Tuolsung headline
Sawrkarin inbiek a nuom tak tak chun President kuta um tah Bill 3 hai a lakkir ding a nih: Inpuis
CCPur: Zani zantieng khan KIC Office, Tuibuong-ah Kuki Inpi Manipur, Zomi Council, Hmar Inpui, Mizo People Convention, Vaiphei People Convention, Simte Tribe Council, Paite Tribe Council, United Zou Organisation, Tedim Chin Union, Komrem Union, Thadou Tribe Council, Gangte Tribe Union, Kuki Inpi/CCPur thuoitu han joint meeting an nei. Hi huna hin State sawrkarin Anti-Tribal bills 3 hai repeal dinga ngenna an siem a ngaisaknaw chungthu le Martyrs 9 hai chunga tawngkam iengkhawm sawrkarin a neinaw chungthu hai an hriltlang.
Hi huna hin KIM in Sept. 21, 2015 nia Manipur sawrkar kuoma Bills 3 hai lakkir a, CM chu Bills hai a table a sie a, Hills le valley-a stake holders hai le Bills 3 hai chungthu ngaituo dinga fielna siem dinga an phutna ngaisak a ninaw nasa taka an dem thu an puong. Hi baka hin Anti-tribal bills 3 hai chungthua govt. level-a bawzuina KIM kutah ringzo taka pek a ni a, KIM hmalakna chu Inpui 4 han an thlawp tlat ding tiin an rel.
Hi meeting zo-a Press/media hai an inhmupuinaah, State sawrkarin inbiek ding tia Inpui le JAC hai fiel an nina thuah, Bill 3 hai President kut a tlung ta leiin, hieng Bill hai chungthua inbiekpui dinga fielna chu mumal lo le inhlemna mei mei a nih tiin an hril a, Manipur Govt. in inbiek a nuom tak tak a ni chun President table-a inthawk Bill 3 hai lakir a ta, chu hnungah inbiekna a um thei chau ding a nih tiin an hril.
CCPur College Centre-ah candidates 463
CCPur: Staff Selection Commission (SSC) huoihawtnain October 4, 2015, 10-12PM inkar sung khin BSF, CISF, CRPF, SSB, ITBP, NIA, SSF le Assam Rifles haia Constable General duty lakna dinga exam a um ding a ni a. CCPur College khawm Exam Centre pakhat-a hmang ve a ni leiin candidates 463 hi centre-a hin inthung an tih. Candidates hai chu zing dar 9 a College tlung hman seng dinga inhriettir an ni a, 9:30AM in gate khar ning a tih tiin ei thu dawngna chun a hril.
October 5 a inthawk School/Colleges hai hawng ta ding
CCPur: Zani (October 1, 2015), 11:30AM khan JAC inrawinain KKL Complex, IB Road, CCPur-ah joint meeting nei a ni a, hi huna hin khuo le veng tina Village Authority/Village Welfare Committee le Women Wings le a dang dang hai thangin hma tienga nuorna fepui pei dan ding an hriltlang.
Joint meeting-a fe khawm han ngaidan le rawtna tum tum an siem hnungin October 5, 2015 (Thawtanni) a inthawk thuthar um nawk hmapo a dingin nuorna/aggitation hun sukdanglam a nih. Hi dungzui hin nitin 5:00AM -2:00PM sung bandh inthlazal ning a ta, October 5, 2015 a inthawk Schools le Colleges hai sun dar 12:00 chen hawng thei ta ding (bandh hun tlung hma 2:00PM chena student hai in an tlung hman seng theina ding).
Hi baka hin tuta nuorna ei fepui mek hi tha taka a fe zawmpei theina dingin sit-in-protest hieng hmun haia chau hin zantieng 2:00PM - 5:00PM sungin Kangvai, Monglenphai, Lighthouse/Sielmat, CCPur Police station, District Hospital, Rayburn College (New Lamka) le Saidan haia nei ding. Sit-in-protest nei zo hnung tieng chu Village Authoity/Village Welfare Committee tinin anni khuo le veng chita a pawimaw le tul an ti anga duty an insiem ding ti a nih.
Bandh hi zantieng 2:00PM a tan ding a ni a, Bandh hin Medical, electricity, telecom, water supply (excluding private service providers), media, Banks le Treasury hai huom naw nih tiin Information and Publicty, JAC Against Anti-Tribal Bills in zanita thusuok a siema chun an ziek.
