Headline
Naga hnam thuoitu han mithihai an hung ral
Tlangmihai inthuruol taka hmalak a pawimaw thu uor takin an hril
CCPur: Zanikhan Gaidon Kamei, President, UNC, S. Kho John, Speaker UNC, ML. Markson, Chairman, ADC/ Senapati, Hingba John, Vice Chairman, ADC/Senapati (+ 4 MDC of Senapati), Solomon Veino, Working President, NPF Manipur Unit, Moses, President, NPO, Titus Kamei, President, Zeliangrong Youth Front, TS. Warngam Anal, UNC, Ashinpou Gangmei, Vice Chairman, Alternative Arrangement Committee, S. Milan, i/c General Secretary, UNC leh Kb. Aduan, Dy. Speaker, UNC hai chu CCPur­ah an hung a, District Hospital Morgue­a Tribal Rights humhalna dinga hringna chan hai sunna le puon inkhumna an nei.
   


Hi zo hin Naga hnam thuoitu hai chun KKL Complex, IB Road­ah JAC hai an inhmupui bakah  zani 12:30PM khan PTC GHQ Office,Hiangtam Lamka hmunah Zomi Council,Kuki Inpi/CCPur le Hmar Inpui thuoituhai inhmupuiin hmatienga hmalak pei dan ding an hriltlang.
   
Mr Gaidon Kamei chun, Communal Govt. huoiah iengchen am ei la um ding tia indawnna siemin, tuta movement ei nei mek hi Manipur Assembly a Bill 3 hai ei ditnaw lei chaua   suktawp ding ei ni am? a nisi naw chun political issue neiin Manipur tribal hai hmakhuo  ding ngaituoa hma ei lak a hun ta hle a nih tiin hi huna hin a hril. Hun liemtaa ei suksuol hai theinghila thangruola hma ei lak a hun tah, a san chu ringtu (kristien) ei ni bakah ei ram sunga Christianity a lut kum 100 a chuong tah tiin a hril.
   
CCPur district­a tribal hai thil tuok le inzawmin UNC chu a totawk tawk naw ding thu; Tribal hai ei inthuruol phawt chun India sawrkar chu mi thangpui dinga inpeisa a nih ti hi theinghil nawng ei tiu, hi lei hin hnam bing/community interest a fe lovin common issue/interest fepui a, mani a roinrelna ei nei theina dinga hma la tlang dingin a ngen.
   
September 3, 2015 zanrila inthawk UNC in bandh an thaw chu Kuki/Zomi/Hmar mipuiin thlawpa area­a volunteer siein bandh a hlawtling el chau ni lovin pakhat ei nina, pakhat einina a suklang leiin thuoitu hai kuoma lawmthu hrilin helna hi communalize lo dingin a ngen.
   
Solomon chun, fak le dawn, khawsak dan le sakhuo (food habit, culture le faith) inang tribal hai chunga tear gas, rubber bullet hmang loa live bullet hmang communal govt. a inthawk ei suok zalen theina ding ni le hun Pathienin a hung ruot hi remchanga laa inthuruol taka thaw pei ding a ngenin Camp Hebron a khawm JAC hai solidarity message thawnin pasaltha 8 thi hai sunna nei a ni thu a hril.
   
ZRO President K. Guite chun, tribal hai ei inthuruol theina dingin Pathien le mi 8 hai thisen in lampui a siem hi remchanga la seng dingin a ngen.
  

LB. Sona chun, Inpui 3 le UNC inhmukhawm chu lawmum a ti thu le tribal history a inchik tlak a ni thu hrilin Inpui 3 han tuta ei district­a thil tlung hi Tribal mihai hmakhuo ding lampui siemnaa hmang ding tiin Sept. 1,2,3 nia meeting niin Political issue a dingin an pawm tiin a hril.

Dawr hai 5AM­-12PM chen hawng ding
CCPur: Mipuiin mamaw le tul hai an inchawk theina dingin vawisun September 5, 2015 hin zing dar 5 a inthawk sun dar 12 chen CCPur khawpui sunga Dawr hai hawng ning a tih tiin JAC thusuok chun a hril.
           
