Tuolsung Headline
UPF le KNO in Separate State ngen dingin thutlukna an siem: PS Haokip
CCPur: United Peoples Front (UPF) le Kuki National Organisation (KNO) thuoitu hai chun zani zantieng khan District Hospital Morgue­ah Tribal Martyrs hai ralna hun an hmang. Hi huna ZRO President Thang Lian Pau in thu a hrilnaa chun, vawisun khan UPF le KNO thuoitu han joint meeting an nei a, ke khata ngirkhawm ding le thiltum pakhat neia kal pentlang dinga an rel thu a hril. Thaw ding tam tak a la um a, ei ram humhimna dingin pasaltha 9 han hringna an inhlan a, UPF le KNO chun kut insuikhawma an bawzui ding thu le pasaltha hai thlamuong taka chawlhadam dingin a ngen.
   

KNO President PS Haokip chun, UPF le KNO in joint meeting an nei hunah ei thil ngen Separate Administration nita lovin ‘Separate State’ ngen dingin thutlukna an siem a, a hming ding chu sawtnawte hnungah UPF le KNO in an la hung hriltlang ding a nih. Manipur Assembly in Bill 3 a passed leia pasaltha 9 in hringna an inhlanna hi UPF le KNO chun pawi a ti em em a nih tia hrilin inzana a pek. Mipuiin Sadar Hills District annawleh 6th Schedule ei ngen a, sienkhawm Manipur sawrkarin a mi pek nuom naw a, tlangmi han ei dikna le chanvo ei humhalna ding a mi pek nuomnaw leiin UPF le KNO chun Manipur­a inthawk Separate State Political Demand dingin thutlukna an siem a nih tiin PS Haokip chun a hril.
   
Hi huna hin UPF le KNO thuoitu han Martyrs 9 hai sunnain minute 2 sung to tawkin hun an hmang a, hi zo hin Sia Pau chun Pathien kuoma tawngtaina neiin Morgue sunga Tribal Martyrs hai inzana an pek.

Tribal movement thua Ni 3 sunga hun hmang dan ding
CCPur: Zanikhan KKL Complex, IB Road­ah JAC thuoitu han joint meeting nein September 27­29, 2015 (ni 3 sung) a hun (agitation) hmang dan ding an rel. Meeting huna an rel dungzuiin hi hun sungin nitin zing dar 5:00AM­1:00PM inkar sung Bandh inthlazal ning a ta, 1:00PM a inthawk Bandh tan nawk ding, zan dar 7:00PM chen khuo/veng tina sit­in­protest nei ding; Total Bandh hin Medical, Telecom, Electricity, Water Supply (Private thangin), Treasury Office, Bank, Airport with ticket, sakhuona thil le marriage program; Press/Media hai huomsa lo ding (exempted) a nih.
   
September 28, 2015, 10:00AM a inthawk khuo lal (Chiefs) han Peace Rally Against Anti­-Tribal Bills nei ding; September 29, 2015, 1:00PM in Civil Pensioners/Ex­-Servicement han Mass Rally an nei ding tiin meeting chun an rel bawk.

Zu litres 400 le Chawl tam tak an man
CCPur: Zanikhan Khugatampak, Churachandpur hmuna IMA LUP, Peace Regulatory and Maintenance Committee, Khugatampak Youth Association, Khugatampak chun Zu zawrna hmun an dap a, Zu litres 400 vel le Zu siemnaa hmang Chawl Rs. 500/­ manhu ding an man a, zani ma khan an suksiet vawng.

Ralna le enna Rs. 42 lakh chuong
CCPur: Tribal Martyrs­hai ralna le hliemna tuorhai enna JPO, CCPur kuta zani chena sum lut chu Rs. 42 lakh a chuong ta a, sum hmang le peksuoka um ta chu Rs. 8 lakh vel a ni ta a; nitina mithiruonghai sie thatna dinga vur hmanga um hlak chu Rs. 1,700 vel a ni a, District Hospital, CCPur ah hliem pakhat le Imphal­ah hliem pahni enkawl mek an la nih tiin zanita tuolsung nitin chanchinbu Editors han JPO Office an hang sir huna JPO thuoitu han an lo hril.

