Responsive Ad Slot

ALMOST CHRISTIAN­PART II “Kawng khat I la bak” Mark 10:21

Sunday, August 23, 2015

/ Published by VIRTHLI
HT Sunday Sermon

~ Rev. Mansang Songate

Part I ah khan tlangval hausa roreltu chanchin tlangpui sermon naran angin ei ziek a. Tuta tum hin tlawm te’n Isu le Tlangval hausapa inbiekna a inthawka thil hmu thei tlanglawn hai hang hril nawk met in la. Chun, mihriem hringnun umzie indiktak hmuthei in a um bawka, ngaituo le sut tham a nih. Tlangval hausapa kha tulai ngirhmuna enin, ngirhmun tha, sum hau, in le lo det nei, mi inza kai, bengvar le nungchang tha tak a nih. Hma thlirna feltak nei a ni bawk. A fel emem na chu a thil nei hai ah innghat el lova, ‘Chatuon hringna’ zawng na chang a hriet kha a nih. A khat chaua a um chang a suk lungngai rawp hlak tu le suk beidawng hlaktu chu ‘Chatuon Hringna’ thu kha a nih. Hi hi tulaia mi inlar le hausa hmingthang (celebrity) hai ngirhmun ani bawk. An puotieng nun chu ‘hlim le inhawi hmel’, angna nei siin; an an lungril sung takah ‘ruokna’ (emptiness) le ‘beidawng rukna’ le tulaia mi tamtakin an invawi ‘stress’ le ‘depression’ an nei deu seng a. Iemani zat hai hi a ruka depressant damdawi fa deu vawng an ni bawk!

Celebrity thenkhat hai chanchin hril inhawk um bek naw sienkhawm, rawngbawltu tamtak, kei thangsa in, kan thawding kan thaw tawk naw sukchiengtu ani leiin hang tarlang ka tih. Entirna dingin inhma lai John Travolta (Hollywood film star) hung inlar vanglai le a hausak zuol lai khan, a neka upa lem nuthlawi leh an innei a. A hmangai em em a nih. Hollywood film star laia international pilot license 11 nei ama chau ana, Boeing 707 modified a neia, Private jet le, private airport nei a nih. A nuhmei a hang thi beidawng kha lungsiet a um em em. Hieng ang deu hin a hrilin chanchinbu ah an ziek, ‘ka insung a ruok vawng ang hin, ka ruok a nih. Ka nun a beidawng a nih’ tiin. Thuhriltu hmingthang le pastor khu zat khun an hrieta, tukhawmin ‘uve au ve’, an va ti sin nawh. A beidawng luotin in Tom Cruise hai rawi hril hmu (ka ring) in ‘Scientology sakhuo’ ah a lut ve ringawt el a. A hringna a chawm bek chu ring a um nawh. Tom Cruise khawm a hlim naw lei chau ni lovin a sakhuo thu ah a nuhmei leh an inrem naw luota inthe an nih tiin chanchinbu mi ha’n  an hril! Chatuon hringna pawimaw zie tukhawma an lo va hril naw kha a mak a nih. Chun, Mike Tyson kha ka lunginsiet bek bek el. New York kawtthler laia midum ruol laia seilien mei mei, a hung hrat emema, sum a hung hau taluo tuor zo naw kha, rawngbawltu tukhawmin ‘u ve au ve’ an va ti naw kha a pawi a nih. Midum thuhriltu hmingthang le thiem khuzat an uma chu tukhawmin an va bawzui nawh. Multi millionaire hung niin khawsak dan tawk a hriet naw khawm khan US rawngbawltu ha’n an ngaisak nawh. Buster Doughlass in a hung hne zo beidawng a Christian a hung inpek khan ‘Chatuon Hringna’  thu inchuktir mumal lovin, eini rawi thawdanin an lo Baptist ringawta, an chibai lawp lawp ringawt kha a pawi tawp a nih! ‘Chatuona hringna’ thu ei in hril rawn naw hi a pawi a nih. Mike Tyson muslim­a a lut kha kei chun, America rawngbawltu hai le ringtuhai kan tum! A nun lungsiet a la um zing! Ei rawngbawl dan hawiher khawm en chieng ava tul de. Chatuon hringna nei nghal lova! Midang dang chanchin hrilsa ta loin, ka hril tum a suk chieng tho ka ring leiin hun el sien.
     
