Tuolsung
MDC tling thar hai lawmpuina an nei
CCPur: Zani zantieng 1:30PM khan Lamka Block Village Authority Council (LBVAC) chun MiniAuditorium, Dorcas Hall, New Lamkaah Lamka TD Block sunga khuo lal 3 DCC Electiona MDC a thlangtling thar hai lawmpuina le election an nei. Hi huna hin Lamka Block Village Authority Council chun MDC tling thar 15 Hiangtam Lamka DCC a inthawk G. Thangkhosuanmung, Chief of Hiangtam Lamka; 12Lanva DCC a inthawk T. Khaikhomang, Chief of Pearsonmun le 9 Ngamjam DCC a inthawk T. Paukhanlian, Chairman Elim Veng Village Authority hai lawmpuinain memento an inhlan.
Chun, hi huna hin kum 201517 sunga LBVAC OB ding mi 7 an thlang a, chuonghai chu Ex MDC H. Mangchinkhup, Chief of Bungmual; St. Solomon, Chief of Chiengkonpang; L. Paupi Ngaihte,V/A Chairman Dorcas Veng; Paul Lalchanhima, Chief of Hmuia Veng; Thangkhankham, V/A Chairman Gouchinkhup Veng, H. Thongkhanlian, V/A Secretary Pearsonmun le LK Mung Ngaihte, V/A Chiarman College Veng hai an nih. Aug. 22, 2015, 7AM khin oath taking nei an tih.
Aug. 24ah JPO le JCILPS an inbiek ding
CCPur: Aug. 14, 2015 nia Imphal Airport bul laia KKL Ambulance suksiet le a driver vau a nina thua Aug. 20, 2015 zingkar khan KKL Office, IB Roadah Joint Philantropic Organisation (KKL, ZYA, HYA, GYMA, Manipur a thuoituhai le Meitei Society/CCPur, Meitei Youth Org./CCPur; CCPur United Club Org (CUCO) thuoitu han inbiekna an nei a. August 24, 2015 nia JPO le JCILPS thuoitu han KKL Office, IB Roada inbiekna nei dingin an rel.
Lekhabu thar inchawk thei
CCPur: Rev. C.C. Rema in a ziek “Krista ka iengkim” ti chu Rs. 80/ a inchawk thei a ni tah. Hi lekhabu thara hin ama mimal chanchin ziek a ninaw a, Krista chu a ringtuhai ta dingin iengkima iengkim a nizie a hrilna a nih. Chun, Rev. C.C. Rema ziek ma “Bible a Pathien mihai nungchang inchukna” ti khawm a copy tlawmte a la um a, Rs. 100 in Rev. C.C. Rema, Sielmat kuoma le Ms L. Ruth, ICI Office hai kuta inthawk inchawk thei a nih.
Pasal pakhat kap hlumsaa hmu
CCPur: August 20, 2015, 7:00AM khan Sugnu Road, Tuileluong ramah pasal pakhat silaia kap hlum saa hmu a nih. Mithi hi a kut pheihnungkira khit le a hmai tuom a nih. Mithiruong hi Police han va lain District Hospital Mogueah an sie a. Iemanichen hnungah mithi hi Seiminthang Haokip (25) s/o Lhunmang Haokip of Leijang Khopi a nih ti hriet a nih tiin Police chun an hril. A ruong hi Police le doctor han postmortem an thaw zovin a sunghai kutah a ruong pek a nih. Ei thu dawngnain a hril danin Seiminthang Haokip hin a nuhmei Lhingkhohat bakah nau pasal 2 le nau nuhmei 1 a thisan a. KNA(I) a inthawk KNO/KNA a lut niin ei thu dawngna chun a hril. Hi thina le inzawm hin CCPur Police chun FIR No. 68 (8) 2015 CCPPS U/S 302/34 IPC & 25 (1C) Arms Act an registered.
