T. Romeo Hmar in Delhi­a MTFD activities report a pek
Th. Muivah an inhmupui huna option 4 a pek hai a puong
CCPur: Manipur Tribal Forum­ Delhi (MTFD) a Convenor T. Romeo Hmar inrawinain Ricky Haokip, Dr L. Lamkhanpiang, Dr Chinkhanlun Guite, Khup Baite le Lekpachwi Siro hai chu zanikhan CCPur­a hungin District Hospital­a Martyrs 9 hai ralna an nei bakah zani zantieng 1:00PM khan JAC thuoitu hai an inhmupui a, Tribal issue le inzawma MTFD in New Delhi­a activities tum tum an nei hai report an pek.
   
T. Romeo Hmar

T. Romeo Hmar in hi huna report a pek naa chun, August 31, 2015 nia CCPur district­a thil tlung an hriet chara inthawk MTFD chun hmalak dan ding thuah meeting an nei nghal a, India President le Union Minister tum tum hai inhmupuiin Memorandum an pek bakah candle sitvarna le Jantar Mantar ah nuorna, protest an nei bakah New Delhi­a Manipur Bhavan­ah Manipur Chief Minister a um ti an hriet leiin protest an nei a, hi huna hin Delhi Police chun mi 300 vel manin an hrentang a nih tiin a hril.
   

MTFD chun ADC/CCPur le UPF&KNO delegation team hai New Delhi an hung huna an lo guide el chau ni lovin Tribal issue thuah briefieng tha taka an neipui zoin Union leaders tum tum hai inhmupuina khawm an tawiawm pei thu a hril. Tribal issue hi party pakhat­pahni in an mimal hamthatna dinga hmanga tribal issue/unity an suksiet inlauna leia hienganga an tawiawm le guide pei a ni thu a T. Romeo Hmar chun a hril.
   
Union Ministers tum tum an inhmupui na haiah inthuruolna ‘unity’ nei zing dingin thurawn an  dawng rawn hle thu a hril a. Th. Muiva an inhmupui huna option 4 a pek a, chuonghai lai chun  – (i) Mizoram bel ding in ti chun kan support ding; (ii) Nagaland bel ding in ti khawmin  most welcome & Nagaland Rights le Privilege popo enjoy ding; (iii) Separate annawleh administration hran nei ding in ti khawmin full support peng kan ti cheu a; (iv) Manipur hnuoia umdet a Meitei bel ding in ti ruok chun pen khat khawm an pen naw ding thu Th. Muivah chun a hril niin Mr Romeo Hmar chun a hril a. Th. Muivah chun, tuhin Central leh Peace Talk/Accord nei mek an ni leiin tu le tua Manipur­a Tribal hai buoinaah direct­a an inrawl thil remchang a ninaw ding thu, sienkhawm Central in in tapna le nuorna nei hai a ngaisak naw chun an inrawl ve ding thu a mi hril a, chu thila ding chun Tribal Unity chel zing ding le Central nakawr deng dinga voice nei a pawimaw thu a mi hril tiin a hril bawk.
   
T. Romeo Hmar chun, tuta nuhmei/nupui han sit­in­protest an nei hi a tha nawh tina ni lovin inter­district (Hill district) connectivity siem dinga hmalak, entirnain vawisun mi 100/200 in hill district hai infepawna ding lampui siem ding, a zingah chuong ang a sunzawm pei ding; a san chu tribal han nuorna/helna ei nei tak tak theina dingin Imphal phairuom hraw thleng lo ding lampui ei siemnaw a ni chun fak le dawnah ei buoi ding a nih. Hmatieng MTFD in Separate State/Administration for Tribal a pieng hmakhat a dingin Jantar Mantar ah Coffin Rally/protest an nei tan ding thu, hi nuorna hi insawk (chain) entirnan vawisun KSO, zingah Naga Students, a zingah Zomi Students etc. ti anga thaw a ni ding thu a hril.

