-LRS Puruolte

Manipur Sawrkar-in Tlangmihai tadingin iengkhawm a pawina a um naw ding thu a hril hnung khawma Tlangmihai himaw la ni zing le Manipur-a tlangram biela chenghai tadinga Anti-Tribal Bills/Tribal hai Chanvo (Rights) lakpekna a ngai, August 31, 2015 ni a Manipur Assembly-in BILLS 3 (Pathum) a Passed chungchang thu a khawm hin Dan le dun inchûkchieng (Study) chet chet chu ei ngai tak zetin a’nlang. A iengpo khawm lo ni ta sien, tharum ṭhanglo le thudik, Dan chu Dan bawk a dodal thei le dolet thei a nih. Hnam tlawmlemhai tading chun hi khawvela hin ngirhmun derthawng hun tawng rawp hlak ei tih. Sienkhawm, Dan le dun hi ei lo hriet chun hun tam takah mi sansuok hlak ngei a tih ring a um.

India ram amani Manipur ram chauh niloin hi Khawvela cheng hnam zetinrenghai hin “Chanvo/Rights” ei nei senga, hnam var taphawt chun ei dam khawsuokna ding ei ngaituo seng a nih. Dec. 10, 1948-a Khawvel hnam zetinreng inzawmkhawm pawl; UN Gen. Assembly-in Universal Declaration of Human Rights a puong le inzawm khan Article tam tak a’n duong suok a, chuchu eini vawisunnia ngirhmun derthawng hle a inngaihai khawmin ei hmang ṭhangkai thei ve a nih. Dan le dun a hre rawn rawn dingchangna ram le khawvel a hin Dan hremihai chu hnawchep ni ngai naw ni hai.

"Human Rights" ei ti hi la hang hrilfie tete inla, mihriem hlutna, inzaumna le thienghlimna ainthawka hung inirsuok a nih a. Hi "Rights" hi khawvel mihriem, mi tuelkhawm chu hnam, kha hnam ti um chuonglo, nuhmei le pasal inthlierhranna umlo, sakhuona dam, hausakna dam le ieng rammi nina khawm thlierhranna um derloa mitinin inang tlangna ei nei sengna chu a nih. A tlangpuiin "Human Rights" ei ti chu, India ram bika ding chun, India Constitution-in amani UNO Gen. Assembly-in Dec. 16, 1996 kuma a lo pawm tah. International Covenant on Civil and Political Rights le International Convention on Economic, Social and Cultural Rights haiah, mimal hringna, zalenna, intluktlangna le inzaumna chungchang a hai "Chanvo" (Rights) an inchuonhai, India rama Court haia takinchangtir (enforceable) thei hai chu an nih.

Dec. 10, 1948-a UN Gen. Assembly-in Universal Declaration of Human Rights-
Article 3: Mitinin mani mimal himna, zalenna le hringna dingin Chanvo an nei seng; Article 6: Mitinin khawlai hmuna khawm dan hmaah a nina ang tak Chanvo a nei; Article 7:Mitin dan hmaah angkhat vawng an nih a, hnam humhalna thuah inthlierhranna um derloa pek seng an nih. Mi popo hi thupuong kal zawnga inthlier bikna le inthlierbik dinga infuipawrna laka inhumhimna angkhat seng an nei bawk; Article 8: Mitinin Constitution/Danin a pek Chanvo hlun (Fundamental Rights) a i nei suksiet ding zawnga thilthaw laka Rorelna khawlah inhumhimna Chanvo an nei; Article 9: Mi tukhawm mumal um loa man, khum/intangtir le hnawtsuok phal a ni nawh; Aricle 10: Mitinin an chanvo le thaw makmaw an thawna kawnga le dan bawsiea intumna kawnga dan kengkawtu le roreltuhai hmaa indik taka a chanchin rel theina chanvo an nei; Article 13: mi tukhawm a umna state/ram sunga a nuomna naah zalen taka invak vel theina le cheng theina chanvo a nei. Chun, a nuom hun hunah a chengna ram maksan theina le a nuom hun hunah kir nawk theina chanvo a nei bawk. Article 17: mi tukhawmin ama mimalin amani annawleh mi dang le inzawm khawmin Thuomhnaw le Hmun le hmang a dit ang ang a nei thei; Article 19: Mi tukhawmin mani ngaidan tlang taka hril thina zalenna Chanvo a nei; Article 22: Mitinin mani mizie le nina ang peiin an ṭhanglienna dingin Economic, Social le Cultural Rights an nei; Article 28: Hi thupuong sunga Chanvo le zalennahai social annawleh International hmangin a nei thei; Article 30: Hi thupuong sunga chanvohai le zalennahai kal zawngin state, pawl le mihaiin thil an thaw ding a ni nawh… ti hai dam an nih. Dan le dun hriet a hmang thiem chun ṭi ding hrim a um nawh.

