Responsive Ad Slot

Hmasawnna Thar | 12 July, 2015

Sunday, July 12, 2015

/ Published by VIRTHLI
Tuolsung
HI inrawinain Hmarkhawlien an pan ding
CCPur: Assam rama hmar hai ngirhmun chungthuah July 13, 2015 khin Hmarkhawlien, Cachar, Assam­a Hmar Inpui General Hqrts. inrawinain hnam thuoitu han inrawntlangna an nei ding a ni a. Hi huna thang ding hin Churachandpur district­a inthawk Hmar Inpui Gen. President le General Secretary Dr John Pulamte le David  Buhril hai inrawinain HWA GHQ, HYA le HSA thuoitu hai chun Tuithaphai suoksanin Hmarkhawlien pan an tih. Hi inrawntlangna inkhawma hin N.C.Hills­a inthawk khawmin Hmar Inpui NC Hills and Karbi Anglong  Region thuoituhai, HYA, HSA, HPU thuoituhai bakah Member of Autonomous Council (MAC) hai; Barak Valley­a inthawk Hmar Inpui, HYA, HSA, Kohran thuoitu hai le intellectuals hai thang bawk an tih.
           
Hi huna hnam thuoitu fekhawm hai chun Assam rama Hmar hai ngirhmun bakah Cachar­a Hmar le Khasi hai inkara inhrietthiemnawna um chungthu hai hriltlangin hmalak dan ding an ngaituo tlang ding a nih.

VTI in Graduation Day an hmang
Inchukna khelah mani thluok hmang thiem a tul: Lalrobul Fimate, MCS

CCPur: Vocational Training Institute (VTI), Muolhlum, Rengkai, CCPur chun July 11, 2015, 11:30AM khan VTI Auditorium ­ah Graduation Day an hmang. Hi huna hin Lalrobul Fimate, MCS, MCS Under Secy., MOBC, Govt. of Manipur khuollienin a thang.
    


Khuollien Mr Lalrobul Fimate, MCS in thu a hrilnaa chun, India rama thawkna ding a vang pei a, secular line­a inchukna insang tak tak nei sin hmu lo tam tak an um thu; Private/Govt. a khawm hiengang Skill tiengpanga thiemna nei hai ta ding ruok chun sin tam tak a um a nih tiin a hril a. Graduate hai chun, an graduate ­na chu a tawpna ni lovin an tanna chau a nih hrie a, an inchukna khela mani thluok hmang thiem dingin an fui a. India rama khawm nasa takin Vocational Training Centre hin hmun pawimaw a chang mek a, inhnik le tumru taka thawtu hai chaun fak hmuna in an hmang mek pei a nih tiin a hril. Mr. Joseph L Infimate, Area Manager, ICDP khawma uop vein thuhrilna hun a hun a hmang bawk.
    


Hi huna Graduates mi 31 hai kuoma Certificate inhlan anni a, Rev. D. Jangkholam, General Director, ECA chun Graduates hai ta dingin tawngtaipekna a nei a, Trainee laia Talent tha tak tak nei han item tum tum inentirna an nei bawk.
    
Vocational Training Centre hi RPCNEI Project hnuoia kum 2006 a indin a ni a, tuhena hin Trade hran hrana Graduate mi 916 an um ta a, hi laia 60% vel chun an thil inchukhai insung enkawlna in an hmang mek a nih. Tu hin Trade 6­ Weaving, Driving, Tailoring & Embroidery, Carpentry, DTP course le Computer Hardware A+ haia Trainee mi 46 an um mek.  Hi institute thiltum chu Skill training chau ni lovin Pathien thua trainee hai chawmlien chu a thiltum a ni a, hi lei hin nitin devotion hmangpui hlak anni bakah Motivational Class le Games & Sports hai khawm nei hlak a nih.

