Tuolsung Headline
Manipur­a Zohnathlak hai thangpui dingin ZoRO an pei zing a nih: Rohmingthanga
CCPur: Manipur Assembly in anti­tribal bills 3 a passed leia Manipur tlangram biela buoina suok le CCPur District­a hi bill dodalnaa mi 9 thi hai ral dinga Mizorama inthawka hung Zo Re­Unification Organisation (ZoRO) inrawinaa Organisation tum tum 9 a member hung han zanikhan KKL Complex, IB Road­ah JAC thuoituhai inpawlpuina an nei. JAC thuoituhai chun tuta buoina ei tuok mek hi CCPur district chau ni lovin Manipur­a tlangmi hai buoina a ni thu hi huna hin an puong a, chu leia tlangmi hai inthuruol taka kal pentlang an ni thu an hril.
   

ZoRO Vice President Rohmingthanga in hi huna thu a hrilnaa chun, ZoRO hin Independent a suol naw a, a thiltum chu Zohnathlak hai inzawmkhawm inpumkhatna a nih; Mizoram le Manipur infepawna Tuivai a inthawk Sinzawl inkar Mizoram sawrkar kuoma report an pek ding thu, siemthatna dingin ZoRO in hma a lak ding thu hai a hril. August 31, 2015 a inthawk mipui han mani sin thawthei ta lova an um mit ngeia an hung hmu dan hai Mizoram sawrkar bakah Organisation tum tum kuomah report an pek ding thu a hril a. A pawimaw le tul hun huna phone a biepaw pei dingin JAC hai a ngenin ZoRO chu Manipur­a Zohnathlak hai thangpui dinga inpeisa a ni thu a hril bawk. ZoRO team hin zanikhan CCPur suoksanin Imphal an pan tah.

Talent Search Exam peklut thei
CCPur: Goverment School­a Class VIII inchuklai hai ta dinga National Talent Search Examination; Govt. le Private School haia Class IX & X inchuklai hai ta dinga National Talent Search Examination form chu Niangzakim,Receipt Clerk, ZEO Office chengna in, Chingkangpa Avenue, Nehru Marg­ah lak thei le Oct. 5, 2015 chenin peklut thei ning a tih. Chun, JNV/Tuinom a Class VI inchuk ding lakna dinga Entrance form a hung tlung belsa a, ZEO Office- a form 200 chuong pelut ta hai bakah form dit han Pumsuanthang, DI of School chengnain, Zenhang Lamka le Ningta, UDC, ZEO Office, Sahei Road, N. Lamka haiah lai thei a nih tiin ZEO chun a hril.

JSSU Teachers’ training thul
CCPur: Hmar Kohran sunga Joint Sunday School Union in Naupang Sunday School Teachers’ Training­cum­Fellowship October 2, 2015 Zirtawpni­a Lamka ICI Biekin­a nei dinga Tuithaphai biel sunga Kohran thuoituhai kuoma inhriettirna siema lo um ta chu tulai ei boruok tawng mek le inzawma Committee in a ngaituo hnungin hun remchang danga nei lem dinga la sawn/thul phawt a nih tiin Secretary, JSSU chun inhriettirna a siem.

Ralna le thangpuina Rs. 1,75,330/­ hmu
CCPur: District Hospital campus­a JPO kuta le gate bula donation/receiption­a zanita Martyrs hai ralna le thangpuina dinga thawlawm hmua um chu Rs.1,75,330/­ le Hnam puon 72 a tling. JPO in donation box an hawng a inthawk tuchena ralna le thangpuina sum hmua um chu Rs. 44,96,853/­ a tling tah.
    

Zanita CCPur District puotienga inthawk ralna le thangpuina petu hai lai EBC Dorcas Pawl, Lamphelpat Imphal Rs. 15,000/­; Lamphel Vaiphei Church Rs. 10,000/­; ZNBC National Games Village, Imphal Rs. 2,000/­; Sikkim Eimi Kilawikhawm Rs. 10,000/­; Eimi Emirates (UAE) Dubai a inthawk Rs. 1 lakh le hnam puon 9; New Lambulane Chongthu Baptist Church Assn. Women Fellowship hnam puon 9; Mimal a thangpuina le ralna hung petu hai lai Prem, Contractor of Utlou; Mahajon Singneng of Hiangtam Lamka, Mission Road Rs. 10,000/­ a thang.
   
United Arab Emirates (UAE) Dubai a um Eimi Emirates chun Manipur tlangmi hai dikna le chanvo (rights) sukbuoi thei ding thil Manipur Assembly in August 31, 2015 nia Bill 3 a passed hai dodalna leia buoina suok chu pawi an ti le an tuornat thu an puongin state sawrkar nasa taka an dem thu an puong. 

