Responsive Ad Slot

Hmasawnna Thar | 14 August, 2015

Friday, August 14, 2015

/ Published by VIRTHLI
Tuolsung
Blood Donation Camp buotsai a nih
CCPUR: District Hospital, CCPur le District Administration hai thangruola huoihawtnain zanikhan District Hospital, CCPur­a Blood Bank­ah ‘Blood Donation Camp’ buotsai a nih. Blood Donation Camp hi Mr Lunminthang Haokip, IAS, DC, CCPur in ribbon chep tanin a hawng. Hi huna hin nuhmei 8 le pasal 9 han thisen an pek. Thisen petu hai lai hin DIO/DIPR, CCPur a inthawk mi 1, Nehru Yuva Kendra/National Youth Corps (NYC) a inthawk 11, Nazareth Nursing Home a inthawk 3 le District Hospital staff mi 1 an thang.
    
Patriots Day le Independence Day hmang ding le inzawma Blood Donation Camp hi  District Administration le thangruola an buotsai a ni thu Medical Superintendent, Dist. Hospital Dr J. Son Gou Kham chun a hril.

DC in Public Toilet a hawng
CCPUR: Mr Lunminthang Haokip, IAS, DC, CCPur chun zani 12:00 khan District Hospital Campus­ah Public Toilet/Sanitation a hawng. Public Toilet hi BRGF 2014­15hnuoia DRDA/CCPur in an bawl a ni a, nuhmei le pasal inzunna room 2 ve ve le ekin room 2 ve ve a um. Toilet hi District Hospital gate thlang lai meta bawl a ni a, tuta inthawk a hmang man peka hmang thei a nita ding a nih.

HLS General Body meet le election nei
CCPUR: August 13, 2015 khan Rengkai Community Hall, Rengkai, CCPur­ah Hmar Literature Society (HLS) Manipur General Body meet­cum­General Election nei a nih.
    
Session khatna Pu Joseph Lalrothang, Vice Chairman, HLS in inkhawm a keihruoi a, Pu J.C. Chongkholien, Chief of Rengkai in hun a hawng a, Rev. Rosung Sinate in tawngtainain hun a hawng. Hi zo hin Secretary le Finance Secretary haia inthawk report ngaithlak a ni a; member han Membership chungchang, Awards chungchang le Hmar Literary & Vernacular Committee, Imphal chungthu hai an hriltlang.

Session hnina­ah election nei a ni a, hi huna hin Hmar Christian Leaders’ Forum inrawinain kum 2015­2020 inkar sunga HLS thuoitu ding thlangna nei a ni a, Executive member ding mi 15 thlang an nih. Executive member dinga thlang hai hin August 15, 2015 zingkar khin Office Bearer (OB) ding insiem an tih.

Seminar/Career Counselling
CCPUR: ZSP GHQ huoihawtnain zani 11:30AM khan Zogal Memorial Hall Complex, Zoveng­ah “Seminar on higher education­cum­Career Councelling­2015” nei a ni a, hi huna hin resource person in Ginzamang, Asst. Professor, CCPur Govt. College; Ms Mannuamching, MCS, CEO/ADCC le Chinlunthang, President, UZO/GHQ  hai an thang a. Topic tum tum­ “The emerging trends of education the past, present and future with special referenes to Zou Tribe” ;  “My Struggle” ti  le “Who am I?, What am I? & What is my capacity? ti thupui hai hmangin thu an hril tawl. Tum tha tak nei a pawimaw thu, harsatna tuor hmasa lo miropui an um ngainaw thu hai hrilin student hai an infui.

ZOREC in hma an lak pei
CCPUR: Zomi Relief Committee (ZOREC) chun hma an lak pei a, Manipur le Myanmar a tuilien le mimkei leia harsatna tuor hai thangpuina dingin Rs. 38,506 an hmu tah. Mi tu khawm mani phal ang tawk tawk thangpuina pe pei dingin ZOREC chun ngenna a siem.

