Sawrkar in VC 31 inthlangna nei tir lo dan ding a dap: MNF

Aizawl, September 10,2015 (Virthli News): April ni 30, 2015-a Village Council inthlangna nei a ni tuma Aizawl le Kolasib District sunga khaw 31 haiah inthlangna buotsai nawna haiah tuchena inthlangna nei a ni nawna thuah MNF chun thusuok a siem.Inthlangna buotsai a ni nawna san ah Mizoram Congress Sawrkar chun helpawl HPC (D) ha’n sukbuoi an tum leiin, District Election thuneitu han inthlangna an neipui ngam naw thu an tarlang.

MNF thusuok dungzui chun HPC (D) hai chun July 7, 2015 khan thusuok siemin, Mizoram Hmar tieng khaw 31-ah V/C inthlangna dinga tukhawm in-candidate lo dinga an ngenna chu an sût kir nawk thu le Sawrkarin inthlangna a buotsai huna sukbuoi an tum ta naw thu an lo hril chu an tarlang bawk a nih.

Hienglai zing hin September ni 1, 2015 khan District Election Officer hai chun VC inthlang thei nawna khaw hrang hranga ‘Booth Level Officer’ hai kuoma lehkha thawnin Village Council inthlang thei naw hai ngirhmun sawrkarin hriet a nuom thu hai, inthlang dingin a ralmuong tawk am ti finfiena report pe dingin V/C aiaw thangin Joint meeting siema, boruok a him am ti an rang thei anga report thelut dinga inhriettirna an thawn suok thu MNF thusuok chun a hril.

MNF chun Mizoram sawrkar in hieng khaw 31-a a hai hin mawphurna a lak ngam naw thu le harsatna a lo tlung pal khawma mipui hai maw inphur tir an tum thu an hril. Hieng ang a ni lei hin innghatna tlak, mipui aiaw sawrkar a um ta naw ang hiel in MNF chun an ngai thu an tarlang a Congress sawrkarin inthlangna a buotsai thei naw nasan lien taka an tum HPC (D) ha’n insiekieng an tum thu an insuo hnung khawma hienganga DEO han mipui ngaidan an lak nawk kher kher hi inhlemna ah MNF chun ngaiin, inthlangna buotsai ani nawna san takah a hmu naw thu a tarlang.

Hieng VC khaw 31 a hai hin phuokchawp V/C, “Advisory Board” Congress Sawrkar chun indin in, an mi ditsak zawng ruling party hai thuneina an inpum bil tir a. Chuleiin, hieng V/C phuokchawp hai kuta thuneina a umzui pei theina dingin, Congress sawrkar hin kawng a dap ruk ngei niin MNF chun a hriet a. ‘Advisory Board’ hai chu Ruling party an ni leiin inthlang lova, thuneina an fepui pei theina dingin ralmuonglo anga an in-report nuom mei mei khawm ring a uma, hiengang, thil umzie bo buoipui kuol vel lovin inthlangna thienghlim le felfai tak, an rang thei ang taka buotsai ngei dingin MNF thusuok chun thuneituhai an phut a nih.

Mizoram buoi vanglai tak le curfew puong lai khawmin V/C inthlang hi nei thei lovin a la um ngai nawa, chuleiin khaw 31-ah hai hin mipui kutthlakna ngei Village Council a ngir theina dingin inthlang buotsai vat dingin MNF chun Congress Sawrkar an phut a nih.