HWA Rengkai le CKMLYC in Zu tam tak an man
CCPur: Hmar Women Association (HWA) Rengkai Unit le CCPur Khumujamba Meitei Leikai Youth Club (CKMLYC) thangruol han zani zingkar inhma tak khan Khumujamba Meitei  Leikai an dap a, district danga inthawka hung phurlut Zu (Andro) litres 600 zet dapdawkin an man. HWA, Rengkai Unit le CKMLYC chun Rengkai lalpa inah inhmukhawmin Zu suong le zawr lo (ban) dingin thutlukna an siem a, chu le inzawm chun Khumujamba Leikai area mipui chun Zu zawrtu hai kuomah September 25, 2015 a inthawk tukhawm Zu suong le zawr ta lo dingin an inhriettir a, chu bawzuinaa zani zingkar inhma taka dapna sin hi an thaw a nih. Zu an man hai hi zani zantieng 1:00PM khan Khumujamba Meitei Leikai khawsungah suksiet vawng a nih.


ADC Chairman le VC han an kankuol tawl
CCPur: Mr Langkhanpau Guite, Chairman, ADCC le Lal Hossan, Vice Chairman, ADCC bakah MDC iemanizat hai chun zanikhan khawpui sung hmun tum tuma sit­in­protest­a inthung hai an dap kuol a, tribal movement leia an sawl le inrimna chunga lawmthu an hril. 
   
Langkhanpau chun, ADC/CCPur team in Delhi an inzin huna mi pawimaw tum tum an inhmupui hai le inzawmin report a pek a, Manipur Govt. in Central sawrkar kuomah ei buoina indik tak report a peknaw leiin Central in thudik a hrietnaw a; thudik tak hrilhriet an ni thu  hrilin pasaltha 9 hai thisen a thlawna a luong naw ding thu a hril. Manipur govt. in tuhin tribal movement hi Law & Order lei a nih ti chauin Central­ah an hriettir a; sienkhawm ADC team in Central thuoitu hai an inhmupui huna security hai chetna video clip hai entir an ni a, chu taka inthawk Center in thu indik tak nuorna (agitation) lei a nih ti a hung hriet ta a nih tiin a hril.

Varak inrutu mi 2 man
CCPur: Rengkai Bible Hill­a duty hai chun zani zingkar khan rukru pahni Nengzalian (32) s/o Ngulkhanthang of Thuangtam village, tuta Lamjang a um mek le Kaisuanpau (30) s/o Lamkhanthang of Lamjang village hai chu Varak ‘Kangnga’ an ti hai 3 leh an man. Varak hai hi Hq. Veng­a inthawka an inruk le Khumujamba hmuna zawr an tum a nih.

Headline
Mudra Shishu Loan Mega Campaign hawng a ni tah
Imphal: Ni 7 sung aw ding Mudra Shishu Loan Mega .Campaign chu zanikhan Hotel Imphal­ah Member of Parliament (MP) Prahlad Singh Patel in hawng. Mr Prahlad in huna thu a hril naa chun Central annawleh state schemes le programme hai government program niin mipui ta dinga thaw an nih tiin a hril. Sawrkar scheme hai hrim hrimah hnamtin, sakhuo tin le political party han hamthatna angkhat/thuhmun an nei seng a, welfare scheme sawrkarin a thaw hai hrim hrim hi sawrkarna cheltu hai program ni loin mipui le sawrkar ta ding a nih tia hrilin “Make in India” flagship hnuoiah Pradhan Mantri Mudra Yoyana tlangzar a lo ni ta thu a hril bawk. Tuhin Mudra Shishu Loan categories pathuma thein Shishu hnuoia loan Rs. 50,000/­ chen, Kishore hnuoia Rs. 50,000­5 lakh chen le Tarun hnuoia Rs. 5­10 lakh chen pek a nih tiin Mr Prahlad chun a hril bawk.
   
Hi hun hmangna huna hin selected beneficiaries hai kuoma Mr Prahlad chun Mudra Sanction letter an hlan tawl. Mudra Shishu Loan hmu ding hin Manipur state sung hmun tum tuma inthawk mi 900 thlang an nih.
   
Hi scheme hi Pradhan Mantri MUDRA Yoja hnuoia small businesses/unit hai kuoma security bova loans Rs. 10 lakh chen lak theina niin Imphal, Manipur­a BO/Manager chu Smt. Anamika R a nih.

