Tuolsung headline
Tribal movement hrat lemna dingin common platform nei le Think Tank & Research Scholar Group nei a ngai: T. Romeo Hmar
CCPur: Manipur Tribal Forum­ Delhi (MTFD) Convenor T. Romeo Hmar chun zani zingkar 8:30AM khan Sauliim Restaurant, New Lamka­ah tuolsung chanchinbumihai an hmupui. Tribal movement hrat lema a fe theina dingin Tribal  han common platform nei chau ni lovin hmatienga ei nuorna (agitation) a dinga plan & strategy siemtu dingin Think Tank & Research Group nei a tul thu T. Romeo Hmar chun a hril. Tu tuma Tribal issue/movement hi CCPur district a intan (epicentre) a ni leiin movement a hlawtlingna dingin mipuiin theitawpa hma ei lak a pawimaw a, chu ding chun a lien a chin ei thaw ding le mawphurna ei hriet seng a pawimaw (exmple. JAC role, Women wing role, student role etc) tiin a hril.
   

Ei demand ei hmu theina dingin kum le thla an vawi ding a ni leiin JAC le leaders tum tum han school hai kai ta dinga ngenna le inhriettirna an siem hi student hai hrethiem dinga ngenin school kai khawm movement chikhat tho a nih. A san chu unau Naga han kum 60 chuong India sawrkar chunga nuorna an nei ta a, an demand hlawtling hma khat School/College kai lo ding ti hai sienla chu vawisun hin Naga a bikin NSCN thuoitu ding mivar le mithiem (educated) an um naw ding a nih tiin T. Romeo chun a hril.
   
MTFD thiltum chu tuta Tribal movement le inzawma state le national level a hma lak a ni theina dinga state le MTFD in coordination tha tak an nei ding ditna lei, chu ding chun thuoitu han an rang thei angin State level a hmang ding common platform pakhat siem thei hai sien a nuom thu; MTFD hi an nuom thu a kalpen ni lovin Think Tank le Research Scholar group han plan le strategy an thaw dungzuia kalpen ding an ni thu; Entirna dingin ei buoina le inzawmin Jantar Mantar­a rally nei ding, Prime Minister etc kuoma Memorandum pe ding le O.Ibobi New Delhi an zin huna Manipur Bhavan a nuorna nei ding ti hai Think Tank le Research Scholar group hai  thurawn dungzuia thaw a ni thu; MTFD an hung nasan chu Think Tank & Research Scholar group ditna anga a hmuna thil umdan enfel dinga hung an ni thu hrilin New Delhi­a report an pek zovah activities tum tum tan a ni ding thu T. Romeo Hmar chun a hril. 
   
Jantar Mantar­ah Coffin rally thangin nuorna le follow up program tum tum nei dinga ti khawm Think Tank & Research Scholar group han tha taka plan & strategy an siem a ni thu; MTFD an hung pensuo nasan chu Bill 3 khelah (beyond the bills) Separate Administration/state thu lei khawm a nih. A san chu tuhin bill 3 hai repeal zonaw chun state govt. in bill dang a pass nawk pei ding a nih. Hi lei hin tu tuma ei buoina hi mitinin hun remchanga ngaia, Manipur state/govt. a inthawk suok theina dinga thang la seng dingin a ngen. Tribal unity um lai taka Manipur Govt. a inthawk ei suok naw chun iengtika khawm suok ta ngainaw mani a, Meitei hai hnuoiah ei kun zing ta ding a nih tiin a hril.
   
Inter­-District (hill district) road connectivity a um theina ding thuah MTFD in suggestion an siem chungthua chun, tu ela sukpuitling ding ti a ni chuong naw a, hmatieng peia thaw dinga thaw thei a ni thu T. Romeo Hmar chun a hril. 
   
MTFD team hin zanikhan CCPur suoksanin Imphal an pan a, Imphal­a inthawk vuongnain New Dehi an pan nawk tah. Manipur an cham sungin ATSUM, ANSAM, UNC thuoituhai an inhmupui a. JNU, Delhi­ah an inzinna report an pek ding thu Airport hmuna T. Romeo chun ei palai indawnna dawnin a hril.

