Tuolsung
Nampi thumkhawmna an nei;
Martyrs hai le Dr Pudaite sunna hun an hmang
CCPur: Zani 7:30AM a inthawk khan UZO huoihawtnain “Hingpei un Mangpa kung ah kinuale kiavai” (Hosea 6:1) ti thupui hmangin Zomunnuam Community Hall­ah Nampi thumkhawmna hun hmang a nih. Rev. S. Nengkhanmang in hun hawng tawngtaina a nei a, Rt. Rev. Dr. Ginkhanmung, Chairman (ZNTC) in lawmlutna thucha le Upa Suankhanmang, Founder Chairman, ZNTC le Upa Goulal Tungnung, Secy. ZNTC ZNTC history report an pek.
           

Tawngtairuolna an nei hma in Mr Chinlunthang, President, UZO GHQ inrawinain hi huna fekhawm hai chun Tribal Rights humhimna dinga hringna inhlantu mi 9 hai sunna le Rev. Dr Rochunga Pudaite, founder President, Bibles for the World sunna neiin minute khat sung tawngtawkin hun an hmang.

Hospital­a inthawk a hung suok tah
CCPur: Manipur Assembly in August 31, 2015 nia Bills 3 a passed hai dodalna huna security hai chetna leia hliem Kuki Christian Hospital, Imphal­a enkawl mi 5 hai laia hospital­a inthawk suok nuhnung tak Thangkaplien (23) of Gangpimuol chu KSO/Imphal in JPO kutah zanikhan an hung inhlan. Langkhanpau Guite, Chairman, ADCC chun tawngtaipekna a n ei. Thangkaplien hi August 31, 2015 nia Lailam leilak bula security forces han an kap hliem a ni a, a mawngtam­ah silaimu an dang leia operation thawa silaimu hi atdawk a nih. Hi hospital­a  midang enkawla lo umve hai chu Khailal John (25) of Chiengkon, Khamboi (28) s/o Genkhokap of N. Lamka Gouchinkhup Veng; Lunminlien (23) s/o (L) Letkhothang of Bijang le Thangminlun (22) s/o Janglet of B. Phaicham hai an nih.


Oct. 17 in US ah Dr Pudaite ruong inthlana
CCPur: October 10, 2015 nia  Colorado Springs, US a fam lo chang tah Bibles For the World founder Dr Rochunga Pudaite ruong inthlana October `17, 2015, 1:30PM khin The Sanctuary Church, 1930 West Colorado Springs, USA a ursun taka nei ning a tih. Hi hunser hmang zo tieng hin a ruong hi CCPur tieng hung phur  ni dinga hril a nih. Churachandpur hung phurtlung ni ding ruok chu hriet thei a la ni nawh. Lekha sukfel tul tam tak a um leiin beisei nekin a hung tlung inhnu deu el thei niin ei thu dawngna chun a hril.

Dengue thuah Awareness
CCPur: Indo Global Social Service Society (IGSSS)­ CCPur huoihawtnain zani 10:00 khan  Nazarene International Ministry Conference, Hmar veng­ah National Food Security ACT le Dengue thuah awareness nei a nih. Hi huna hin M.Khaihao Haokip,Coordinator, NEICORD/CCPur chun National Food Security Act, 2013 ti thupui hmangin thu a hril a, Seithang Mate, Multi Purpose Worker (MPW), Malaria Department CCPur in Dengue natna laka inveng dan ding thuah hrilhrietna a nei. Henglep block –a inthawk mi 40 vel hi huna hin an thang.


Morgue­ah freezer sie tum
CCPur: District Hospital/CCPur Morgue­a chun mithi hun sawt tak vawng that theina dingin  Rs. 16.2 lakh manhu vel ding Freezer pahni inthut tuma hma lak mek a ni a, tuta inthawka sawtnawte hnunga a hung tlung tah beisei a nih. Tribal Martyrs 9 hai rung Morgue­a um mek hai tuta enkawl danah duthusam a tlingzo naw leia JPO le CMO han hma an lakna leia Freezer hi sie tum a nih.

Tuomna puon an thethawp
CCPur: Tribals Martyrs hai tuomna puon hai chu zanikhan Hmuia Veng­a YMA Office­ah  Tuibuong Women Welfare Assn.; Hmuia Veng Nupui pawl le JPO han hnam puon chi hran hran hai semdawk thei dingin the­thawp.

