Tuolsung
HYA Imphal Jt. HQ in tlawmngaina sin an hung thaw
CCPur: Hmar Youth Association (HYA) Imphal JHQ hai chu zanikhan Imphal­a inthawk   Ambulance 1, Bus 3 le Car 14 sip a hungin District Hospital­a Tribal Martyrs 9 hai ralna le a tul le pawimaw haiah rawngbawlin tlawmngaina sin le ruong nghakna sin an hung thaw. Hmun danga inthawk a telpuia ruong nghakna sin hung thaw hmasa tak la nia hriet an nih.
   


Hi huna HYA Imphal JHQ President Ms Thang­thatling in thu a hrilnaa chun lusun sungkuo hai an tuorpui thu le nunrawng taka hringna latu Manipur sawrkar an dem thu a hril a. Vawisuna an hung nasan tak chu lusun sungkuo hai an tuorpui zie suklangna ding le Tribals hai ei inthuruol zie suklangna dinga hung an ni thu a hril.
   
HYA Imphal JHQ member hung nunghak­tlangval hai chun District Hospital­ah a pawimaw le tul ang anga sin thawin, morgue sung sukfaina sin an thaw a, nupui ruol lengkhawm prog. ah an thang a, thalai han thingpui an inlum bawk bakah ralnain In 300 a inthawka an dawldawk Rs. 30,000 chu JPO kutah an inhlan nghal.
   
HYA Imphal team hin zani zantieng Imphal an pan huna District Hospital­a inthawk Khawmawi, CCPur chen ke­a lawnin peaceful and silent peace rally an nei a, zani zantieng 4:45PM khan Imphal an pan nawk tah.
   
Zani kha JPO hnuoia rotation dungzuiin HYA GHQ thingpui inlumni ding a ni a, anni hin thlawmngai insuoin hi sin hi an hung thaw a nih.

Zanikhan ralna sum Rs. 1,07,435 hmu a nih
CCPur: Tribal martyrs 9 hai ralna le thangpuina dinga zanita JPO kuta sum hmua um chu Rs. 1,07,435 /­, puon 72 le Maibal pum 2 a thang. Zanita CCPur khawpui puotienga inthawk ralna petu hai lai USRA in puon 9; BDF, EBCC Suangdoh in Rs. 1000/­, Christ Saptuam Nupi Pawl, Langol in Rs. 5000/0; KTP EFCI, Imphal in Rs. 3000/­, Women Department, EFCI, Imphal Presbytery in Rs. 5000/­; Hope Cultural in Rs. 1000, Langol Christian Church, Women Society Rs. 2000/­ le puon 9 a thang.

JAC Fin. Committee kutah ralna sum Rs. 1,74,900
CCPur: JAC Against Anti­Tribal Bills hnuoia Finance Committee in In tina Rs.100/­ le a chungtieng dawl dinga inhriettirna a lo siem angin zani khan khuo 30 haia inthawk Rs. 1,74,900/­ hmu nawk a nih.

KNO­-UPF thutlukna lawmum an tih
CCPur: Zanikhan Mizo People Convention (MPC) Office, Hmuia Veng, CCPur­ah MPC, Hmar Inpui (HI), Kuki Innpi/CCPur (KIC) le Zomi Council (ZC) han joint meeting an nei a, September 26, 2015 nia Kuki National Organisation (KNO) le United Peoples Front (UPF) han common Political goal 1 neia ke pentlang dinga thutlukna an siem chu Inpui 4 han lawmum an ti thu an hril.
   
Hi bakah hin mipui hai chu inremna le muongna a um theina dinga hma la seng ding, thudiklo thadar lo ding, mimal le hnam kara buoina intlun thei thil hai social media hieng Whatsapp, Facebook etc) haia thedar lo ding le tharum hmnga tukhawma buoina siem ta lo ding le ei thiltum a hlawtling theina dinga mitin thangruol dingin ngenna le inhriettirna an siem.