School kai tan; School thenkhat kai thei lova sawisak
CCPur: CCPur khawpui sunga School hai chu thla khat chuong zet hawng lo le student hai kai lova an um hnungin JAC remtipuina angin October 5, 2015 7AM­ 12 Noon chen khan CCPur khawpui sunga school hai hawngin  kai tan nawk a nih. School kai nawk a ni le inzawm hin thawktu le students han Martyrs hai sunna hun an hmang tawl bawk.
   

School thenkhat sukbuoi lova an kai thei laiin School thenkhat a bikin Rengkai khawsunga school hai chu kai thei lo dingin student pawl khatin an sukbuoi leiin intintir an nih. Chun, school thenkhat haia student hai chun an school tuol haiah sit­in­protest an nei leiin class la lovin an um bawk. School thenkhat kai thei lo um hai sienkhawm class la thei school an tam lem niin ei thu dawngna chun a hril.
   
School thenkhat chu sukbuoi ding vengin nupui hawn school bul haiah an duty. School kai sukbuoituhai hi ‘Student movement’ inti pawl an nih.

Rayburn College in sunna hun an hmang
CCPur:Tribal Martyrs 9 hai laia thang, Rayburn College­a BA 1st Semester inchuklai Paulianmang sunna zani 7:30AM khan Rev. Khen P. Tombing inrawinain student han an nei. Hi huna hin Mr Paulianmang lim (thlalak) ah par inhlanna an nei. Hi huna hin Mr Pauliammang sung hai bakah College & High School a teaching le non teaching staff hai bakah students hai an thang a, Rayburn NCC han gun salute pekna an nei bawk.

Rengkai­ah fogging thaw: Dengue thuah team 4 indin
CCPur: Churachandpur District­a khawm tulai hin Thokang chikhat “Aedes Mosquito” se a inthawk natna Dengue hri an leng mek a, Rengkai khuo a chun mi iemanizat Dengue natna invawi hrietchieng an ni tah.
   
Hi le inzawm hin Chief Medical Officer (CMO), Churachandpur thupek dungzuiin October 4, 2015 zantieng khan Vector Borne Disease Control Programme, Churachandpur a Consultant, S. Thangthianmuan rawiin mi 10 velin Rengkai Bible Hill area sungah Dengue dangna dingin machine hmangin Fogging an kap. HYA General Headquarters le HSA CCPur Jt. Headquarters han medical team hi an thangpui.
   
Hieng laizing hin Vector Borne Disease Control Programme/CCPur chun khawpui sunga Dengue natna an dar nawna dingin Aedes Larva Breeding site enfeltu dingin team 4 an din a, team 4 hai hi October 6, 2015, 10:00AM a inthawk CMO Office­a in report dinga ti an ni a, an thil hmusuok hai October 9, 2015 chena CMO kuoma pelut dinga ti an nih.
   
Medical team hin khuo le veng tum tum haia tui sekkhawlna Syntex, tanky le motor tyre hnawl tasa haia tui intling haia Dengue natna phurtu Thokang Aedes te le a tui (egg) a um le umnaw hai an enfel ding a nih.
   
Team 1 ah Robert Pauzalal, Health Health Supervisor (MHS) inrawinaa mi 13 han New Lamka khawsung enfel an tih. Team 2­ah Samte Chin, MHS inrawinain mi 7 han Lailam Veng le Simveng biel enfel an tih. Team 3 S. Jamzadou, MHS inrawinain mi 9 han Nehru Marg, Zenhang Lamka, Apollo Veng, Khumujamba le Beulahlane hai enfel an ta, Team 4 ah Sumsanghlun, MHS inrawinaa mi 9 han Rengkai khawsung enfel an tih.

School hai kai seng ding
CCPur: JAC a inthawk thusuok an hmu dungzuiin zanikhan HWA Rengkai Unit chun tawnginringna hmangin an khek a, Oct. 6, 2015, 7:00AM­12:00 inkar sung Rengkai khawsunga School hai kai seng dinga inhriettirin an ngen. Hi hun sung h in HWA Rengkai Unit duty in uluk takin school hai an veng ding a nih.

