Pu L Hlima hin a lungawinawna hai a hrila, mipui hai ta dinga sin a thawtha thei beiseina leiin Congress party zawm dingin June 7,2013 dai khan hnina a pek thu a hril a, amiruokchu November 11, 2014 khan an laklut chau thu a hril.
Pu L Hlima chun NC Hills a Constituency um hai laia mipui tamna hmuntaka thlangtling nisienkhawm iengkhawm portfolio an peknaw thu le Executive Member pangngai el nina an pekthu a hrila, kum 2013 a Haflong Town Committee a Chairman dinga a hnina khawm an hnawl thu tarlang in , ama aiin Council election a ahneban pa an ruot lem niin a hril bawk.
A lungawinawna tak pakhat a hril chu ruling party member ni bawk, Planning Board inthung huna a constituency ta dinga rawtna le ngenna a thelut hai hnawl pekin tlawmte chau an pawm pek niin a hril. Council in a mimal hmang dinga motor an pek sun khawm August 12 khan CEM order na in an lak kir pek nawk thu a hrilsa bawk a nih. Hieng hai popo lei hin Congress (I)-a a member nina chu an ban a nih tiin a hril.
