Shillong, September 8,2015: Pu LS Koireng Lungtau (Kum 50) h/o Pi Remvel chu nakie met (5:00PM) khan Woodland Hospital, Shillong hmunah lungphuchawl leiin ei lo the tah.

Football tournament Hmar Community Cup, Shillong hmuna fe mek ah papui ruol in team an siem ve a, hi team a hin Pu LS Koireng chu thang ve in, vawisun khan an inkhela, an inkhel zo sawtnawte hunga Stroke leiin a buoi thuta Hospital tlanpui nghal niin, Woodland Hospital, ICU ah hun iemanichen doctor han theitawp suoin an enkawla chu vangduoitlak takin san hman ani ta naw nih.

Pu LS Koireng Lungtau hi Manipur a pieng le seilien niin, naupang te a ni laia inthawka football khel inhnik em em mi ani a, Kum 1987 khan Assam Regiment ah Sports tieng pang a lutin ARC football team ah inkhel tan in, a thiem em leiin India ram pumpui a Sipai hran hran hnuoia inkhel thiem hai thlangkhawm, Services an ti team a khawm kum thum sung ngat a khel a. Indian Army XI team ah kum thum a khel nawk a, hi hun lai hin India ram sunga football tournament lien, IFA Shield, Durand Cup, Governor Gold Cup, Kalinga Gold Cup a hai Army XI hmingin alo inhnel bawk a nih.
National Instititute of Sports, Kolkata ainthawkin, Football ah Diploma a zo a. A football career tawp tawm kum 1996 – 97 khan Services hmingin Santosh Trophy ah a khel nawk a. Football khel a chawlsan hnungin ARC ah kum 1998 a inthawkin Coach ani ngat ngat tah a nih.

ARC football team a enkai sung hin National level ah Champion nina vawitamtak alo lakpui taa, ARC football team a Coach ni sawttak le hlawtling tak a nih. Mizoram team khawm ama enkawlna hnuoiah Santosh trophy vawihni lai zet an lo inhnel tah a nih. Chun I-League a lo qualifiy ve tah Rangdajied United FC a khawm Assistant Coach chen hai lo ni ta hlak a nih.

Pu LS Koireng hi Army a inthawkin JCO a pension ani a, a sunghai leh Shillonga khawsa an nih. A nuhmei le a nau hai 4 a maksan a nih.
Lusun sunghai ei sunpui tak zet.


Post a Comment

Powered by Blogger.