Tuolsung
Darkar 8 sung General strike inthlazal
CCPur: Vawisuna inthawk September 20, 2015 chenin darkar 8 sung, zing dar 5 a inthawk chawhnung dar 1 chenin general strike inthlazal ning a ta, hi hun sung hin sawrkar offices ti lo offices/establishments danghai hawng thei ning a ta, general strike in media houses, water supply le medical services hai huom sa naw nih tiin zanita JAC CCPur thusuok chun a hril. JAC/CCPur chun thuthar um nawk hmakhat sawrkar office­hai khar ding, general strike sung security forces hai inlawn lo ding le Tribal movement a hrat zuol theina dingin Hmar Inpui, Kuki Innpi, United Nag Council, Zomi Council le JAC/CCPur thangpuitu dingin JACs indin dingin ngenna an siem. Sept. 13, 2015 a Kangvai a JAC volunteer­hai lo beitu Bishnupur Police Commando hai nasa takin JAC/CCPur chun an dem. Sept. 14, 2015 a inthawka JAC, CCPur thangpuitu dingin JAC, CCPur chun ZMA a inthawk Vungmuanching, Kim Mary, Ngaiphal, Chonghoih le Joicy; HWA a inthawk Nissi Lalrochan, Mary Beth; MPC Women Wing a inthawk Lalrikhumi, R. Lalkhumi le KWU a inthawk Kimneihoi le Ngailun hai an ruot.

KNO le UPF in Demand thuhmun nei
CCPur: Kuki National Organisation (KNO) le United Peoples Front (UPF) chun Sept. 13, 2015 zantieng 6PM khan Press conference an ko a, UPF le KNO highest level making decision in joint meeting neiin Political demand hran ve ve an nei hai siethlain demand thuhmun nei dingin an rel thu an puong a. Tribal martyrs 9 hai thisen a thlawna luong lovin ra tha tak an suo a, hi le inzawm hin UPF le KNO joint meeting thutlukna (resolution) 3 an siem a. Chuonghai chu­ 1. Political demand pakhat nei ding, technical tiengah an hmatienga sukfel ding; UPF le KNO in political demand 1 an nei thu Central in a mi hrietpui theina dingin UPF le KNO joint delegation in an rang thei anga Delhi pana Central thuoitu tum tum hai inhmupui ding ti le; hmatienga hmalak dan ding thuah NSCN(IM) thuoitu hai inhmupui a, ngirhmun sukfel ding ti hai a nih.KNO Defence Secy. TS Haokip chun, Bill 3 pased leia tribal martyrs hai UPF le KNO in inzana a pek thu a puong.

TN Haokip lim an raw ve
CCPur: Khawpuibung le Valpakawt a sit­in protest nei nuhmei pawl hai chun zani zantieng 1:00PM khan ITI, Saikawt tuol lai Saikawt MLA T.N. Haokip lim (effigy) an raw. Hi huna hin  HWA hotu JL Sawmi, Hmar Inpui President John Pulamte le Secretary David Buhril bakah HYA GHQ Secy. Francis Songate le HSA thuoitu hai an thang a, hi huna hin Bill 3 hai chungthua awareness nei a ni bawk. Hi huna hin hi zo hin Valpakawt VA han mitthi ralna cheng 5000/­ JPO hai kutah an inhlan.

Saidan khuoah awareness neipui
CCPur: JAC, Hmar Inpui, Hmar Youth Association le HSA thuoituhai chun zani zantieng 2PM khan Saidan khuoa sit in protest nei nuhmei pawl hai an va kan a, Anti­Tribal Bills 3 hai chungthuah hrilhrietna (awareness) an neipui. Duty huna inruithei zawr le phur man hai chunga hremna an pek pei ding thu Saidan mipui  chun an hril.

