Tuolsung
Tukum sung Malaria Positive 30 hmu a nitah: CMO
CCPUR: July 9, 2015 (zani) khan Dr Thangchinkhup Guite, CMO& DMO/CCPur inrawinain CMO Mini­Conferene Hall­ah Malaria Department hnuoia Male Health Superviser, Male Health Worker, Microscopist; Multi­Purpose worker han joint meeting an nei. Hi huna CMO in thu a hrilnaa chun Contractual staff han kum 1 chuong dam hlaw hmu lova an um hlak laiin regular staff hai chun tha taka hlaw an hmu bakah fak zawngna, nuhmei le nau chawmna a ni leiin tha taka sin an thaw a tul thu a hril a. Kum 2014 June thla chen khan Malaria Positive 13 hmu anni laiin tukum June, 2015 chen khan Malaria Positive 30 hmusuok a nita a, kum hlui le tekhiin tukum hin Malaria case a tamlem tiin a hril.
    


Malaria damdawi le blood slide thawna ding State Malaria Officer kuomah vawi tam tak ngen a nita a, sienkhawm sawrkarin stock a nei tamnaw leiin tukum sung slide 3000, khawsik damdawi mum 15000 chau a la hung pek a. Malaria natna dona hlawsam anga a umna thuah State sawrkar tlinnawna le thawktu hai tlin nawna khawm a um; hmatieng khawsik a damnaw an hung um pei ding a ni leiin thawktu hai chu hma nasa nawk zuola la dingin a a ngen.

L.  Thahgen in School tum tum inspection a thaw
CCPUR: Mr L. Thahgen, Director, Ministry of Health and Family Welfare, Govt. of India, New  Delhi chun zanikhan CCPur khawpui sunga Govt. School tum tum hai a kan a, Swachch Vidyalaya Abhiyan hnuoia sin thawna (Toilet) hai a enfel. Mr L. Thahgen hin zani zantieng 1:45PM khan Tuibuong Jr. H/S a Mid­Day Meal semna le Toilet a enfel. July 10, 2015 hin inspection a thawna sunzawm a ta, July 13, 2015 khin New Delhi a pan nawk ding a nih. L. Thahgen hi MHRD le MOHFW in CCPur District­a Swachh Cidhayalay Abhiyan le an zawmpui hnuoia sinthawna hai inspection thawtu dinga Observers­a a ruot a nih.



SP/CCPur in SDPO le OC Parbung hai a release
CCPUR: L. Mangkhogin Haokip, IPS, SP, CCPur chun SDPO/CCPur chel mek Mr Emmanuel Fimate, MPS chu IRB­ah Asst. Commandant chel dingin zanikhan a released. Chun, OC Parbung Police Station chel mek Inspector Tlangthangzuol khawm CID (Special Branch) sin chel dingin SP chun a released bawk.

M.Gouzamang in thungna le Dawkan 10 a pek
CCPUR: New Lamka East MDC M. Gouzamang chun zani 10:00AM khan Vimala Raina High School kuomah an hmang dingin thungna le dawkan 10 a pek. Hi hun hi bieltu MDC G. Thangkhosuanmung khawmin a uop.
    


M. Gouzamang Guite chun, hi school a Principal in school a enkawl that leia student thungna ding nei lo hiel khawpa an umna thua lawmum a ti thu hrilin school tha taka a fepeina dinga MDC hai chu thlawp dinga inpeisa an ni thu, ei ram le hnam, society hmasawnna dingin  education a pawimaw tak a, tu hnunga ei ram le hnam thuoitu  la hung ni ding siemtu chu school a nih tin a hril. Education in ramri a neinaw a, MDC biel a ni nawh ti khawm a u m thei naw bawk. Student hai thaw ding chu lekhatiem a nih tiin a hril a, MDC a tling nawk hnung students Class X & XII pass mi 500 chuong lawmpuina thil a pekta thu le tuta mi hi a vawihnina a ni thu a hril.
    
G. Thangkhosuanmung chun, student hai chu exam huna passed ringawt ni lova mani inchuklai tha taka an hriet a pawimaw thu, Pathien hrezing puma lekha inchuk ding le ei hmatieng ding tu huna innghat a ni leiin student hai chu hun hmang thiem dingin an fui. Vimala Raina H/S a hin student 600 chuong an um a nih.

