Tuolsung
Joseph Lalrothang in Award a dawng ding
CCPUR: Rengkai Govt. High School Headmaster lo ni hlak le Zonal Education Officer (ZEO), Churachandpur a inthawka lo pension tah Pu Joseph Lalrothang chu October 5, 2015 a Mumbai hmuna Global Teacher’s Conference­a thang dinga fiel a ni bakah “Global Teacher Role Model Award, 2015” dawng dinga thlang sa a nih. Hi Conference thupui chu “Education for Enlightenment, upliftment of Human life, Global Friendship” ti ning a tih. Award hin Trophy, Engraved Pendant medal, Certificate (Lakhote) Rope of Honour thang a tih. Hi Conference a hin khawvel rambung tum tuma inthawka Teachers tha thlangkhawm hai thang an tih. Pu Joseph Lalrothang in khawvel huopa Award a dawng ding hi ei chanchinbu chun a lawmpui hle.

HYA GHQ Executive meeting
CCPUR: Hungtlung ding August 25, 2015, 11:00AM khin HYA Gen. HQ Office, Rengkai, CCPur­ah HYA GHQ Executive meeting ko a nih. Hi huna hin Executive members hai chu thang seng dinga inhriettir an nih.Meeting huna hin Ro hlui hai ennawnna, HYA Annual membership fee, Contingency Fund le Emergency Relief fund siem dan ding, HYA JHQ le Branch (Ghq a inkhai) hai term le tuta an ngirhmun enfelna; Hmar Inpui Executive Council 28/8/2015 ding le inzawma Agenda; Info. & Publicity Dept. le HYA fb group siem dan ding le a dang dang hai rel (agenda) ning a tih.

DC Hospital­a inthawk a suok tah
CCPUR: Mr Lunminthang Haokip, IAS, DC, CCPur, Aug. 20, 2015 zana zunthlum le sungkhaw leia District Hospital­a admit chu zani hmasa zan dar 9:00PM khan Doctor han Hospital­a inthawk an insuoktir ta a, zanita inthawk khan Office a kai tan nawk. DC/CCPur hi thaw ding pawimaw a nei leia Aug. 17, 2015 ­a Kolkata­a inzin, Aug. 20, 2015 nia CCPur hung tlung nawk a nih.

Freshers’ meet 2915 an hmang tawl
CCPUR: HSA CCPur College Unit chun Aug. 22, 2015, 11AM khan VTI Auditorium, Rengkai, CCPur­ah Freshers Social Meet, 2015 an hmang. Hi huna hin Chief Guest­in Pu Isaac L. Pakhuongte Principal, Sielmat Christian Hr. Sec. School le Functional President­in Pi Ramsiemzo Tusing Principal, Young Learners’ School hai an thang. Freshers’ hai Pathien kuoma tawngtai pekna Rev. Michael Zote Academic Dean, SBC in a nei.
   
Khangthah Zuun Pawl (KZP), VK Tawna College, Rayburn College, CCPur College le Donbosco Hr. Sec. School Unit chun zani 11AM khan  Simte Inn, Simveng­ah Joint Freshers meet an hmang a, khuollienin Th. Jamchinthang, MDC a thang.
   
TKSU Rayburn Branch chun B.Vengnuom Community Hall ah zani 10:00 khan Freshers meet an hmang a Chief Guest in Langkhapau Guite, Chairman ADC/CCpur an thang.
   
SSPP Donbosco Branch chun YPA Hall, Dorcas Veng­ah Freshers meet an hmang a, M. Gouzamang, EM, ADCC in an thang.

Toilet hran siem dingin
CCPUR: Churachandpur block hnuoia Govt. le Private schools hai chu Swachh Vidyalaya Swachh Bharat Initiative hnuoiah nuhmei le pasal hai ta dingin toilet a hrana siem seng dingin  Kaikhanlian Guite, DI of School/CCPur Block chun school headmaster/headmistress le Principal hai an hriettir.

NGMF 5th Motivation Prog.
CCPUR: August 31, 2015, 6:00PM khin Molnon ECA le KCC Youth Dept. mikhuolnain Molnon Community Hall­ah Nationwide Gospel Music Festival (NGMF) 5th Motivational programme um a tih. NGMF thiltum chu CCPur district a hnam tum tum le kohran tum tum hai taksa le thlarau tienga inpumkhatna inumtir a nih.

