Tuolsung
MUTU in inthuruol taka thawtlang dingin an ngen
CCPur:  Manipur University Tribal Forum (MUTU) & Manipur University Eimi Welfare Society (MUEWS) member hai chun zanikhan District Hospital­a tribal martyrs hai Rs. 20,000/­ in an hung ral a, JPO kutah an inhlan. Hi zo hin KKL Complex, IB Road­ah JAC inpawlpuina an nei a, ngaidan inhriltlangna an nei.
   

MUTU thuoitu hai chun JAC in thaw ding a pek ang ang thaw dinga inpeisa an ni thu hrilin an tlansan lova an thlawp zing ding thu an hril. Imphal an kir nawk huna meeting neiin JAC le thawtlang theina um hai inhrepawa hma an lak ding thu an hril. Ei ram le hnam ta dinga ngaidan tum tum lakhawm a, inthuruol taka sin thaw tlang dingin an ngen a. Hi huna hin MTFD a inthawk Dr Lamkhanpiang kawmin thuhrilna neiin MTFD hmalakna hai report a pek.
   
Chun, EBCC Zion Veng Tualsung Mission Committee han KKL Complex, IB Road­ah zanikhan JAC hai inhmupuiin Pathien kuoma tawngtaipeina an nei. Hi huna hin JAC thangpuina dingin Rs. 5000/­ an inhlan bawk. Local Pastor Chinzamang chun, EBCC Zion Veng in 6AM­8AM sung ei ram le hnam damna ding le hotu hai ta dinga tawngtai pekna hun an hmang zie thu a hril.

Blessed Choir album tlangzar
CCPur:  October 2, 2015, 8:00AM khan Blessed Choir in “Kan hnenah awm ta che’ ti thupui hmanga Video Album an siem tlangzarna Lalramlien In, Rengkai­ah nei a nih. Album hi Rev. H.B. Hluothang, former principal, SBC in a tlang zar. Album tlangzar zo hin ruoi kiltlang a ni bawk. Album thar hi Cassettee zawrna dawr tum tum haia inchawk thei ni tang a tih.

Inkhawmpui thul a nih
CCPUr: Tuithaphai Presbytery Nuhmei Pawl (ICI) Inkhawmpui vawi 55­na October 10& 11, 2015 a Saidan a nei dinga ti chu tulaia Churachandpur boruok leiin thul a nih tiin Secretary, Tuithaphai Pesbytery Nuhmei Pawl, ICI chun inhriettirna a siem.

JPO kutah donation Rs. 42,153/­ le JAC kutah Rs. 1,76,300/­
CCPur: District Hospital, CCPur­a Tribal martyrs hai ralna dinga JPO donation/receiption -ah zanikhan mimal le pawl tum tum 11 han ralna an pek a, zanita JPO kuta donation hmu chu a rengin Rs. 42,153/­ bakah Puon 27, Maibal 33, Memento 9 le Mango drink box 1 a nih. Zanita ralna petu hai lai­ Haotak Phailen Christian Church Rs.2,343/; Mannem of Lanva in Maibal  3; Tuilakjang EBCC, Singngat sub divn. Rs.2,000/­; PCI (R) North Lamka Presbytery Rs.10,000/ le   Puon 9­; Jangnuam V/S Singngat sub divn. Rs.1,000/­; EBCC Zion Veng Mission Committee & Dorcas Committee Rs.5,000/­, Puon 9 le Maibal 25; B. Muan Ngaihte & Friends Memento 9; S.Pumzalian of Elim Veng, New Lamka Maibal pum 5; Manipur University Tribal Union  Rs.20,000/­; Manipur University Eimi Welfare Society puon 9; CT Lian, MDC mango drink box 1 le gate donation/reception - a hmu Rs.1,810 a nih. Ei hriet china JPO kuta ralna lut hi Rs. 51,50,782/­ a ni tah.
   
