Hmasawnna Thar | 13 August, 2015

Tuolsung

EM hai portfolio ding sem

CCPur: Mr Langkhanpau Guite, Chairman, ADC/CCPur chun zani zantieng 1:00PM khan a office Chamber­ah  Executive Member (Ems) hai meeting a neipui a. Hi huna hin an portfolio ding hai a sem tawl bakah sin tha lema thaw dan ding hai an hriltlang. Hi dungzui hin Mr Lalhossan, Vice Chairman chun Medical, Arts & Culture, Ferries lending; M. Gouzamang Guite in Education, Industries le Town chel a tih. Genneikhup in PWD, MI, Cooperation; Zamneiching in Vety & AH, Social Welfare, CAF & PD; Ngamhao Touthang in Horti & Soil Conservation, Transport & PHED le G. Thangkhosuanmung in Agriculture, SC & Technology le Power chel a tih.

Ni 5 sinthawna ding sanction

CCPur: Chairman DRDA le Executive Director, DRDA chun MGNREGS 2015­16 1st Phase­a Block 7 haia Job Card holder hai ta dinga ni 5 sung sinthawna ding sum a sanctioned. Kum 2015­16 a inthawk Job Card holder hai nikhat hlaw chu Rs. 190/­ pei ni tang a tih. 2014­15 khan Rs. 175/­ a ni. Ni 5 sin thawna dinga  sum sanctioned­a um Block 7 hai chu Saikot block­a khuo 35, Sangaikot block­a khuo 103, Vangai block­a khuo 35, Singngat block­a khua 96, Tipaimukh block ah khuo 18, Lamka block ah khuo 60 le Thanlon block ah khuo 64 an nih. Block 3­ Henglep block, Tuibuong block le Samulamlan block haia Ni 5 sin thawna ding sum sanctioned a la ni nawh.

Hmar film thar tlangzar ding

CCPur: Pu Daniel Songate in a buotsai le a produced “Kumtluong Par” ti Hmar film chu August 29, 2015 khin Shillong hmuna tlangzar (release) ning a tih. A film hi Shillong­a Hmar Arasi Picture Production han thiem taka an inchang a ni a, a changtu hai chu Tv. Immanuel L.  Zate le Nk. Ellery Lalengvar Sungte hai an nih.

Students Science Seminar

CCPur: ZEO/CCPur hnuoia Science Dept. huoihawtnain zani 10:30AM khan Synod Hall, IB  Road, CCPUr­ah District Level Students Science Seminar a vawi 37­na nei a nih. Hi huna hin St Mary school a inthawk student 3, Don Bosco Hr Sec school 3, JNV/Tuinom 2, Grace Academy 2 le Dr S.Radhakhrishnan Foundation school a inthawk 2 an thang. Zantieng lawmman semna ZEO, CCPur in a nei nghal. 1st Letginthang Baite (class X) of St Mary H/S niin lawmman Rs.1300 +Certificate, 2nd Khoithien (class X) of Donboso Hr Sec School niin lawmman Rs.1200/+ Certificate a dawng. Hieng mi 2 hai hi Imphal ah CCPur representative in State Level Sc Seminar nei pha va thang an tih. Consolation Prize mi 4 hai kuomah Rs.500 + Certificate le mi 4 kuomah participant certificate le laawmman Rs.300 seng pek an nih.

Workshop on Human Rights

CCPur: Zani 10:00AM khan Relief & Development Department, EAC huoihawtnain EAC  Council Hall, Rengkai­ah “Workshop on Youth & Human Right” nei a ni a, programme hi  Simon L. Hrangchal, Director, Relief & Devpt. Dept. EAC in tawngtainain a hawng. Technical Session­ah George Munluo chun “Youth & Human Rights” ti thupui hmangin thu a hril a, Rev. Huolthangsei Thiek, Exe­Director, EAC in lawm thuhrilna a nei.

Lions Club in thingkak an phun

CCPur: Lions Club CCPur Greater (International Dist­322D) chun zani 9:30AM khan District Hospital­ah thingkak an phun. Thingkak phun hai hi N. Lhungdim in a tuok/thawlawm a ni a, Lions member han thingkak pakhat seng an phun. Thingkak phunna hi Dr Son Gou Kham, MS/ Dist. Hospital in a hawng.