Ei harsatna hi khawla’m zuolko chi ni tang a ta?:

Protection of Human Rights Act 1993 (Human Rights Humhalna Dan, 1993): Mihriem nauhai chanvo humhalna ngielnghet lema a hung um thei ngeina ding le inzawmin National Human Rights Commission dam, State Human Rights Commission dam le Human Rights Courts dam indina a um theina dingin, Protection of Human Rights Act, 1993 chu Sep. 28, 1993 khan India rama hmang ṭan theiin a hung um a. National Human Rights Commission (NHRC)- Protection of Human Rights Act, 1993-na besanin, "Human Rights" humhalna ding le dawmsangna dingin, India sawrkar chun Oct, 1993 khan National Human Rights Commission chu a hung indin ve tah a nih.

Manipur sawrkar khawmin mipuiin an nghakhla em em el sukpuitlingnain, Manipur Human Rights Commission (MHRC) a'ndin thu, June 27, 1998 ni khan Puonglangna (Notification) insuo a nih a. Abikin Manipur-a tlangmihai hin MHRC hi a um le a um naw khawm mitamtak chun ei hriet phak naw niin a'nlang! An hmalakna hriet ding a um naw lei le Manipur sawrkarin thuneina tak tak a pek naw lei khawm chu a lo ni el thei (?...). (Ei hriet phak nawh... ?!...). Human Rights hlutna khawm hi ei hriet tawk naw mani aw?! ti thei ding khawpin ei la um a nih! Vawisunni khawm hin mipui hin Human Rights Dan hi ei ngaisak tawk naw hle a, a nina tak tak paw chu ei tam naw hle! Mani ning-ninga ningin ei hmatawk tawkin, ei inhramin, ei chang tawl el hlak khawm hi thil pawi tak a nih. Chuongang peiin dan le dun- Indian Constitution, IPC, IT Act, Etc. hai khawm ei hriet tawk naw hle’n a’nlang! A chuongaliema chang le ṭawng khawm ei kat nuk a nih. Ei Politician-hai chau intum thei an ni nawh. Mipui khawm ei indiknawna tam tak a um. Election-a an tling dan thu a ringawt khawm Democracy a um nawh! Anni haia inthawk beisei ei lo nei insang taluo khawm hi an dik naw el thei (?...).

Aug. 31, 2015 ni a Manipur Assembly in Bills 3 (Pathum) Tlangmihai ṭiṭthawng le lungkhei zawng tak el, tribal-hai ‘Chanvo/Rights’ sirdena ni a ngai thei bawk, Anti-Tribals Bill a ngai thei ding a hung passed ainthawka buoina nasatak abikin, Manipur Tlangram biela khawm Churachandpur Phairuom (Khuga Valley) laia Security Forces haiin Silai an hmetpuokna leia mi 9 lai zetin thina an tuok pha tah le mi 30 neka tlawmloin hliem natak an tuorna thuhai hi iengleia National Human Rights Commission (NHRC) a intlun dinga rawtna JAC/Ṭhuoituhaia inthawka hriet ding a la um der naw mani a? Ngaitha ei ninawna dinga Human Rights Commission hai kuoma zuolko hmasak hi ei thaw ding a ni naw am a ni? Thil indik naw a um changhaia Inquiry thaw dinga State Sawrkar phut vet khawm hi thil invet thlak tak a nih. Thudik suisuokna ding chun NHRC a ngai a nih. Tu hi Manipur a tlangram bielhai po po Sixth Schedule hnuoia sie dinga Sawrkar thlungpui hrat taka hni (Demand) hun a nih. JAC niloin Sixth Schedule Demand Committee khawm siem hun lai a nih. BJP a mi pe theitu dinghai le pe dinga an tiemtuhai hlak MDC/ADC Election hunah mipuiin ei thlang lal ta si naw a, hmalak dan ding chu ngaituo thiem a ngai hle awm.