Chun, hi hun sung hin Treasury Office le Banks hai khawm nidang ang bawka hawng dingin JAC chun an ngen a, tukhawma sukbuoi lo dingin JAC chun  ngenin an hriettir bawk.

JAC in memorandum an hnukkir
CCPur: Zanikhan JAC in special emergency meeting an nei a, resolutions 4 lungruol takin an siem. An resolution siem hai chu, mithi sunghai ngenna le mipui dit danin Manipur­a tribal hai chu political autonomy hran nei dinga hmalak tlang ding le hmalak dan ding chu UPF, KNO le a dang dang hai hung siem ding, thina tuok mi 8 hai TribalMartyrs tiin puong a, sawrkara inthawk zangnadawmna le thangpuina lak lova mipui haia inthawk dawl ding, September 3, 2015 a JAC in CM, Manipur kuoma Memorandum hnukkir nawk le JAC chun ei unau thi tahai hmalakna chu sunzawm pei a, hi hmalakna a hin tribal mipui hai po po ei damtlang sengna dinga hmalak dinga ngen seng ei nih tihai an nih.

VA hai mani khuo chit control dingin
CCPur: Joint Action Committee (JAC) chun tribal movement fe mek le inzawma thil ditum lo a tlung nawk tanaw na dingin volunteer indin a, Youth Clubs, tuolsunga Organisations le Kohran thuoitu hai leh thangruola a mani veng/khuo chit control dingin a ngen.

JL Sawmi kuoma lak thei
CCPur: September 3, 2015 nia Public ground hmuna public meeting nei huna khan mi thenkhatin Nihliep, Puon, Sana le thil dang dang tlansan/theinghil an um a. Hiengang sukhmang le theinghil hai chun Ms J.L. Sawmi, Spokesperson, JAC kuomah lak thei ning a tih.

Computer thiem mamaw
CCPur: Thlalak print­na Zaiawithang Photo Studio chun thlalak print­tu ding Computer (Photosop) thiem a mamaw a, inhnikna neihai chun an hmatiengin Zaiawithang Photo Studio/ 8575167133 ah indawn le kanchieng thei ning a tih.

Exam Bus
CCPur: HSA chun Sept. 6, 2015 nia MAHUD hnuoia sin lakna dinga Imphal­a exam um dinga HSA member candidate hai ta dingin Bus tir a tum a, hi Bus a chuong nuom hai chun Mob. no. 9612510400/ 9856691218 haia ngaiven thei ning a ta, HSA Campus, Rengkai­ah ticket lak thei ning a tih. Departure 7AM.

HYA GHQ in ralna le thangpuina an inhlan
CCPur: Hmar Youth Association General Headquarters thuoituhai chun zani zantieng khan  Tribal movement fe mek le inzawma thina tuok mi 8 hai ralna dingin Rs. 50,000/­; CCPur District Hospital­a hliem enkawla um hai thangpuina dingin Rs. 32,000/­ le Imphal­a refered­a um hliem  hai thangpuina dingin Rs. 20,000/­ JAC kutah an inhlan.


One Day Mass prayer huoihawt dingin
CCPur: Joint Action Committee (JAC) chun Kohran tin hai kuomah­ tribal hai lai inremna, inthuruolna le politics zalenna ei nei theina ding; Manipur Assembly in Bill 3 a passed hai hnukkir a ni theina ding, tribal han political autonomy ei hmu theina dinga movement ei nei pei theina ding, Martyrs sungkuo hai ta ding le ei movement­ah Pathien thang­ puina hni dinga Sept. 6, 2015 (Pathienni) hin One Day Mass Prayer buotsai seng dingin an ngen.
   
Hieng laizing hin Christian Goodwill Council thuoi­tuhai chun JAC hotu hai inhmupuiin   kristien seng ei ninaah Kristien taka rorel ding le kohran han JAC thuoi­tu hai le hnam thuoituhai tawngtainaa an san zing ding thu an hril.

