga Rifles Battalion (NRB) hran; LS MP 3 le RS MP 3 bakah Naga Assembly House ah MLA seats 30 a sukpung ding ti le a dang dang hai points/ proposal an siem lai a thang niin Imphal Times chun a zieklang.

Bomb pahni puokah mi 1 a hliem
Imphal: Zani zingkar 9:30AM vel khan Tiger Camp le Uyumpok purum Pangaltabi, Imphal East haiah helpawl hai kam ni dinga ring Improvised Explosive Device (IED) bomb pahni a zawnin bomb a puok a, Md. Amid Khan (37) s/o Md. Jamir Khan of Uyumpok Purum Pangaltabi chu a vawitieng kutah na rak loin a hliem. Zani zingkar khan bomb ni dinga ring hmu a ni a, 8:30AM vel khan Sagolmang Police le 16­Assam Rifles hai kuoma report pek a ni a, bomb a ni le ninaw enfel a ni mek laiin hi hmuna inthawk metres 100 vela hlana hmuna hieng bomb pahni hai hi hung puok nia hril a nih. Hi huna hin bomb puok lo RDX kg. 1.5 a rik, detonator , 9 volt batterie, spinder kg. 3 a rengin kg. 4.5 dapdawk a ni a, pawi tawk nawna ding hmuna zani 12:45PM khan sukpuok a nih.

Prof. Laldena ‘Scroll of Honour’ inhlan ve
Imphal: October 11, 2015 khan  Senior Citizens for Society, Manipur (SCSM) chun 11th Annual General body meeting an nei a. Hi huna hin Manipur­a senior citizen 4 hai kuoma chawimawina ‘Scroll of Honour’ inhlan an ni a, mi 4 hai lai hin Prof. Laldena khawm a thang ve. Inchukna tieng le society­a a contribution hai leia chawimawina hi inhlan a nih. Midang 3 chawimawina inhlan hai chu Manipur CM hlui Rishang Keishing, (L) C Opendra Singh, retd district and session judge, Md. Abdul Razaque, retired professor of RIMS, Imphal hai an nih. (Virthli)

Hmun hran hrana helpawl 4 man
Imphal: October 14, 2015 khan khan 12 Bihar regiment han NSCN(K) cadre SS. Pvt. Gaimoipou of Dangmei (24) s/o Ningpha Dangmei of None Part­I Tamenglong district an man bakah NH­37 a motor inlawn hai an dapnaah NSCN(K) cadre SS 2nd Lt Chamding Kamei @ Chakamei (43) S/o (L) Kalanglung Kaimei of Tamenglong  district hai an man a, Lamphel Police kutah an peklut.
   
Chun, Oct. 15, 2015 khan Takyel hmuna UNLF cadre SS Sgt Aheibam Angouba @ Bulu Meithai s/o (L) A. Dewan Meithai of Takyel Kolam Leikai an man a, Lamphel Police kutah an peklut; Bishnupur Police commandos hai le thangruolin 12­Bihar regiment han Nambol bazar­ah UNLF cadre SS Corporal Kh. Kiran Khahanganba (28) s/o Kh. Phajabi of Heirok Mayai Leikai  an man bawk niin zanita PRO, Assam Rifles thusuok chun a hril.

Darkar 48 bandh thaw an tum
Imphal: Agust 18, 2015 zanril­a inthawk hin Manipur hill district­haiah Darkar 48 sung Bandh an thaw ding niin JAC against the killing of Khupneilal Neihsiel and Robert Hesei Kipgen chun zani hmasa khan an puong. January 28, 2015 nia KNF le 8­AR hai Kadangband hmuna an inkaptuo huna hieng mi pahni hai hi kap hlum an ni a, hi thina thuah magisterial inquiry thaw dinga sawrkarin a ti, tuchena iengkhawm a la thaw naw leia a dodalnaa Bandh hi thaw an tum niin an hril.

