Responsive Ad Slot

Hmasawnna Thar | 04 September, 2015

Friday, September 4, 2015

/ Published by VIRTHLI
Headline
JAC hmalaknain Public Meeting nei a nih
CCPur: Joint  Action Committee (JAC) hmalaknain Sept. 3, 2015, 10AM­1:00PM inkar sung khan Public Ground, CCPur­ah public meeting nei a ni a, hi huna hin H. Mangchinkhup, Chief Convenor, JAC; Muan Tombung, President ATSUM& Convenor; Seth  Shatsang, President, All Naga Students’ Union, Manipur; Sanga Vaiphei, Vice President, KSO/GHQ; John, Tribunal General, All Zeliangrong Students’ Union, (Manipur, Nagaland& Assam); N. Chamrey, Advisor, ATSUM le All Tribal Chief Forum, Manipur han mipui singtel hai hmaah thuhrilna an nei.
   

H. Mangchinkhgup chun, British a inthawk India in kum 1947 a zalenna a hmu hnung, 1949 in Manipur rengpa in India rama kawp (merger) dingin suoi a lo kei a, kum 1972 khan Manipur chun state puitling (statehood) a lo hmu a nih. Manipur in statehood a hmu hma 1971 in Manipur ram sunga tlangmi hai ta dinga roinrelna hran Indian article 371C hnuoia siem pek ei ni a, chu dungzui chun majority han tribal/hill district a ram le hmun an inchawk theinaw ding ti a ni a, an inchawk ding a ni khawmin District Administration kuoma phalna an lak hmasa ding, chu zovah Hill Area Committee kuomah peklut ding; Hill Area Committee in phalna a pek chun an inchawk thei ding chau a nih tiin a hril.
     
Manipur sawrkarin 1960 in MLR Act a siem a, kum 2014 in Chief Rights a inthawk Village Authority hai ta dingin dan le dun a hung siem a. Chu Act/dan hai khawm dittawk lovin ILP awmphawa hmangin helna a hung um a, Manipur Assembly in Aug. 31, 2015 khan Bill 3 hai chu dodalna um lovin passed a hung nih.
   
Bill 3 hai hi Act a hung ni chun 1951 census registered le village record/registered a thang lo po ramdangmi ei hung ni ding a ni a, ei dodal naw chun tribal tamlem ramdangmi (foreigner) chau ni lovin, education le development tieng khawm nasa takin ei tlahnuoi ding a nih. Bill 3 han Tribal Rights iengkhawm tawkpawi naw nih tiin hril hai sienkhawm bill sungah thupruk (hidden agenda) tam tak a um a nih.
   
Ei unau mi 8 han hringna an channa hi thlawn naw ni a, Naga, Kuki, Zomi, Hmar etc. ti  um lovin theitawp suo seng ei ta, JAC in charter of demands a nei hai Convenors ATSUM, ANSUM, KSO, HSA etc han a puitling ngeina dinga hma an hung lak a nuom thu a hril.
   
Muan Tombing chun, Hill Tribal Student bodies han zani hmasaa an inthung khawm huna district, state, national­ le Indian embassy a tribal issue intlun dinga hma an lak thu a hril. ANSUM President chun, History in valley le hill a thehrang el chau ni lovin Indian Consititution Article 371C khawmin a thehran a, hi inthena humhalna ding MLA/minister han an fak hmang a nih. Tu tuma hill district a buoina le Bill 3 passed a ni hi Hill district MLA han maw an phur ding a nih. Lungril hmunkhat puta inthuruol taka ei um phawt chun boundary le administration in mi the naw ni a, tribal hai inthuruolna dingin ANSUM hnungtawl naw nih tiin a hril.Sasang Vaiphei chun, Naga hai chu an mi thlawpna tawpsan lo dingin a ngen.
  
John chun, August 31, 2015 kha Tribal history –a inhlemna ni a nih tiin a hril a, ILP thua helna thla 2 vel sung action iengkhawm la lova a um laiin tribal han ni 3 sung chau helna an nei lei elin communication sukbuoina dingin SMS le internet hai sawrkarin a hung that a, hi thil hin tribal rights a tawk el chau ni lovin Constitution a freedom of expression khawm a tawk a nih tiin a hril. Tuhin roinrelna hran ei nawrna dinga hin mani inthunun chau ni lovin thudiklo thedar khawm ei insum a tul ding a nih. MLA Election (2017) hung um dinga hin mipui han tuta a mi hlemtu MLA/Minister hai hmun pek tum ta nawng ei tiu tiin mipui hai a ngen a, annaw chun ei public meeting hi hmangna bo ning a tih tiin CCPur mipui hai an thla.
   
