Responsive Ad Slot

HSA Sinlung Hills Education Campaign hlawtling taka zo

Wednesday, September 16, 2015

/ Published by VIRTHLI
Aizawl, September 16,2015: Sinlung Hills, Mizoram a sunga Hmar Students’ Association in a huoihawt Education Campaign chu liemtah thawtanni khan ni 7 sung khuo dang dang haia Campaign nei ani hnungin hlawtling taka zo a nih. Ni 9 September khan Saiphai a tan ani a, Mauchar, Zohmun, Tinghmun, Sakawrdai, Suongpuilawn, Phuoibuong le Khawlien hai a, Nu le Pa le inchuklai hai lai “Inchukna hmangin ei hringnun suk awlsam ei tiu” ti thupui a hmangin Thupui thenawi - Benefits of Education, Education For Social Transformation, Education for Economic Development le Competitive Exams & Professional courses ti thupui thenawi hai hi Resource person hran hran haiin hrilin hun hmang a nih.


Saipum khuo a hin vangduoi tlak takin HSA Saipum Unit a Vice President nuhmeiin thina a tuok leiin programme hi hmang thei ani naw a, lusun sungkuo hai a tuorpui takzet a HSA chun ralna a nei bawk. Chun, Khawlek khuo hi inbiekpawna telephone network atha naw leiin programme hi thul ani a pawi ei ti takzet a nih. HSA chun Zohmun khuo tlangvalte Mizo Idol top 3 Thawlehnaniropuia (Puipuia) chu chawimawi a phu hle a hriet ani leiin Thangsuopuon insiltirnin a chawimawi bawk.


HSA chun Campaign Team hai lo lawm a lo bawisawmtu khawtlang thuoitu hai popo le Nu-le-Pa le inchuklai hai chungah lawmum an ti takzet a, lawmthu a hril mawl mawl a, hi campaign hin ra thatak an suo ngei beisei ani bawk. Chun, hi programme hlawtlingna dinga tlawmngai a sum le puon a mi tuomtu Pu Rothanglien Khawbung GS,HSA, GHQ, Aizawl, Ramsiempui Memorial Charitable Foundation (Tv. Sumlamrawn Hmar, Dimapur) le Pu Rothang Thiek le a naupa Tv. Hossana Thiek haiin phal taka an Gypsy inro lova an hung thawlawm tawp hi inpak umin ropui ati hle a an chungah Lalpa’n tamtakin malsawm sien ei ditsakna a nih. Chu khelah hi programme hlawtlingna dinga moral support mi pe a tawngtaina a milo santu hai popo chungah HSA chun lawmthu hrilin iengkima mi suk hlawtlingtu Pathien kuomah lawmthu a hril takzet a nih.


Team Member hai - Tv. Lalringum Riengsete, Dy.Secy.HSA Assembly Affairs, Tv. Josef V Tuolor, Secy. Education HSA, GHQ, Tv. Vanlalhlu Khawbung, AGS, HSA Sinlung Hills JHQ, Tv. Hossana K Thiek, Secy.Pub Relation HSA Barak Valley JHQ, Tv. H.Lalthutlung Zate


Don't Miss
© all rights reserved
made with by Simon L Infimate