Heroin grams 12.5 leh mi 1 man
Aizawl: Mizoram Excise and Narcotics department hnuoia Anti Narcotic Squad chun zanikhan Aizawl hmuna Ms Lallawmkimi (38) of Sesih, Mizoram­Myanmar ramri, Champhai district chu Heroin grams 12.5 leh an man. Heroin hi Myanmar­a inthawka a hung phur a ni a, Narcotic Drugs and Psychotropic Substances Act, 1985 hnuoiah case siem khum a nih.

Dr Kalam Memorial indin ning a tih: PM
New Delhi: Zanikhan India President hlui (Peopkle’s President) Dr APJ APJ Kalam piengchampha a vawi 84­na a ni a, PM Narendra Modi chun inzana pein Dr Kalam chawimawina ding le thangthar hai suk thatho na dingin a piengna Rameswaram hmuna memorial indin ning a tih tiin zanita DRDO in famtah Dr Kalam puola function an buotsaia thu a hrilna huna a hril. PM chun DRDO Bhavan hmuna APJ Abdul Kalam lim (statue) bakah ‘A Celebration of Dr Kalam’s Life’ ti photo exhibition a hawng bakah Dr Kalam lim chuongna Stamp a tlangzar bawk. a ni ding thu a hril. 

Jammu­ah terrorist 2 kap hlum
Jammu: Zani hmasaa Security forces han Jammu & Kashmir­a Doda district sunga Bhagwan ramhnuoia dappui an thawnaah helpawl hai leh an inkaptuo a, inkaptuonaa hin helpawl 2 kap hlum an nih tiin Police thusuok chun a hril. Kap hluma um hai hi SPOs, Doda Police lines a inthawk an rifles hai le tlanhmang, a hnunga Hizbul Mujahiddin zawm an nih tiin ei thu dawngna chun a hril. Inkaptuona hmuna hin ralthuom le silaimu tam tak dapdawk a ni bawk.

Mi 5 damsung lungin intang dingin
Jajpur: Odisha –a Additional and Session Judge Rohitlal Panda chun April 3, 2012­a Upper Baruan village –a sumdawngtu Shaikh Sajan thatna le inzawmin mi 5­ Meherban Ali, Sultan Ali, Bebula Ali, Liaquat Ali le Irfan Ali hai chu damsung lungin intang dingin thiemnaw an changtir. Shaikh Sajan hi a chengna ina mobile phone­a mi a biek laia kap hlum a ni a, hi thina thua hin mi 8 chunga case siem a ni a, mi 5 man an ni a, pakhat chu tuta hma met khan a thi a, midang 2 hai chu man lova la um an nih.

Diesel man sukpung a nih
New Delhi: Indian Oil Corporation chun zani zanril­a inthawk khan Diesel man chu litre 1­ah paise 95 in a sungpung a, Petrol man ruok chu sukdanglam a ni nawh. Hi dungzui hin Diesel litre litre 1­ah Rs. 44.95 ni hlak chu Rs. 45.90 ni tang a tih. Tuta thla sunga Diesel man sukpung a vawihnina a ni tah. Oct. 1, 2015 khan 50paise a sukpung a lo ni tah.

SI laknaah interview um ta lo ding
New Delhi: PM Narendra Modi rawtna remtipuiin Home Minister Rajnath Singh chun, tuta inthawk Delhi Police hnuoia Sub­Inspector (SI) lakna haia interview um tanaw nih tiin zanikhan a hril. Staff Selection Commission huoihawtnaa Delhi Police hnuoia SI (Group C post) laknaa interview um hlak chu um ta lo dingin a remti ta a nih. Pu Modi chun tukum Independence Day nia thu a hrilnaa junior level recruitment haiah interview thaw hlak chu suktawp dingin rawtna a lo siem ta a ni a, merit a insang, interview a hnawl candidate an um hlak suktawp a tul thu hrilin personality le appearance) pawimawna haia chun interview thaw tha a ti thu Pu Modi chun a hril a nih.

