Tuolsung headline
Oct. 5 a inthawk Schools le Colleges hai hawng ta ding
HSA le ZSF in hotuhai thurel inza seng dingin an ngen
CCPur: JAC le Village Welfare Committee/Authorities le Nuhmei pawl tum tum han October 1, 2015 nia meeting nei huna Oct. 5, 2015 (Thawtanni) a inthawk Schools le Colleges hai sun dar 12:00 chen kai ta dinga an lo rel ta angin October 5 2015 a inthawk khin CCPur district suna Schools le Colleges hai chu sun dar 12:00 chen hawng in kai tan ang an tih.
   
Hi le inzawma HSA CCPur Jt. Hqrts chun zanikhan inhriettirna an siem.Social media (Whatsap/facebook) fethlenga mi thenkhatin “Student Movement” tia tukhawm Thawtanni a school inkaitir lo ding ti thuthang an thedarna thuah, School kai tan ding tia rel kha thlak danglamna a um nawh tiin HSA CCPur Jt. Hqrts thusuok chun a hril. Tukhawma hiengang thuthang inleng hai awi lo ding le hiengang thu thedar ta lo dingin an hriettir. HSA functional areas haia Schools le College kai sukbuoi tum an um chun HSA thuoitu hai an rang thei anga inhriettir dingin HSA CCPur Jt. Hqrts chun inhriettirna a siem a, hotuhai thurel mitinin inza seng dingin an ngen.
   
Zomi Students Federation (ZSF) GHQ chun zanikhan thusuok siemin, JAC le VAs/ Womens’ leaders han October 1, 2015 nia KKL Complex­a joint meeting nei huna October 5, 2015 a inthawk Schools le Colleges hai hawng le kai seng ta dinga an rel chu inchuklaihai hmakhuo ngainain mipui le a bikin students han JAC thurel in inza seng dingin an ngen.

SFJ­C le HPB han tawngtairuolna hun an hmang
CCPur: Society for Fast Justice/CCPur (SFJ­C) inrawinain zani 6:30­9:30AM sung khan Tuibuong Peace Ground­ah mipuii tawng­tairuolna hun an hmang. Program hi Rev. Nengzatun in tawngtainain a hawng a, Widows Welfare Association Asia han special number an inhlan a. Rev. Dr Ruth Singson le Rev. Thienkim hai inrawinain tawngtairuolna hun hmang a ni a, program zovin Rev. Janghlun in tawngtainain hun a khar.
   

Hieng laizing hin Gospel Strike CCPur chun Oct. 1­3, 2015 inkar sung Nehemia Prayer Mountain, Muolvaiphei­a bungheia tawngtairuolna an nei zovin zanikhan District Hospital an sir bakah CCPur khawpui sung hmun tum tumah rally rally neiin, Nehru Marg Junction, Tiddim Road­ah tawngtairuolna le Pathien thu hrila rawngbawlna hun an hmang bawk.
   

Hieng laizing hin zanikhan Tribal Martyrs sungkuo han Kangvai a inthawk hmun tum tuma Dharna/Sit in protest a inthung hai kan in lawmthu hrilna an nei bawk.

JPO an inhmupui: Morgue an lut le JAC an inbiekpui phal pek lo
CCPur: Citizens Committee, Manipur (CCM) a Chairperson Radha Binod Koijam inrawinain  Baloo Loitongbam, Convenor (Human Rights Activist); Roshan Meishnam, Asst Convenor (Social Activist); Dr M. Nara Singh, Ex Minister; RV Mingthing, Ex Minister; M.Tombi Singh, Political leader; Lien Gangte, Political leader; Laba Yambem,Sr Journalist; Pradeep Phanjoubam, Editor Imphal Free Press; Khelen Thokchom, Correspondent Telegraph; BB Sharma, Sr Journalist le Khumukcham Momon, Arts & Culture Expert hai chu zani zingkar 9:30AM khan CCPur­ah an hung a, District Hospital­ah JPO thuoituhai an inhmupui. Ralna Rs. 20,000/­, Chini kg 5 le Bawngnene kg 1 JPO kutah an pek. Hi huna hin JPO chun JPO thiltum, sinthaw dan tlangpui hai an hrilpui a, Morgue­a Tribal Martyrs hai en an tum a, sienkhawm JPO chun an phal pek nawh. Chun, KKL Complex­a JAC thuoitu hai inhmupui an tum khawm phalpek an ninaw bawk. New Lamka­a Sauliim Restaurant­a bu an fak zovin Imphal tieng an kir nawk.

