Headling
Nuhmei han ruosur hnuoiah Kangvai-a inthawk Human Chain thaw: Taksa chau leiin mi 4 hospital phurlut
CCPur: JAC hmalaknain zanikhan Nuhmei Pawl han Churachandpur District­ a Kangvai a inthawk District Hospital, CCPur inkar sung Human Chain thawin lampui intluonin an ngir tlar. Hi huna hin Manipur Assembly in Bills 3 a passed hai an dit nawna le inzawmin Signature Campaign an thaw bawk. Human Chain hi Kangvai­a inthawk tan a ni leiin an remnain hun sawt tak a lut a, zantieng dar 1 vela tan dinga ti kha zantieng 3:30PM chen khawmin duthusam in an lan rem rel thei nawh. Chu laizingin ruo a hung sur nawk leiin Human Chain a thang Nuhmei pawl hai chu an buoi hle a, nihliep khumin ruosur hnuoiah human chain thawin kut an inchel tawl.
   

Hieng laizing hin zanikhan CCPur Community Hall, Hiangtam Lamka campus­ah Hiangtam Lamka mipui chun Tribal Martyrs 9 hai thlalak tardawkin inzana an pek a, a nuom taphawtin inzana an pek theina dinga tha taka a chung inkhum a ni bawk.
   
Human Chain nuhmei pawl han an nei huna hin hriselna lo chau deu 4 hai chu an taksa hratna in a zonaw leiin District Hospital Casualty lutpui an ni a, pahni hai chu Medical Ward­a admit an ni a, pahni dang hai chu iemanichen enkawl anni hnungin Hospital­a inthawk insuoktir an nih.
           

Taksa chau leia Hospital panpui hai chu Mrs Lamneilhing (45) w/o T. Vungminthang of Lanva (BP tieng harsatna leiin doctor thurawn anga admit);Ms Bony Lalhlunmawi (20) d/0 Lalrammawi of Rengkai (luna khawsik le inluok char char a ni a, that tieng a pan pei a, sienkhawm Medical ward­a admit a nih); Ms Lalthangmawi (25) d/o (L) Ngurlienzuol of Khawpuibung (Kalna enkawl lai zing a ni a, a har  nawk deu ta leiin insuoktir phawt) le Mrs Lalnunzawm (34) w/o Immanuel of Muolvaiphei (ama khawm hi Kal na enkawl kai mek, a har deu ta leiin insuoktir nawk phawt) hai an nih. Ms Lalthangmawi hi Pu Zothanmawia, Vice President HYA GHQ le Pi Lalnunzawm hi Upa Tlanmawi, Secy. Fin. HYA GHQ han an in chen an va thak tawl. (with input form FHG)

Karthar sunga thaw ding vawisun an rel ding
CCPur: Zani zingkar khan JAC inrawinain JAC hnuoia Sub­Committee indina um hai, JPO thuoitu han KKL Complex, IB Road­ah joint meeting an nei. Hi huna hin JAC, Finance Sub­Committee le JPO le Women Wing han tuta kar sunga an activities hai report an pek bakah Sept. 20, 2015 hin JAC chun kar khat sunga activities ding hai hriltlangna le sukfelna nei an tih.

Vawisun 6AM­12 sung electric a varnaw ding
CCPur:  Khengjang­a 132/33/11KV Sub­Station Operation le Maintenance sinthaw ding leiin vawisun (Sept. 20, 2015) 6AM­ 12:00Noon inkar chun Churachandpur District pumpuiah Electric a varnaw ding a nih tiin A. Bimol Singh, DGM, Transmisson & Construction Division­1, MSPCL chun inhriettirna a siem.

Court in Sept. 21 chen PS Custody a um dingin
CCPur: Sept. 15, 2015 nia 12­Bihar Regiment, 7­Assam Rifles le Bishnupur Police Commando thangruol han Sagolpham Mamang Meitei Leikai, Tuibung­a an man KCP (MTF) cadre Laishram Herojit Meitei (36) s/o L. Ibomcha Meetei of Sagolpham Mamang Meitei Leikai, Tuibuong chu zanikhan CCPur Police han CJM Court hmaah an inlangtir a, CJM chun September 21, 2015 chen Police Custody­a la um phawt dingin a rel.