Chun, JAC againts Anti­ Tribal Bill hnuoia Finance Sub Committee in In tina Rs. 100/ ralna dawl dinga an inhriettir angin zanikhan Tribal Martyrs hai ralna dingin khuo 34 hai bakah Hauboi of Hq. Veng chun Rs. 100/­ a pek a, a renga JAC kuta zanita ralna sum lut chu Rs.1,76,300/­ a nih. Zanita ralna pelut khuo 34 hai hi Singngat Block a inthawk vawng an nih. JAC Finance Sub­Committee kuta ralna sum hi khuo 280 haia inthawk a lut ta a, hieng khuo tum tum han ralna sum an dawl khawm Finance Sub­Committee kuta an peklut chu Rs. 23,35,760/­ a tling tah.

NGMFC inrawinain mass prayer
CCPur: October 4, 2015 (Pathienni), 1­4PM sung khin Nationwide Gospel Music Festival Committee (NGMFC) huoihawtnain Public Ground, CCPur­ah ei ram ta dinga tawngtairuolna (mass prayer for our nation) um a tih. Sun dar 12:30 a inthawk 1PM chen NGMF worship Team inrawinain inkhawmna hun hmang ning a ta, hi zo hin mass prayer tan a ni ding a nih. Hi huna Kohran thuoitu, social & political leaders, officers le mitin thang dingin NGMF chun fielna a siem. Prayer leader ding hai chu Rev. S. Vungminthang, Evan Lunkhosei (Hesei), Rev. Zathangsing Zate, le Rev. R. Vanmawia hai ning an tih.

JPO in lawmthu an hril
CCPur: Manipur Assembly in August 31, 2015 nia Bills 3 a passed dodalna leia buoina suoka tribal martyrs hai ralna ding le hliem hai thangpuina ding petu hai popo chungah Joint Philanthropic Organisation (KKL, HYA, MYA, ZYA) chun lawmthu an hril. Hi baka hin JPO function na ding le tha le zung, sum le pa le thil dang danga thangpui tu hai chunga lawmthu an puong. JPO function theina dinga mimal, organisation, kohran le Bank han JPO kuoma sum an pekkhawm chu Rs. 1,14,190 a tling ta a, thangpuina petu popo chunga JPO chun lawmthu a hril.

Headline
Regular Governor ngen ding le President in ILPS Bill a pawmpui ka beisei: CM O.Ibobi Singh
Imphal: Zanikhan Congress Bhavan, B.T. Road, Imphal­ah 146th Gandhi Jayanti hmang a ni a, hi huna Manipur CM O .Ibobi Singh in thu a hrilnaa chun, ka sawrkar chun regular Governor a dit a, sawrkar thlungpui kuomah regular Governor a ngen a, la ngen zawm nawk pei a tih. Tulaia law and order ngirhmun enin regular Governor ei mamaw a nih. Governor neina ding thua hin state sawrkarin thu a neinaw a, sawrkar thlungpui thuneina le a ruot ding a nih tiin a hril.
   
ILPS Bills 3 hai chu India President kuta um a ni a, President in hieng Bills 3 hai hi a pawmpui le suoi a hung thaw ka beisei tiin CM O.Ibobi Singh chun a hril. President in hieng Bills 3 hai chungthua hin Union Home Ministry, Union Law Ministry le an zawmpui dang dang hai a lan rawnpui ding a ni leiin Bills pawmpui le suoi a thawna dinga hin hun iemanichen chu a la lak ding a nih. President chun Manipur­a tlangmi le phaimihai ta dinga ieng thil am an tlun ding, a tha le tha naw ding hai khawm a enfel a tul ding a nih tiin O.Ibobi Singh chun a hril. Tulaia Churachandpur thua Chanchinbumihai indawnna siem dawnin, an hotuhai inbiekpui dinga fiel an ni a, vawisun hin Kuki Innpi thuoituhai le State sawrkar han inbiekna an nei ding a nih tiin a dawn. SoO zieknaa thang hai thil ngen chu thil thei ding a ni chun sawrkar chun pek dingin an pei a, Manipur state sunga State hran siem le pek chu State sawrkar thuneina khel tieng a ni a, Manipur ram thedarna ding ruok chun state sawrkarin thil thaw naw nih tiin O.Ibobi Singh chun a hril.
           