UCC inrawinain Lal han lampui hrawna an nei
CCPur: United Chief Committee (UCC) inrawinain CCPur district sunga khuo lal (Chiefs) han zani 1:00PM khan Tuibuong Peace Ground­a inthawk Tiddim Road zuiin rally an nei a, Tiddim Road a inthawk IB Road zuiin KKL Complex, IB Road chen rally an nei. An rally banner­ah “Our Ancestral Land, Our Chief Rights, We May lose our lives but we will never lose our land” ti an ziek. KKL Complex­a hin UCC chun T.K. Simte, Asst. Commissioner to DC/CCPUr kuomah Manipur Assembly in Bills 3 a passed hai an ditnawna le inzawma India President, Prime Minister, Union  Home Minister, Union Minister Panchayati Raj, Union Tribal Affairs Minister,Manipur Governor le DC/CCPur kuoma ding Memorandum an pek. An memorandum a chun Bills 3 passed a um hai Lal hai rights le inkal a ni thu an zieklang.


Dr Amo chengnain suksiet le raw nawk
CCPur: Zani zantieng khan Nuhmei pawl inhawrkhawm hai chun Rengkai, Nehru Marg­a Hill Areas Committee Chairman le Tipaimukh MLA Dr Chaltonlien Amo chengnain an suosam nawk a, a in inhuonna concrete fencing an suksiet bakah tubo le hmangruo dang dang hmangin in tukver darthlalang hai an sukkawi bakah insunga thil hai ladawkin an raw bawk. Tuta tum hi mipuiin Dr Amo in an suosam vawihnina a ni tah. Tuta hma khan raw le suksiet a lo ni ta bawk.


Ex­Servicemen peace rally
CCPur: Vawisun September 29, 2015 hin Ex­Servicement han Peace Ground, CCPur­a inthawk KKL Complex inkar chen peace rally nei an tih. Rally a hin Ex­Servicemen & Widows Association; Ex­Paramilitary Forces BSF, CRPF, ITBP, SSB, CISF, DSC, Assam Rifles etc hai thang an tih. Hieng a chunga zieklang hai chu kim taka thang seng dingin Chanchinbu fethlenga inhriettir an ni a, Sun dar 12:30 in Peace ground, tuibuong tlung hman ding le thuomhnaw dum nei ang anga inbel seng ding ti a ni bawk.

JAC, JPO le Inpui 3 han meeting an nei
CCPur: Zani zantieng 3:00PM khan JAC, JPO le Inpui pali (KIC, ZC, HI& MPC) thuoitu han KKL Complex, IB Road, CCPur­ah joint meeting an nei. Hi huna hin Tribal Martyrs 9 hai vuina ding JPO in site selection a thaw hai hriltlangna an nei bakah hmatienga nuorna nei pei dan ding le hmalak pei dan ding hai an hriltlang.

RPC­NEI in tuilien thangpuina an inhlan
CCPur: Reformed Presbyterian Church (NEI) chun September 25, 2015 khan Manipur­a tuilien leia harsatna tuortu hai sawmdawlna dingin Evangelical Churches Association (ECA) le Manipur Evangelical Lutheran Church hai kutah relief Materials an inhlan. Relief material an pek hai lai Bufai bags 115, Dal 8 qtlsl; Mustard Oild 167 litres; Chi 167 kgs le Tarpouline 15 a thang. Hieng relief material hai flag off na chu Sept. 25, 2015 khan Children Home, Saikawt hmuna nei a nih.


SLKCin JAC an hung inhmupui
CCPur: Zanikhan Imphal­a inthawk State Level Kut Committee (SLKC) a W.L. Hangshing, IAS; P. Doungel, IPS; Lunseh Kipgen, IPS hai thangin mi 9 CCPur­a hungin KKL Complex, IB  Road­ah JAC thuoituhai an inhmupui. Manipur tlangram biela buoina suok chu pawi an ti thu, a bik takin CCPur district­a buoina leia mi 9 thi sung hai an sunpui thu le hliem hai an tuorpui thu an puong a. Anni level­a an thaw thei ding thil a um am ti enkai ding le an tuorpui zie suklangna dinga hung anni thu; Govt. a officer an ninaah duthusama an thang theinaw na thuah JAC le mipui hai hrietthiemna an ngen. JAC Chief Convenor chun, tuta tum ei buoina hi district pakhat chau ni lo Manipur tlangram popo buoina a ni leiin sawtnawte hnungah ATSUM inrawinain District 6 haia thuoitu hai le Tribe leaders han joint meeting neiin inrawnkhawmna an nei ding a ni a. Chu huna chun sawrkar le inbiek ding le dingnaw thuah thutlukna lak thei a ni chau ding thu a hril.