ATSUM Advisor chun mi 8 thi hai a sun thu le inzana pein vawisuna inkhawmna hi Manipur history a dinga inchik thlak a ni leiin vawisuna ei thil tum hi duthusam el chau ni lovin politically a ra an suo theina dingin nuom elin inthamral tir naw mei niu tiin a hril.
   
All Tribal Chief Forum Manipur President chun, Tribal han kum tak tam politics lo khel ta inla khawm vawisun hin tribal hai lai Politics tak tak ei khel tan ni a nih; tribal rights humhalna dinga hringna petu mi 8 le hliem na tuor hai Tribal history­ah bo ta ngainaw nih. Mi 8 hai thina leia tribal hai ei politics ah chiengin kal ei pen tlang theina thuah Forum aiawin lawm thu a hril. Public Meeting hi Pastor T. Tutsawn in tawngtainain a khar.

Mipui a ngaituo leiin Dr Shyamsunder, Jt. Director CCPur­ah
CCPur: District Hospital/CCPur­a kum 10 chuong Ortho Doctor sin lo thaw ta le tuta Imphal hmuna Joint Director sin thaw mek Dr Shyamsundar Singh chun CCPur­a tulaia buoina a ngaimaw leiin zanikhan Imphal­a inthawk CCPur a hung a, Imphal­a inthawk Dr Monika Thokchom, Anaesthetic; Dr Shyamjai, Dy. Director (Store) le staff 4 hung thuoiin zani 11:30AM khan District Hospital an hungtlung a, surgical material tam tak an hung phur bawk.
   

Dr Shyamsundar Singh chun, mi tam takin hliemna la hung tuok pei thei an ni leiin Nurse indainaw leiin Directorate of Health Services kuomah emergency­a dingin Nurse ngen belsa ding; Dist. Hospital­a X­Ray hmang mek 100MA khawm duthusam a tling zonaw leiin Director of Health Services kuomah 300MA ngen ding, lampui that hun huna Imphal­a inthawk District Hospital phurlut a ni ding thu a hril.
   
Dr MonikaThokchom khawm hi OT­ah operation thaw ding um huna thangpuitu dingin iemanichen a um phawt ding thu a hril. Dr Shyamsunder Singh in CCPur mipui hai ngirhmun a ngaimaw le a hmangaina hi mi tam takin lawmum le inpakum an ti thu an hril.

Mithi 8 an ni tah: School la hawng lo ding; dawr hai hawng ding
CCPur: A ril te raka kap hliem Pumkhenthang of Hiangtam Lamka, RIMS, Imphal­a enkawl mek chu zanikhan a thi nawk leiin Assembly­a Bills 3 passed leia CCPur­a mipui helna suoka thina tuok chu 8 an tling tah.
   
CCPur khawpui sunga Schools hai chu vawisun khawm hin hawng lova la khar phawt dinga ti a nih. Bazar le Dawr hai ruok chu zing dar 5AM­10AM inkar sung mipui han mamaw hai an inchawk theina dinga hawng seng dinga ti an nih. Chun, hi hun sung hin CCPur inkara motor service hai khawm an tlan phal ni ding in ei thu dawngna chun a hril.

Employment Exchange le SDO Office raw
CCPur: Zani (Sept. 3, 2015) zantieng khan tu ti hrietlo hai chun District Empoyment Exchange Office, CCPur le SDO/CCPur Office hai an raw ut vawng. Ei thu dawngnain hieng sawrkar office haia file/documents pawimaw hai chu tuta hma khan la dawkin a himna ding hmuna an lo sie tha vawng ta niin a hril.
ZEO Office
SDO Office