Competitive/scholarship exam form
CCPur: ZEO Office­a Class V&VII hai ta dinga Scholarship Competitive Examination, 2015 a dinga original appoication form peklut hai ZEO Office raw huna meiin a kang vawng leiin a thar­a fill up a tul leiin School tinin Oct. 6­9, 2015 sung mani candidate hai ta ding Pumshong Hangshing, DI/DDO & Dist. Liaison Officer kuoma form laa pelut dingin Mr Hangshing chun ngenna a siem.

Malaria Positive 6
CCPur: District Malaria Department chun September, 2015 thla sung khan damnaw mi 1766 thisen lain an enfel a, hienghai lai hin Malaria Positive 6 an hmu a, hi laia 5 chu Malaria PV anni a, 1 chu malaria PF a nih.

Manmasi Digest magazine
CCPur: Manmasi Digest magazine August­September, 2015 issue chu inchawk a tiem thei dinga zo a ni ta a. Lekhabu zawrna dawr le Agent hai kuoma inthawk Rs. 30/­ peka hmu thei ning a tih. Top 3 Mizo Idol 2015; Tribal Movement in Manipur; Bill 3 passed leia buoina; Current news, articles, student corners le a dang dang tiem ding a um.

Inkhawmpui hun sawn
CCPur: EAC Hmarsak Pastorate Biel KNP Conference October 16­18, 2015 sunga nei dinga ti chu tulai buoina leiin November 27­29, 2015 inkar sunga nei dinga sawn a nih tiin Secretary, HSP KNP EAC chun inhriettirna a siem.

JPO in ralna Rs. 1,24,130/­ le JAC in Rs. 79,700/­ 
CCPur:  District Hospital morgue­a Tribal martyrs 9 zal mek hai ralna dinga mimal le pawl tum tum 17 han zanita JPO donation centre­a ralna an pek chu Rs. 1,24,130/­ bakah puon 28, cross puon 9 le silpauline lien 4 a thang.

Chun, JAC againts Anti Tribal Bill hnuoia Finance Sub Committee kutah zanikhan khuo 31 haia inthawk Tribal Martyrs hai ralna ding Rs. 79,700/­ a lut bawk. Zanita JAC kuta ralna sum petu hai chu Henglep block –a khuo 1, Thanlon block­a inthawk khuo 2, Imphal a inthawk khuo 1, Sangaikot block a inthawk 27 hai an nih.

Law & Order enkai dingin Kailun, IPS, IG
CCPur: Churachandpur District­a Law & Order enkai dinga hun iemanichen CCPur­a a cham hnungin Mr Thangkhanlal Guite, IPS, IG Zone­III chu Imphal tieng a kir nawk tah. Ama aiawin Mr Kailun, IPS, IG Zone­II CCPur­ah a hung nawk a, amah in CCPur­a Law & Order ngirhmun a enkai nawk ta ding a nih.

BJP in inhriettirna a siem
CCPur: State BJP sunga BJP thuoituhai Booth, Mandal, District le state level­a inthlangna a hung um vat ta ding BJP Saikawt Mandal, CCPur District BJP chun inhriettirna a siem a. Mandal president hrietpui lovin tukhawm party active member ni thei lo ding; hi lei hin BJP Saikawt Mandal sunga Active member in ti taphawt Oct. 10, 2015 chena in report dinga inhriettir an nih.

CM in RTI Week a hawng: Dan anga taka RTI hmang dingin a ngen
Imphal: Manipur CM O.Ibobi Singh chun karkhat sung aw ding Manipur Right to Information Week Celebration ­2015 chu zanikhan Manipur State Film Development Society, Palace compound, Imphal Auditorium hmuna a hawng. RTI Week hi Department of Personnel & Training, Ministry of Personnel, Public Grievances & Pension, Govt. Of India sponsored­na hnuoia Manipur Information Commission in an huoihawt a nih.
   