MDC thar hai lawmpuina an nei
CCPur:  Zomi Council chun July 11, 2015, 1:00PM khan ADC CCPur­a MDC dinga thlangtling thar mi 24 hai lawmpuina hun an buotsai a, hi huna hin MDC thar mi 17 chau an thang.  Hi huna hin Zomi Council hnuoia Frontal Organisation tum tuma President le Secretary ding hai thlang thar hai an thang bawk. MDC hai hi Rev. Dr B. Luaichinthang, Chairman, ZOLLS in tawngtaipekna a nei.
    


Langkhanpau Guite, Chairman (caretekar) chun, mipui ta dinga tha lema sin thaw theina dinga  Hill Peoples Alliance (HPA) indin a ni thu, Govt. in Chairman le Vice Chairman election hun ding a ruot zovah HPA in CCPUr ADC­ah sawrkarna an siem ding a nih tiin hi huna thu a hrilna huna a hril.
    
Hi huna thang MDC hai chu ZC Chairman L.B. Sona le Speaker Zam Khua Cin han Zomi Mufler le “Prelim of the Zo People” ti lekhabu an inhlan a, zantieng bu an faktlang.

Financial Literacy Awareness nei
CCPur: July 11, 2015, 10:00AM khan Community Development Society le NABARD hai thangruola huoihawtnain Bungmual­a SSPP Complex­ah NABARD Foundation Day le Financial Literacy Awareness Program hmang a nih. Hi huna hin Pu Lunminthang Haokip, IAS, DC, CCPur chun khuollienin a thang.
            


DC, CCPur chun, Ei economy thatlemna dingin lampui tha nei a pawimaw thu hrilin lampui a thanaw chun economy transaction a u m thei nawh. Khawpui sung Khawmawi a inthawk New Lamka inkar Tiddim Road a street light ding MANIREDA fethlengin 200 chuong a hung tiin a hril. Mimal economy a that hunah ei ram economy khawm a hung tha ding a nih. Hi thila hin Bank han mawphurna lien tak an nei tiin a hril.

(L)  Thangzalang Memo. Award sem
CCPur: July 11, 2015, 12:30PM khan Lailam Veng­ah (L) Thangzalang Memorial Award for   Topper students of  Singngat sem a nih. Hi huna hin 60­Singngat MLA Ginsuanhau Zou chun  Benjamin Paokhogin Haokip of Hengjang (Class X BSEM); Carolyn Chingthianmawi of Teikot (Class  X CBSE) le Gouzamuan Samte Zou of Muallum (10+2) hai kuomah cash award Rs. 10,000+ Memento hai an hlan.

Class X & XII hai lawmpuina an nei
CCPur:  Zani 1:00PM khan New Age Foundation huoihawtnain H. Mangchinkhup In, Bungmual­ah, 16 ­New Lamka West a tukum­a Class X & XII pass hai lawmpuina hun hmang a ni a, hi huna hin H. Mangchinkhup chun a pa (L) H. Lianzamang Guite le a nu (L) Pauzaching Meritorious Award 2015 hai a sem. Hi hun hi Pu Lunminthang Haokip, IAS, DC, CPur; Pu L. Mangkhogin Haokip, IPS, SP, CCPur hai khawma an thang. Award  dawngtuhai chu­ Thangson Tawmbing (class X, CBSE); Marion Vung Lian Cing class XII (CBSE); Thangdikson class X (BSEM) le Thanglianmung s Class XII (CoHSEM)  hai an ni a, lawmman Rs. Rs.3000+ Memento le gift  pek an nih.
    
DC chun, mihriem hai hi Pathienin talent a mi pek seng a, Pathien hrezing puma tumru le taima taka thawtu han hlawtlingna an chang hlak; khawvela mi hlawtling tamlem hai hi lekhathiem thei (brilliant) nekin hlawsam hnunga thaw tal talna leia hlawtling an tam lem tiin a hril.

