Aizawl, August 18,2015: Mizoram Health Minister Lal Thanzara chun Sunshine Overseas Company ah 21.6% share nei anga intumna le ‘office of profit’ neia anga sekaltu pawl-MNF Thalai hai in an hekna chu a ditnaw zie le hi intumna inthawk hin a fihlim a nih ti in entirna’n vawisun khan Chief Minister le Assembly Speaker hai kuomah inbana (resignation) a the lut.

Vawisuna Congress Bhavan, Aizawl ah thu a hrilna ah Lal Thanzara a chun Minister of State (Cabinet minister) le MLA a nina inthawk in an ban thu a puonga. Inbanna lekha hi Chief Minister Pu. Lal Thanhawla le Assembly Speaker Pu. Hiphei hai kuomah a thelut thu a hril.

An bana san hrilin Pu. Lal Thanzara a chun tulai hnai ela online news portal thenkatin Sunshine Overseas Company ah 21.6% shares nei anga an intumna thangsana Mizo Nationa Youth Front (MNYF) haiin ‘office of profit’ neia anga an intumna chu an diknaw zie le hi taka inthawk hin a fihlim zie an entirna a nih a ti a. “Hienga intuma ka um hi khel nisienkhawm keima mimal zaumna le party zaumna a suk hmelhem ding a ni leiin, inbanna hi ka thelut el a nih”, ti’n a hril bawk.

Pu. Lal Thanzara hin Minister of State (Independent Charge) 3 hieng Health & Family Welfare, Minor Irrigation le Information & Communication hai a chela, hi baka hin PWD & P&E Department ah Chief Minister a thangpui bawk a nih.

Kha hma July ni 26 khan tulaia online news portal thangduong tak Scroll.in chun investigation report a pekna ah Mizoram Chief Minister Pu. Lal Thanhawla sangpa Pu. Lal Thanzara chu Sunshine Overseas Company ah 21% vel share nei angin a lo hrila. Hi le inzawmin MNYF chun CM Pu. Lal Thanhawla le Health Minister (PWD incharge ni bawk) Pu. Lal Thanzara chu ‘office of profit’ nei anga intumin inban di’n an lo phut ta bawk a nih.

Sienkhawm Lal Thanzara a hin Company ah share a nei le neinaw a hrietnaw thu le, hienga intum a ni phinga share a lo nei a nih ti a hriet suok thu a hril thung. “Share ka nei a nih ti ka hrietnawna san chun chengkhat khawm hi Company a inthawk hin ka dawng naw lei a nih”, a ti bawk.
Hienga Health Minister in resignation a thelut phing hin, Congress party worker hai lai boruok a sosang hlea, Health Minister inbanna chu an pawmnaw thu le sekaltupawl ha’n indiknaw taka an hekna chu bei let ve an nuom thu an hril.

Congress thuoitu pakhatin a hril danin Pu. Lal Thanzara, MLA anthawka an bana chu High Command Executive ah an la ngaituo ding thu le Minister a nina ruok chu Chief Minister kuta um a ni leiin a thutlukna an nghak thu a hril bawk.

Hi laizing hin MNYF president K. Vanlalvena chun chanchinbumi hai a pawlna ah Pu. Lal Thanzara in Company ah share a nei ngei a nih ti suichieng an ta a, CM in an bana a pawmnaw chun a tul anga hma an lak ding thu a hril.

Post a Comment

Powered by Blogger.