Thisen pe dinga ngen

CCPur: Vawisuna District Hospital, Churachandpur hmuna Blood Donation Camp um dinga hin Nehru Yuva Kendra, CCPur hnuoia Clubs le Mahila Mandals ni lai mek le lo ni ta hlak hai chu Blood Donation Camp­ah thanga, an thisen pe dingin District Youth Coordinator, Nehru Yuva Kendra, CCPur chun ngenna a siem.

Tuilien le mimkei leia harsatna tuor hai thangpuina pek thei

CCPur: Manipur le Myanmar ram haia tuilien le mimkei leia harsatna tuortu hai ta dinga thangpuina pe nuom hmun dang le ram danga um hai ta dingin Zomi Human Rights Foundation SBI A/C No. 30730152664, CCPur Branch, IFSC Code: SBIN0000618 chu hmang thei a ni thu  Zomi Relief Committee (ZoREC) chun zanikhan Chanchinbumihai kuoma an hril. Charity Musical Road Show nei huna khan Rs. 16605/­ hmu a ni a, ZoREC kuta inhlan a nih.

   

ZoREC report dungzuiin Myanmar a tuilienin thil a suksiet le Lanva le Tuithapui vadungin thil a suksiet hai an lakkhawm zing a, Sangaikot area a M. Khaukual khaw hnuoi tieng tuilienin leilak 15 a suksiet a, Lo hactres 329, agriculture land 125 hactare a suksiet bakah In 11 a suksiet vawng a, In 243 a suksiet met niin ZoREC report chun a hril. Chun, Joumuol khuoa mimkei tlung leiin mi 9 an thi a, zani chen khan mi 5 hai chu hmu an la ni nawh.

   

Myanmar rama Chin state a tuilien in lampui hmun 5­ah a suksiet leiin khuo iemanizat hai chu hmundang le infepaw thei lovin an um a, In 200 chuong le leilak 11 a suksiet a, tuilien leiin khuo 10 chuong hai chu hmun danga an insawn a, Lo le thlai chingna ram lien tak tuiin a chimsiet bawk a, report lakkhawm zing a la nih tiin ZoREC chun reporter hai kuoma an hril.

DC in thangpuina semtu ding hai a vai liem

CCPur: Mr Lunminthang Haokip, IAS/DC, CCPur chun zani 9:00AM khan Joumuol le Sugnu area sunga mimkei le tuilien tuor hai kuoma thangpuina sem dinga suok ding YPA GHQ inrawinain Lamka le New Lamka Block YPA hai Hiangtam Lamka YPA GHQ Hall tuolah a vailiem.

    

Chun, KIC President Thangjang Haokip khawmin zani 10:30AM khan KKL Complex, IB Road­ah Joumuol le Sugnu area a mimkei le tuilien tuor hai kuoma thangpuina thil semtu ding KKL Gen. HQ thuoituhai a vai liem.

Advocacy & Networking meeting nei

CCPur: Zani 10:30AM khan IGSSS (Indo­Global Social Service Society), CCPur huoihawtnain   Sumkong Kaimun, Tuibong­ah Advocacy and Networking meeting nei a ni a, hi huna hin SEDO (Social Economic Development Organization), LASTO (Leimatak Area Social Transmission Organization), RUSS (Rural Social Service Society) le KAYDF (Khousabung Area Youth Development Forum) haia inthawk member 21 an thang a, Henglep Area sunga development thaw dan ding le thu pawimaw tum tum an hriltlang.

State sawrkar le JCILPS palai han inbiekna an sunzawm; Student thuoitu 7 insuo an nih

Imphal: Zani zantieng dar 3:30 vela inthawk khan Chief Minister Office, Imphal­ah CM O.Ibobi Singh inrawina hnuoiah State sawrkar palaihai le JCILPS thuoitu 20 hai chun inbiekna an sunzawm nawk. Inbiekna hi ILPS chungthua bill thar siemna ding le inzawma an sunzawm nawk a nih. HI thu ei ziek chena hin inbiekna a la fe pei leiin an inbiekna result hriet thei a la ni nawh.