Khawvel thil ah iengkhawm inhnar khawp nei lo, pasie em em, rimsi em em, ruol ban naw em em khawma, ‘Chatuon hringna’ thu buoipui nachang ei hriet der naw hi mak ka ti bek bek hlak! ‘Bu bohmang nawk el ding’  zawng hin an lapin ei inlap mur mur lem a. Chatuon hringna zawnga inngai hai le changtah a inngai hai khawm hin ka ngai an suktha chuong nawh! Thlarau hringna chun ‘puo tieng’ hringna a siemtha in a suk danglam ding a na. Chuong ang siemtharna (transformation) neilo haiin zalen taka ‘Chatuon hringna’ neia an inngai hi an inngai suol a nih. Suk danglamna le siemthatna Paul hai, Zakai hai, Nuoia hai ang khan ei chang naw leiin ringzo ei um tak tak nawh. Judas Iskariot nungchang hlui khan ami la tuom tlat hlak lemin ka hmu. Chun, Pathien thu hi ei ‘pawng nel’ taluo bawk leiin ei inza tawk naw a nih. Ei hringnun le ei khawsak dan ringawta hang inkhi ding chun atu sakhuo haiin am mi ngaisang an ta? UK (England) hai le USA haia Kristienhai dam chu ‘Public enemy number one’ an ni ringawt el an tah! Ka hmu chieng ve in ka hrieta­“mi inti tha, mi danghai suola ngai, mi inti thienghlim, midang hai hmusit (judge), mi zalenna ngai theilo, mi khuokhir tum, mi rights control tum, gay hai hmusit le do ringawt, exclusive club, le suol neilo a inngai in an intum” a nih. Christian boruok chu a rik tel tel el! America ram ah chu tulai Christian thuoitu haiin  an ngai pawimaw le an seminar thupui thenkhat chu “Branding Christian” (Kristien hming chawisang dan ding), “How to improve Christian identity” (iengtinam kristien hai hming suk tha thei ei ta) ti a nih. Hming that ei nuom leh Krista mizie ei put el ding an nawm! Krista thisen in ami sukthieng el ding an nawm. Ieng leia suol a ei um zing am a na? Sakhuo dang popo le khawvel mi popo in west mi (Mi vaar) hai hi Christian ah an sie vawng hi a vangduoi thlak hle a nih. ‘Isu hming leia mi popo theida ni inla chu Pathien thu ei sukdik ding ana, ei thawding le ei hringdan dinga ei hring naw leiin khawvel ah ei nghawng a nih’! UK ram ah 4% hring inhro in an lan khawm a, USA ah 37% an lan khawm tawka, a dang popo hai hi ‘a bila tho lo’ vawng an na, ringtu hming an suksiet hne hle a nih. An tading chun gay (mawngkuo hur le nihmei le nuhmei innei) dam chu suol a kai phak naw tawp! An ‘rights’ ah an ngai leiin. “Mani ta khawm in nita nawh a, mana inchawk inta in saw naw”, ti thu dam chu a hriet in an hriet phak nawh! An hringna an nuom zawnga an keilet thei hi ‘changkang’ na ah an inngai tlat!
     
Sap hai (mi var) chau an ni nawh! Hang sawrchin nawk dep inla! Mizoram vela drugs, ralthuom le Gangja  zawra man popo hai hi Kristien deu vawng an nih! An hminghai ah ‘Lal’ le ‘Van’ ti vela intan deu vawng an nih! Inzak chu a um a nih! Officer ruol khawm Silchar tlung le tlung lova Zu le nunghak zawng ruoi el. HIV&AIDS ah khawvel hriet khawpa inlar filawr, ler le hur kawngah ruol chunga leng! Tripura ram a Zofest nei tum lem khan chu Vai Zu zawr pan “hung thaw nawk unla Lakh 1 in thangpui veng ka ti cheu” a ti tawp el a ni kha! Eini rawi khawm Sikpuiruoi le social thil hrim hrim thawpha a Zu leh insukmak le buoi ringawt el. Zan a lem chu social program khawm ei nei ngam ta naw ni lo? Zu ku hi eini rawi hai ta dinga zawr le siem an nita hi! Aizawl ah Mizoram pastor pakhat in “Pu, kei chu Silchar tilo chu khawlai hmuna khawm posting ka nuom vawng. Silchar chu Mizo ler tak tak le zu dawn mi an tam taluo a, Mizo an mi hmusit taluo,  iengkhawm law thei naw ma nih” a tih! Ei hringdan in ei nina a suk chieng hle. Kawng khat ei bak hi ‘Chatuona Hringna’ tak kha ala ni lem naw maw? ‘Ring thu a innghat’ ringawt ei la ni a, ‘Pathien thu a innghat’ ni ei ngai. ‘Hriet ring’ ei ni pha leh suk danglamin um ei tih. Ieng leia thlarau thienghlim neia inngai si a ei hringna hi thlarauin a control thei naw? Abul ah tan lovin a ler ah ei pakai lem a hawi.  Ei ‘Kawng khat la bak’ hi a tam mawi bak a? “Chatuona Hringna” tak kha ei la bak el am ie?


Don't Miss
© all rights reserved
made with by Simon L Infimate