RPF overground 1 le HPC cadre 1 man
CCPUR: Police a inthawk ei thu dawngnain a hril danin July 8, 2015, 6:00PM khan 7­Assam Rifles han B. Vengnuom area, Tuibuong­ah RPF overground worker Sagolsem Kulla Mangang (50) s/o (L) L. Babu of Mangang of B. Vengnuam an man. 7­Assam Rifles chun Police kuta an pek a, Police chun FIR No. 60 (7) 2015 CCP­PS U/S 20 UA (P) A.Act an registered khum.
    
Chun, Police­a inthawk ei thu dawngnain a hril danin July 8, 2015, 2:00PM vel khan 7­Assam Rifles chun Bijang Area­ah HPC­P cadre Lalhlawthlinga (40) s/o L. Nghinglo of Kholen, Aizawl District, Mizoram an man a, a kuta inthawk 9mm Pistol mu 1, demand letter 1, Nokia Mobile handset 1 le SIM Card 2 b akah Rs. 3810/­ an man sa a, CCPur Police Station­ah an peklut. Police chun hi le inzawm hin FIR No. 59(7) CCP­PS U/S 400/384 IPC & 25 (1­C) A.Act an registered.

Headline
ILP thuah Assembly minutes 10 sung sukchawl;
MRVTMW Bill, 2015 siem that annawleh thlakthleng a ni ding
IMPHAL: Mipui nawrna le ngenna nasa tak a um leiin Manipur Regulation of Visitors,  Tenants and Migrant Workers Bill (MRVTMW), 2015 chungchangah Selkaltu Pawl (TMC) MLAs, Kh. Shyamkuamr le Dr I. Ibohalbi han Calling Attention Motion zanikhan Manipur Assembly­ah an pulut a, Speaker chun thil pawimaw nia a hriet leiin Short duration discussion in an lettir a, members han hi thu hi an hriltlang a. TMC MLA Shyamakuarm in hi thua  Chanchinbu tum tumhai thu ziek a tiemna le inzawmin Congess MLA Dr  Ng. Bijoy in a hung khak tawl leh Kh. Shyamkumar chu ngirsuokin an selpui a.  Assembly Speaker Th. Lokeshar chun buoina a suksuok ding nia a hriet leiin zani sun dar 12:30 a inthawk 12:45PM chen minutes 10 sung Inpui inthung a sukchawl pha.
            
Hi zo a Inpui inthung sunzawm nawk a ni huna Chief Minister O.Ibobi Singh chun, MRVTMW Bills hi ei State mipui han an dit naw a, Inpuiin lo pasi ta sienkhawm ei Governor chun pawmpui lo le suoi thaw lovin a hung thawnkir a, tuhin reserve in a um mek a, State sawrkar chuan hi Bill hi President kuomah direct in thawn naw nih. Manipur Assembly Monsoon Session neia um mek zova MRVTMW Bill chung­changa hin state sawrkarin meeting ko a ta, hi meeting a hin experts, NGOs, JCILPS, Political party tuam tum thuoituhai fielin hriltlang ning a ta, chu huna mi tam lem dit dan le tha ti angin hi Bill hi siem that le hnawla a thara thlakthleng dingin State sawrkar chun riruong a siem a nih tiin zanikhan Manipur Assembly­ah a hril. Chun, a tul a ni chun hi thua hin Assembly Special Session khawm ko ning a tih tiin CM chun a hril.

Tuta thla sung MDC han sesamna
IMPHAL: Manipur­a ADCs 6 hnuoia MDC dinga thlangtliang thar hai chun District Headquarters tina ADC Office haia MDC dinga sesamna an nei chu State sawrkar dit dan a nih. Amiruokchu, Security thilah fel hlelna a la um leia sesamna hunser nei hun hi sukhnuk a ni a, tuta thla sung ngei MDC dinga thlangtlaing thar han sesamna nei an tih tiin zanikhan Dy. CM Gaikhangam chun Manipur Assembly­ah a hril. Hill districts 5 haia District Council complexes bawlna sin chu tukum November thla hin zo hman beisei a nih tiin Gaikhangam chun a hril bawk.

Demands for grants 7 pass nawk
IMPHAL: Zanikhan Manipur Assembly chun Demands for Grants 7 an pasi nawk. Demands for grants pasi­a um hai chu, DIPR, Tribal Affairs, CAF & PD, Election, Fisheries, Panchayat le  Sericulture hai an nih.Demand pasi­a um hi a rengin Rs. 581,29,36,000 a ni a, I&PR a dinga Demand pasi­a um chu Rs. 5,25,76,000  a nih.