Mipui hmalakna kal zawnga thaw ta lo dingin an intiem
CCPur: Manipur­a Anti­Tribal Bills 3 passed hai le inzawma Dr Chaltonlien Amo, Chairman, Hill Areas Committee (HAC) in hrilfiena le thiemthu a hrilna lekha mi 5 in an semdarna le inzawmin Rengkai khaw sunga boruok a sosang hle a, mi 5 hai laia Rengkai khuo mi 3 hai lem chu mipuiin an in hai raw an tum a. Amiruokchu, Church leaders le hnam thuoitu tum tum hai a hun taka an inrawl leiin mipui sosang khapdei an ni a, mi 5 hai khawmin an thil thaw pawi an ti thu mipui hmaah an puongin ngaidam an inhni.
   

Hieng mi 5 hai chun tribal movement fe mek laia a kal zawnga thil an lo thawna leia hnam thuoitu han an chunga action an lakna thuah iengkhawm hrilchier le nuorna an neinaw thu, tuta inthawk chu mipui ditnaw zawnga kal an pen nawk ta lo dinga intiemin hnam, pawl le mipui ditnaw zawnga kal an lo pen nawk a ni chun a maw annin an phur ding thu hrilin suoi an thaw.
   
Ei thu dawngnain a hril danin hieng mi 5 hai hin September 2, 2015 khan Tipaimukh biel, Parbung khawsungah Dr Amo thiemthu hrilna lekha an semdar a, September 29, 2015 khan Tuithaphai/CCPur an hungtlung nawk niin a hril. An thilthaw le inzawm hin hnam le pawl thuoitu han October 1, 2015 khan kokhawmin thu indawnna an nei a, Rs. 1 lakh seng fine an inchawktir bakah October 2, 2015 khan thupha chawina le thaw nawk ta lo dinga intiemin suoi an kei bawk a nih. Mi 5 hai chu­ Lalneisang, Glory Wilson, Lalrammawia, Ramthanglien le Laltlansang hai an nih.

HPC (D) a inthawk ban
CCPur:  John F. Hmar, Information & Publicity, HPC (D), Gen. Hqrts in October 3, 2015 khan thupuong a siem. Chu taka chun tulaia Manipur­a Tribal movement nasa taka a fe mek laia, a kal zawnga Mr Laltlansang @ Sanga, Town Commander, HPC(D) a lo inrawl ve na chungthuah HPC(D) Emergency meeting neiin ngaituo a ni a. Executive Committee chun ama hi hnam sipai a ninaa inthawk “BAN A NIH’ ti mipui hriet dingin a puong. Hi baka hin Tuithaphai suoksan nghal dinga thu pek a ni bawk tiin thusuok chun a hril.

JPO in ralna Rs. 52,480/­
CCPur: District Hospital Campus­a JPO in Tribal Martyrs hai ralna dinga donation centre an hawngah zanikhan pawl tum tum haia inthawk ralna Rs. 52,480/­ an hmu bakah Puon 28, Chini kg. 33,Bawngnene kg. 1 le Maibal pum 2 an dawng. Zanita ralna hung petu hai chu Kamuching Christian Revival Church, Langol Rs. 12370; Bethel Children Home, Hmuia Veng, Puon 9 le Chini kg. 28; Citizen Committee of Manipur, Imphal Rs. 20,000/­, Chini kg 5 le Bawngnene kg 1.; Football Federation Club of Zion Veng, Rs. 3000/­; Engidi Presbyterian Church PCI(R) Kanan Veng, Rs. 200/­ le puon 9; EBCC Saikul & Docas Pawl Rs. 9000/­ le puon 9; Singtangmi Whatapp Group Rs. 5,600, puon 1 le maibal 2 le Hospital gate/receiption­ah Rs. 510/­ a nih. Zani chena JPO kuta ralna le thangpuina sum lut chu Rs. 52,03,262/­ a tling tah.