Sanjenthong leilak dawa um mek chungthu a hrilnaa chun, hi leilak dawna dinga hmangruo tul le pawimaw hai po po a tlungkim vawng ta a, Sangai Festival nei hma ngeia zo fel tum a nih tiin CM chun a hril.

Manipur le Mizoram haiah NFSA
Imphal/Aizawl: Manipur Food & Education Minister M. Okendro chun Manipur­ah National Food Security Act (NFSA) chu January, 2016 ah thaw tan ning a tih tiin a hril. Mizoram Food, Civil Supplies & Consumar Affairs Minister John Rotluangliana chun, an state ah NFSA hi November, 2015 a inthawk an thaw tan ding niin a hril. Tripura chun September 1, 2015 a intahwk khan NFSA hi an thaw tan tah. NE biela chun a thaw tan hmasa tak an nih.

Meitei Nationalist Party indin
Imphal: Political Party thar, Meitei Nationalist Party ti hmingchawiin September 30, 2015 khan indin a ni a, founder President dingin Brahmacharimayum Angousana Sharma lungruol taka thlang a nih tiin zanita Hotel Mass, Imphal­a Brahmacharimayum Angousana Sharma in Chanchinbumihai an hmupui huna a hril. Hi party thiltum pakhat chu Meitei­hai Schedule Tribe a zieklut a nih. Meitei­hai Schedule Tribe a zieklut anni chun Manipur a cheng hnam dang danghai laia intluktlangna um lo chu a hung sukbo ding a nih tiin Mr Sharma chun a hril.

Biekin bawlna dingin Rs. 5,000
Imphal: Kotel Kanpadan, Chandel District­a Kotel Kanpadcan Baptist Church bawlna dingin 4th Assam Rifles chun Rs. 5,000 October 1, 2015 khan an pek bakah an thei ang anga thangpui pei dingin Pastor Su Than Son Laiukang le Khuntak Village Chief hai an lo hril.

Mizoram PSC Chairman dinga fiel
Imphal: Manipur Chief Secretary a inthawka pension zo hlim Pu P.C. Lawmkunga chu Mizoram State sawrkarin Mizoram Public Service Commission (MPSC) Chairman sin chel dingin a fiel. Hi fielna hi a pawm ding niin P.C. Lawmkunga chun a hril.

EC in Lalu le Sushil Modi hai Show Cause notice
Patna: Election Commission (EC) chun RJD President Lalu Prasad le senior BJP leader Sushil Kumar Modi hai chu Election campaign an nei huna Election Code of conduct bawsiea intum le le FIR registered khum an nina thua hrilfiena October 6, 2015 chena pe dingin an hriettir. Sushil Modi hi  campaign a nei huna voters hai Color TVs, Laptops le dhoti­saris hai pek dinga a tiem leia FIR file khum a ni a, Mr Prasad hi Raghopur hmuna public rally nei huna hnam thila tawngkam a nei leia FIR file khum a nih.

Brown Sugar 1.450kg leh pasal 1 man
Kozhikode: October 1, 2015 zing dar 5 vel khan Kerala State a Kozhikode hmuna brown sugar (Grade 3 Heroin) 1.450 kg leh Savaad (38) s/o Mammed Koya of Pantheerankavu chu  Excise officials han an man. Brown Sugar hi international market rate a chun Rs. 1.5 crore manhu vel nia hril a nih. Savaad hin Kuwait rama zawr le thawn dinga Delhi a inthawk Brown Sugar hi an chawk niin an puong.