LATSEA in thil man sukpung lo ding le dar 10AM chen dawr hawng seng dingin
CCPur: Lamka Traders and Self Employee Association (LATSEA) chun zani zantieng khan tuolsung chanchinbu reporters hai an inhmupui a, tulaia CCPur district­a political movement fe mek leia bandh leiin khawpui sungah fak le dawn thua harsatna an tlun a. Ei inthuruol inentirnain dawrkai le sumdawngna hmun neitu hai chun tukhawma thil man sukpung lo dingin an inhriettir.  Chun, Bandh um sung tukhawma wholesale a pedawk lo ding; mipui hai khawmin mani mamaw ang zat pei inchawk seng dingin mipui hai an ngen bawk. Dawr­a thil inchawtu hai khawma an thil inchawkna receipt la a, a man pangngai neka tama thil zawr an um chun LATSEA kuoma report dingin an inhriettir. Chun, Dawr neitu han Sept. 4, 2015 zingkar­a inthawk 10:00AM inkar chen bek mani dawr hai hawng seng dingin an inhriettir bawk.
   
LATSEA hmalakna in UBI/CCPur Branch a ATM khawm Sept. 4, 2015 in hawng ning a ta, SBI/CCPur Branch le Bank tu m tum a ATM hai khawm Sept. 5, 2015 chena mipui hmang theia hawng a ni theina dinga hma lak a ni thu an hril.
   
LATSEA thusuok dungzuiin CCPur khawpuiah ni 2/3 vel dai ding bufai a um a, Moirang a inthawk bufai laklut dan ding ngaituo mek a nih. Tuhin bufai man Superfine bag 1 ah Rs. 1100/­; Andra bag 1 ah Rs. 1700/­; Moirang Phou kg. 1 ah Rs. 30; Chini kg. 1 ah Rs. 40; Dal kg. 1 ah Rs. 110/­; Purunsen kg. 1 ah Rs. 80; Purunvar kg. 1 ah Rs. 100; Alu kg. 1 ah Rs. 30/­ chena zawr ding a nih tiin LATSEA thusuok chun a hril.

Sit in protest
CCPur: Joint Action Committee (JAC) rel angin September 4, 2015, 10AM a inthawk zantieng 2:00PM inkar sungin ZMA, KWU, MPC (women wing) le HWA haia inthawk nupui 50 pei fekhawmin Public Ground/CCPur­ah Sit­in­Protest nei ning a tih.

Joint meeting an nei
CCPur: Zani zantieng khan KKL Complex, IB Road, CCPur­ah Tribal student bodies­ ATSUM, ANSAM, KSO, ZSF, HSA etc) le JAC thuoitu han joint meeting an nei a, hi huna hin hmatienga hmalak pei dan ding le thu pawimaw tum tum an hriltlang.

Thilman sukpung lo dingin
CCPur: CEO/ADC, CCPur chun CCPur khawpui sunga Dawrkai  hai chu fak le dawn, nitin mamaw man sukpung lova, a um sung phawt a man pangngaia mipui hai kuoma zawr dingin an hriettir a, hi inhriettirna le thupek bawsea, thil man sukpunga, an thil zawrtu hai chu an Licence kansel pek ning an tih tiin thusuok chun a hril.

JAC in CM kuomah Memorandum an pek;
CCPur thuoituhai inbiekpui dinga fiel
CCPur/Imphal: August 31, 2015 a Manipur Assembly in Bills 3 a passed hai dodalna le inzawma Churachandpur­a indina um Joint Action Committee (JAC) chun zanikhan Deputy Commissioner,Churachandpur fe thlengin Manipur Chief Minister O.Ibobi Singh kuomah Memorandum an pek. An memorandum a chun, mi 8 hai thina thuah independent Judicial Enquiry thaw a, an rang thei anga a mawphurtuhai hrem ding, chu hma chu mithiruonghai lak lo ding; thina tuok sunghai zangnadawmna le sawrkar sin pek ding le hliemhai thangpuina pek ni raw hai seh ti le bills 3 passed a um hai sut nawk ni raw seh tia ngenna hai a thangsa.
   
Chun, Kuki Innpi, Manipur; Hmar Inpui le Zomi Council han zanikhan Joint Declaration an siem. An Joint Declaration a hin, September 1&2, 2015 a KIC, CCPur; Hmar Inpui; Zomi Council le frontal Organisation bakah Joint students han Joint Declaration an siem an pawmpui thu, Manipur Asembly in August 3, 2015 a Bills 3 an passed haia pawmpuina suoi thawtu Hill Area Committee member­hai an demna thu le UNC in September 3, 2015 zanrila inthawka National Highway a darkar 48 bandh an thaw an thlawpna thu hai an zieklang.
   
