Responsive Ad Slot

Hmasawnna Thar | 25 September, 2015

Friday, September 25, 2015

/ Published by VIRTHLI
Tuolsung
Inrawnkhawm hnunga CM fielna dawn chau dingin an rel
CCPur: Zani sun dar 12 khan UPF, KNO, Tribe Leaders, Philanthropic Organisations, Student leaders le Church Leaders han KKL Complex, IB Road, CCPur­ah Joint meeting an nei a, agenda pathum hai an hriltlang.
   

Manipur CM in JAC kuoma inbiek dinga fielna a hung siem chu Inpui hai po le thuoitu han pawimaw le tul hai an hriltlang hnungah damtea inbiekpui (inbiek dinga fielna) an remtih. Hmatieng a hmalak pei dan ding chu district tina thuoitu tum tum hai le inhrepawa, chu hnunga hmatienga nuorna nei dan dingah thutlukna siem ding bakah Tribal Martyrs hai ruong vuina ding thuah JPO in town area hmun 8 le town puotieng hmun 7 an enna report an pek a, JAC ngenna angin Tribe leaders han Sept. 25, 2015 chenin Tribal martyrs 9 hai vuina ding an sukfel ding; Vuina ding hmun sukfel a ni zoah mipuiin rem an ti hun huna vui ding tiin an rel. 
   
Hi huna Calvin H. in thu a hrilnaa chun, Political demand chu UPF le KNO mawphurna a ni a, JAC in Manipur Assembly in bills 3 a pass hai, khawtlang buoina le mithi hai a buoipui ding thu a hril. CCPur District Christian Goodwill Council chun buoina suok a inthawk Kohran han inkhawm dar an vuok tanaw thu, ei buoina a re theina dinga Pathien kuoma tawngtaina nasa taka nei a ni thu an hril.
   
ZRO Adviser K. Guite chun, Chief Minister fielna thuah tuolthattu state sawrkar a ni leiin inbiekna a um theina ding bakah tribal han dan le dun ei nei ve ti inentirna dingin Tribal customary & culture dungzuiin mithi 9 hai tuomin ran a that ding a nih tiin a hril.
   
Manipur CM in JAC inbiekpui dinga a hung fielna thuah buoina hi Tribal issue a ni leiin UNC, ZC, HI, Kuki Innpi, ATSUM le Stake Holders hai le joint meeting an nei hnungah inbiekpui dan ding inhriettir a ni chau ding thu JAC chun CM fielna dawnin an inhrietir.

Zanikhan ralna JPO kutah Rs. 1,00,070/­ a lut
CCPur: JPO chun zanikhan mimal le organisation tum tum haia inthawk Martyrs hai ralna le thangpuina sum an dawng chu Rs. 1,00,070/­ a tling phak a, zani chena JPO kuta sum lut ta chu Rs. 43,21,523/­ a tling tah. Zanita ralna sum petu hai lai hin New Lambulane Chongthu Baptist Church Association Women Fellowship Rs. 4000/­, ESC Church Langol, Imphal Rs. 3000/­; Society for fast Justice, CCPur Rs. 2000/­; Kuki Christian Leader Fellowship (KCLF) Rs. 5000/­; ZOFA Global Network (Mizoram) Rs. 9000/­; ZoRO in puon 9 le JPO fund dingin Rs. 10,000/­; MPCC (Mizoram Pradesh Congress Committee)  in puon 9, Mizo Students Union (MSU) puon 9 a thang.

Inkhawmpui hun sawn hlat
CCPur: EFCI Saikawt Presbytery Standing Committee Sept. 23, 2015 a nei chun tulaia CCPur khawtlang boruok thatnaw leiin October thlaa Department inkhawmpui nei dinga ti hai chu a sawn hla. Kristien Thalai Pawl (PKTP) inkhawmpui chu December 11­13, 2015 inkar sungin Saidan khuoa nei ning a ta, Nuhmei Pawl (PNHP) Inkhawmpui chu Demcember 18­20, 2015 inkar sungin Muolvaiphei khuoa nei dinga sawn hlat a nih tiin Presbytery Superintendent, EFCI Saikawt Presbytery chun inhriettirna a siem.

