Tuolsung:Headline
L. Thahgen in a thil hmu haia a lungawi tawk thu a hril
CCPUR: Swachh Vidyalaya Abhiyan scheme hnuoia CCPur district sunga Schools haia toilet siema um hai le Mid Day meal sem dan enfeltu dinga MHRD le MOFHW in Observer dinga a ruot CCPur­a cham mek Lalkhothang @ L. Thahgen, Director, Ministry of Health & FW, Govt. of India chun School tum tum inspection a thaw zing a, zani hmasa khan Swachh Vidyalaya Abhiyan scheme hnuoia Toilet le Mid Day meal sem dan Schools 14 haiah a enfel a, zani khawm khan School tum tum a sir.
    


Zanita School tum tum a sir hai lai Panglian JBS; T.Kaizakhup Jr H/S; Geljang JBS; Muallian UPS; Mata Mualtam JBS; Lingsiphai Jr H/S; Tangmual JBS; Tangnuam JBS; Mandop Meitei Leikai JBS; Bijang Loubuk Jr. H/S; Muolvaiphei UPS hai a thang. Rengkai Hr Sec School hai a thang a. Rengkai Hr Sec school a sir huna hin ZEO/CCpur le DI of school CCPur hai khawma zuiin hi School­a Mid Day Meal sema u m chu an fak ve.
    


L. Thahgen chun, school tum tum a sir na haiah a lungawi tawk thu a hril a. Ministry of  Rural Development, Govt. of India chun SVAS hnuoiah school 1­a nuhmei le pasal han toilet 2 pei an nei dinga ti a ni thu a hril a. Mid Day Meal thua a thil hmu hai chu Ministry of Child  Development, Govt. of India kuoma report a pek ding thu hrilin, Schools han thlaisuongin (kitchen) an nei seng ding, Mid Day meal fakna ding thleng indaitawk pe ding le quality thalem a thaw dinga rawtna a peklut ding thu a hril bawk.

Speed Breaker lakdawk dinga Order DC in an suo
CCPUR: Mr Lunminthang Haokip, IAS, DC, CCPur chun mipui tienga inthawk complain um leiin CCPur khawpui sunga hmun tum tum haia Speed Breaker siea um hai chu lakdawk dingin July 10, 2015 khan Order an suo. Speed breaker lakdawk dinga zanita DC in Order an suo hai chu Gangte Veng lutna hmuna 1, Headquarters HQ­JNV Road­ah 5, Mission Road­ah 2, Central Road­ah 2, Zou Colony­ah 8, 27 Sector, Assam Rifles ah 2, Dist. Council­Mini Secctt. Road (Opp. Christian Fellowship Church) ah 3 an nih. Speed Breakers hai lakdawkna le lampui sukruolna sin chu PWD/ CCPur mawphurna pek a ni a, DC chun EE/PWD, CCPur lo thlawp dingin  a ngen.

World Population Day kick­off prog  DC in a hawng
CCPUR: July 10, 2015, 10:30AM khan Mr Lunminthang Haokip, IAS, DC, CCPur chun khuolliena thangin Hiangtam lamka YPA GHQ Hall­ah ‘World Population Day’ a hawng.  DC/CCPur chun, Population control na dinga nau sukthlak (abortion) hi Kristien hai ta ding chun ei sakhuona le inkal, tuolthatna chikhat a nih tia hrilin mani inthunun thei a pawimaw tiin a hril.  Nau tam tak nei hin fak le dawn khawsakna (economy) a nghawng hlak leiin  nu le pa hai ta dingin fimkhur a pawimaw tiin a hril.
    


Hi hun hmangnaa hin Female Health Worker Training school le Bethesda School of Nursing, Muolvaiphei han special no. an present a, ASHA han drama inentirna an nei a, Dr VC Pau chun slide shaw hmangin thuhrilna a nei . World Population Day 2015 hi July 11­24, 2015 sung hmang ding a nih.

Award Nomination Committee
CCPUR: Ministry of Health & Family Welfare, Govt. of India in National Health Mission (NHM) hnuoia best Public Health Institution (District Hospitals, Community Health Centres (CHC) le Primary Health Centres) kuoma “Kayakalp Award Scheme” pek a tumna le inzawmin zani hmasa khan District Level Award Nomination Committee indin a nih. Hi Committee a Chairman dingin Dr Thangchinkhup Guite CMO/CCpur, Convenor in Seiboi Mate, DPM/NHM, Members­ Mannuamching, CEO/ADCC, Member, Dr. Vumchinpau Tonsing, DFWO, Quality Assurance Committee, Dr. James of MSF as Civil Society Representative le Dr. J. Songokham Samte, Medical Superintendent, DH hai an nih.