Hr. Sec. Leturer Recruitment­ah an hlawtling
CCPur: Manipur sawrkar hnuoia Government Higher Secondary tum tum haia Department (subject) tum tuma thawk ding Lecturer lakna (recruitment) final result puong a ni ta a, hlawtlingna chang hai lai Chemistry Department­ah Henry N. Pangamte s/o L. Ruoivel Pangamte; Home Science Department­ah Elmuonzo d/o Pastor Thangtinmang; Elizabet Lalramneilhun d/o Rosiemlien le S. Welhelmina Lalsiemthar d/o Ngursangluoi Sanate hai an thang.

KNLF cadre 4 jail­ah, pakhat Juvenile home­ah
CCPur: CCPur Police chun zani hmasaa khan KNLF cadre 5­ Ngangam (19) s/o Dongjang of Gamphajang village, Chandel district; Francis (18) s/o Lulun of Bongjol village, Chandel district; Galhang (23) s/o Lambu of Tengnopal village, Chandel district; Minlun (23) s/o Henkholen of Tollen village, CCPur district le Arjun @ Kakap (24) s/o Muljathang of T.Nampao village,Chandel district hai CJM hmah an inlangtir a, anni laia Francis (18)  ti lo chu Court rel angin Judicial Custody (Jail) a thun an ni a, Francis chu Court rel angin Juvenile Home­ah an  sie. KNLF cadre 5 hai hi Sept 9, 2015 nia M. Songgel hmuna 7­Assam Rifles han 9mm Carbine machine gun 2, magazine 1, 9mm Pistol 1 le magazine 1 bkah 9mm mu 9 leh an man a ni a, Police chun FIR No.85 (9) 2015 CCP­PS U/S 400 IPC & 25 (1­C) Arms Act. an registered khum a nih.

Donation Box­ah Rs. 1,52,055 a lut
CCPur: Tribal Movement fe mek le inzawma Tribal Martyrs 9 hai ralna le hliem hai thangpuina dingin zani khawm khan mi thahnem takin thawlawm an pek a, zanita JPO donation box/receiption le JPO gate donation box a pawisa lut hi a rengin Rs. 1,52,055 a nih.
   

Zanita ralna le thangpuina sum petu hai chu YVA Compound Veng­ Tui dawn ding litres 2000; Civil Officers Pensioner Society Rs. 10,000/­; Ex­servicemen League, CCPur ­Shawl 9 + Rs. 5,000/­; Uzungmakhong Nupi Pawl Rs. 2,500/­; Lalpuitluai Foundation School staff Rs. 5000/­; Mr Robin, New Lamka Rs. 2,000/­; ZYA Haopi Block Rs. 5,000/­; Disable Union CCPur Dist. Rs. 5,900/­ B. Phaicham Presbyterian Church Rs. 2,000; Baptish Church of Phoipi, Motbung, Sadar Hills, Shawl 9+ Rs. 5000/­; Consumer Club, CCPur  Shawl 9; ECA Church, Teijang Rs. 1,000/­KSO, Sangaikot Block, Shawl 54 +Rs. 35,425/­; EBCC Zenhang Lamka Shawl 9+ Rs. 21,890/­; ZMA, Tonglon Tuijang Shawl 9; Seloijang Baptist Church, Shawl 9+ Rs. 3,000/­; V. Hangkhanlian, Zenhang Lamka Shawl 9+ Rs. 20,000/­; Ngaljang Krist Saptuam Rs. 1,000/­; Ngaljang Chief Rs. 1,000 le JPO Gate donation box ah Rs. 26,340/­ a nih. Zani chena ralna sum lut hi Rs. 33,01,871/­ a nitah.

Moirang Bandh thul a nih
Imphal: Keke Moirang Apunba L:up in vawisuna inthawka hun tiemchin um lova Moirang Bandh thaw an tum chu hun iemanichena dingin an thul nawk. Zanikhan DC Bishnupur Office­ah Moirang A/C MLA le Parliamentary Secretary M. Prithviraj inrawinain DC, Bishnupur le bandh thaw tum pawl han inbiekna an nei a, chu taka an inbiekremna dungzuia bandh thaw tumtu pawlin an bandh thaw tum hi la thul hri phawt an remti niin ei thu dawngna chun a hril.

Students 8 khaw hre lovin an tlu
Imphal: September 18, 2015 khan Savio English Higher Secondary School, Thangmeiband a Class IX students han period hnina an lak lai takin student 8 zet chu thawklekhatin khaw hre lovin an tlu tawl nia hril a nih. Tuolsung mi le hi School Authority hai chun Pathien sinthaw ni dinga an ring thu an hril.

