Tuolsung
Inremna le muongna um thei dan ding an hriltlang
CCPUR:  Tulaia Manipur phairam biela Inner Line Permit System (ILPS) ngenna nasa taka fe mek le inzawma hnam tum tum hai kara inremnawna le buoina a tlung nawna ding le Churachandpur District sunga inremna le muongna a um zing theina ding, hnam tum tum cheng hai inrem le ralmuong taka um theina ding ngaituoin zani 4:00PM kha O. Leimaton, MCS, Addl. DC inrawinain  a office chamber­ah joint meeting nei a nih. Hi huna hin Tribe Council/ Community Leaders, Philanthropic Organisations le Student thuoitu hai bakah SP/CCPur le CO 7­Assam Rifles hai an thang.



District Forum meeting nei
CCPUR: August 18, 2015 khan NEICORD/ACTED, CCPur inrawinain District Training Centre Hall, Tuibuong­ah Grievance Redressal System, Aadhar & RTI for “Improving Access to information and delivery of public schemes in remote and backward district of North East India’ thuah 3rd District Forum meeting nei a nih. Hi huna hin NEICORD/ACTED hnuoia beneficiary tum tum hai le NGO thenkhat an thang. NEICORD District Coordinator chun hi huna hin District Forum Aadhar & RTI chungthu chipchier takin a hril.

I ­Day cum­ Senvawn inter school sports an nei
CCPUR:   HSA, Senvawn Unit le Village Authority (VA) hai hmalaknain Aug. 15, 2015 khan 67th Independence Day­cum­Senvawn Inter­school Sports, 2015 Senvawn khuoah ropui taka nei a nih. Sawrkar tienga inthawk thangpuina dawng ninaw sienkhawm inchuklaihai hmakhuo ngainain Independence Day le inzawm hin  Senvawn Inter School sports buotsai a nih.

DC in ni 3 chawl a lak
CCPUR: Mr Lunminthang Haokip, IAS, DC, CCPur chun Aug. 17, 2015 a inthawk ni 3 sung chawl lain Kolkata­ah an zin. A umnaw sung Ms O. Leimaton Devi, MCS, Addl. DC/CCPur &  SDO/Tuibuong chu DC in­charge lo chel dingin an hlan.

Hmalak pei dan ding an hriltlang
CCPUR:  Mr Langkhanpau Guite, Chairman, ADCC inrawinain zani zantieng 1:00PM khan a office Chamber­ah District Council, CCPur­a members (MDCs) han informal meeting an nei a, member tam tak an thang. Hi huna hin hmatienga hmalak pei dan ding le thil pawimaw tum tum an hriltlang.



Gas Cylinder inrutu  man
CCPUR: Aug. 18, 2015, 8:30AM vel khan Tuibuong Area Youth Club (TAYC) chun Family Lane, Bijang­ah Gas Cylinder inrutu Mr Lamminthang (26) s/o Khupjakham of Saikul an man a, TAYC in thu an indawn huna B.Aijalon khuoa Lhingboi Gas cylinder le puonbi, B. Aizalon bazaar­a nupui hme zer hai phala le Cycle an ruk thu a puong bakah Aug. 17, 2015 khawm khan Zion Veng, Tuibuong­ah Kimi Gas Cylinder an ruk thu a puong. TAYC chun tha taka thu an hril hnungin an inthlasuok nawk.

Scholarship hni thei a nih
CCPUR: Piengphunga ruolbanlo, students, mimal, pawl, nu le pa han Sholarship chi tum tum, financial Assistance le Unemployment Allowance kum 2015­16 a dingin District Social Welfare Office, CCPur­ah hni thei a nih. Hnina lekha hi office­a lak thei le fill up zovin September 2, 2015 chena peklut thei a nih.