HSA in lawmthu an hril
CCPUR:  HSA, CCPur Jt. Hqrts. chun, fur ruotui tlak rawn leia lampui lun em em Rengkai Road, IB Road le Tuibuong road hraw harsa taka u m le pawr em em Pu Lunminthang Haokip, DC, CCPur hmalaknaa Pu P. Tongthang, Special Class contractor in mipui hmakhuo ngainaa lampui siet zuolna le inkhurna hai single balu sunga a siemthatna thuah DC, CCPur le Pu Tongthang chunga HSA CCPur JHQ chun lawmthu an hril. Hiengang thuoitu le Social worker ei nein a chunga lawmum le thlamuongum an ti thu an hril bawk.

SP in Electric Bill Counter a hawng
CCPUR: Mr L. Mangkhogin Haokip, IPS, SP, CCPur chun zani sun dar 11:00 khan SP Office, Tuibuong gate bulah Electric fee pekna ding Bill Counter hawngin ribbon chep bawngna a nei. Electric Bill Counter hi KSO/CCPUr le TKSU/CCPur hai hmalakna hnuoia hawng a ni thu Khampu Hatzaw, General manager, MSPDCL chun a hril a, July 13, 2015 a inthawk hi hmuna hin Electric Consumer han fee/bill an pek thei ta ding thu a hril.
    


KSO/CCPur President T. Lalkhohao Haokip chun, Police station a Bill Counter -ah bill pe ding tam tak intlar hlak leia mipui harsatna sukkiengna dinga mimal le tlawmngai han donation an pek hai hmanga KSO le TKSU in Department hrietpuinaa Bill Counter hi anhawng a ni thu a hril.

July 13-ah MDC han sesamna an nei ding
CCPUR: Principal Secretary (Hills), Government of Manipur, S.K. Dev Verman in July 9, 2015 nia Notification an suo dungzuiin Manipur­a Autonomous District Councils (ADCs) 6, Chandel, Churachandpur, Sadar Hills, Senapati, Tamenglong le Ukhrul hnuoia MDC dinga thlangtling thar hai chun an District sunga ADC Office haiah sesasmna hunser nei an ta, sesamna hi DC tin han inneitir an tih tiin a hril. ADC, CCPur hnuoia MDC a thlangtling thar hai chun July 13, 2015 11AM khin District Council Hall,Tuibuong,CCPur hmuna sesamna nei an tih tiin CEO/Secretary, ADC, CCPur chun zanikhan inhriettirna a siem

CMO in chawl a lak
CCPUR: Dr Thangchinkhup Guite, CMO/CCPur chun chawl a lak a, a chawl sungin Dr Pumzathang, DTO chun CMO/CCPur in­charge in lo chel sang a tih.

Lok Adalat thul
CCPUR:  Ei state a Law & Order ngirhmun thatnaw leiin vawisun July 11, 2015 a CJM, CCPur huongsunga Lok Adalat District Legal Services Authority, CCPur in huoihawt a tuam chu thul a ni a, Lok Adalat nei hun ding chu hi hnunga la ruot nawk ning a tih tiin Secretary,  Churachandpur Legal Services Authority chun inhriettirna a siem.

Headline
High Level meeting nei; Darkar 5 sung Curfew inthlazal, CM in New Delhi a pan
IMPHAL: Zani chawhnung dar 2 a inthawk khan State sawrkarian Chief Minister Office/Bunglow, Imphal­ah  High Level meeting a huoihawt a, hi meeting a hin Chief Minister O.Ibobi Singh, Dy. CM  Gaikhangam, Ministers, Chief  Secretary, Principal Secretary (Home) le  mana um JCILPS thuoitu 6 hai an thang a, tulaia Manipur ngirhmun an hriltlang. H meeting hin Curfew inthlazal ding le mana um JCILPS thuoitu 6 hai insuo dingin an rel.
    
High Level meeting a rel a ni angin Imphal West le Imphal East District haia hun tiemchin um lova  Curfew puonga um chu vawituk zing dar 5 a inthawk zing dar 10 chen darkar 5 sung  Curfew inthlazal a ni thu zani chawhnungtieng khan State sawrkarin a puong. Curfew inthlazala a um sung hin mi 5 neka tam umbum phal a ninaw bakah mihriem sukna le thina thei hriemhrei le silai chawi khap a nih tiin sawrkar thusuok chun a hril.
            