Mass Social Work nei
CCPur: July 11, 2015, 10:30AM khan District Hospital Management Committee hmalaknain District Hospital, CCPur campus­ah Mass social work nei a nih. Hi huna hin Doctors, Nurses hai bakah Grade­ IV hai an thang. Hi thil hi District Hospital campus sung thienghlim lemna dinga an thaw a nih.

Headline
India hmarsak biel venghimna sawrkar thlungpuiin a ngaipawimaw;
Misuolhai sawrkar thlungpuiin inbiekpui ngainaw nih: Rajnath Singh
Guwahati: Union Home Minister, Rajnath Singh chun zanikhan Guwhati ah India hmarsak biela Chief Minister­hai meeting a neipui. Hi meeting a hin Manipur CM O .Ibobi Singh thangsain  NE CM­hai, Union Minister of State for Home  Kiren Rijiju, Union Youth  Affairs & Sports Minister  Sarabananda Sonowal, Union DoNER Minister Dr Jitendra Singh; Union Home Secretary, L.C. Goyal le top officials hai an thang tawl.
    


Rajnath Singh in NE CM­hai an hmupui huna hieng thuhai hi a hril:  India hmarsak biel venghimna sawrkar thlungpuiin a ngaipawimaw hle a, Security ngirhmun in that tieng a pan ta leiin India hmarsak bielah Central Forces siea um hai suktlawm tha ka tih tiin a hril. Security ngirhmun a hung tha pei ta leiin hi biela security forces sie a um hi, India hmarsak biela helpawlhai an chet vanglai taka sie nekin an tam lem tia hrilin NE CM­hai chu an state tina Central Armed Police Forces umzat hriet tum dingin a ngen tawl. A tul tak tak le in mamaw tak tak huna chun Central Forces hung pe dingin ka tiem cheu tiin Rajnath chun a hril.
    


Security ngirhmunin that tieng a pan peina thuah Rajnath Singh chun NE CM ­hai kuomah lawmthu a hril a. Arunachal Pradesh a district pathum ti lo, Mizoram, Tripura bakah Assam le Meghalaya state haia hmun tam lem haia chun helpawlhai an che naw ang an tah. Nagaland le Manipur hai chu helpawl chet inzingna deu an ni a, state danghai anga helpawlhai chet tam nawna le ram ralmuong an hung ni vat ka nuom. Garo Hills, Meghalaya a chun helpawl group tum tum hai an hung kawidar pei a, silai leh chuktuo a sum ngen, mi suom, suma intlansuok dinga inthuoihmangna hai an thaw hlak. Hiengang misuolhai hi sawrkar thlungpui chun inbiekpui ngai naw ni a, dan angin an chungah rorel ning a tih. Sawrkar thlungpui chun helpawlhai indawrpuina kawnga hin zero­tolerance policy a hmang zing a nih. Thuoi suola um thalai tam tak insirin an hung inlamlet a, anni hi chu sawrkarin inbiekpui an peizing. Helpawl group tum tum hai leh inbiekna a fe mek a, inbiekna a tluong pei, result tha tak a hung rasuok ka beisei tiin Rajnath Singh chun a hril.
            
India le Myanmar inrina zul, km. 10 biel huop sunga khuo 240 a cheng mi nuoi 2 neka tam hai chu “helpawlhai thuhnuoia um an nih”. Hiengang bawk hin India le Bhutan inrina zula chenghai khawm an um ve a nih. Hieng biela CM ­hai chu lo ngaisak dingin a ngen. Chun, Border Area Development Programme (BADP) Fund  30% ni hlak chu 40% a sukpung a nih tiin Rajnath Singh chun a hril.

Pasal 1 electric in a man hlum
Imphal: Zani zing dar 6:30 vel khan pasal pakhat Modhusana of Uchiwa tuta Maibam Joykishore Singh of Keishamthong Ahanthem Leikai a private security guard­a um chu lamliena eletric hrui tla thla mi inlawn vel han an tawkfuk nawna ding tia sie hmang a tumnaah changsuolin electric in a man hlum.