Contractor Assn. in JPO kuoma Rs. 1 lakh
CCPur: All Tribal Contractor Association, Manipur thuoitu hai chun zani 12:00Noon khan KKL Complex, IB Road, CCPur­ah JAC thuoitu hai an inhmupui a, JAC in a tulna naa an hmang dingin Rs. 50,000 an pek bakah District Hospital­a Martyrs 9 hai puondum in an tuom bakah ralnain Rs. 50,000 le hliem hai thangpuinain Rs. 50,000 a rengin  Rs. 1 lakh JPO kutah an  inhlan a, JAC an pek le chun Rs. 1.5 lakh a nih.



Ralna le thangpuina Rs. 22,11,383 a lut tah
CCPur: Joint Philanthropic Organisation (JPO) in District Hospital­a Donation Box an daw a chun zanikhan JPO kutah Rs. 3,05,620 a lut a, September 2, 2015 a inthawk tuchena hin ralna le thangpuina sum Rs. 22,11,383 a lut tah. EBC Dorcas veng chun zanikhan tuomna puon 9, hliem hai thangpuina dingin Rs. 30,000 an pek a, Tuibuong bazaar a dawrkai han puon 9 le Rs. 4000 an pek a, Bijang Welfare Association in puon 9 le Rs. 8000; Lamka Presbyterian kohran, IB road in puon 9 le Rs. 20,000 in an ral a, ralna le a dang dang zieklang lo hai leh zanita JPO kuta lut po hi Rs. 3,05,620 a nih.

Kohran hotu han tawngtairuolna an nei
CCPur:  September 14, 2015, 2:00PM khan CCPur district sunga Pastor le Kohran thuoitu mi zatel hai chu Public Ground, CCPur­ah fekhawmin tawngtairuolna an nei. Rev. S. Vung Minthang, Gen. Secy. EBC chun tawngtaina subject ding hai a dawt dawta a puong zovin tawngtairuolna hi nei a nih.


Electric fee pek le recharge thaw thei
CCPur: Churachandpur a electric consumer hai hai chun Pu Vanlalhlun Hrangchal, Manager, MSPDCL chengnain, Tipaimukh Road ah electric fee pek thei a ni bakah pre­paid consumer han  Pre­paid Recharge Centre, Gouchinkhup Veng, N. Lamka ah office hour sungin recharge thaw thei ning a tih tiin Department thusuok chun a hril.

HCLF in Rs. 50,000/­ in an ral
CCPur: Hmar Christian Leaders Forum (HCLF) chun September 13, 2015 khan Manipur Assembly in Bills 3 an passed dodalna leia buoina suoka thi Tribal Martyrs mi 9 hai Thangsuopuon in an ruong an tuom bakah ralnain Rs. 50,000 an pek. (Fox Journal)

SBI zingkar 8­11AM sung hawng ding
CCPur:  SBI/CCPur Branch chu September 15, 2015 hin zingkar 8AM­11AM sung hawng ning a tih tiin Chief Manager, SBI/CCPur Branch chun a hril a, hi hun sung hin bank a thaw ding nei han dawr thei an ta, Bank a thaw ding neia lut hai po 1:00PM chena thaw zo tum a nih tiin a hril.

Headline
Imphal-ah Mega Food Park indin vat ni tang a tih: Sadvi Niranjan Jyoti
Imphal: Union Minister for Food Processing Industries, Ms Sadvi Niranjan Jyoti chu Imphal­ah a hung inzin a, MURDA Bank a hawng. Hi huna thu a hrilnaa chun, Imphal khawpuiah sawrkar thlungpuiin Mega Food Park a hawng vat ta ding thu, Mega Food Park­in in loneituhai harsatna sawkzangkhaiin hamthatna tam lem peng a ta, an harsatna hai khawm hung hlipkieng  a ta, thalai lekhathiem sin la nei lo hai sin a pek bawk ding a nih tiin a hril.
           