JAC Finance kutah ralna Rs. 50,200/-
CCPur: JAC-a Finance Sub-Committee chun In tina Martyrs hai ralna Rs. 100/- dawl dinga an hriettir angin zanikhan khuo12 haia inthawk Martyrs hai ralna Rs. 50,200/- a lut nawk. Zanita ralna lutna khuo hai chu- Singngat block-a Tuilakzang Rs 1,100/-; Vokbual Rs 2,000/-; T. Singtam Rs 1,900/-; L. Kanan village Rs.2,400/; Zebellei village Rs.3,400/; Zokhonuom village Rs.1,300/-. Thanlon sub divn-a inthawk Mong-on village Rs.2,000/; Henglep block a inthawk L.Khengjang village Rs.4,200/-; L. Khongbung village Rs.1,000/-. Saikawt block a inthawk Nazareth village Rs.3,500/; Saikul village 2,400/; CCPur block a inthawk Nghathal village 25,000/- bakah Rintluanga in Rs.100/- Finance Sub-Committee JAC kutah a pek.
ZC Chairman ding in Vungsuanthang
CCPur: Zani zingkar 7:30AM khan Zomi Council (ZC) chun Hiangtam Lamka-a PTC office-ah Cabinet emergency meeting an nei a, ZC Chairman ni lai LB Sona in inbanna a pek chu hnukkir a tumnaw leiin an banna pek hi cabinet in an pawmpek a. Thuthar um hmakhat a dingin PTC GHQ a President ni lai mek le Zomi Council-a Vice Chairman G. Vungsuanthang chu i/c Chairman, Zomi Council chel dingin an ruot.
Day of Prayer an nei ding
CCPur: October 5, 2015 zing dar 9:30 a inthawk khin Trinity College and Seminary, Sielmat chun tulaia ei rama buoina le inzawmin Day of Prayer nei an tih. Students le hotuhai thang seng dinga inhriettir le ngen an nih. Lo thei lo thil leia thang thei naw dinghai chun Principal Or Registrar kuomah hril dinga ti an nih.
ZC in thusuok le ngenna an siem
CCPur: Zomi Council chun Manipur Assembly in Anti-Tribal Bills 3 a pass leia ei ram humhimna dinga pasaltha 9 hringna inhlan le le mi 50 chuong hliem hai inzana an pek a, anni hai leia tuta ei issue hi hung suok a ni leiin mipui han a letling zawnga ei hmang chun an thlarau a hadam naw ding a ni a, ei buoina hi Manipur-a tlangmi po po buoina a ni leiin District dang hai leh hma ei lak tlang a pawimaw thu; Manipur Tribal Forum Delhi hai hmalakna leiin lawmum an ti thu le an chunga mipui an lawm thu; ATSUM Coordination Committee chun Joint Delegation team an hmatiengin Delhi-ah tir a tum a, anni hung kir nawk huna hmatienga hmalak pei dan ding ngaituo tlang nawk a ni ding thu; Pasal tha hai thina san mipui han theinghil lovin, a thlawna an thisen inluong tir el tum loa hma la tlang seng dingin ngenna an siem. Tharum thang lova inthuruol taka ei insunga buoina a sosang nawna dinga hma la seng ding le hotu hai thu ngaia hma la seng dingin ZC chun mipui hai a ngen.
Peace Ground-ah tawngtairuolna
CCPur: October 3, 2015 (Inrinni) , 6:30AM-9:30AM sung khin Society for Fast Justice-Churachandpur (SFFJC) huoihawtnain ei ram damna dingin mimal, kohran le pawl bik um lovin a nuom taphawt hai thang theina dingin tawngtairuolna hun hmang ning a tih. Inhnikna nei taphawt thang dinga fiel ei nih.
ZC Chairman ding in Vungsuanthang
CCPur: Zani zingkar 7:30AM khan Zomi Council (ZC) chun Hiangtam Lamka-a PTC office-ah Cabinet emergency meeting an nei a, ZC Chairman ni lai LB Sona in inbanna a pek chu hnukkir a tumnaw leiin an banna pek hi cabinet in an pawmpek a. Thuthar um hmakhat a dingin PTC GHQ a President ni lai mek le Zomi Council-a Vice Chairman G. Vungsuanthang chu i/c Chairman, Zomi Council chel dingin an ruot.