Dil­ah a tla hlum
CCPUR: August 18, 2015, 12:00Noon vel khan STC/BSF campus, Mualkawi­a Pukrhi/Dil sungah pasal naupang kum 13 mi Jangminlian chu a ruolhai le Nga an kuoi naah changsuolin Dil tuiah a tla hlum niin ei thu dawngna chun a hril.
Headline

Moreh-a buoina suokah mi 7 an hliem; hun tiemchin u m lovin Curfew puong a nih
IMPHAL: Zanikhan Chandel District sunga Moreh hmuna ILPS le inzawma lampui hrawna a um a, hi lampui hraw dodaltu le ILPS le le inzawma lampui hraw hai inkarah inbeituona a tlung a, buoina a hung sosang pei leiin Meitei Council, Moreh Branch Office, Hodel De Khunai, In 2 le dawr iemanizat raw le suksiet a nih. Hi buoina lei hin Imphal­a inthawk ADG, L.M. Khaute inrawinain Police, Assam Rifles le Paramilitary Forces hai tirlut belsa an ni a, Buoina suok hi thunun a ni ta a, sienkhawm boruok chu a la sosang niin ei thu dawngna chun a hril.
   
Buoina suok lei hin Additional District Magistrate, Moreh chun zani zing dar 8 a inthawk khan hun tiemchin um lovin Moreh Sub­Division huop sungah Curfew a puong. Curfew puong zo hnung hin chu buoina suok hriet a ni tanaw a, Moreh town sung chau a re hle.
   
A hmuna thil um dan enfel ding le inhrietthiemnaw hai inkara inremna siem tumin All Manipur United Clubs Organisation (AMUCO), United Committee Manipur (UCM) le Kuki Innpi thuoitu han MOreh pan an tih. State sawrkar tiengpang khawm IFCD Minister Ngamthang Haokip; Works Minister Dr Kh. Ratan Kumar le Tengnoupal A/C MLA D.K. Korungthang han Imphal suoksanin Moreh pan an ta, a hmuna thil umdan hang enfel an tih. ADC/ Moreh chu hi buoina suok le inzawmin report kimchang state sawrkar kuoma pe dinga inhriettir a nih.
           
Moreh a buoina suokah hin mi 7 an hliem niin ei thu dawngna chun a hril a. Manipur hmun hran hranah ILPS le inzawma nuorna chi hran hran a la fe pei a, bungheia nuorna nei Police han mi 7 an man a, sienkhawm Khurai Lamlong ah mi 6 le hmun dang dangha mi 6 han bungheia nuorna an nei tan nawk. Chun, zanikhan Bishnupur District­a Kumbi le Moirang vela ILPS le inzawma nuorna nei hai le Police hai inbeituonaah mi 5 an hliem niin ei thu dawngna chun a hril.

IG, AR in CM an hmupui
IMPHAL: Zanikhan Major General V.S. Sreenivas, Inspector General (IG), Assam Rifles (South) chun Manipur CM O.Ibobi Singh an hmupui. Hi huna hin Brigadier le Commandant level Officer­hai khawm an thang a, ieng thu  thu am an hriltlang ti ruok chu hriet a ni nawh.

AR han thangpuina an pek
IMPHAL: Chandel District a Aishi Top, Aigejang, Sajik Tampak, Longja, Singheu, Tuitam Kongkai le Khulmulen khuo haiah tuilien le mimkei leia harsatna tuorhai chu 21 Assam Rifles han an thangpui bakah tuilien le mimkeiin a suksiet an lamlien le khuo le khuo infepawna lampui hai an inthielfai pek niin Assam Rifles thusuok chun a hril.

Home Minister in action lak dingin
IMPHAL: August 17, 2015 zan dar 8:51 vela Huiyen Lanpao Daily Office tuola Bishnupur Police Commandos han Willar Leimapokpam, Staff member, Huiyenlanpao, Naorem Johnson, Managing Editor, Image Monthly magazine le Harish Sharma, Reporter, Image hai an vuokna le inzawmin AMWJU chun zanikhan Manipur Press Club, Majorkhul a i nthawk Nupi Laan Complex chen lampui hrawna an nei bakah Dy. CM le Home Minister Gaikhangam an inhmupui a, Memorandum an pek. Gaikhangam chun darkar 48 sung ngeiin Chanchinbumi vawtu Police Comman do­hai chungah action a lak ding thu AMWJU thuoituhai a lo tiem. Willar Leimapokpam hi a luah hliemna a tuok leiin Raj Medicity panpui a ni a, Doctors han a lu hmun 8 le a hner hmunliah an thui.

Sharmila Court hmaah inlangtir
IMPHAL: Zanikhan Irom Chanu Sharmila Chief Judicial Magistrate (CJM), Imphal East Court hmaah inlangtir a ni a, ni 15 sung lungin a sie dinga ti le ni 15 hnunga Court hmaa inlangtir nawk dinga ti a nih. Sharmila hin Manipur­a inthawk Armed Forces  Special Power Act 1958 hlip dinga ngennain kum 13 z et bungheia nuorna a nei ta a nih.