Hi zova BJP Manipur Pradesh Office, Nityapat Chuthek a reporter­hai an hmupuinaa chun, Manipur State a thalai lekhathiem sin nei lo han sin an nei theina dinga project thawna dingin sawrkar thlungpuiin sum thuah harsatna a nei nawh. MURDA Bank in Manipur state­a nuhmeihai thuneina tam lem a pek bakah loan pe bawk a tih. MURDA Bank hin category pathumah loan pe thei a ta, category pakhatna chun mimal kuomah loan Rs. 5,000­Rs. 10,000; category pahnina hnuoiah loan Rs. 10,000­ Rs. 1,00,000 le category pathumna hnuoiah loan Rs. 5 lakh­Rs. 10 lakh chen pe thei a ta, loan hmu ding han Guarantor or Mortgage in an thil neihai an sie tul naw ni a, sienkhawm an thil thaw ding le inzawmin ‘Detail Report” an peklut tul a tih. Hi Scheme a ding hin Scheme Card siem ning a ta, Scheme Card hi September 25, 2015 a inthawk October 2, 2015 chenin semsuok ning a tih tiin Sadvi Niranjan Jyoti chun a hril. Manipur chu Food Processing Centre Units 26 indin thei dinga phalna pek a ni a, sienkhawm tuhin Centre units 2 chauin sin an la thaw thei a, chuonghai chu tui dawn ding le Atta Beson siemna hai a nih tiin a hril bawk.  Hi zo 3:00PM vel khan Air India flight in Ms Jyoti hin Imphal suoksanin New Delhi a pan nawk.

Sept. 20 ah Moirang Bandh
Imphal: Keke Moirang Apunba Lup chun September 20, 2015 a inthawk hun tiemchin  um lovin Moirang bandh thaw tan an tum. State sawrkar kuomah Moirang suk hmasawn dinga an ngenna sawrkarin a ngaisak naw leia an lungawi nawzie suklangna dinga bandh hi an thaw tum niin hi pawl Secretary, M. Shantikumar Singh chun thusuok a siem. Hi bandh h in Press, Medical, emergency service le nitin mamaw thil hai huomsa naw nih tiin M. Shantikumar thusuok chun a h ril.

RIMS a inthawk MBBS zo 3003
Imphal: RIMS, Imphal 44th Foundation Day zanikhan hmang a nih. March 31, 2015 chen khan RIMS, Imphal a inthawka MBBS courses zo Doctor 3003 le 1199 MO/MS an um ta a, MO/MS hai lai hin Urology le Plastic Surgery haia Super Speciality (Mch) khawm iemanizat an um ta niin RIMS thusuok chun a hril.

Oct. 4 ah Maoist pawlin General Strike
Imphal: BJP Youth Wing­ BJYM in Mega Marathon huoihawt an tum ni tak October 4, 2015 khin BJP dodalnain Maoist Communist Party of Manipur chun General Strike an thaw ding thu le Sept. 15, 2015 a inthawk BJP hmalakna (activities) po po khap (ban) thaw vawng an tum thu Maoist Communist party of Manipur chun thusuok an siem.

Manipur CS Seoul ah an zin ding
Imphal: September 16­24, 2015 inkar sung khin Manipur Chief Secretary P.C. Lawmkunga chu official thil le inzawmin Seoul, South Korea ah inzin a ta, a umnaw sungin Additional Chief Secretary or Principal Secretary hai laia a senior takin a sin hi lo chel (urgent administrative matters) a ta, financial or State Vigilance Commissioner sin hai ruok chu a hungtlung huna sukfel dinga lo sie ning a tih tiin official thusuok chun a hril.

ADC, Chandel Chairman in L. Zou
Imphal: Zanikhan Chingmeirong a Council House, Imphal­ah ADC, Chandel Chairman ding thlang a ni a, khingtu um lovin Lhunkhosei Zou (L. Zou) chu Chairman, ADC/Chandel dinga thlang a nih tiin ei thu dawngna chun a hril.

SM Vaiphei Jr. Adn. Grade in a kaisang
Imphal: Department of Personal & Administration Reforms, Govt. of Manipur in Order an suo dungzuiin Mr S. Minlinthang Vaiphei, IAS, Director, TA, Hills & Sc chu IAS Junior Administrative Grade (JAG) in a kaisang a, Additional Secretary a inthawk Special Secretary a hlangkai a nih.