Headline
Ieng thil khawm nisienla inbiekna neia chingfel thei vawng a a nih: O.Ibobi Singh
Imphal: Inspector General Assam Rifles (IGAR) South huoihawtnain zanikhan IGAR (South) Headquarters, Mantripukhri ah “An Emergent Manipur- The Way Ahead” ti thupuia neiin seminar nei a nih. Hi Seminar hi CM O.Ibobi Singh in khuollien nipumin a hawng. Hi seminar a hin Lt. Gen. N.K. Singh, PVSM, UYSM, AVSM, VSM, (Retd) Chairman Ceasefire Monitoring Group; Lt. Gen. Bipin Rawat, AVSM,YSM, SM, VSM, GOC 3 Corps, Manipur; Maj. Gen. V.S. Sreenivas, VSM, Inspector General Assam Rifles; Brigadier Vinod T. Mathew, Commander Sector; Dr Thiyam Bharat Singh, Prof. W. Naba Kumar, Prof. Amar Yumnam le Prof. K. Ibo, Manipur University hai chu penalist in an thang tawl.
CM, O.Ibobi Singh chun inzing uta bandh, blockade le helpawlhai chetna hin harsatna an tlun a, hmasawnna sin thawna sukbuoiin a dal a, mipui han hamthatna an dawng ding ang an dawng thei naw pha a nih tiin thu a hrilna huna a hrillang. Suspension of Operation (SoO) zieknaa thang tlangram le phairam helpawlhai leh inbiekna nei mek a ni a, inbieknaa la thang lo helpawl group dang dang hai khawm tharum insuona bansan le an ralthuomhai intung a, nundan pangngai hung zawma inbiekna a thang dingin a fiel nawn nawk. Lungsenna le lungawinawna hritthlakna dinga sawrkar thil hai raw siet hi thil thaw dan ding a ni naw bakah lampui indik a ni nawh. Tu pawl ta ding khawmin sawrkarin inbiek a ni theina dingin kawt lien takel a hawng zing a nih. Ieng thil khawm nisienla inbiekna neia chingfel thei vawng a nih tiin O.Ibobi Singh chun a hril. Ei rama nun dan pangngai a hung um nawk theina ding, inremna le muongna a hung um theina dingin hi seminar a thanghai chu ngaidan tha le thurawn tha hai hrila pe dingin CM chun ngenna a siem.
Draft Electoral Roll insuo
Imphal: Manipur Asembly Constituencies 60 haiah Draft Electoral Roll chu insuo a ni ta a, sawiselna siem nuom le Electoral roll a hming zieklut thar nuomhai chun mani umna District senga DC or SDO office haiah October 30, 2015 chena hnina peklut thei ning a tih tiin official thusuok chun a hril. January 1, 2016 chena kum18 tling ta ding hai chu voter list-a hin inzieklut thei ning a tih.
AR han lunghlu grams 104 an dapdawk
Imphal: September 30, 2015 khan 24 Assam Rifles han Imphal-Moreh Road a Khudengthabi Check Post a motor inlawn vel hai sukchawla an dapnaah lunghlu grams 104, polythene bag a inthun, Rs. 6.76 lakh manhu vel an dapdawk a, a neitu ni nuom an um naw leiin an lak a, Customs Department, Moreh kutah an inhlan niin Assam Rifles thusuok chun a hril.
Mega Marathon thaw an khap
Imphal: Hungtlung ding October 4, 2015 a Mega Marathon BJP Manipur in huoihawt an tum chu Maoist Communist Party Manipur (MCPM) chun an khap thu an puonglang. BJP in Hindutva ideology an tu tumna le hnam tum tum hai thedar tumna a nih tiin an hril. Tu pawlkhawm Marathon a hin thng lo dingin an ngen. Ieng thil khawm a lo tlung pal chun a maw BJP in phur a tih tiin an hril. Chun, Oct. 4, 2015 a Marathon um ding dodalnaa General Strike thaw an tum chu an hlip ta niin MCPM thusuok chun a hril.