DCEA General Body meeting le election
CCPur: August 20, 2015, 1:00PM khan District Council Office, Tuibuongah District Council Employees Association (DCEA), CCPur General Body meeting le thuoitu thar ding thlangna an nei. Nemzathuam, Inspector le Shanta Singh, Deputy Inspector hai inrawinain kum 201517 sunga OB ding thlangna hunah President dinginUpa Kaikhokam Vaiphei; Secretary Engmawi; Fin. Secy. in Lalnuntluanga le Tresurer in Thanglun hai an thlangtling. OB hai hin cabinet expansion thawng an ta, Vice President le Asst. Secretary thangin member iemanizat ruot an tih. District Council Employees Association (DCEA) hi kum 1978 a indin a nih.
Headline
Moreh buoina thunun a ni tah; ILPS Bill pasi ning a tih: Gaikhangam
Imphal: Zanikhan MPCC huoihawtnain Congress Bhavan, Imphalah India PM hlui Rajiv Gandhi piengchampha a vawi 71na hmang a ni a. Hi huna hin Manipur CM O. Ibobi Singh; Dy. CM Gaikhangam; Cabinet ministers, Congress MLA le party thuoituhai an thang a, inzana le hrietzingnain Rajiv Gandhi thlalakah par an inhlan tawl. Hi husnera thang ve Deputy Chief Minister le Home Minister ni bawk Gaikhangam chun, Moreh a buoina tlung chu pawi a ti thu le a dem thu a hril bakah thil vangduoi thlak takel a nih tiin a hril. Moreh buoina chu thunun a ni ta a, buoina suok leia hliemna tuorhai le thil suksieta um neituhai kuomah zangnadawmna pek ning an tih tiin Gaikhangam chun a hril.
Inner Line Permit System (ILPS) le inzawma Gaikhangam in thu a hrilnaa chun, State sawrkarin ILPS le inzawm hin Manipur Asembly Special Session ko le inthung vat ni tang a ta, State sawrkar le JCILPS inbiekremna angin ILPS Bill annawleh an tlukpui Bill Assembly chun pasi a tih tiin a hril. Amiruokchu, JCILPS le inbiekna chingfel (finalised) a ni hmakhat chu state sawrkarin Assembly Session ko hun ding thuah thutlukna a la siem theinaw a nih. Hiengang bawk hin Sapam Robinhood thina chungthu khawm hi JCILPS thil ngen ang tho a ni a, JAC Against the brutal killing of Sapam Robinhood, JCILPS le state sawrkar han inremna an nei thei pha pha leh Sapam Robinhood thina chungchang hi chingfel theiin a hung um chau ding a nih tiin Gaikhangam chun a hril.
Moreh ah darkar 10 Curfew inthlazal
Imphal: Zanikhan Moreh town le a se vel haiahCurfew puonga um chu darkar 10 sung, zing dar 8 a inthawk zantieng dar 6 chen inthlazal a ni a, hi hun sung hin buoina suok a um hriet a ni nawh. Curfew ruok chu la sunzawm pei a nih. Hill Tribe Council (HTC), Moreh; Meitei Council, Moreh (MCM) le pawl dang dang han zanikhan Morehah meeting an nei a, muongna le inremna a um p[ei theina dinga hmalak sunzawm pei dingin an rel.
Resolutions 10 an passed
Imphal: JCILPS huoihawtnain zanikhan MDU Hall, Yaiskul, Imphalah second People’s Convention nei a ni a, hi huna hin resolutions 10 zet an passed. Resolutions 10 an passed hai lai hin Manipur State Population Commission indin ding ti a thangsa niin ei thu dawngna chun a hril.
Paraolin inlambunaa thang NSCN(K) cadres 3 man
Imphal: August 19, 2015 khan hmun hran hranah June 4, 2015 a Paraolin, Chandel District, Manipur a 6 Dogra Regiment hai lambunnaa thang NSCN(K) cadres 3 AR le Army han an man niin Assam Riles thusuok chun a hril. 10AR han 19082015 khan NSCN (K) Mayanglambam Manglemba @ Touthing Ngangba Pallela Tuisimi villageah an man a, Pallel PS ah an peklut. August 19, 2015 ni main Utlou ah AR le 12 Bihar Regiment han NSCN(K) SS Pte Giftson (22) s/o M. Ibomcha of Waloagai Kaachin, Thoubal District an man a, Nambol PS ah an peklut. Chun, SS Sgt. H. Bojesh Monsang (24) of Zaphou, Chandel chu 6 Dogra Regiment han Kakching Lamkhai ah an man a, Kakching PS ah an peklut. Mana um hai hi Paraolin inlambunnaa thang an nih tiin AR thusuok chun a hril.