Monthly Attendance submit a tul
CCPur: ZEO/CCPur hnuoia schools hai chu Paybill countersign na dinga monthly attendance a tul leiin thla tawp chena ZEO office­a Cashier Chingngaihpau kuomah Monthly Attendance pelut dinga inhriettir an nih. Class VIII registered school iemanizatin an peklut ta a, sienkhawm ZEO Office raw a ni huna a kang vawng leiin a pelut ta le la pelut lo han Khampu, OSD/CPIS kuoma peklut ding; Chun, ZEO hnuoia Grade IV hai GPF register hai khawm a kang vawng leiin a thar siem a tul a, chu thila ding chun kum liemtaa Balance sheet hai Rokung, DA, ZEO Office kuoma peklut ding a nih tiin ZEO/CCPur chun an hriettir.

JAC kuta ralna Rs. 13,000/­
CCPur: Tribal Martyrs hai ralna dinga JAC hnuoia Finance Sub­Committee hmalaknaa in tina Rs. 100/­ dawla um ralna sum a lut zing a, zanikhan khuo 6 haia inthawk ralna sum Rs. 13,000/­ a lut nawk. Zanita JAC kuta ralna petuhai chu Bisanmual Rs.1,900/­; Henglep block a Chongchin Rs.5,000/­;Lailong (S) Rs.1,300/­ ;Thnalon block a Suaohthumphai Rs.300/­; Khuongjang Rs.2,500/­ le B’Nei Israel Houbung, New Lambulane, Imphal Rs.2,000/­ hai a nih.

JPO kuta ralna Rs. 86,050/­
CCPur: District Hospital­a JPO donation centre­a chun zanikhan Tribal martyrs hai ralna dingin  mimal le organisation 11 han Rs. 86,050/­; Maibal pum 3, Chini kg. 50 le Puon 14 an pek. Zanita ralna le hliem hai thangpuina ding sum petuhai chu­ EBCC Bethany, Bungmual Rs.15,000/­; Bethany Kochuam,Lalzakham road, New Lamka (G) Rs.5,000/­; All Christian Evangelical Prayer Fellowship, Hospital Ministry Rs.1,000/­; Imphal Christian Hospital Staff Rs.5,100/­; Olive Presbyterian Church,Chiimtung Veng, New Lamka Rs.5,000/­; Mrs.Singhoihching w/o Langkhanpau Chini kg 50; Chassat Avenue Welfare Committee, Imphal Rs.10,000/­ le puon 4; Thanglunmang of Tuibuong Bazar Veng Maibal 3; Muamuang of Zogam road, New Lamka Rs.100/­; EBCC V.Munhoih Rs;.10,000/­ le Maibal pum 9; Chongchin V/A puon 1; EBCC Delhi Rs. 30,000/­; Nengzalam Guite of Zion Veng, New Lamka Rs.500/ le  Zenhang Lamka Numei Pawl Rs.4350/­ a nih.

MSPDCL in thlakhat sungin fines Rs. 5 lakh an hmu;
January 2016 a inthawk Imphal khawpui sung power 24x7 pek tum a nih- MSPDCL
Imphal: Manipur State Power Distribution Company Limited (MSPDCL) chun September 19, 2015 a inthawk thla khat liemta sung khan Imphal area sunga dan lova electric latu mi 48 an dapdawk a, hieng haia inthawk hin fine Rs. 5 lakh vel an hmusuok niin MSPDCL official thusuok chun a hril. Electric inrutu mansuoka um hai laia mi thenkhat chun prepaid meter a inthawk le thenkahtin main line­a inthawk company hrietpuina lova electric an lo lak a nih.    
             
MSPDCL official hai chun electric fee tamlem hmu a ni theina ding le Imphal­area cheng han January, 2016 a inthawk darkar 24 ( 24x7) electric meivar an hmu theina dingin hma a lak mek a, hi le inzawm hin Imphal khawpui sung hmun tum tum haiah an khattawkin drive a thaw hlak niin official thusuok chun a hril a. MSPDCL chun Imphal area sunga electric power supply­na dinga electric power inchawknain Rs. 10.5 crores a seng a, sienkhawm company chun tuchena hin Rs. 5 crores chau consumer haia inthawk a khawndawk niin an hril. Hieng a ni chun company in 50% vel an hmang phak a, hi lei hin 24x7 power peksuok a tumna a sukpuitling theina ding chun company in revenue collection a thaw hrat a tul tina a nih tiin MSPDCL chun an hril.
   