District Hospital an hung en
CCPUr: Sawrkar thlungpuiin Manipur state sunga Hospital fai tak kuoma lawmman/Award pek a tumna le inzawmin Imphal­a inthawk Dr Somorendro, Dr Usha le Momta, NGO hai chu zanikhan CCPur­a hungin District Hospital inspection an hung thaw. Inspection team hin tuta hma khan inspection an lo hung thaw ta a, zanita mi hi a final­na a ni tah.

Hmatienga hmalak pei dan ding an hriltlang
CCPur: Zani zingkar khan Mizo People Convention, Manipur (MPC­M) Office, Hmuia Veng, CCPur­ah Mizo People Convention, Hmar Inpui, Kuki Innpi/CCPur le Zomi Council thuoitu han joint meeting neiin thingpui dawntlangna an nei. Hi huna hin Mr Langkhanpau Guite, Chairman, ADCC chun ADCC team Delhi­a inzinna report a pek a, Lal Hossan, Vice Chairman, ADCC; Khaopao Haokip, MDC le Hrila, MDC hai khawm hi huna hin an thang.
   

Inpui 4 han meeting an nei huna hin thutlukna siem neinaw hai sienkhawm hmatieng peia hmalak dan ding an hriltlagn a. Member tum tum han Manipur tlangmi hai buoina fe mek chungthua hmatieng a hma lak pei dan ding thua ngaidan le thurawn hai an hril tawl.

Nuhmei hawnin ZRO President In an hlukhum, a In le motor 5 an raw
CCPur: Zani (September 26, 2015) zantieng khan Nuhmei pawl lungsen inhawrkhawm hai chun New Lamka, CCPur­a ZRO President chengna building an hlukhum a, motor 5 an raw siet bakah a in meiin an raw. Nuhmei ruol Pu Sia Pau ina an va fe huna hin ama le a bodyguard hai khawm an um a, hienganga buoina a hung tlung hnung hin a guard haileh an inhem hmang vawng niin ei thu dawngnain a hril.
    
       
Nuhmei Pawl hai hin Pu Thang Lian Pau @SiaPau chengna In lutna thir gate suksiein compound sungah an lut a, tuola Bolero motor 2 um hai  le a in bula Maruti Van innghat chu meiin an raw siet nghal a, insunga furnitur hai la dawkin tuolah an raw bawk. Hi zo hin a in hnuoia um Scorpio motor 1 le Car 1 an raw nawk niin ei thu dawngna chun a hril. A in hi sawnghnia insang a ni a, a sawng chung taka kaiin a in hi a dawt dawtin an hung raw suk pei niin ei thu dawngna chun a hril bawk. ZRO President In hlukhumna huna hin mi thenkhat an insukhliem a, hospital panpui nia hril a ni bawk. Nuhmei ruol hi iengleia Pu Sia Pau chunga lungsen am an nia ti ruok chu hrietna ei nei nawh. In hlukhum huna hin nuhmei ruol chun pasal thang an phal naw leiin pasal an thang naw nia hril a nih.

AR han NSCN(K) cadre 1 an man
Imphal: 20­Assam Rifles chun intelligence report an hmu leiin Tuisimi Village­ah dappui an thaw a, NSCN(K) cadre SS Pvt. Lamphakka Koba Maring (33) s/o L. Morung Maring of Laiching Kangsang, Thoubal district an man a, a kuta inthawk thil thenhat an mansa bawk.  Assam Rifles chun an mi man pa hi Kakching Police kutah an peklut niin zanita Assam Rifles thusuok chun a hril.