Motor eksidenah mi 5 an hliem
Imphal: Zani zing dar 6 vel khan Koirengei bulah Oil Tanker le Civil Truck an inbaw a, naupang 2 thangsain mi 5 an hliem a, 45­Assam Rifles han hliem hai hi first Aid an pek hnungin CMC Hospital, Koirengei an panpui niin Assam Rifles thusuok chun a hril.

Moirangkhom ah bomb a puok
Imphal: Zani zingkar dar 5:10 vel khan Imphal­Moreh road a Moirangkhom Saugaijam Leirak­a Mr L. Modhumangol (67) chengnain bul lai bomb a puok a, sienkhawm mihriem thi le hliem an um naw a, bomb puokna bul hnaia In bang thenkhat chu bomb hlekin a deng per nuoi bakah Car MN 01 S C 6564 hnungtieng glass (wind shield) chu a nghawr kawi vawng. Bomb hi Mr Modhumangol chengna in Gate vawitiengpang retaining wall bul laia puok a ni a, hi thil tlung hun hi zani zingkar 5:30AM vel kha nia hril a nih.

JAC Senapati in ni 9 sung nuorna
Kangpokpi: August 31, 2015 a Manipur Asembly in Bills 3 a passed dodalnain Joint Action Committee (JAC), Senapati chun September 21­30, 2015 inkar, ni 9 sung Sadar Hills biel sunga hmun hran hran haiah thungbuma nuorna nei ding, hi hun sunga passed­a um Bills 3 hai  hnukkir a ninaw chun October 1, 2015 a inthawk Trans­Asian Highway ah hun tiemchin um lova economic blockade thaw tan ding; September 30, 2015 ah ADC Sadar Hills members (MDCs) hai chu an office tuol, Kangpokpi ah thungbuma nuorna nei dinga ti an ni a, an nei naw leh an office khar ding ti le Sept. 22 & 23, 2015 a All India JAC Federation for Tribal Rights meeting­ah  palai 2 tir ni raw seh tiin Sept. 18, 2015 a meeting an nei huna an rel.

Registration Application Form
Imphal: Colleges +2  Courses nei le Higher Secondary Schools nei hai ta dingin Registration Application le Enrolment list (Academic Session 2015­16) peklut thei hun chu September 26, 2015 chena dinga suksei nawk a nih. Chun, Class XI & XII haia admission thawna dinga Eligibility Certificate lak thei hun khawm 26­09­2015 chen a dinga suksei nawk a nih tiin  Chairman/Secretary i/c, Council of Higher Secondary Education, Manipur chun inhriettirna a siem.

BJP Manipur Vice President man
Imphal: Thokchom Jadumani (56) of Khangabok Mayai Leikai chu September 17&18, 2015 inkar zan khan Police han an man. Thokchom Jadumani hi Vice President, BJP Manipur sin chel lai a nih. Jadumani hin nuhmei Judge pakhat thangsain mi thenkhat kuomah Rs. 10 lakh a puk a, Rs. 7 lakh chau a thungkir a, a dang Rs. 3 lakh a pek tanaw leia hekna an siem leia Police in an man niin ei thu dawngna chun a hril.

Third Counselling Sept. 21 ah
Imphal:  AIPMT, 2015 a tling, Counseling a la thang lo hai ta dingin September 21, 2015 khin Third Counseling nei ning a tih tiin Director of Health Services, Govt. of Manipur chun inhriettirna a siem.

Thla 8 sungin NE bielah helpawl 115 kap hlum
New Delhi: January 1, 2015 a inthawk August, 2015 inkar sung khan India hmarsak bielah Security Forces le helpawlhai inkaptuonaah helpawl 115 le Security Forces 40 kap hlum an nih tiin Ministry of Home Affairs thusuok chun a hril.

Muslim kulmut 3 silai 10 leh man
Chirang: September 7, 2015 khan Assam state a Chirang District sunga Daukhanagar hmuna Assam Police han Muslim kulmut hai camp an hlukhum a, Muslim kulmut pathum, Minarul Islam (20), Johrul Haque (25) le Badiur Zamal Sheikh hai chu tuolsung AK series Rifles 8  le InSAS Rifle 2 leh an man. Training huoihawttu tak hi Ashqnee Bura Bhai of Howly, Barpeta District a ni a, training petu chu Mohfiz of Baksa, Kamrup district a ni a, an thiltum tak chu Muslim mi suknawmnatu hai hrem a nih. Mi 3 hai hi Barpeta, Bongaigaon, Baksa, Nalbari le Kokajhar District a cheng mi 9 hai le Dhaligaon Police station huop sunga Daukhanagar training Camp training la an nih tiin Dr L.R. Bishnoi, IGP, BTAD chun a hril.