Zanita Manipur Deputy Chief Minister le Home Minister chanvo chel bawk Gaikhangam in Babupara, Imphal­a Chanchinbumihai an hmupuinaa chun, Bills 3 passed a um hin tlangmihai pawi tawk naw ni a, sukdik tul le siem that tul a um chun siem that le sukdik thei ning a tih.  State sawrkar chun Churachandpur hi Security Force hmanga thunun a tum naw a, a tha zawnga thunun a tum a nih. Churachandpur thuoituhai khawm inbiekpui dinga fiel an nih. Inbiekna neia thil chu chingfel a tha a nih. A tul anga hma latu dingin L.M. Khaute, ADGP, Manipur khawm Churachandpur a tir le sie a nih tiin a hril. A tul le pawimaw hmasa tak chu inbiekna nei a, dit dan le ngaidan inkal a um chun hril fel hi a nih tia hrilin CCPur a tharum insuona um chu a dem thu Gaikhangam hin a hril.

UNC in darkar 48 bandh
Imphal: August 31, 2015 a Manipur Assembly in bills 3 an passed dodalnain U NC in Sept. 3, 2015 zanrila inthawk NH­2 (Imphal ­Dimapur Road) ah darkar 48 bandh an thaw tan. Hi Bandh hin September 5, 2015 zanril chen a aw ding a nih. Hi hun sung ma hin Thadou Peoples Liberation Army han Imphal­ Dimapur Road le Imphal­Jiribam Road haiah darkar 48 bandh an thaw ding thu an puonglang. An bandh hin Sept. 5, 2015 6PM chen awng a tih. HI pawl khawm hin Bill 3 passed­a um dodalnaa bandh hi an thaw niin an hril.

Sept. 5 ah KCP in General Strike
Imphal: KCP Poirei Lup chun zing dar 5 a inthawk zantieng dar 5 chen, darkar 12 sung Manipur pumpui huopin General Strike an thaw ding thu an puonglang. FO le Contractor Rame  hai thil indiknaw thawna thuah Manipur University Vice Chancellor hrilfiena siem dinga ti a ni a, a la hrilfie naw zing leia General Strike hi an thaw tum niin Manglemnganba, Publicity Secretary, KCP, Poirei Meitei Lup chun thusuok a siem.

Inchuknainhai hawng nawk ta ding
Imphal: Vawisuna inthawk hin Imphal bakah Manipur phairam biela inchuknainhai chu hawng nawk ni tang an tih. JCILPS chun Schools, Colleges le Universities student­hai chu ni dang ang bawka an class sengah thang a, an lekha inchuk sunzawm nawk ta dingin ngenna le inhriettirna an siem.

Awa tlangah raw liem
Imphal: JCILPS in ILPS an ngenna le inzawma nuorna an nei huna July 8, 2015 a security force han an kap hlum Sapam Robinhood ruong chu an hnam danin zanikhan Awa tlang, Imphal East­ah raw liem a ni tah.

Bufai thla khat dai ding
Imphal: Food Corporation of India, Imphal chun sekkhawlsa bufai thla khat vel fak ding Godown­ah a la um niin an hril. Chun, lamlakah bufai an tang mek khawm a um niin an hril.

Bank sin thaw a sukbuoi pha
Imphal: Tulaia internet service thenkhat khara um hin BAnk sin thawna nasa takin a sukbuoi pha niin Imphal­a Bank tum tum thuneitu han an hril. A bikin internet banking transaction a su kbuoi nasa hle niin an hril.

Training a fe mi 29 an hungkir
Imphal: Manipur Development Society (MDS) in Quality Skill Training (IQST), Guwahati­a Dress Making and Aviation thil haia thla 6 sung training dinga a tir mi 40 hai laia 29 hai chun an umna Hostel chu umna tlak nia an hriet naw leiin an in tieng an hung kir san niin ei thu dawngna chun a hril. Mi 29 hai hi pasal vawng an nih.

Sept. 4 in AICC GS Manipur­ah
New Delhi: Manipur­a ni 3 sung cham dingin All India Congress Committee (AICC) General Secretary, NE in­Charge, V. Narayanasamy chu September 4, 2015 hin Imphal hungtlung a tih. September 4, 2015 hin Imphal­a inthawk Churachandpur sir a ta, buoina suok leia thil suksieta um hai a hmuna enfel a tih tiin AICC thusuok chun a hril.