Darkar 7 sung Curfew inthlazal
Imphal: Imphal East le Imphal West district haia tiemchin umlo Curfew puonga um chu zanikhan darkar 5 (5AM­10A) inkar sung Curfew inthlazal a ni a, nitin mamaw inchaw nuoma bazar kai mihriem le motor an tam hle leiin traffic a jam pha. Vawisun hin chu Curfew puongna biel sunga hin darkar 7 sung, zing dar 5 a inthawk sun dar 12 chen Curfew hi inthlazal nawk a nih tiin hieng District pahni haia District Magistrates han thusuok an siem nawk.

MPSC Exam Hall­ah sawn
Imphal: Vawisun hin India rama Exam Centre hran hran haiah UPSC huoihawtnain Assistant Commandant Exam um a tih. Imphal khawpuia Ananda Higher Secondary School khawm Exam Centre pakhata ruot a ni a. Amiruokchu remchangnawna a um leiin hi exam Centre hi hmang a ni tanaw ding a ni a, hi Centre a exam ding candidates hai chu MPSC Examination Hall­a exam dinga sawn an nih. Hi lei hin hi centre­a candidate hai chun MPSC Exam hi pan lem ding a nih tiin MPSC chun inhriettirna a siem.

Lampui dangna an la sunzawm
Imphal: JCILPS thlawptu volunteers han zani khawm khan Curfew bawsein Greater Imphal area sungah lampui dangna le lampui hrawna an la sunzawm a, Police han a hnawthmangna dingin tear gas, rubber bullet le mob bomb hai an kap khum. Hi thil tlunga hin mihriem thi le hliem an um nawh. Chun, ILP leia thina tuok Sapam Robinhood ruong khawm lak lovin Morgue­ah a la umzing.

PSLV­C28 hlawtling taka ensin
Sriharikota: Indian Space Research Organisation (ISRO) chun July 10, 2015 zan dar 9:58 khan Satish Dhawan Space Centre, Sriharikota a inthawka PSLV­C28 hlawtling takin ensinnain a kapsuok. Hi satellites hin United Kingdom sattelites 5 a phursa a nih.

Keite’n nupui 1 a se hlum
Jammu:  Zani hmasa zan khan Jammu & Kashmir state a Doda  district sunga Bhaderwah khuoah Keite a va lut a, nupui kum 48 mi, Seema Devi chu an in bulah a se a, thangpuitu kovin a khek a, an veng mi han an va sansuok. Amiruokchu, Seema Devi hi a hliem inrik leiin Hospital panpui a ni a, a hliemna tuorzo lovin zani zingkar khan Hospital­ah a thi niin Police han an hril.

ITBP Constable in SI  a kap hlum
Musoorie: Zani zingkar dar 6 vel khan IAS Officer­hai trainingna Lal Bahadur Shastri National Academy of Administration, Mussoorie, Uttarakhand­a venghimna sin thaw ITBP constable Chandra Shekar chun a service LMG hmangin an Officer (Sub­Inspector), Surendra a kap hlum bakah Constable Mohammed Alam a kap hliem zovin LMG le a mu 70 chawiin a tlan hmang. Shekar hi zani hmasa khan an officer, Surendra in discipline thuah a hrem a, chu lungsena hi thil hi a thaw el ni dinga ring a nih tiin Krishna Chaudhary, Director General, ITBP chun a hril.

AIPMT re­test exam­ah dress code
New Delhi: July 25, 2015 a Central Board of Secondary Education (CBSE) hmalaknaa All India Pre­Medical Test (AIPMT) re­test exam hung u m ding le inzawmin CBSE in dress code khau tak an suo. Hi dress code dungzui hin Candidates han sil le bil zangkhai slippers a chung u m lo (open slippers) hakin bun an ta, kutsebi, nabe, kuta bun chi sana, banbun, thi an khai chi hai an be le bun phal lo, mobile phone, bluetooth, earphone, hairband, kawnghren, scarf le lukhum hai chawilut phal lo le T­Shirt, Zakhuo ban­bul hai hak ding le pheikawk bun lo ding tihai a thangsa.