December­ah Draft Education Policy
Agartala:  December, 2015 thla khin Draft National Education Policy puonglang theia a um beisei a nih tiin Union Human Resource Development Minister Smriti Irani chun zani hmasa a Agartala hmuna media hai an hmupui huna a puonglang. National Institute of Technology (NIT), Agartala a va sir huna NE NITs Special meeting ko vat ning a ta, hi huna hin NITs han harsatna an tuok le an mamaw hai hriltlang ning a tih tiin Smriti Irani chun a hril bawk.

Maoist cadres 12 man an nih
Gaya: Darkar 24 liemta sung khan Bihar state a Gaya District sunga hmun hran hranah Maoist cadres 12 Police le security Forces thangruol han an man a; an kuta inthawk Walkie­talkies, Improvised Explosive Devices (IEDs), silai le a mu thahnemtawk tak man a nih tiin SP, Gaya chun hril. Maoist helpawlhai man an ni theina dingin Bhagalpur, Banka, Jamui, Munger, Lakhisarai, Sheikhpura, Begusarai le Khagaria district haia khawm dappui thaw pei la ning a tih tiin SP, Gaya chun a hril. Hieng districts haia hin October 12, 2015 khin Assembly election a um ding a nih.

Vica Voce hun ding siem thar
Police Department, Manipur hnuoia Police Constable (Male) lakna dinga Viva Voce hun chu siem thar a ni a, Viva Voce/Interview hun ding chu a hnuoia ang hi a nih. Viva Voce hi 1st MR Ground, Imphal ah zing dar 9 zata tan ni hlak a tih.
1. Ukhrul District (405): Sept. 28&29, 2015
2. Chandel Distric (566): Oct. 1&2, 2015
3. Tamenglong District (670): Oct. 3 & 4, 2015
4. CCPur District ( 914): Oct. 5, 6 & 7, 2015
5. Senapati District (1070):  Oct. 8, 9, 10 & 11, 2015
6. Bishnpur District (701): Oct. 12, 13 & 14, 2015
7. Imphal East & Jiribam (1802): Oct. 15, 16, 17&20, 2015
8. Thoubal & Sugnu ( 1952): Oct. 22, 23, 24, 25&26, 2015
9. Imphal West ( 2207): Oct. 27, 28, 29, 30&31, 2015
10. Remaining candidates (Hils & Valley): Nov. 1, 2015
   
Candidates han Viva Voce huna Admit Card, Original Educational Certificate le documents dang dng hai chawi ding a nih.

Intensive Student Contact Progamme
Delhi Public School, Ghaziabad le PACE IITians chun October, 2015 haptakar hnina le January 16, 2016 inkar sung khin Intensive student contact programme Delhi Public School, Ghaziabad hmuna huoihawt a tum. Hi thil hi JEE (Advance) le JEE (Mains) 2016 a thang ve theina dinga thaw tum a nih. Council of Higher Secondary Education Manipur hnuoia affiliated schools haia Class XII (Science) inchuklaihai hi programme a hin thang thei an tih. Hi taka zu thang ding mi 50 (nuhmei 25 le pasal 25) hai chu Directorate of Eduation (S), Govt. of Manipur in thlang a tih. Chu thlangsuokna dingin Selection test Sept. 27, 2015 khin TG Hr. Sec. School le Lamlong Hr. Sec. School haiah huoihawt ning a tih. Hnina lekha 25/9/2015 chenin Directorate of Eduation (S), Lamphelpat ah peklut thei ning a tih. Appliation Form le thu chieng lem www.manipureducation.gov.in ah download thei ning a tih. Sum seng po po Directorate of Education, Manipur le Sponsoring Institutes han an tum ding a nih. Hi taka thang hai chu Class XII Examination, 2016­ah an thang thei tho ding a nih.

