Guwahati, September, 6,2015 (Virthli News): Hmar Students Association  (HSA) Joint Headquarters, Guwahati le Hmar Welfare Society, Guwahati hai inkawpa an huoihawt 33rd Freshers Social cum Welfare Meet 2015 chu NEZCC, Shilpgram ,Panzabari, Guwahati hmuna zanikhan (September 5,2015) inhawi le hlawtling taka hmang a nih.

Hi hun hi hunthuma the in hunkhatna hi HSA Freshers Meet hun anga hmang a ni a, Pu C.S. Daniel, Income Tax Officer, Ministry of Finance, Govt.of India chu Chief Guest a hmang a nih. Tv. Albert L Hmar, President HSA Guwahati in lawmlutna thucha hrilin, Chief Guest chawimawina thilpek inhlanna nei a ni zovin Chief Guest a inthawkin thu ngaithlakna nei a nih. Hi huna hin Freshers mi 25 hai chu introduction hun le lawmlutna hun nei a ni a, Freshers hai ta dinga tawngtai pekna Rev. Lalchawlthang Thiek, Secy, IEM, North East chun a nei. Freshers hai ta dinga infuina thucha chu Pu hanghlun Hmar, IRS, Adviser HSA JHQ, Guwahati chun hrilna neiin fiemthu thaw huna fiem thaw, titak huna titaka, ruolhai mawmaw huna thangpuitu ni thei ding le inchuklai haiin Guwahati hmuna an umna san tak theinghil lova, hlawtlingna chang ngei dingin inchukna tieng khawm ngaipawimaw dingin Freshers hai chu an fui.

Hunkhatna a hin HSA, JHQ, Guwahati thuoitu thar ding hai thlangna Pastor Lalhmunsang F Tusing le HSA General Headquarters thuoitu hai keihruoina hnuoia nei a ni a, hieng a hnuoia hai hi term 2015-2017 sunga thuoitu dinga thlang hai chu an nih.

President: Tv. James Songate
General Secretary: Tv. Vanlalbel Zote
Tv. Daniel Khawral
Tv. Mathew Hrangate
Pu Albert Sitlhou
Tv. Albert Hmar
Nk. Euniki Lungtau
Tv. Eric L Ralsun
Tv. Marcus Thiek

Portfolio dang po chu thlangtlinga um hai hin an insiemrem dinga sie a nih.

Inchukna tienga thawtha zuol mi 45 hai kuoma chawimawina thilpek inhlan an ni bawk a nih. Hunkhatna hmang zo a ni hin ruoi tuihnai tak el the a nih.

Hunhnina hi chawhnung dar 2 vela tan niin, hi huna hin Pu Ngamrothang Hmar, Chairman, NCHAC chu Chief Guest hmang a nih. Pu Thanghlun Hmar, IRS, Vice Chairman, HWSG chun lawmlutna thucha a hrila, hi zo a hin kum 2014-15 sunga member fam lo chang ta hai sunna hunser hmang a nih.

Chief Guest a inthawk le Pu David Buhril, Secretary, Hmar Inpui GHQ haia inthawkin thuhrilna an nei zovin "Tlawmngaina" ti thupui hmangin seminar nei a nih. Hi seminar hun a hin "HWSG hmalakna le pawimaw zie" ti thupui hmangin Pu Lalzuithang in a hrila, "Pi le Pu Tlawmngaina, Guwahati context' ti thupui chu Pu LK Varte, "Pi le Pu tlawmngaina, nuhmei hai mawphurna" ti chu pi Hnemi Tuolor in a hrila "Sakhuona le Pi le Pu tlawmngaina" ti thupui chu Rev. Lalchawlthang Thiek in a hril bawk a nih.

HSA thuoitu thlangtling thar haiin oat-taking na Rev. Lalsiemlien Zote keihruoina in an nei zovin hunhnina khar a nih.

Hun thumna hi Hmar FC ta dingin Live Concert huna hmang a nih. Hi Concert huna hin Sinlung Express band haiin hmang in zan dar 9:30 chen nei a nih. Mipui an inawi hnein an hlimtlang hle a nih.








































































































Post a Comment

Powered by Blogger.