Ama hi EFCI Kohran rawngbawlna zarin Pathienthu lo hmufukin iengkim maksanin Kristien sakhuo ah a hung inpe a, Muolhoi Kanaan EFCI Biekin ah February 15,2015 khan Baptisma a hung changa, hlimtaka an veng tieng a kir nawk chu, an veng a tlung chun a pujari chanpui hlak hai le a vengmihai chun nasatakin an lo vuok hrep a, an vuokna chu zuol tieng a pan leiin damdawiin (hospital) panpui a ni a, hunsawt tak enkawl ani hnungin August 11, 2015 khan an vuok hliemna chu tuor zo ta loin Lalpa angsunga chawl dingin muol a lo liem tah a nih. Muolhoi a inthawkin EFCI D/S hai le Diphu a EFCI Pastor Isak Lalrohlu hai va fein Baptisma a’n chang huna Baptisma inchangtirtu Pastor Isak Lalrohlu vekin a vuiliem a nih.
Pu Jeng Ronghang hi Karbi hnam a ni a, an venga thiempu (Pujari) lien pawl tak lo ni hlak a nih. Kum hni vel liemtah khan an khuo kawl lai hin EFCI in Biekin an va bawl a, chutaka inthawk chun Kristien sakhuo hi ama mimal takin alo ngaiven ṭan a. Ama hril dan chun Kristien tamtak hi ka en a, an khawsak dan le umdan ka hmu hin Pathien tak bie ngei an nih ti ka ringa chuleichun Kristien a inpe dinga thutlukna siem ka nih a ti a nih. Pu Jeng Ronghang hin a nuhmei le a nauhai 6 a maksan a nih. A maksan a sunghai ei ṭawngṭaina a hai san ei tiu.