O.Ibobi Singh chun mipui hai chu an right to information hrie a, Right to Information (RTI) dan ang tak le hlawk taka hmang dingin a ngen a, RTI hi mipuiin state hmasawn lem na ding le lampui indika an khal theina a ni thu a hril. State sawrkar hnuoia department hai chu a tul le pawimaw anga information pedawk ding le mipui hai chu hi Act tha tak hi hmang suol lo dingin a ngen.

Revenue District puitling pek nuom
Imphal: Zanita National Students Union of India (NSUI), Manipur in RIMS a Blood Donation Camp an nei huna Dy. CM Gaikhangam in thu a hrilnaa chun, state sawrkarin Sadar Hills le Jiribam Sub­Division hai Revenue district puitling pek a nuom. Amiruokchu, sukfel le enfel ngai a la um tiin a hril. Chun, National Highways haia Truck tlan hai suom hlaktuhai chu sawrkarin manin hremna la pe ngei a tih tiin a hril bawk.

Union Minister a hung inzin ding
Imphal: Union Minister of State (Independent Charge) for Labour & Employment Bandaru Dattatraya chu October 7 le 8, 2015 hai khin Assam, Manipur le Mizoram hai sir dingin a hung inzin ding nia hril a nih. Minister hi Aizawl/Mizoram­ah fe hmasa tak a ta, hi zo hin Helicopter­in Imphal a hung vuonglut ding niin ei thu dawngna chun a hril. Tulai hnaia NE states haia state  puotieng mi hai chunga suknawmnatna tlung hlak le inzawma hung inzin ding nia hril a ni a, hieng state haia Chief minister hai migrant labourers chungtuah inbiekpuina nei a ta, Manipur­a labour department ngirhmun khawm a enfel bawk ding niin ei thu dawngna chun a hril.

Security Forces han IED an dapdawk
Imphal: 9 Sector Assam Rifles hnuoia 12­Bihar Regiment­a Quick Response Team (QRT) chun zani 4:30AM vel khan Nambol Police station huop sung Bishnupur district­a Malom­Bomdiar inkarah Improvise Explosive Device (IED) kg. 1 a rik ding an dapdawk. IED hi Plastic bag a inthun a ni a, a sungah mortor cell 1, Detonator No. 33 pakhat, IED hrui metre 6 a sei a um. Zani 8:30AM khan Bishnupur Police, Nambol Police le 12 Bihar Regiment, D.Company 201 CEDU bomb squad han Ichum Kom Village le Leimaram Village inkarah pawi tawklo dingin an sukpuok niin zanita Assam Rifles thusuok chun a hril.

Statistical Asst. lakna dinga interview
Imphal:  RIMS, Imphal hnuoia Statistical Assistant le Medical Social worker sin lakna dinga interview chu October 11, 201 sun dar 11 a inthawk Lecture Theatre Complex, RIMS, Imphal­ah nei ning a tih tiin RIMS thusuok chun a hril.

Electric in mi 1 a man hlum
Imphal: October 3, 2015 khan Dijam Keka (24) s/o Osuk Keka of Soudar Urtha village,  Assam chu Marangjing village, Noney Police station, Tamenglong district­ah electric in a man hlum a, a ruong JNIMS hung phurtlung le October 4, 2015 khan postmortem thaw le a sunghai kuta pek a ni tah. Dijem Keka khawm hi Rel lampui siemnaa sinthaw (worker) a nih.

Truck eksiden­ah mi 5 an thi
Imphal: October 2, 2015 zing dar 8 vel khan Tamenglong District­a Nungba Police station huop sunga Nungkao Part­II ah Tata Truck pakhat, Naya, Infrastructure Privte Limi ted hnuoia sinthawhai phurtu a eksiden a, mi 5 an thi a, mi 13 an hliem a, hliem inrikhai Silchar Hospital panpui an ni a, thenkhat Jiribam Community Health Centre ah admit le enkawl an nih tiin Police thusuok chun a hril. Thina tuok le hliem hai hi Rel lampui siemnaa thang an nih. Truck hi lamthlang tieng an lettla a nih.