Freshers meet an hmang
CCPUR: SSPP CCPur College Unit chun zanikhan College Room No. 3 ah Social Freshers Meet­2015 an hmang. Hi huna hin M. Gouzamang Guite, EM, ADC; CT Lian Guite, MDC; G. Thangkhosuanmung Guite, EM/ADCC le SSPP Jt. HQ. thuoitu hai chu special invitees in an thang. Special Invitees hai chun inchuklai hai chu theitawpa  lekha inchuk dingin an infui.  Freshers Meet hmangna hi Student body tum tum Zillai, HSA, TKSU, ZSP, MZP le KZP thuoituhai khawmin an uop.

Headline
PM in final Accord ziek huna state sawrkar hung hril ngei a mi tiem;
August 15 chenah State sawrkarin Bill thar pasi hman naw nih: O.Ibobi Singh
IMPHAL: Zanita Patroits  Day hmang zova CM O.Ibobi Singh in Imphal­a Chanchinbumihai an hmupuina a chun, New Delhi­ah fein Prime Minister Narendra Modi, U nion Home Minister Rajnath Singh le India sawrkar le NSCN(IM) inbieknaa India sawrkar Interlocutor Ravindra Narayan Ravi hai an hmupui thu le PM leh darkar khat le a chanve zet Naga Peace Accord ziek thuah inbiekna an nei a; PM chun Naga Peace Accord zieka um hi a framework chau a la ni a, final Accord ziek a ni huna chun lo thei lovin ama le state sawrkar a hung hril ngei ngei ding thu a mi tiem tiin a hril.
            
Chun, JCILPS in ILPS chungchanga Bill thar August 15, 2015 liem hma ngeia Special Assembly Session kova pasi dinga an ngen hi state sawrkar chun technical ground leiin August 15, 2015 liem hma chun a pasi theinaw ding a nih tiin O.Ibobi Singh chun a hril. Assembly Special Session kona ding hin Governor remtina a ngai bakah tulai tak hin chawl a tam a, legal experts, Manipur Bar Association, High Court Bar Association, Pawl dang dang le mithiem dang dang hai inrawnpui an tul a, ILP thua Draft Bill hi hmawsaruma thaw el chi a ninaw lei a nih. State sawrkar chun Draft Bill thar hi a ngaipawimaw hle a, pasi vat a nuom a, thil a hung fel deu pha leh nitinin JCILPS thuoituhai leh khawm inrawntuona um thei tang a tih tiin O.Ibobi Singh chun a hril.

JCILPS in darkar 12 Public Curfew
IMPHAL: Joint Committee on Inner Line Permit System (JCILPS) chun Inner Line Permit  System (ILPS) annawleh an angpui dan hmang dinga nawrnain Aug. 14, 2015, 4AM­4PM inkar sung Manipur­ah Public Curfew a thaw ding thu an puong. Public Curfew hin Media, medical, nurses, sakhuona thil, power le Water supply hai chu huom naw nih tiin JCILPS chun an puong a, mipui hai chu public curfew sunga invak suok lo dingin an ngen.

Patriots Day ursun taka inser
IMPHAL: Zanikhan Manipur hmun tum tum haiah Patriots Day a vawi 124­na ursun taka inser a nih. Zani zing dar 8 a Hicham Yaichampat, Moirangkhom a Memorial sites le Complex of  Thangal General Temple, Palace Compound a Patriots Day hmangnaa chun CM O.Ibobi Singh, Dy. CM Gaikhangam, Manipur Assembly Speaker Th. Lokeshwar, Ministers le MLAs hai khawm an thang. State level in B.T. Park a khawm state sawrkarin Patriots Day a huoihawt. Kum 1891 a Anglo­Manipuri War a ei ram le hnam ta dinga lo martyr tahai inzanain an thlalak haiah par inhlan a nih. Hi ni le inzawm hin blood donation camp hmun hran h ranah pawl tum tum han an huoihawt.