ZoRO thuoitu han mithi an hung ral; JPO le JAC an inhmupui
CCPur: Zo Reunification Organisation (ZoRO) a Vice President Rohmingthanga; Lalmuanpuia Punte, Consultant, ZoRO GHQ hai inrawinain Mizoram­a inthawk ZoRO thuoituhai, Zoga Global Network GHQ, Zoram Nationalist Party GHQ, Mizoram Pradesh Congess Committee, Mizo Student Union thuoitu an rengin mi 9 hai chu zani hmasa zan khan CCPur an hungtlung a, JAC hotu hai an inhmupui zo hnungin zanikhan District Hospital­a JPO hai inhmupuiin Martyrs 9 hai ralna an nei a, JAC thuoituhai khawm an inhmupui bawk.
   

ZoRO inrawinain zani khan KKL Complex, IB Road­ah Press/Media hai an inhmupui a. ZoRO President Rohmingthanga chun, 2011 census dungzuiin Zohnathlak hai 65 lakh vel ei ni a, UNO chena ZoRO chun zohnathlak hai harsatna, roinelna pakhat hnuoia an um theina ding an tlun a nih. Myanmar tuilien tuor hai ZoRO bakah Mizoram sawrkarin thangpuina tam tak a pek ta thu a hril. Manipur tlangrama buoina suok leia Martyrs hai ZoRO in a sun thu le hliem hai a tuorpui thu hrilin Manipur­a zohnathlak hai inrem le inthuruol taka kal an pentlang thei chu lawmum a ti thu a hrilin hmatieng peia khawm inthuruol taka kal pentlang pei dingin a ngen. Mizoram­a inthawka an hung na sengso hai chu Mizoram CM Lalthanhawla in a tum vawng a ni thu le ZoRO GHQ in a tul ang peia a thangpui pei ding thu a hril.

Papui duty han inruithei zawr an man
CCPur: CCPur Police station tuola duty papui hai chun zani zantieng 4:00PM vel khan ringhla leiin nuhmei pakhat manin thu indawnna an nei a, a kuta inthawk Heroin (No. 4) pcs 3 le Syringe 1 an dapdawk. Mana um nu hin Thianngaiching (30) d/o Khamzamang of Imphal niin an hril a, Khuga Tampak, Zoveng –a inthawk Heroin hi an chawk niin a hril a, New Bazar­a Night Centre­a riek le khawsa hlak niin an puong.


Papui hai an duty tan
CCPur: JAC in 1:00PM a inthawk 7:00PM chen papui han sit­in­protest nei ve ta dinga VA le Welfare Committee hai kuoma inhriettirna a siem angin zanikhan CCPur khawpui sung hmun tum tum haia chun nuhmei pawl hai duty ta lovin papui hai an duty ve thung tah. Nuhmei le pasal duty/sit­in­protest hun tekhi in pasal hai duty huna hin motor tlan inlawn an tlawm lem tiin ei thu dawngna chun a hril.

Bills hnawl a ni theina dinga tawngtai dingin
CCPur:  Manipur Govt. in Anti­Tribal Bills 3 a passed hai Act a ni theina dingin Manipur sawrkar chun President Pranab Mukherjee kuomah a peklut ta a. Hi le inzawm hin Bill 3 hai President in hnawl a, Act a hung ni nawna dinga Kohran tin hai chu Pathien kuoma tawngtai ding le a bik takin President Pranab Mukherjee ta dinga tawngtai dingin Info. & Publ. Dept., JAC hun inhriettirna le ngenna a siem.

JAC in an dem thu an puong
CCPur: Mi thenkhat, a bikin phairam district a inthawka propaganda indiklo thedar a ni hlakna thuah JAC Against Anti­Tribal Bills chun pawi a ti a, hnambing thil anga print le electronic media, a bik takin ISTV in an suo nawn rawp hi JAC chun a dem takzet a nih. JAC hi non­communal committee, Tribal apex bodies, JPOs, CCPur le CCPur­a Students Organisation tum tum hai thangruola indin, Hmar Inpui, Zomi Council, Kuki Inpi, Manipur le United Naga  Council han an thlawp a nih tiin zanikhan JAC, Information & Publicity chun thusuok an siem.

Khuo tum tuma ralna sum dawl dawk Rs. 8,03,580/­
CCPur: JAC Finance Sub­Committee in khuo/veng tum tum tum haia Martyrs hai ralna din In tina Rs.100/­ le a chungtieng dawl dinga inhriettirna a lo siem angin dawl mek a ni a, September 24, 2015 chen khan Rs. 8,03,580 dawl dawk a ni tah. Hi baka hin Finance Committee, JAC  chun Naga Peoples Union, Imphal­a inthawk Rs. 60,000; Manipur Tribal Forum, Dimapur a inthawk Rs. 14,660 le Tengnoupal V/A Chandel Dist. a inthawk Rs. 15,710 a hmu bawk.