High Level meeting zo hin Manipur CM O.Ibobi Singh le Principal Secretary (Home), Government of Manipur hai chun Imphal suoksanin New Delhi an pan. CM hi Union Home Ministry in an hung ko leia New Delhi inzin niin ei thu dawngna chun a hril.

Mass Protest sunzawm, JCILPS Convenor man
IMPHAL: Manipur ah Inner Line Permit (ILP) hmang sunzawm nawk ni raw seh tia ngennaian zanikhan Imphal khawpui le a se vel haiah mipui han Mass Protest an la sunzawm pei. Mipui pungkhawm hnawtdarna dingin Police han mipui chu tear gas, rubber bullet le mob bomb hai an kap khum. Mihriem thi le hliem ruok chu an u m nawh. Curfew bawse a protest­a thang hai hin Police hai chu saihli hmangin Police hai an per bakah lungin an deng bawk a nih.
             
Hieng laizing hin zanikhan OC, Bishnupur Police Station le a rawi han JCILPS Women’s Wing Convener Ima L. Nganbi chu Bishnupur ­a a chengna ina inthawk an va man.

Manipur Appropriation Bill passed
IMPHAL: Zanikhan Manipur Assembly chun lungruol takin Manipur Appropriation (No. 5) Bill, 2015 an passed. Hi Bill hi Manipur CM O.Ibobi Singh in hriltlang le pass dinga Manipur Assembly­a a phar a nih. June 26, 2015 a inthawka tan 10th Manipur Legislative Assembly 11th Session chu zanikhan Speaker Th Lokeshwor in hun tiemchin um lovin a khar tah. Hi Session sung hin Govt. Bills 6 passed le sitting vawi 11 nei a nih.

Sum harsat leia Central Pay pek lo
IMPHAL: Manipur sawrkar hnuoia thawktuhai chu sum harsat leia Central (6th Pay Commission) pek thei lova um an nih. Central Pay pek anni chun Overdraft hung um a ta, sawrkar thawktuhai chau ni lovin a ram mipui hai khawmin harsatna an tuok pha ding a nih. Central  Pay hi pek anni chun State sawrkarin Rs. 396 crore seng belsain thla tian Rs. 14.34 le kum tin Rs. 172 crore pei seng belsang a tih tiin CM O.Ibobi Singh in zanikhan Inpuiah a hril. Sawrkar chun AMTUC le AMGEO thil ngen a thei ang ang a pek hlak. Central pay hi a pek nuomnaw a ni nawh. Sum indai naw lei a nih. Hi thua hin inhrethiem ei tiu a, July 20, 2015 a inthawka thawktu han nuorna nei tan in tum hi thul ro tiin CM chun ngenna a siem.

Beacon light thaw thar dingin
IMPHAL: Trinamool Congress MLA Dr I. Ibohalbi chun zanikhan Manipur Assembly­ah Ministers le MLA­hai ta dingin Beacon light thaw thar nawk dingin ngenna a siem. Hi thua CM, O.Ibobi Singh in Dr I.Ibohalbi ngenna a dawnnaa chun, hi thil hi sawrkar thlungpui thupek leia thaw a ninaw a, sienkhawm VIP culture suktlawmna dinga state Cabinet meeting in a khap a nih tiin a hril.

Surrender Scheme­ah a tehlem um lo
IMPHAL: Ministrya of Home Affairs in an duong Surrender­cum­Rehabilitation Scheme hnuoiah  mi tukhawm a tehlem annawleh indiklo taka hi Scheme dawng an um nawh. Hi Scheme dungzui hin helpawl inpe hai chu mi pakhatah thlatin Rs. 4,000 pei, thla 36 sung pek anni bakah Vocational Training le kum 3 sung Bank­ah Rs. 2,50,000 fixed deposit a sie pek an nih tiin zanikhan Dy. CM  le Home Minister Gaikhangam in Manipur  Assembly an hriettir.

Mizoram­ah May thla chena Dengue invawi 19
AIZAWL: Mizorama chun tukum May thla chen khan Dengue invawi 19 an um tiin zanita Mizoram Health Department official thusuok chun a hril.  Kum 2012 khan Dengue invawi 6 le kum 2013 khan Dengue invawi 7 an um niin Anti­ Dengue month hawngna huna health offial  thusuok chun a hril. Mizoram­a Aizawl Civil Hospital le Lunglei town­a hospital hai chu Dengue thuah Sentinel Survillance Centre a ruot an ni a, ELISA Reader le Washer hai sie an nih tiin official thusuok chun a hril.