Victims sungkuo han vui an la remti nawh
CCPur:  September 28, 2015 nia  Inpui pali­ KIC, ZC, HI & MPC) han October 6, 2015 chena  mithi 9 hai vui dinga rawtna (Proposal) an siem chu nasa taka an dodal thu Victims family member han zanikhan ziek in JAC thuoitu hai kuomah complaint an peklut. Complaint an pekluta chun, Martyrs hai ruong chungthuah JAC fethlenga Sept.8, 2015 nia mipui kuta an inhlan a ni ta leiin an ruong vuina ding chungthua chun Inpui 4 hai rawtna ang lovin mipui thutlukna a ni ding a ni thu; ei thil ngen hai hmu lova vui ding an ni rau rau chun an ruong hai mithi sungkuo chit kuta pedawk dinga an ngenna hai an zieklang. Tribal movement fe meka ei thil ngen hai sukpuitling dinga assurance state le Central­a inthawk hmu a ni hma chu mithi hai vui lo dingin JAC an ngen.
   

Mithi sung haia inthawk Rev. V. Jamkhanthang chun Inpui 4 hai rawtna chu in lakkir tir dingin JAC Chief Convenor a ngen. Tribal Rights & Land humhalna dinga hringna pe 9 hai vui an ni leia hung hring nawk ding an ninaw leiin an nauhai thina in ra iengkhawm nei lova vuiliem tumna chu an remti theinaw thu a hril bawk.

Inremna um theina ding an khekpui
CCPur: Goodwill Mission, CCPur District member han khuo le veng tin sirin zanikhan ei rama inremna a um theina ding an khekpui. Goodwill mission team hi zani 11:30AM khan H. Mangchinkhup, Chief Convenor, JAC chun KKL Complex,IB Road, CCPur a inthawk tawngtainain an thladawk. Goodwill Mission CCPur District hnuoia Pastors le Church leaders hai hin Kangvai le New Lamka inkar haia khuo le veng tinah lutin ei rama inremna le muongna a um theina ding an khekpui a nih.

MO Promotion hmu thar hai
CCPUr: Manipur sawrkar chun Medical Officers 77 hai Senior MHS Grade­III a an promotion order zani hmasa khan an suo a, hienghai lai hin Churachandpur mi 4 an thangsa a, chuonghai chu Dr Phirthanglien Buhril, Dr Paulunmang, Dr Nengkhanmang le Dr Kimneilam hai an nih.  An promotion hmu ei Chanchinbu chun a lawmpui hle.

Thangting Chief Assn. in Lal puonsen
CCPur: Thangting Area Chief Association chun zani 12:00noon khan KKL Complex, IB Road, CCPur­ah JAC le Martyrs sungkuo hai an inhmupui a, hi huna hin Lal puonsen (red blanket) pakhat seng leh mithi ralna an nei. Nehlianlal, Chief of Nabil chun, ram le hnam humhalna dinga hringna inhlantu Martyrs 9 hai mihuoisen le miropui an ni a, hi lei hin Lal han lal puonsen ngeia ruong hai tuomna nei tum an ni a, sienkhawm tu ngirhmuna ruong tuom a remchang naw leiin JAC Chief Convenor chu martyrs sungkuo hai kuoma lal puonsen hai hi inhlantir an ni thu a hril.



NGMFC inrawinain mass prayer
CCPur:  October 4, 2015 (Pathienni), 1­4PM sung khin Nationwide Gospel Music Festival Committee (NGMFC) huoihawtnain Public Ground, CCPur­ah ei ram ta dinga tawngtairuolna (mass prayer for our nation) um a tih. Sun dar 12:30 a inthawk 1PM chen NGMF worship Team inrawinain inkhawmna hun hmang ning a ta, hi zo hin mass prayer tan a ni ding a nih. Hi huna Kohran thuoitu, social & political leaders, officers le mitin thang dingin NGMF chun fielna a siem. Prayer leader ding hai chu Rev. S. Vungminthang, Evan Lunkhosei (Hesei),Rev. Zathangsing Zate, le Rev. R. Vanmawia hai ning an tih.