11AR han pasal 1 an kap hlum
IMPHAL:  Zani zing dar 3 vel khan Chandel District a Moreh Sub­Division sunga T. Minou khuoah 11 Assam Rifles han helpawl ni dinga ringhla pasal pakhat an kap hlum a, Moreh Police Station­ah an va sie. Kap hluma um kuta inthawk Pistol 1 hmu a nih. T. Minou khuo hi Moreh a inthawka km. 2 vela hlaa um a nih.

In 300 zet tuiin a chîm
IMPHAL: Zani zingakr dar 9:30 vel khan Thoubal District a Tentha Khunou le Tentha Khongban inkara Wangjing River bank a chim leiin tui a tam hle a, In 300 zet tuiin a chim niin ei thu dawngna chun a hril.

Mass Protest rally nei ding
IMPHAL: ILP chungthua Sapam Robinhood (16) thina le inzawmin JCILPS chun vawisun hin Protest rally nei an tum. Hi thina thua hin zanikhan Dy. CM le Home Minister Gaikhangam chun inquiry thaw ning a tih tiin Inpuiah a hril.

AR han Khaini bur 2700 leh an man
IMPHAL:  20th Assam Rifles han July 8, 2015 khan NH­102 a Bongyang, Chandel District hmuna Maruti Van AS 01U 5817sukchawla an dapnaah N. Bimol Singh (37) s/o N.  Shamungou Singh of Kongba Makha Leikai, Imphal East District chu Khaini (Bengali Spit Tobacco) bur 2,700, Rs. 40,500 manhu leh an man a, Food Security Officer, Chandel kutah an inhlan.

October a inthawk NFSA tan
IMPHAL:  CAF & PD Minister M. Okendro chun October, 2015 a inthawk khin Manipur­ah National Food Security Act hmang le Scheme thaw tan ning a tiah tiin zanikhan Manipur  Assembly an hriettir.

Curfew hlip a la ni nawh
IMPHAL: Zani hmasa zantieng dar 4 a inthawka Imphal East le Imphal West Districts haia hun tiemchin um lova Curfew puonga um chu hlip a la ninawzing. Curfew sunga buoina suok um hriet a ni nawh. Curfew hin Security, Health, Power, Water Supply, BSNL etc hai chu huomsa naw nih. Sawrkar thawktuhai chu Curfew PASS a um naw khawm an Identity Card seng chawi dinga inhriettir an nih. Curfew zam a ni lei hin Imphal khawpui sunga chun bazar le dawr hai khar vawng an ni a, sipai motor ti lo motor dang inlawn  hmu ding an um meu nawh.

Doctor­hai MMC a registration thaw dingin
IMPHAL: Manipur state sunga Doctor­hai po po chu Manipur Medical Council (MMC) Act, 2009 le Medical Council Rules, 2013 part­ VII Rule No. 34 le Sub­Rule (2) dungzuiin September 9, 2015 chena MMC a in register ding le an register nawhai chu dan angin an chungah action lak ning a tih tiin Manipur Medical Council thusuok chun a hril.

Financial Committees 3 ruot ding
IMPHAL: Vawisun hin Manipur Assembly Session­ah Financial Commitees 3, Committee on Public Accounts, Committee on Public Understandings haia Chairman le members dinghai ruot ning an tih. Tuta tuma ding chun vawisun hi Manipur Assembly Monsoon Session tawpna tak ding a ni tah.

ADC­ hai enkaitu ding Ministry hran
SHILLONG: July 8, 2015 khan India hmarsak biela Autonomous District Councils (ADCs), Sixth  Schedule hnuoia um haia Chief  Executive Member (CEM) han Shillong­ah meeting an nei a, sawrkar thlungpui kuomah ADC­hai enkaitu ding bik Ministry hran indin dinga ngen ni raw seh tiin lungruol takin thutlukna an siem. Hi thil bawzuitu ding hin Forum of Councils under Sixth Schedule (FOCUSS) an indin a, Chairman dingin HAADC CEM le Vice Chairman in N.C. Hills ADC CEM  Debojit hai an ruot.