Graduation Ceremony an hmang
CCPUR: NYK/CCPur, 25 Madras le AWCA thangruola Munhoih­a Zonu Computer training peka um mi 7 ta dinga graduation ceremony zani 11AM khan Grace Zamnu, MDC, ADCC chengnain­ah nei a nih. Hi huna hin Brig.RK. Sharma, SC, SM, CO 27­Secror AR chun Certificate inhlanna a nei a, Rev. Hangpi Manlun in graduates hai tawngtaipekna a nei. 
   

Brig. Sharma chun, SSC le competitive exam ding student hai ta dingin computer inchukna le coaching tum tum thaw a ni ding thu hrilin thalai a tam thei ang takin sawrkara sin an hmu theina dinga a thangpui pei ding thu a hril.

Lampui siemthatna sin an thaw mek
CCPUR: MLA le MDC biel thum huom sunga Ngurte­Ngathal road chu Ngurte­Ngathal Road & Bridge Development Committee inrawinain Mass social work neia siemthatna sin thaw nawk a nih. Zanikhan lampui siet zuolna hmun haia chun Shaktiman 2, Tractor 8, Tripper 2 le JCB hai hmangin lungphit sung a nih. Lungphit phurna Tripper 2 le JCB chu Lanva MDC T. Khaikhomang in a tum a, Chongkhojou MDC Genneikhup Vaiphei, EM le Mahajon Zathuama of Central Lamka han Shaktiman an tuok ve ve. Haopi range MDC P. Kamkholal Viphei chun thangpuinain Rs. 5,000/­ Committee kuoma a pek bawk.

Headline
Hurriyat third party annawleh Kashmir chungchang hriltlang a ni ding chun inbiekna nei thei ninaw nih: Sushma Swaraj
NEW DELHI: India le pakistan hai chun vawisun hin New Delhi­ah National Security Adviser (NSA) level­a inbiekna nei dingin rawtna an siem a, nisienlakhawm inbiekna an nei ngei ding le dingnaw thuchieng a la um thei nawh. India chun Pakistan chu August 23, 2015 zanril chena thil hung hril fel dingin deadline a pek. Pakistan chun inbieknaa hin Hurriyat thuoituhai thang ve dingin a fiel a. Amiruokchu, India chun h i thil hi a remti theinaw a nih.
   
Union External Affairs Minister Sushma Swaraj chun, inbieknaa hin Pakistan in Hurriyat thuoituhai third party annawleh Kashmir chungchang hriltlang ding a ni chun inbiekna nei thei ninaw nih’ tiin zanikhan a hril. Inbieknaa hin Terrorism chungchang chau hril le thupuia nei ding a nih. Shimla Agreement dungzuiin inbieknaa hin third party an thang ding a ni nawh tiin Ms Sushma Swaraj chun a hril.
           
India le Pakistan PM­hai khawma NSA level­a inbieknaa hin terrorism chungthu la hril phawt dinga an remti ve ve nia hril a nih. Union Home Minister Rajnath Singh khawmin terrorism chungchang chauah inbiekna nei thei ning a tih. Inbiekna (Kashmir thuah) le terrorism thu chu fe tlang thei ngainaw nih tiin a hril. Inbiekna chu Ufa hmuna India PM Narendra Modi le Pakistan PM Nawaz Sharif hai inbiekna ang dungzui a ni ding a nih tiin a hril bawk.

Hun tiemchin um lovin Imphal­Moreh bandh
IMPHAL: August 18, 2015 a Moreh­a buoina suok leia mipui lungsen han motor an suksiet neitu hai kuoma sawrkarin August 25, 2015 chena zangnadawmna a pek naw chun hun tiemchin um lovin August 26, 2015 a inthawk Imphal­-Moreh Road ah blockade/bandh an thaw ding thu  JAC of Imphal­Moreh Road Transport Association chun thusuok an siem. Motor suksieta um hi 30 vel a ni a, hienghai lai hin Maruti Van 7, Tata Sumo 6 le Tata DI 11, Imphal­Moreh Road Transporters Association ta a thang. Hieng motor­hai hi zanikhan Moirangkhom Moreh Parking­ah en thei dinga suklang an nih.