MSPDCL chun power inruk sukbo a ni theina dingin Imphal khawpui sunga AB cable connection thaw tumin sun le zanin sin a thaw a, indiklo taka electric la le inrutu hai man le fine inchawitir an ni theina dingin MSPDCL chun Vigilance team an din a, hi team hin nitin enfelna sin an thaw hlak. Electric inruknaa inrawlna nei Assistant Manager pakhat khawm tulai hnai el khan suspended a nih.

CorCom in Oct. 15 ah darkar 18 General strike
Imphal:  Manipur phairam helpawl group 6 hai infinkhawmna Co­ordination Committee (CorCom) Manipur merger agreement dodalnain October 15, 2015 khin (Oct. 14 zanril a inthawk Oct. 15, 2015, 6PM chen) darkar 18 sung aw dingin General strike an thaw ding thu an puong. Manipur Merger agreement hi September 21, 1949 a ziek le hi kum vek October 15 khan Manipur chu India ram rorelna hnuoia a lut (effect) tan a nih. Merger agreement hi Manipur Maharaja Bodhchandra le Governor General of India han an ziek a ni a, kum 1962 a inthawk khan Manipur chu Union Territory niin kum 1972 khan state puitling a hlangkai a nih. Silai le chuktuoa thawluina hmanga merger agreement kha Shillong hmuna ziek niin CorCom chun an tum. CorCom a hin KCP, KYKL, PREPAK, PREPAK (Pro), RPF le UNLF hai an thang a nih.

India sipai han Myanmar an tham niin an tum
Imphal: Myanmar ram sunga Nyapithaw Government province sawrkar le ceasefire an neina huop sung Pou Nyiu village area sunga NSCN hai hnawtdarna dingin Indian Army hai chun  Myanmar­a Operation Commander an tham a nih tiin NSCN/GPRN chun zanikhan an intum.
           
NSCN thusuokin a hril danin Myanmar Army­a 364 Bn. Operation Commander, Lt. Col. Min Thaw Hein chu NSCN han chawlhadamnaa an hmang Myanmar ram sunga Pou Nyiu khuoah fein NSCN hai khawlam an um tiin khawsung mi hai an dawn a, NSCN hai an lo fe hmang vawng ti a hriet leia lungsenin khawsung mi hai chunga kut tlakin khawsung NSCN hai pedawk dingin a vau niin zanita NSCN thusuok chun a hril.

MPS Officers Transfer
Imphal: 9th IR (Mahila) Commandant Mamata Wahengbam, MPS chu SP/CID (Technical) sin chel dinga sawn a ni a, Ms Joyce Lalremmawi, MPS, in­charge SP/CID chu Commandant 9th IR (Mahila) Bn. dinga an sin sin sukdanglam a nih.


SK Women’s College Teachar han GB thiek dingin
Imphal: S.K. Women’s College Teacher Welfare Association chun hi College Governing body chu Ministry of Women and Child Development, Govt. of India hnuoia Women’s Hostel bawlna ding sum indiklo taka hmanga intumin GB thiek dingin an phut.

KSA in extra class buotsai dingin
Imphal: ILPS movement leia imphal khawpui sunga Schools le Colleges hai thla hni sung zet kai thei lova an umna thuah student hai ta dinga extra class buotsai dingin an ngen. Higher Secondary le College students union election campaign­a student hai sukbuoi lo ding le BA, B.Sc., B.Com exam hung um ding hai a hun taka nei a ni theina dinga hma la dingin thuneitu hai an ngen bawk.

UPSC CS Prelims ah mi 15,008 an hlawtling
New Delhi: Union Public Services Commission (UPSC) huoihawtnaa August 23, 2015 nia Civil Services (preliminary) Examination, 2015 result chu zani hmasa khan puong a ni a. Candidates 9.45 lakh in application an pek a, hi laia 4.63 lakh exam­ah an thang a, hieng hai laia candidates 15,008 hai chu Mains exam­a thang thei dingin an hlawtling. Preliminary exam­a hlawtling hai chu December 18, 2015 a Mainsexamination­a dinga Detailed Application online­a fill up dinga inhriettir an nih.

ST recognition hnitu tribes 1,000 an um
Shillong: Union Minister of Tribal Affairs Jual Oram chun, Assam­a tribe 6 han Scheduled Tribe­a zieklut (recognised) dinga an ngenna chu  thla 6 sunga sukfel a ni ding thu a hrilin Union Cabinet pawmpui dingin thawn a ni tah tiin a hril. India rama chun tuhin tribes 1,000 velin ST recognition an hnitu an um mek niin Jual Oram chun a hril. ST recognition norms sukdanglam le ennawn mek a ni a, ST recognition a dingin criteria 5 vel a um a, chu laia pakhat chu state government recommendation a nih tiin a hril. Assam a chun tribes 6­ – Koch­Rajbongshis, Tea tribes, Tai Ahoms, Morans, Motoks le Chutiyas han ST recognition an ngen mek a nih.   
 