Nagaland state pumpui Disturbed Area in
NEW DELHI:  June 30, 2015 a inthawk Nagaland state pumpui chu Union Home Ministry in kum khat dang “Disturbed Area” in a puong nawk. Disturbed Area hi Armed Forces (Special Powers) Act, 1958 under Section 3 dungzuia puong a nih. Hi Act dungzui hin sipai han Warrant thang lovin mi an man thei bakah In, mihriem taksa le an thil neihai an dap a thieng vawng a nih.

Rama riek nupa a thisaa hmu
AIZAWL:  July 8, 2015 zing  dar 9 vel khan North Serzawl le Chhanchhuana khawpui village inkara Tuituang vadung kama lo tuah nupa tuok Lalrinchhana (45) le Lalzuimawii (40), Chhanchhuahna khaw mihai chu a thisaa hmu an nih. Lalrinchhana ruong hi tu namthlakah hmu a ni a, a ringa hmun hniah hliemna be hmu a nih. Lalzuimawii ruong chu tu sunga kawtkhar bulah hmu a ni a, a ring hmun 3 le a dar changtieng  hliemna be pakhat hmu a nih. Nupa tuokhai hi an ram riekna hmuna that ni dinga ring an nih.

SC in Vyapam Scam case CBI rel dingin
NEW DELHI: Supreme Court chun zanikhan Vyapam Scam cases chu CBI rel le suizui dingin thusuok a siem. Madhya Pradesh High Court Chief Justice H.L. Dutta chun Vyapam Scam cases um po po July 13, 2015 khin CBI kuta peksuok vawng ning a tih tiin a hril. Hi case le inzawm hin mi 40 chuong an thi ta bakah hi case a intuma um mi 50 vel an inbihmang taa hril a nih. Hi case a hin Himachal Pradesh Governor, Ram Naresh Yadav khawm an rawla intum a ni leiin ama le ama an ban naw khawma ban a ni el thei. Hi chungthu hi PM ramdang inzin New Delhi a hungtlung pha leh sukfel ni dinga hril a nih tiin ei thu dawngna chun a hril.

Kum 5 lungin intang theina
NEW DELHI: India hmarsak biel mihai an nina ni  lova hmusit taka ko hlakhai hremna dingin IPC siem that tum a nih tiin Ministry of Home Affairs chun Delhi High Court an hriettir. Hi dan thar 153C and 509A IPC chu Parliament­ah phar le pasi ning a tih tiin Home Ministry chun a hril. Hi dan hi dan anga hmang theia a um huna chun India hmarsak biel mihai deusaw taka ko le betuhai chu bail­a suok thei lo ding le kum 5 chen lunginah an intang thei ding a nih.

AICC in thangruol dingin a ngen
NEW DELHI: AICC Vice President Rahul Gandhi Chairman nina hnuoiah July 8, 2015 khan New Delhi­ah AICC High Command meeting nei a ni a, Assam state a Assembly election hung um dinga Congress party an hrat thei dan ding chungchang an hriltlang. AICC High Command chun Assam state a Congress lukhaitu mi 3, Tarun Gogoi, CM; Anjan Dutta, President Assam Pradesh Congress Committee le Himanta Biswa Sarma hai chu thangruol dingin a ngen.

Mumbai Police hai an inralring
MUMBAI: Independence Day ni annawleh a hmain helpawlhai chu Mumbai khawpui sungah chet a, bomb sukpuok an tum ti intelligence report a um leiin Mumbai Police­hai an inralring tha hle. Pakistan thangsana nei Lashkar­e­Toiba helpawlhai chu hungin Mumbai khawpuiah hin an hung che nawk el thei niin intelligence report chun a hril. LeT pawl hin tuipui chu lampuia hmangin Mumbai hi an hung pan hlak a nih.

Truck driver thatin a kut le kei hai an tanbawng
JORHAT: Truck driver Junti Ali chu July 6, 2015 zingkar inhma tak khan Golaghat district, Assam sunga Rangamatty Goan village a cheng han Bawngpui le bawngchal, a rengin bawng 6 le a Truck khal leh an man a, an vuok hrawn sup sup leiin a hliemna tuor lovin a thi a, a thi el hi la dittawk lovin a ke 2 le a kut pakhat hai an tanbawng pek a, NH­37 ah an sie tiin P.P. Singh, SP, Golaghat district chun a hril.