JPO ah Rs. 2,23,440/-  le JAC Fin. Sub-Commt. kutah Rs.3,07,850/- a lut nawk
CCPur: Zanikhan mimal le Organisation tum tum 23 han District Hospital­a JPO donation centre­ah Tribal martyrs hai ralna an pek a, zanita ralna hmu po hi Rs. 1,23,440/­ le hnam puon 45 a ni a,  September 1, 2015 a inthawk JPO kuta ralna lut chu a rengin Rs. 51,08,629/­ a tling tah.
   
CCPur puotienga inthawk ralna hung petuhai chu­ EBCC Paite Veng Imphal Rs 19,100, + Puon  9, T. Kamkhenthang, Paite Veng Imphal  Rs 500, H. Ponpi Village Rs 1000, Immanuel Baptist Church, Motbung, Sadar Hills Rs 7000/­; Delhi Manipur Tribal Forum puon 9, Civil Pensioner Welfare Association Rs 10,000, Paite Tribe Council, Imphal Block Rs 30,000, Hill Tribe Council, Moreh Rs 80,000 + Puon 9, Kuki Inpi, Kangchup Area puon 9, Zomi Welfare Association, Guwahati Rs 10,000, Dr. Ginzaniang w/o Dr. H. Jamchinthang, Laimanai, Imphal Rs 5000 le Dr. Kp. Guite, Lamphelpat Rs 5000/­ hai an nih.
           
Chun, JAC hnuoia Finance Sub­-Committee in Martyrs 9 hai ralna dinga In tina Rs. 100/­ le a chungtieng dawl dinga inhriettirna um angin zani khawm khan khuo 59 haia inthawk ralna sum Rs. 3,07,850/­ a lut nawk.

Manipur Governor dingin V. Shanmuganathan in sesamna a nei
Imphal: Zani zantieng dar 4 khan Imphal­a Raj Bhavan Durbar Hall­ah V. Shanmuganathan chun Manipur High Court Chief Justice Laxmi Kant Mohapatra hmaah Manipur Governor dingin sesamna a nei. Hi hunsera hin Manipur CM O. Ibobi Singh, Dy. CM Gaikhangam, Cabinet ministers, Parliamentary Secretaries, MLAs, Th. Chaoba, President BJP Manipur, Civil le Police tienga officer lien hai an thang tawl. Sesamna hunser hmang zovin Manipur Governor thar hin sesamna hunsera thanghai thingpui  a dawnpui a, titina an nei tlang.
           
V. Shanmuganathan chun, Manipur Governor ka chel hun su ng hi a sawt naw akhawma Manipur Governor sin ka chel sung chun thlierbik nei lovin sin thawng ka ta, hnam tin lungruol taka an um seng theina dingin hma lang ka tih tiin a hril. V. Shanmuganathan hin Manipur Governor thar ding ruot a ni hmakhat chu Meghalaya Governor le Manipur Governor sin a chelkawp ding a nih.

Hun tiemchin um lo Moirang bandh
Imphal: Vawisun (October 1, 2015) zing dar 5 a inthawk hin Kege Moirang Apunba Lup (KEMAI) chun hun tiemchin um lovin Moirang bandh an thaw ding  niin an General Secretary M. Shantikumar Singh chun thusuok a siem. Bandh hin electricity, water supply, fire service, Education le sakhuona thil hai a huomsa naw ding niin a hril. PHC, Moirang Dairy Farm & Veterinary Hospital, SDO, SDC le Sub­Treasury Office hai siem tha dinga an ngenna state sawrkarin a sukpuitling pek naw leia bandh hi an thaw tum niin Shantikumar chun a hril.

RV Mingthing kuomah Irawat Award
Imphal: Zanikhan Iboyaima Shumang Leela Shanglen, Palace Compound, Imphal­ah 119th Irawat Birth Anniversary hmang a ni a, hi huna hin minister hlui R.V. Mingthing kuomah Hijam Irawat Award, Unity Award chu Social Activist Rose Mangshi Haokip; Thiyam Meghachandra Journalist Award chu Irengbam Arunkumar, Editor, Echel Express; Hijam Achou Sinmi Award Chingthem Kulachandra Yumsaba le Thokchom Achouba Award Oinam Munal hai kuoma inhlan an nih.

