Aizawl, 9 Sept, 2015 (Virthli News): August ni 31 a Manipur sawrkarin Special Assembly session-a a ram mi le sa ni si, ‘Tlangmi” (Tribal) hai ta dinga himlo le andikna chanvo lakpeka, an in le lo hai chen inchu thlakpek theina ding ‘Bills’ a passed dodalna le Churachandpur a bill dodalna le inzawma pawitawklo mi 9 lai rawngtaka an hringna lakpek an nina le inzawmin vawisun khan Aizawl-a Governor chengna in (Raj Bhavan) tuolah lungawinawna (demonstration) inlang tir/ nei a nih.

Demonstration hi inchuklai pawl 4 hieng Mizo Students’ Union (MSU); Hmar Students’ Association (HSA), Jt. Hqrs, Aizawl; Siamsinpawlpi (SSPP), Hqrs, Aizawl le Thadou- Kuki Students’ Union (TKSU) hai huoihawt niin inchuklai baka mipui thahnem tak an thang a nih. Demonstration neina a hin pawl hrang hrang hieng- Mizoram Hmar Welfare Committee (MHWC), MSU, HSA ,SSPP le ZoRO aiaw in mi dang dangin thuhrilna an neia, Mizoram Governor Nirbhay Sharma fethlengin India President Pranab Mukherjee kuomah inchuklai pawl 4 hmingin ‘memorandum’ thelut a ni bawk.

Pu. J. Lalchhanhima, Treasurer, MHWC in Manipur buoina chungchang report pein, bill dodalna leia Manipur-a zohnathlak hnam peng hrang hranghai tuorna nasat zie a hrila, Manipur sawrkarin a ram mi le sa tlangmi hai, ui le ar ang chova a suknawmnat el chu pawi a ti thu le sawrkar a dem takzet thu a hril.


Pu. PC Lalrinhlua, President, MSU, General Headquarters, Aizawl in thu a hrilna ah tulai hnai hin khawvel hmun hrang hranga Zohnathlak haiin vangduoina chi hrang hrang ei tuok meka, ei vangduoi tuok hai hin Zohnathlak hnam peng hrang hrang hai misuikhawmin ei inkarah in unauna tha tak mi siem pek ngei sien a nuom thu le MSU chun a tul phawt chun Manipur-a Zohnathlak hai thlavang hau dingin hma a lak pei ding thu a hril bawk.

Thuhriltu dang Pu. K. Lalramtana, President, HSA, Jt. Aizawl chun Manipura Zohnathlak hai tuorna chu thang la hung thar pei dinghai chen a nghawng thei ding a ni leiin Myanmar a ei unauhai tuorna nekin a nep naw thu hrilin Mizoram mipui chu theitawpa thang la dingin a ngen a nih.

SSPP President, Sanghminga khawmin thuhrilna neiin “Hi hun hi an nawm a nih unau ei inthangpuina hun ding chu”, tiin Zohnathlak popo impumkhata ei thangruol a tul ta takzet thu a hril.

Memorandum a hin Manipur-a Zohnathlak hai chu separate administration pe ding le Manipur sawrkar chet dan chu central sawrkar in suichieng dingin inchuklai pawl 4 hai chun India President an ngen a nih.




 Pu. J. Lalchhanhima, Treasurer, MHWC addressing the rally

Pu. K. Lalramtana, President, HSA, Aizawl Joint Headquarters addressing the rally

ZoRO Treasurer

Pu. PC. Lalrinhlua, President, MSU, General Headquarters, Aizawl 




Extreme left corner- Pu. Sanghmingthanga, President, SSPP, Headquarters, Aizawl, Mizoram

Post a Comment

Powered by Blogger.