Responsive Ad Slot

HSA Shillong 58th Freshers' Social-cum-Annual Meet 2015 hlawtling taka hmang

Sunday, August 30, 2015

/ Published by VIRTHLI
Shillong, August 30,2015 (Virthli News): Hmar Students' Association (HSA) Joint Headquarters, Shillong chun tarik 29th August,2015 khan Don Bosco Technical Hall, Laitumkhrah, Shillong hmuna 58th Freshers' Social-cum-Annual Meet 2015 chu hlawtling takin an hmang.

Hi huna hin Shri Dr. Jemino Mawthoh, Member, Meghalaya Legislative Assembly, Govt. of Meghalaya chu Chief Guest a hmang ani a, Shri Lalthanglien Sungte, Inspector of Police, Central Bureau of Investigation, Govt. of India chu Chief Host a hmang niin Shri Hima Darnei, Executive Member, Jaintia Hills Autonomous District Council chu Special Guest a hmang ani bawk a nih.

Hi huna hin Shillong hmuna lekha inchuk dinga hung thar (Freshers) mi 40 vel bawr hai chu lawmlutna le tawngtaipekna hun Pastor Lalngaizuol in a nei a, Freshers hai thil indawnna nei ani bawk a nih. Mipui hmaa an umdan le an tawngdan vel hai lo enin HSA Shillong Mr. le Miss Freshers thlangna nei nghal niin Mr. Freshers dingin Tv. Lalhmasawna le Miss Freshers dingin Nk. Vasty Lalthangsangi hai thlang an nih.

Thuhrilna hun Chief Guest Dr. Jemino Mawthoh a inthawkin ngaithlak a ni a, Shillong hmuna lekha inchuka um hai ta dingin infuina thucha tha tak hrilin Shillonga lekha inchuka um hai mani um nasan tak, nu le pa haiin an tir nasan tak theinghil lova fimkhur deua hun hmang tawl dingin an chaa, khawpui nun inhawi in an career hai chu in suksie tir lo dingin an fui bawk a nih.

HSA General Headquarters a Asst. Gen. Secy. Tv. Simon L Infimate a inthawkin thuhrilna ngaithlak a ni nawka, HSA GHQ hmalakna tlangpui hai hrilin GHQ le JHQ hai inlaichina suk hrat nawk zuola, theitawp suoa iengkima hma la tlang a pawimaw hai a hril.

Pu Hima Darnei in Biate le Hmar hai hi thisen hmunkhat ei ni zie hai hrilin, student hai infuina thucha a hril bakah Hmar hnam in a mawmaw hun huna an pei zing thu a hril. Pu Lalthanglien Sungte a inthawk khawmin thu ngaithlak a ni bawk a nih.

Hi huna hin inchukna tienga thaw tha zuol hai kuoma Meritorious Award mi 35 hai kuoma inhlan a ni a, Achievement Award mi 4 hai kuoma inhlan a ni bawk a nih.

Hi huna bawk hin Hmar film thar Pu Daniel Songate in a buotsai le a produced “Kumtluong Par” ti chu Pu Rohminglien Buhril, IFS in mipui inchawk thei dingin tlangzarna a nei bawk a nih. A film hi Shillong­a Hmar Arasi Picture Production han thiem taka an inchang a ni a, a changtu hai chu Tv. Immanuel L.  Zate le Nk. Ellery Lalengvar Sungte hai an nih.

Hmar Inpui le HSA GHQ hai inrawina hnuoia HSA Shillong thuoitu thar ding hai thlangna nei a ni a, term 2015-2017 sunga thuoitu dingin hieng a hnuoia hai hi thlangtling an nih.

President: Tv. Brando H keivom
Vice President: Tv. Joyful Thiek
General Secretary: Tv. Ezra L Darngawn
Asst. Gen. Secy.: Pu John Laltanlien
Finance: Nk. Bony Thiek
Treasurer: Nk. Rohminghlu

Hieng thlangthara um hai hin Departmental Secretaries ding hai chu an ruot ding a nih.

Union Christian College (UCC) HSA Unit haiin Drama en nuom um tak el an nei bawka, rimawi tieng pang ah hlasakthiem tak tak el hieng Nk. Sarah Tryte, Lydia Huolngo, Jenifer Sante, Herlyn Sinate le The 7th Seal haiin hun karlaka mipui an inawi hne hle bawk a nih.

HSA Shillong Mr.& Miss thlangna nei ani a, Mr. dingin Tv. Josia Khawzawl le Miss dingin Nk. Sylvia Tusing hai thlang an nih. Anni hi mipuiin HSA Shillong members hai laia entawntlak le mifel an ti tak an tlang a nih.

Hi Freshers Social -cum- Annual a hin mipui an fekhawm tha hlea, hun inhawi taka hmang niin, hlawtling taka hmang zo a nih.










































































































































































Don't Miss
© all rights reserved
made with by Simon L Infimate