NFSA thaw tan vat ta dinga hmalak
Imphal: Manipur­ah National Food Security Act (NFSA) thaw tan dingin state sawrkarin hma a lak tan a, Senapati District­ah hi thil hi ngaipawimaw le thaw hmasa ning a ta, NFSA hnuoia hamthatna dawng dinghai hming chu DC, Senapati Office le ADC,Kangpokpi Office haia Notice Board ah en thei ning a tih.

Eksiden­ah nupui pakhat a thi
Imphal: Zani hmasa zan khan Tata Winger MN06/5065 le passenger phurtu Auto  MN04D/3778 hai chu Thoubal Police station huop sung, Khangabok­a Wangbam Sorijini pump bul lai an inbaw a, Diesel Auto a chuong nuhmei pakhat Thongram Lukhoni (55) w/o Th. Amu of Tekcham Awang Leikai a thi a, a driver a hliem met. Motor hi a se nasa ve vea hril a nih. Hi thil tlung huna hin Diesel Auto­a hin midang chuong an um nawh.

PM Narendra Modi in UNSC siemthat a tul thu uor takin a hril
New Delhi/New York: US a cham mek Prime Minister Narendra Modi chun zanikhan New York khawpuia G­4 Summit ah thuhrilna a nei a, United Nations Security Council (UNSC)  siemthat a tul uor takin a hril. Hi huna hin German Chancellor Angela Merkel, Japanese PM Shinzo Abe le Brazilian President Dilma Rousseff hai an thang.
   
Pu Modi in hi huna a mikhuol (G­4 members) hai lawmlutna thucha a hrilnaah, United Nations (UN) indin a nia inthawk khawvel nasa takin an thlakdanglam ta a, member khawm a let li velin an pung ta a, security thilah hrillawk theilo le hriet lo hun khir tak ei tawng mek leiin UN hi khawvel mipui ring le innghatna tlak a ni pei theina dingin UNSC hi siem that a tul a, khawvela Democracy rambung lien tak India chu UNSC­ah a thang ngei a pawimaw a nih tiin a hril.
   
Brazilian PM Dilma Rouseff le Japan PM Shinzo Abe hai khawmin Pu Modi hi thuhril hi thlawpin khawvel hun tawng nasa taka a danglam ta thu hrilin Security Council siemthat a pawimaw thu an hril. India chun UNSC­a permanent member ni tumin hma a lak mek a ni a, tuhin UNSC a permanent member 5 an um a, chuonghai chu China, France, Russia, UK le United States hai an nih. Non –permament members 10 umin UN General Assembly chun kum 2 dan peiah Non­permanent member ding hi a thlang hlak a nih. 
   
Pu Modi hih hi Summit zo hin Silicon Valley­a top company CEOs hai inhmupui dingin San Jose, California a pan. September 28, 2015 khin PM hin US President Barack Obama buotsai New York­a UN Peaekeeping Summit ah thuhrilna a nei bawk ding a nih.
   
Pu Modi in UN Hqrts a zani hmasaa thu a hrilnaah, hmasawnna intlunna ding le khawvel sik le sa a se zawnga nasa taka an thlakthleng hrat dangna dingathangruol a pawimaw thu, khawvela inremna le mongna, nunphung indik le hmasawnna thlungpui indik tak a um theina dingin retheina hnawthmang hi thaw makmaw a nih tiin a hril.

Mizoram­ah HIV hrik pai 10,125
Aizawl: Kum 1990 a inthawk April, 2015 chen khan Mizoram­ah mi 3,14,288 hai thisen enfel a ni a, hienghai lai hin HIV hrik pai 10,125 hmu a ni a, hi hun sung hin AIDS leia thi mi 643 an um. Mizoram State AIDS Control Society (MSACS) thusuokin a hril danin HIV pai 10,125 hai laia 6,353 chu pasal an ni a, 3,772 hai chu nuhmei an nih. HIV hrik pai hai laia 7,022 chu nuhmei­pasal thil hmangna leia kai, 2,484 chu drugs inkap lei, 363 chu nu le pa a inthawka an kai  le 256 hai chu an kaina san hriet lo a nih tiin a hril.