Army han Canvas pheikawk aiah sports shoes
NEW DELHI: Indopui pahnina hun laia inthawka Army hai kuoma PT naa bun dinga pek hlak pilvut rawng Canvas pheikawk chu sports shoes a thlakthleng dinga hma lak mek a ni a,  sawtnawte hnunga contract ziek a ni ta beisei a ni thu Army official thusuok chun a hril. Canvas pheikawk thlakthleng dinga rawtna hi kum iemanizat liemtaa kha lo um ta a ni a, sienkhawm tuchena la hlawtling lo a nih. Canvas pheikawk hi a quality a thanaw leiin Army jawans hai chun an bun pei tanaw a nih. Army hai chun kum tin canvas pheikawk 20 lakh ve Ordnance Factories Board (OFB) a inthawk an lak hlak a, OFB chun amain canvas pheikawk hi siem ta lovin Army hai ta ding chauvin civilian suppliers hai kuta inthawk an chawk sawng ve ta a nih. Army personnel hai chu thla 6 dan peiah canvas pheikawk le uniform dang hai chu a thlawnin pek an ni hlak. Sports shoes hi canvas neka a tlo lem ring a ni bawk

Nuhmei a mel leiin a ruol han an that
MUMBAI: Maharashtra state a Ahmednagar district sunga Nutan School, Rajapur a class VII inchuklai Kiran Gorakhsh Sonawane (13) chun a classmate nuhmeite a mel tia intum le an theida na leiin a ruol han (pasal) an vuok hlum. Hi thil hi June 26, 2016 a tlaung le Kiran hi vuok hliemna a umna tuorzo lova July 1, 2015 a thi niin Police han an hril. Hi thina hi thikthu siet leia tlung a nih.

Delhi Home Secretary tharin Sahai
NEW DELHI: Zani hmasa khan Union Home Ministry chun Delhi Home Secretary thar dingin senior IAS Offier, S.N. Sahai a ruot. Mr Sahai hi 1986 batch IAS Officer, Union Territory cadre a nih. Delhi Home Secretary ruotna thua hin tuta hma deu khan Delhi­a sawrkarna cheltu AAP le Delhi Lt. Governor Najeeb Jung hai nasa takin an lo inkeibuoi hrep a nih.

Constable helpawla inlet kap hlum
SHILLONG: Meghalaya Police Department hnuoia Constable sinthaw, a hnunga helpawl, Garo National Liberation Army (GNLA) a inlet le thang, Savio Marak of Williamnagar, East  Garo Hills, Meghalaya chu zani zingkar dar 4:30 vela Rengregra village a Swift Weapons & Tactics (WWAT) pawl le an inkaptuonaah kap hlum a nih. A kuta inthawk Pistol 1 hmu a nih.

Sonia Gandhi in Iftar dinner
NEW DELHI: AICC President Sonia Gandhi chun Iftar Dinner (zanbu) buotsai a tum a, hi dinner a hin Selkaltu pawl tienga thuoituhai (TMC, BSP, NCP, National Conference (NC) le Samajwadi party) hai a fiel tawl. Parliament Monsoon Session hung um dinga hin Selkaltu pawlhai an thangruol a nuom leia hi Dinner hi Sonia Gandhi in a ko nia hril a nih.

Sawrkarin Aug. 7 Natl. Handloom Day in
NEW DELHI: Prime Minister Narendra Modi chun hungtlung ding August 7 hi “India Handloom” day in a puong el thei.  Hi ding le inzawm hin Union textiles minister Santosh Gangwar chun Prime Minister tulai hnai el khan an hriettir tah. Textile ministry chun August 7 hin National Handloom Day vawikhatna hmangna hi National­level in function puithu taka buotsai a tum a, hi huna hin PM Narendra Modi chu khuollien­a thang dingin a fiel ta niin  Textiles minister Gangwar chun a hril.

Mar vadungah pafa an tla hlum
LUNGLEI: Zani hmasa khan Lunglei district, Mizorama Mar vadungah Lawngleng pakhat an let khup a, hi lawnglenga chuonghai laia H. Lalsangzuala le a naunu Lalnunhlu­i (12) hai chu tuia an tla hlum a, Lalnunhlui ruong hi hmu a ni ta a, a pa H. lalsangzuala ruoang ruok chu hmu a la ni naw a, tlawmngai pawl han an zawng mek. H. Lalsangzuala hi UPC(NEI) Missionary a ni a, tulai hnai ela Marpara hmuna posting thar a nih. Marpara North a bazar kai tuma fe an nih.