CM in JNIMS Auditorium a hawng
Imphal: Zanikhan CM O.Ibobi Singh in JNIMS Auditorium a hawng. Hi Auditorium hi Rs. 16.07 crore senga bawl a nih. State sawrkar chun hriselna tiengpang hi a ngaipawimaw hle leiin Doctor hai umna ding Quarter khawm bawl a la ni pei ding thu, JNIMS chu India hmarsak biela Medical Institution tha taka siem tum a ni thu hai O.Ibobi Singh in thu a hrilna huna a hrillang.
Rul chuk mi 2 AR han an sansuok
Imphal: Zanikhan Seitabi Devi (58), Utlou Mayai Leikai, Bishnupur District le Maniha (56) of Maitram, Imphal West District hai chu Rulin a chuk hliem a, HQ IGAR(South) hnuoia um 12-Bihar Regiment han an sansuok. Rul tur thatna an kap (injection) hnungin an natna hi a hung dam nawk niin an sung hai chun an hril.
O. Nabakishore in CS sin
Imphal: Zani hmasaa inthawk khan O. Nabakishore, IAS in Chief Secretary, Manipur sin chelin a office a kai tan tah. Ama hi 1984 batch IAS officer, Manipur-Tripura Cadre a nih. Chief Secretary sin a chel hma hin Additional Chief Secretary (Works, Election & CEO) a lo chel a nih.
Diesel man 50 paise a sukpung
New Delhi: Diesel man litre khatah 50Paise a sukpung a ni a, petrol man ruok chu sukpung ve a ni nawh. Diesel man sukpunga um hi zanita inthawk khan hmang tan a ni a, Delhi a chun litre 1 ah Rs. 44.95 a zawr a nih. May 16, 2015 a inthawka diesel man sukpunga a um vawikhatna a nih. Tax lak dan dungzuiin state hran hran a diesel man hi an ang naw ding a nih. Mumbai a Rs. 52.08, Kolkata ah Rs. 48.71 le Chennai ah Rs. 46.08 a nih.
Naga mihai sukdik dingin
Dimapur: NSCN(IM) Chairman, Isak Chishi Swu chun thil iengkim han hun an nei a, Naga mihai ta dingin tu hi politics thila ei suksuolna hai laka insiemthat le sukdikna hun a nih tia hrilin Naga mihai chu politics a an thil suksuolhai sukdik dingin a ngen. Hi thil hi ei inthuruolna ding le ei hnam damna ding a nih tiin Isak Chishi Swu chun a hril.
Himachal Pradesh HC in a cheltang
Shimla: An pawisa hmusuokna le inmil lo khawpin an hausa tia intumna case a CBI in Himachal Pradesh CM Virbhadra Singh le a nuhmei Pratibha Singh man an tumna chu zanikhan Himachal Pradesh High Court in a cheltang a, CBI in case an suina ruok chu la sunzawm pei dingin a rel. Chun, hi case a hearing chu November 18, 2015 a nei dingin a bituk. Virbhadra Singh aiawin Court ah Union Minister hlui le Supreme Court lawyer hlui Kapil Sibal an lang.
LGBI Airport suklienna dingin Rs. 1,200 crore
New Delhi: Assam State a Lokpriya Gopinath Bordoloi International Airport (LGBI) siemlien, sukchangkang le cheimawina dingin sawrkar thlungpui chun Rs. 1,200 crore sangsawn a remtih tiin Union Minister of State for Tourism & Civil Aviation minister Dr Mahesh Sharma chun a hril. Agartala Airport suklienna dingin Rs. 484 crore le Tezu airport, Arunachal Pradesh suklienna dingin Rs. 90 crore peksuok remti a nih tiin a hril bawk.
Mani le mani inthat 743 an tling tah
Aurangabad: Marathwada Region a chun September 22-28, 2015 inkar sung khan loneitu mani le mani inthat 14 an um nawk leiin tuta kum fe meka Mathwada region-a loneitu mani le mani inthat chu 743 an tling tah. Mani le mani inthat hai laia a tam lem chu khaw inthal leia an loneina haia an hlawsam leia beidawnga inthat an nih tiin Shetkari Sanghatana thuoitu Shrikant Umrikar chun a hril.