Mizoram Health Minister inbanna pawmpek
AIZAWL: Mizoram Health Minister Lalthanzara chun zanikhan “Office of Profit” thubuoi le inzawmin Health Minister a nina le Aizawl North­II A/C a MLA a nina haia inthawk an banna lekha a pek a, Health Minister a ninaa inthawka an banna chu pawmpek a ni a, MLA a inthawka an banna ruok chu New Delhi­a inzin Mizoram Assembly Speaker Hiphei August 22, 2015 nia Aizawl a hungtlung hnunga  ngaituo ding chau niin ei thu dawngna chun a hril. MNF Youth President K. Vanlalvena chun Lalthanzara hi Sunshine Overseas Company­a chanvo (share) Rs. 4,76,000 (21.6% of the total shares of the company) changin an intum a nih. Minister hin intuma a umna hi a hnawl. Lalthanzara hi Mizoram CM Lalthanhawla sangpa a nih. ZNP chun Social Welfare Minister P.C. Lalthanliana khawm hi scam­a hin an rawl ve leiin inban ve raw seh tiin an phut.

President nuhmei Suvra Mukherjee a thi
NEW DELHI: India President Pranab Mukherjee nuhmei Suvra Mukherjee (74) chu damnawna leiin zani 10:51AM khan Army Research and Referral Hospital, New Delhi­ah a thi. August 7, 2015 a inthawka Hospitala enkawl tan a nih. Nau pasal 2 Abhijit, Congress MP le Indrajit hai bakah a nau nuhmei pakhat Sharmistha le a pasal a thi san. Pranab Mukherjee le Suvra hai hi July 13, 1957 a innei an nih. Suvra hi Delhi Assembly Election a khan Congress ticket in a ngir a, sienkhawm a hlawsam a nih.
           
President Pranab Mukherjee nuhmei Suvra Mukherjee thi hi Vice President Hamid Ansari, PM Narendra Modi, AICC Vice President Sonia Gandhi, Lok Sabha Speaker, Union Ministers le MPs han an sunpui thu an puong tawl.

Heroin Grams 48 leh nupui 1 man
AIZAWL: Zanikhan Mizoram Excise & Narcotics Department han Lalhmunmawii (52) of Khawmawi Village, Myanmar chu Heroin grams 42, Rs. 1.9 lakh manhu leh  Champhai, Mizoramah an man a, NDPS Act, 1985 dungzuiin case an siem khum.

NE biela state tinah DoNER Office
AGARTALA: August 15, 2015 nia Union DoNER Minister Dr Jitendra Singh in Parliament House a NE MP­hai meeting a neipui huna, NE state tinah DoNER Offices hawng vat a ni ta ding thu a hril. Hi meeting a hin Lok Sabha Speaker hlui P.A. Sangma thangsain NE MPs 40 an thang a, Union DoNER Minister kuomah rawtna le thurawn chi tum tum an siem. Sawrkar thlungpui chun hmalakna thar “DoNER at Doorstep” ti a siem a, hi dungzui hin a kar thlak peiin thla tin NE state haiah Camp Secretariat hawng a nih tiin Dr Singh chun a hril.

Padma Awards, 2016 hni thei
NEW DELHI: Civilian Awards (Padma Awards), 2016 hni nuomhai ta dingin September 15, 2015 chenin hnina lekha peklut thei a ni ding thu Union Home Ministry chun inhriettirna a siem. Awards hni thei hai chu Padma Vibhushan, Padma Bhusan le Padma Shri Awards hai an nih. Hieng Awards dawng dinghai ruot (nominate) theituhai chu State sawkarhai, UT sawrkarhai, Central­a Departments, Ministries, Union Ministers, Chief Ministers, Governors, MPs le mani le mani khawm inruot thei a nih.