NSCN(IM) in suol dotu dingin CSD an din
Dimapur: NSCN(IM) chun Dimapur le a se vela suol dotu dingin Crime Supression Department (CSD) an din. CSD hin zan sawt tak chena Disco thawnahai, Night Clubs, Restaurants hai check an ta, hmun fienriel deu state stadium, DC Court, 4th Mile, Agri Expos le Chathi River hai khawm dap an ta, dan kala ramdang thil zawr, duplicate tobacco products, Ganja, Drugs, motor inru, a ruk a rala ralthuom zawr, thil a man to taluo a z awr, petrol a thil dang chawkpawl, thil a hun bo tahnung zawr, bufai tha lo zawr le a dang dang hai khawm an hmalakna hin a huomsa vawng ding a nih tiin Khekuto Jakhalu, Secretary to CSD, NSCN(IM) chun thusuok a siem.

Maoist thlawptu 400 zet an inpe
Malkangiri: Zani hmasa khan Odisha state a Malkangiri District a Materu Gram Panchayat hnuoia cheng Maoist thlawptu mi 400 zet Police kuta an inpe a, inpe hai lai hin Maoist member 45 an thangsa tiin Mitrabhanu Mohapatra, SP, Malkangiri chun a hril. An thuoitu han pawitawk lo mi tam tak an that bakah an pawl rorel dan an ditnaw leia inpe anni thu inpehai hin Police kuomah an inpuong.

Sept. 21 a inthawk AC Bus
Aizawl: September 21, 2015 a inthawk Transport Department, Mizoram chun Aizawl le Silchar inkarah Air Conditioned (AC) Bus chin intlantir tan a tum. A/C Bus a hin mi 12 chuong theina seat um a ta, a chuongman chu mi pakhatah Rs. 273 ning a tih tiin Transport Department thusuok chun a hril. Zing dar 6 a suok tan hlak a tih. Aizawla inthawk Thaw­tanni, Nilaini le Zirtawpni haiah Silchar pan a ta, Silchar a inthawk Thawleni, Ningani le Inrinni zatin Aizawl pan hlak a tih.

PM in IPDS thaw tan dingin
Varanasi: PM Narendra Modi chun zani hmasa khan thlangtlinga a umna Varanasi ah Integrated Power Development Scheme (IPDS) thaw tan dingin a hawng tan. Hi Scheme thawna ding sum hmang dinga riruogn chu Rs. 45,000 crore a nih. Kum 2011 chena khin hi Scheme hmang hin India ram pumpui chu power supply 24x7 a pek le semdar ding ti a nih. Chun, tlangram kilkhawr hai khawm ni khatah power darkar 4­6 sung pek ding tia riruong a nih.

Rs. 30 lakh le Zu litres 5,926 man
Patna:  Zani hmasa khan Bihar state a Nawada, BAnka, Bhojpur le Madhubani district haiah Rs. 30 lakh, Zu litres 5,926, Mobile phone 15, SIM Cards 20, silai 12, silaimu 36 le motor 10 man nawk a nih tiin R. Lakshmanan, Chief Election Officer (CEO), Bihar chun a hril. Bihar State Assembly election hung um dinga hin candidate­hai chun vote neihai chu pawisa le mobile phone hmnga inchawk an tum nasa a, hi lei hin hiengang thil do le manna dinga hmalakna sukhrat zuol a nih tiin R. Lakshmanan chun a hril.

Pawisa note lem Rs. 90,300 leh pasal 1 man
Ghaziabad: September 17, 2015 zan khan Hindon Air Force Station, Ghaziabad hmuna Delhi mi Layak Hussain Ansari chu India pawisa note lem Rs. 90,300 leh man a nih tiin Hari  Dayal Singh Yadav chun a hril. Pawisa note tehlema a sumdawngna hi kum tam tak a ni ta thu Layak Hussain Ansari chun a hril. Layak hi Section 489B le 489C IPC dungzuia case siem khum a nih.

Helpawl 4 kap hlum, AK­47 Rifle 2 hmu
Rinagar:  Zani hmasa khan Jammu & Kashmir State a Kashmir hmartiengpanga Gurez an ti hmuna Security Forces le helpawlhai an inkaptuo a, helpawl 4 kap hlum le inkaptuona hmuna AK­47 Rifles 2 hmu a nih tiin Police official thusuok chun a hril.
-----------------------------------------------------------------------------------------------
VAWISUN THUPUI
Lalpa Pathiena nei hnam chu an hamtha a, Ama rochan dinga a thlang mihai chu. Lalpa chun vana inthawk khin a thlir a, Mihriem nauhai po po hi a hmu hlak.    Sâm 33:12­13