Tui­a a tlak ni 22 hnungin a ruong hmu
Ankhasuo: September 4, 2015 nia Tuolbung (CCPur district) kai sak lilien laia thing an tawlnaa Tuiruong vadunga tla hlum Mr Lalramdin (28) h/o Debori (Debpui) of Ankhasuo, CCPur district ruong chu ni 7 sung zet khawtlang le tlawmngai pawl han an zawng hnung khawma an hmu zonaw hnungin Sept. 8, 2015 khan dan pangngai angin vuina hunser hmang a ni a. Amiruokchu, tuia a tlak ni a inthawk ni 22 hnung September 25, 2015 khan Patpuihmun kai lai tui chunga a hung inlang dawk a. A ruong hi lain Sept. 26, 2015 khan vuiliem a nih tiin ei thu dawngna chun a hril. Mr Lalramdin hin a nuhmei bakah naupasal 1 le nau nuhmei pakhat a thisan.

IAS hmu lawmpuina
CCPur: Ms Mannuamchng, MCS, CEO/ADCC in IAS a hmu (conferred) lawmpuina Sept. 27, 2015 khan Nengkhosoi, President, ZSP GHQ inrawinain ZSP thuoitu han an nei a, lawmpuinain puon le memento an pek.Ms Mannuamching chun Competition tum tum hmasawn dinga inpuocha dingin ZSP member hai an fui.

Headline
Manipur Governor Dr Syed Ahmed vuiliem;
Manipur­a khawm Govenor thi sunna hunser hmang a nih
Imphal/Mumbai: Manipur Governor Dr Syed Ahmed chu Sept. 27, 2015 khan Lilavati Hospital, Mumbai­ah Cancer natna leiin kum 73 mi niin a thi a, a ruong hi zanikhan South Mumbai­a Byculla, Rehmatabad thlanmuolah­ah ropui taka vuiliem a nih. A ruong vuina huna hin Maharashtra Chief Minister Devendra Fadnavi, Maharashtra Assembly­a Opposition leader Radhakrishna Vikhe­Patil, Union Miniter Nitin Gadkari hai bakah Union minister hlui le senior Congress leader Ghulam Nabi Azad hai bakah state le central a milien milal tam tak le Manipur PHED Minsiter I. Hemochandra Singh hai an thang.
   
Manipur­a khawm CM O.Ibobi Singh inrawinain zani 11AM khan Secretariat Conference Hall, South Block, Imphal­ah Manipur Governor Dr Syed Ahmed sunna hunser state level in hmang a nih. Hi huna hin Manipur CM O.Ibobi Singh, Cabinet ministers, paliamentary secretaries, MLAs, Chief Secretary, DGP, Army Officers, civil le Police officers hai an thang tawl a, inzanain a Dr Syed Ahmed thlalak­ah par inhlanna an nei bakah inzanain minute 2 sung to tawkin hun an hmang.
   
Manipur CM O.Ibobi Singh chun, Dr Syed Ahmed chun Governor Dr Ahmed chu mi ropui, sin pawimaw tak tak lo chel ta le Maharashtra Asembly­ah MLA dinga vawi 5 zet thlangtlinga lo um ta a ni thu ; Manipur­a a hung hmain Maharashtra­ah minister le Jharkhand Governor hai lo chel ta a ni thu hai a hril a. A ruong vuina huna Dy. CM leh zu thang an nuom a, sienkhawm a ruong vuina nang hman dinga Mumbai direct flight a umnaw leiin Delhi­a cham mek Manipur PHED Minsiter I. Hemochandra Singh le official thenkhat Manipur sawrkar aiawa an thang thu a hril.
   