Imphal­a inbiek ding Inpui 3 in an pawm nawh
CCPur:  Zani zantieng k han Inpui pathum Zomi Council, Kuki Inpi/CCPur le Hmar Inpui thuoitu hai le JAC han meeting an nei a, JAC chun ni 2 sunga an sin thaw dan report an pek.  LB Sona, Chairman, ZC in thu a hrilnaa chun, Sonia Gandhi chun Inpui 3 hai le inbiekpui dingin Congress thuoitu 1 a hung tir a, Imphal­a inbiek ding ti chu Inpui 3 han an pawm theinaw a, tul an ti a ni chun a hmun (spot) a hung  an ta, chu hnunga inbiekpui chau ding tiin an inhmupui nuomnaw thu a hril. Khawpui sunga mipui sosang control a ni theina dingin Tribe tum tum thuoitu han an biel sengah hma la dingin an ngen. Hi hun sung hin JAC in a thi le hliem hai enkai an ta, political demand tiengpang ATSUM enkai dinga mawphurna pek a nih. Member thenkhat chun JAC kuomah rawtna siemin thalai hai chet ding dangna dingin Thawtanni­a inthawk school hai hawng seng nisien, mithi hai hun sawt tak sie a ni theina dingin Doctor hai thil thaw dan ding ngaituo nisien ti hai an hriltlang.

MHJU President rawiin an hung en
CCPur: Mr Shothing Shimray, President, Manipur Hill Journalists Union (MHJU) inrawinain Ukhrul, Chandel, Tamenglong, Senapati district haia Journalist 6 hai  chu zanikhan CCPur­ah an hung inzin a, JAC thuoituhai an inhmupui bakah sawrkar office raw sieta um hai a hmuna enna le sit in protest nei hai inpawlpuina an nei a, hi zo hin Imphal tieng an kir nawk.

JAC ti dan dana an um ding thu an hril
CCPur: Zani zingkar khan JAC thuoitu hai le mithi 8 sung hai KKL Complex, IB Road, CCPur­ah an inhmukhawm. Hi huna hin thina tuok sungkuo hai chun mithi ruong hai thaw dan ding chungthuah JAC ti dan dan an zawm ding thu JAC thuoituhai an inhriettir.


Army lakna a um ding
Imphal: October 15­24, 2015 inkar sung khin Tamulpur College, Tamulpur, Assam hnunga  Stadium/playground­ah Army lakna um a ta, Soldier  Clerk/store keeper Technical/Inventory management le Soldier Technical categories hai lak ning an tih. Nagaland le Manipura inthawk candidate­hai chu October 21, 2015 zing dar 5 a Army lakna hmun ding tlung hman dinga ti an nih. Thu chieng lem Notice Board, M­Sector, Imphal or  www.joinindianarmy.nic.in haiah hriet thei ning a tih.

Thla 2 hnungin inchuknainhai hawng nawk
Imphal: Thla 2 deuthaw a liem hnungin Greater Imphal area, Imphal East le West district haia inchuknainhai chu zanita inthawk khan hawng tan nawk le students han ni dang ang bawkin Class an sunzawm nawk tah. JCILPS hmalaknaa ILPS ngenna leia nuorna chi tum tum a um lei le Greater Imphal Area sunga Curfew puong a ni leia inchuknainhai hi July 9, 2015 a inthawka khar tana um an nih.

Mi inhmang a thisaa hmu
Imphal: September 2, 2015 a inthawka inhmang Moirangthem Chaohal (75) of Khurai Puthiba Leikai chu zani zing dar 9 vel khan Porompat Police station huop sunga Khoyathong Pukhri Achouba ah a thisain tui chunga inlanga hmu a nih. Mithiruong hi City Police han an va lak a, RIMS Morgue­ah an va sie.

Teacher’s Day hmang a ni ding
Imphal: Vawisun hin Directorate of Education (S), Govt. of Manipur huoihawtnain State Level Teacher’s Day Imphal­ah hmang ning a ta, CM O.Ibobi Singh khuollien le Education Minister M. Okendro functional President in thang a tih.

