HPA member han joint meeting an nei
CCPur: Mr Langkhanpau Guite Chairman (caretaker) ADCC le Leader Hill Peoples’ Alliance (HPA) inrawinain July 15, 2015,1:00PM khan Tuibuonga District Council Officeah HPA member han joint meeting an nei a, HPA a thang MDCs 17 hai an thang seng. Hi huna hin HPA hmatienga fepui dan ding hai an hriltlang a, sawrkar (ministry) siemna dingah HPA chu inzo saa um anni thu, sawrkar tienga inthawk ChAairman thlangna ding le thil tul dang dang hai process a fe mek thu hai an hriltlang. HPA zawm nuom MDCs hai chu iengtiklai khawm an lawmlut thu HPA chun an hril.
Suicide Prevention Awareness nei ding
CCPur: 16New Lamka West MDC CT Lian; Church leaders; Lainat Counselling Centre le ZEO/CCPur hai thangruola huoihawtnain July 17, 2015, 11:00AM khin EBC Centenary Hall, New Lamkaah “Suicide Prevention Awareness Campaign in tune with RTE Act 2009” um a tih. Program hi Pastor M. Ginzatun in tawngtaina in hawng a ta, T.Goukhomang, ZEO in RTC Act ti thupui hmangin thu hril a ta, Rev Kamchinkhup, Director of Ministries, EBC in Social Life & Christianity ti thupui hmangin le Miss Muani Tombing in Depression & Psychology ti thupui hmangin thu hril an ta, hi huna hin CT Lian, MDC khawmin thuhrilna hun hmang a nih.
Scholarship Exam Aug. 2 a nei dinga sawn
CCPur: Department of Education (S) huoihawtnaa July 19, 2015, 10:00AM a inthawk Class VI & IX inchuklai hai ta dinga Phungkhothang Govt. H/S a State Level Scholarship Examaination, 2015 nei dinga ti chu Imphal tienga buoina leiin August 2, 2015 a nei lem dinga a hun sawn a nih.
T. Manga Vaiphei in leilak a hawng ding
CCPur: Pu T. Manga Vaiphei, MLA/Henglep le Chairman, MTDC chun July 17, 2015, 12:00 khin Leimatak Power House bula Leimatak leilak daw zo thar hawng a ta, Pastor D. Thangsei, Area pastor in Pathien kuoma tawngtainain inhlan a tih.
One Day Market for Mission
CCPur: July 18, 2015 zing dar 6 a inthawk khin ICI Nuhmei Pawlin Sielmat lamthe le Light House Laneah One Day Market for Mission thawng an tih. Hi market a hin Bu, Sa, thingpui, Bei, secondhand, thuomhnaw thar, thlai le thei zawr an tih. Chun, BP le weight inen thei ning a tih. Pathien hmingin mitin va dawr dingin Tuithaphai Presbytery ICI Nuhmei Pawl chun ngenna an siem.
Christian Outlook Magazine
CCPur: Mizorama Christian Media Society Publication CHRISTIAN OUTLOOK July, 2015 issue chu Churachandpur a hungtlung ta a. A dit hai chun CCPur khawpui sunga lekhabu zawrna dawr tum tum hai le W.R. Khumlien, Rengkai kuoma inthawk hmu thei ning a tih. A sungah Kelkang Harna simtu an pung pei thu, khawvela Muslim ral lien pei; Islam sakhuo bichiengna; Guddist world le Spiritual Look East Policy; Danglam ngam Kristien |halai; Christian news le thu tiem nuom um tak tak tiem ding a um.