BJP National Secretary a hung inzin
Imphal: Mr Prahlad Singh, National Secretary, Manipur in­charge chu zanikhan Imphal­ah a hung inzin a, tulaia BJP Manipur sunga inremnawna um chingfel dinga hung inzin nia hril a nih. Manipur CM hlui Radhabinod Koijom, MPP thuoitu hlun le Ex­MLA O.Joy le Manipur DGP hlui Y. Joykumar haiin BJP an zawm a, hi le inzawm hin a ditnaw pawl le dit pawl an um leia BJP Manipur sunga inremnawna hi a hung um nia hril a nih.
           
Hieng laizing h in O.Joy le Manipur DGP hlui Y. Joykumar Singh hai BJP a lawmlutna hun zanikhan BJP chun Kakwa Community Hall­ah an hmang. Hi huna Mr Prahlad in thu a hrilnaa chun Centre­a NDA sawrkar chun India ram state dang hai ang bawkin India hmarsakbiel hmasawnna dingin sawrkar thungpuiin hma a lak a nih tiin a hril.
MJS Grade ­III Written Exam result puong
Imphal: High Court of Manipur huoihawtnaa MJS Grade­III lakna dinga August 28­30, 2015 inkar sunga written exam neia um result puong a ni ta a. Interview/ Viva Voce­a thang dinga hlawtlingna tlangmi hlawltingna chang hai chu Margaret Niangsiamkim (UR), Masana Evangeline Panmai (UR); Hranggao Rozhemal (UR) le ST ah Kimneingahh Kipgen; Reena Serto; Chongchuirinmayo Luithui; M. Thangsuansang Zou; Nangzakai Suante le Joyce Kemp hai an nih. Interview/Viva Voce chu October 8, 2015 in High Court of Manipur­ah nei ning a tih. Hi huna hin candidate hai chu Original Certificates chawi seng dinga inhriettir an nih.

KCP(P) in Horti Director vauna an pek
Imphal: Danpuoa hnawl KCP Poirei Meitei Lup chun Horticulture Department­a Director chu loneitu hai ta dinga welfare schemes sum tam tak farua intumin ama le department officials h ai chu kum 10 liemtaa farmers scheme hnuoia thangpuina dawngtu hai list puonglang dingin an inhriettir. An puong naw chun media hmangin mipui hriet dinga an puonglang ding thu an hril.

AR han helpawl pahni an man
Imphal: Sept. 24, 2015 khan 11­Assam Rifles le Moreh Police commando thangruol han Moreh­a Premnagar hmuna dappui an thawnaah UNLF cadre  SS Sgt. P. Yaima Singh @ Iraibak (37) s/o (L) Tomba Singh of Langathel Manmang Leikai, Thoubal District an man a, kum 2005 a CCPur dist. a training la niin an puong. Chun, 22­Assam Riles han PLA/RPF cadre SS Cpl. Sanasam Ojit Singh @ Thomson (30) s/o Ningthem Singh of Wangoo Awang Leikai, Thoubal Dist. chu Wangoo Awang Leikai hmuna an man bawk.
   
Chun, Sept. 24, 2015 khan 2­ Assam Rifles le Thoubal Police Commando han Yairipok Bazar­ah MNRF Overground worker Khullem Delleay Singh (29) s/o Amuchou an an man bawk.

NDFB(S) C­in­C man
Guwahati: Zanikhan Army, Police le SSB thangruol han Chirang district­a Morabari ramhnuoiah National Democratic Front of Bodoland ­Songbijit faction, NDFB(S) self­styled   Commander­in­Chief Rabi Basumatary chu a bodyguard Jwnglaw Narzary @Jekhai, BTAD leh an man niin IGP LR Bishnoi chun a hril. An kuta inthawk AK­56 Rifle 1, AK mu 170, INSAS rifle mu 50, Hand Grenades 4 mansa a ni bawk. Basumatary hi Sept. 26, 2013 a Kokrajhar district­a Rupsi outpost Inspector­in­charge Narayan Barman thatnaa inrawlna neia intum a nih.

BSF han tangkaruo incheina kg. 5 an man
Kolkata: Border Security Force (BSF) chun Sept. 24, 2015 khan India le Bangladesh inrina Nadia, West Bengal hmuna tangkaruo (silver ornaments) kg. 5 zet an man. Tangkaruo hai hi a ruka sumdawngtu han Bangladesh rama phurlut an tum a ni a, 113 Bn. BSF han special operation an thaw hunah ramri zula mi inlawn an hmu a, an va enfel hunah plastic a inthun thil iemani  ramri dai sunga vawrkai an tum lai an va hmu a, chu huna tangkaruo hai hi an man a nih.  A neitu pasal ruok chu a tlan hmang hman leiin an man nawh. Tukum sung hin BSF chun     South Bengal Frontier­ah Tangkaruo (silver) Kg. 180.85, Rs. 35,73,389 manhu deuthaw an man ta a nih.