            

ILPS le inzawma student thuoitu 7 mana u m le Sajiwa Central Jail­a intang hai chu zani sun dar 11 vel khan insuo an nih. Lungin a inthawka insuo a um hai chu Th. Suresh, Advisor, AMSU; K. Dhanabir, Vice President, AMSU HQ; Th.Kavichandra,President, AMSU, Bishnupur Branch; L. Robindro, Secretary, AMSU, Bishnupur Branch; S. Somakanta, Ex­President, AMSU, Imphal East; K. Siming, Organisation Secretary, AMSU, Bishnupur Branch le K. Premakumar,  Finance Secretary, AMSU, Bishnupur Branch hai an nih.

Th. Muivah Dimapur a hungtlung tah

Imphal: NSCN(IM) General Secretary, Thuingaleng Muivah chu zanikhan Dimapur, Nagaland a hungtlung a, ropui taka lo hmuok a nih. Naga Peace Accord ziek hnunga Nagaland a hung sir nawkna hmasa tak a nih. Naga Peace Accord hi a final­na a la ninaw a, framework Agreement chau a la nih. Final Peace Accord ziek hmain Naga hnam sunga pawl tum tum thuoituhai rawn vawng ning an tih. Naga­hai chu India harsatna hrietthiempui ding le thenum state hai rights inza dingin Th. Muivah chun ngenna a siem. Th. Muivah hi August 14, 2015 nia Camp Hebron, Dimapur­a 69th Naga Indepdendence Day hmangna huna thangin thuhrilna a nei ding a nih. Hi huna thang ding hin Manipur, Assam le Arunachal Pradesh haia Naga hnam hai khawm fiel vawng an nih.

BJP Manipur in PM kuomah Memorandum

Imphal: Naga Peace Accord le inzawmin BJP Manipur chun Prime Minister Narendra Modi kuomah Memorandum an pek bakah New Delhi­a an cham sungin PM Narendra Modi, Union Home Minister Rajnath Singh le Indo­Naga Peace talk Interlocutor, R.N. Ravi hai an inhmupui a, chu huna chun Naga Peace Accord in Manipur ram a tawksa naw ding thu an mi lo hril tiin zanita BJP Office, Imphal hmuna Chanchinbumihai an hmupui huna Th. Chaoba, President, BJP Manipur chun a hril.

August 15 ah KCP(M) in public curfew

Imphal: Kangleipak Communist Party (Military Affairs) chun Independence Day hmang ding dodalnain August 15, 2015 zingkar dar 6 a inthawk zantieng dar 6 chen, darkar 12 sung Public Curfew an thaw ding thu an puonglang. Mipuihai chu Independence Day hmangnaa thang lo dingin KCP(M) chun ngenna an siem.

Patriots Day hmang ding

Imphal: Vawisun hin Manipur pumpuiah Patriots Day ursun taka hmang ning a tih. State Level chun Patriots Day hi zantieng 4PM in B.T. Park, Imphal­ah hmang ning a tih. Patriots Day hmangtu dinghai po po Manipur Governor, CM le Manipur Legislative Assembly Speaker han ditsakna chibai an  buk.

IPS/MPS Officer thenkhat sin thlakthleng

Imphal: Manipur sawrkar chun IPS/MPS Officers thenkhat hai sin chel a thlakthleng. Hi dungzui hin Thangkhanlal Guite, IPS chu IGP Zone­III, S. Manglemjao, IPS chu IGP (TRG/HR/RTI) le  IGP (Ops/AP), Luther Nangsha, MPS chu Deputy CO, IRB, S. Somorjit Singh, MPS chu Deputy CO, 7MR le L. Ragui, MPS, Additional SP, Tamenglong chu SP in­charge, Tamenglong sin chel dinga ruot an nih.

KCP(P) khawmin General Strike

Imphal: KCP(Poirei) khawmin August 14, 2015 zanrila inthawk August 15, 2015 zanrila inthawk August 15, 2015 zantieng dar 6 chen, darkar 12 sung General Strike an thaw ve ding thu an puonglang. Chun, vawisuna Patriots Day hmangtu dinghai po po khawm chibai an buk thu an puonglang.