Headline
Manipur Assembly Special Session in MRVT&MW Bill lungruol takin hnukkir an remtih;
CM i n inbiek dinga a fielna JCILPS in an hnawl
Imphal: Zanikhan Manipur Assembly Special Session nei a ni a, members han The Manipur Regulation of Visitors, Tenants and Migrant Workers (MRVT&MW) Bill, 2015 chu hun iemanichen an hriltlang hnungin lungruol takin hnukkir an remtih. MRVT&MW Bill, 2015 hi 10th Manipur Legislative Assembly ah March 15, 2015 a putlut le March 16, 2015 a passed a nih. Hi Bill passed a um dodalnain Selkaltu members 5 hai chu Inpuia inthawk an suoktau a nih. Hi Bill hi March 20, 2015 a Governor kuoma peklut le June 23, 2015 a President kuoma pek dinga reservation a sie, a hnung July 8, 2015 a Governor’s Office in President thu lak dinga Ministry of Home Affairsa an thawn a nih.
CM O.Ibobi Singh chun, ILP le inzawm hinBill thar thla 3 sungin draft, Inpuiah phar le pasi dinga hmalak a ni ding thu a hril. Hi Bill hi State sawrkarin a ngaipawimaw a, mithiemhai le JCILPS thuoituhai leh thangtlanga draft ning a ta, thla 3 sung kher khera zo ding tina a ninaw a, ni 15 or ni 30 sunga draft zo a lo ni khawma Inpuiah pasi vat ning a tih tiin zanikhan CM O.Ibobi Singh chun Inpui an hriettir.
Hieng laizing hin zani chawhnung dar 2 khan Joint Committee on Inner Line Permit System (JCILPS) Convenor Kh. Ratan chu CM’s Secretariat, Imphalah meeting pui dingin a fiel a, sienkhawm CM fielna hi Kh. Ratan le JCILPS thuoitu han an hnawl. Zanita Manipur Assembly in MRVT&MW Bill, 2015 hnukkir an remti le Bill thar thla 3 sunga pasi ding ti chun an lung a sukawi zo naw a, JCILPS chun bill thar chu ni 15 sunga zo le pasi dinga July 16, 2015 zantieng dar 4 chena CM Secretariat in Order an suo naw chun JCILPS hmalakna hrat lem le khau lema sunzawm pei ning a tih tiin an hril.
DY. CM le S. Vaiphei han Adimjati Girls Hostel an va sir
Pu Vaiphei in HYA, YVA le YPA hai rangva a pek
Imphal: July 15, 2015 khan Dy. CM le TA/Hills and SC minister incharge Gaikhangam le S. Minlianthang Vaiphei, IAS, Director TA/Hills and SC hai chun Chingmeironga Adimjati Girl’s Hostel an va enfel a, Hostel fencing, water supply siemthat ding bakah dining hall siemthat dingin thutlukna an siem. Hi huna hin ExMP le Adimjati Girls Hostel managing Board Chairman Rishang Keishing khawmin a zui.
Hi huna hin S. Minlianthang Vaiphei, IAS, Director TA/Hills and SC Pu S. Minlianthang Vaiphei chun ama quota a inthawkin Housing scheme beneficiaries 34 hai kuoma Tata Rangva ban 6 (phek 42) seng a pekdawk bakah Director hin sietnithatni haia hmang dingin Imphal Blocka HYA, YVA le YPA rawi upa hai kuoma Tata Rangva Ban 5 seng a pek bawk tiin Directorate of TA, Hills & SC a inthawk ei thu dawngna chun a hril.
Darkar 12 Curfew inthlazal hawk
Imphal: Vawisun zing dar 5 a inthawk zantieng dar 5 chen hin, Darkar 12 sung Imphal East le Imphal West district haiah Curfew inthlazal nawk ning a tih tiin hieng district haia District Magistrate han thusuok an siem. Curfew inthlazala a um sung buoina hriet a ni nawh. ILP ngenna le inzawma lampui dang le thungbuma nuorna hai ruok chu a la fe zawm pei.
Schoolhai hawng tan a ni ding
Imphal: District pahni, Imphal East le Imphal West haia July 8, 2015 zantieng dar 4 a inthawka Curfew zam a ni leia hieng district pahni haia inchuknain hai khara lo u m ta chu vawisuna inthawk hin hawng tan le class tan nawk ni tang an tih.