Bihar Council election­ah BJP ­NDA in seat 12 lain an hrat;
JD­U, RJD le Congress in seat 10 an lak phak
PATNA: Bihar Legislative Council seats 24 uma inthlangnaa vote tla hai chu zanikhan tiem a ni a, BJP inrawinaa NDA chun seats 12 an lak a, Nitish Kumar inrawi JDU, Congres le RJD alliance chun seats 10 an lak a, Independent candidate Ritlal Yadav, tuta Patna hmuna Beur Jail­a intang mek chu thlangtling a ni bawk. Party mala chun BJP in seats 11 lain party mala a tling rawn tak an ni a, LJP in seat 1 an lak a, JDU in seat 5, RJD in 4 le Congress 1 le Independent  in seat 2 an lak a nih. BJP spokesperson Shahnawaz Hussain chun, Council Election result hi  Bihar Assembly Election hung um ding thlalak a nih tiin a hril a, BJP chun Bihar Assembly  seats 243­a inthlangna hung um dinga hin seats 200 bek­ah hratna an chang ding thu a hril. JD(U) ruok chun mipui tamlem ditdan indik tak chu Assembly election huna a hung inlang ding a nih tiin an hril.

TN sawrkarin zangnadawmna Rs. 10 lakh
CHENNAI: Pakistan sipai han Ceasefire bawsie a July 8, 2015 a J&K state a Shopian district huop sung, Baramulla sector­a LoC an kap tuma BSF constable an kap hlum kha Tamil Nadu State a Kanyakumari district a cheng T. Anish a nih. Tamil Nadu sawrkawr chun T. Anish sunghai kuomah zangnadawmna Rs. 10 lakh a pek ding thu zanikhan a puong. Tamil Nadu CM J. Jayalalitha chun mithi sunghai a tuorpui le sunpui thu a hril.

Union Home Minister Guwahati­ah
GUWAHATI: Union Home Minister Rajnath Singh chu zani zan khan Guwahati a hungtlung. Rajnath Singh hin vawisun hin Guwahati ah NE biela Chief Ministers 8, DGPs le Security Agencies haia officials hai meeting a neipui ding a nih. Hi meeting a hin Union Minister of state for Home, Kiren Rijiju le Union DoNER minister Dr Jitendra Singh hai khawm thang an tih.

Chhattisgarh­ah ATM rawk, Rs. 24 lakh inruk
RAIPUR:  July 8, 2015 zan khan Chhattisgarh state a Janjgirchampa district sunga Akaltara an ti hmuna Central Bank ATM chu rukru han suksiein an rawk a, Rs. 24 lakh zet an lak hmang hnungin an fe hmang san. ATM hi Gas cutter hmanga an su ksiet a nih. ATM an rawk hun hi zing dar 3 vel ni dinga ring a nih tiin Manager chun a hril.

Akash missile Air Force kutah
GWALIOR: Union Defence Minister Manohar Parrikar chun zanikhan Maharajpur Airbase, Gwalior hmuna Akash Missile chu Indian Air Force hai hmang dingin Air Chief Marshal  Arup Raha kutah an hlan. Akash missile hin indona ralthuom kg. 60 a rik a phur thei bakah km. 25 a hla a kap phak a nih.

Yoga Compulsory ni lo ding
AIZAWL:  Mizoram state sunga sawrkar schools haiah Yoga chu Compulsory subject­a hmang ninaw nih tiin zani hmasa khan Mizoram School Education Minister H. Rohluna chuan Mizoram Assembly an hriettir. Chun, zani hmasa khan Mizoram Assembly chun “Mizoram Entrya Tax Bill, 2015” a passed. Hi dan hi hmang a ni pha leh items 45 haiah tax lak ning a ta, kum khatah sie (revenue) Rs. 3000 lakh hmu belsa theia a um beisei a nih tiin Mizoram Finance Minister Lalsawta chun a hril.

Nepal thangpuina dingin Rs. 9.76 crore
BHOPAL: Madhya Pradesh sawrkar chun Nepal­a simkhawlei inhning leia harsatna tuorhai thangpuina ding pawisa a khawn a, tuchena hi thila dinga a hmusuok chu Rs. 9,76,60,398 a tling ta niin Madhya Pradesh sawrkar thusuok chun a hril. Thangpuina sum hi Special Bank Account hawnga sie a ni a, thangpuina pek thei hun khar a ni zova pawisa hmusuok hai po po sawrkar thlungpui kutah pek lut ning a tih tiin an CM Shivraj Singh Chouhan chun a hril.