Bangladesh mi 6 man an nih
Imphal: Zani zing dar 6 vel khan Chingmeirong mipuiin Bangladesh mi ni dinga ringhla, phalna lekha nei lo mi 6 an man a, Chingmeirong Police outpost ah an peklut. Assamese le Hindi tawng an hmang thei naw seng niin ei thu dawngna chun a hril. Hieng mi 6 hai hi Manjam Ali (37) of Kayakuchi, Barpeta district, Assam in sin thaw dinga a hung thuoi nia hril a nih.
Lalthanzara MLA a inthawk an banna pawm pek
Aizawl: Aizawl NorthIII A/C a Congress ticket a thlangtling Lalthanzara in MLA a ninaa inthawka an banna chu R. Lalrinawma, Dy. Speaker, Mizoram Assembly in a pawmpek tah. A hmain Health Minister a ninaa inthawka an banna khawm pawmpek a lo ni tah. Election Commission khawm hi thu hi inhriettir a ni tah. Aizawl NorthIII A/C seat chu a ruoka puong a ni ta a, tuta intahwka thla 6 sungin hi biela hin Election Commission of India in hi biela hin byelection a hung huoihawt ding a nih tiin R. Lalrinawma chun a hril.
Geelani ti lo midang po insuo
Srinagar: House Arrest a sie hai laia Syed Ali Shah Geelani ti lo po hai chu zanikhan insuo an nih. Insuoa um Kashmiri separatist le leaders dang hai chu, Mir Waiz Umer Farooq, Shabbir Shah, Nayeem Khan, Yasin Malik le Abbas Ansari hai an nih. Kashmiri separatist leaderhai hi an rengin Pakistan National Security Adviser, Sartaj Aziz Delhia a hung huna inhmupui seng dinga Pakistan High Commissioner to India Abdul Basit in a fiel an nih. Sartaz Aziz chu August 23 & 24, 2015 haiah New Delhiah a hung inzin ding a ni a, Kashmiri separatist leaderhai hi August 24, 2015 nia inhmupui dingin Basit in a fiel an nih.
Manipur mi 2 Zu Rs. 39 lakh manhu leh man
Kohima: August 18, 2015 khan Guwahati a inthawka Imphal pana hung Truck pahni Khuzama Check Gate, Nagaland a Kohima Police han sukchawla an dapnaah Signature Whisky cases 300 le MC Whisky Cases 300, Rs. 39,60,000 manhu dapdawkin Truck driver 2 hai leh an man niin PRO, Kohima Police, Atu Zumvu chun a hril. Zu hi Ngathu bags 120 hnuoia an thup a nih. Driver han Zu hi BSF ta ding an nih tiin an hril a, sienkhawm lekha pawimaw an neinaw leia man an nih tiin Police chun an hril. Mana um hai chu Md. Sahidur Rahman le Md. Ahub, Kakching, Thoubal District, Manipur a um ve ve an nih.
APah nuhmei vawng thawkna Bank
Itanagar: August 18, 2015 khan Arunachal Pradesh CM Nabam Tuki chun nuhmei vawng thawkna le enkawl Cooperative Apex Bank Naharlagun hmuna a hawng. Arunachal Pradesh a nuhmei vawng enkawl Bank hmasa tak a nih. Kum 2013 khan Itanagarah nuhmei vawng umna Police station hawng a lo ni ta bawk. Hi Bank hi NABARD thangpuinaa indin a nih. Nabam Tuki CM Arunachal Pradesh chun NSTFCDC fe thlengin Bank Branch thar hawnga um hi thangpui ning a tih tiin a hril.