Jr. Administrative Assistant
Imphal: High Court of Manipur hnuoia Junior Administrative Assistant (Jr. AA) Post 10 a ruok. Pay scale Rs. 5200­20200+ Grade Pay Rs. 3,000 per month plus other allowances a nih. Sept. 21, 2015 chenin online in hnina peklut thei ning a tih. Online application 11­9­2015 a inthawk lak thei ning a tih. Written exam 11­10­2015, Computer Typing test  15­10­2015 le Viva voce 18­9­2015 haiah nei ning a tih. Thu chieng lem http://hcmimphal.nic.in ah hriet thei ning a tih.

Thirtluon phurtu Truck 1 raw
Imphal: September 3, 2015 zan dar 9:30 vel khan National Highway No. 2 a Keithelmanbi Cemetry bul, Imphal­Mao Sector ah bandh thlawptu ni dinga ringhla han thirtluon phur Truck pakhat an raw. UNC in darkar 48 bandh an thaw hmaa hi thil hi a tlung a nih. UNC bandh leiin Imphal­Dimapur Road le Imphal­Jiribam Road haiah chun motor a tlan nawh.

Rel accident­ah mi 35 an hliem
Madurai:  Zanikhan No. 16859 Chennai­Mangalore Express Rel chu Tamil Nadu­a Puvanur station bul lai eksidenin coaches pathum an letthlu a, mi 35 in hliemna an tuok. Railway officials, fire le rescue services personnel han hi thil tlungna hmun hi panin sansuokna sin an thaw nghal. Hliem hai hi Vridhachalam hmuna Government Hospital­ah admit an nih. Hi Rel eksiden lei hin Chennai pan ding Rel thenkhat hai chu lampui dang inhrawtir an nih.

Nitina inhlawfa nau IES an ziek tling
Kendrapara: Odisha state­a Mahanangala village a cheng, nitina inhlawfa Amulya Kumar Behera (50) naunu Aparjajita Priyadarshini Behera (24) chu UPSC huoihawtna hnuoia coveted Indian Economic Service (IES) exam­a khan hlawtlingna changin India ram pumpuiah a 13­na a ni phak. A pa Mr Behera hi Paradip hmuna fertilizer plant­a nitina inhlawfa niin thlakhata a sum laklut chu Rs. 10,000 vel chau a nih. Ms Priyadarshini hi Marshaghai College­a class XII le degree zo le Utkal University­a inthawk Economics­a post graduate zo a nih.

Suomhmang pahni vuok hlum
Tura:  Zani hmasa  zan khan North Garo Hills­a Dokongsi village­ah suomhmang mi 4  hai laia mi 2 manin mipui lungsen han an vuok naah anni laia mi 2 hai chu an hliemna tuorzo lovin an thi. Midang pahni hai ruok chu an tlanhmang hman. Hieng suomhmang 4 hai hi Dokongsivillage­ah va fein khawsung mi hai kuoma sum an dawl a, chu huna mipuiin inhuolkhuma an man an nih tiin Police thusuok chun a hril.

CRPF Officer inkhai hlum saa hmu
Jorabat: 9th Mile, CRPF camp sungah CRPF ASI Mathura Chanda Patowary (49) chu ramhnuoia thingkungah inkhaihlum saa hmu a nih. Ama hi September 1, 2015 a inthawka inhmang a ni a, September 2, 2015 khan a nuhmei chun Jorabad Police outpost ah an hmang thu hi report a pek a nih. Mr Patowary hi ama le ama inthat ni dinga ring a nih.