Secretary ECI in a kaisang
Parbung/New Delhi: Election Commission of India (ECI) hnuoia Under Secretary sin chel lai mek Pu Darsuothang s/o H.K. Thanga of Parbung/New Delhi chu zani hmasa khan Secretary, Election Commission of India in a kaisang. Ama hi hnam ta dinga mi thahnemngai tak niin an sungkuoin Delhi­ah an khawsa mek. (virthli)

Headline
Mecca hmuna inchilbuoina tlungah mi 700 chuong an thi tah; mi 863 an hliem
Mina: Zanikhan Saudi Arabia khawpui Mecca hmuna Islam sakhuo zuitu han kum tina an thaw hlak, an hunpui tak hmang dinga an hmun thienghlim Mecca ­a Haj Pilgrimage (sakhuo thil a inzin) an fe hunah inchilbuoina nasa tak a tlung a, mi 700 chuongin an thi bakah midang 800 chuongin hliemna an tuok. Annual Pilgrimage an fe huna an ngaipawimaw em em ‘stoning of the devil’ an thaw laiin lamthuom pahni haia inthawk Jamarat pana fe mipui an innawrbum thut leia inchilhlumna rapthlak tak hi tlung niin ei thu dawngna chun a hril. Thi le hliem hai hi khawvel rambung tum tuma mi anni tawl a, hliem hai lai hin India mi khawm 2 an thang niin ei thu dawngna chun a hril.
   
Hi thil tlung hun hi India darbi a chun 11:30AM (9AM local time) niin Saudi Press Agency report chun a hril. Kum 25 liemtaa annual pilgrimage a inzin huna sietna tlung rapthlak tak pahni nia hril a nih. Kum 1990 khan an hmun thienghlim panna tunnel (hnuoiver) sungah inchilbuoina (stampede) tlung leiin prilgrims a fe mi 1,426 an lo thi ta bawk a nih. Tukum Haj Pilgrimage a hin khawvel rambung tum tuma inthawk mi 2 million vel an fekhawm a, hi lai hin India mi khawm 1.5 lakh zet an thang a hril a nih.
   
Jeddah hmuna Indian Consulate chun tuchena hin India mi thina tuok an um thu hriet a la ni nawh tiin a hril a, India mi 2 hliem hai ruok chu hospital­ah admit an nih tiin a hril. President Pranab Mukherjee le Prime Minister Narendra Modi hai chun Mecca hmuna thil tlunga thi le hliem hai an tuorpui thu an puong.
   
Tuta hma met khawm khan Mecca Grand Mosque hmuna Mosque bawlnaa hmang crane chim leiin mi 115 zetin thina an lo tuok ta a, thi hai lai khan India mi 11 an thang a nih.

Thil rik phur motor lien hai tlan phal lo
Imphal: Tulai hin Pallel ­Moreh road siem mek a ni leiin thil rik phur motor lien, Shaktiman le  Truck hai an tlan phal a ninaw a, hi khapna pawisa lova tlan lui an um a, harsatna an tuok khawmin an ni mawphurna nig a tih tiin State Public Workd Department (PWD), Govt. of Manipur chun inhrietirna a siem. Ruotui tam leia mimkei  leiin Pallel­Moreh Road a lampui le leilak a suksiet hai siem thatna sin chu state PWD in tulai hin chawl lovin an thaw zing a nih.

Vawisun Id­ul­Zuha Kut
Imphal: Rambung le hmun dang dng h aia hmang a ni ang bawkin vawisun hin Manipur a Muslim sakhuo zuituhai chun Id­ul­Zuha Kut ursun takin hmang an tih. Manipur Assembly Speaker Inner Lok Sabha MP Dr Thkchom Meinya, Manipur Rajya Sabha MP Haji Abdul Salam le Political party tum tum thuoitu hai bakah Manipur CM hai chun Id­ul­Zuha Kut hmangtu ding po po hlim le lawm taka hmang seng dingin ditsakna an inhlan tawl.

Eastern Army Commander a hung inzin
Imphal: Lt. Gen. Praveen Bakshi, AVSM, VSM, General Officer Commanding­in­Chief, Eastern Command ch zanikhan Manipur­ah a hung inzin a, Lt. Gen. Bipin Rawat, AVSM, YSM, SM, VSM, General Officer commanding, 3 Corprs in a hung zui. Army Commander hin Manipur CM O.Ibobi Singh khawm Chief Ministers Secretariat­ah an hmupui a, Manipur state sunga Law and order chugnthu hai an hriltlang.