NDFB(S) Commander ralthuom leh man
Guwahati: September 30, 2015 khan Indian Army le Assam Police thangruol han report an hmu leia Assam le Bhutan ramri Chirang district-a dappui an thawnaah NDFB(S) self-styled Deputy Commanding Officer Udiyachal Dwimary @ Udangcha chu 7.65mm Pistol 1, a mu iemanizat le Hand grenade 2 leh an man. Kum 2014 a Baksa district, Assam-a Muslim hai thatna inrawlna nei ve niin Police chun an hril. Chun, hi ni ma hin Kokrajhar district, Assam-ah NDFB(S) cadre Sandhulal Basumatary @ Shakal @ Birkan G Basumatary chu 7.62mm Pistol 1 le a mu leh an man bawk.
Mi 20 damsung lungin intang dingin
BAllia: Zanikhan Uttar Pradesh a Ballia district Additional Session Judge Anarpal Singh chun mi 20 hai chu damsung lungin intang ding le Rs.10,000 seng chawi dingin thiemnaw an changtir. Mi 20 hai hi kum 10 zet liemtah May 17, 2005 a kha sipai pension Pashupati Nath Misra (47) of Gariya Dangarbandh village-a a chengna hmuna hlukhumin an that nia intum an nih.
LPG man Rs. 42 a sukhnuoi
New Dlehi: Zanikhan LPG non-Subsidised Cooking Gas man chu cylinder pakhatah Rs. 42 a sukhnuoi, Khawnvartui (non-subsidised) man litre khatah 54 paise le Vuongna thautui man 5.48 percent in Oil companies han an sukpung. Vuongna thautui man hi kilolitre 1 ah s. 2,245.95 le khawnvartui chu Rs. 43.18 (non-subsidised) a ni ta ding a nih.
Visva Bharati VC an ban
New Delhi: Visva Bharati Vice Chancellor, Sushanta Dattagupta chun President Pranab Mukherjee kuomah a sina inthawka an banna lekha a pek. Haptakar liemtah a kha Human Resource Development Ministry in Sushanta Dattagupta (68) hi a sina inthawka ban dinga President kuoma a recommended a nih. Dan kala Visva Bharati a inthawka hlaw la le Jawaharlal Nehru University a inthawka pension la bakah Administration tienga thaw suol nei nia intum a nih.
Pu Buanga Award Lalthangfala kuomah
Lunglei: Mizo Academy of Letters (MAL) Joint Headquarters, Lunglei chun Pu Buanga Award chu September 30, 2015 khan Lalthangfala kuomah an inhlan. Hi Award hi kum 5 dan peia an inhlan hlak a nih. Hi Award hi (L) Lalsangzuali Sailo, B. Lalthangliana le Dr Laltluangliana Khiangte hai khawm inhlan an lo ni tah.
Myanmar sipai han uniform thar
Yangon: International standards le Myanmar rama sik le sa fe dan inmilinMyanmar sipai han (Army, Navy le Air Force) Uniform thar an hak ta ding a nih tiin Commander-in-Chief of Defence services chun a hril. An uniform thar hi zanita inthawk khan an hak tan ding nia hril a nih.
UNO office-ah Palestina Flag
New York: United Nations Organisation (UNO) General Asembly nuhnung taka passed a ni angin UNO office-ah Palestina Flag khaipar ve a ni tah. Hi thu a vote lak a ni huna Israel le United States hai thangsain rambung 8 in a kal zawngin vote an pek a nih. Hi thil hi UNs hijack tumna a nih tiin UN a Israel ram palai Ron Prosor chun a hril. New York a UN headquarters-a Palestina flag khaipara a umna hmasatak a nih.
--------------------------------------------------------
VAWISUN THUPUI
Kei mi hung ko la, lo dawn ka ti cheh a, thil ropui le inthup i hriet naw hai chu inentir ka ti che. - Jeremia 33:3
Editorial
Thuvuongva
Mi ei hne lo, ei tluk lo, var lem, a thiem lem, a taima lem, a var lem le ei ni neka ngaituona tha lem neihai hi ei demin ei hril siet nuom hlak. Zohnathlakhai hi sungkuo khat ei ni a, indem le inrel neka intan ding ei nih. America rama chun sawrkarna changtu Party han thil an thaw dik naw chang khawmin, indem el lovin tha takin an inhril lem hlak. Mihriem hi ei famkim naw a, ei famkim naw chang khawmin ei famkimnawna kha indemnaa hmang lovin, tha taka inhrilfie ding ei nih. Tulaia ei boruok tawng mek chungthua lem hin chu indem le insawisel rak chi niin an lang nawh.