NITI Aayog meeting nei
New Delhi: Zanikhan PM Narendra Modi inrawina hnuoiah NITI Aayog’s Governing Council meeting nei a ni a, Chief Ministers 16 an thang. Hi meeting a thang Chief Minister hai chu, Bihar CM, Tripura CM, Delhi CM le NDA rorelna statea CM hai niin ei thu dawngna chun a hril a. Congress rorelna states 9 haia CMhai chu an thang ve nawh.
Hi huna PM Narendra Modi in thu a hrilnaa chun, Land Acquisition Bill thil leia Politics leia inhrietthiemnawna a u m ding a ni nawh tiin a hril a, Hi bill hi boruok sik le sa mumal naw leia tlangrama hmasawnna nasa taka a sukpawi zie, damdawiin indinna, lampui siemna le irrigation project hrang hrang a sukhnuk hlak sie hai a hril a, state tin hai leh nasa lema thangruola retheina hnawthmang chu a sawrkar thiltum le hmathlir a ni thu a hril.
Ganja Dimapur a inthawka supply
Jhajjar: Ganja le Kani tam tak takel chu Dimapur, Nagaland a inthawk Rajasthan, Haryana le Delhi haiah an supply hlak niin Naveen alias Billu of Berala, Rajasthan chun a hril. Naveen hi hiengang thila sumdawngna lukhaitu tak a ni a, July 11, 2015 zan khan Special Investigation Team (SIT) han Jhajjar, Rajasthan ah an man. Ganja hi Dimapur ah kg. 1 ah Rs. 1500 in an lak a, Rajasthan, Haryana le Delhi haiah kg. 1 ah Rs. 3,500 to Rs. 4,500 in an zawr hlak niin an puong.
July 30ah Yakub Memon khai hlum ding
Mumbai: March 12, 1993 a Mumbai khawpui bomb puokna le inzawma thi dinga Court in thiemnaw an changtir Yakub Memon (53) chu Nagpur Central Jail ah khai hlum ni el theia hril a nih. Yakub Memon hi Chartered Accountant a nih. March 12, 1993 a Mumbai khawpuia a zawna bomb vawi 13 a puok tum khan mi 257 an thi a, midang 700 neka tam an hliem a nih
Pakistan sipai han nupui 1 an kap hlum
Jammu: Zani zingkar khanPak istan sipai han Ceasefire rule bawsiein Ankhnoor Sector, Jammu district an hung kap a, civil mi nupui pakhat an kap hlum bakah BSF constable pakhat thangsain mi 3 an hliem. Nupui kap hluma um hi Poli Devi (42) le civil mi hiem hai chu Ramesh Kuamr (24) le Udha Devi (38) hai an nih.
Police thisa ruong 4 hmu a nih
Raipur: Chattisgarh state a Maoist helpawl han Police 7 an thuoihmanghai laia 4 hai ruong chu zanikhan Bijapur district, Kutru Police station huop sunga Gudma khaw bulah hmu an nih. Police thihai chu Jaidev Yadav, Mangal Sodhi, Raju Tela le Rama Majji hai an nih. Police 7 hai laia 6 hai hi July 13, 2015 a man le thuoihmang an nih.
PM in Skill India Campaign a hawng
New Delhi: Zanikhan PM Narendra Modi chun World Youth Skill Day hmangnaah Skill India Campaign le National Skill Development Mission a hawng. Hi hunsera hin Union Ministers le State thenkhata Chief Ministers hai an thang tawl.
J&K ah DSP hlui kap hlum
Srinagar: Zani hmasa khan Jammu & Kashmir Police a DSP lo ni hlak, a sina inthawka pension tah Bashir Ahmed chu Kulgam district, Srinagar hmuna helpawl han an kap hlum. Mosquea tawngtai zo, Mosque siunga inthawka a hung suok chara motorcyclea chuong han an kap hlum a nih tiin Police thusuok chun a hril.