NASA, USA ah Assam students 20
Guwahati: Assam state sawrkar chun an state sunga lekha hrie thei le thiem bik zuol iemanizat a thlawnin National Aeronautics and Space Administration (NASA), USA ah inzintir (educational tour) dinga a lo puonglawk ta a hnukkir zo charin Assam statea private school, NPS International School chun September thla khin students 20 zet a thalwnin an zintir ding thu a puong. NASA a inzin dinghai hi merit basis a thlang ning an ta, HSLC Examination, 2015 a top 5 chen hai laia mi thang thei an tih. Kum tin NASA ah student kan inzintir zie a nih tiin Jitendra Nath Das, Director, NPS International School chun a hril.
IPS Officer ED Chief a ruot
New Delhi: Senior IPS Officer Karnal Singh chu thla 3 sung Director of Enforcement Directorate sin chel dinga ruot a nih. Karnal Singh hi Special Director, Centre Region of Enforcement Directorate sin chel lai a nih. Hieng sin pahni hai hi a chelkawp ding a nih. Chun, Gujarat State a IPS Officer Sanjiv Bhatt chu phalna la lova hun sawt takel a office kai lova a um leiin a sina inthawk ban a nih. Sanjiv Bhatt hi 1988 batch IPS Officer, kum 2011 a inthawka a sina inthawk suspended a nih.
Kum 9 mi tui in a len hmang
Tura: August 18, 2015 zantieng khan Garo Hills, Meghalaya state a Gelmol vadung tuilienin nuhmei naupang kum 9 mi, Asibra khuo mi chu a len hmang. Naupang ruong hi nasa taka zawng a ni a, sienkhawm hmu a la ni nawh. Tulaia ruo a sur zing lei hin vadung dang dang hai khawm an luongliem a, mipuiin harsatna lien tak an tuok pha. Tura Civil Hospital bulah mimkei rapthlak takel a tlung a, Hospital bula dawr tam tak a suksiet bawk.
GNLA Dy. Commander kap hlum
Tura/Shillong: August 18, 2015 zan khan South Garo Hills District, Meghalaya sunga Sawekolgre Village ah Police han dappui an thaw a, hi huna inkaptuonaah GNLA Deputy Area Commander, Shilbirth M. Sangma kap hlum le GNLA cadre pakhat Tenobirth N. Marak (18) man a nih. Kap hluma um Silberth R. Sangma kuta inthawk China siem Pistol pakhat hmu a nih tiin South Garo Hills Police thusuok chun a hril.
AI Chief thar dingin Ashwani Lohani
New Delhi: Madhya Pradesh Tourism Development Corporation MD Ashwani Lohani chu Air India Chief thar dinga ruot a nih. Mr Ashwani Lohani hi 1980 batch Indian Railway Service Officer a ni a, nikuma inthawka a hun (term) kum 1 suksei peka lo um tah Rohit Nandan a hung thlakthleng ding a nih. Nandan hun (term) kum 1 sukseia a umna hi zani zan khan a tawp ta a nih. Lohani hi Mechanical engineer niin Chartered Institute of Logistics and Transport fellow a ni a, Indian Steam Railway Society founder member le member CII National Council on Tourism a nih. Lohani hin lekhabu pahni ‘Winning at work against all odds’ ti le coffee table book ‘Smoking Beauties’ tihai a lo ziek ta bakah January, 2006 khan Report on ‘Rail Heritage and Tourim’ ti a lo ziek ta bawk a nih.
Police ASI pakhat an hmang
Diphu: August 17, 2015 a inthawk khan Diphu Bazar Police Outpost a thawk Police Assistant SubInspector, Hirenwa Bora chu a umna hriet lovin an hmang. Zan dar 10:30 vela Diphu Bazar Police outpost a inthaawka a Bikea quarter pana a fe laia inhmang a nih. A bike chu DiphuLumding Roadah August 18, 2015 zingkar khan hmu a nih. Police chun helpaw han mana an thuoihmang ni dingin an ringhla. Bora hi tuchen hin a umna hriet a la ni nawh.
Bangladesh Smugglers han BSF 2 an man
Agartala: August 18, 2015 khan India le Bangladesh ramri zula patrolling a fe BSF hai laia BSF constable 2, Mukesh Kumar (34) le Mir Islam (37) hai chu Bangladesh smuglers han an man a, Bangladesh ramah an thuoi a, an hliem leiin Camila hmuna Army Hospitalah enkawl an nia hril a nih. Smuglers han an man ti chu hrietchieng a nih tiin Tripura Police thusuok chun a hril.