Hindu temple­a Bawnglu va sie leiin Curfew zam
Silchar: Zani hmasa khan Assam­a Cachar district sunga Tarkpur­a Kali Hindu Temple­ah tu ti hrietlo han Bawng lu an va sie a, hi thil hi Muslim hnam hai thilthaw ni dinga Hindu han an ring leiin boruok a sosang hle a. Tarakpur hmuna motor pakhat suksiet a ni bakah zanikhan Autorickshaw pathum suksiet ni tain ei thu dawngna chun a hril. Boruok a sosang hle leiin hi lai biela hin zani zantinga inthawk khan tiem chin um lovin sawrkar chun Curfew a puong. Hi thil tlung le inzawm hin mi 17 thu indawn dinga hrantang an nih tiin ei thu dawngna chun a hril bawk.

CBI in HP CM in an dap, FIR registered
New Delhi: Central Bureau of Investigation (CBI) team chun zanikhan Himachal Pradesh Chief Minister Virbhadra Singh chengnain Delhi a mi le Himachal Pradesh a mi hai an dap a, FIR an registered. Mr Singh, a nuhmei Pratibha Singh, an naupa Vikramaditya Singh, an naunu Aparajita Singh le an LIC Agent Anand Chauhan hai chu an sum hmusuokna le inmil lovin an hausa tia intumna um le inzawma CBI in suizuina an neinaa a in hai hi an dap a nih. CBI chun Mr Virbhadra Singh le a sung hai hin kum 2009­2011 a steel minister a ni sung khan Rs. 6.1 crore a sum a hlepruk/fakruk nia intum a ni a, CBI chun Virbhadra Singh hi October 2013 a inthawka kha an lo sui le kum 2014 khan thu indawnna khawm an lo nei tasa a nih.

CEC Bihar­ah an zin ding
New Delhi: Bihar Assembly nei ding le inzawmin Chief Election Commissioner (CEC) Nasim Zaidi le Election Commissioners pahni Achal Kumr Joti le OP Rawat hai chu   September 27 le 28, 2015 hai hin Bihar­ah inzin an ta, Assembly election nei ding le inzawma insingsat dan enfel an tih. First Phase election hi October 12, 2015 a nei ding a nih. EC eam hin Civil le Police hotulien hai inhmupui an ta, political party tum tum palai hai inpawlpui bawk an tih.

Bihar Assembly Election first phase Oct. 12, 2015 a nei dinga inhnukdawk nuom hai ta dinga inhnukdawk theina hun tawpna tak chu zani kha a n i ta a, Assembly constituencies 49 haia inthlangna um dingah zani chen khan candidates 586 an um.

MUDRA hnuoia Loan Rs. 1.22 lakh sem hman tum
New Delhi: Sawrkar thlungpui chun tukum kumtawp chena hin MUDRA Scheme hnuoiah sumdawngna chinlem (micro­Small business) haiah loan Rs. 1.22 lakh semdawk hman a tum.  Union Finance Minister Arun Jaitley in ni 7 sung aw ding Pradhan Mantri Mudra Yojana (PMMY) hnuoia MUDRA Loan campaign a hawngnaah, sawrkar thlungpui chun sumdawngna lien lo hai theitawpa dawmsang tumin hma a lak a, hi thil hin India ram sunga mi vaibelsie 11 hai ta dingin sin a siem pek ding bakah PMMY hmangin bank loan semin tha lema a fe theina dingin sawrkarin hma a lak ding a nih tiin a hril a, tuchena hin PMMY hnuoiah mi 37 lakh hai kuomah loan a pek ta a nih tiin a hril. 