Khawnvartui litre 1 ah Rs. 14.96 in
New Delhi: Khawnvartui man indik tak chu litre khatah Rs. 33.47 a ni a, sienkhawm sawrkar chun Public Distribution System (PDS) hnuoiah litre khatah Rs. 14.96 peiin a zawr a, litre 1 ah Rs. 18.51 pei a seng a nih. Sawrkarin litre 1a Rs. 18.51 pei an hmang laia Rs. 12 pei chu Finance ministry in a tum ta ding a nih tiin senior official thusuok chun a hril.
Pak. in spy cameras hai a lakdawk
Barmer: Pakistan chun Rajasthan le inrina international border haia Spy cameras siea um hai chu tulai hnai khan a lakdawk tah. Border Security Force (BSF) han an sawisel leia lakdawk an nih tiin ei thu dawngna chun a hril. Rajasthana Barmer hmuna hin feet 1520 vela insangah Pakistan chun spy cameras 10 vel an sie nia hril a nih.
AAP ta dinga pawisa thawlawm dingin
New Delhi: Aam Aadmi Party (AAP) chun pawisa a tlasam ta leiin mipuihai chu pawisa thawlawm dingin Delhi CM le AAP thuoitu lu tak Arvind Kejriwal chun ngenna a siem. Thawlawm pe nuomhai chun Rs. 10 a inthawk pek thei a ni thu a hril bawk. India rama Chief Minister le MLA/MP ni tahai laia an party fund dinga mipui kuoma pawisa thawlawm dinga ngen hmasa tak chu Arvind Kejriwal hi a la nih. Thamna le fakrukna a thaw naw leia an party fund ding hi an tlasam niin Arvind Kejriwal chun a hril.
Ram Saiin mi 3 a that
Kalaigaon: Zani hmasa khan Assam State a Udalguri district sunga Bamunjuly Tea Estate ah ram Sai a va lut a, mi 3 lai a that. Ram saiin mi a that hai chu Deogi Munde (42), Bristo Boro (45) le Purki Jhora (45) hai an nih. Thina tuok sunghai hi tuchen hin Forest Department in zangnadawmna a la pek naw leiin mipui lungsen a sosang hle a hril a nih.
Khawsiet leiin Helicopter lamlienah
Guwahati: Juy 14, 2015 khan Pawan Hans Helicopter M17, Arunachal Pradesh le Guwahati inkara service chu khawmuol siet leiin emergency in Sonitpur district, Assam a National Highway lamlienah a tum a, khawmuol a hung that nawk hnungin a vuong suok nawk a, him takin Guwhati a tlung tiin District Administration thusuok chun a hril.
Yemen ram buoinaa thi mi 1670
Geneva: Yemen rama helpawl Houthis le Yemen sawrkar sipaihai inbeituona a la fe pei a, hi buoinaa hin ni 10 liemta sung khan mi 142, Civil mi vawng an thi belsa leiin tuchena Yemen rama buoina leia civil mi thi chu 1670 an tling ta tiin Rupert Colville, Spokesman, UN Human Rights Office, Geneva chun a hril. Yemen mihai chun an ram suoksanin Djibouti,Somalia, Oman, Saudi Arabia le Sudan haiah an raltlan tawl a, raltlan chu 51,000 an tling ta niin a hril bawk.
---------------------------------------------------------------------------------------------------------------------
VAWISUN THUPUI
Chun, inthim thilthaw ra nei ngailohaia chun thangna hrim nei naw ro, thang nek hmanin a thiemnawzie inhriettir lem ro; inruka an thil thaw hlakhai chu a hril khawm inzak a um sih a. ~ Ephesi 5:1112
Editorial : Hlawtlingna hlawsam
Thupuia ei hmang hlawtlingna hlawsam’ ti hi thil ni thei a ni dim ei ti el thei. Hlawtling nana na chu hlawsam ei ti thei dim a ni maw! khawm ei ti el thei. Hlawtlingna ei ti hin iengchen chie am a huoma ti ngaidan an ang naw hle ring a um. Mita ei hmu thei thil, in ropui le tha, inlirthei manto le tha, sum le pai hau, thil hlu tam tak nei, lekhathiem, inchukna tienga degree insang tak neia officer lien tak ni, hlasakthiem, inkhel thiem, politicians a ngur le lal chang hai hi mi hlawtling ei ti thei awm ie. Hiengang mihai hin an fena le an umna haiah hlawtlingna an chang a ni el thei, nisienlakhawm hlawsamna an nei rawp hlak.