A ngaizawng hlui pa’n mi an thattir
IMPHAL: Nov. 23, 2015 a nuhmei nei tading Konthoujam Sanjoy Singh (25) s/o K. Joy Singh of Arapti Lilong Mapal Thongkhong chu H. Thouba Meitei (23), s/o H. Aheiba of Thanga Karang Maning Leikai le Aheiba Naoba (23) s/o H. Jayenta of Thanga Karang Maning Leikai han August 21, 2015 zan dar 8 vel khan Lilong leilak bul, Shantipur hmuna an that. Thouba Meitei hi tuolsung mi han an man a, Sanjoy Singh nuhmei ding ngaizawngpa’n ruoia an that tir niin an puong. Naoba ruok chu a tlan hmang hman. Hi thina le inzawma JAC indina um chun Sanjoy inthat tirtu man a ni hmakhat mithiruong lak ninaw nih tiin an hril.

Sawrkar le JCILPS in vawisun inbiekna
IMPHAL: Joint Committee on Inner Line Permit  System (JCILPS) le Manipur sawrkar chun Inner Line Permit System (ILPS) le inzawmin August 23, 2015 hin Chief Minister’s Secretariat­ah inbiekna an nei ding niin ei thu dawngna chun a hril. Manipur CM O.Ibobi Singh chu official thilah New Delhi an zin el thei niin ei thu dawngna chun a hril bawk.

Silaimu le thil dng man
IMPHAL: Zanikhan 40 Assam Rifles le Lilong Police thangruol han Waithou ah dappui an thaw a, hnuoi sunga phum .38 silaimu 920, .303 Rifle mu 21, 40 mm Lethod Shell 1, COM Radio set khat, battery le a charger dapdawkin an man a, Lilong Police station­ah an peklut.

CM Relief Fund­ah Rs. 5,00,000
IMPHAL: Manipur mi USA, Australia, Canada le United Kingdom a um hai chun Chief Ministers Relief  Fund­a dingin Rs. 5,00,000 Manipur Chief Minister O.Ibobi Sigh kutah an inhlan.

Ukhrul phurtlung
IMPHAL: August 16, 2015 nia Ukhrul district­a Wahong le Leiyum, Myanmar inkara  Helicopter tuoksieta hliem niawm tak nuhmei pakhat hmua  um chu zanikhan Tusom a inthawk Ukhrul phurtlung a ni tah. Zanikhan SP, Ukhrul rawiin thu an indawn a, ‘Madhya Pradesh mi ka nih’ tiin a hril. Amiruokchu, Helicopter tuoksiet a um nawa hril a nih.

Imphal­Dimapur Road­ah mimkei
IMPHAL: Ruosur nasa leiin Imphal­Dimapur Road­a Nagaland state huop sung tiengah mimkeiin lamlien metres 100 vela sei a keithlak leiin Imphal­Dimapur Road ah motor fe thleng thei lovin a um pha niin ei thu dawngna chun a hril.

Tamenglong­ah office­hai khar
TAMENGLONG: ADC, Tamenglong hnuoia MDC­hai chun tuchena sawrkar insiemtir an la ninaw leia lungsenin nuorna zanikhan an nei tan. DC, Tamenglong Office thangsain sawrkar office­hai chu sin thaw thei lovin an khar.

ATM pakhat rawk, Rs. 17 lakh lak
GUWAHATI: Zani zingkar inhma tak khan Guwahati khawpui sunga Canara Bank ATM, Chandmari Branch rawk a ni a, Rs. 6.75 lakh inruk hmang a nih. Zani ma chawhnungtieng khan Gotanagar hmuna motorcycle a chuong han pasal pakaht an suom a, bag­a a pai Rs. 17 lakh an lakpek hnungin an tlan hmang san. Pawisa hi companies 2 ta, an thawktuhai hlaw dinga laksuok a ni a, pawisa bag chawitu khawm an vuok hliem niin Poliec thusuok chun a hril. pawisa neitu companies 2 hai laia pakhat chu Ashok Weaving Limited, Paschim  Boragaon a nih. Hi thil hi zani hmasa 2:45PM vela tlung a nih.

