Tuolsung headline
JAC team Delhi an tlung:
Manipur Bhavan tuolah mipui an pungkhawm
CCPur: Anti­Tribal Bills leia  Tribal movement fe mek le inzawma Central thuoitu tum tum hai inhmupui dingin H. Mangchinkhup, Chief Convenor, JAC Against Anti­Tribal Bills thuoitu hai chun zanikhan CCPur suok sanin New Delhi an pan. Delhi­a inzin ding hai hi zani 9:00AM khan KKL Complex, IB Road­ah Rev. Stephen Chinzathang, Executive Secretary, ZPCS in Pathien kuoma tawngtainain an thla. JAC team hai hi Mizoram House, New Delhi­ah an innghat ding a ni a, MZP Mizoram le Home Minister Mizoram han thil tul hai an sukfel pek vawng tah. CCPur­a inthawka suok hai lai hin Lalkhohao Chongloi (Secretary, JAC), Richard Laltanpuia (President HSA CCPur Jt. Hqtrs.), Lalkhohao Haokip (President KSO CCPur), K. Vanllalian (President ZSF), Paul Lalchhanhima (President MZP) hai bakah ATSUM Convenor Thangzamuan Tombing le ATSUM Co- ­Convenor Joseph R. Hmar hai an nih. JAC team hi zani zantieng 4PM khan Delhi an tlung tah.
   

Hienglaizing hin zani zan 7 PM vel a inthawk khan Manipur Dy. CM Gaikhanngam Delhi­ah an zin ti hriet a ni a, hi le inruol hin Delhi ah an zin ti an hriet le in MTFD inrawinain Delhi­a Tlangmihai chun Manipur Bhavan, SP Marg, Chanakyapuri, New Delhi­ah an pungkhawm tawl a, Manipur Bhavan tuolah doodalna (Protest) an nei. Boruok sosang ding vengnain Delhi Police han mipui fekhawm hai hnawtdar tumin an bei zing niin ei thu dawngna chun a hril.
           
JAC team hin MTFD le inthlawpin India President, Prime Minister le Central thuoitu dang dang hai inhmupui an tih. An inzin sung hin Rev. Stephen Chinzathang in JAC Convenor mawrphurna a lo chel ding nia hriet a nih.

JAC in inhriettirna an suo nawn nawk
CCPur: Tribal movement fe mek le inzawma JAC in October 1, 2015 nia inhmang dan ding inhriettirna a siem chu an suo thar nawk. Hi dungzui hin bandh inthlazal hun sung a pangngai ning a ta, 2PM a inthawk total bandh; band sungin medical, electricity, telecom, water supply (private service thang lo), media, bank le treasury hai huom naw nih. Chun Dharna inthungna hmun hai le a hunbi sukdanglam a ninaw a, 2­5PM dharna, 5PM a inthawk Village committee/authority hai a tul anga thil thaw ding, inchuknain (schools) hai 12:00PM chen hawng ding. Nu le pa han mani nau hai nghak annawleh an tin huna thuoi seng ding; Schools umna Village authority hai chu thil ditum lo tlung ding vengna kawngah thuneina pumhlum (full authority) pek an nih. Bandh sunga thil ditum lo a tlung nawna dinga mitin inza seng dingin JAC chun an ngen.

HWA Martyrs ruong nghak hun dinghai
CCPur: Hmar Women Association (HWA) GHQ chun khuo/Unit tina Tribal Martyrs 9 District Hospital­a um hai ruong nghakni ding hai a siem thar nawk. Hi dungzui hin Oct. 8, 2015 in Sielmat; October 9, 2015 in Saikawt; Oct. 10, 2015 in Valpakawt & Khawpuibung; Oct. 11, 2015 in Rengkai; Oct. 12, 2015 in Muolvaiphei; Oct. 13, 2015 in Khawmawi, Bethel & M. Ramthar; Oct. 14, 2015 in Saidan & Thingchawm; Oct. 15 in Hmarveng; Oct. 16, 2015 in Muolbem & Thingchom; Oct. 17, 2015 in Ngurte le Oct. 18, 2015 in Lamka Unit hai ning an tih.  HWA GHQ chun Unit tin hai zawm seng dingin ngenna a siem.