KYKL cadre 1 man
Imphal: October 4, 2015 khan Khabam Lamkhai hmunah 9 Sector le 10 Sector hnuoia  45­Assam Rifles le 16­Assam Rifles han KYKL cadre pakhat SS Pvt. Thoudam Sanathoi @ Momo Singh (23) s/o Th. Rajen Kumar Singh of Lamsang Tera Urak, Imphal West District aan man a, Heingang Police station­ah an peklut. Kum 2006­a Burma rama training zo niin an puong tiin zanita Assam Rifles thusuok chun a hril.

Mizoram Assembly Winter session
Aizawl: Vawisun hin Mizoram Assembly Winter Session tan ning a tih. Hi Session a hriltlang dingin Bills 3 a lut. Mizoram Annual Budget 2015­16 phar a la ninaw leiin tuta session hin Mizoram Finance Minister Lalsawta in phar a tih.

Serampore College Principal dingin Dr Vansanglura
Aizawl: Dr Varsanglura Vanchhawng chu Serampore College (University) Principal thar dinga ruot a ni a, November 1, 2015 khin principal ni lai mek Prof. Laltluangliana Khiangte kuta inthawk charge lain principal chel tan a tih. Dr Varsanglura Vanchhawng hi J Buana College, Lunglei­a associate professor ni lai mek a nih. NEHU hnuoia MA zo le Mizoram University hnuoia Ph.D zo; kum 1995 a Serampore College a Bachelor of Christian Studies zo le Therapon University, Usa a inthawk Doctor of Theology a ni bawk. Hi baka hin kum 2010­11 sung khan Teachers College, Columbia University, New York, USA ah visiting scholar sin a thaw bawk a nih.

UP in SC/ST hai ta dingin police station hran
Lucknow: Uttar Pradesh sawrkar chun a state sunga SC/ST hai chunga suolna a pung pei le inzawmin Scheduled Caste (SC) le Scheduled Tribe (ST) hai ta dingin Police station hran  district tina pakhat pei hawng a tum. Hiengang hnam tlawmlem hai ta dinga Police station h ran hi  Bihar, Jharkhand, Madhya Pradesh, Chattisgarh le Andhra Pradesh haia chun hawng a ni tah tiin official thusuok chun a hril. Hi thila dinga sum seng chu Centre le State in an tum ding a nih. DSP rank officer Nodal officer in um a ta, Addl. SP (ASP) rank officer chu hieng police station h aia hin Zonal­ incharge ning a tih. National Crime Records Bureau (NCRB) data 2015 dungzuiin Uttar Pradesh a hin SC/STs hai chunga suolna case 8,072 zet a um a nih.

India le Germany han MoU 18 an ziek
New Delhi: India le Germany hai chun zanikhan renewable energy, skill development and culture hai thangin sector tum tum haia thawtlangna ding Memorandum of Understanding (MoU) an ziek. 3rd. Indo­German Inter­governmental Consultation New Delhi hmuna nei zo hnunga MoU hi ziek a nih. Hi Consultation­a thang ding le ni 3 sung cham dingin German Chancellor Angela Merkel chu zani hmasa khan New Delhi a hungtlung a, Rashtrapati Bhavan hmuna lawmlutna nei a nih. Ms Merkel hin Rajghat hmun khawm a sir. Zanikhan P resident Pranab Mukherjee an hmupui a, vawisun hin PM Narendra Modi inhmupui bawk a tih.

Assam Congress in MLA 9 hnawtdawk dingin
Guwahati: October 4, 2015 nia Assam Pradesh Congress Committee (APCC) meeting chun party kal zawnga che Congress MLA 9 hai chu party­a inthawk hnawtdawk dingin an rel. Assam Congress in MLAs 9 hnawtdawk dinga a rel hai chu Mallah Baruah, Pijush Hazarika, Pallab Lochan Das – Abu Taher Bepari, Kripanath Mallah, Rajen Borthakur, Binanda Kumar Saikia le Bolin Chetia hai an nih. Assam­a Congress MLA hel hai inrawitu tak minister hlui Himanta Biswa Sarma chun Sept. 15, 2015 khan Assembly­a Member a ninaa inthawk inbanin BJP a zawm der ta a nih. Tuhin Assam Assembly member 126 umnaah Congress chun dissidents MLA 9 hai thangin MLA 77 a nei a nih.