TDP hotu 3 hai dama insuo
Hyderabad: Maoist helpawl han October 5, 2015 nia Visakhapatnam hmuna inthawka an thuoihmang Telugu Desam Party (TDP) hotu pathum hai chu zani hmasa khan dam takin an insuo tah. Maoist in an thuoihmang TDP hotu pathum hai chu Mandal Unit President Mamidi Balayya Padal, senior leader Vandalam Balayya le district committee member Mukkala Mahesh hai an ni a, Kothaguda village­a an chengna in haia inthawk ko dawka an thuoihmang an nih. Maoist hai hin hi lai biela bauxite project a thaw tum suktawp dingin an ngen a nih.
 
Agartala­Kolkata via Dhaka Bus service
Agartala: Vawisuna inthawk hin Agartala­ Kolkata via Dhaka inakrah Bus a service tan ta ding niin Tripura Transport minister Manik Dey chun a hril. Bus service hi zanita tan dinga ti a ni a, sienkhawm Dhaka hmuna Tripura Road Transport Corporation (TRTC) officer LJ Rokhum vuok a ni leia October 16, 2015 a service tan dinga sawn nawk a nih. LJ Rokhum hi Volvo bus Agartala le Kolkata via Dhaka inkara service ding thua road permit la dinga a fe huna misuol thenkhatin an sawisak a nih. 

Pakistan in mi 6 a khai hlum
Islamabad: Pakistan chun zanikhan Punjab Province­ah thi dinga thiemnaw inchangtir mi 6 a khai hlum nawk leiin December, 2014­a inthawk mi a khai hlum chu 260 an chuong tah. Ni 2 liemta haia khawm khan mi 6 ve ve a lo khaihlum ta bawk a nih. Nikum December thlaa Peshawar hmuna Taliban helpawl han school runa, mi 150 zet a tamlem students an that hnunga moratorium hlipa hiengang thi dinga thiemnaw inchangtir hai khaihlumna hi a hung thaw tan nawk a nih. Pakistan­a chun thi dinga thiemnaw inchangtir 8,000 chuong an um a nih. 
-------------------------------------------------------------------------------------------------------
VAWISUN THUPUI
In hring theina dingin that nawna zawng loin, thatna zawng unla; chun, in hril angin, Lalpa sipaihai Pathien chu in kuomah um a tih.    ­Amos 5:14

Editorial
Ei hun tawng le KUT

Manipur state hi sakhuo chi hran hran, tawng dang dang hmang le hnam hran hran hai chengna ram a ni leiin festival le hunpui state sawrkar mi hrietpui le hrietpui lo tam tak an um a. Festivals  state sawrkarin a mi hrietpui hai laia thenkhat chu sakhuona le inzawm le thenkhat chu social festivalan nih. Manipur­a festival hran hran, state sawrkarin a hrietpui hai chu­Manipuri hai social festival ‘Ningol Chakkouba’; Manipur Hindus hai festival ‘Yaoshang’; Manipur Muslim festival ‘Ramjan ID’; Zohnathlak hai festival ‘KUT’; Kabui Naga festival ‘Gan­Ngai’; Tangkhul Naga festval ‘Chumpha’; Manipur New Year ‘Cheiraoba’; Kristien hai nipui tak ‘Chrismas’; Kang, Heikru Hidongba; Naga festival Lui­Ngai­Ni hai an nih.
   
Manipur­a tlangmi (Zohnathlak) hnam tum tum han ei hnambing chitin festival nei fir fer inlakhawm sawrkar hrietpui le a sponsored an la um naw a, sienkhawm non­Naga tribal hai po po hmang hlak ‘KUT’ chu mi hrietpuiin State level­a hi festival hmangna ding hin sum le pai khawm a pek hlak a, district tum tum haia khawm sawrkar pawisa hmang lovin hmun thenkhata chun hmang a ni hlak.
   