PTC Mizoram HQ in martyrs hai an hung ral
CCPur: Paite Tribe Council (PTC) Mizoram Hqrts thuoitu hai chu an President H.  Dalkhenkhai inrawinain CCPur­a hungin zanikhan Anti­Tribal Bills le inzawma buoina suoka thi tribal martyrs 9 hai ralna an hung nei. PTC Mizoram Hqrts hin JPO kutah ralnain Rs. 5000/­ bakah puon 9 an pek a, JAC in a tulna naa an hmang dingin Rs. 5000/­ JAC kutah an pek bawk. Bills 3 hai leia tribal hai inthuruol taka ei umna thua inthuruolna tha lem a um theina dingin mitin hma la seng dingin an ngen. PTC GHQ chun PTC Mizoram team hung hai lawmlutna le informal meeting PTC GHQ Office, Hiangtam Lamka hmuna an buotsai. Hi huna hin PTC President thar L. Pumlianpau chun Manipur­a tlangmi hai thil tuok le hmalakna hai report a pek.


BJP Ntl. VP ST morcha CCPur a hung
CCPur: Mr Ramesh Chand Meena, National Vice President, BJP ST Morcha chu zanikhan CCPur­a hungin 8:00AM khan district Hospital Morgue­ah tribal martyrs hai ralna a nei.
   
Mr Ramesh Chand Meena hi party level­a hung ni lovin ama mimal ngaipawimawna leia hung a ni leiin martyrs hai a sun thu ti lo iengkhawm comment a pek naw a, Tribal hai harsatna mita a hmu hai Prime Minister le Party High Command kuoma an tlun ding thu a hril. Mr Meena hin JPO member hai an hmupui a, Hmarveng­a BJP office khawm sir lovin Imphal tieng a kir nawk. Mr Meena hin Oct. 8, 2015 hin Senapati­a ST Morcha Committee uop a ta, Oct. 24, 2015 in Rani Gaidinliu centenary prog. uop bawk a tih.

JPO kutah ralna Rs. 74,600/­
CCPur: District Hospital­a Tribal Martyrs hai ta dina JPO in donation centre an hawnga chun zanikhan mimal le pawl tum tum 14 ralna an pek  nawk a, JPO kuta zanita ralna lut po chu Rs. 74,600/­ bakah Puon 18 le Maibal 13 a thangsa. Zanita ralna petu hai chu North Maring Elders   Forum (NMEF) Sadar Hills Rs. 10,000/­; Vakotphai Christian Church, IT Road, Sadar Hills Rs. 10,000/­ Jt. Churches (EBCC, PCI (R), PCI, UPC,) Mimbung Mizoram Rs. 10,230/­ Elvee Flex Printing Maibal 10; PTC, Mizoram Hqrts Rs. 5,000 le Puon 9; North East Manipur Kuki Chief Assn., KSO& KWU Bungpi Rs. 20,000/­ le Puon 9; M. Buangmun Village Presbyterian Churcvh Rs. 1,000/­; Mr & Mrs Capt. G.S. Hunjan, New Delhi Rs. 2,000/­; Axis Bank, CCPur (for JPO) Rs. 1,000/­; Kim Joe Gas Service, Nehru Marg Rs. 9,000/­; Phualjang Area Esther Prayer team Rs. 700/­; Emmanuel Church, P. Kamdou Veng, Rs. 3,000/­; Gamphajol EBC Rs. 1,000/­ le Maibal pum 3 le Gate donation Rs. 1,670/­ a nih.

Enfel dingin mi 51 thisen lak
CCPur: Tulaia CCPur district sung a Dengue natna inleng mek le inzawmin zanikhan District Malaria department chun Rengkai khuo mi damnaw 51 hai chu Dengue a ni le ninaw enfel dingin an thisen (blood sample) lak. Hieng thisen laka um hai hi enfel dingin October 8, 2015 hin Medical department han Imphal­ah thawn an tih.

JAC kutah ralna Rs. 7200/­
CCPur: Tribal martyrs hai ralna dinga JAC a Finance Sub­Committee in In tina Rs. 100/­ le a chungtieng dawl dinga a lo inhriettir angin zanikhan khuo pathum haia inthawk ralna Finance Sub­Committee kutah Rs. 7,200/­ a lut nawk. Zanita ralna sum petu hai chu Sainoujang (Thanlon) Rs. 1,100/­; Kawlhen (Henglep) Rs. 3,300/­ le Lancha (Singngat) Rs. 2,800/­ a nih. 

ZSF in an dem
CCPur: October 6, 2015 nia Pangzawl village­a Thangliansiam (20) s/o Thonsong of College veng, New Lamka a thisaa hmu a nina thuah tuolthattu hai an dem thu puongin  tuolthattu hai an phurawk hremna pe dingin thuneituhai an ngen.