Dr Ahmed hi Cancer leia tuta hma meta kha Lilavati Hospital­a hi admit a nih. Dr Ahmed hin May 16, 2015 a inthawka kha Manipur Governor sin a chel tan a ni a, ama hi Maharashtra­a inthawk Congres leader hlui, Maharastra Assembly­ah MLA dinga term 5 thlangtlinga lo um ta  a ni a, a nuhmei Hasan Tara, nau nuhmei pahni le nau pasal pakhat a thisan. Dr Ahmed hi politician a ni el khelah academician le literateur niin Hindi le English a Master degree nei le Urdu a Ph.D a nih.
           
Manipur sawrkar chun Dr Syed Ahmed sunnain zanikhan Govt. Office haiah chawl a puong bakah ni 3 sung (vawisun chen) sun dingin a puong a. Maharashtra sawrkar khawmin Dr Syed thi hi nikhat sung sun dingin a puong.

Cabinet in DA 17% a sukpung dingin
Imphal: Zanikhan Manipur Assembly Cabinet meeting nei a ni a, Cabinet meeting chun thawktu hai Dearness Allowances (DA) 90% ni mek chu 17% a sukpung dingin a remtih. Hi dungzui hin Manipur sawrkar hnuoia thawktu hai chun DA 107% an hmu ta ding a nih. DA 107% hi October 1, 2015 a inthawk hmang tan ding a nih tiin ei thu dawngna chun a hril.

Meghayalaya Governor in Manipur Governor
Delhi/Imphal: Manipur Governor Dr Syed Ahmed September 27, 2015 nia a thi leiin President pranab Mukherjee chun Meghalaya Governor ni lai mek V. Shanmuganathan chu Manipur Governor thar ding ruot a ni hma po Manipur Governor sin khawm lo chelsa dingin a ruot.

Manipur CS PC Lawmkunga a pension ta ding
Imphal: Manipur Chief Secretary ni lai mek Pu P.C Lawmkunga, IAS chu October 1, 2015 hin kum 60 a tling ta ding a ni leiin a sina inthawk a pension ta ding niin ei thu dawngna chun a hril. Pu P.C. Lawmkunga hi 1979 batch IAS, Manipur­Tripura cadre a ni a, August 1, 2013  a kha Manipur Chief Secretary dinga ruot a nih.
   
Pu. P.C Lawmkunga a pension ta ding lei hin Manipur­a IAS Officer hai laia a senior tak Ukhrul District mi Ameishing Luikham, IAS chun Manipur Chief Secretary sin a hung chel ring a nih. Mr Ameishing hi 1981 batch IAS, Manipur­Tripura cadre niin tuhin Secretary, Dept. of Public Enterprises, M/o Heavy Industry& Public Enterprises a chel mek a nih. Ama dawttu ding chu tuta Addl. Chief Secretary (Elections) & Chief Election Officer, Manipur chel lai mek 1984 batch IAS O. Nabakishore Singh (Manipur­Tripura cadre) a nih.

Assam Rifles han helpawl 4 an man
Imphal: Assam Rifles le Police thangruol hai chun hmun hran hranah helpawl 4 an man. 2­Assam Rifles le Thoubal Police Commando thangruol han Sept. 27, 2015 khan Charangpat hmuna PLA cadre SS Sgt. Kangabam Ibomcha @ Rajesh Meitei (33) s/o (L) K. Manijao Meitei of Jiribam Dibong Khunou an man a. 45­Assam Rifles han Heingang hmuna motor inlawn hai an dapnaah NSCN(K) cadre SS Lance Corporal Gaitangbam Gangmei @ Gangmei (26) s/o Kuthairei Gangmei of Kambirong, Nungba, Tamenglong dist. an man a. 16­Assam Rifles han Imphal East Police Commando le thangruola Sagolmang bazaar­a dappui an thawnah UNLF cadre SS Pvt. Md. Feroz Khan @ Majnoon (19) s/o Abdul Majit @ Tomai of Pangaltabi, Pangei, Imphal East an man bakah 22­Assam Rifle le Hiyanglam Police Commandos thangruol han  UNLF cadre H. Priyokumar Meitei @ Naohemba (20) s/o Heisanam Sanayaima Meitei of Laphupat Tera Mayai Leikai, Imphal West an man bawk niin zanita Assam Rifle thusuok chun a hril.