Assam­ah Political party thar indin
Guwahati: Zani hmasa khan Assam­ah Political party thar indin a ni a, hi party thar hmingah Liberal Democratic Party, Assam inbuk a nih. Hi party thar President dingin Pradyut Bora ruot a nih. Hi party hi BJP a inthawka lungawi naw han an indin nia hril a nih.

West Bengal­ah Kristien Biekin suksiet
Kolkata:  Zani hmasa khan West Bengal state a Nadia district sunga St. Thomas Catholic Church chu suksiet a nih. Hi Biekin suksetuhai hi tu ham an ni a ti hriet a la ni nawh. March, 2015 khawm khan West Bengal state a Nadia district sung ma,  Ranaghat hmuna Nun kum 70 mi suollui le Biekin suksiet a lo ni ta bawk.

July 15 ah PM in NITI Aayog meeting a ko
New Delhi: PM Narendra Modi chun July 15, 2015 khin New Delhi­ah NITI Aayog Governing meeting a ko. Hi meeting a hin Chief Ministers le Key Cabinet ministers hai thang an ta, Land Acquisition Bill chungchang hriltlang an tih tiin ei thu dawngna chun a hril. CMs le Key Cabinet ministers hai chu Governing Council, NITI Aayog a members an nih. Parliament Monsoon Session hung um dinga hin NDA sawrkar chun Land Acquisition Bill hi sukfel a nuom a nih.

India pawisa lem leh mi 2 man an nih
Jammu:  July 11, 2015 khan Jammu and Kashmir­a chun Police han pasal pahni hai chu India pawisa lem leh an man. Mana um hai chu Abdul Rashid of Anantnag district le Abdul Gani of Gondo, Doda district hai an ni a, Bus stand­a Bus chuong an tum laia  man an nih. An kuta inthawka India pawisa lem an man hi Rs. 3 lakh anghu vel niin Police thusuok chun a hril a, pawisa lem hai hi West Bengal­a inthawka an lak niin an hril a, case registered a ni bakah suizuina nei mek a nih.

World Population Day hmang
New Delhi: Zanikhan khawvel pumpuiah World Population Day hmang a nih. Hi Day thupui chu, “Vulnerable populations in emergencies” ti a nih. Zanikhan New Delhi a khawm Health & Family Welfare Ministry huoihawtnain World Population Day le inzawmin National Workshop nei a nih. Governing Council, United Development programme chun kum 1989 a kha kum tin July 11 chu World Population Day a hmang dinga a lo ruot a nih.
--------------------------------------------------------------------------------------------
VAWISUN THUPUI
Amiruokchu, Lalpa chau Pathien diktak chu a na, Pathien hring chu a na, chatuon lal a nih; a lunginsenna chun hnuoi chu an thin a, a lungawi nawna chu hnamhai chun an tuor thei nawh. ­ Jeremia 10:10

Editorial: Insumtheina hi

Galati 5:22 & 23 haiin thlarau ra nia a mi hril hai chu hmangaina dam, insumtheina dam, hlimna dam, inremna dam, dawtheina dam, ngilneina dam, thatna dam, ringumna dam le nunnemna dam an nih. Hieng thil hai po po hi Kristienhai thangsain khawvel mihriem han zui le zawm harsa ei ti bek bek le ei tlaksam hai an nih. Thlarau rahai hi khawvel mihriemhai hin zuiin zawm seng inla chu khawvela hin suolna um naw ni a, inremna, muongna le inremnain sip a ta, ei ram hi ram zalen le ram nelum hung ni ngei a tih.
    