Human Rights Commission hmalakna le Investigation (Suichiengna) kalhmang:
Matters not subject to jurisdiction of the State Commission (State Commission hmalaknain a huom phaklo thilhai) - (1) State Human Rights Commission hin dan hnuoia indin, State Commission hran annawleh Commission dangin an ngaituo lai thil hrim hrim chu sui naw nih. (2) State human Rights Commission hin, "Human Rights" bawsieta um hi kum khat a lo liemtah a ni chun suizui naw nih. (3) Sipai ralthuom chawiha'n "Human Rights" an bawsietna thil chu New Delhi-a National Human Rights Commission chauhin a suizui ding a nih.

Investigation (Suichiengna) chungchang a chun hiengang hi ning a tih. State Commission chun Inspector General of Police inrawina hnuoiah ama puolin suichiengtu pawl (investigation staff) nei a ta. Suichiengna kawngah indawn fel ngai dam a lo um a ni chun, Central sawrkar remtinain Central hnuoia suichiengtu pawl annawleh Central office thawktuhai tuelkhawm sawr thei a ta; chuongang pei chun, State sawrkar remtinain State sawrkar hnuoia thawktu hrim hrim a ṭul dan ang peiin sawr thei bawk a tih.

Provision of Atrocities Act, 1989: India Parliament khawmin Schedule Caste/Schedule Tribe-hai humhalna thuah Provision of Atrocities Act, 1989 a Passed a. Hi provision sunga hin Schedule Tribe-hai laka nunrawng taka changtuhai chungthu ngaituona dingin Special Court chen a’ndin a, Section 3-na dungzui khawmin Schedule Caste/Schedule Tribe ni loin Schedule Caste/Schedule Tribe chunga thil ditumlo a thaw leiin hrem theina dan iemanizat a siem a nih. Chuhai laia pakhat chu- “Schedule Tribe-hai an Inhluo/ram hluo dawk pek/lak pek” hi a nih. Dan ei ngaisak tawk naw a, Dan a um a nih ti ei hriet tawk naw leiin buoinawna dinga ei buoi hlak khawm a niin a'nlang. Chiengkuong taka a Point tak sam dawk thei si lo a, "Rights" ei nei an nawm ti ringawt hi ei thiemchangna a ni naw ding a nih ti khawm ei hriet tlat nuom a um. Ei "Rights" ei i ti tak chu besan tak tak ding, ei sam dawk thei am? Ei sam dawk chat chat thei a ngai ve a nih. Chu ding chun hrietna puitlinghai rawn le ruot in hma la inla hlawtlingna khawm hung um thei ngei a tih. Dan chu Dan bawka chingfel ngai a lo ni hlak leiin ‘Dan’ inchûkchieng (Study) hi uor zuol ei tiu. Vawisunnia inchûklaihai khawmin Dan hi inchûk uor zuol ei tiu. Ei ram le hnam ngirsuokna ding chun Dan hriet a, hmalak hi a var thlak tak a nih. Ralthuom nekin Hrietna (Education Not Gun) in thil a thawthei lem.

Eini sunga khawm ei thil nawr le tum ah ei inthuruolin, ei thiltum an langtlang (transparency) tlang am?:
  