Headlne
Union Cabinet in National War Memorial le War Museum bawl dingin remti tah
New Delhi: Prime Minister Narendra Modi inrawina hnuoia zanita Union Cabinet meeting chun, India ram venghimna dinga hringna inhlantu India sipai hai hrietzingna dinga National War Memorial le National War Musuem bawl dinga rawtna um chu a remtipui (approved) tah. War Memorial le Museum hai hi India Gate bul­a Princess Park, New Delhi hmuna bawl ning a tih.Hi thil thawna dinga sum seng dinga riruong chu Rs. 500 crore vel a ni a, kum 5 sunga zo ding (project) a nih tiin Defence ministry thusuok chun a hril.
   
Official data dungzui chun India ramin zalenna a hmu hnunga ram venghimna dinga hringna inhlan India sipai chu 22,500 chuong an ni a, sienkhawm India in Independence a hmu kum 69 hnunga khawm sipai huoisen hringna inhlantu hai chawimawi le hrietzingna ding Memorial indin a la ninaw a nih. Union Minister Nitin Gadkari chun India ram venghimna dinga India sipai hringna chan 22,500 hai hrietzingna dinga hi thil hi thaw a ni ding thu reporters hai kuoma a hril.
   
Hi project a hun taka zo a ni theina dingin Defence Secretary Chairman nina hnuoia empowerd Steering Committee in thangpuiin enkai zing an tih. Zo a ni pha a enkaitu dingin Management body indin ning a tih.
   
War Memorial le Museum ena fe (visitors) hai lungrilah ram hmangaina lungril a tu thar ngei beisei a nih tiin thusuok chun a hril.
     
Union Cabinet meeting chun Pradhan Mantri Swasthya Suraksha Yojana hnuoia All India Institutes of Medical Sciences (AIIMS) 3 indin belsa dingin remtina a nei bawk. AIIMS indin na ding hmun hai chu Nagpur (Maharashtra), Mangalgiri (Andhra Pradesh) le Kalyani (West) Bengal hai an ni a, hi thila dinga sum seng ding chu Rs. 5,000 crores a nih.

Zan khat riekin Union Minister
Imphal: Union Minister of state for Rural Development Sudharsan Bhabat chu Imphal­a zankhat riek dingin zanikhan Imphal a hungtlung. Vawisun hin Senapati Mini­Stadium ah Rani Gaidinliu piengchampha a vawi zakhat tling lawmna nei ning a ta, hi huna hin Sudharsan Bhagat hi khuollienin thang a tih. Hi programme zovin New Delhi pan nawk a tih.

NC for ST chairman Oraon Manipur­ah
Imphal: National Commission for ST Chairman Rameshwar Oraon chu zanikhan Manipur­ah a hung inzin a, S. Minlianthang Vaiphei, IAS, Director Tribal Affairs, Hills & SC chun lo hmuokin Manipur Tribal Affairs Dept. aiawin Non­-Naga puon le Naga puon 1 ve ve an siltir.  NC for ST Chairman hi Manipur­a Tribal hai harsatna enkai dinga hung inzin niin ei thu dawngna chun a hril.

Primary Teachers 1,423 banna order
Imphal: October 6, 2015 khan kum 2011 a Manipur sawrkarin Primary Teachers 1,423 a lak h ai banna Order High Court of Manipur in an suo a, September 12, 2006 a notice an suo ang dungzuia thla 2 sunga DPC ennawn (review) a, strict taka recommendation pelut dingin Manipur sawrkar an hriettir. Hi Order an hmua inthawk thla 3 sung chu student­hai hmakhuo ngainain Primary Teacher­hai hi an sin lan thawtir dingin Manipur High Court chun state sawrkar an hriettir. Candidates 9 han hekna an siem leia hi Order hi insuo a hung um a nih.

Pasal pakhat chema sat hliem
Imphal: Zani hmasa zan dar 10 vel khan Lilong Police station huop sunga Lillong Ataokhong Mamang Leikai­ah Md. Hajikhomei (65) of Lilong Ataokhong Makha Leikai chun Md. Tajudin (38) s/o (L) Md. Sherajur Rehman of Lilong Ataokhong Mamang Leikai chu a dar le a ring haiah chemin na takin a sat hliem a, Tajuddin hi Shija Hospital & Research Institute, Langol panpui le ICU a sie a nih. Hajikhomei hi a tlan hmang leiin man a la ninaw a, Tajudin a sat hliem nasan hriet a la ninaw bawk. Hi thil tlung le inzawma indin JAC chun mi sat hliemtu hi hremna pe ngei dingin thuneitu hai an ngen. Mipui lungsen chun hi thil tlung zan hin Md. Hajikhomei chengna in an raw.

