Tuolsung
Hmar Inpui in MDC hai lawmpuina
CCPUR: Hmar Inpui (HI) inrawinain July 3, 2015, 4PM khan Hmar Secretariat, HSA Campus, Rengkai, CCPur­ah ADC CCPur­a Hmar mi MDC dinga thlangtling thar mi 4­ Pu Lal Hossan MDC, Vangai; Pu Lalhmangpui MDC, Pherzawl/Parbung; Pu Lalhrillien MDC, Saikot le Pu Lalditsang MDC, Senvon hai lawmpuina, tawngtai pekna le bufakpuina hun hmang a nih. Hi huna hin Hmar hnam sunga pawl tum tum HI, HCLF, HYA, HSA, HAA, HWA, HNU thuoituhai le hnam sunga mi pawimaw dang dang an thang. MDC hai tling hai hi Hmar Thangsuo Puon insiltir anni bakah, Kel le Ar thatin zantieng bu fakpui an nih. MDC hai tawngtaipekna Rev. Dr Lalhmuoklien in a nei.
    

Hi huna` hin Dr John H. Pulamte, President, HI in lawmpuina thu le hnam hmalaknahai a hril  bakah Pu David Buhril Gen. Secy., HI; Pi JL Sawmi President, HWA/GHQ, Pi Chongtuozing Gen. Secy., HWA/GHQ le MDC 4 hai khawmin thuhrilna hun an hmang bawk. MDC 4 hai chun hnam ta dinga an thaw thei a lo um a ni chun inpeisa an ni thu, ADCs hai 6th Schedule hnuoia mi a ninaw leia harsatna tam tak a um leia mipui tieng khawma duthusama thil a fe theinaw khawma hre thiem dingin an ngen.
    
Hi huna hin hnam hmalakna dinga inrawnkhawmna khawm nei nghal a ni a, a bikin Assam le Manipur­a Hmar hai harsatna thu le Hmar Hnam puon chungthua rawtna lut hai bawzui dan ding hai hriltlang a ni bawk. (input LRS Puruolte)

ANM inchuk nuom hai ta dingin
CCPUR: Female Health Workers Training School (FHWTS), CCPur hnuoia ANM inchuk nuom han July 10, 2015 chenin CMO, CCPur le Director Health, Imphal haiah Application form lak thei le July 15, 2015 chenin peklut thei ning a tih. Entrance test July 26, 2015 in nei ning a tih. Admit Card chu July 20­24 inkar sung sem ning a ta, thuchieng lem Principal FHWTS ah hriet thei ning a tih.

June 11 in Lok Adalat a um ding
CCPUR: July 11, 2015, 10:30AM khin National Legal Services Authority and Manipur State Legal Services Authority, Churachandpur District Legal Services Authority chun Chief Judicial Magistrate Court,CCPur hmuna one Day LOKADALAT buotsai an tum.Hi huna hin Electricity/ Water/ Telephone/ Public Utility le thubuoi dang dang nei hai chun July 6, 2015, 12:00Noon chen khin Chairman/Secretary, Churachandpur Legal Services Authority, CJM CCPur Office­ah ziekin peklut thei ning a tih tiin Secretary, CCPur Legal Services Authority, CCPur Manipur chun inhriettirna a siem.

Assam Rifles han pasal 1 an man
CCPUR: July 2, 2015 zantieng dar 4:30 vel khan 7­Assam Rifles han Matejang khuoah pasal pakhat Thangkholal (32) s/o Onkhomang of Matejang chu sumdawlna (extortion activities) leiin an man a, zani 9:00AM khan CCPur Police Station­ah an peklut niin Police thusuok chun a hril. Thangkholal hi Police han FIR No. 55 (7) 2015 CCP­PS U/S 25 (1­C) A. Act an registered khum.

Pasal pakhat a thisaa hmu
CCPUR: July 3, 2015, 12:30 vel khan New Zoveng khaw bul, C. Phailen­ah pasal tu ti hrietlo Nulla sungah a thisaa hmu a nih. Police­ah report a pek a, Police han zani zantieng 1:30­2PM khan a ruong hi an va lak a, District Hospital Morgue­ah an sie. Mithi pa hin IRB form kekawr le T­Shirt dum a hak a, a kut khingkhatin Rs. 10 note a chawi. Mithi hi Stephen Thangvanglian (25) s/o Mangliankhup of Zoumunnuam a nih ti hriet a ni tah.

BSI Annual Conference
CCPUR: July 25­26, 2015 inkar sung khin Bible Society of India, CCPur Branch chun ECA­Central Church, Hill Town­ah Annual Conference, 2015 nei an tih. Conference hun sung hin Rev. Thangkhosiem Gangte, Executive Secy, ESC, Rev. L. Khamkholun, Director of Mission, EBC le Rev. LB. Angam, General Director, ECCI han Pathien thu hril an tih.