Lt. Gen. Gurdeep in CoS Western Command
Jammu: Lieutenant General Gurdeep Singh chun zanita inthawk khan Chief of Staff (CoS), Western Command Headquarters a chel tan tiin Defence spokesman chun a hril. Lt. Gen. Singh hi June 1977 a Kumaon Regiment a commissioned niin National Dfence Academy le Indian Military Academy alumnus a nih. Lt. General Gurdeep Singh hi Infantry School, Mhow a Commandant sin thaw lai mek a nih.
Ram Sai 7 in pasal 1 an that
Udhagamandalam: Zanikhan Tamil Nadu state a loneitu, Ramasamy (55) chun Udhagamandalam hmuna ram sai hel 7 an tuokpui a, ram Sai hai hin thangruolin Ramasamy hi an bei a, a hmuna an that niin Police chun an hril. Forest Department le a se vela cheng han va sansuok an tum a, sienkhawm Sai ruolin an inhuolkhum leiin an thangpui ngamnaw nia hril a nih.
A.Raja chungah CBI in case
New Delhi: Union Telecom minister hlui A.Raja le midang 14 hai chungah Central Bureau of Investigation (CBI) pawlin case an registered. Case registered khum hai lai hin A. Raja nuhmei le a unau hai khawm an thang a, an sum lamsuokna le inphu lova Rs. 27.9 crore neia intum an nih. A. Raja hi 2G Spectrum case nei lai mek a nih.
Thangpuina thil phurtu Truck a eksiden
Aizawl: Myanmar rama tuilien leia harsatna tuorhai thangpuina dinga thil chi tum tum, Chin Welfare, Delhi le inchuklai han an pekkhawm phurtu Truck chu August 19, 2015 zing dar 2:30 vel khan Cawngtlaia inthawka km. 8 vela hla, Merabawk ramah a eksiden a, lamthlang tieng metres 100 vela insangah an letthla a, a Driver le handyman an hliem a, Khawzawl Hospital panpui an nih. Trucka hin Driver le handyman chau an chuong a nih.An thil phur hai hi Chawngtlai khawsunga tlawmngai han an lakkhawm a, Chawngtlai Phaiveng YMA Hall sungah an sie tha.
Lawmmanin USD 28,000 pek dingin
Bangkok: Bangkok a bomb sukpuoktu tak nia ringhla hmelput dan lim (sketch) chu Thailand Police han mipui hmu le hriet thei dingin an tarlang ta a, hi pa man theitu kuomah lawmman 1 million baht (USD 28,000) pek dingin an puonglang. Bomb sukpuoktu hi zakuo (TShirt) eng ha, Muslim helpawla mi ni dinga ring a nih. Bangkok a bomb puoka khan mi 20 zet an thi a nih.
Helpawl thangpuitu SC lawyers 3 man
Dhaka: Bangladesh rama Islamic helpawlhai ralthuom inchawkna ding Taka maktaduoi 10 (USD 12,00) petu Bangladesh Supreme Court Lawyers (Ukil) pathum man an nih tiin Bangladesh Police thusuok chun a hril. Helpawl an thangpui hi Shaheed Hamza Brigade ti a ni a, hi Brigade a lukhaitu tak chu Miftah Uddin Ahmed nia hril a nih.