Kum 1 mi a nu le pa thisa bulah ni­hni
Hyderabad: Zanikhan nupa tuokkhat Manjunath (30) le Rani (25) hai chu Kukatpally hmuna an chengna inah a thisaa hmu an nih. Hieng nupa thisa ruong hmu hai bula hin an naupa kum 1 mi dama hmu a ni a, a nu le pa hai hi ni 2 vel liemtaa kha thi ni dinga an ring thu Police chun an hril a; naute hi ni 2 sung zet a nu le pa ruong bula tu hriet lovin hun a hmang a nih. An khuo le veng han a tap ri an hriet a, an va en huna hieng nupa hai ruong le an naupa dama um hi an va hmusuok a nih.

J&K in SUV motor thar 100 a order
Srinagar: Jammu and Kashmir­a PDP­BJP thangruol sawrkar chun a MLAs hai hmang dingin Rs. 11 crore chuong manhu ding Sports Utility Vehicles (SUVs) 100 inchawk dingin a order.  SUVs 100 inchawk ding hai hi Mahindra Scorpio S10  BS4 pakhatah Rs. 11 lakh pei man an ni a,  state budget sum hmanga DGS& D rate in pakhatah  Rs. 11,26,208 pei senga inchawk ding a nih.

Coal Secy. hlui le midang 4 bail­a insuo
New Delhi: Coal block allocation thua jail­a intang Coal Secretary hlui HC Gupta le midng 4 hai chu zanikhan Patiala High Court in bail­a an suok a remti pek. Anni hi Jharkhan­a Jindal Group companies pahni Jindal Steel and Power Ltd (JSPL) le Gagan Sponge Iron Private Ltd (GSIPL) hai kuoma Amarkonda Murgadangal coal block allocation thuah indiklo taka thilthawa intum an nih.

India ramah internet hmangtu maktaduoi 352
New Delhi: India ramah Internet hmangtu June 2015 chen khan mi maktaduoi 352 an um a, hienghai laia maktaduoi 213 hai chu (over 60%) Mobile device fethlenga hmang an nih tiin Internet and Mobile Association of India (IAMAI) thusuok chun a hril. October, 2014 chen khan chu internet hmang hi mi maktaduoi 278 an ni a, 26% in an pung a nih. October, 2014 chen khan mobile internet hmang mi maktaduoi 159 an ni a, tuhin 40% in an pung elsa ta a nih tiin IAMAI thusuok chun a hril.

Heroin Rs. 1.9 lakh manhu leh man
Aizawl: September 3, 2015 khan Mizoram le Myanmar inrina Champhai hmuna Ms Lalhmunmawii (52) of Khawmawi village, Myanmar chu Mizoram Excise and Narcotics department­a  Anti­Narcotic Squad han inruithei Heroin grams 42, Rs. 1.9 lakh manhu leh an man. Heroin hi Myanmar­a inthawka a hung phur a nih.

Goa CM hlui Souza a thi
Panaji: Goa Chief Ministervawi 3 lai lo chel tah Wilfred De Souza chu zani zingkar khan kum 88 mi niin lungphu chawlin a thi. D. Souza hi zani 9:15AM­a kha thi niin Dr Shekhar Salkar chun a hril. D. Souza hin a nuhmei Grace bakah nau nuhmei pahni Joanne le Suzie hai a thisan.
-------------------------------------------------------------------------------------------------------
VAWISUN THUPUI
Isu Krista ngei chu a kia lung pawimaw tak niin, tirkohai le zawlneihai lungphum chunga bawl in nih. ­ Ephesi 2:20

Editorial
Inchuktirtuhai Ni

Ei ram le Society sunga hin thil iemani puola Ni hmang hi ei uorin ei phur hle hlak a, a “Ni” na nana hi chu ei hmang ropui tawk hle hlak ti chu a hmu le hretu seng ei nih. Iemani puola ni hmang hi ei la uor pei ding niin an lang. Tuta tuma ei thil tuok le inzawm khawm hin JAC chun tuta inthawk August 31 chu Tribal Unity Day le Martyrs Day a hmang dingin a rel a, Zohnathlak, a bikin Manipura cheng hai chun khawvel um sung po chu kum tina August 31 chu Tribal Unity Day le Martyrs  Day in ei hmang ta  hlak ding a nih. Zohnathlak hai chau ni lovin hnam tin le rambung tinin “Ni” bik hi ei nei seng a, ei la hmang ursun pei ding a nih. Hi thil hi ei siemfawm le ei phuokfawm a ninaw a, khawvelin a hung hersuok a ni a, a la hung hersuok pei ding a nih.
   