NCL GM hlui kum 5 intang dingin
JABALPUR:  Northern Coalfields Ltd (NCL) a General Manager hlui le South Eastern Coalfields Ltd (SECL) a Chief General Manager hlui Ram Lakhan Rai le a naupa Ashok Rai hai chu an sum hlawsuokna le inphu lova an hausak (disproportionate cases) leiin CBI Special Court Judge MK Sharma chun zani hmasa khan kum 5 sung rimsi taka lungin intang ding le fine Rs. 2 lakh ve ve chawi dingin thiemnaw an changtir. Rai chengna in CB I in an dap huna a sum laklutna hrietlo  rothil Rs. 1,27,63,034 manhu ding an dapdawk a nih.

Khaplang inhmupui dingin an fe
NEW DELHI: NSCN(K) Chairman, S.S. Khaplang inhmupui dingin Nagaland­a inthawk Naga Hoho thuoitu hai chun Nagaland suoksanin Myanmar an pan. Khaplang chu India sawrkar leh Ceasefire sunzawm nawk ding le final Naga Peace Settlement a thang dinga hang ngen an tum a nih. Amiruokchu, SS Khaplang chun a damnawna suonlamin NSCN(K) Vice Chairman Khango Konyak le NSCN(K) Military Commander Nikki Sumi hai chu Naga Hoho thuoituhai inhmupuitu dingin S.S. Khaplang in a ruot nia hril a nih. Self­styled Lt. Gen. Nikki Sumi hi June 4, 2015 a Chandel, Manipur a Indian Army hai lambun an nina thu phierrutu tak nia hril a nih. Kha inlambunnaa khan Army personnel 18 an thi a nih.

Bihar a dingin PM in Spl. package Rs. 1.25 crore
ARRAH: Zanikhan PM Narendra Modi in Bihar Assembly election hung um ding le inzawmin Arrah, Bihar hmna Vote campaign a nei tan. Mipui pungkhawm hai hmaa thu a hrilnaa chun, Bihar state a hamsawnna sin thawna dingin Special Package Rs. 1.25 crore pek a tiem thu a puong. Hi hi Bihar State le a mipui hai hmasawnna ding a nih tia hrilin Bihar state­ah inthlangna a hung um ding thu a hril.

August 21 a inthawk NE Film Festival
NEW DELHI: August 21, 2015 a inthawk khin ni 3 sung aw ding NE Film Festival New Delhi­ah tan ning a tih. Hi Film festival hi Directorate of Film Festivals (DFF) in an huoihawt ding a nih. Hi Film festival­a hin Manipuri film Ishanou, Imagi Ningthem, Orchids of Manipur, The Deer on the Lake, Indigenous Games of Manipur le Yelhou Jagoi ti film hai khawm insuo ning a tih.

Thamna a lak leiin AE man
PUNE: Rajesh Singh, Assistant Engineer, CPWD (Civil), IIITDM Project, Jabalpur, Madhya Pradesh chun thamna Rs. 2,00,000 a lak leiin CBI pawlin an man. Thamna hi  Rs. 5,00,000 a ngen a, Rs. 4,50,000 dingin an inbiekrem a. First instalment Rs 2,00,000 a lak hmasa niin CBI thusuok chun a hril. RAjesh Singh hi thamna Rs. 2,00,000 a lak lai taka man a ni a, a chungthu suizui pei a nih tiin CBI thusuok chun a hril.

Sonowal in projects 3 lungphumna
NORTH LAKHIMPUR: Zani hmasa khan Union Minister of State for Sports & Youth Affairs, Sarbananda Sonowal chun a constituency  huop sung (North Lakhimpur) a North Lakhimpu College huong sungah Synthetictrack turf, Rs. 6 crore senga bawlna ding, Rs. 100 crore senga Lechai Gaon a Sports Training Facility bawlna ding le Sufi Shrine of Deka Fakir a Community Hall bawlna ding lungphumhai a phum bakah Sufi Shri thangpuina dingin a MP fund a inthawk Rs. 10 lakh a pek.

India Flag a keithlak leiin man
BAREILY: August 15, 2015 nia Poorva Madhyamik Vidyalaya (Primary School), Chaudera compound sunga Independence Day hmangna  huna India hnam puonzar inkhai chu programme tan hmain hi School­a zirtirtu, Ram Asney Yadav in nawmna taka a keina hrui mandea a keithlak hnungin a fe hmang san. Hi le inzawm hin August 17, 2015 khan “The Pevention of Insults to the National Flag Act, 1971 dungzuiin Police han an man a, case an siem khum. Court in thiemnaw an changtir chun kum 3 sung lungin intangtir annawleh pawisa inchawitir annawleh a pahniin a tuor thei ve ve ding a nih.