AR post NSCN(K) pawlin an kap
Dimapur/Wakha: Zani hmasa zan dar 7:30 vel khan Wokha District, Nagaland a Coco leilak bula 17 Assam Rifles Post Chukitong chu an va kap a, Assam Rifles hai khawmin an lo kap let ve a, sienkhawm a tu tieng tieng khawm thi le hliem an um nawh. Chukitong khaw mihai chun hi thil tlung hi an dem hle a, a zan la lain mipuiin lampui an hraw a, muongna kan dit, tharum insuona kan dodal a, kan dem hle a nih tiin an khek ruol thup thup.

Principal Rel sungah suom
New Delhi: Zanikhan Agra le Mathura inkara Samata Express Rela chuong Ms Rekha Saxena, Principal, Central School chu suomhmang han chemical an kap (sprayed) khum a, khuo hre lova a um hnungin an suom a, a pawisa le thil nei po po an lakpek. Rekha Saxena hi Moolchand Hospital­ah admit a nih. September 5, 2015 a Teacher’s Day hmang huna President’s Medal for Excellence dawng dinga Delhi pan a ni a, chu huna suomna hi a tuok a nih. Medal hi President Pranab Mukherjee in an hlan dinga ti a nih.

Kum 2014 khan motor eksidenah mi 75,000 an thi
New Delhi: Kum 2014 khan India ramah motor eksiden leiin mi 75,000 an thi niin Road Accident Report, 2014 chun a hril. Motor eksiden a thi hai laia 82% chu pasal, kum 15­34 inkara mi an nih. Motor eksiden tam zuolna hmuna hril hai chu Uttar Pradesh, Tamil Nadu, Maharashtra, Karnataka, Rajasthan, Madhya Pradesh, Gujarat, Andhra Pradesh, Telangana, West  Bengal,  Bihar, Punjab le Haryana hai an nih.

Helpawl 4 le Army 1 an thi
Kupwara: Zani zingkar khan Jammu & Kashmir a Kupwara district a Handwara an ti hmuna Army le helpawlhai an inkaptuo nawk a, helpawl 4 le Army 1 an thi niin Senior Police official thusuok chun a hril. Inkaptuona hmuna hin sipai tam lem tirlut belsa an ni a, dappui nasa takin an thaw a, man ruok chu an nei nawh. Zani hmasa khawm khan Baramulla district­ah inkaptuona hi a lo tlung ta bawk a nih.

Mosque bomb, mi 28 an thi
Jarraf: Zani hmasa khan Yemen rama Jarraf District sunga Shitte Mosque ah thichil bomb paitu, ISS mi le sa, Qusai al­Sanaani an ti chun a bomb pai a sukpuok a, ama bakah mi 28 an thi a, midang 75 an hliem. Zani khawm khan Kuwait le Saudi Arabia ram haiah silai chawi han International Committee of the Red Cross thawktu mi 2 an kap hlum.

SSC CGL Exam 2014 Final result puong
New Delhi: Staff Selection Commission (SSC) huoihawtna hnuoia Combined Graduate Level (CGL) Examination, 2014 Final Result puong a ni ta a. Non­Naga tlangmi hlawtlingna chang ei hriet thei hai chu hieng a hnuoia hai hi an nih. Hmu thel a um chun a hnunga inchuonsa ning a tih.
I­Interview Post
1. Ruthi Lalchawisang ­Divisional Accountant in CAG
2. Angela Lalrimawi ­Asstt. in Other Ministries (GP=Rs.4200)
3. Nelson Lalthuoisang Joute Inspector (Central Excise) in CBEC
4. Joshua Z Khawbung ­Inspector (Central Excise) in CBEC
5. Faith L. Hranngul ­Inspector (Central Excise) in CBEC
6. Jacob Thangminsang ­Asstt. in Central Secretariat Service
7. Malsawmthang Infimate ­Asstt. in Other Ministries (GP=Rs.4200)
8. J L Sinate ­Inspector (Central Excise) in CBEC
10. Vungngaihlian Asstt. in Central Secretariat Service
11. M Siemlaljoy Gangte K Inspector (Central Excise) in CBEC
12. P Kevin Lamzamuan­ Inspector (Central Excise) in CBEC
13. Benjamin Douchinlian Samte ­Asstt. in Central Secretariat Service
14. Densil Samte Asstt. in Central Secretariat Service
15. Benjamin Kamlianmung A Asstt. in Central Secretariat Service
16. Paothensei Haokip Asstt. in Intelligence Bureau
17. Paokai Kipgen K Inspector (Central Excise) in CBEC
18. Khumminthang Sitlhou ­Inspector (Preventive Officer) in CBEC
19. Jangkhotinthang Haokip Inspector (Examiner) in CBEC
20. Ginminthang­ Inspector (Central Excise) in CBEC
21. Thuambiaklun ­Inspector (Central Excise) in CBEC
22. Saitluanga Sailo­Inspector (Central Excise) in CBEC
23. Michael Thangminlien Mate ­Inspector (Preventive Officer) in CBEC