Mission Indradhanush Second phase
Imphal: Zanikhan Thoubal­ah Mission Indradhanush second phase T. Ranjit, DC, Thoubal in a hawng. Vawisun hin hi Mission hi Imphal East, Bishnupur le Chandel haia khawm hawng ning a tih. Zanikhan India ram sunga District hran hran 352 ah hi Mission hawng le sien thaw tan a nih. April, 2015 khan hi mission hi Churachandpur, Ukhrul le Senapati district haia tan a lo ni tah.

Moreh ah Residential Court complex
Imphal: Justice Laxmikant Mahapatra, Chief Justice, Manipur High Court in Moreh, Chandel district­ah Residential High Court complex a hawng. Hi hunsera hin Manipur High Court Judges Justice N. Koteswar le Justice Kh. Nobin hai khawm an thang.

UNLF cadre 1 man, ralthuom dapdawk
Imphal: October 6, 2015 khan 16­Assam Rifles le Imphal East Police Commandos han Happy Valley hmuna dappui an thawnaah UNLF cadre SS Pvt N Md Ribiyul @ Salim (23) S/o Md Jamil, of village Pangaltabi, Imphal District an man a, Sagolmang Police station­ah an peklut.
   
Chun, hi ni ma hin 41­Asam Rifles le 20­Assam Rifles thangruol han Unapal hmuna dappui an thawnaah AK­47 rifle 1, magazine 1 le a mu 30 dapdawkin an man niin zanita Assam Rifles thusuok chun a hril.

Mahila Congress Gen. Secretary dingin Nagma
New Delhi:  Bollywood actress hlui le Congress member Nagma chu Office bearers thar siem a ni le inzawmin Mahila Congress General Secretary dinga ruot a nih. State Mahila Congess Units hotu ding siemthara um hi 4 a nih. Delhi Commissioner for Women Chairperson hlui Barkha Shukla Singh chu Delhi Mahila Congress chief dinga ruot a ni bawk. Nagma hi Congress party candidate hai ta dinga campaign vawi tam tak lo nei tah, Lok Sabha election nuhnung taka lo ngir ve ta a nih. Mahila Congress general secretaries ding 11 ruot hai lai Maharashtra Minister hlui Varsha Gaikwad khawm a thang.

Nobel Pize Chemistry dawngtu ding hai
Stockholm: Royal Swedish Academy of Sciences chun Scientist pathum Sweden mi Tomas Lindahl, America mi Paul Modrich le US­Turkish scientist Aziz Sancar hai chu Nobel Prize Physics 2015 dawng dingin zanikhan a puong. 

ATM suksea rawk tumtu mi 11 man
Boko: Zani hmasa khan Nagarbera hmuna Central Bank ATM rawk tumtu suomhmang mi 11 hai chu Boko Police han an man. ATM rawk tumtu hai hin Police hai an hmu leiin an hriemhrei hai Kulsi vadunga dehawnin tlan hmang an tum a, sienkhawm VDP party le tuolsung mi hai le thangruolin mi 11 hai hi an man ta a nih. Mana um hai chu Bishnu Das (23), Borhan Ali (30), Amir Ali (20 ), Hafiz Ali (25), Maznur Ali (26), Imran Ali (22), Kamal Talukdar (32), Rubul Ali (22), Mubarak Ali (30), Milan Barman (26) le Ibrahim Ali (26) hai an nih.

Naxal nuhmei cadre 1 kap hlum; Naxal 2 IED leh an inpe
Raipur: Zanikhan Chhattisgarh­a Baster district sunga Chandameta village­a Naxalites le security forces hai nasa taka an inkaptuo naah Naxalites nuhmei cadre Piso of Jheeram village chu an kap hlum niin Baster Addl. SP, Vijay Pandey chun a hril. Naxals han mi thenkhat an hrentang ti report an dawng leia Police a District Reserve Group (DRG) le CRPF thangruol han dappui an va thawna huna inkaptuona hi tlung a nih. Inkaptuona hmuna hin.315 bore le .12 bore silai hmu le man a ni bakah an mi hrentang hai khawm sansuok an nih.
     