Kum 1 le a chanve sungin Rs. 8 crore
THIRUVANANTHAPURAM: Kerala state a Ernakulam khawpui sunga Muvattupuzha hmuna cheng le in nei, Police constable Jabin K. Basheer hai sungkuo chu kum khat le a chanve sungin an hung hausa duok el a, Real Estate ah sum an sukpung a, Shopping Malls, buildings tha le Cars manto Rs. 8 crore manhu vel an inchawk el ta a. Mihai makti a tling hman. An hang suizui chun Jabin hi Cochi International Airport a Immigration Department a thawk a ni a, Dubai a inthawk a ruka rangkachak 1,700­1,800 kg, Rs. 400 crore manhu vel lalut le sumdawngnaa lo thang ve a nih ti hrietsuok a ni lein man a ni a, h i taka inthawk hin an hausak thutna san hrietsuokin a hung um ta a nih. Jabin hi kum 28 mi chau a la nih.

Chawlkar 3 sungin Assam­ah bandh vawi 15
GUWAHATI: Gauhati High Court chun Assam state sunga bandh le blockades dan kala puongin Assam sawrkar chu bandh le blockades thawtuhai chunga action na tak la dingin inhriettir sienkhawm Manipur ang thovin umzie a nei ve nawh. Chawlkar thum liemta sung khan Assam rama chun Bandh vawi 15 lai zet a um hman ve. Assam sawrkar chun August, 2012 khan thla khat sunga dingin bandh thaw a ban(khap) a, hi Order hi sukthar nawk a ni naw a, sienkhawm kum 2013 khan Assam Prevention of Unconstitutional Bandh Bill 2013 siemin bandh thawtu hai chu kum 2 chen lungin intang thei ding le fine Rs. 10,000 chawi ding ti a ni a, sienkhawm a hlawtling naw ve hle.

WB a pawl pahni hai inbeituonaah 1 a thi
KOLKATA: West Bengal­a chun zani hmasa zan khan Pub­a bill pek nuomnaw leia pawl pahni hai inkara inbeituona tlung leia silai hmetpuok a ni leiin mi 1 a thi a, midang 2 an hliem. Hi thil hi misuol  ruol 20/30 vel dingin bill an pek nuomnaw leia Pub neitu le thawktu hai an inbeituo huna tlung a nih. Hi thil tlung le inzawm hin Police chun pasal pakhat an man a, a dang hai khawm man tuma zawng mek an ni bakah Police chun CCTV a thlalak hai an enfel mek. Silai hi bill pe nuomlo misuol ruol hai hmetpuok a nih.

Inderjeet Singh in World University Games ah Gold
SEOUL: Lung deng (shot­putter) hrat Inderjeet Singh chun Gwangju, South Korea hmuna World University Games nei huna Gold Medal a lak. Inderjeet Singh hi World University Games­a India mi Gold Medal la hmasatak a la nih. Inderjeet hin a vawikhat dengnaah a fault a, a hnunga a deng haia chun 18.79 metres, 18.95m , 19.80m a le a deng tawpna takah 20.27m a hla a deng phak a nih. Inderjeet hi thla thara World championship um dinga thang dingin legendery shot­putter John Carl Godina hnuoiah training ding a hril a nih.

Myanmar General Election Nov. 8­ah
YANGON: Myanmar sawrkar chun July 8, 2015 khan Myanmar General Election chu November 8, 2015 a nei dingin a puong. Election a hin Parliament a Inpui pahni um haia Members of Parliaments (MPs) dinghai thlang an ta, MPs a thlangtling han an ram President thar ding an thlang ding a nih. Myanmar rama Selkaltu pawl National Legue for Democracy (NLD), Aung San Suu Kyi thuoina hnuoia mi chun inthlangnaa hin an thang ding le ding naw an la hril thei naw a, meeting nei an ta, chu huna an la rel fel ding chau niin an party spokesperson Nyan Win chun a hril.
------------------------------------------------------------------------------------------------------------------
VAWISUN THUPUI
Chun, Lalpa chun thuoi rawp a ti cheh a, hmun tawla khawm sukkhawp a ti che a, i ruhai khawm sukhrat bawk a tih; chun, huon tuia chawm ang le, tuihnar kang ngai lo ang ni tang i tih. ­ Isai 58:11

