Aizawl, 04 Oct, 2015 (Virthli News): Hmar Students’ Association (HSA) indin champha (Rising Day) vawi- 76na chu October ni 3, 2015 (Inrinni) khan HSA, Aizawl Joint Headquarters huoithawtna hnuoiah I & PR Auditorium, Treasury Square ah ropuitaka hmang a ni a, Aizawl veng hrang hranga inthawk le khuo thenkhat hieng Sesawng le Muthi hai a inthawkin mipui thahnemtak fekhawm a nih.
Khuolliena fiel a nina angin Pu R. Vanalavena, MLA & Chairman, ZOHANCO chun Rising Day hi a hmangpuia, khuolzaum dinga fiel Pu. Hmingchungnunga, Chairman, SHDC khawmin a hmangpui bawk a nih. Hi baka hin Mizorama inchuklai pawl lien tak tak hieng Mizo Zirlai Pawl (MZP) le Mizo Students’ Union (MSU) thuoituhai khawmin rising day hi hmangpuiin thuhrilna hai an nei.


Kuollien Pu R Vanlalvena chun thu a hrilna ah HSA Rising Day hmang dinga fiel a ni chu lawmum a ti thu a hrila. Hmar hai hi Mizo (Zohnathlak) hnamlaia a lienpawl tak, lekhathiem tamna pawl tak le Mizoram neitu ti a sal theikhawpa hnam lien ei ni thu a hrila. Sienkhawm beisei anga hma eisawn thei tanawna le ei delchil ram (SHDC) chu hnufuol ram ang ela a la um chu an vawi takzet thu a hrila. Chulaizing chun India hmarsak state a lo sir ta hai le khaikhin chun SHDC khawm hmasawntak a ni thu a hril bawk.

SHDC huom sunga beisei anga development a hratnawna san chu sawrkar thuneitu hai lei am annaw le SHDC thuoitu ha’n fund thataka an hmang naw lei tiin mipui fekhawm hai an dawn bawk. MZP president khawm lo nita hlak Pu. R. Vanlalvena chun inchuklai hai chu nasataka thangla ding le taimataka inchuka hlawtling ngei dingin an cha a nih.

Khuolzaum Pu. Hmingchungnunga chun Council puitling ei nei theina ding chun a hmasatakah ‘elected Council’ ei nei a tul thu a hrila, electoral roll khawm siem dingin ruohmangna fepui mek a ni thu a hril bakah Mizoram sawrkar chu election nei dingin an peizing ta thu a hrila. Sienkhawm tuta ei ngirhmun enin election ah ei ni hrat lovin party dang an hrat el thei ding anga an lang leiin election nei inzuom a umnaw thu a hril bawk.

Rising Day lawmna hi hun hnia the a ni a, hunkhatna a hin thu tha tak tak ngaithlak a ni bakah Mizoram hlasakthiem hieng- Rualthankhuma Chhakchhuak (A-Grade radio artist), Juliet Hnamte, Lalruatdiki, Caroline Biakthansangi, Margy Lalremruati, Rosy Vanlalhlani, Lalremkim le Mary Sungte ha’n anthiemna le an rawlmawihai hmangin mipui fekhawmhai an in awi.

Hun hnina hi Career Awareness Seminar-a hmang niin, resource person in Tv. Kapremvel Pulamte, Auditor, AG, Govt. of India le Nk. Lily Sangpui, M.Phil Scholar & Guest Lecturer, MZU hai hmang an nih.

Rising Day lawmna a hin ‘Zo Food’ in catering tieng mawphurin ruoi tuihnai tak kil tlang a ni bawk.


Post a Comment

Powered by Blogger.