Aizawl, 27 Aug, 2015 (Virthli News): Tulai ruosur nasat leiin Aizawl bakah Mizoram hmun hrang hrangah mimkei a um a, vawizan ruosur nasat leiin Aizawl a chengna in 3 chu mimkei in a keithlak a, thlan (grave)-70 vel hmun hni ah a keichim bakah veng infepawna lampui thenkhat chu pilin a  vur ping. Mihriem thi le hliem an um ruok chu hriet a ni nawh.

Mak takel chu vawizan Aizawl khawpui sunga mimkei hai hi zing dar 1 le dar 2 inkar a tlung deu vawng an nih.

Virthli in siet tuokna hmun a sirna ah thu a dawng danin, vawizan khan ruorsur nasat leiin Aizawl hmun 12 velah mimkei a tlunga thlanmuol 2 a chim bawk. Mihriem thi le hliem an umnaw hlau.

Bawngkawn  le Thuampui/Zemabawk inkar ah mimkei 4 a tlunga, chengna in 2, sungkuo member 5 le 6 ve ve umnahai chu thuomhnaw iengkhawm la hman loin mimkei in a keithlak. Hi in a chenghai hi mimkei tlung hma metin an inthierfihlim hman niin thu ei dawng. Hi thu buotsai a ni lai hin Bawngkawn to Zembawk lampui hi fethlang thei a la ninawa, PWD department in an thielfai mek a, zantieng hin mortor a fethlang thei beisei a nih.

Vawizan vek khan Ramhlun North le Ramhlun Vengthar Thlanmuol intawm chu a chima thlan 20 lai a sie. Hi baka hin Chaltlang Lily veng thlanmuol khawm vawizan ruosur lei khan a chima thlan 50 lai vel a sie niin ei thu dawgna chun a hril.

Hun sawt taka inthawka lo um tah Hunthar, Sairang Road a hnuoi/pil chim thla chu vawizan khan chimsa nawkin National Highway- 54 chu a her chenve hmak, feet 10 vel a chimthla a, hi lai bul vela cheng sungkuo 12 chun an in hai ansuok san zo ta a, workshop 1 le building 1 sungkuo 5 le dawr 1 umna chu hluo thlak loin hi pil chim hin a keithlak a nih.

Hunthar Veng leh Edenthar Veng tuilakna Chanmari West a Chhawnzinga Tuikhuop chu vawizan dar 3 vel khan a chima, tuihnar a suk ping vawng baka, a bula PHE quarter pakhat chu a suksiet bawk. Quarter a cheng mi 3 hai chu an thlan dawk hman a nih. Bawngkawn – Sairang Road mimkei leiin hun iemanichen kha motor a fethleng thei nawh.

Hriet thei china Aizawl khawpui hmun 12 ah mimkei nasa zuol a tlunga, thlanmuol 2 le chengna in 3 a chim bawk. Kum 2013 a mi 17 thina Laipuitlang mimkei khawm a chimsa nawk bawk.

Bawngkawn – Thuampui tinaw chu lampui dang chu a thlang deu vawng tah niin thu ei dawng.

Aizawl bakah Mizoram hmun dang danga khawm mimkei tamtak a tlunga, tui a lien bawk niin thu ei dawng.

SHDC huomsung Mauchar le Zohmun inkar chu mimkei leiin infepaw thei an nawa, bufai/ration phur thei a ninaw leiin mipuiin harsatna namenlo an tuok thu ei dawng bawk.

August ni 25 zan khan ruosur leiin Phullen khuo a in 3 le Thingsai khuoa in 1 hai chu mimkei in a keithlaka, in 5 thiek a nih.
Seling le Tuirini inkara Champhai lampui ping chu Seling khawtlangin JCB hmanga vawizan dar 8 bawr vela an nawrthlang hnungin, ruosur leiin vawizan vek khan pilin a vur ping nawk tah niin ie thu dawngna chun a hril.

Tulai ruosur leiin Mizoram khuo thenkhat hai chu infepaw theilo in a um a, Khawtlangtuipui lien leiin Lunglei district khuo thenkhata sungkuo 100 vel chu chengna in neilo in an um.

Tlabung le Borapansury inkar lampui khawm tui in a chim leiin Wet rice cultivation (WRC) thawna hmuna sungkuo 250 hai chu tuilienin a chim mek thu dawng a ni bawk.




Post a Comment

Powered by Blogger.