JAC Finance kutah Rs. 1,15,500/­
CCPur: JAC Against Anti­Tribal Bill hnuoia Finance Sub­-Committee chun In tina Rs. 100/­ le a chungtieng Martyrs hai ralna dinga dawl khuo 7 haia inthawk zanikhan Rs. 1,15,500/­ an dawng.Zanita ralna sum petu khuo hai chu­ Tuinuam Rs.900/­; Behiang (V) Rs.17,100/­; Zenhang Lamka Rs.78,600/­; S.Zezaw Rs.4,200/­; Suangphuh Rs.1,500/­;Lungthul (L) Rs.12,400/­ le Thiekbung Rs.800/­ a nih. JAC Finance Sub­Committee kuta ralna sum lut chu Rs. 24,51,260/­ a tling tah.

Inkhawmpui thul a nih
CCPur: Assemblies of God Manipur District of AGEI, Tuithaphai Section; Youth Alive le Women Missionary Council Joint Conference October, 2015 a nei dinga ti chu ei ram ngirhmun enin hun remchang hmasa taka nei el dinga thul hri a nih tiin Assemblies of God, Manipur District, AGEI chun thusuok a siem.

B.Ed. training dingin CCPur­a inthawk mi 8
CCPur: Academic Session 2015­16 sunga DM College of Teacher Education (B.Ed) training dingin CCPur district­a inthawk mi 8 thlang an ni a, hieng mi 8 hai hi ZEO/CCPur chun zanikhan a released nghal. Ms Nemneilhai, Dealing Asst, ZEO office, chengnain Bijang­ah released order la dingin ZEO/CCPur in an hriettir.
   
CCPur District­a inthawk B.Ed. inchuk dinga thlang hai chu­ Lalawmpuia, Arts G/T of Bunglishi Upper Primary school; Phaljachong Chongloi, UPT of Bunglushi Upper Primary School; Lalhlunkim, Arts G/T of Maite Upper Primary school; Niangneihkim, Science G/T of Thangkhai govt H/S; Chinlalmuan L. Ngaihte, Science G/T of Bungpilon govt H/S; Hauzel Khaithanlian, Science G/T of Gandhi Memorial H/S; L.Jayanta Singh, Science G/T of Gandhi Memorial H/S le Ngainuntluang, Science G/T of Saikot govt H/S  hai an nih.


Khawmpui an hmang
CCPur: EBCC Bethany Bungmual chun zani 6:30AM khan EBC Lamka North Divn. Kumsim Khawmpi a vawi 9 na an hmang a, April, 2016­ March, 2017 chena sum hmang dingin Rs. Rs. 6,03,48,500/­ an passed.
   
Chun, EBCC Kanaan, New Lamka in zani 7:00AM khan EBC Lamka South Division Kumsim Khawmpi a vawi 9­na an hmang a, April 2016­March, 2017 sunga sum hmang dingin Rs. 7,38,03,00/­ an passed.

CM in Govt. Children Home a hawng
Imphal: Manipur Chief Minister O.Ibobi Singh chun zanikhan Takyel, Imphal West District­ah khum 50 umna Goverment Children Home Boys Hostel building a hawng. Hi huna CM O.Ibobi Singh in thu a hrilnaa chun, sawrkarin district Headquarters tinah naufahrahai umna ding Children Home hawng a tum thu le sawrkar thlngpuia inthawka Children Home bawlna ding la sia sum hmang indiklo le sin thaw tha lo NGO­hai chunga action lak tha a ti thu a hril. NGOs hai chu sawrkarin piengphunga ruolbanlo naupang hai dawmsangna dinga hma a lakna kawnga sawrkar thlawp dingin a ngen.
   
Education Minister M. Okendro Singh in hi huna thu a hrilnaa chun,kum thara inthawk Anganwadi student hai ta dingin State Education Policy thar hmang a ni ta ding thu a hril. Social Welfare minister AK Mirabai chun, hiengang hostel hi Social Welfare department chun nuhmei hai umna ding Home bawl a tum thu a hril.