ILP thuah inbieknaah relfel um lo
IMPHAL: ILP thua state sawrkar le JCILPS thuoitu han zani hmasa zana inbiekna an sunzawm  nawka chun thil rel fel a um nawk thei nawh. Inbiekna le i nrawntuona chu State sawrkar hmalak dan dungzuia nei le neinaw a hung ni ding a nih tiin JCILPS Convenor incharge Khomdram Ratan chun inbiekna an neizo hnunga Chanchinbumihai an hmupui huna a hril.

PLA cadre 1 man
IMPHAL: 22 Assam Rifles hai chun zanikhan Serou hmuna PLA cadre pakhat No. 1295, SS Pvt.  Thokchom Ibobi @ Inakkhunba @ Basanta s/o (L) Lukho of Serou Awang Leikai chu an man a, Sugnu Police Station­ah an peklut niin PRO, Assam Rifles thusuok chun a hril.

Maku le Chassad lampui siemthatna sin
IMPHAL: Ukhrul District­a Kamjong Sub­Division­a Maku le Chassad inkar lampui ruosur leia mimkei hmun tam taka a tlung leia motora infepaw thei lova a um leiin 44 Assam Rifles le tuolsungmi thangruol han sun le zan chawl lovin lampui sie hai siemthatna sin an thaw. Lampui siet lei hin Chassad le Imphal inkara chun motor an fe theinaw a nih.

Original Service Book pelut dingin
IMPHAL: Teachers/Lecturers tuta hmaa an service Book Photostate copies pelut tahai chu   Autust 28, 2015 chena an Original Service Book hai Directorate of Eduation (S), Govt. of Manipur a pelut dingin Director of Education (S), Govt. of Manipur chun inhriettirna a siem. Hi thil hi Selection Grade Scale siemna ding le inzawm a nih.

TN CM in zangnadawmna Rs. 10 lakh
CHENNAI: June 8, 2015 a Coast Guard Donier Aircraft CG791 tuoksiet tuok leia thina tuok mi 3 sunghai kuomah Tamil Nadu CM J. Jayalalitha chun zangnadawmna  Rs. 10 lakh seng cheque  zani hmasa khan an hlan. Hi Vuongna tuoksieta thina tuokhai chu M.K. Soni, Deputy Commissioner, Subash Suresh, Deputy Commandant le Vidyasagar hai an nih. Hi vuongna tuoksiet kawidar le mithiruong hai hi July 10, 2015 khan Chidambaram Coast, Cuddalore hmuna hmu a nih.

PM UAE ah an zin ding
NEW DELHI: Prime Minister Narendra Modi chu UAE a ni 2 sung cham dingin August 16, 2015 khin New Delhi suoksan a tih. Kum 34 zet liemta hnunga India PM UAE a inzin nawk hmasa tak a ni ding a nih. PM Modi UAE a an zin hin economic tieng hmasawnna nasa tak a hung intlun le an ram pahnihai inlaichinna nasa taqka a hung siem that beisei a nih.

Rs. 10 lakh le thil hlu inruk hmang
KOTA: Zani hmasa zan khan tlangval pathum, kum 19, 22 le 28 mi vel  dinga ring hai chun Rajasthan State a Kota district sunga R.K. Nagar an ti hmuna Mazhar Khan (24) chengna in an rawk a, pawisafai Rs. 10 lakh, rangkachak le tangkaruo (silver) a siem incheina thil cheng tam tak manhu an lakhmang hnungin an fe hmang. In neitu Mazhar Khan hi manin hruiin a khum leh an khitde a, chu hnunga a In hi an rawk niin Police chun an hril.

Parliament Monsoon Session khar
NEW DELHI: July 21, 2015 a Parliament Monsoon Session tana um chu zanikhan tiemchin um lovin khar a lo ni tah. Parliament Monsoon Session nei sung hin Selkaltu Pawl han buoina an siem zing leiin rorelna tluong taka nei thei a ninaw a, Rajya Sabha chun Good and Service Tax (GST) Bill khawm an pasi hman nawh.