Inbieknaah Zoramthanga le B.K. Hrangkhawl

Aizawl: National Liberation Front of Tripura (NLFT) chun sawrkar thlungpui le final talk an nei huna TNV thuoitu hlui B.K. Hrangkhawl le kei (Zoramthanga, Mizoram CM hlui) hai chu interlocutor in thang rawhai seh tiin NLFT chun Ministry of Home Affairs kuomah ngenna an siem tiin Zoramthanga chun a hril. Zoramthanga hi sawrkar thlungpui le NSCN (IM) inbieknaa khawm an rawl ve a nih. Inbiekna puipa taka inrawl ka ninaw a, inbiekna neihai inkarah inringzotuona a um theina dinga inrawl ve ka nih tiin zanikhan Zoramthanga chun a hril.

Helicopter tuoksieta thihai ruong

Itanagar: Arunachal Pradesh a Pawan Hans Helicopter tuoksieta thi hai ruong chu zanikhan High Altitute Warfare School a Commandos han tlangram kilkhawrah an hmu tah. Thina tuokhai chu Tirap Deputy Commissioner, Kamlesh Kumar Joshi, Pilots 2 M.S. Brar le Rajeev Hoskote hai anni a, an ruong hi Helicopter bawk hmangin Khonsa ah phurtlung ning an tih tiin Chief  Secretary, Ramesh Negi chun a hril. Mithiruonghai hi tuoksiet an tuoka inthawka ni 8 hnunga hmu an nih. Helicopter kawidar chu August 10, 2015 khan Sangliam khuo a inthawka Km. 4­5 vela hlaa ramhnuoi pik tak laia hmu a nih.

JV Pudaite ruong vuiliem

Aizawl: India International Friendship Society, New Delhi in a pek Vijay Shree Award lo dawng tah, Sielmat High School, ACE School, CCPur le Mission High School, Kangpokpi, haia Principal sin lo chel hlak Pu JV Pudaite chu Aug. 12, 2015, 2:40AM vel khan Chatuon ram a lo inlawi tah. A ruong hi zanikhan vuiliem a nih.

Aadhar Card lo theilo nilo dingin

New Delhi: August 11, 2015 khan  Supreme Court chun India khuo le tuihai ta dingin Aadhar Card hi lo thei lova nei (Mandatory) ding a ni nawh tiin a rel. Hi thu hi an rang thei anga print media le electronic media hai hmanga inhriettir dingin Supreme Court, Constitution  Bench chun sawrkar thlungpui an hriettir.

Lungin sungah pasal 1 that a nih

New Delhi: Zani hmasa zan khan Tihar Jail a intang le a chungthu rel lai mek Dipak an ti chu Tihar Jail­a intang dang han an vuok hlum. Dipak hi lungin a intang dang pasal 4 han thirtluon hmanga an vuok a ni a, mi vaw hlumtuhai chunga hin case registered a nih.

Tata Sumo eksidenah mi 10 an thi

Srinagar: Zani hmasa khan Jammu & Kashmir a Sadhna Top le Karnahkupwara Road inkarah Tata Sumo a eksiden a, lamthlang tieng an hlum thla a, a Driver thangsain mi 10 an thi. Tata Sumo hi Tangdar a inthawka Kupwara pana fe niin ei thu dawngna chun a hril.

Pakistan in Ceasefire vawi 192 a bawsiet tah

New Delhi: January 1, 2015 a inthawk July 26, 2015 chen khan Jammu and Kashmir a International border ah Pakistan in Ceasefire vawi 192 a bawsiet ta a, hi ceasefire bawsietna leia Pakistan sipai han J&K an hung kapnaah civil mi 3 le BSF constable 1 an thi a, mi 22 an hliem pha tiin Union Minister of state for Home Haribhai Parathibhai Chaudhary chun zani hmasa khan Lok Sabha an hriettir. Sawrkar thlungpui chun hi thil le inzawma thina tuok sunghai chu zangnadawmna Rs. 5,00,000 pei pek dingin a rel bawk.