CAPF la sie pei dingin
Imphal: Tulaia Manipur boruok fe mek le inzawmin state sawrkar chun Manipur state sung, a bikin tlangram biel haiah Central Armed Police Forces (CAPF) sie hun sung keisei dingin a suktluk nia hril a nih. CAPF a hin Rapid Action Force, CRPF le BSF hai khawm an thangsa a nih. A hma chun CAPF duty hun ding hi 30­09­2015 chena ding ti a nih.

Tripura Governor dingin Tripathi
Agartala: West Bengal Governor Keshari Nath Tripathi chun zanikhan Tripura Governor sin chelsa dingin Raj Bhavan, Agartala hmuna Deepak Gupta, Chief Justice, Tripura High Court hmaah sesamna a nei. Tripura Governor Tathagata Roy in thla khat sung chawl a lak leia Tripura Governor sin hi Keshari Nath Tripathi in a lo chelsa ding a nih. Roy hi November 3, 2015 khin Agartala hung tlung a ta, Tripura Govenor sin hi a hung chel nawk ding a nih.

Goa Speaker minister­a laklut ding
Panaji: Goa Assembly Speaker, Rajendra Arlekar chu Cabinet minister a laklut le Deputy Speaker, Anant Shaet chu Speaker a hlangkai ning a tih tiin Goa CM Laxmikant Parsekar chun a hril. Rajendra Arlekar hi vawisun 4PM hin Raj Bhavan, Panaji hmuna Cabinet minister a laklut ni dinga hril a nih. Arlekar hi a zawna term hni MLA a thlangtling ta a nih. Rural Development minister Mickky Pacheco in Junior Engineer, Electricity Department a vuok leia April, 2015 a ban a ni leia Cabinet minister seat pakhat hi hung ruok a nih. Mickky hi lunginah khum a ni a, thla 6 sung lungin intang dinga thiemnaw inchangtir a nih. Minister pakhat laklut zova Goa chun minister 12 a nei ta ding a nih.

Damsung lungin intang dingin
New Delhi: Kum 1995 a Jammu hmuna Republic Day hmang huna a zawna bomb sukpuoktu Pakistan mi le Hizbul Mujahideen helpawl Ghulam Nabi chu zanikhan Supreme Court in rimsi taka damsung lungin intang dingin a chungthu a rel. Kum 1995 khan Maulana Azad Memorial Stadium, Jammu­a J&K Governor, Gen. K.V. Krishna Rao in mipui pungkhawm hai hmaa thu a hril laia bomb 3 sukpuok a ni a, Governor himin a suokdawk a, sienkhawm mi 8 an thi pha a nih.

INS Kochi Indian Navy hmang dingin
Mumbai: Zani zingkar khan Union Defence Minister Manohar Parrikar chun INS Kochi chu Naval Dockyard, Mumbai hmuna Indian Navy hai hmang dingin an hlan. INS Kochi hi Directorate of Naval Design hnuoia Mazagaon Dock Shipbuilders Ltd. in an siem, thalmitnei chi tum tum hai khawm dang le sukse thei a nih.

Mi 5 thi ding le mi 7 damsung lungin
Mumbai: Zanikhan MCOCA Court, Mumbai chun July, 2006 a Mumbai khawpuia a zawna bomb sukpuokna le inzawma thiemnaw inchangtira um mi 12 hai laia 5 hai chu thi ding le midang 7 hai chu damsung lungin intang dinga hremna pek dingin an chungthu a rel. Kha huna bomb puoka khan mi 189 an thi a, midang 800 chuong zet an hliem a nih.

Inchuktirtu pakhatin student a vuok hlum
Ballia: Uttar Pradesh state a Ballia district huop sunga Nawarn village a class ­IV inchuklai  Ramji (10) chu an hotu(inchuktirtu) Vijay Ram in thu an dawn a, a dawn theinaw leiin a vuok a. A vuokna tuorzo lovin a thi niin Police chun an hril. Hi thil hi September 29, 2015 nia tlung a nih. UP Basic Education minister Ram Govind Chaudhary chun hi thil tlung thua hin inquiry thaw dingin mawphurtuhai thu a pek.