Editorial
Tribal Revolution

Indona (war) ei ti hi a hming ringawt a inthawk khawmin tibaium takel a nih. Hi thumal ei lamrik le inruol hin lung a thawngin lungphu a tawk danglam nghal dut dut thei hlak. Hiengang khawp hiela tibaium nisienla khawm khawvela mihriem cheng hai hin indona hi ei ching thang le ei pumpel thei lo a ni lawi si a nih. Mihriem hringna hi thil hlu tak nisienlakhawm, ram (leilung) hi a hlu lem dai amani ti thei a nih. A san chu ralthuom tium tak tak le tha tak takhai hi rannung hai that annawleh suotna ding ni loin, mihriem thatna le suotna a ni deu tak hlak a, a san chu ei chengna ramri kham chin seng humhal ei nuom lei a nih. Ei chengna ram seng hi khap khat chau khawm inlakpek ei nuom naw leiin ei indo a, sipai le pawi tawk lo le pawi hrillo han hringna tam tak ei chan hlak. Chuleiin, hringna nekin leilung (ram) a hlu lem ti inla ei hril suol taluo awm nawh.
   
Rambung le rambung el chau ni lovin ram chungchang hin mimal, pansak le panthlang hai inkara khawm harsatna ei tuok rawp hlak. Ei inhmun ramri chiterek chungchanga khawm hriemhrei le silai chen ei chelek a, ei inthat chang khawm a bo nawh. Inhmun, huon le ram chungchanga chun mihriem thisen a sosang nghal a, thi hiel ei ngam hlak. Hi taka inthawk hin ram hlutzie chieng taka hriet thei a nih. Tulaia Manipur a tribal hai hmalakna le chetna khawm hi tribal hai ram humhim ei tumna lei a nih. Ei ram humhimna dingin silai khawm ei ti naw a, silai puok riin a mi dang hne chuong nawh. Churachandpur a chun ram le hnam humhalna dingin pasal 9 zetin thina an tuok pha a, mi 30 chuongin hliemna an tuok pha ta a nih. Ram le hnam hmangaina h in chu ti a neinaw a, mi han an hringna an inhlan ngam hlak a lo nih.
   
Tuta ei thil tuok mek khawm hi a taka indona a ninaw a, nisienlakhawm a thua indona a nih. Mipui han Democracy dan hnuoia ei rights neihai hmangin ei ram le ei hnam humhalna dingin ka sawl ie, ka kham ie ti lovin nitin elin kal ei pensuok a, tha le awm ei hriet hai ang angin ei thil ngen nawrnain thungbum, lampui hraw, mombati sita lampui hraw, meiser sita lampui hraw le human chain ti le a dang dang hai ei thaw a nih. Ei inrimna hi a thlawnin a fe liem el nawna dinga ei fimkhur le teirei ei pei hle chu a tul ding a nih.
   
Khawvela hin history hlui tak tak tam takel a lo piengsuok ta a, sal nei hun khawm a lo um a, kum 1884 lai khan sal dawrah sal nunghakhai chu saruokin an la zawr a nih. Amiruokchu, sal intang hai to tawkin an um thei bik tanaw a, kum zabi 18­na a hungtlung a, Sal hai an hung che tak tak a, Sal zalen hun a hungtlung a, ei hriet angin REVOLUTION a hung intan suok a, Revolution hung suokhai laia ei hrietlar tak le ei inchuk nasa tak chu French Revolution kha a ni a, mipui lungsen chun LAL le HAUSA hai kha an suot mang tep a ni kha.

           
August 31, 2015 khan Manipur Assembly in Bills 3 a passed­a Manipur a tribals han hieng bills 3 hai hi Anti­tribal bills nia ei hriet leiin ei chanvo (rights) chang le humhim tumin thang ei lak a, Manipur a ding chun TRIBAL REVOLUTION ti inlakhawm ei hril suol taluo ring a um nawh. Ei ram annawleh ei state sawrkar chun rorelna a fepui hi indikin a hriet a, an phat nuom naw a; thiemnaw an chang nuom bawk naw leiin tribal movement hi a fe mek a nih. Mipui lungsenna hi thawi dam le an thil ngen hi ngaisak ding a nih tia a ngaisak a, indikna hmanga ro a rel pha pha leh Manipur a tribal movement hi a re chau ding niin an lang. Chu hun ding chu nghakhla um takel a nih.

Post a Comment

Powered by Blogger.