JMB members 6 man an nih
Guwahati: Assam­a Chirang district a chun zani hmasa khan Chirang District Police han Muslim fundamentalist group Jamaat­ul­Mujahideen, Bangladesh (JMB) members 6 an man. Mana um hai laia pahni man hmasak hai chu Suleman Ali le Mafizul Islam hai niin Goalpara hmuna man niin midang 4­ Noor Mohamad, Malek Sheikh, Mostafa Mandal le Hafizur Ali hai chu follow­up operation thaw huna man an nih tiin Chirang SP Ranjan Bhuyan chun a hril. Mana u m hai kuta inthawk country made arms le AK­47 Rifle 2 man niin IGP (BTAD) LR Bishnoi chun a hril.

Hnuoi a châng leiin an insawn tawl
Aizawl: Sept. 24, 2015 khan Venghluia Vanapa Section huom sung, Aizawl Dakinpui hnung lai hnuoi a chang leiin hnuoi châng­na huom sunga cheng sungkuo 39 hai laia thenkhat chu fimkhur thuin an insawndawk. Aizawl Dist. Disaster Management Authority Chairman Dr Franklin Laltinkhuma, Aizawl DC, Geology & Minieral Resources Joint Director  Lalhmachhuana, Dist. Emergency Operation Centre­a Coordinator Irene Lalmuanpuii le official han a hmuna an va sir.

MLA official motor inrukhmang
Shillong: September 25, 2015 zingkar khan tu ti hrietlo han Mowkaiaw MLA Robinus  Syngkon official motor ML­01­5868, Pohkseh hmuna a chengna in compound­a a sie chu  tu ti hrietlo han an inrukhmang. Hi zan ma hin Motinagar­a CPWD Central Pool quarter a innghat Indra Deo motorycle ML­05K­5519 chu inrukhmang a ni bawk. A hnungin misuol han Fire Brigade ground, Laitumkhrah hmuna two wheeler motor pakhat an raw. Chun, Sept. 20, 2015 khan PHE Colony, Williamnagar hmunah Borina R. Marak motor Bolero pick up ML­07B­3377 chu tu ti hrietlo han an inrukhmang bawk.

BJP MP in party ticket zawrin an tum
New Delhi: BJP leader le MP ni bawk R.K. Singh chun Bihar BJP unit chunga a lungawinaw thu hrilin party ticket MLA ni lai mek inlar tak tak hai hnawlin party ticket chu misuol (criminal) hai kuomah pek an nih tiin an tum. Misuol hai kuoma party ticket pek hin Lalu Yadav le BJP in danglamna iem in nei a? tiin indawnna a siem bawk. Bihar Assembly seats 243 uma election hi Oct. 12 a inthawk phase 5­a nei ding a nih.

India mi thi 18 an tling tah
New York: Mecca hmuna inchilbuoina tlunga India mi thina tuok chu 18 an tling tah tiin   MEA a spokesperson Vikas Swarup chun zani zingkar khan New York hmuna a hril. Saudi Arabia rama Mecca hmuna inchilbuoina tlunga khan mi 700 chuong zet an thi bakah midang 800 chuong an hliem a nih. Haj pilgrims a fe hai hliem hai lai khan Assam mi 9 an thang a, Saudi Arabia Hospital­a admit an nih. Assam mi hliem hai chu ­Manowar Hussain Mazumdar of Hailakandi, Nurul Haque Laskar, Hazira Begum le Moinul Haque of Gharmurra, Moin Uddin Laskar, Faiul Haque Barbhuiya le Kabir Hussain of Algapur hai an nih.

Meghalaya MLA upa tak le ni sawt tak Hoping Stone Lyngdoh a thi
Shillong: Meghalaya State­a MLA hai laia upa tak le MLA ni sawt tak Hoping Stone Lyngdoh chu zani zingkar 1:00AM vel khan Northeast Indira Gandhi Regional Institute of Medical Sciences and Health Sciences (NIGRIMSHS) ah kum 86 mi niin a thi. Hoping Stone Lyngdoh hi West Khasi Hills district­a Nongstoin constituency MLA a nih. A awm na a ti bakah thuok harsa a ti leia Sept. 20, 2015 a kha hospital­a admit le enkawla lo um ta a nih.  NEIGRIHMS a Medical Superintendent Dr A Phukaan chun, Lyngdoh hi Pneumonia le Septicemia le multi organ failure leia thi niin a hril. Meghalaya CM Mukul Sangma, Speaker AT Mondal le Opposition leader Donkupar Roy hai chun a thi an sun thu an puong.
   