October 15 chen inzieklut thei
Imphal: HSLC Examinations, 2011, 2012, 2013, 2014, 2015 le HSLC Compertmental Examination, 2015 a failed, HSLC Examination, 2016 hung um dinga External or Supplementary candidate a exam nuomhai ta dingin October 15, 2015 chen khin Proforma hmangin hming zieklut thei ning a tih. Candidate pakhatin permission fee Rs. 400/­ pei a pek tul tih tiin Controller of Examinations, Board of Secondary Eduation, Manipur chun inhriettirna a siem.

EO le AEO Interview hun
Imphal:  MAHUD hnuoia thawk ding Executive Officer (EO) le Assistant Executive Oficer (AEO) sin hai lakna dinga MPSC in MAHUD Examination, 2014 a huoihawt result insuo a ni ta a, mi 72 an hlawtling. Hlawtlingna changhai ta dingin Interview/Personality Test October 12, 2015 in MPSC Office, Imphal­ah nei ning a tih. Attestation Form le Interview Call Letter 28­09­2015 a inthawk MPSC Office­a lak thei ning a tih. Interview huna Orginal Certificates le documents hai chawi ding a nih.

Electoral Roll siemthatna
Imphal: October, 2015 a inthawk Manipur a Electoral Roll siem thatna sin thaw tan ning a ta, January 1, 2016 chena kum 18 tling hman ding hai chun electoral Roll siem that dinga hin an hming zieklut thei an tih tiin CEO, Manipur chun a hril.

AR han PREPAK cadre 1 man
Imphal:  45­Assam Rifles le Police thangruol hai chun Sept. 23, 2015 khan Khabeisoi hmuna PREPAK (PRO) cadre pakhat SS Pvt. Suresh Tamang @ Boi (35) s/o (L) Gopal Tamang of Langol, Imphal West an man a, Heingang Police kutah an peklut niin zanita Assam Rifles thusuok chun a hril.

MTFD in Ashok Prasad an inhmupui
New Delhi: Manipur Tribals Forum, Delhi (MTFD) chun ADC/CCPur member thenkhat hai leh Sept. 23, 2015 khan Mr Ashok  Prasad, Internal Security, Special Secretary, Ministry of Home Affairs an inhmupui a, September 22, 2015 nia President Pranab Mukherjee an inhmupui chungthu an intlun a. Mr Prasad chu Manipur Assembly in bills 3 a passed hai President pawmpui dinga peklut nitaa local paper han an zieklang na thuah President inhmupui dingin an ngen thu zanita MTFD in press release an siema chun a zieklang a. Manipur tlangmi han state sawrkar chunga ringzona an nei tanaw thu le muongna tluontling a hung um theina dinga an rang thei anga hill district a stakeholders hai political dialogue neipui dinga sawrkar thlungpui an ngenna hai an zieklang bawk.

Mimkeiin nuhmei pahni a vur hlum
Shillong: Meghalaya­a East Khasi Hills district sunga Lamavilla area a chun ni iemanizat zet liemtaa inthawk ruo a sur leiin September 23, 2015 zantieng khan mimkei a tlung a, retaining wall chimin In pakhat a del chim leiin nuhmei pahni Meenu Thapa (40) le Karuna Shreshta (25) hai chu an thi. Hi thil naupang kum 5 mi a hliem leiin hospital panpui a nih. East Khasi Hills DC P.S. Dhkar chun, hi thil tlung hi suizui dingin Meghalaya Urban Development Authority an hriettir a, thina tuok sung hai kuomah zangnadawmna pek an ni ding thu a hril. Mawmluh­Mawshamok Road le Sohra­Shella Road, East Khasi Hills haia khawm mimkei a tlung niin ei thu dawngna chun a hril.

Vyapam scam thuah CBI in hmun 40 an dap
Bhopal: Central Bureau of Investigation (CBI) chun Madhya Pradesh­a recruitment scam ‘Vyapam Scam’ tia ko le inzawmin Madhya Pradesh­a hmun tum tum 40 lai an dap. CBI hin Indore, Bhopal, Jabalpur, Ujjain, Rewa, Lucknow le Allahabad haia hmun 40 an dap a, hienghai lai hin Technical Education minister hlui Laxmikant Sharma chengna in khawm a thang.
   