NE a inthuoihmang tamna tak Meghalaya
New Delhi: India hmarsakbiel (NE) a chun Meghalaya State chu inthuoihmangna case tamna tak a nih. India hmarsak biel (NE) a chun tukum sung hin in­thuoihmangna cases 182 a um ta a, hienghai laia 45 chu Meghalaya state a tlung niin, mi thuoihmangna thaw rawn tak chu GNLA hai niin mi 17 an thuoihmang ta niin ei thu dawngna chun a hril. Meghalaya dawta NE a inthuoihmang tamna tak state chu Assam niin tukum sung hin cases 24 a um ta a, Tripura­a chun tukum sung hin inthuoihmangna case 3 chau a la um thung.

Khuoi in mi 2 a bel hlum, 1 a hliem
Raipur: Chhattisgarh­a Jashpur district sunga Manora hmuna chun Sept. 26, 2015 khan Khuoi in mi 2 a bel hlum bakah midang 2 na takin an bel hliem. Mr Alok (27) an ti chun khuoibu umna thingkunga kaiin khuoibu hi tawk a tum a, chu huna khuoin nasa taka an bel leiin a hnuoia a tla thla a, inrang takin hospital panpui a ni a, sienkhawm damzo lovin a thi a nih. A ruoldang mi pahni Jatru le Lal Sai hai khawm Khuoi hawn hin an hnawt km. 2 zet an tlanse a, sienkhawm  khuoi hin nasa takin an bel a, a hliemna tuorzo lovin an Inah a thi a, Lal Sai ruok chu hospital­a enkawl mek a nih tiin ei thu dawngna chun a hril.

Thuoihmanga um IB Official umna la hrietlo
Shillong: September 24, 2015 nia Meghalaya­a South Garo Hills a inthawka tu ti hrietlo han an thuoihmang Intelligence Bureau (IB) official Bikash Singh chu tuchen hin Police han a umna chin an la hriet naw zing a, a umna hril thei tuhai kuoma lawmman pek dingin South Garo Hills Police chun an puong. Bikash hi sumdawngtu pakhat Kamal Saha le Rongara village­Baghmara hmuna inthawka tu ti hrietlo han an thuoihmng a ni a, Mr Kamal Saha khawm hi hmu a la ninaw bawk a nih. A thuoihmangtu hai hi tu pawl am ti hriet a la ninaw a, sienkhawm ASAK helpawl hai ni dinga ringhla a ni a, Bangladesh ram an lutpui ta ring a ni bawk.

Recruitment Scam thuah Digvijay Singh ko
Bhopal: Madhya Pradesh Chief Minister hlui le Congress leader Digvijay Singh chu Assembly recruitment scam thuah September 30, 2015 nia inlang dingin Police in an ko a, ko a nina lekha hi a official residence B­1 Shyamla Hill, Bhopal hmuna va pek a nih. Mr Digvijay Singh le Madhya Pradesh Assembly Speaker hlui Sriniwas Tiwari hai chu  kum 1993 le 2003 hai khan an nina hmangsuola indiklo taka Assembly Secretariat thawktu ding 15 laa intum an nih. Assembly recruitment scam a hin an rengin mi 24 chunga case siem a ni a, Speaker hlui  Sriniwas Tiwari thangin mi `19 hai chunga Police chun Chargesheet an file ta a nih. Hi recruitment scam thua complaint hi Assembly a Deputy Secretary Shyam Lal Maithil in a file a nih.

Assam­ah helpawl 2 kap hlum
Guwahati: Assam­a Dhubri district­a chun zani zingkar inhmatak khan Chaliabhui area hmuna security forces le helpawl hai an inkaptuo a, inkaptuonaa hin GNLA helpawl 2 kap hlum an ni bakah ralthuom iemanizat inkaptuona hmuna hin dapdawk a nih tiin IGP LR Bishnoi chun a hril.
   
Hieng laizing hin Hindu hai temple­a tu ti hrietlo han  Bawng lu an va sie leia boruok sosang leia Dhubri district sunga Agomoni area hmuna tiemchin um lova Curfew zama um chu zani zingkar khan hlip a ni ta thu Mr Bishnoi chun a hril.