NIA in lawmman Rs. 5 lakh pek dingin
NEW DELHI: National Investigation Agency (NIA) chun August 5, 2015 nia Jammu & Kashmir­a Udhampur district­a  tuolsung mi han Pakistan terrorist  hring le dama an man Naved Yakub a ruol mi pahni hai lim (sketches) an tlangzar ta a, hi le inzawm hin Yakub a ruolhai Zargham@ Mohd. Bhai le Abu Okasha (Pakistan mi ve ve) hai man an ni theina dinga information pe theitu hai kuoma lawmman Rs. 5 lakh ve ve pek dingin an puong.

A nu thattu damsung lungin intang dingin
ETAH:  August 28, 2012­a Palia village­a a piengna nu Bhoori Devi silaia kap hlumtu Satish chu zanikhan Special Judge Ravindra Singh chun damsung lungin intang dingin thiemnaw an changtir. Ms Bhoori chun a thi hmain silaia kaptu chu Satish a ni thu Magistrate kuoma a lo hril a nih. Satish hi Court chun fine Rs. 5000 chawi dingin a rel bawk a nih.

NSCN (K) thuoitu Delhi­ah man
NEW DELHI: August 17, 2015 zan khan Delhi Police han NSCN(K) thuoitu Panmei (50) of Paren District, Nagaland chu Habitat Centre building, Lodhi  Road a in pakhata inthawk an man niin Delhi Police thusuok chun a hril. Panmei hi a ruolpa zun hmupui dinga Delhi­a inzin nia hril a nih.

Air India Attendant post 193 a ruok
NEW DELHI: Air India hnuoia Airline Attendant Post 193 (SC­32, ST­14, OBC­49, UR­98) a ruok. Thiemna 10+2 ni a tul a, training sung thla khatah stipend  Rs. 10,000/­, training zovah Rs. 31880/­ per month. Inhnikna nei hai chun August 12, 2015 a inthawk September 1, 2015 chenin (online) application peklut thei ning a tih. Thu chieng lem official website: http://www.airindiaexpress.in/careers.aspx ah hmu thei ning a tih.

Sept. 18­ah ‘Everest’ film tlangzar ding
MUMBAI:  Kum 1996­a khawvela tlang insang tak Mount Everest­a tlang kai hai thiltuok (real life story) thangsana siem Hollywood thriller “Everest” ti film, English, Hindi, Tamil le Telugu tawnga siem hai chu September 18, 2015 khin India rama tlangzar ning a tih. Hi 3D movie hi Baltasar Kormakur in a direct niin a changtu hai chu Jason Clarke, Josh Brolin, John Hawkes, Robin Wright, Michael Kelly, Sam Worthington, Keira Knightley, Emily Watson le Jake Gyllenhaal hai an nih.

Mi 6,189 in hnina an peklut
YANGOON:  November 8, 2015 a Myanmar a Union Parliament (Lower House) seats 913 le Upper House seats 3,504 um haia ngir nuom mi 6,189 in hnina lekha an peklut ta tiin Union Election Commission (UEC), Myanmar thusuok chun a hril. Hnina lekha peklut theina nuhnung tak chu August 14, 2015 kha a lo ni tah. Hi Election a hin Suu Kyi thuoina hnuoia National League for Democracy (NLD) khawma thang an tum thu puonglangin candidate dinghai khawmin hming an peklut tah.

Australia Parliament­ah  Gay Marriage Bill
CANBERRA: Nei inang (Gay) innei pahlna dan siemna ding Sex Marriage Bill chu August 17, 2015 khan Australia Parliament a khawm putlut ve a nih. Hi Bill hi Coalition MP Warren Entsch in a putlut a ni a; hi Bill chungthua hin vote lak a ni ding le ding naw hriet a la ni nawh. Australia general election hi kum 2016 a nei ding a ni a, hi hma hin chu Gay Marriage Bill hi pasi hman beisei a um nawh tiin ABC report chun a hril.
---------------------------------------------------------------------------------------------------------------------
VAWISUN THUPUI
Thlarau thang naw chun taksa chu thi a nih, chuong ang bawkin thilthaw thang naw chun ringna khawm chu a thi a nih.  ­ Jakob 2:26