VDF hlui a thisaa hmu
Imphal: VDF a lo thang hlui, a sina inthawka ban tah Ayekpam Suresh @ Tom 932) s/o (L) A Naraiyan of Uripok Tourangbam Leikai chu zanikhan Mr Keisham Romi (32) s/o (L) Keisham Lukhui chengnain, Keisampat Mutum Leikai­ah a thisaa hmu a nih. Forensic science expert hai chun zanikhan a ruong hi an va enfel a, postmortem thaw dingin RIMS morgue­ah sielut a nih.

Silai leh chuktuoin Rs. 40,000 an lakpek
Imphal: Zani zingkar khan helpawl tu ti hrietlo han Kangla  Food Production motor Tata Magic AS 01 DD 8669 chu Saparmeina le Motbung, Sadar Hills inkarah silai leh chuktuoin an suom a, Rs. 40,000/­ silai leh chuktuoin an lakpek niin a driver Maibam Lakshana (30) le a ruolpa  Arambam Ishwarchandra (26) of Nambol Maibam Chingmang hai chun an hril. A suomtu hai hi Bolero dum a chuong mi 7 niin an hril.

Inbiekna a hlawtling a beisei thu a hril
Imphal: Churachandpur chungthang (issue) thuah state sawrkar le nuorna nei han zani hmasa khan inbiekna an nei tan ta a, hi inbiekna hi a hung hlawtling ngei ka beisei tiin zanita Congress Bhavan, Imphal a thu a hril huna Dy. CM in a hril.

Consultative meeting an nei
Jiribam: JAC for Protection of Tribal and Minority People’s Right (PTMPR) chun zanikhan   Tuisuolien hmuna Jiribam biela tlangmi um han consultative meeting an nei. Hi huna hin Anti­Tribal Bills pathum 3 draft­naa Drafting Committee Chairman le Jiribam bieltu ni bawk Th. Debendra Singh, Minister Law & Revenue chu nasa takin an dem.

CBI in thamna latu CPWD a SE an man
New Delhi: Central Bureau of Investigation (CBI) chun Central Public Works Department (CPWD) hnuoia Superintending Engineer (SE) Vinod Kumar chu thamna Rs. 33 lakh ngen le laa intumna leiin an man. Rs. 210 crore sengna Imphal, Manipur­a multipurpose building le  National Information Technology,Imphal hai bawlna dinga mobilization advance le sinthawna bills pekna dinga Visakhapatnam base infrastructure company kuoma Mr Vinod Kumar hin thamna hi a ngen le a lak a nih. Hi le inzawm hin company­a Director (Project) khawm man a nih. CBI team chun Delhi, Gurgaon,Ghaziabad, Dehradun, Lucknow,Imphal le Visakhapatnam hai khawm an dap niin an hril. Gurgaon hmuna company director (project) guesthouse a inthawk Rs. 19 lakh le document lem tam tak an man sa bawk niin CBI chun an hril a, zanikhan Delhi­a designated Court hmaah an pahni hin an inlangtir.


Bihar SP Chief chunga FIR
Patna: Bihar­a Samajwadi party Chief Ram Chandra Prasad Yadav le an party media in­charge Rajesh Kumar hai chu Venkatesh Prasad kuoma inthawk party ticket pekna dingin Rs. 10 lakh an lak tia intumna leiin FIR file khum an nih. FIR petu chu Mr Venkatesh Prasad niin Addl. CEO R. Lakshmanan chun a hril. Ram Chandra Prasad Yadav account­ah Rs. 8 lakh a thun bakah Rajesh Kumar kuomah sumfaiin Rs. 1.75 lakh a pek thu Prasad chun a hril. Hieng lai zing hin Ramchandra Prasad Yadav chun intuma a umna hi hnielin an party suksietna dinga Nitish Kumar thilthaw a nih tiin an tum.

Gold medal la hai lawmmanin Rs. 1 crore
Itanagar: Arunachal Pradesh state sawrkarin a state Sports Policy thar a siem dungzuiin an state mi, Olympic Games a Gold medal la hai chu lawmmanin Rs. 1 crore pei, Silver medal  lahai Rs. 75 lakh pei le Bronze medal la hai Rs. 50 lakh pei pek ning an tih tiin Arunachal Pradesh Government Spokesperson Bamang Felix chun a hril. Chun, Sports tienga thiemna neihai ta dingin sawrkarin sin ruok um haiah 5% reservation, Police department ah medal la ta hai ta dingin 10% (APST) le non­APST ah 5% reservtion pek ning an tih tiin Felix chun a hril bawk.