Corruption hi natna hri anga enkawl a tul
New Delhi: President Pranab Mukherjee chun, Corruption hin ram hmasawn le inthanglienna ding a dal leiin natna hri anga ei enkawl a tul tiin October 26, 2015 a inthawk India ram pumpuia vigilance awareness week hmang ding le inzawma thucha a hrilnaah a hril. Corruption hin sawrkar inthang ding a dal a, sawrkar sum lamsuok a suktlawm a, mirethei le hausa kar a suklien. Hmasawnna daltu lien tak a nih tiin a hril.

Padma Shri a pekkir
New Delhi: Punjabi writer Dalip Kaur Tiwana chun India rama hnam thila buoina hung pung em em dodalnain zanikhan Padma Shri a dawng chu a pekkir ding thu zanikhan a puong. Tuchena writers le poet Sahitya Academi award an dawng pekirtu chu mi 23 an tling tah. Ms Tiwana hi kum 2004 a Padma Shri inhlan le kum 1971 a Sahitya Akademi Award lo dawng ta a nih.


President Israel a tlung
Jeruralem: Israel rama ni 3 sung cham dingin President Pranab Mukherjee chu zanikhan Palestina suoksanin Jerusalem a tlung. President Mukherjee hin vawisun hin Israel Parliament Knesset­ah thu hril a tih. Israel ram thuoituhai an hmupui huna terrorism chungchang bakah kawng tum tuma an ram pahni hai thawtlangna chungthu an hriltlang ring a ni bakah Culture, Education le Science & technology haia thawtlangna ding agreement ziek bawk an tih.

Luman Rs. 20 lakh neia puong Maoist leader man
Hydrabad:  Maoist senior leader, luman Rs. 20 lakh neia puong, states pathum­ Andhra Pradesh, Telangana le Chhattisgarh haia mi 50 thatna le inzawma man dinga zawng mek (wanted) Y. Shiva Reddy @ Kiran chu zanikhan Andhra Pradesh Police han an man. Kiran h i mi 50 thinaa cases 73 lai nei mek niin ei thu dawngna chun a hril.

--------------------------------------------------------------------------------
VAWISUN THUPUI
In puon ni loin, in lungril thler ro” a tih. Lalpa in Pathien tieng chu ngha ro: ama chu lunginsiet theitak le lainatnaa sip, lunginuoi le zainemnaa sip, thiltha naw chu inl>t hlak a nih.  ­-Joel  2:13

EDITORIAL
Miropui

Khawvel­a mi tamlem chun mi ropui le thilthaw thei ni ei chak a, sienkhawm miropui ei ni vawng thei nawh. Miropui tam tak piengin an lo thi ta a, khawvel dama a la um chun an la hung suok pei bawk ding a nih. Miropui thenkhat khawvel inza le a ngaisang an ni a; thenkhat ruok chu  nun tawrawtna le nunrawngna leia hming inthang le ropui an ni a, hiengang mi ropui hai hin khawvel mihriem popo ngaisang le inza an hlaw nawh. Khawvelin an inza le an ngaisang miropui hai chu a pumpui (as a whole) a khawvel le a sunga cheng mihriem hai thatna ding, mihriem ngirhmun dawmsangna dinga thil thawtuhai an nih. Hi lei hin Pa seng seng, nu seng seng ei inangnaw ang bawkin miropui ni seng seng ei ropui dan le ei hlut dan an thei nawh. 
   
Ei thlang ding nisien, miropui a tu lem him tlang ei ta!Khawvel in an za miropui hai ngirhmun ei tlang lem ngei ring a um. Khawvel hrieta inlar le miropui ei tling phaknaw thei, sienkhawm ei ram le hnam ta dinga miropui ni thei a nih. Chu ding chun ramri nei lova sin ei thaw a tul. Adolf Hitler dam kha an ropui hle a, khawvel umsung chun a hming hi history­ah bo ta ngailo ding a ni a, an ram le hnam ta ding chun an ropui ngei el, khawvel mipui ngaisang le inza a tling zo naw tlat. Chuong laizing chun Abraham Lincoln dam, Mother Teresa dam, Princes Diana le a dang danghai khawvelin iengleia an za le a ngairopui am ei ti chun an hmalakna khan ramri a neinaw lei a nih.
   