Chandel­ah Peace rally nei
Chandel:  Zanikhan Chandel Naga People’s Organisation (CNPO) chun UNC hmalaknain Chandel­ah Peace rally an nei. Hi Rally hi Naga Peace accord ziek an thlawpnaa an nei a ni a, Governor kuomah pek ding Memorandum DC/Chandel kutah an pek. Rally neihai chun August 31, 2015 a Manipur Assembly in Bills 3 a passed le CCPur a state forces han mi 9 an that nasa taka a dem thu an puong.

Police Constable Civil/Male written result
Imphal: Manipur Police Department hnuoia Police Constable (Civil/Male) lakna dinga June 16, 2015 nia written test neia um result chu Sept 13, 2015 khan puong a nih. Result en nuom hai a dingin http://manipurpolice.org/results.html ah en thei ning a tih.

SL PM Ranil Wickremesinghe India ramah
New Delhi: Sri Lanka Prime Minister Ranil Wickremesinghe chu India rama ni 3 sung cham dingin zanikhan New Delhi a hung tlung. India rama a cham sungin Mr Ranil chun PM Narendra Modi inhmupui a ta, India le Sri Lanka han sectors dang danga thawtlangna ding MoUs ziek an tih. Sept. 16. 2015 khin Rashtrapati Bhawan­ah President Pranab Mukherjee inhmupui bawk a tih. Mr Ranil hi Sri Lanka International Trade minister Malik Samarawickrema in a hung zui.

NDA in Bihar Assembly electiona seat insem dan ding an sukfel
New Delhi: BJP thuoina hnuoia Centre­a NDA sawrkara thang poltical party thuoitu hai chun thla thara inthawk phase 5­a Bihar Assembly Election hung um dinga seat insem dan ding sukfelin an puong tah. Hi dungzui hin Bihar Assembly seats 243 uma chun BJP seats 160 ah ngir an ta, Ram Vilas Paswan inrawi LJP in seats 40 le  Jitan Ram party HAM chu seats 20 ah ngir an ta, Upendra Kushwaha party RLSP chu seats 23 ah ngir an tih. Seat insem dan an puong huna hin BJP Chief Amit Shah, LJP Chief Ram Vilas Paswan le HAM hotu Manjhi le RLSP hotu Upendra hai khawm an thang. HAM hi a hma chun seat 15 chau pek a ni leiin a lungawi rak naw leiin seat 20 pek a nih.
   
BJP Chief Amit Shah chun, Chief minister ding chu election zovah NDA MLAs han an thlang ding thu hrilin seat insemna thuah ngaidan inkalna a umnaw thu a hril. JDU­RJD le Congress coalition Janata Parivar a inthawk Mulayam Singh Yadav a suok dawk chun anni sunga inremnawna a um ti a suklang tia hrilin NDA chun sawrkarna siem khawpa hratna an chang ngei ding thu a hril.

India mi thina tuok 11 an tling tah
New Delhi: Saudi Arabia rama Mecca khawpuia Grand Mosque bawlnaa hmang Crane tluk leia India mi Haj Pilgrim a fe mi 9 an thi belsa nawk leiin hi thil tlunga India mi thina tuok chu 11 an tling tah tiin External Affairs Ministry a spokesperson Vikas Swarup chun a hril. Hi thil tlung leia India mi inhmang hai zawngna sin sawrkarin a thaw zing bakah thina tuok sunghai a tul anga thangpui zing an nih tiin a hril. Hi thil tlunga hliem hai lai hin Maharashtra, Telangana, Uttar Pradesh le Madhya Pradesh mi 3 seng, Delhi le West Bengal mi 2 ve ve le Punjab, Bihar le Assam mi 1 seng an thang tiin Mr Vikas Swarup chun a hril.