Nuhmeite kum 7 mi a pa in Rs. 30,000 in a zawr
Itanagar: Arunachal Pradesh­a Kumey district­a Tarla village a cheng Lokam Tagi an ti chun September 3, 2015 khan a naunu kum 7 mi Lokam Yakti chu Leel village­a Gangte Tado an tipa kuomah Rs. 30,000/­ in a zawr a,Gangte Tado le a unaupa Gangte Taniang hai chun  piengphunga ruolbanlo mi pakhat Gangte Togbe an tipa kuomah Rs. 1.5 lakh in an zawr nawk niin Police thusuok chun a hril. Hi thil tlung hi October 2, 2015 khan police­a report pek a ni a.  Itanagar PS Sub­Inspector N Angu inrawina hmuna an bawzuinaah nuhmeite kum 7 mi bakah nuhmei dang pathum an sansuok bakah Lokam Tagi thangin hi thila inrawl mi pathum hai chu an man niin Police thusuok chun a hril.

Nuhmei suolluia intum AIUDF MLA man
Guwahati: Nuhmei suolluia intum AIUDF MLA Gopinath Das chu zani hmasa zanteing khan Hajo Chowk hmuna Police han an man niin Kamrup SP, Indrani Baruah chun a hril. Das hi a umpui (domestic help) nuhmei kum 14­a upa suolluia intum, Section 4/8 of the POCSO Act, 2012 le Section 447/506/355/384/420/120B of the IPC hnuoia thubuoi siem khum a ni a, bail a ngenna Gauhati High Court in October 1, 2015 khan a hnawl pek leia inbihmang a nih. AIUDF chun man a ni le inzawm hin an party­a inthawk an suspended nghal.

South Asia Bible Commentary
New Delhi: Zani hmasa khan India Vice President, Hamid Ansari in “South Asia Bible Commentary “ (SABC) New Delhi­ah a tlangzar. Hi Commentary hi India, Pakistan, Sri Lanka le Nepal ram haia Scholars 90 zet thangruola an ziek le buotsai a ni a, a ziek le sutnaa hin kum 8 zet hun a lak a nih tiin Paul Swarup, Presbyter­in­charge, Cathedral Church, Redemption Delhi Diocese chun a hril.

SC in Bharti bail ngenna a hnawl
New Delhi: Aam Aadmi Party (AAP) MLA Somnath Bharti in bail a ngenna chu Supreme Court in a hnawl pek. Bharti hi a nuhmei in domestic violence le tuolthat tumna case a file khum leia Police han an man a nih. Bharti nuhmei in an nupa kara inremna a um theina dinga inbiekna nei a nuom naw leia Chief Justice HL Dattu inrawinaa Supreme Court in bail a ngenna hi a hnawl pek a nih.

Rio in Bills 3 hai lakir dingin
New Delhi: Nagaland Chief Minister hlui le Nagaland Lok Sabha MP neisun Neiphiu Rio chun October 3, 2015 khan PM Narendra Modi lekha a thawn a, August 31, 2015 a Manipur Assembly in ILPS le inzawma Bills 3 a passed hai chu remtipui lo ding le Bills 3 hai hi lakkir dingin ngenna a siem. Tuta hma khan Nagaland Rajya Sabha MP neisun, Mizoram CM le Lok Sabha speaker hlui P.A. Sangma hai khawma Bills 3 hai hi lakkir dingin PM kuomah ngenna an lo siem ta bawk a nih.
----------------------------------------------------------------------------------------------------------------
VAWISUN THUPUI
Hi rama hin in cheng zing chun, rem ka ti cheu a, thiek naw ning cheu a, phawidawk naw ning cheu, in kuoma thil tha naw ka thaw ka lamlĂ»t ta sih a, ­ -Jeremia 42:10

Editorial
Dengue natna hri
ILPS le inzawma August 31, 2015 a Manipur Asembly in Bills 3 a passed leia Churachandpur a public unrest a fe mek laiin Dengue natna hri Churachandpur town sunga a hung inleng hi a pawi a, a vangduoi thlak hle. Hi natna hri hin mipui lungril a sukphawklek a, khawsika damnawhai chu an lungrilah Dengue natna invawi ni dinga inringhlana neiin an lungril himaw takin an um a nih. Hi natna invawi hi an um ngei a nih ti hrietchieng a ni ta leiin khawsika damnahai chun thisen test hi thaw ngei ngei chi a nih. Dengue natna hi an dar le thokang se a inthawka inkaisawng thei a ni el bakah thi theina natna hri a ni leiin ngaitha el chi a ni nawh. An veng dan tha tak chu thokang insetir lo a nih.
   