Mihriem chengna In 16 a kang
Dimapur: Zani hmasa chawhnungtieng khan Nagaland a Dimapur khawpui huop sunga Zakiesetuo Colony, Golaghat Road­ah kangmei rapthlak takel a suok a, mihriem chengna in 16 a kang fai rit a, a sunga thil Rs. 10 lakh manhu a kangsiet niin Fire Brigade thusuok chun a hril. Kangmei theltu motors 9 han kangmei suok hi darkar khat le a chanve sungin an thelmit. Thlaisuongna meia inthawka kangmei hi intan nia hril a nih.

Maharashtra DGP thar dingin Dixit
Mumbai: Maharashtra Anti­Corruption Bureau Chief Praveen Dixit chu Director General, Maharashtra dinga ruot a nih. Praveen Dixit hi IPS Officer, 1977 batch a ni a, zanita a sina inthawka pension ta Sanjeev Dayal hmun a hluo ding a nih. Chun, Vijay Kamble, State Security Corporation Bureau Director General thar dinga ruot a ni bawk. Satish Mathur chu DG le MD, SPHWC dinga ruot le Meera Borwankar, Addl. Director (Prisons) chu Director General, Legal  & Technical Department a  ruot le inkaisangtir anni bawk.

Bihar ah Rs. 7 crore chuong man
Patna: Zanikhan Bihar State a hmun pahniah Bihar Police le Income Tax Department thangruol han tangka sum Rs. 7 crore chuong zet an man. Saran district a Chepra an ti hmuna motor pakhat sukchawla an dapnaah pawisafai Rs. 7 crore dapdawkin an man bakah Siwan District­a motor pakhat sukchawla an dapnaah Rs. 12 lakh dapdawkin an man niin Police thusuok chun a hril.

Bose sunghai an hmupui ding
Kolkata:  PM Narendra Modi chun October 14, 2015 khin Netaji Subhas Chandra Bose sunghai an hmupui ding niin Prime Ministers Office (PMO) chun Bose sunghai e­mail hmangin thu an thawn niin Subhas Chandra Bose unaupa Sarat Chandra Bose tupa chun a hril. Research thawtuhai, Scholars le legal experts hai thangsain Netaji sung han October 14, 2015 khin PM MOdi hi a chengnain 7 Race Course Road, Delhi­ah an van hmupui ding nia hril a nih.

Assam CM  a damnaw
Guwahati: Assam Chief Minister Tarun Gogoi chu Santen natnain a damnaw a, Assam Medical College, Dibrugarh ah enkawl mek a nih. Tinsukia ah an zin a, September 28, 2015 zantienga Tinsukia hmuna party workers­hai an hmupui le thu a hril mek laia a damnawna hi a hung zuol nia hril a nih. Tarun Gogoi (79) hi Asian Heart Institute, Mumbai­a vawithum lai a lung at (operation) thaw ta a nih. Doctors han an phal chun Vuongna hmangin Guwahati tieng phur ning a tih.
-----------------------------------------------------------------------------------
VAWISUN THUPUI
Chun, kei chu mi hung ko in ta, feng in ta, ka kuoma chun tawngtai in ta, chun, kei khawma lo ngai ka ti cheu. Mi zawng in ta, in lungril po poa in mi zawng pha chun mi hmang in tih.  ­- Jeremia 29:12­-13

Editorial
Ram damna formula indik iem ning a ta?

Ram thuoituhai hi Pathien ruot nihai sienlakhawm mifel le tha hai a ruot vawng  kher  ngai naw a, a ram mipui lungril puthmang le inmil tawk angin a hremtu ding dam, a tungding theitu dam hi a ruot lem hlak. Israel nauhai khawm kha an ni hremtu dingin Pathienin Lal suol tak dam a pek hlak a, Pathien pawi an hril leiin hnam hran hran hai lai kum sang chuong fe an vakvai tir hiel lem a ni kha. Pathien hnam thlang hai hiel Israel mihai chunga khawm phuba lak hniel lo Pathien hi ei biek Pathien a ni ve tho chun ei ngirhmun ding chu mipui ditthlangna a ni ding a ni a, nuomchenna khurpui ringawta intal lut ei tum a ni chun hnam dang hai rorelna hnuoia ringawta khawsa ei ni zing chun bohmang bak hmabak ei nei ding am a ni? Ei chungah hin a lungsenna hung bur khum ta sienla Israel nauhai ang hin ei tuor muolsuo zo ve ding am? Hnam ringum hai chu anin suikhawm mek a ni hi!
   