NDFB(S) helpawl man
Guwahati: Assam –a  Chirang district, Dhaligaon police station huop sunga Aie vadung bul lai zani hmasa zan sawt hnung khan NDFB (S) cadre Thopsa Narzary (28) chu 7.65 Pistol 1, a mu 2 le Grenade 1 leh an man niin IGP LR Bishnoi chun zanikhan a hril. Thopsa Narzary hi December 30, 2014 a Adivasi hnama mi 80 deuthaw thatnaa thang le mi thuoihmangna dang dang haia thang hlak niin Mr Bishnoi chun a hril.

Jhabua thil puokna hmuna detonators 69 hmu
Jhabua: September 12, 2015 nia Jhabua district­a Petlawad town hmuna Restaurant­a thil puok leia building chimna hmuna khan Detonator 69 le Gelatin tluon iemanizat an hmu niin Police chun an hril. Hi thil tlunga intum tak chu Rajendra Kasawa a ni a, man a ni thein dinga information pe theitu hai kuomah Rs. 1 lakh pek dingin an CM Shivraj Singh Chouhan chun a puong bakah thina tuok sunghai zangnadawmna Rs. 5 lak seng pek dingin state sawrkar chun a puong a nih. 

Thil phurtu motor eksiden­ah mi 16 an thi
Murari: Zani zingkar inhma tak khan Andhra Pradesh­a East Godavari district sunga Murari village­ah thil phurtu motor lien chi (lorry) eksidenin an letthlu a, sinthawtu (labours) mi 16 in thina an tuok. Lorry hi Guntur a inthawk Visakhapatnam pan a ni a, a sungah mi 35 an chuong a nih. Lorry khaltu le cleaner hai chu Nakkapalli Police station­ah an inpe. Andhra Pradesh Finance minister Yenamala Ramakrishnudu chun hi thil tlungnatuoksunghai kuomah zangnadawmna Rs. 2 lakh seng pek dingin a puong.

Garo Hills­ah Driver 2 thuoihmang
Tura: September 13, 2015 zingkar dar 6 vel khan Meghalaya­a South Garo Hills district sunga  Chandagre village­a inthawk Truck driver pahni Akidul Islam (25) le Bilu Miah (23) hai chu  tu ti hrietlo han silai leh chuktuoin an thuoihmang. Thuoihmanga um hai hi Assam­a Mankachar mi ve ve an nih. Hieng laizing hin Tebolpara, Garo Hills­ah pasal pakhat Akkas Ali chu helpawl hai le inzawmna nei ringhla leiin khaw mipuiin an vuok a, Hospital­ah admit a nih.

IAS 15% in ram le in an nei nawh
New Delhi: Indian Administrative Service (IAS) Officers, kum 2014 financial year a dinga  Immovable property Returns (IPR) pelut mi 3,600 hai laia 559 (15%) hai chun ram le lo, in annawleh building an neinaw niin Centre­a financial year 2014 a an peklut­a chun an zieklang (kum 2010 a inthawka mi hai). Ram le lo le In nei lova inhril IAS Officers hai laia 57 hai chu Uttar Pradesh a mi an ni a, Madhya Pradesh­ah 42, AGMUT 37, Maharasthra 33 le Tamil Nadu a inthawk 31 an nih.   

Lincoln House Rs. 750 crore a zawr
Mumbai: South Mumbai­a Breach Candy hmuna US sawrkar ta le a enkawl Lincoln House chu zawr a ni a, industrialist Cyrus Poonawalla chun Rs. 750 crore zetin an chawk. Mr Cyrus Poonawalla chun an sungkuo chengnaa hmang a tum thu a hril. Hi in hi ram acre 2­a lien sunga bawl, kum 1938 laia Majaraja of Wankaner (central Gujarat) in a bawl niin a hma chun Wankaner Palace tia inbuk a nih. Hi building hi tuhin grade III heritage building list­a thang a nih. Kum 2011 khan US sawrkar chun Rs. 850 crore in a zawr a, sienkhawm ngaisak a hlaw mangnaw a nih. Lincoln in inchawtu Poonwalla hi Forbes list­ah India rama mi hausa tawntaw thlangsuok hai laia rank 11 na niin a hausakna chu dollar 6.6 billion (Rs. 43,700 crore) a niin sumdawngtu biotech company neitu a nih.