Dit le tum inang hai hi a chang chun ei dit dan, ei ngaidan le ei tha ti dan hai an ang naw chang um ngei a tih. Hi thil hi indemnaa neia, hmelma ang ela inngai le inen phanaa ei hmang chun ei tu m ram hi ei tlung phak ring a um nawh. Indem le hmelma ena inen el lovin tha taka ei inhriltlang lem ding a ni a, a thei hram chun intawngtaipui ding a nih. Thuvuongva hi a tam hlak a, thuvuongva inleng vel haia insukbuoi ding ei ni nawh. Ei rama hin thudik, thu tha ngirpui ngam lo, thudiklo nia an hrietchieng ngei khawm an hnawl ngam ta nawh a, a va rapthlak ngei de!
Ei ram ang tluka thudik le thutak tlawmna ram hi a vang hle awm ie. Hiengang em em a thudik le thutak um lova, thukhel le thuvuongva hai mei meia thu ei thedar hlak hi a pawi hle a, ei hnam sunga sietna intluntu a ni mek a, iengang khawpa nasa lema sietna am a la hung intlun ding ti hi ngaituo tham a nih. Hi chungchanga hin Social media-facebook, whatsapp le twitter hmangtuhai ei fimkhur a tul bek bek a nih. Social media hi thuvuongva mei mei kap darna ding a ni nawh. Social media hmangtu hai hin facebook account tehlem hmang nawhai sienla nuom a um. Facebook account tehlem hmanghai hi mi teplo le mi dawizep an nih.
Mi tam tak chun chik taka thil ngaituo an pei nawh. An thil hriet taphawt an dik le an diknaw khawm hre chieng lovin hril sawng kar an nghakhla hlak. A tawkpawi ding le a that nawna ding tiengpang ngaituo der lovin chanchinbu annawleh Social media hai chenah insuoin an tarlang hlak.
Chuongchun, indik mang lo thu ei hriet kha a lo hre sawngtu han a neka indiklo lemin ei hril sawng nawk pei a, a tawpa lem chun kakhawk tha lo tak a hung nei hlak. Khuol thuthang le ar pan chuk a na’ an ti a hung ni ta hlak. Hi lei hin thuvuongva hrim hrim hi chu hril sawng lo a tha tak.
Chuongchun, indik mang lo thu ei hriet kha a lo hre sawngtu han a neka indiklo lemin ei hril sawng nawk pei a, a tawpa lem chun kakhawk tha lo tak a hung nei hlak. Khuol thuthang le ar pan chuk a na’ an ti a hung ni ta hlak. Hi lei hin thuvuongva hrim hrim hi chu hril sawng lo a tha tak.
Machi man a hung to ding a nih ti thuvuongva indiklo tak ei dawng tuma harsatna nasa tak ei tuok dam kha ei la hriet seng ring a um. Thudik ni lo, thuvuongva mei mei hi suol pakhat a nih ti inla ei hril suol taluo ring a um nawh. Tulaia ei boruok tawng mek le inzawm lem hin chu thuvuongva hi thedar lo ding a nih. Thuvuongva thedartuhai hi mipui khawma ei hrem ngam an tul a nih. Chuong a ninaw chun thuvuongva hin ei hmalakna hi a la hung suksiet ding a nih ti tulai hin a hung inlang tan ta a nih.
Lungsenah la naw inla, Social media hi chu tukhawma thutak le thu indikah pawm naw phawt inla a tha ring a um. A bik takin Facebook Account lem tam takel a um ta a, a la hung um belsa pei ding a ni a, hi thil laka hin ei insieking le ring lo tawp el ding a nih. Thiltha tak khawm hi a thanaw zawnga ei hmang pha chun hmangna bo a nih. Thlarau nei lo, thing le ruo, hnatawng le lungte hai hman hmangna an um a, social media meu hmangnaboa hmangtu mihriem ni chu nuom umlo takel, mihai hlemtu le buoina suksuoktu nina a nih. Thil tha lo tawpkhawk a nih.