Maggi khapna Bombay HC in a hlip
MUMBAI: Food Safety and Standards Authority of India (FSSAI) in India ram pumpui huopa  Maggi noodles zawr a khapna chu zanikhan Bombay High Court in a hlip. Maggi noodles test­na hai chu a test tu ding an ninaw a, accredited laboratories 3, Punjab, Hyderabad le Jaipur haia test ding a ni a, Nestle Company in hieng laboratory haia hin test thawng a ta, a tha tawka ngai a ni chun Maggi noodles siem sunzawm thei nawk an tih tiin Bombay High Court chun a rel.

Hero Cycles Chairman a thi
LUDHIANA:  Hero Cycles Chairman, Om Prakash Munjal chu kum 86 mi niin zani zingkar khan Heart Institute of Dayanand Medical College & Hospital ah a thi a, a ruong chu vawisun zantieng dar 5 hin Model Town Extension Cremation Ground, Ludhiana, Punjab­ah ropui taka raw liem ning a tih. India ram pumpuia Cycle industry hai chun Om Prakash Munjal thi hi an sun thu an puong.

Eco Tourism Award inhlan
ITANAGAR: Gill India Group chun zani hmasa khan Taj Palace, New Delhi­ah 9th Annual Today’s Traveller Award, 2015 semna a nei a, Arunachal Pradesh chu “Best Eco Tourism  Award’ an hlan. Arunachal Pradesh hi  Bhutan, China le Myanmar han an inhuolkhum a ni a, khuolzinmihai ta dingin leilung mawina chi hran hran en ding tam tak a um a nih.

UP a in chimin mi 9 a del hlum
GANDHINAGAR: Zani hmasa zan khan Uttar Pradesh a Banda district sunga Gandhinagar hmuna in pakhat a chim leiin mi 9 a del hlum niin Police chun an hril. Mi 7 a hmuna an thi a, mi 2 Hospital tlungpui an ni hnungin an thi. Mi 2 na takin an hliem. In chim hi a hlui taluo leia chim nia hril a nih.

Thuomhnaw phur thei zat kg. 25
MUMBAI: Air India (AI) chun passengers han Vuongnaa thuomhnaw an phur thei zat a sukpung. A hma chun kg. 15 chen phur thei a ni hlak a, August 12, 2015 a inthawk February 7, 2016 inkar sung kg. 25 chena rik phur thei dingin a siem thar. Naute hai khawm kg. 10 chen thuomhnaw a thlawnin chawi thei an tih tiin AI thusuok chun a hril.

Baghdad­a bomb puokah mi 54 an thi
BAGHDAD:  Zani zingkar inhma tak khan Iraq khawpui Baghdad huop sunga Sadr City an ti hmuna Jameda Market ah bomb hrat takel a puok a, mi 54 an thi a, midang 86 an hliem niin Police thusuok chun a hril. Bomb hi Truck pakhat sunga puok niin Police chun an hril. Hliemhai hi Hospital pathum haiah enkawl an nih.
---------------------------------------------------------------------------------------------------------------------
VAWISUN THUPUI
Pathien i nei taphawt chun khawvel a hne pei sih a; hi hi khawvel hnea ngamna chu a nih, ei ringna hi. ~ 1 Johan 5:4

Editorial: Hriselna le bawrsawmna

Hriselna hlutzie chu a tlangpuiin ei hriet seng awm ie. Amiruokchu, hriselna hlut zie hi mi hrisel lo, mi bawrsawm ei ti hai hin ei hrietchieng zuol bik ring a um. Mihriem hai hi ei inang naw hle a, thenkhat  ei hrisel em em laiin thenkhat ei bawrsawm em em ve thung. Pasal pakhat chun khuo ka hrieta inthawk vawikhat el khawm ka la hritlang naw a, luna, kawngna, pang kham, khawsik le natna dang dang hai ka lan vawi ngai der nawh a tih. Khawpin tam a hriet nawh an ti ang deuin hi mipa hin chu hriselna hlutzie a hriet ring a um nawh. Hriselna hin a mi sukhlimtu, mi sukhuoitu, mi sukhmelthatu, lungruolna, le varna chenin hriselna hin an tlun a nih.
    