BJP in Vision Document an tlangzar
Patna: Bihar Assembly Election le inzawmin zanikhan BJP in Vision document an tlangzar. An party thlanglal an ni chun kum 2022 chenah Bihar­a Inhmun nei lo hai inhmun le In bawlna hmangruo pek ding, tui, electricity le ekin hai In tina pek ding tihai an Vision Document a hin a thangsa. Chun, hnam hnufuol Dalit le Maha­dalit hai chu a thlawna Colour TV pek ding, technical inchuk le nuhmei hai loan a pung tlawmtea pek ding, Atal Medicine Centres haiah inthawk damdawi pek ding, lamlien hai pucca road a siem ding, in tinin Ekin an nei ngei ngei theina dinga loan pek ding tihai a thang bawk.

Mahatma Gandhi piengchampha
New Delhi: Zanikhan India ram pumpuiah Mahatma Gandhi piengchampha a vawi 146­na hmang a nih. Delhi a chun President Pranab Mukherjee; Vice President Hamid Ansari; PM Narendra Modi; AICC President Sonia Gandhi; BJP thuoitu hlun L.K. Advani, Delhi CM Arjun Kejriwal, Union Ministers le thuoitu dang danghai an thang a, Mahatma Gandhi thlan Raj Ghat ah a hrietzingna le inzanain par an van hlan tawl.

Navy Chief Australia ramah
New Delhi: Australia rama ni 6 sung cham dingin Chief of Naval Staff Admiral R.K. Dhowan chun zanikhan New Delhi suoksanin Australia khawpui Canberra a pan. Australia rama a cham sungin Austrialia Chief of Royal Navy,Vice Chief of Defence Staff, Defence Secretary le Senior Naval Officer­hai inhmupui a tih. Australia Navy in Sea Power Conference an huoihawta khawm R.K. Dhawan hi thang a tih.

Maoist thuoitu le an thlawppui mi 2 man
Guwahati: Maoist thuoitu lulawk le founder in­charge of Upper Assam Leading Committee of the Communist Party of India (Maoist), Aditya Bora le an thlawppui mi 2, Uttam Hazarika le Binanda Bora hai chu Assam Police han Dergaon, Golaghat district, Assam ah an man. A kuta inthawk 9mm Pistol 1 le a mu 12 hmu le mansa a nih tiin Police thusuok chun a hril. Kum 2011 khawm khan Saranda Reserved Forest, Odisha ah an thlawpui mi 2, Tingraj Orang le Ashis Sabar hai leh man an lo ni ta a, Assam Police kutah inhlan an ni a, sienkhawm bail­a a suok hnungin Maoist pawl hi a zawm nawk a nih tiin Police chun an hril.

Sri Lanka Navy han Ngamantu 7 an man
Rameswaram: Zanikhan International Maritime Boundary Line pel a, Sri Lanka tuipuia  dan bawse a Nga man India Ngamantu 7 an len le Lawng hai leh Sri Lanka Navy han  Katchathivu islet ah an man niin Subburaj, Joint Director (Fisheries), Govt. of Tamil Nadu chun a hril. Mana um Ngamantuhai hi Kankesanthurai tieng thuoi an nih.

Zu Rs. 7,00,000 manhu man
Muzaffarnagar: Zani hmasa zantieng khan Excise le Police Department thangruol han Uttar Pradesh a Mathura village­ah Car pakhat sukchawla an dapnaah Zu cartoons 43, Rs. 7,00,000 manhu vel dapdawkin a neitu Harbindra le Shyamlal hai leh an man. Panchayat election a um ding a ni a, vote zawngnaa hmang dinga Haryana state a inthawka UP a phurlut a nih tiin Karunendra Singh, District Excise Officer chun a hril.

CBI in Mayawati thu indawnna nei
New Delhi: Uttar Pradesh Chief Minister hlui Ms Mayawati chu multi­crore National Rural Health Mission (NRHM) scam thuah inrawlna a nei ve ti evidence an hmu thar leiin CBI chun  zanikhan thu indawnna an nei. NRHM scam a hin CBI chun FIRs 74 le Chargesheets 48 an siem ta a nih. Hi scam hi NRHM hnuoia indiklo taka District Project Officers (DPO) lakna thubuoi a nih.