Taliban han jail an hlukhum, intang tam tak an suok
Ghazni:  September 14, 2015 zingkar 2:00AM vel khan Afghanistan­a Ghazni khawpuia Jail an hlukhuma bomb an sukpuok leiin jail­a intang 400 chuong jail­a inthawk an tlansuok niin Police thusuok chun a hril. Jail gate bul laia innghat car pakhat sunga inthawk pasal pahni han thichil bomb an sukpuok a, gate a suksiet vawng leia intang hai hi an tlansuok niin ei thu dawngna chun a hril a, bomb sukpuoktu ni dinga ring 2 hai khawm bomb puoka hin an thi nia hril a nih. Taliban spokesman Zabihullah Mujahid chun Jail va beitu hai hi silai chawi pakhat le thichil bomb chawitu mi 3 an nih tiin a hril a, bomb sukpuoktu 3 hai khawm an thi ve niin a hril.  Bomb puoka hin Afghan security forces le jail vengtu 40 vel an thi niin a hril bawk.
------------------------------------------------------------------------------------------
VAWISUN THUPUI
Lalpa ruok chu khumkhuoa dingin lalah a thung a, A lalthungpha chu rorelna dingin a buotsai tah. Ama chun khawvel hi fel takin ro relpek a ta, Thlierbik nei loin mi tin ro chu relpek a tih.  ­
-Sâm 9:7­8

Editorial
Ei Lawng khal thiem a ngai ding

Committee on Inner Line Permit System (JCILPS) in Manipur­a Inner Line Permit hmang nawk dinga nawrpui an bei leia Manipur Assembly chun August 31, 2015 nia Bills pathum­ The Protection of Manipur Peoples (PMP) Bill, 2015; The Manipur Land Revenue & Land Reforms (MLR&R) (7th Amendment) Bill 2015 le The Manipur Shops and Establishment (MS&E) (2nd Amendment) Bill 2015 hai an passed chun Manipur tlangmi hai lai a bik takin Churachandpur district­ah hartharna hung tlungin chawp le chilin tlangmi hnam tum tum hai lai inthuruolna a hung pieng a, hieng bill 3 hai dodalna leia buoina suok leiin mi 9 zetin thina an tuok bakah midang tam takin hliemna an tuok a. Hi chau ni lovin All Tribal Students Union (ATSUM) pawl   hni a um hlak pawl pumkhatin an hung um a, demand hran ve ve neia Centre le Suspension of Operation (SoO) nei mek UPF le KNO hai khawm pumkhat le political demand thuhmun nei dingin lungruolna an hung nei pha a, lawm a um takzet.
   
Tawng hran hran hmang tlangmi hai unau ei ninaa hartharna nasa tak a hung intlun rasuok ditum takel, mi tam tak duthusam UPF le KNO in September 13, 2015 nia press conference an nei huna KNO in Kuki State an ngen le UPF in Autonomous Hills State an ngenna hai siethlaa Political Demand pakhat nei dingin a thu (principle) in remtina an nei thu an puong hi lawm a um tak zet.  UPF le KNO in Political Demand pakhat nei dinga remtina an nei le inzawm hin sawrkar thlungpui kuomah Joint Delegation tir vat ding bakah hmatienga hmalak pei dan ding chungthuah unau Naga hai inbiekrawn pui ding tiin lungruolna an nei bawk a, lawm a um takzet. Lawm a um lai zingin a thu (principle) chau a la ni a, a takram ei tlung phak dim ti ruok chu hunin a la hung hril ding a nih. Naga hotu hai le inbiek huna ngaidan le ditdan inthieng thei zing a ni bawk.
   