NIA in lawmmanin Rs. 10 lakh
KASHMIR: Lashkar­e­Toiba Commander, Kashmir­a um Abu Kasim man theitu ananwleh man a ni theina dinga a umna hril theitu chu lawmmanin Rs. 10 lakh pek dingin National Investigation Agency (NIA) in a puong. Lashkar­e­Toiba (LeT) terrorist dang Abu Okasha khawm a man theitu le a umna hril theitu hai kuomah lawmmanin Rs. 5,00,000 pek dingin tuta hma khan NIA in a lo puong ta bawk. Abu Okasha hi Udhampur biela um hlak a nih.

Delhi Version Bible tlangzar ding
NEW DELHI: Delhi Version Bible (Hmar), edition hmasa chanve ang chauva saa sut chu  August 30, 2015 khin Apostolic Methodist Church, Sector IV., R.K. Puram, New Delhi hmuna HCFD inkhawmna huna tlangzar ning a tih. Bible hi Savun kawma siem, Rs. 700 le PVC kawma siem Rs. 500 a zawr suok ning a tih. Tlangzar ni ruok hin chu savun kawm Rs. 500 le PVC kawm Rs. 300 a zawr ning a tih.

Maoist helpawl han APC an kap hlum
RAIPUR: Zani zingkar dar 2 vel khan Chhattisgarh state a Baster district sunga Totapara bulah Jeeram Ghati an ti hmuna Maoist helpawl han Special Task Force (STF) hai an lo lambun a, STF Assistant Platoon Commander Krishna Pal Singh an kap hlum a, STF constable Santosh Yadav a hliem a, hospital panpui a nih tiin Deepanshu Kabra, Inspector General of Police chun a hril.

Kum 2 pheikawk bun lovin
JAIPUR: Rajasthan state a Bhailwara district a cheng pasal pakhat, Kumawat an tipa chun tuta India PM Narendra Modi chu kum 2 zet el inhmupui a lo tum ta hlak a, “Modi kan hmupui hmakhat pheikawk bun lovin kelawngin ka lawn ding a nih’ a ti a,  kum 2 zet kelawnga a um hnungin zanikhan Jaipur­ah PM Modi chu hmaisanin an hmupui ta a, zanita inthawk khan pheikawk a bun tan nawk tah.

NLFT le sawrkarin peace Accord
AGARTALA: Tripura CM Manik Sarkar chun an state a helpawl group tum tum hai laia NLFT  le India sawrkar han Peace Accord an ziek ve vat ta ding niin zanikhan a hril. Union Home Ministry, Central intelligence bodies le Tripura State sawrkar han peace accord ziek a hung ni theina dingin hma an lak mek a nih tiin Manik Sarkar chun a hril.

AAP MLA Surinder Singh man
NEW DELHI: Zani hmasa khan Delhi Cantonment bieltu le AAP MLA Surinder Singh, a driver le Assistant Driver hai chu Police han an man. Surinder Singh hin New Delhi Municipal Corporation (NDMC) thawktu kut a thlak tia hekna a um leia a driver­hai le man a nih. Tulai hnaia Delhi Police han AAPM MLA an man a pathumna a ni tah. AAP thuoitu Ashutosh chun Surinder Singh hi corruption thawhai dotu a ni laizinga mana a um chu thil indik le lawmum a ni nawh tiin a hril.
---------------------------------------------------------------------------------------------------------------------
VAWISUN THUPUI
Pathien chun mi tin an sinthaw ang peiin relpek a tih, thil tha thaw fan fana, ropuina le chawimawina le bohmang theinawna zawngtuhai kuoma chun kumkhuoa hringna peng a tih. ­ Rom 2:6­7