Delhi­ah Dengue leiin mi 8 an thi nawk
New Delhi: Delhi­a chun October 1, 2015 khan Dengue natna leiin mi 8 an thi belsa nawk leiin tuchena Dengue leia Delhi hmuna thina tuok chu 25 an tling ta a, Dengue invawi 6,486 an tling tah tiin official thusuok chun a hril. Kum 2010 khan Delhi­a hin Dengue invawi 6,259 an um a, mi 8 Dengue leiin an thi a, tukum hi Dengue leia kum 10 liemta sunga mi an thi rawn kum tak la nia hriet a nih.

Motor eksiden­ah Army officers 2 an thi
Jammu: Zani zingkar dar 5 vel khan Jammu­ Pathankot National Highway, Samba district­ah Army motor in Truck pakhat a baw a, Army officers 2, Colonel Yogesh Kumar Gautam le Major Harish Deepak Johri hai a hmuna an thi nghal tiin Defence spokesperson Col. S.D. Goswami chun a hril. Army chun Court of inquiry thaw dingin Order an suo.

Pak. PM rawtna India in a hnawl
New Delhi: Pakistan Prime Minister Nawaz Sharif in UN General Assembly­a thu a hrilna a inremna le muongna a um theina dinga thil 4 rawtna a siem hai chu hnawlin External Affairs Minister Ms Sushma Swaraj chun, an ram pahni hai inkara inlaichinna tha a um theina ding in Pakistan chun rawlrala che hai a thangpuina tawpsan sienla  a hun tiin a hril. Inremna dinga rawtna pali siem hran a ngai naw a, Pakistan chun rawlrawla che hai a thangpuina tawpsan sienla, India chu inremna dinga inbiek an pei zing a nih, sienkhawm tharum thawna le rawlrala chet han an chawkbuoi ding a ni nawh. India chu rawlrala chetna chungthua National Security Advisor (NSA) level­a inbiekna neia hril fel an pei zing bakah Pakistan in hi hi a zawm chun  Director General of Military Operations level­a inbiek khawm India chu an pei zing a nih tiin Sushma Swaraj chun a hril.

Russia in Syria a va bomb; mi 36 an thi
New York: Russia indona vuongna han October 1, 2015 khan Syria rama Homs province a va bomb a, naupang 5 thangsain pawitawklo civil mi 36 an thi niin Syria rama Selkaltu Pawl han an hril. US chun hi thil tlung hi a dem a, a ngaimaw hle a nih tiin US Secretary of State, John Kerry chun a hril. Chun, Russia in a va bomb­na hmun hi terrorist­hai chetna hmun ni lo a nih tiin US chun a hril.

Vuongna tuoksiet­ah mi 11 an thi
Kabul: US Vuongna US C­130 (Hercules) chu Jalalabad Airport, Afghanistan ah zani hmasa zanril lai khan tuoksiet a tuok a, mi 11 an thi a, hienghai laia 6 hai chu US sipai hai ta dinga sinthaw le a dang hai chu Civilian Contractors an nih tiin US Army Colonel Brian Tribus chun a hril. Taliban Spokesman Zabihullah Mujahid chun US vuongna hi an ni kapthlak niin an hril.  US ruok chun iengleia tuoksiet tuok am ti a sui mek niin a hril.
------------------------------------------------------------------------------
VAWISUN THUPUI
Nunghak chun an cheina thuomhnaw chu a thienghlim, mo chun a mo puon chu a theinghil thei am a nih? Ka mihai ruok chun nihai tiem seng loa inthawk tah an mi theinghil a nih.  ­-Jeremia 2:32

Editorial
Thurawn tha le ngaidan tha

Pathien zarin ei thaw nek nek a, kum tawp tieng ei lo tlung nawk der ta a. Harsatna le buoina chi tum tum hai bakah thina le hliemna hai tuok inlakhawm ei ngaidan le thurawn tha hai ei inlaktuo a, inchuknainhai hawng thei nawk ding le student han an lekha inchukna sunzawm nawk thei ding ngirhmuna ei hang um nawk el ta hi lawm a um. Ieng thil khawm thaw ding ni inla, mihriem le mihriem hai inkarah inlaichinna tha, inpawtawnna tha, thurawn tha le ngaidan tha inlaktuo theina lungril ei nei hi a pawimaw thlawt a nih. A pawimaw el chau ni lovin, hmasawnna le hlawtlingna leilak pawimaw tak a nih.
    