Kashmir­ah Internet service sukchawl
Srinagar: Jammu and Kashmir­a chun zanikhan security forces le mipui nasa taka inbeituoin lunga indengtuona a tlung leiin state sawrkar chun Jammu & Kashmir pumpuia internet service a sukchawl/that. Eidgah hmuna Eid prayers nei zoa inbeituona le buoina hi tlung a ni a, inbeituona tlung na hmun hai chu Anantnag, Baramula, Kupwara le Sopore khawpui  hai nia hril a nih.  Internet service sukchawla um hi ni 2 sung ding a ni a, Mobile internet chau ni lovin  Broadband chen that a nih. Eid­ul­Zuha hmangna le inzawma insukbuoina tlunga hnam thila buoina lien lem tlung ding laka invengnaa hi thil hi thaw a nih.

Hnuoithatna le inpawl Zu dawn leiin nuhmei 3 an thi
Bengaluru: Bengaluru a inthawka km. 400 vela hla Haveri­a district hospital­a chun zanikhan hnuoithatna siena bottle­a Zu thuna an dawn leiin nuhmei 3 an thi. Hnuoithatna siena bottle a hin damdawi a la um leia hi thil hi tlung ni dinga ring a ni a, a dawntu hi loa sinthaw nuhmei 4 an ni a, pakhat ruok chu a dam suok.

India le Pak. sipai han chithlum an inpektuo
Jammu: India le Pakistan sipai hai chun Eid le inzawmin zanikhan Jammu & Kashmir, Ponch  District, Line of Control (LoC) a Chakan da Bagh le Mendhar crossing point haiah chithlum (sweets) an inpektuo niin defence ministry spokesman Lt. Col. Manish Mehta chun a hril. Nikum khan chu Pakistan sipai han ceasefire bawsea silai an hung kap leia civil mi 4 zet an thina leiin Eid Festival an hmang theinaw a nih.

AP kuomah Spl. Assistance Rs. 1000 crores
New Delhi:  Sawrkar thlungpui chun Andhra Pradesh state kuomah Special Assistance in Rs. 1000 crores pek dingin zanikhan a puong. Sawrkar thlungpui chun Rayalaseema le North Coastal region haia district hnufuol zuol haia hmasawnna sin thawna dingin Rs. 350 crore a pek ding thu Ministry of Finance official thusuok chun a hril a, Andhra Pradesh khawpui (capital) thar siemtharna dingin Special Assistance Rs. 300 crores le Polavaram Irrigation Project a dingin sawrkar thlungpiuin Special Asssitance Rs. 300 crores a pek bawk ding a nih tiin thusuok chun a hril.

Software Technology Park
Itanagar: Arunachal Pradesh Chief Minister Nabam Tuki ngenna angin Omkar Rai, Director General, Software Technology Park of India (STPI) chun Arunachal Pradesh state khawpui Itanagar­ah Software Technology Park indin a remtih. Hi le inzawm hin STPI le Arunachal Pradesh sawrkar hai chun October 1, 2015 khin Memorandum of Understanding (MoU) ziek an tih. STPI hi autonomous society, Department of Electronics and Information Technology, Govt. of India hnuoia um a nih.

Tribal Carnival huoihawt ding
New Delhi:  Hungtlung ding February 12­17, 2016 inkar sung khin Ministry of Tribal Affairs chun New Delhi­ah “Tribal Carnival” huoihawt a tih. Hi Carnival a hin Logo, hming le Tagline competition um a ta, pakhatna latuhai kuomah lawmmanin Rs. 30,000 pek ning a tih. Lawmman pakhatna dawngtu pathum an lo um pal chun logo a dawngtuin Rs. 15000 le hming le tagline a lawmman dawng han Rs. 7,500 ve ve dawng an tih. Entry September 28, 2015 chena peklut thei ning a tih.