China mi pahni man an nih

Kolkata: August 11, 2015 khan Siliguri Police han China mi pahni, Qiv Qinghua (36) le Cai June (30) hai chu Siliguri, West Bengal ah Red Sandalwood Rs. 15 lakh manhu leh an man. Chian mi pahni hai hi SUV Car­a Delhi pan an tum laia man an nih. Mana um China mi hai hi Fujian Province a cheng, saptawng le Vai tawng an hriet naw leiin inbiekpui an harsa a, tawng inlettu ruoi a tul tiin Siliguri Police thusuok chun a hril.

Sawrkar thawktu nuhmei 3.37 lakh an um

New Delhi: Sawrkar thlungpui hnuoia ministries le Departments hran hran haiah sawrkar thawktu nuhmei 3.37 lakh an um tiin zanikhan Union Minister of state for personnel Dr Jitendra  Singh chun Lok Sabha an hriettir. Hi thil hi March 31, 2011 chena sawrkar record dungzuia mi a nih tiin Minister chun a hril. Sawrkar thlungpui hnuoia thawktu um po po chu nuoi 48 niin Jitendra Singh hin a hril bawk.

LeT cadre ni dinga ringhla man

Guwahati: Lashkar­e­Toiba (LeT) cadre ni dinga ringhla Md. Rakib Ali alias Raju chu a chengna in, Baksa district, Assam sunga Tamulpur ah hmu niin Senior Special Branch (SB) official thusuok chun a hril. Hi lei hin Assam state sunga Security Forces hai chu inralringtir an nih. Ali hin student’s Islamic Movement of India (SIMI) a zawm a, kum 2001 a SIMI sawrkarin a ban hnunga LeT hi a zawm nia hril a nih.

Keite’n nuhmei naupang a se hlum

Nashik: Zani hmasa zantieng khan Niphad district a Karanjgaon­Shingave  Shivar khuo a an chengna In bulah Keite’n nuhmei naupang kum 6 mi a se hlum. Ni 5 liemta sunga Keite’n hi district a mi pahni an se hlumna a nih. Autust 8, 2015 khawm khan pasal naupang kum 10 mi chu Chapadgaon hmuna Keite’n a lo se hlum ta bawk.

Oct. 12 in GHADC election

Shillong: Hungtlung ding October 12, 2015 khin Garo Hills Autonomous District Council (GHADC) Election nei dingin Meghalaya sawrkar chun a puong. A ngir nuom han September 21, 2015 chenin nomination paper file thei an ta, Sept. 24, 2015 chenin inhnukdawk nuom han inhnukdawk thei an ta, vote thlakna October 15, 2015 in um a tih.

Senior Military officers 45 ngir an tum

Yangon: Myanmar a senor Military officer, an sina inthawka pension tahai laia mi 45 hai chun November 5, 2015 a Myanmar General election hung  um dinga khin tuta sawrkarna cheltu Union Solidarity and Development Party (USDP) ticket a ngir ve an tum thu an hril. Election a ngir tum hai hi Lt. General Major General a pension tahnung an ni tawl.

---------------------------------------------------------------------------------------------------------------------

VAWISUN THUPUI

Thlemna tuor hram hramtu chu a hamtha, fiea a um phaleh hringna lallukhum Lalpain ama hmangaituhai kuoma a tiem chu a hmu ding a ni si.  ­Jakob 1:12

Editorial

Muivah thuhril dingin Mipui ngaiven a hlaw

NSCN(IM) chun kum tin Naga Independence Day an hmang hlak ang bawkin August 14, 2015 hin Camp Hebron hmuna an hmang nawk ding a nih. Hi taka thang ding hin NSCN(IM) General Secretary Thuingaleng Muivah khawm Dimapur, Nagaland a tlung tah.Naga Independence Day hi kum dang hai khan chu ngaiven a hlaw bek nawh. Amiruokchu, India sawrkar le NSCN(IM) han August 3, 2015 a Peace Accord ziek, sienkhawm tuchena Peace Accord­a thu inziek hai mipui hriet dinga puonglang a la ninaw leiin hi huna hin Th. Muiva chun iemani tawk 69th Naga Independence Day hmangna huna hin a puonglang beisei a ni leiin India hmarsak biela Greater Nagaland ngenna in a tawk state hieng Arunachal Pradesh, Assam le Manipur mipui hai chun an ngaiven nasa hle a, a bik takin NSCN(IM) Greater Nagaland an ngenna in a tawk lienna tak Manipur mipui chun an ngaiven nasa zuol hle a nih.