STATISTICAL INVESTIGATOR GR.II
1. Zenneth Lalhimpui Varte ­Statistical Investigator Gr.II
2. Jamkhohao Mate Statistical Investigator Gr.II

NON­INTERVIEW POSTS
1. Travis Ramsang Auditor in C&AG
2. David Lalrawngbawl Tax Assistant in CBEC
3.Evelyn Lalrosiami ­Tax Assistant in CBEC
4.Joseph Vanronghak F. Kholum Acct./Jr. Accountant in CGA & Other
5.Melody Dimnunthar Amo Tax Assistant in CBEC
6.Ginliansiam G ­Tax Assistant in CBEC
7. Paolunsei Sitlhou­Tax Assistant in CBEC
8.JANGKHOLEN ­Tax Assistant in CBEC
9. Margaret Chinlunkim Samte ­Tax Assistant in CBEC
10 Sonkhopao Haokip ­Tax Assistant in CBDT
11.Liansonjem Dousel ­Auditor in C&AG
12.Thangminlun Sitlhou Tax Assistant in CBEC
13.Lal Min Lun Khaute ­Tax Assistant in CBEC
14.S Lalpaul Gangte Accountant/Jr. Accountant in CGA & Other
15.M Hauminthang ­T Auditor in C&AG
16.Lhingneithem Haokip ­Acct/Jr. Accountant in CGA & Other
17.Ningmuankim ­Tax Assistant in CBDT
18.Duhlian Kailallem Vaiphei ­Accountant/Jr. Accountant in C&AG
19.Lamjacob Simte Tax Assistant in CBEC
20. Pauchinhau Manlun ­Tax Assistant in CBEC
21.T Chinkhansiam Tax Assistant in CBDT
22.T.Minthang ­Tax Assistant in CBEC
23. L. Seikholen Haokip ­Auditor in C&AG
24.Thanglenmang Vaiphei ­Tax Assistant in CBEC
25.T. Mangminthang Haokip ­Tax Assistant in CBEC
26. Paolenlal Khongsai Accountant/Jr. Accountant in CGA & Other
27. L. Thangtinlen Khongsai ­Tax Assistant in CBEC
28. Hengouthang Lhouvum ­Tax Assistant in CBEC
29. Ronald Mingoulen G. Misao Tax Assistant in CBEC
30.Th. Hangshing ­Tax Assistant in CBEC
31. Nehkhohao Singsit Tax Assistant in CBEC
32. S. Lamkholen Haokip ­Tax Assistant in CBEC
33. Francis Khupthanlian Tax Assistant in CBEC
34. K. Thangneilal Tax Assistant in CBEC
35. Khupzamang Hanghal ­Tax Assistant in CBEC
36. Richard Thanglianmang Than ­Tax Assistant in CBEC
37. Thongkhenmung Hangzo Acct/Jr. Accountant in CGA & Other
38. Dallunmuan Guite ­Tax Assistant in CBEC
39. Ginlunmang Thangngeu Tax Assistant in CBEC
40. Douchinthang Tungnung Tax Assistant in CBEC
41. K. Stephen Lianmuanlal ­Tax Assistant in CBEC
------------------------------------------------------------------------------------------------------------------
VAWISUN THUPUI
In rikphurhai chu insâwngtuo ro; chuongchun, Krista dân chu in zâwm ning a tih. Mi iengkhawm ni si loin, mi lien deua ân ngai chun, ân hlem fâwm el a ni sih a.  Galati 6:2­3