Samak pakhat kap hlum nawk
Kaziranga: Assam­a Kaziranga National park­a chun Samak pakhat kap hlum nawk a nih.  Forest guard han zani hmasa zan khan Burpahar range sungah silai puok ri an hriet leiin an hnawtzui a, Samak kaptu hai leh iemanichen an inkaptuo a, a hnungin Samak kap tu hai hi an inrel hmang. Forest guard han dappui an thawna huna Samak chal puitling pakhat kap hlum saa hmu a ni a, a Ki la hman lovin an maksan niin official thusuok chun a hril. 

Jail­a drugs supply­na thuah Jail officer 2 man
Faridkot: Punjab­a jail officers pahni hai chu jail sunga drugs­a sumdawngnaa an thangpui tia intumna leiin man a nih. Mana um hai chu Faridkot Jail­a Assistant Superintendent Karamjit Singh Bhuller le Patiala Central Jail­a Head Warden Sukhwinder Singh hai an nih. Mr Bhuller hi jail sunga narcotic drugs sumdawngna a thangpui hlak bakah Sukhwinder hi duty dinga jai a lut lai dap a ni huna inruithei Smack, opium le inruithei dang hai le man niin ei thu dawngna chun a hril. 

Dalit putar hreia chek hlum hnunga raw
Jhansi: Zani hmasa khan Uttar Pradesh­a Hamirpur district sunga Bilgaon village­ah Dalit mi putar kum 90 mi Khimma Ahirwar chu zurui pakhat Sanjay Tiwari chun pawisa an hni a, a pek nuomnaw leiin hreiin an chek hlum bakah meiin an raw. Khimma Ahirwar hi a nuhmei Basanti le an laina hnai dang hai le Temple pana fe an ni a, Mr Tiwari hin Ahirwar kuoma hin pawisa a hni a, a pek nuomnaw leia hreia a chek hlum zo hnunga meia a raw nia hril a nih. Mr Tiwari hi mipuiin an man a, a hnungin Police kutah an inhlan.

Egypt a inthawk Purunsen tonnes 18,000
New Delhi: Purunsen indainaw leiin India chun thla 2 liemta sung khan Egypt a inthawk Purunsen tonnes 18,000 a laklut (import) a, tuhin Egypt a inthawk purunsen tam tak India tieng hun phur mek a nih tiin ei thu dawngna chun a hril a, a hung tlung zo pha India in Egypt a inthawk tukuma Purunsen a laklut chu tonnes 35,000 a tling phak ding a nih. Boruok sik le sa infuknaw le a hun lova ruosur in thlai nasa taka a suksiet leia Purunsen hi ei tlasam a nih.

UP sawrkarin zangnadawmna Rs. 20 lakh
Lucknow: A in huongsungah Bawng a that a, a sa a zawr bakah bawngsa khawm a fak ti thuvuongnva leia Bawng that dodaltu pawl han an vuok hlum Iqlakh (58) of Basida village, Greater Noida area, Uttar Pradesh sunghai chu zangnadawmnain Rs. 20 lakh pek ning an tih tiin Uttar Pradesh Chief Minister Akhilesh Yadav chun a puong. Mithi sunghai chun hi thua hin CBI inquiry thaw dingin an phut.
------------------------------------------------------------------------------
VAWISUN THUPUI
I suolna chu hre phawt phawt la, Lalpa i Pathien chunga chun i lo bawsiet tah a, thing hring tin hnuoia chun hmelmakhai kuomah i lo inphal tah a, ka rwl khawm chu i awi bawk ta nawh a,  Lalpa chun a tih. - Jeremia 3:13

Editorial
Lungril tuiek
Ei lungril put dan hmang an dik ta nawzie le siem that a ngai nasatzie ei hriet seng a, ei hril thei seng bawk. Sienkhawm a taka insiemtha nuom ei um chuong nawh. Hi thil hi Zoram Khawvel sukbuoitu tak a nih. Kei chun hi thil hi lungril tuiek annawleh lungril innge niin ka ngai. Thiltha ei hriet a, a thaw chu ei hang thaw hlak ngei. Ei lungril a tuiek annawleh an nge nasa ta leiin ei inringhlel vel vawng ta a, thil po po hi a kawi zawng vawngin ei lak ta niin an lang. Hi hi ei ram, ei hnam, ei khawtlang le ei kohran hai hmasawn thei nawna san tak niin an lang. Lungril tuiek ta annawleh lungril innge ta hi siemthat thil namei lo takel a ni ring a um.
   