Ni bik hmang hi a pawimaw hle ning a tih. India ram chau ni lovin khawvel rambung tum tum hai khawmin NI/Day hmang an hau hle. Khawvel pumpui huopa Ni puol bik hmangna khawm hi a tam ta hle a, sienkhawm ei la dittawk naw a, Ni puol bik hmang ding hi a la hung um belsa pei a, India sawrkar rawtna du ngzuiin tu kuma inthawkin International Yoga Day khawm ropui taka hmang tan a nih. Ni puol bik inser le hmangna hi a tul naw le a pawimaw naw nisienla chu ei ram sawrkar le khawvel rambung tum tu m sawrkar hai hin “Ni” puol bik nei le hmang dingin an siem hlak ring a um nawh. Chuleiin Ni puol bik nei le hmang hi thiltha chu a nih ti a chieng hle.
   
India ram chun kum tin Day chi tum tum ei hmang hlak a. Vawisun khawm hin Zirtirtuhai Ni India ram pumpuiah ropui taka hmang ning a tih. Amiruokchu, tulaia ei thil tuok leia buoina boruok a la sosang lei le ei hotuhai remtuotna le JAC thu rel angin inchuknainhai po po khar an la ni leiin Churachandpur District, a bik takin Churachandpur town le a se vel haia chun dan pangngaiin Zirtirtuhai Ni hi ei hmang thei naw ding a nih. A ni tak hmang theinaw inlakhawm lungril takin hi Ni hi hmang seng inla nuom a um.
   
Inchuktirtuhai hi inpak le chawimawi an phu a, ngaisang ding khawm an nih; chu laizing chun ei rama inchukna kalphung that le that lo (education quality) inkhina tak chu inchuktirtuhai anni tlat leiin Inchuktirtuhai khawmin ram le hnam ta dinga an pawimawna hi an hrietchieng ve a ngai a, an ngirhmun pawimawzie an hrietchieng chun thahnemngaina le taimakna an nei ngei ngei ding a ni a, chu thahnemngaina le taimakna inbelkhawm chu student­hai result a dam, lekha inchuk dawkhai quality a dam a hung inlang ngei ngei ding a nih. Student­hai result a inthawk hin inchuktirtuhai quality le an inpekzona le an inpekzonawna khawm inkhi thei a ni awm ie.
   
Inchuktirtuhai Ni hi inchuktirtuhai khawmin inpek tharna Ni ah hmang hai sienla, chu chu Inchuktirtuhai Ni suk hlu zuoltu a ni ngei ring a um. Inchuktirtuhai hin an pawimawzie dam, an ropuina dam, mihriem puitling le lekha thiem siemtu le sertu, ram le hnam, kohran le khawtlang thuoitu tha le ban pawimaw siemtu an nizie hi an hrietchieng a, chu dungzuia an sin seng an thaw nuom a um takzet.
           

Student­hai khawm hin an inchuktirtuhai pawimawna le an ropuina hai hi an hrietchieng hle a pawimaw. Students han an inchuktirtuhai ditsakna le inzana ieng chen am an nei ti inkhina pawimaw tak a nih. Inchuktirtuhai Ni chau a par amani, thilpek amani, ditsakna, inzana le chawimawina students han an pek el hi a huntawk naw a, lungril inthuk tak le indik taka an pek a pawimaw a nih. Chu lungril an nei theina dinga inchuktirtuhai khawma an student­hai an inchuktir le entawn tlaka an um ve a tul bawk. Inchuktirtuhai Ni chau ni lovin ienglai khawma inchuktirtuhai Ni hmang thei dinga naupanghai lungril an sersuok hi a pawimaw hle bawk.

Post a Comment

Powered by Blogger.