----------------------------------------------------------------------------------------------------------------
VAWISUN THUPUI
“Nangni sininrim le phur rik phur po pohai, ka kuomah hung unla, keiin inchawltir ka ti cheu. Ka ringkawl bat unla, ka kuomah inchuk ro; thuhnuoirawl le lungrila inngaitlawmtak ka ni hi; chuongchun, in thlarau ta dingin chawlna hmung in tih. Ka ringkawl chu an hawi a, ka phur khawm a zang a nih,” a ta. Mathai 11:2830
Editorial
A bawsetu seng ei nih
Khawvelah thiemna, varna, rem hrietna, thil thaw theina hai a hung insang pei angin hmasawnna le changkangna ei ti hai khawm a fe pei a. Rambung tin le hnam tum tum hai intlansiekna hai lai intodelna, mani ram le hnam hmangaina hai khawm a hma nekin a hung zuol pei a, hnam tinin ram bik le hnam inhumhimna ei hung dit seng a. Hi thil hi ei Bible khawmin a mi hrilsa a ni a, khawvel changkangna ang peiin ram le hnam hmangaina hi a zuol pei ding a nih. Hi lei hin hnam le hnam thila inhrietthiemnawna, inlungruollona, inremnawna, buoina neu neu le thil dang dang hai hi dang le sukre tum inlakhawm dang zo le sukre thei tak tak ninaw ni a, khawvel um sung chu a fe pei ding a nih ti inla ei hril suol taluo ring a um nawh.
Khawvel rambung tum tum hai inthlungkhawmna United Nations Organisation (UNO) memberhai chu meeting an nei a, khawvela inremna le muongna tluontling a hung um theina dingin ralthuom tium siem tawpsan dingin lungruol em emin an rel a. Amiruokchu, an ram seng an tlung huna ralthuom tha siem tiengpangah hma an pu sau sau seng a, rambung tin inelna chu ralthuom tha lem siem a nih. Ralthuom tha le changkang lem siemna dinga an ram budget khawm a dabawlin an sukpung hlak. Ralthuom siema inruolsiekna hi an bansan thei tak tak ring a um der nawh.
Khawvel rambung tin deuthawah helpawl an um a, hieng helpawlhai thiltum tak nia an hril khawm ram hran nei a nih. India rama ngei khawm helpawl group tum tum an um a, India hmarsak biela khawm Manipur state chu helpawl group hran hran tamna tak a ni ngei ring a um. Hieng helpawlhai hin an hnam seng humhim bakah state hran nei chu an thiltum tak a ni bakah thenkhat thil ngen chu independent a ni bawk. State hran chu hmu thei a ni a, Independent ruok hi chu suoldawk a harsa hle ring a um.
Tulaia Manipura buoina suokna san tak chu mani ram humhim tumna, hnam dang hai chimral inlauna lei, mani ram bik nei nuomna lei hai an nih. Inner Line Permit System (ILPS) ngenna hi Meghalaya State a khawm nasa takin thaw a ni a, buoina chau suok lovin hliemna le thina hai chen an tuok ve a, chuongang bawk chun Manipur a khawm ILPS ngenna leiin thina le hliemna tuok ei um pha ta a nih. Ram bik neina ding chun thi le hliem hi hnam tinin ei ngam seng niin an lang. Muslim helpawlhai lem chu an huoisen bik a, an ram le hnam ta dingin an inpumpek a, thichil bomb sukpuok dam chu iengah an ngai nawh. Hnam le ram hmangaina hi a na hle a nih.
Manipur a khawm hnam hran hran chi 30 chuong ei um a, chuong hnam hai chun ei hnambing chita ram annawleh state hran le rorelna hran neia khawsa ei tum seng a, hi lei hin hnam tinin ram le hnam ta dinga ralthuom cheleka hma latu ei nei seng an naw mani ti thei a nih. Manipur a cheng phaimi le tlangmi hai khawmin state hran nei le mani seng le hnam seng humhim tumin thang ei lak seng a, indem le insawisel thei ding ei um nawh.
Ram le hnam humhim seng ei tum. Amiruokchu, ei hnam le ram humhim tum dan hi chik taka ei ngaituo veng veng a tul hle. Ei ramadawr hmun tha, building tha, sin hnuoihnung le sumdawngna hai po po chu mi chimral dinga ei tihai kutah a um vawng bakah anni hmingin hmun le hmang an nei ei remti nawh. Nisienlakhawm hmun le hmang hi tlangmi annawleh phaimi hai hming dama inchawk a um niin an lang. A hmingin a neitu chu lekhaa an ziek a, a tak taka neitu chu Vai an nih. Hi chau hi a la ni nawh. Phaimi le tlangmi hai hming hawa vai dawr siem khawm an bo bik nawh. Hi thil hi ei thaw suol lien takel a ni a, hi chungchanga hin a bawsetu seng ei nih.