Company, mimal le Kohran hnuoia taima tak le ringum taka sin lo thaw ta hlakhai khawm sawrkar sin an hung thaw meu hin chu an inthlada nghal pei hlak. Mimal, company le kohran hnuoia an thawk laiin an office a hun takah an tlung a, a hun taka tin hlak hai kha sawrkar office­ah chun ain inhnu thei em em a, an tin inhma em em nawk ringawt hlak. Mimal sum en em em hlak hai khan sawrkar sum an ren nawk si nawh. Sawrkar thuomhnaw hai khawm an enkawl uluk lem nawh. Sawrkar sin hi u luk le ringum taka thaw ni inla chu sawrkar school le collge hai hi tu ang chau hi ni der naw nihai. A san chu sawrkar School thenkhat a thawk inchuktirtuhai taimak leiin naupang admit seng lo nei an um tlat el. Hieng laizing hin sawrkar school a tam lem chun student admit ding khawm an hmu zo ngai nawh. Sawrkar Department tum tum haia mi indik, ringum le taima hai hang lawrkhawm ta inla chu Kohran lien pakhat Zaipawl (Choir) zat khawm an um naw el thei.
   
Ei Politics thlir dan le fepui dan hlak chu ram changkanghai thaw dan leh chun an ang naw nasa el si. Ram hmasawnna le inrelbawlna tha tak nei theina ding mi han an ngaituo laiin ei ni rawi ruok chun mimal hamthatna dam, chapona dam, inlulingna dam le dan chunga lengna damin ei hmang a, “hamthatna beisei naw inla iengleiin am politics buoipui ka ta’ ti hi ei lungril indik tak a nih. Politics tienga che thei deu sawrkar sinthawhai lem hi chu sawisel ngam khawm an ni nawh. Thil thaw thei lo hai hlak chu hrentang (hostage) ang elin an thaw bawk si. A tawi zawngin ei duam leiin ei ram hin hma a sawn thei naw a ni deu tak. Hi lungril tuiek le lungril innge hi sukfai a tul hle a nih.
   
Sum hmuna ding a ni phawt chun khel hril ei rin naw a, hming inhawtir pawi ei ti naw a, hnam dang nei ei rin naw a, dan bawsiet pawi ei ti bawk nawh. Chun, ei nun zemawi le ei Kristienna chenin siethat ei rin der nawh. Duamna leiin nuom zat zatin thil ei zawr a, thil man (MRP) thenkhat hlak chu company rate siem ang thei dan ding taka bel chawp mei mei, Gas buk tlinglo, petrol pawl dal, bufai tha le thalo chawkpawla a tha anga zawr, thil  buk tling lova zawr, BPL ni si lo inziek BPL ve ringawt ti vel chenin ei lungril a tuiek tah. Mani ditzawng le hamthatna ding chun  Sakeibaknei phingtam ang el ei nih. Siem thar ei ngai nasa hle.
   
Tulai hin tribal Unity ei hril vung nasa, tribal martyr­hai khawm ei ngaisang, ram le hnam hmangaina leia ei inpekna leiin sin khawm ei thaw inrim. Amiruokchu ti thei ding a hung um ta tlat el. Tuolsung Chanchinbu thenkhatah chu pawl thu insuo chu an dik nawh, false propaganda a nih, mimal inhnikna chau bakah thu bulbal nei lo (baseless) a nih tia inhrilna a hung suok tan tah. Hi thil khawm hi lungril tuiek le lungril inngena leia hung suok a ni dim maw? Ngiatuona a suksei hle!



Post a Comment

Powered by Blogger.