Lottery scam­ah NE state 3an inrawl ve
Kolkata: Enforcement  Dorectorate in Kolkata hmuna Rs. 1000 crore anghu indiklo taka lottery thawna an suizuinaah India hmarsak state pathum Nagaland, Sikkim le Mizoram hai khawm an inrawl niin an hril. Hi lottery scam le inzawma Sept. 24, 2015 nia  Kolkata le Siliguri haia Central Board of Direct Taxes (CBDT) in hmun 13 an dapnaah Rs. 50­70 crore vel ding pawisa fai an lo dapdawk ta a nih. Indiklo taka lottery ticketa sumdawngna thawtu taka intum hai chu S. Nagarajan le Santiago Martin hai an ni a, Martin hi tuta hma met khan Chennai hmuna man a ni a, a kuta inthawk Rs. 7 crore man a nih.

‘Astrosat satellite hlawtling taka kap suok
Sriharikota: India in van tieng (Arasi) chanchin inchukna dinga vanboruok lawng (sattelite) a siem hmasa tak ‘Astrossat’ chu zani 10:22 le second 52 char khan Sriharikota­a Satish Dhawan Space Centre­a inthawk hlawtling taka kapsuok a nih. Astrosat satellite hi kum 5 sung dai dinga siem le kg. 1531 a rik a nih. India chu khawvel rambung tlawmte van boruoka observatory nei rambung hai lai a thang ve ta a nih. Astrosat Mission a hlawtlingna thua hin ISRO Chairman A.S. Kirankumar chun scientist hai a lawmpui thu a puong.

India mi thina tuok 45 an tling tah
New Delhi: Saudi Arabia rama Haj Pilgrim­hai Mecca bula an innekbuoinaa mihriem thina tuok chu 1,090 le hliem 934 an nih tiin Saudi Arabia sawrkar thusuok chun a hril. India mi thina tuok 10 hriet belsa an ni leiin tuchena India mi thina tuok chu 45 an tling ta niin External Affairs ministry thusuok chun a hril. Thina tuok 1,090 laia mi 769 hai chu an hming le ram hriet a ni tain Saudi Arabia sawrkar thusuok chun a hril.

J&K­ah Internet sukhring nawk tah
Jammu: Jammu & Kashmir­a buoina lien lem suok ding laka invengna dinga Jammu & Kashmir pumpuia Internet sevices sukchawl/ khar a lo um ta chu ni thum hnungin sukhring nawk a ni tah. Landline broadbans services chu Sept. 27, 2015, 8PM a inthawk khan sukhring a ni a, Mobile data (internet) services hai chu zani 10AM a inthawk khan sukhring nawk a ni tah.  Internet services hi Sept. 25, 2015, 5AM a inthawk Jammu & Kashmir district pumpuia that a nih.

Agartala Airport suklienna dingin Rs. 438 crores
Agartala: Union Civil Aviation ministry in Agartala International Airport International Airport a hlangkai dinga a lo puong ta angin Airport suklienna sin February, 2016 a inthawk Airport Authority of India in tan a ta; Airport siem lienna dingin Airport Authority of India in Rs. 438 croes zet a sanctioned ta a nih tiin Tripura State Transport minister, Manik Dey chun a hril.Bangladesh khawpui Dhaka le Chittagong hai le khawm Agartala Airport hi inthlungzawmtir dinga sawrkar thlungpui ngen a nih tiin Manik Dey chun a hril.

-----------------------------------------------------------------------------------------
VAWISUN THUPUI
Chun, inremna Pathien ngei chun, in pumin sukthieng raw se cheu; chun, in thlaraua le, in lungril le in taksa chu ei Lalpa Isu Krista a hung pha chun sawiselboa a puma humhimin um raw se.   1 Thessalonika 5:23

Editorial
Thil thaw theilo ding thaw thei le thil thaw thei ding thaw thei lona ram
Thil thaw thei, hungtlung thei amani, hung um thei ‘possible’ ei ti hi Latin tawng thumal ‘possibilis’ a inthawka hung pieng a ni a; hi thumal kal zawng chiea ei hmang lar nawk chu ‘impossible’ ti a ni a, a umzie chu thil thaw thei lo, ngaituo thei lo ti haiin hrilfie ta inla an dik el awm ie.
   