Lyngdoh hi Hill State People’s Democratic party (HSPDP) MLA a nih. A hmasatakna in kum 1962 khan composite Assam Assembly ah thlangtling a ni a, HSPDP hi kum 1965­a an din a, ama hmalakna hnuoia Assam­a inthawk state hran ngenna nawrpui nasa taka bei a ni a, January 21, 1972 khan Meghalaya state hran a hung pek a nih. Kum 1977 khan Shillong Parliamentary Constituency a inthawk Lok Sabha member dinga thlangtling a ni a, kum 1988 khan Assembly  Constituencies pahni Nongstoin le Pariong haia inthawk a ruolin MLA dinga thlangtling a ni bawk.  2008­2009 khan Dy. CM khawm a lo chel ta a nih.

IT Dept. in MPs 4 le MLA 12 notices
Patna: Income Tax Department chun Bihar a MPs 4 le MLAs 12 hai chu election nuhnung taka an sum hmuna le tekhia sum an hau taluo leiin hrilfiena pek dingin notices a pek tawl. Affidavit an file naah rothil laksawn thei le laksawn thei lo an nei chu election hmasa nekin a let nga in an hau tawl leia notice hi a pek a nih. IT Dept. in notices a pek hai lai hin Chief Minister hlui Jitan Ram Manjhi le Nitish Kumar sawrkar huna a cabinet colleagues pathum Shravan Kumar, Narendra Narayan Yadav le Manoj Kumar Singh hai an thang. MP notice peka um hai chu Shatrughan Sinha, Hari Manjhi, Sushil Kumar Singh le Bhola Singh hai an nih.

Rs 5,000 pek hnungin an insuo
Shillong: Assam­a Forest Department official Babul Chettri chu Sept. 22, 2015 khan tu ti hrietlo han an thuoihmang a, a sung han a thuoihmangtu hai kuomah Rs. 5,000 an pek hnungin an hung insuo. Chettri hi Khera Check gate­a a chengna ina inthawka an thuoihmang a ni a, a sung hai chun inthlasuok a nina ding hin pawisa an peknaw niin hril hai sienkhawm Chettri insuo zalen a nina ding hin Rs.5000 an pek niin Police report chun a hril a, misuol le suomhmang thenkhat thilthaw ni dinga an ring thu an hril. Simsanggiri Range a Range Forest Officer Chisak Ch. Marak chun hi thua hin Police­ah complaint a peklut.
----------------------------------------------------------------------------------------------------
VAWISUN THUPUI
Tukhawm a kraws puta mi zui naw chu ka mi ni tlak a ni nawh. Tukhawm a hringna hmu chun chun chân a ta; keia leia hringna chân chun hm<ng a tih. ­ Mathai 10:38­-39

Editorial
Lungzing a um takzet
Manipur Assembly in August 31, 2015 a bills 3 a passed leia thil hungtlung le ei thil tuokna kawnga hin fe pei dan ding le hi harsatna hlipkieng a, rel fel a hung ni theina ding kawnga hin lunginzing a um takzet. A bikin state sawrkar ta dingin lungzing a um zuol bik ring a um. Chuongang bawkin sawrkar thlungpui ta ding khawmin lunginzing um tak ning a tih. JAC Against Anti­Tribal Bills, tribe tum tum, tribal Organisation hran hran le a mipui hai ta ding khawmin lungzing a um tho bawk. Hril thiem, rel thiem le thaw thiem a tak a, lung a zing bek bek el a ni hi! Thaw suol pal le rel suol pal hlak chun ei renga ta dinga tho dawk thei nawk ta ngailo dinga ei sietna ding a ni si a.
   