Misuol Pawl
Pawisa ei ti hi a pawimaw em em a, mihriem hai hi pawisa thang lova khawsa thei lo ei ni lei in pawisa zawngin ei invir buoi seng a nih. Pawisa le mihriem hringnun hi inzawl an nih. pawisa nei le hau hai ma inza le hmel enin an um hlak niin an lang. Ei society sung chau ni lovin, sakhuona le Kohran chen haia khawm a neizo le p awisa hau hai ma a thu lut, inza le kohran sunga thuneitu an nih an naw mani aw ti theiin a um hlak. Pawisa hau hai bawkin sietni le thatni haiah lainatu le ditsaktu an hau lem nge nge hlak. Hi thil hi ei tulai khawvel fe dan a ni ti inla ei hril suol taluo ring a um nawh.
   
A bikin Manipur­ah pawisa a pawimaw em em a, pawisa nei lo hai ta dingin chet ngaina a um der nawh. pawisa hin a mi sukhlim a, pawisa hau chu hminginthangna, inza hlawna, fel le var hlawna a nih. Mivar le remhriehai khawm pawisa an neinaw chun an varna le remhrietna hai chun thlawp a hlaw ngai nawh. Hi lei hin  pawisa hau le nei ngei tumin mani chet theina kawng sengah, ka sawl, ka kham ti lovin ei invir mup mup tawl a, a chang lem chun pawisa hmuna ding a ni phawt chun an dik le an diknaw, a thienghlim le a thienghlim naw khawm ei thehran ta ngai nawh. Pawisa ditna leiin misuol pawl (Gang) ei indin hiel ta niin ana lang.
   
Sin inrim taka thaw a pawisa hmusuok ei peinaw leiin misuol pawl ei indin a, thawluina, vauna le ralthuomhai chen hmanga mihai pawisa laklui pek pawiti der lo, misuol pawl khawm ei bo bik ta nawh. Pawl chi hran hran um hai laia pawl thenkhat chun an pawl chu sumdawngna le fakzawngnain an hmang an tanaw mani ding ti theiin a um. Ram le hnam ta dinga hma la anga pawl indin a, sawrkar officer lienhai, Contractor le mi hausa hai kuoma pawisa singtel le nuoitel ngen khawm ei um ta niin an lang.
   
Misuol pawl (Gang) ei tihai hi India ram s tates le Union Territories dang dang haia khawm indin a nih. India rama misuol pawl tamna taka hrila um chu Uttar Pradesh state nia hril a nih. Uttar Pradesh state hi India rama mihriem bubitna tak, MP le MLA hau tak state an ni bawk. Mi an tam a, mi hausa tak tak tam tak an um laiin thalai lekhathiem, sin neilo an pung tuol tuol a. Chonghai chun Gang an siem a, mi hausa  tak tak le an nauhai chu an inruk hmang a, pawisa tam tak takin an intlantir a, chu sin chu sin hlawk  le awlsam, pawisa tamna tak le hausak thut theina a nih. Heingang thil hi ei state a khawm a tlung ta hlak a, ei ram chu ramnelumlo in ei siem pha a, misuol Group hi an pung deu deu el a nih.
   
Uttar Pradesh a misuol pawl hai lem chun thil an thaw thei em em a, Politician thenkhatin kut le ke takin an hmang nia hril a nih. Hi thu hi khel a ni ring a u m nawh. Mi hausa hai pawisa an lak pekhai chu an insem a, Politician thenkhat chun vote campaign­nain an hmang nia hril a nih. Ei rama khawm hiengang pawl hi an um ve ta an naw ding maw? Ngaituo chet chet a tul ta hle el.
           
India ram khawpuilien hai po poah misuol pawl hi an um vawnga hriet a nih. Mumbai khawpui a ngei khawm misuol  turaw tak tak an um. Entirnain, Dawood Ibrahim dam hi misuol pawl thuoitu turu takel, India sawrkar ngei khawma man tuma a zawng zing a nih. Dawood Ibrahim hi pawisa hau, che thei em em el, India sarwkar sukluhaitu laia thang ve hak a nih. Churachandpur town sung ngeia khawm hin misuol pawl hi pawl iengzat hlawl am an um ding chu! Ngaimaw thlak a nih



Post a Comment

Powered by Blogger.