Kut hi November ni 1 nia kum tina hmang hlak a ni angin tukum (2015) khawm hin State Level Kut Committee (SLKC) chun 1st Bn. Manipur Rifles ground, Imphal hmuna hmang dingin an buotsai mek a. Amiruokchu, Manipur Assembly in Anti­Tribal Bills 3 a passed hai dodalna leia buoina suoka security hai chetnaa mi 9 zetin hringna an chan bakah hieng bills 3 hai lakkir a ni theina dinga protest fe mek le inzawmin Martyrs hai inzanain Kut hmang huna inlar em em le mi huikhawmtu tak ‘Miss Kut’ thlangna um lo ding le hi hun hi hnam lam inentirna le Pathien hla sakna chaua hmang dingin SLKC chun a rel bakah cultural show­a hin kum hlui­a cultural dances competition­a thang lo Kut Tribes hieng Monshang, Moyon, Paite, Simte, Tarao, Thadou­Kuki, Thangkhal, Tiddim Chin, Vaiphei le Zou hai chu hi huna lam inentir dinga fiel an nih.
     
Manipur tlangmi han Govt. Bills 3 hai passed a ni leia tlangmi hai dikna le chanvo humhalna dinga hringna lo inhlantu mi 9 zet ruong District Hospital, CCPur morgue­a an la zal lai le, mipuiin sunna le protest a fe lai meka Kut festival hmang chu Kut Tribes thenkhat chun remchang le tha in an hriet naw a. Hi le inzawm hin Young Vaiphei Association (YVA) Imphal Jt. HQ le Zillai Imphal Block chun  meeting neiin tukum Kut festival hmangnaa hin thang lo dingin an rel. YVA le Zillai chun Tribals martyrs hai lu sun lai zinga hiengang festival hmang hi an rem nawh tia Kut a hin thang an tumnaw a nih.  Kut Tribes dang dang hai ruok chun tuchen hin Imphal­a State level Kut hmangna ding chungthua hin iengkhawm thusuok an la nei nawh. Sienkhawm, ei boruok tawng mek en hin, hiengang ngirhmuna um zing lai chun Kut hmang hi an thlawp naw deu seng niin an lang.
   
Bills 3 hai hi lakkir le ei martyrs hai ruong vuiliem hman a lo ni ruok chun state sawrkarin a sponsored a ni leiin hmang ngei chu thain an lang a. Sienkhawm lusun lai zinga lawmna le insukhlimna tieng thil hang hmang hi chu an remin a tha chie dim! ti chu mi tam tak ngaituo a ni mek. Tribals hai ralna annawleh zangnadawmna sum khawm state sawrkar kuoma inthawk lak lo dinga JAC Against Anti­Tribal Bills in thutlukna an lo siem le a hnawl a ni a. Chuong laizing­a Manipur sawrkar sponsored State Level Kut hmang dinga ei hang insingsat el hi an dik chie am ti khawm SLKC hin a ngaituo nawn thiltha ni dingin an lang.           

Tribal Unity a thei china ei fepui lai zing hin Kut festival hin tlangmi hnam tum tum hai lai ei inunauna le ei inthuruolna a tawkpawi el dim ti dam hi SLKC hin ngaituo ve sien thiltha ni dingin an lang a. Kut huoihawt tumna thua hin unau seng le tribal ei nina angin Anti­Tribal Bills pathum hai le inzawma indin JAC, JPOs le stakeholders hai inrawnpuiin ei buoina hi chingfel hman a la ninaw chun thul el hai sien ti chu tu ngirhmuna Kut tribes a tamlem ditdan a niin an lang. Kut hi Chin­Kuki­Mizo­Zomi­Hmar Zohnathlak hai festival a ni lai zing hin tuchena thil fedan enin hnam thenkhat chun tabik chaiin an enkawl ta khawmin an lang a. Hieng a ni chun ei boruok tawng mek enintlangmi hnam tum tum hai kara inunauna thalem intlun nekin inhmelmakna le intheidana a rasuok lem ding niin an lang. Hnam thuoitu hai khawma hunin a mi hnawde hma ngei le hun a la um lai hin hi chungthu hi ngaituo hai sien thiltha a ninaw dim a nih! Ei martyrs hai ruong la vui si loa function buotsai hi thil remchang tak chu ni dingin an lang naw a, ei remtitlangna a ni ruok chun a tha.

Post a Comment

Powered by Blogger.