CBI chun hi case an suizui mekna le inzawmin tulai hnai khan hi scam­a mawphurtu taka intum Lakshmikant Sharma hi thu indawnna an lo nei taa a, FIRs 100 chuong an registered tah. Professional Examination Board­VYAPAM scam hi recruitment le admission test scam lien pawl laia mi a nih.

CBDT in Rs. 20 crores an dapdawk
Mew Delhi: Central Board of  Direct Taxes (CBDT) chun Intelligence Bureau a inthawk report an dawng angin pawisa suma inkhelna ‘lottery­hawala­money laundering racket’ le inzawmin Kolkata le Siliguri haia zani zingkar­a inthawk khan hmun pahni hai an dap a, saiip 20 a inthun pawisa Rs. 20 crore vel ding dapdawkin an man. CBDT chun report an dawng angin hmun dang dang khawm an la dap zing. Pawisa an dapdawk hai laia gunny bags 13 a i nthun hai chu 127B, Sarat Bose Road, Kolkata hmuna an dapdawk le gunny bag 3 hai chu 75/3, SN Roy Road, Kolkata hmuna an dapdawk a ni le travel bag lien 3 le ft. 6 a insang steel almirah pawisa siena hai chu Teesta Distributors, Ananda Mangal Square, Siliguri hmuna an dapdawk a nih.

7th Pay Commission report
New Delhi: Seventh Pay Commission chun an recommendations siem an zo fel ta a, Union Finance Ministry ah report an peklut vat ta ding niin hi Commission Chairman Justice A.K. Mathur chun a hril. Hlaw hi kum 10 dan peia ennawn le siem that hlak a nih. Sixth Pay Commission 1­1­2006 a hmang tan, Fifth Pay Commission 1­1­1996 a hmang tan an nih. Sawrkar thlungpui hnuoia thawktu nuoi 48 euthaw le pensioners 55 lakh vel an um. Seventh Pay Commission a memberhai chu, Vivek Rae, IAS, 1978 batch le Rathin Roy, Economist hai an ni a, Secretary chu Meena Agarwal a nih.

India ramah Doctors 16,75,399 an um
New Delhi: Health Ministry in National Health Profile (NHP), 2015 a puonglang­a chun   India ramah allophathic doctors 938,861, Auyush (Ayrvedic, Yunani, Sidhi le Homeopathy) doctors 736,538 le nurses 256,6067 an um mek a, India rama doctors um chu an rengin 16,75,399 niin a zieklang. Hi baka hin NHP­2015 in a tarlang danin kum 2014 chen khan India ramah Ha doctor (dental surgeons) 154,436 registered an um bakah June, 2014 chen khan registered Pharmacist 664,176 an um. India rama doctor tamna tak chu Maharashtra niin registered doctors 148,575 an um a, a dawttu chu Tamil Nadu niin registered doctors 102,328 an um a, Doctor tlawm na tak chu Andhra Pradesh niin doctors 510 chau an um.
   
India rama tuhin Medical Colleges 398, Dental Colleges (bachelor degree level) 305, Dental Colleges (master degree level) 224 a um. Chun, Nurse inchukna 2,865 a um a, hienghaia inthawk hin kumtin general nurse midwives zo 115,484 an um zie a, December, 2014 chen khan Pharmacist inchukna colleges 723 a um. Chun, Hositals 20,306 a um a, hienghaia hin khum 675,779 an um a, hi laia hospitals 16,816 hai chu tlangram le 3,490 chu khawpui (urban areas) a um an nih.

CRPF jawan ama le ama an that
Raipur: Chhattisgarh a Gariyaband district­a chun zani hmasa zan khan CRPF constable  Santosh Kumar Singh (26) chu ama hmang lai rifle hmangin ama le ama an kap hlum niin  Additional SP, L. David chun a hril. Mr Santosh Kumar hi CRPF 211 battalion a um niin an camp­a a duty huna ama le ama inkaphlum a nih. Santosh Kumar hi Uttar Pradesh­a Deoria khaw mi a ni a, iengleia hieng thil a thaw am ti hriet a la ni naw a, case registered a nih.
   