Doctor­hai chun Dengue natna hri paitu le sukdartu hi thokang chikhat “Aedes’ niin an hril. December, 2014 khawm khan Dengue natna hri paitu le sukdartu Aedes hi hmu a nih tiin Dr Jamkhokam State Malaria Officer chun a hril. Chun, kum 2010 khawm khan dengue natna hri invawi hi Churachandpur ah hmu a lo ni ta bawk tiin a hril. Dengu natna hri hi Churachandpur chauva inleng a ninaw a, tukhawm hin Bishnupur district, Moreh le phairam biel haia khawm an leng mek niin ei thu dawngna chun a hril.
   
Churachandpur district a Dengue natna hri inlengna chu Rengkai a ni a, sawrkar chun zani hmasa khan fogging a thaw tan an lawm a um. Amiruokchu, Rengkai area sung chauva fogging thaw hi a huntawk naw ding a ni leiin Medical department in khaw dang dang haia khawm fogging thaw pei sienla nuom a um. State sawrkar khawmin fogging machine le a damdawi hi hung pe belsa sienla, District Hospital, Churachandpur le a se vel hai bakah town area sunga veng le khuo hran hran haiah fogging hi hung thaw vawng sienla mipui lawm hleng an tih.
   
Churachandpur a chun khasika damnaw mi 21 test an ni ta a, hienghai laia mi 10 hai chu Dengue natna invawi hrietchieng an ni ta tiin official thusuok chun a hril. Test dingin thisen hi Imphal­ah vawihni thawn a ni ta a, a vawikhatnaah mi 8 thisen thawn a ni a, test a ni zovin mi 8 hai laia mi 5 hai chun dengue natna an invawi ti fie a ni a, a vawihnina mi 13 thisen thawn nawk a ni a, test a ni hnungin mi 5 in dengue natna hrik an pai ti fie nawk a ni leiin tuchena official­a Churachandpur a dengue natna invawi um hrietchieng ta chu 10 an ni tah. Dengue natna invawi iengzat tam am ei um ding ti hi ngaituo tham a nih. Ngaitha le namnul mei mei chi a ni nawh.
   
Dengue natna hri hi India ram khawpui tak Delhi a khawm an leng mek a, mi 25 lai zetin thina an tuok pha ta a nih. Thina hiel tuok hai hi a hun taka dengue natna an invawi ti hrietsuok an ninaw lei le a hun taka enkawl an ninaw lei nia hril a nih. Dengue test­na man hi a to leiin Delhi sawrkar chun Private hospital/clinic hai khawm Rs. 600/700 bak la lo dingin thusuok a siem pha.  Ei ni lai hin test­na man hi Rs. 1600/­ nia hril a nih. Ei state sawrkar khawmin Dengue test­na man hi control thei ve sienla chu mipui lawm hleng an tih.
   
Vai rama um dengue natna hri invawi thenkhat chu hung suokin Churachandpur a an chengna in haiah an inenkawl ti khawm hril le hrietin a um. Hi lei hin an thisen test a inthawka an vawi hai chau hi dengue natna invawi a ninaw ding a nih ti a chieng sa a nih. Hi lei hin dengue natna hri laka hin ei inveng fimkhur hle a tul a nih. Khawsik insang le dam suok vat thei naw dam ei ni chun thisen test hi makmawa thaw ding a nih. Khuga Dam a thokang hai lai khawm dengue pai an um a hril a ni a, Nga man a fe hlak hai thokang se laka fimkhur hle thang a tih.





Post a Comment

Powered by Blogger.