Mihriem seng seng, hotu seng seng, thuoitu seng seng khawm ei thi hnung el chau ni lovin ei dam lai ngei khawmin thenkhat mipui ngainat le inza an hlaw laiin thenkhat chun mi popo inza le ngaisang ei hlaw nawin ei hlu ngai kher nawh. Khawtlang thuoitu ei ni am, hnam thuoitu ei ni am, Kohran thuoitu ei ni khawmin ei hmalak dan, ei thil thaw danin mipui lungril hnein a hne naw thei. Ei member lai chun ei lo ropui hle khawm a ni thei. Mihriem hi tukhawm a famkim ei umnaw a, tlin nawna le tlaknawna ei nei seng. Chu chu Pathien angpuia siem nisia Pathien ei ang nawna, mihriem ei nina san tak a ni a, mitin suklungawi vawng a theinaw lai zing hin thenkhat chu an hlu lem tlat thei. Hi hi a san iengdang lei a ninaw a, a nawlpui thatna ding thil an thaw lei, a tawi zawngin Kristienna le social thilah inbuk tawk taka kut an rawl leia, ram le hnam le kohran han an inza le an chawimawi lo thei lo a nih.
   
October 10, 2015 nia fam lo chang tah Bibles for The World indintu Rev. Dr Rochunga Pudaite khawm kha mihriem a ni leiin mi popo suklungawiin an lawm zawng thaw vawng kher naw nih, chuong nisi chun iengleia mipui nawlpui in ei inpam­a ei inro em em zie internet le social networking site haia chena hieng lawma sunna thu an dar el am ning a ta? A san iengdang lei ni lovin inbuktawk taka Pathien ram le hnam rawng a bawl lei a nih ti inla ei hril suol taluo ring a um nawh. Dr Pudaite khan Pathien rama rawng nasa taka a bawl leiin ram le hnama kut a rawlna a chai chuong nawh. Kha tak kha a bik takin Hmar tawng hmang popo hai inpam, inza le ngairopui a hlaw nasan a nih.
   
Mi thenkhat chu Kohran thuoitu ei ni leiin social thila kutrawl ei rin tlat. Chuongang bawkin ei hnam sunga Organisation amani annawleh Politicians hai khawmin ei Pathien thu nasa takin ei inthlada a, Kohran thuoitu amani annawleh hotu ei ninaw leiin thil thienglo le zu le sa chen dinga phalna nei ang zie zangin ei zalen hle. Hi tak hi ei hotu le thuoitu hai ei ropui ding ang le ei hlut ding anga ei hlut nawna a nih. Ienganga Kristien tha le hotu khawm ni inla, Hnam anga mi siemtu chu Pathien a ni leiin ram le hnam chu ei invawi a, ei chawisang a tul, chu chu Pathien thu khawm a nih. Mani hnam hmusittu chun siemtu a hmusit a nih.       
           
Pathien ka hmangai ei ti chun, ei unau ei hmangai ngei ding a nih. Mani unau khawm hmangai thei lo, unau le inrem thei si lova Pathien ka hmangai ei ti hin tukhawm ei hlem naw a, mani le mani inhlem ei nih ti hi ei hriet nawn nuom a um bawk. Miropui seng seng an hlut dan an chen naw ang bawk hin mihausa seng seng khawm an hlut dan le mi inza an hlaw dan an chen nawh. Chu lai zing chun daikilkara mi mise tak khawm miropui le inzaum tak ni thei a nih. Chu ding chun mani inzaumna humhal, sakhuona le khawtlang thil buktawn thiem a ngai. Mi tam takin sakhuona le khawtlang thil ei buktawn thiemnaw bakah ei thlierhran thiem naw a, pakhat ei inbukrik tir hlak leiin ei ropui ding ang le inza hlaw ding ang in ngainat ei hlaw phak ngainaw a nih. Chun, ei hotu suong um tak tak thenkhat hai an ropui le inza an um ding anga inza an um ngai nawna san chu an ngirna hmun enchieng lova thlier bik le tan bik neia hma an lak hlak lei a ni bawk. Miropui le hnam ropui ni ei nuom chun miropui hai lam hraw seng tum ei tiu. Chu lam hrawtu ei tam pha pha ei ram le hnam, ei khawtlang, le kohran hai hung ropuiin siemtu Pathien khawm mawizuol a tih. Miropui ei la tlawm leiin ei ram le hnam a la ropui naw a nih. Miropui tamna hnam le rambung chu hnam ropui le hnam ropui an ni ngei hlak.



Post a Comment

Powered by Blogger.