Chun, zanikhan Chhattisgarh­a Sukma district sunga CRPF han dappui an thaw huna Naxalites hai bomb chang kam puok leiin CRPF constable Dev Suresh in hliemna a tuok.
----------------------------------------------------------------------------------
VAWISUN THUPUI
Thil tinrenghai chun hun le kawnglam an nei si a, mihriem buoina chu a chungah nasa hle sien khawm. Thil la hung tlung ding chu a hriet si nawh a, a la hung ni dan ding chu tuin am hril thei a ti leh? ­ Thuhriltu 8:6­7

Editorial
Inlang lova thupruk thei tak tak a um nawh

Scientist­hai chun khawvel leilunga thil um hrim hrim hi a ral ananwleh a bohmang vawng ngai naw a, thil dangah an siem danglam chau hlak a nih tiin an hril. Lekha ei raw hmang hin lekha a ni theina thil chi hran hran chu boruok (carbon dioxide) a dam le thil dang dangah an siem nawk a, a bohmang naw a, thil dangah an siem le an letna po po hi lekha a ni laia a rikna leh an lan ang thlap a nih ti a fiena an hmusuok. Mimawl ngaituona a chun a ral hmang vawng nia ngai hlak a ni a, nisienlakhawm scientists han a bohmang vawng naw a nih ti an fie chieng hle a nih.
   
Mihriem khawsak dan phung khawm hi hiengang deu a um dinga ngai a ni a; fakruk ei ti rawp khawm hi thil dang a inthawk a hung inlang suok tho tho hlak. A tira lekha pawisa kha Car dam, building dam, ram dam, inhmun dam, rangkachak le thil hlu em em, manto tak takin a hung insiem hlak. Fakruk a ni mieu leiin a tir chun midangin an hriet ngai nawh. A hung sawt deu deu a, fakruk na nana chu thup seng a ninaw a; miiin “ka fakruk a nih” ti naw sienkhawm, a khawsak dan phunga inthawkin a hung inlang suok a, a tawpah iengti zawng takin amani hriet suok a hung ni hlak.
   
Ei rama ngei khawm hin sawrkar sinthaw, Kohran pawl tum tuma thawkna nei, minister, MLA, MP, ram thuoitu inti, hnam thuoitu inti thenkhat chu an hlaw le an sum lam suok le inmil der lova che lien le che inhawi an bo bik nawh. A nina taka chun midangin an fakruk zie hi hrie hai sienla pawi an ti nawh tina a ni a, chu umzie chu mipu inzana an nei naw a, khawtlang an inza naw a, sawrkar khawm an ti der nawh tina ang tluk a nih. A khaikhawmna’n, an mihriem chanpuihai inzana an nei der nawh tina a ni bawk.
   
Inlang lova thil thupruk thei tak tak a um nawh. Ei khawvela hin a ruk a ralin thil thaw a ni hlak. Amiruokchu, inlang lova thupruk iengkhawm a um thei nawna  khawvel a ni mieu  leiin a ruka thil ei thaw hai hi a hung  inlang suok nawk hlak a, a lan lang suok lo hai khawm ieng huna mani chu a la hung inlang suok tho tho ding a nih. Churachandpur town le a se vel haia chun tulai hin ram le hnam ta ding tiin sun var lai chau ni lovin zan huna chen ei duty tawl a, lawm a um lai zingin thil thalo thaw an um hlak nia hril rik a hung um el hi a pawi takzet a, bansan hmak ding a nih. Nupa inremnawna chau ni lovin, sungkuo, khawtlang, ram le hnam ta ding khawma thil inzakum, muolphona le sietna nasa tak hung intlun thei ding a nih. Nuhmeihai an sawl ta bawk a, pasal han an sawkzangkhai theina dinga an duty khawm thil awm tho a nih.
   
Ei state sawrkar khawmin Manipur tlangram buoina, a bik takin Churachandpur chungchang (issue) chu ngaisak lo le thup a tu m a chu a thup thei tak tak ta nawh. Sawrkar thlungpui nakawr a deng a, sawrkar thlungpiin Churachandpur­ah palai a hung tir meu chun a thu le hla an ta nawh. Zani hmasaa State Cabinet meeting ah Churachandpur issue a ngaituo a, buoina chingfel dan ding a ngaituo zek el a nih ti chu ei hriet seng ta ngei ring a um.
           

Tribal Martyrs 9 hai hi iengang taka kap hlum am an ni a ti khawm hi inbiekna a hung u m thei chun suisuok a la hung ni beisei a um. Thil indiklo le suol chi tum tum hai  hi thupruk sawng thei tak tak a ni naw a, ieng silaimu am hmang a na, tum a kap hlumtu, tum silai hmetpuok dinga thu petu ti hai khawm suizui a la hung ni ngei beisei a um. Thil indiklo thawtuhai chun dan angin roreltu han an chungthu relin, dan ang ngeia an phutawk hremna pek ngei ngei ding an nih.
Don't Miss
© all rights reserved
made with by Simon L Infimate