Ei hriet seng angin, thil liem ta hnung thlir kir lem chun lungril natna ding le ei inkara intheidana awlsam tak intlun thei zing kara leng le thaw tlang ei ni a. A nina taka chun tuta ei thangruolna khawm hi a fe fuknaw vai chun bel kawi awl em em anga tet meta kawidar nawka, indotuo nawk el thei zing; thlise hrat tak le vur tlang lien tak tak inthuprukna tupui chunga Lawnga intawl ang ei nih ti inla ei hril suol taluo ring a um nawh. Ei unau Naga hai chun ei hmalakna hi an mi thlawp hle a, an MLA (NPF) khawm 4 zetin inbanna an lo pek hiel ta a ni kha. Amiruokchu, ei unau Naga hai hi Centre le NSCN(IM) in Peace Accord an ziek khan a huomsa (ring danah) an ni a. Hi lei hin iengleia hieng lawma ei unau Naga han ei hmalakna an mi thlawp am ning a ta? ti khawm hi ngaituo tham tak chu a ni ve. NSCN(IM) le Centre in Peace Accord an ziek, an lungawi china a hlawtling theina ding chun eini tribal (a bikin unau Kuki hai) ram del hai hih an pawimaw ve hle a nih. A siet zawnga hril inchang naw sien, hi lei tak khawm hin ei unau Naga hai hin an mi thlawp a ni thei. Peace Accord a dingin ei ram del a pawimaw ti ruok chu a chieng.
   
 Manipur­a tlangmi hai lai tuchenah inthuruolna tha tak neia kal pen tlang nuomna lungril ei hang nei hi a ropuiin lawm a um a, tribal hai inthuruolna (unity) hi vul zing sienla nuom a um tak zet a nih. A hmaa ei hril ta ang khan inthuruol tak le lungruol taka fe le kal ei pen tlang lai zing hin thil iemani a fe suol kek leia inthedar nawk rup thei ngirhmuna um zing ei nih. Hi lei hin ei chuongna Lawng khaltu hnam thuoitu hai an fimkhur hle a tul bakah, an Lawng khal an khal thiem hle a ngai ding a nih. Ei thaw fuk naw chun tlangmi sunga inthena chau ni lovin, Tribal+Meitei le Tribal+ Naga tribal” anga pawl pahnia indar thei ngirhmuna um ei ni bawk ti chu chik taka thil ngaituo mi hai chun ei hriet ngei ring a um. Hieng a ni lei hin ei hotu han Lawng an khal thiem hle a ngai ding a nih.
   
Chuongang bawkin hnam tum tum hai khawmin mani hmasielna neia, mani bing hamthatna ding amani zawnga hma laa politics ei lo khel a ni vai chun tukhawm him bik naw mani a, a ruolin tuipuiah ei pil vawng ding a nih ti hi ei hriet tlat nuom a um. Ei pilhmangna ding tuipui chu ‘mani dikna (rights) khawm hum thei lo khawpa hnawchepna’ le a dang dang ning an tih. Hi lei hin tribal hnam tum tum han vervekna tlansana, tlangmi hai popo damkhawsuokna ding lungril neia kal ei pentlang a pawimaw in a tul takzet a nih.
           
Chun, tuta ei fe dan ang hin iengchen am ei fe thei ding hriet an tak. Hiengang zing chun sawt tak ei fe zo ring a um nawh. Separate Administration amanih annawleh polical demand hai hrim hrim hi chawp le chila thaw chuk chuk le sukfel thei a ni ngai nawh ti chu mithiem le chinchang hre chin chun an hriet seng ring a um. Hi lei hin Separate Administration/ poltical demand ei nei a ni khawmin chu kar laka ei lo inhumhimna ding le ei insaiinsangna ding ‘bûkte’ ei bawl phawt a ngai ding niin an lang. Tuta ei fepui mek ang hin ruopui do zing thei nawng ei ta, ei zo naw bawk ding a nih. Tukhawm hin nitina inhlawfa le fakfawm zawng hai chu ei buoise let der an ta hi! Lungril lien le hmathlir hla tak neia ei lawng khaltu han lawng an hung khal a, a hausa le pasie hai inleng vawng dan ding lampui dap hi tutaka ei pawimaw le tul a nih. 

Post a Comment

Powered by Blogger.