Chun, Chhattisgarh­a Sukma district Naxalites cadre pahni Padam Raju (20) le Tati Masa (30) hai chu Police, CRPF le District Administration hai hmaah improvised explosive device (IED) bomb kg. 8 zeta rik leh an inpe. Raju hi luman Rs. 3 lakh nei le Tati hi luman Rs. 1 lakh nei a nih.

EC in Bihar 4th Phase election notification
Patna: Election Commission chun Bihar­a Fourth Phase inthlangna ding Election Notification zanikhan an suo. Third phase a hin districts 7 haia Assembly Constituencies 55­ah inthlangna November 1, 2015 in nei ning a tih. October 14, 2015 chen nomination file thei le inhnukdawk nuom han October 17, 2015 chen inhnukdawk thei an tih. Bihar Assembly election hi Oct. 12, 2015 a inthawk Phase 5­a nei ding a ni a, Third phase a dingin mi 351 han nomination paper an file ta a, election chu Oct. 28, 2015 a nei ning a tih. Third phase a nomination file theina hun tawpna tak chu vawisun hi a ni tah. Vote thla hai po po November 8, 2015 a tiem ding a nih a, tuta sawrkar fe lai mek hi November 29, 2015 a tawp ding a nih.

Bangladesh­ah Pastor pakhat that tum
Dhaka: October 15, 2015 khan Bangladesh rama Pabna district a Faith  Bible Church a Pastor Luke Sanker (52) chu pasal pathumin that tumin an bei a, sienkhawm damin a suokdawk niin Police thusuok chun a hril. Pasal pathum Islamist helpawl ni dinga ringhla chemte chawihai chun Pathien thu kan ngai nuom tiin Pastor chengna inah an va fe a, Pastor in Pathien thu a lo hril a chu lai taka a ringa at hlum tuma an bei thut el niin Police chun an hril. Pastor Luke Sanker hin hliemna a tuok leiin Hospital panpui a nih.

SC in Aadhar LPG le PDS a chau hmang dingin
New Delhi: Supreme Court chun government schemes hran hran haia hamthatna hmu theina dinga Aadhar Card hmang a remti nawna chu inphet lovin Aadhar chu LPG subsidies le PDS thil haia chau hmang dingin zanikhan sawrkar thlungpui an hriettir.

Central fund hai hmang vat vat dingin
New Delhi: Union minister of state for Development of North Eastern Region (DoNER) Dr Jitendra Singh chun, India hmarsak states hai chu Central fund an hmu hai hmang vat vat dingin an hriettir. Development sin thawna sukhnuk a ni hlak nasan tak chu state sawrkar han Utilization Certificate an peklut ngainaw lei, DPRs an peklut inhnuk hlak lei le state sawrkar han an ni tum ding chin (share of funding) an pek thei ngainaw lei a ni a, hi lei hin project hai a hun taka zo thei lovin a um pha hlak a nih tiin Dr Jitendra chun zani hmasaa NEC executive meeting nei huna a hril.

Delhi MLA hai hlaw sukpung dingin
New Delhi: Lok Sabha Secretary General hlui PDT Achary inrawinaa Committee chun Delhi­a MLA hai hlaw chu Rs. 50,000/­ a inthawk Rs. 12,000/­ a sukpung ding recommendation  zani hmasa khan Delhi Assembly Speaker Ram Niwas Goel kutah an peklut. Hi baka hin Delhi MLA hai conveyance allowance khawm Rs. 6,000 a inthawk Rs. 30,000/­ dingin an recommended bakah daily allowance khawm Rs. 1000/­ a inthawk Rs. 2000/­ a sukpung a ni el thei. Recommendation anga Delhi MLA hai hlaw le allowance pek an ni chun thla khata sum an hmu ding hi Rs. 2 lakh chuong a ni ding a nih. Tuhin Rs. 88,000/­ an hmu a nih.
   
Hlaw sukpung dinga committee recommendation hi BJP le Congress chun an sawisel. Delhi  Congress Chief Ajay Maken chun, AAP sawrkarin 400 percent­a hlaw sukpung tumna; MLA 21 zet hamthatna dang dang an dawng theina dinga Parliamentary secretaries - a ruot an nina hai sawiselin AAP sawrkar chun VIP culture a hrilmawi a nih tiin a hril.
----------------------------------------------------------------------------------------------
VAWISUN THUPUI
Ngai ta, thlarau po po chu ka ta an na, pa hringna chu ka ta a ni ang bawkin, naupa hringna khawm chu ka ta a nih; thlarau thil suksuol chu thîng a tih. ­Ezekiel 18:4