Thurawn tha le ngaidan tha hai hi dawngsawng thiem le hmang tangkai thiem a tul. Hotu le thuoitu ei ni chun ei hnuoia thawkhai amani, sin ei thawpuihai amani leh ei thawtlangna boruok chu a thain a zalen ding a nih. Hotu mizie, um dan le nungchang tha hai khawm hriet a, entawntlak le inzatlaka um a tul bawk. Thunei taluo le inlaklien hai hi a tha naw a, mipui rawng ei bawl tak tak ding a ni chun um dan tawk thiem ding a nih. Chuong a ninaw chun insel inhalna a hung suok hlak.
   
Ei hun tawng izir le mihriem mizie hran hran a zirin, mi pangngai ta ding chun mihai sawngbawl dan, dawngsawng dan le hril tum hrietthiempui zung zung a ngai. Mihai inza hlawna hi, thuneina lek taluo le hril puot puot a hlaw suok chi a ninaw a, entawntlak a um le thil thawa hlaw suok chi a nih. Mipui hmaa inpakna thu saksuok theim a, sawiselna kawnga ruok chun mi hriet lova sawisel ding a nih. Ei mihriem chanpui hai le inlaichinna tha tak nei hi thil tul le thaw makmaw a nih. Mani thu le ngaidan dit taluotna hin mi a siem tha ngai naw a, ei ngaidan a lo ni naw pal khawma inza der thiem hi mivar hai thaw dan a nih.
   
Hotu ni lei ela mani rawihai chunga intivei taluoa um hi a tha naw a, a hrisel bawk nawh. Chapona hung irsuok a ni leiin nghawng tha naw a nei sawt nuom hlak. Chu nek chun, an ni rawn ve pumin, rawtna dam, thurawn dam le infuina thu tha tak tak hmel hlim takin inlangsuoktir la, phur takin hmabak hlen dinga la um hai chu tha takin hlenpui thei ngei i tih. Mi thu le hla ngun takin ngaithla pek rawp hlak rawh. Chun, tawngbau mawi le inzaum tak hmang rawp a; tawng mawi lo le intiveina tawngbau hmang lo hram hi thiltha a ni hlak.
   
Mi chapo le intivei hai chun mihai thurawn le rawtna hai iengma lova ngainepin an hnawl hlak. Chu thil chun inremnawna le innghirnghona a hung rasuok hlak. Rawtna tha, ngaidan tha le thurawn tha la hlak hai chun rorel dan an thiem nge nge a, mi an huikhawm hlak. thurawn tha pawm nuom lova ei hnawl rawp chun ei rorel annawleh ei thu rel inlai ngai naw nih ti hi lungrila sie tlat ding a nih.
           

Mihriem hi mani khat chauva khawsa thei lo ei ni a, inkamtuo, inthangpuituo a, ei hrietnaw hai inhriltuo a, khawsa tlang ding ei nih. Mani khata khawsa thei lo, in mamawtuo seng ei nih. Mi hausahai khawm pasie hai bovin an um thei naw a, milien le milal hai khawm mi hnuoihnung hai boin an khawsa thei nawh. Ramsa, vate le rannung hai khawm hi a hawna tla dinga khuonu siem an nih. Pathien angpuia siem mihriem hai lem hi chu a mala um ding ei ninaw a, ei dit dan, ei ngaidan hai hriltlang a, thurawn tha inpetuo ding hrim ei nih.

Post a Comment

Powered by Blogger.