Manipur a tlangmihai himna dingin ieng ieng am a pawimaw a? ti indawnna dawn ding ni ta ang inla chu hril ding tam vieu a tih. The Manipur Village Authorities in the Hill Areas Act, 1956 (Tlangram Biela Village Authority-hai Dan, 1956) dam kha ei bie chieng chet chet chun kha/hi dan hi eini Manipur a tlangmi/chingmi/tribal hai tadinga ṭhilṭha chu a nih.Village Authority (VA) hai thuneina insang tak a pek a nih. Manipur Union Territory a ni lai dai tah a kha hi Dan hi induong a lo ni tah a. Manipur sunga tlangram popo a huom vawng a nih. Hi dan hi VA ṭhenkhat chun a hmang suol an lo um hlak leia mipuiin VA a inṭhuoi ei dit naw le nghawk em emna khawm a um el thei. Suk thar ei tiu hang ti rak dingin eini sunga tho Chief Rights suk hrat, nawr le dit pawl ei um thei nawk leiin eini le eini ngei khawm ei inkal thei… tlangmihai tadinga ṭha tam tak a um lai zingin inlakhran kek chun sietna mi’n tlun theitu a um nek nuk zing a nih ti khawm hi ei hriet dinga ṭha a nih.

Ei ram le mipui hmakhuo ngaia, ṭhahnemngai ei inti seng lai zingin ram le hnam hmangaitu a insal, ṭhuoitu, mipui tadinga pensuok hai hlak ei dit dan le ngaidan an ang naw hle’n a’nlang a. Ditdan thuhmuna ei um thei si naw dam a lo ni chun iengam nawr dawk ei ta? ti hi ei ngaituo nawn rawp dingin dit a um hle. Tulaia “Separate Administration” ei dit thu ei insam, ei insam khawm hi a iengang zawng tak am a ni a? ADC Under Sixth Schedule amani? Iengang tak am an’a ei hmalak tum dan tak ti hih mipuihai laiah inhrilchieng vat thei inla chu hmalakna hrat lem hung um theiin, ra hung insuo puitling ngei a tih ti hih ring a um. A Ruongam/Frame Work induong suok dingin fimkhur le chipchier taka mipui ainthawk Democracy taka ngaidan lakkhawmna ni bawk Seminar –cum- Workshop hai dam huoihawtin (Open Discussion) dam nei ni thei ngat sien chu a ṭhaṭ hle ring a um (Hun khawm kar khat aw sienkhawm a pawi nawh). Manipur tlangram biela hnam chi hran hran le chenghai hi a mipuihaiin ei dit dan hai lakkhawma, inthuruol taka kal ei pen thei si naw chun tuta ei hmalak mekna khawm hi iengmaloa an chang thei a nih ti hi ei hriet tlat nuom a um.

Ei Pathienthu thienghlin Bible (BFW Version) chun ieng am a mi hril a?:

Thuvarhai 11:14- Ṭhuoitu var um nawnaa chun, mi an tlu hlak a, Nisienlakhawm remruothai tamna a chun himna a um.

Thuvarhai 15:22- Inrawnna um nawnaa chu, thil tumhai chu a hlawsam hlak a, Amiruokchu thurawntuhai tam chu hlawtlingna an nih.

Thuvarhai 27:5- Tlangtaka inkawkna hi hmangaina inthup nek chun a ṭha lem.

Thuvarhai 29:18- Hmulawkna umnawna hmun a chun mihai an bohmang hlak a, Amiruokchu dan vawngṭhatu chu a hlim a nih.

Ei hmalak mekna kawng a hin Vision/hmathlir/hmulawkna ei nei ṭha tawk am? Ei Unau Nagahai chun hmathlir ṭha tak el an nei a. Subject 28 lai zet 2004 – 2011 a NSCN (IM) – Govt. of India (GoI) Peace Accord Ruongam/Frame Work an siem ei en chun hmu theiin a um a nih. Ruongam siema um a tamlem GoI in a remti pek tah. A remti peklohai khawm thuthara la ngaituo dinga sie dam a nih.

Rights, Rights… tiin mitin ei khek vela, nang le keiin Chanvo/Rights ei nei ang bawkin mi khawmin an nei ve a nih. Rights Versus Rights, a ru no no suok ah khawvel a hin “Thaw ro, ei Chanvo/Rights ngaituotlang ei tiu” ti thupui hmanga an rang thei anga “Seminar-cum-Workshop” huoihawta Manipur Tlangram biela cheng Tlangmihai ei inrawnkhawm diel diel hi ei hmalak dan ding tak a ni naw maw? Ei thil nawr hi thil na mei a ni si naw a. Mani ṭanghma chauh ngaituoa nawr ei ni chun sawtnawteah ei tlusie tho ding a nih.

Post a Comment

Powered by Blogger.