Tuta ei fe dan le hmalak dan ang hlak hin hun sawt tak ei daizo naw ding niin an lang. Chuleiin, ienganga fe pei ding am ei ni a ti hi an hmatienga ei rel fel a, ei thaw dinga tha ei ti tlang ang dungzuia thil ei thaw nghal a tul takzet a nih. Hun sawt tak an chie chun ei inthuruolna le inpumkhatna hai hung se nawk thei a ni tlat el. Thaw dan thiempa Setan, ralhratpa hlakin a min huol vel a, suolna tinrenga mi hertluk tumin an vir zing el bawk si, suolah dam, inremnawna le inthuruolnawna kawngah mi bawde pal hlau rawi a tih ti inlau um takel a nih.
   
JAC bakah pawl tum tum tum han thungbuma nuorna an neina haiah ei sakhuo thuoitu han thu an hril chang khawmin an lung a zing ve a, Pathien ti zing puma thil thaw le hmalak a tulzie an hril uor hle. Pastor/Reverend thenkhat lem chun an thahnemngai taluona leiin huoisen takel in tribal martyrs­hai thisen hi a thanaw zawng le an dik nawzawngin tukhawmin inhnelpui nawng ei tiu. Mimal hamthatna ding, mimal inhawitirna ding le nun nuom chennaa hmang ei um ngei ngei chun ei biek Pa Pathienin ansie inlawng a ta, inhawi muolah dak naw nihai tiin an hril tawp el a nih. Hi thu hi thudik sel ruollo a nih. Indiklo taka thawtu chun ‘pap’ hi tuok thei ngai a ni hrim a nih.
   
Hieng a ni lei hin ei sum le pai thawlawm hai, fak le dawn, nungchang, khawsak dan le chet dan haia hin ei fimkhur hle a tul a nih. Mipui tieng chau ni lovin thuoitu le hotu tieng hai an fimkhur zuol a tul. Mipui mittlung zo lo khawm an bo bik ta nawh ti an hriet tha hleng a tih. Martyr­hai thisen inhnelpui ngam hai chunga hin Mob violence a tlung ngei ngei ding a nih ti hrietzing ding a nih. Ei Pathien khawmin malsawm naw ni a, tawngsie an phur ngei ring a um. Ei ram le ei hnam ta dinga martyr­hai hi inza ding a nih. Thaw suol le suksuol zau a hung um pal chun iphlang an ta, insum zo lova an kutthlakna chu na hleng a tih.
   
Tribal martyr­hai ruong vui ni ta ang sienla hlak, ei thu hi state sawrkar ni leh Central Government ni leh a mi la ngaimaw pek ding am? Mipui tiengpang lungril le hmalak phurna hai a hung suknep pha dim maw tihai hi indawnna pawimaw tak an nih. Vui lovin sie zing inla hlak ei harsatpui taluo naw ding maw ti khawm ngaituo a tul ang reng bawk. Iem a tha pa tak ning a ta ti hi hril le hriethiem an tak ngei el. Lungzing chu a um a ni hi!
   
Iengpo khawm nisienla a tul le pawimaw tak chu JAC Against Anti­Tribal Bills, Civil Society Organisations, mipui, Chandel, Ukhrul, Senapati, Tamenglong le Sadar Hills haia tribal thuoitu han hmathlir sei tak neia thutlukna chieng takel (collective decision) an hung lak vat hi a pawimaw bek bek a nih. Thutlukna ei siem thei a, inbiekna a hung um a, inbiekna a fe tluong thei phawt chun ei lunginzingna hi a hung inkieng thei ding a ni a; chu inbiekremna a hung um theina dinga ei Pathien kuoma tawngtaina uluk le taima nawk zuola ei nei seng chu ei thaw ding a ni hri phawt el naw ding?


Post a Comment

Powered by Blogger.