Editorial: Hotuhai thuawi ding
Inner Line Permit System (ILPS) ngenna le inzawma Joint Committee on Inner Line Permit System (JCILPS) hmalak dan kha ei hriet seng a. An tumruna le taimakna leiin Manipur sawrkarin Assembly­ah Bills 3 zet a passed pha a nih. Tuhin tlangmi han Bills passed um dodalnaain hma ei hang lak tan a. A tawp chena thangruol thei dinga tumruna le taimakna ei nei a tul hle. Laklaw takin tawpsan pal ei tih ti hi inlau um takel a nih. JCILPS hmalakna ei en chun an tumru hle a, thla hni deuthaw chawl der lovin an hmalakna kha an fepui a, an mithi khawm a ni 58 tlingna ni chara lain an hnam dan angin zanikhan a ruong an raw liem chau a nih. Ei ni rawi hin ni iengzat am ei che ve thei ding ti hi ngaituo tham takel a nih.
   
Ieng thil kahwm thaw ding ni inla, a pawimaw chu inthuruolna, tumruna, taimakna, teireipeina, thuawina le hotuhai thuawi le ngaipawimaw hi a tul em em a nih. Churachandpur District a chun ei hotu han ei hmalak dan ding an induong fel ta a. Hmalak dan dinga an mi hril hai hi ei zui le ei zawm seng hi ei mawphurna seng a nih. Hotuhai thu lovin thil thaw naw inla nuom a um. Ei hotuhai thu zui le zawma hma ei lak a, thil ei thaw chun ei thiltum hi ei hlawtling thei ngei beisei a um. Mi han an thaw a, an hmu thei chun ei ni rawi khawm hin ei hmu ve ding a nih.
   
Ei ni rawi hin thuawi hi harsa ei ti hle. Ei thuawi naw leiin tuok lo ding ei tuok chang a um rawp hlak. Tuta ei hmalaknaa khawm hin hotu han thaw lo ding an ti khawm pawisa der lova thawlui hram hram ei um ti chu a hmutu le a hretu seng ei nih. Thuawina le hotu inzana ei nei naw chun ei hmalakna le ei thiltum hi a suk hlawsam thei ding a nih. Hotuhai thu ei awi theinaw ding chun mani ina um tha lem a tih. Hotu hai hi ei inza naw chun an hmai a mawk el chau ni lovin an hming ei suksiet ding a nih.
   
Tuta tuma Zohnathlak han inthuruol taka hma ei hang laktlang thei hi mitinin tha le lawmum ei ti seng a, ei um dan ding le ei thaw dan ding hrim a nih. Thina, hliemna, tuorna le harsatna ei tuok pha hai hi a thlawna a liem hmang el nawna dingin ei fimkhur hle a tul bawk. Hnam le hnam thila intheidana tlung le suok thei lakah tawngbau fimkhur a, mani seng ei inthunun a tul a nih. Ei hotuhai khawmin hi thil hi an ngaipawimaw a, thaw lo dingin an mi hril tasa vawng an leiin ei lungrilah vawng tlat ding a nih.
   
Mitin dan hnuoia leng ei ni a, dan ei bawisiet chun hremna ei pumpel bik naw ding a nih. Civil mi khawm, Police le Security Forces dang dang hai khawm dan hnuoia um seng ei ni leiin dan pela chet lo hram hram ding ei nih. Dan bawsie a ei che chun man le hrem ei ni hun a la hungtlung thei a nih ti hi hriet a, dan ngaipawimaw a, inza hle ding ei nih. Dan thuah ei hrietna a tlawm hi a pawi hle. Dan hrietna ei tlasam taluo leiin ei thaw lo ding le ei hril lo ding chen chen ei hril rawp hlak a nih.
   
Thil iengkim el hi ei thaw thei. Amiruokchu, ei ta dingin thaw a tha vawng kher nawh. Ei ta dinga tha lo ei thawfuk pal hlau chun, ei chunga thuneitu le roreltu Pathien khawma mal a mi sawm nuom ring a um nawh. Hotuhai thuawi ding le roreltuhai thuawi ding khawmin a min chuktir a nih. Chuleiin, ei hmalakna kawnga hin hotuhai thuawi hi a tha tak a nih. Nu le pa hai khawmin nghawk lovin ei nauhai, ei tu le tehai hi hotuhai thuawi le zawm dingin hril nawn nawk seng ei tiu. Thuawina hi a pawimaw el chau ni lovin hlawtlingna a nih.





Don't Miss
© all rights reserved
made with by Simon L Infimate