Thlarau rahai laia pakhat insumtheina hi hang ngaituo tlang ei tih. Mi insumthei chu mi hrat a ni a, mi insumthei lo mi chu mi hrat lo a nih. Kristien intihai lai khawm mi hrat lo ei tam hle awm ie. Insumtheina ding kawng thumin ngaituo tlang phawt ei tih. Pakhatnaa chun tawng, hmu le hrieta insumtheina: Tawng hi inhawi ei ti tlang hle. Officer lien pakhat chun Zohnathlakhai  hin in thu hriet hi in ip thei naw a, in thu hriet hi inhril sawng pei a, inbiekhlatna khawm in mamaw nawh tiin a hril. Hril lo ding ei hril leia buoina suok khawm a um hlak. Hril ding tul hril a, hril tul lo hril lo thei hi ei inchuk a pawimaw. Ei thu hriet taphawt hi hril sawng a tul kher nawh.
    
Hmu ding um taphawt hmu ei chak hlak. Nisienlakhawm ei thil hmu thenkhat chu hmu dinga tha lo a ni thei. Ei thil hriet le hmuah ei fimkhur hle a tul. Thil hungtlung iengkim el hi hriet ei chak a, sienkhawm ei hriet tam hi ei hriet lo dinga tha an nih. Ei thu hrietah ei fimkhur a tul a nih. Chuongchun, tawng, hmu le hrietah fimkhur inchuk ei ta, insumtheina nei tum ei tiu.  Mi pakhat hin zawng lim a ziek a, pakahtin a hmur a hip a, pakhatin a mit a hip a, pakhat dangin a nakawr a hip. Hi milim inchuktir chu, tawng fimkhur ding, hmua fimkhur ding le hrieta fiemkhur ding ti a nih.
    
Pahninaa chun, fak le dawn kawnga fimkhur ding: Zohnathlakhai hi fak le dawn kawnga insum thei lo takel ei nih. Fak ding le dawn ding ei hmu taphawt fa a dawn el hlak hi a tam lem ei niawm ie. Ei taksa ta ding le ei hriselna ta dinga tha le tha lo ding ngaituo hman lek lovin ei akin ei dawn pek puk el a nih. Hi lei hin fak le dawn ei insum a tul a nih. Vawksa hi Bible chun sa thienghlim lova a ngai a, fak lo ding a ti a. Amiruokchu, Zohnathlakhai sa du tak a ni tlat si! Insum harsa ei ti tlang chu a ni hi! Kristienhai lai Seventh Day Kohranin fak le dawn, hawp le hmuom haiah insumtheina an inchuktir a, entawn tlak an nih.
    
Zu dawn, drugs thaw ching, hawp le hmuom thaw nasa taluo leia thi pha hiel khawm ei tam tah. Kohran pawl tin han hieng thil hai po po hi ei khap deu vawng a. Amiruokchu, Kohran mihai lai Zu dawn le drugs thaw ei tam hle! Kohranin dan ei nei hai hi khau le khir takin hmang ngam seng inla Kohran mi Zu dawn le drugs thaw tlawm deu an tim maw?
            
A pathumnaa chun hawp le hmuom: Hawp le hmuom ching hi ei tam hle awm ie!  Lekhaziel hawp, kuva fa, khaini le tuibur hmuom tam tiengpangah Zohnathlakhai hi ei rank an sang hle awm ie! Hieng thil hai hi hriselna ta dingin a tha naw el bakah sum tam takel khawralna a nih ti ei hriet seng. Nisienlakhawm ei insum theinaw tawl a ni tak awm ie!  Sawrkar le khawtlangin an khap nasa a, sienkhawm a khap hlawtling an la um  nawh. Khapna thuapek le dan a khau po leh a man a kaisang pha a, a thaw nuom an tam ting el a nih. Hieng thil haia hin insum tum tlat ei tiu.  Chuongchun Zu le Drugs thaw hung tlawm deu ei tih. Mimal ditthlangnaah an nghat a nih.

----------------------------------------------------------------
Don't Miss
© all rights reserved
made with by Simon L Infimate