Mi hrisel naw ta ding chun hlim thei a ninaw a, hmatieng hun beisei ding a tlawm bik hle. Hiengang khawpa hriselna a pawimaw lai hin ei hriselna dingin tum a pawimaw tak ti ei ngaituo thiem naw rawp hlak. Ei hriselna ding chun Doctor Specialist­hai chenin mani seng hi ei pawimaw hle a nih. Ei hrisel lem theina dingin thaw ding le hriet ding pawimaw tam tak ei nei a, chuonghai laia thenkhat hai chu, hawp le hmuom insum, fak le dawn insuma fimkhur ding,  insawizawi a, a hun le a hmun hriet, invawngfai le a dang dang hai an nih.
    
Hawp, hmuom, fak le dawn hi  insum an tak hle. Naupanghai chau ni loin, nu tling le patling ei tihai khawmin insum hi harsa ei ti a, Doctors han fak lo ding, dawn lo ding, hmuom lo dinga an tihai hi ei insum zo naw leiin ei hrisel ding angin ei hrisel naw a, ei fak le dawn, ei hmuom le hawp thenkhat hi chu hrivawiin ei nei pha hlak. Doctors han fak lo ding, dawn lo ding le hmuom lo ding an tihai hi hang bansan hmak inla chu tuta nek hin ei hrisel lem ngei ring a um.
    
Ei taksa le lungril sukhriselna dingin exercise lak ei taima tawk nawh. Sap le Vai ei ti hai hin an taksa sukhrisela, sukmawina dingin zingkar le zanting exercise lak an taima hle. Ei ni rawi chu exercise lak hi ei ngaipawimaw naw hle. Exercise lak nek chun zingkar zal ei hawmthaw lem. Zohnathlakhai lai zingkara insawizawia fe hlak hi mi 100 ah pahni ei tling phak dim chu maw? Hrisel ei nuom, sienkhawm insawizawi nekin zal le um mei mei ei thlang lem. Ei insawizawi ngai naw taluo leiin ei hmel khawm hi a ap bik niin an lang. Insawizawi ei peinaw hi ei bawrsawmna pakhat niin an lang.
    
Hriselna dinga kawngro suttu tak pakhat chu fak le dawn hi a nih. Zingkar thingpui dawn nekin tuisik dawn a tha lem tiin doctors han an hril. Thudik a nizie chu haptakar khat sung thingpui nekin tuisik dawnzie la, haptkar khat zova a thatzie hung hrein hung inlang ngei a tih.  Ei duzawng ni lovin, ei taksa mamaw chau fain dawn inla chu taksa hratna chau ni lovin hriselna mi pe ngei a tih.
            
Fak le dawn thua khawm a hun le a hmun hriet a pawimaw. Fak hun bik nei lo hai chu mi hrisel vek vawk an ni ngai naw a, an phing an sawisel hlak. Khawl khawm a hun taka a Oil nalnaw chun a se hlak. Mihriem phingpui khawm chuongang tho chu a nih. Hunbi bik nei lova bu fa hai chun an phing an sawisel hlak. Hi lei hi a ni dim, eini laia phingpui na ei tam bik em em el hi! Natna hrik hnawt hmangna dingin insukfai a tul hle bawk. Taksa, sil le bil, puonthuo le insung hai chau ni lovin mani in bul sukfai hi thaw ngei ngei ding a nih. Natna hri laka invengna tha tak pakhat a nih. Bal le bawrsawmna hi an zawm tlat a nih. Faina ruok chu hriselna a nih.


Don't Miss
© all rights reserved
made with by Simon L Infimate