Khawvela democracy ram lien tak le democrary hlawtlingna tak chu India ram hi nia hril a ni rawp hlak. Democracy hi a tha a; mipui ditthlangna le a sukthlek dan an lal a, a mi chenghai khawmin inhawi an ti hlak. Amiruokchu, mipui dit dan inlal taluona hin sawrkar inawpna le rorelna indik (justice) chenin a thanaw zawngin nasa takin nghawng a nei thei. Communist, Socialist, dictatorship le kingship hai hi a tha naw hlea an lang laiin, kawng tam takah democracy rorelna nekin a tha lemin a hlawtling lem anga an langna lai khawm a um hlak. Amiruokchu, mipui nun zalenna tak tak chu democracy­ah hin a famkim deu tak niin an hriet thei.
   
Hienganga mipui dit dan inlalna ram ei ni lei am a ni ding, a bikin ei ram Manipur­ah ngat lem chu mipui hin um dan chintawk ei thiemnaw chang a um niin an lang a; chuongang bawkin sawrkar khaitu tak Ministry, officials le sawrkar sinthaw an hnuoi tak chen hin um dan chin tawk ei hriet naw nia ngai thei a ni bawk. Sawrkar hin fe dan phung fel tak (office procedure) le Rules mumal tak a nei a; chuonghai chu sawrkar sinthaw le ram mipuihai keithuoina inangtlang le chanvo thuhmun, thlierbik um lo thei ding ang taka hrutruolna dan mumal tak chu a ni a; chuongang taka sawrkarin dan a fepui chun, ram mipui han hamthatna thuhmun an dawngtlang hlak a nih.
   
Amiruokchu, hienganga dan tha tak le mumal tak, thil thaw thei le thei lo chi a um thlip thlep lai hin ei democracy ram nina suongin mipuihai le pawl (pressure group) hai le Association hran hran hai hin dan a um ngai lo le thil thaw ngai lo hai chu inthawluitir tumin ministry le sawrkar official­hai annawleh thuneitua ei ngaihai ei nawr buoi chamchi hlak a; a tawpah hi thil hin rorelna a sukbuoi khawlo zo vawng hlak a; a tawpah ei ni le ei ni harsatna ei insiem a; sawrkar ta ding khawma mipui chunga rorel dan thiem an tak pha hlak.
   
Hiengang bawk hin ministry le sawrkar official thenkhat hai khawm hin mipui hriet lem lovin, thil thaw ngai lo le thaw thei lova inlang hai dam palzut an ching ve nia hril a ni bawk hlak. Sawrkar hlaw sukpung chungchanga dam, inchuktirtu nei mumal lo chungthua dam, Road permit pek thu le thil dang tam tak hril ding a um.
   
Iengkhawm nisienla, mipui, roreltu (ministry) le sawrkar official­hai hin dan hi ngaipawimaw tawn seng inla, dan (rules) ang thlapa fe thleng thei dingin dan ang lova thaw dingin innawr tawnin bawse tawn naw inla, rorelna inhawi, rorelna felfai ei nei thei el ding a nih. Chuleiin, nawrna (aggitation/strike) leia thaw thei nawk tlat si dam, sawrkar dan anga thaw thei si, sawrkarin a thaw nuom vat naw a, mipuiin an nawr le nuor leia awlsam taka thaw nawk thei sihai dam hi thil mak a nih.
   
Chuleiin, sawrkar hin thil thaw thei zing si, mipui le pawl mamaw ngawi ngawi nisi hai hi chu nuor le nawr ngai kher lovin thawin rel fel el hlak sienla; chuongang bawkin dan phallo le dana um lo thaw ding le dan bakah infeluitir tlat ding zawngin ram mipui le pawl hran hran hai hin sawrkara thuneituhai hi nawr buoi rawp naw inla. Chuong­chun,sawrkar nawrna le lungawinawna chi hran hran ei inlangtir hlak hi a hung zieum deu ring a um. Iengkhawm nisienla ei ramah hin chu thil thaw thei lo hi an thaw thei a; thil thaw thei ding hai hi an thaw thei naw rawp hlak niin an lang.



Post a Comment

Powered by Blogger.