BADP a dingin Rs. 990 crore
NEW DELHI: Kum 2015­16 inkar sunga Border Area Development Programme (BADP) a hmang dingin Rs. 990 crores budget allocatioan siem a nih tiin Home Ministry thusuok chun a hril. Hi pawisa hi international border a inthawk km.10 in a huop china chenghai suk hmasawnna a hmang ning a ta, a bikin sports le rural tourism tieng uor zuol ning a tih tiin ministries of Home, RD, Sports, Health le Human Resource chun a hril.

Haryana­ah Supervisors 4 ban
CHANDIGARH: Haryana­a Women and Child Development Department hnuoia Supervisors sin thaw nuhmei 4 hai chu Graduate certificates lem an hmang tia intumna leiin an sina inthawk ban an nih. Ban­a um Supervisors 4 hai chu Sunita Devi, Babita, Santosh Devi and Indirawati hai an ni a, Haryana Staff Selection Commission, Panchkula fethenga Supervisor dinga lak nia hril an nih. Graduates Certificates hmanga intum an ni le inzawm hin an graduates na an hril certificates hai chu enfel dingin Veer Bahadur Singh Purvanchal University, Jaunpur, Uttar Pradesh a thawn a ni a, hi University chun hieng mi 4 hai record an neinaw thu an hril leia an sina inthawk department in a ban a nih.

ATM rawk tum an kal khum pal
NEW DELHI: July 8, 2015, 2:30AM vel khan ICICI Bank ATM, Mehrauli market, South  Delhi a mi chu Carpenter pakhat, Zakhir (26) an tiin rawk a tu m a, sienkhawm thil a hmet suol pal leiin ama le ama kawt an khar khum pal leiin Police le ATM Guard han an man. ATM a hin  Rs. 5,00,000 a um a hril a nih. Zakhir chun Zu an rui leia ATM hi rawk a tum niin a hril.

NE ah Dams in sietna nasa tak an tlun thei ding
DOOMDOOMA: Geomorphologist le natural hazards specialist Dr Manik Kar chun, India hmarsakbiel (North East region) hi pil a hnawng in ruotui a tam bakah earthquake­prone region a ni leiin NE biela Dam lien tham siem hin NE bielah sietna nasa tak an tlun thei ding a nih tiin  tulai hnai ela Doomdooma Press Club (DPC) huoihawtnaa Doomdooma Girls’ High School hmuna seminar nei huna a hril. Dr Kar hi Nagaon College­a Geography associate professor sin thaw lai zing a nih. Sawrkarin Dam bawl a tumnaa hin mipui han dodala rawl ei insuo a ‘ul a nih tiin a hril. Human civilization a dingin hmasawnna le power chu ei mamaw ngei, sienkhawm civilization a um sinaw chun umzie neinaw nih Dr Kar chun a hril.

Kalita hnam han ST an ngen
GUWAHATI: Assam state a cheng Kalita hnam hai chun Scheduled Tribe (ST) list a zieklut le inthangsatir ve dingin an Chief Minister Tarun Gogoi kuomah Memorandum an peklut. Assam state sunga hin Kalita hnam mi nuoi 80 lai zet an um a hril a nih. Tuta hma deu khan Assam sawrkar chun a state sunga hnam (communities) 6 hai chu ST list­a zieklut dingin a lo remti ta a nih.

Aug. 17 ah SL Parliamentary election
COLOMBO: Hungtlung ding August 17, 2015 khin Sri Lanka Parliamentarya Election nei ning a tih. Sri Lanka President hlui Mahinda Rajapaksa khawm Kurunegala P/C a ngir dingin zani hmasa khan nomination paper a file. Sawrkarna chel mektu United Peoples Freedom Alliance (UPFA) thuoituhai khawmin nomination paper an file tawl.