EDITORIAL
Ei lampui hrawnaa hin fimkhur ei tiu

Mimalah, khawtlangah, ram le hnamah a thangruol thiem hai an ngirsuok hlak a, chu chu khawvel mitinin ei hriet seng. Nisienlakhawm, chu thu hrie zing sia thangruol thei chuong lo chu an um a, chu hai lai chun Manipur­a Zohnathlak, a bikin Churachandpur a chenghai hi ei thangve am ti hi inlau le tium takel a nih. Thangruol hi hratna a nih ti an dikzie hre inlakhawm, thangruol hi harsa takel a ni a, thangruol naw leia sietna, buoina, harsatna, thina le hliemna tlung hi nakawra ei hriet el chau ni lova mit ngeia ei hmu le tuok hi tam takel a um ta a nih.
   
Ram le hnam ta ding tiin thang nasa takin ei lak a, Churachandpur District a cheng Zohnathlakhai lem chun district danga Zohnathlakhai nekin ei sawlpui zuol bik a, nitin nundan, fak le dawn, sum le pai, sawrkarna thil le thil dang dang haiah harsatna namen lo takel ei tuok ta a, ei la tuok pei ding niin an lang. Ei thil tuok hin thangruolna tha tak a hung intlun el dim tia beiseina lien tak ei nei laizingin inremnawna le intheidana a hung intlun pha lem el rawi dim ti hi inlau a um khawp el. Hi lei hin ram le hnam ta ding tia kal ei chawina haia hin ei fimkhur nawk zuol nuom a um hle.
   
Tulai hin Churachandpur ah Dengue natna thli a hung hrang a, rukru nasa takin an huongintau a, thi dan pangngai loa thina dam a hungtlung a, tribe tum tum hai lai indem le a thanaw zawnga insawiselna le thil iemani neu neu a tlung ri hi hriet dingin a um zing el ta a, hieng thil hai hin a tha tieng nekin a thanaw tieng kakhawk a nei lem ding nia an lang leiin a pawi takzet. Inthuruol taka hmalak tlang a tul leiin iemani neu neu hungtlung hai hi an hmatienga ei hmet mit vat a tul. Thil neu neu hai hin thil lien takel a hung kangkai thei leiin ngaitha el chi niin an lang nawh. A hun laia ei hmet mit naw chun hmet mit zo ruol lovin a hung tal suok chun tuornaw hleng ei tih.
   
Ram le hnam ta dinga ei hmalakna le ei lampui hraw dana hin di fimkhur hle nuom a um. Thawfuk le bawfuk tum neia hma la ei ni a. Hi lai kara hin mani ngei zawng le dit nawhai chunga phuba lakna dama ei lo hmang pal hlau chun ei lampui hraw dan an dik naw a nih ti hrie a ei bansan hmak nuom a um. Tulaia ei boruok tawng mek le thil ngen ei neina hi phuba laknaa ei hmang chun sawrkara ei thil dit le ngen hi hlawtling ngai nawng ei ta, chu nek chun invuok chekna a hung rasuok lem ding a nih. Ei lampui hraw hi mitinin fimkhur ei tiu.
   
Inthuruol le inpumkhat anga inlang si, pawl pakhata um anga inngai le hma la tlang ni sia a ruk a rala inbei, zaidam tak le innui hmel inhmu puma a ruktea inbei dam le iner ru takel dam ei lo ni pal chun ei hmakhuo sukthim zuol hleng a tih. Party annawleh pawl tam tak sietna chu puotieng mi ni lovin, anni party le anni pawl sunga mihai ma an nih ti hi ei ni lai khawm hung ni ve pal a tih ti khawm inlau a um hle.
           

Theitawp suoin ram le hnam hum tum inla khawm mipui, hotuhai, thuoituhai, sawrkar han lungril hmunkhat ei nei thei naw chun mani ram le hnam san hin ei ni le ei ni, Zohnathlak inti ve ve hai hi indo thei ngei a nih. Silai le bomb hai hmanga indona kher a ninaw a, thu le thuneina hmanga indona dam, lungrila indona dam, sum le pai hmanga indona hai hi a um thei a nih. Hi lei hin ei hmalakna kawnga hin ei lampui hraw hi ei fimkhur hle a tul a nih. Mitdel le mitdel an inthuoi chun khur a dam a tla a, thing bul le lunga dam an inpal tlu hlak. Ei lampui hrawnaa hin inpal tlu lo dinga ei fimkhur a, ei mit ei sukvar nuom a um.

Post a Comment

Powered by Blogger.