Editorial
Thangruol ei mamaw

Thuvar inlar takel “Thangruol hi hratna a nih” ti hi an dikzie hrie inlakhawm, thangruol hi harsa ei ti tak a ni a, ei thangruol naw leia sietna, harsatna le buoina ei tuok hril le hriet ding tam takel ei nei bakah chân khawm  ei nei a nih. Thingher pakhat le thingher intelkhawm tekhin  thu hi  hrie kur siin, insuikhawm hi harsa ei ti bek bek a, unau ni siin Zohnathlakhai hi  insuikhawm thei der lo ei nih. Thenkhatin Mizo ei inti a, thenkhatin Zomi ei inti a, thenkhatin Kuki ei inti a, thenkhatin Hmar ei inti a, mani hmazawn chita hma ei lak a, nisienlakhawm ei thangruol naw leiin India ramin zalenna a hmu kum 68 lai zet a liem hnunga khawm Mizoram ti lo, NE biel huop sunga Zohnathlakhai chun ei hnam hmingchawiin ram, district le state amani hai nei thei lovin ei la um a nih. Ei thil chan hi inpam um takel a nih.
   
Zohnathlakhai hi tlawmngaina kawnga chun ei inthuruol thei hlak. Amiruokchu, politics thil le Kohran thil haia chun ei inthuruol theinaw a, ei insuikhawm thei bawk nawh. Hi hi thil pawi takel, ei thangmawbawk le ei sietpui a nih. Thangruolin insuikhawm thei inla chu iemani tak chu hmu le chang ei nei ta ngei ring a um. Ei unau Naga hai, mani tawnga inbiepaw theilo hai hman an hnam pumpui thil le a tlangpuia an thangruol le insuikhawm thei leiin thil hmu le chang an nei ta ding a nih.
   
Thangruolin ei insuikhawm thei hmakhat chu ieng ieng thaw hlak inlakhawm ieng tak tak hmu ngai nawng ei tih. ILPS chungthua khawm hin thangruol a hun. India sawrkar le NSCN(IM) han Peace Accord an ziekna le inzawm khawm hin thangruolin hma la tlang inla chu sawr­a muol muol ei nei le hmu thei ve ring a um. Hiengang hi ei ngirhmun a ni leiin ei dit dan, ei ngaidan le hmalak dan thlakthleng a, insuikhawm le thangruol zai ei rel ve a hun tah.
   
India rama Political party tum tum hai khawm an dit dan le ngaidan an ang nawin an persan hle leiin Parliament session haia khawm rorel  hlei thei lovin an um hlak. Amiruokchu, rambung dang le misuol haiin India ram sukse le do zawnga chetna an nei huna chun an party sung thil sie thain an thangruol tlat hlak.Hi kui hi politics, ram le hnam hmangaina an ti chu a nih. Political party hran hran hai ram le hnam thilah an inthuruol leiin ei ram, India ram hi kawidar lovin a la um theizing a nih. Kohran thilah ei inthuruol annawleh ei insuikhawm thei hlawl naw khawmin Zohnathlakhai hi politics thila bek thangruolin insuikhawm thei inla nuom a um.
   
Mimalah, khawtlang thilah, ram le hnam haiah a thangruol thiem thiem an ngirsuok, hi hi khawvela mitin hriet a nih. A thangruol thiem hai an vangnei a, an harsatna chi tum tum hai khawm an chingfel vat vat hlak. An thangruol leiin mihai inza, ti le an ngamlo an hung ni hlak. Hnam dang hai inza le belthlak ni ding chun hnam thangruol ni a tul. Hnam thangruol thei lo hai chu hnam danghai sirde le hmusit an ni hlak. Kuki State annawleh Zomi State annawleh Hmar State hang neizo inla chu insuk Kuki, insuk Zomi le insuk Hmar nuom tribe chin hai lai hin an tam hle ring a um.
           

Mihai belthlak ni ding chun thangruola ram nei a tul phawt a nih. Chuong a ninaw chun tu hnam khawma mi bel ngai nawng an tih. Hnam thangruol le insuikhawm hai hrim hrim ram nei lova umsawng an um ngai nawh. Hi lei hin ei hnamin thangruol ei mamaw takzet a nih. Ei unau chalranghai khawm an thil ngenah an inthuruol hle ti a hmutu le hrietu seng ei ni a, iemani tak chu hmu le chang an nei ring a um.

Post a Comment

Powered by Blogger.