Khawvela scientist ropui takel, khawvel indopui pahnina hun laia Atom bomb siemtu Albert Einstein chun a hlawtlingna chungchang hiengang hin a hril: Try not to become a man of success, but a man of value” tiin. A umzie le a kawk chu, mi hlawtling ni lovin midanghai ta dinga mi tangkai le hlu ni tum lem rawh, a tina a nih. Ei ramah politician hlun le ropui tak tak dam, lekhathiem, degree insang tak tak nei, officer lien le inza kai tam takel umin ei nei fer fur el tah. Hieng mihai hlawtlingna le hlawtlingna dinga lampui, a suk le a tung an lo hraw ta hai a ropuiin ngaisang an um takzet. Amiruokchu, hieng mi hlawtlinghai hin midanghai ta dingin malsawmna an intlun am? Mihai ta dingin hlutna le tangkaina an nei am? An neinaw chun hlawtlingna hlawsam dawngin an chang an naw ding maw? Ngaituo chet chet a tul hle.
Ei ramah, ei hnam sungah le ei khawtlanga hai IAS, IPS, IFS, MCS offier lien tak tak, lekhathiem le thluok tha em em el khawm ei nei ta hlak. Amiruokchu, sungkuo, nu le pa le unau danghai ta dinga tangkaina ding um der lo khelah mani hnam chanpui le ram ta dinga thaw le tangkaina chiterek khawm nei lo ei society sungah hin ei bo bik nawh. Hiengang mihai hlawtlingna ku hi a nih hlawtlingna hlawsam chu! Hiengang mihai hi an tarpi, an tarpu le an nauhai ta ding chaua hring an ni hlak leiin mihai ngaisang le ngaihlu an ni ngai naw a, society ta dinga mi zero an nih.
Ei society sunga hin IAS, IPS, IFS, MCS etc officer lien tak takel hai lai, an nu le pa, an hnuoi Pathien hai meu khawm hmangai thei lo, duot nuom lo le hmusita che hlak le la che mek khawm an bo bik naw bawk. Hiengang mihai hin hi hnuoia an um le damsung ngei hin an nu le pa hai ansie le ‘paap’ an la tuok ding a nih. An chan ding le an hmabak ding hi a kho inkham hle. IAS, IPS, IFS etc officer lien ni ta lei ela harsatna, beidawngna, a thlum le a al an lo fakpui le dawnpui ta hlak an nuhmei, hmangai em emtu le duot taka lo enkawltu, an lien hnung, an khawsak thei hnung le inlalna an chang hnunga mani nuhmeihai mak ngam khawm an um. An suol dan hi turu takel a nih. Hiengang mihai hlawtlingna khawm hi hlawtlingna hlawsam chu a va ni ngei el.
Libya rama kum 42 zet roreltu Muammar Gaddafi ei hriet seng awm ie. Thuneina po po chelin a ram mipuihai chanvo sirde le lapekin ro a rel a. Kum 2011 a tuolsung indona suokin rapthlak le muolpho taka kap hlum a nih. Myanmar ram hausakzie ei hriet seng. Sienkhawm rorelna cheltu an fuk naw leiin mipui sirdein an um a, inrum tlawk tlawkin an um hlak a ni kha. Hieng rama roreltuhai hin hlawtling an inti el thei, sienkhawm khawvel chun ram hlawtlingah a tiem der nawh.
Ei degree insang tak tak, ei hausakna, ei varna, ei thiemna le hmasawnna ropui tak tak hai hi ei ram le hnam ta dingin hmangtlak an ni meu am le? Mi hlawtling hlawsam le mi hlawtling tium iengzat am ei um ta a? Ei la u m pei ding a ni? Inngaituo chet chet a hun ta hle. Politician hlawtliang nia inngai, hlawsam si khawm ei bo bik nawh.