Editorial: ILP leia thina

India rama state lien hai ngaituo chun Manipur State chu chiterek el, mi nuoi 27 chuong met umna a ni a. A sunga cheng hai hi khawvel khawsakna phungah ei lan hnuoi a, hnam dangin awlsam taka an chimral el thei ngirhmuna um ei nih. Hi thil hi mi lo awp hmasatu saphai khan an hmuin an hrietchieng hle a, chuleia invenghim bikna dan Inner Line Permit (ILP) kha an mi lo siem pek a nih. Amiruokchu, ei ram le ei hnam ta dinga a thatna le a pawimawna hi ei ram thuoitu haiin an lo hriettawk naw leiin Manipur a inthawk ILP hi hlipin a lo um ta leiin thangtharhai ta dinga thil pawi takel, thina chen a hung intlun el ta hi a pawi bek bek el a nih.
    
ILP hi hrilfie rak ngai ta lo khawpa ei rama inlar em em el, thuthar tulai hnai ela hung intan a ninaw a, kum tam tak liemtaa kha Manipur State a hin ILP thu hi hrillang chau ni lova hmang nawk dinga ngen le nawrna leia bandh, lampui hrawna le nuorna chi hran hran lo nei ta hlak a nih. ILP hi Meghalaya state mipui khawmin a thatzie le a pawimawzie an hriet thar a, ILP hi nei ve an nuom a, sawrkar thlungpui le an state sawrkar nasa takin nawrna an lo nei ve ta a nih. Amiruokchu, thina tuok pha hiel chu an la um ve nawh.
    
British­hai khan Manipur hi ram chiterek, mi tlawmte umna, ei se vela hnam tam lem le thil thaw thei lem han awlsam tea an mi chimral el thei ei nizie hriein, ei inhumhimna ding tiin dan fel tak a mi lo siem pek a nih. Amiruokchu, ei ram le ei hnam thuoitu hmasa hai lo fimkhur tawk naw lei, an hmathlir a lo sei naw lei le ei ta dinga a thatna le a pawimawzie an lo hriettawk naw leiin hi dan hmangna hi hlipin a lo um a, a pawi takzet el a nih.
    
ILP in a tum tak chu tuolsung mi ananwleh a ram mihai annawleh a state mihai bakah an ram, an hnam nunphung le an thil neihai humhim pek ding ti a nih. ILP dungzui chun a ram mi ni lo, hnam dang le state dang mi han in le lo, huon le ram an ni thei nawna ding dam, hnam dangin sumdawngna an control thei nawna ding dam, India mi khawm nisienla Manipur state mi ni lo, hnam dang po poin an nuom hun huna ei ramah an hung lut thei nawna dingin Inner Line  Regulation/Permit (Bengal Frontier Provision Act, 1873) hi tha tak le var takelin an lo siem a, an lo hmang a nih.
    
India hmarsak biela states 8 um hai laia states pathum, Mizoram, Nagaland le Arunchal Pradesh (M:NA) haiah ILP hi hmang a la nih Hieng states 3 han ILP an la hmang thei chun iengleiin am Manipur a khawm hmang thei lovin um bik ei ta? tia indawnna siem thei a nih. Amiruokchu, British­hai enkawlna hnuoia an um laia inthawka zalenna an hmu hun chena khan hieng states 3, Mizoram, Nagaland le Arunachal Pradesh hai chu British enkawlna hnuoiah an um a, sienkhawm Manipur ruok chu Lal/Rengpa enkawlna hnuoia a lo um a nih ti ruok chu theinghil chi ninaw nih.
            
ILP hi Manipur sawrkarin a thu thua an umtir thei annawleh hmang nawk ni raw seh tia order an suo thei a ni nawh. ILP chungchanga thuneitu, a Tala le a Chabi kawltu chu sawrkar thlungpui (Union Home Ministry) a nih ti hriet tlat ding a nih. Hi lei hin ILP Manipur­ah hmang nawk a hung ni theina ding chun Manipur state sawrkar le a state mipuihai ei thangruol a, Union Home Ministry ei inhmin chu a tulin a pawimaw tak a nih. Mani le mani ei inkal le ei inbeituo sung hin chu ILP ei ngenna hin hlawtling ngai nawng ei tih.

Post a Comment

Powered by Blogger.