Modi le Sharif han inbiekna sukthar dingin
UFA: Zanikhan PM Narendra Modi le Pakistan PM Nawaz Sharif hai chu Ufa, Russia rama inbiekna an nei a, an ram pahnihai inkara inbiekna sukchawla um ta chu suk thar nawk an remtih. Rambung pahni haia National Security Adviser hai  chun territorism chungthu thangsain New Delhi­ah inbiekna nei an tih tiin India  Foreign Secretary, S. Jaishankar chun a hril.
--------------------------------------------------------------------------------------------------
VAWISUN THUPUI
Nunghak chun an cheina thuomhnaw chu a theinghilin, mo chun a mo puon chu a theinghil thei am a nih? Ka mihai ruok chun nihai tiem seng loa inthawk tah an mi theinghil a nih. ­ Jeremia 2:32

Editorial: Ram le hnam humhal

Ram le hnam humhalna kawngah Manipur mihai hi ei thanghar ve tan ta leiin lawm a um hle.  Humhal pei dinga ei thangruol a tul a nih. Upa han thangruol hi hratna a nih an lo ti ang hrimin  ei ram le hnam humhalna ding chun ei thangruol a, neitu le chawngpu chan seng changa theitawp takmeu suoa hma ei lak nuom a um. Ei ram le ei hnam hi tuhai lak am ei humhal ding ti hi ei hrietchieng a pawimaw em em el a nih. Manipur mi ni lo, ramdang mi, state dang mi, kawr le vai ei tihai hi an lungril siet lei le chimral mi tum hrim hrima Manipur­a hung lut ni bik kher naw nihai.
    
Ei rama an hung lutna san nia inlang chu an ditzawng sin hadam, a fur a thala thaw thei zing, intodelna ding a um a nih ti hiengang mihai hin an hmu thiem bik a nih ti inla a suol awm naw ie. Ei rama hnam dang hung lut, ei mikhuolhai hi an um sawng ta ding ning a tih, ti dingin an um sawtin an cham sawt thei hle. Hi thil hi ienglei am ei ti chun ei thaw pei lo sinhai an thaw nuom a, ei thaw thei lo sin hai an thaw nuom a, a ram mihai nekin an hlaw a tlawm lem khawma an lungawi thei pei a nih.
    
Ei ramah nitina sin thaw ding an hmu zing bakah ralmuong takin an u m thei leiin ei inring le inveng hmain ei ramah hnam dang um ei dit neka tam an lo um ta a, a dang an la hung lut belsa ta pei leiin an mi chimral ei  inlau a, Inner Line Permit System hmang  nawk dingin sawrkar  ei nawr tlut tlut el an ta hi! Chun, ei state sawrkarin hnam dang laka invenghimna ding dan fel tak le khau tak a lo neinaw bawk leiin ei state a inthawk hnam danghai ei pawng hnawtdawk el thei ta si naw leiin ei buoise let der an ta hi!
    
Ei thenum state hai laia Mizorama Civil Societies Organisation um hai laia a lien tak, members hau tak le thil thaw thei em em el YMA khawma “ram le hnam humhal” an ngaipawimaw a, YMA inkhawmpui chun “ram le hnam humhal” ti chu an pawl thupuiin an puong a, tuchen hin hi thupui hi YMA thupui a la nizing. Hi thil hi ram le hnam humhalna kawnga hmalakna dinga pawimaw a ni a, Manipur mihai inpumkhatna a sie chun ram le hnam a kawidar ding tina a nih. Chuleiin, inpumkhatna hi ram le hnam humhalna dinga pawimaw hmasa, sirbi bul a ni leiin an tei zawng amani, an lak hran zawnga boruok um thei ding hi veng a pawimaw em em el a nih.
     
Ram le hnam humhal dinga siem that ngai hmasa tak chu ei lungril puthmang (morale) hi a ni ring a um. Ram le hnam humhal ding chun ram le hnam hmangaina lungril (patriotism) nei hi a pawimaw hmasa awm ie. Lungril taka ram hmangaina chun fakruk a do nghal a, hlemletna a do nghal a, indiklo taka thil thaw a do nghal a, thil chin taluo le lien taluo a um nawh. Hmunphittu a inthawka politician, sawrkar sinthawa inthawk kut sinthawtu, mani zawn senga mani  mawphurna indik le ringum taka hlensuoktu chu ram le hnam hmangaitu a nih.
            
Assembly session nei lai chauva ramri buoina thu, ILP thu le a dang dang thu hai ngaisak le khekpui a, Assembly session zo le inruola a ri khawm hriet ding um ta lova vawi boa bo nawk el thil hin chu ram le hnam humhal ngai naw nih. Indik, taima, ringum le huoisen taka ei hmalakna a tawprawtna chena thaw le tlungpui ngamhai hi ram le hnam hmangaituhai an nih.

Post a Comment

Powered by Blogger.