Ram rorelna fe dan phung a fel naw chun a ram sunga cheng hai inrem takin an um thei ngai naw a, sungril taka inthlier hranna a nasa hlak. “Chingmi tammi ama tani, echin enau nee” an ti hi ei hriet rawp hlak. Amiruokchu, ei unau hai hin tlangmi le phaimihai pakhat ei ni a, unau ei nih an tawngbauin ti hlak de hai sienkhawm a tak tak chun an ti thei naw niin an lang. An lungril indik taka an hril nisienla chu Bills 3 hai hi passed a ni ring a um nawh.
   
Tuta ei ngirhmun le boruok tawng mek thlir hin Zohnathlakhai damna ding tak tak chu a tlung el naw ding a nih ti chu tlang hriet a ni tah. Hi lei taka hi Zohnathlakhai thangruola hma ei laktlang a nih. Hmalak el hi a huntawk naw a, ei hnam le ei ram dam theina ding formula or strategy ei siem le ei thlang ngei ngei a tul ta a nih. Ei ram le hnam damna ding formula or policy ei siem fuk naw le ei thlang thiem naw chun a tuortu ding chu ei ni rawi tho ei nih. Ram le hnam damna dinga Bible a ei hmu thenkhat hai hang entlang inla nuom a um.
   
Josefa formula: Genesis bung 41­a ei hmu angin Pharo in mang a neia chun Aigupta ram tam a hung tla ta a, ram chu a boral thei ngei ding ti an entir a. Nisienlakhawm, Pharo mang hrilfietu  Josefa chun “Pharo chun mi remhrie le mivar zawng suok sienla.. hotu ruot sienla.. tam leia ram a boral nawna ding. “tiin thurawn a pek a, chuongchun Josefa thurawn­ Formula chu Pharo chun a pawm nghal a, chu kawnga mivar le remhrie tak (Economist?) ding Josefa kutah chun Aigupta ram Economy enkawl mawphurna chu a sie ta a. Aigupta ram chu ram ropui tak le hausa tak a hung ni thei ta ei  hriet.
   
Gospel Principle/Appostle’s formula: Tirko thilthawhai bung 6 chun umdan ding, thaw dan ding, economic le politics thil tiengpang ngaituo dan ding thu hai zieklang a nih. Bible a ei hmu angin, Peter le a pawlhai (cabinet ministers?) khan nitin khawsakna tieng buoipuina sin chu a enkawl thiem ding mi thar thlang suok hai kutah an nghat a, thuoihruoihai khawm an pung ta pei a nih. Hi formula hi ei aiaw dinga ei thlangtlinghai chun an hmang ve naw a, an hmang ngam naw ni takin an lang.
           
Ram damna ­“Bible Formula”:  2 Chronicles 6:14 a chun, ‘ka mihai, ka hming chawia ko hai chu an insukhnuoi a, an tawngtai a, an lampui rilohai chu nghatsana ka hmel an hung zawng chun, Vana inthawk chun lo hrieng ka ta, an suol chu ngaidam ka ta, an ram khawm sukdam nawk ka tih” tiin Pathienin a hril (an tiem) a nih. Hi Bible or Pathien formula hriet le hril el ding ni lovin a taka hmang le sawr ding a nih. Thil awlsam tak chu ni vawng naw sienkhawm Zohnathlakhai hin thil thei lo a ngai ding a ni nawh. Theida zawngah la naw inla, ei thil thaw dan hai hi formula le strategy tha an ni am aw ti hi ei ngaituo chet chet a tul hle. Mob rule annawleh Mob Culture ei ti dam hi formula le strategy tha le indik a ni am aw ti ngaituo chik nawk zuol ei tiu. Ram damna formula ei zawng a tul a nih.

Post a Comment

Powered by Blogger.