Haj Stampede­a thi hai lai India mi 14 an than
Mina: Zani hmasaa Saudi Arabia rama Mecca khawpuia Haj Pilgrims a fe han ‘stoning of the devil’ an thaw laia inchilbuoina (stampede) tlunga mi 717 thi hai lai khan India mi 145 an thang a, hliem 800 chuong hai lai India mi 13 an thang bawk niin Jeddah hmuna India Consul general report chun a hril. India mi hliem hai hi hospital­a enkawl mek an nih tiin ei thu dawngna chun a hril.
-----------------------------------------------------------------------------------------------------
VAWISUN THUPUI
Ror>lna tha chu suksuok unla, mi tinin mâni unau chungah zângaina le lunginsietna inlangtir raw se:   ­ Zekaria 7:9

Editorial
Hlawtlingna
Hlawtlingna ti lêmah, ieng anga hlawtling ding am ti le chu hlawtlingna chu ienganga thawsuok ding am ti khawm chu ngaituo vang vang a pawimaw hle ring a um. Kum 2015 Januarty thla bul vel khan chu tulaia ei thil tuok le buoipui hi hungtlung a ta, hiengan boruok hi tuok ei tih ti ei suongtuo phak ngai nawh. Amiruokchu, “Times changes, and so are we? an ti ang deuin thil um dan le fe dan a hung inthlakthleng a, Manipur­ah Tribal Unity, a bikin Churachandpur­a cheng Zohnathlak hai ai inthlakthlengna nasa tak a hungtlung a, Zohnathlakhai inpumkhat le inthuruola hmalak tlang theina ding kawt a hung inhawng pha a, ei thil dit le ngenna haiah hlawtlaingna chang ngei tuma kal ei pen pei thei hi lawm a um.
   
A hmasa takin, hlawtlingna ding chun tumruna, ngaituona, taimakna, tuorselna, huoisenna le thuawina hai a pawimaw bek bek a nih. Ei ngaituona, ei taimakna le ei tuorselna hai hi hnam dang hai chung daiah a um le an vawr kai dai a tul a nih. Hlawtlingna ei chang ding chun ei thaw inrim el khelah tuor dam le chan dam ei nei ngam a tul takzet a nih. Chun, ei thaw peina lampuia hin iem a tha a, a tha naw a ti thlir thiem a, hmu thiem rana fe a tul bawk. Khawvela mi hlawtling ei tihai hi chuongang mi chu an ni rawp hlak.
   
Hlawtlingna hi vana intahwka hung tla thla chawr el chi a ni nawh. Thaw inrim ra tak meu meu a nih. Pathien thu khawmin thaw inrim dingin a min chuktir a nih. Ieng hnam le ieng mi khawm nisienla, a tul hmasa tak chu taima taka thaw pei mi annawleh hnam a tul phawt a nih. Thaw pei lo hai chu nei tlak le hmutlak khawm an ni nawh. Chu bakah hlawtlingna ding chun mani mawphurna seng indik, huoisen le taima taka fepui ngam hnam a ni ngei a tul a nih.
   
Khawvela mi hlawtling, ram le hnam hlawtling hai khawm hi an chanchin ei hang sui chieng a, ei hang belchieng chun, an taima a, an huoisen a, an tuorsel a, teirei an pei a, an mawphurna an fe tlanpui a, an ringum a, an indik a, thil an namnul ngai naw a, hlawtling khawpa hma la an ni hlak. Mi dawizep chun sawl tak le taima taka hma hang lak a lungril hlak. Amiruokchu, laklaw takin a tlanse rawp lein hlawtlingna a chang ngai nawh. Chuleiin, ei hmalakna a hin tlanse ding le inhlem ding ei ni nawh. Khawvela hnam inthlierhranna rapthlak takel (Apartheid) umna rambung a mihang hai hmalak dan kha ngaituo inla nuom a um, a mi sukhrattu a ni ngei ring a um.
   
Ngam lo le hneban thei ngailo ding khawpa ropui Roman Empire ngei khawm hneban lo niin, a hne hnung le a sirde hnung khawvela sawrkar ropui le thil thaw thei an hung ni ve ta thung a nih. Kha hun laia hriet khawp ni lo USA, Japan le sawrkar dang dang an hung dingchang ta a nih. Zohnathlakhai khawm hi mihai hriet fuk khawpa tam ninaw inlakhawm ei thangruol a, pumkhata ei ngir tlat chun Anti­Tribal Bills 3 ei dona kawnga hin hlawtling hun ei nei ngei beisei a um.
   
Kum zakhat chau sungin saruoka inthawk silfen tha le nal, building le motor nal le tha, India sawrkara palai hiel nei thei ta le Information Technology haia khawm duoi bik ta lo hnam, Zohnathlak hai hi ei thangruol pei a, inpumkhata kal ei chawi pei chun ei thiltum le ei thil ngena hin hlawtling ngei ei tih. Amiruokchu, Pathien malsawm tlaka kal ei chawi a tul a nih ti hi theinghil ngai nawng ei tiu.



Post a Comment

Powered by Blogger.