   

Camp Hebron hi Dimapur khawpuia inthawk km. 35 a hla a ni a, Naga Independence Day hmangna ding le inzawm hin thil iengkim ruot le siem fel a nita bakah NSCN (IM) thuoitu hai chun Assam, Manipur le Arunachal Pradesh­a cheng Naga hnam hai chu Naga Independence Day hmangnaa thang dinga fielna an pek vawng ta bawk a nih. Naga Peace Accord hi ‘framework’ (a tlangpui) chau a la nih tiin sawrkar thlungpuiin hril sienkhawm iengthu tak am a um ding ti hi mitin hriet chak a ni a, Manipur mipui hai lem chun tulaia an nakawr an sitna tak a nih ti inla ei hril suol ring a um nawh. Manipur, Assam le Arunachal Pradesh sawrkar hai chun a sunga thu inziek hai kimchang taka pe dingin an lo ngen ta bawk a nih.

   

Naga Peace Accord chungthu hi PM Narendra Modi in August 15 a Independence Day nia thu a hrilnaa khawm an thangsatir ngei ring a ni bawk a nih. Naga Peace Accord a hin thenum state  Arunachal Pradesh, Manipur le Assam state hai khawidarna ding chu a lo thangnaw khawm a ni el thei a, tu chena an lang dana khawm hin state khawidar zawnga sawrkarin thil a thaw chu ring a um nawna chin a um. A san chu, hieng state pathum hai khawidar a ni vai chun State pathum haia hin mei a chawk ding a ni leiin Peace Accord zieka um hi party pahni (India sawrkar le NSCN­IM) ta dingin Peace Accord lo ni sienkhawm state pathum hai le Nagaland le India sawrkar ta ding chun Peace Accord a ni thei nawna ding chin a um tlat a nih. Naga Peace Accord hin State thedarna ding zawng thil a lo thang a, Naga Independence Day huna Th. Muivah in Naga Independence Day huna a puonglang a ni chun  ei ram buoina sumpuiin a tuom tanna ding ning a tih.

   

State khawidar si lova mania ro inrelna ding iemani tak an lungawi  na tawk Peace Accord­a hin a thang chu mi tam tak ring a nih. Chuong chu lo nita sienla eini Manipur­a Zohnathlak hai hi teh iem ei ngirhmun ning a ta leh!

   

Hieng laizing hin National Federation for New State huoihawtnain zani hmasa lai el khan Mavalankar Hall­ah ‘Perspective and Realisation on the Issue of Smaller States in India’ ti thupui hmangin seminar an buotsai a. Hi huna hin Organisation tum tum 8 lai an thang a, chu hai lai chun the All Bodo Students’ Union (ABSU), Kuki State Demand Committee, Bharatiya Gorkha Parisang, Indigenous People’s Front of Tripura, Joint Action Committee for Autonomous State (JACAS), Peoples Joint Action Committee for Bodoland Movement, Joint Action Committee of Dimaraji Movement le Vidharba Connect hai an thang a. August 30, 2015 chena smaller states siemna dinga sawrkar thlungpuiin remtina a neinaw chun nuorna chitum tum nei dingin an rel.

   

Tu taka Naga Peace Accord chu beiseina le lunghimawna inchawkpawl a nih. The Morung Express­a ideologue Asangba Tzudir in ngaidan a zieknaah Naga Peace Accord hi Ao tribal tienami a, putar pakhatin a tupa tap thlem tlainaa Thlapa pek dinga an tiem zing ang leh a tekhi. Naga hnam sunga helpawl group hran hran an um leiin NSCN(IM) le sawrkar thlungpuin Peace Accord an ziek hin Naga mi hai chengna bielah inremna le muongna thlungpui indik tak an tlun an beiseinaw thu mi tam takin an hril bawk.