Kuki Nampi kipumkhatna maicham July 7­ah
CCPUR: July 7, 2015, 11:00AM khin Songpi Maicham, CCPur­ah “Insah bang’a kasah phat kitding” Jer. 3:3­7 ti thupui hmangin Kuki Nampi Kipumkhatna Maicham (KNKM) hmang ning a tih. Hi huna hin Rt. Rev. Dr Ginkhanmung, MELC in Pathien thucha hril a ta, ADC member hai tawngtai pekna le P.S Haokip President, KNO in thu hril a tih.

Child Health Screening nei a nih
CCPUR: July 3, 2015, 11:00AM khan Chiengkawnpang Community Hall­ah National Health Mission (NHM) chun Rashtriya Swasthya Karyakram hnuoiah Child Health Screening, Medical Camp nei a nih. Hi huna hin Dr Donna Vungngaihching, MO Ayush, Niangbiaklun, Pharmacist le Lalhlimpui ANM han naupang hai hriselna an enfel. Chiengkonpang Anganwadi Centre 6 hnuoia hi health Screening­a thang naupang hai a thlawnin Homeopathic damdawi pek an nih. Zani hmasa khawm khan Bungmual khuo ah Child Health Screening nei a ni bawk.

SP campus­ah thingkak an phun
CCPUR: July 3, 2015, 7:00AM khan Mr L. Mangkhogin Haokip, IPS, SP, CCPur inrawinain Police le VDF han  SP, CCPur office campus­ah social work neiin thingkak an phun. Hi huna hin thingkak 120 phun a ni a, thingkak an phun hai lai Zawngta, Lamkhuong le thingkak dang dang an thang.


Headline
Kum 80 hnunga a hmasatakna dingin Socio­Economic & Caste Census for rural India tlangzar a nih
NEW DELHI: Sawrkar thlungpui in kum 80 liemtaa inthawka a hmasatakna dingin Socio­Economic & Caste Census (SECC) data chu zanikhan Union Finance Minister Arun Jaitley le Rural Development,Panchayati Raj and Drinking Water Supply and SanitationMinister Chaudhary Birendra Singh han a ruolin New Delhi hmuna an tlangzar. Census tlangzara um hi sawrkar thlungpui le State sawrkar­a policy siemtu han policy an induongna kawnga thil tul le tangkai tak a ni ding thu Mr Arun Jaitley chun a hril a, retheina san hrietsuoka, ei rama retheina a zunga inthawk phawidawk a ni theina dinga policy induongna kawngah nasa takin a thangpui ding a nih tiin a hril.
    
Zanita Socio­Economic & Caste Census tlangzar­a um hi kum 1932 a inthawka tlangzar hmasa tak niin India ram sunga biel tum tum, hnam, chi le Economic ngirhmun hrang hrang kim taka tarlang a ni bakah sungkuo tin hmasawnna dinga hmalakna hai tarlang a ni bawk.
    
Socio ­Economic & Caste Census tlangzar­a um dungzui hin India rama sungkuo zaah 73 percent hai chu tlangram (rural) a cheng an ni a, hieng hai laia 18.5 percent hai chu Scheduled Caste an ni a, 11percent hai chu Scheduled Tribe category­a mi an nih. Census data dungzui hin tlangram biela sungkuo tin hai income chu an hnuoi hle a, sungkuo 74.5% haia income insang tak chu Rs. 5000/­ per month a ni a, 8.3% chauin thlakhatah Rs. 10,000/­ le a chungtieng an hlawsuok.
    
Hi Census data tlangzar­a uma hin socio­economic status­housing, land­holding/ landlessness, educational status, status of women, the differently­abled, occupation, possession of assets, SC/ST households, incomes le a dang dang hai a chuong a. Rural area­a cheng hai khawsakna ngirhmun chu an hnuoi hle a, sungkuo 50% hai chu kut sinthawa nitina fakfawm zawng an ni a, 56 % hai chun ram le hmun an nei nawh. SECC 2011 report hi http://secc.gov.in. ah hmu thei ning a tih.

Imphal
Bill 6 phar
IMPHAL: Manipur Assembly inthung mekah zanikhan Bill 6 phar a nih. Bill 6 phar hai laia pathum hai chu Manipur CM O.Ibobi Singh in a phar an ni a, chuonghai chu ­Manipur University of Culture (Amendment) Bill, 2015, The Manipur Public Library (Taking Over of Management) Bill, 2015, The Manipur Public Service Commission (Additional Functions) Amendment Bill, 2015 le the Manipur Municipalities (Eight Amendment) Bill, 2015 hai an nih. Bill pahni dang hai chu Health Minister Pu T. Phungzathang Tonsing in inpuia a phar an ni a, chuonghai chu The Manipur Anatomy Bill, 2015 le Manipur Medicare  Service Personnel and Medicare Service Institutions (Prevention of Violence and Damage to Property) Bill hai an nih.

Assembly in Demands 6 an passed
IMPHAL: Manipur Assembly session fe mekah zanikhan Demands 6 inpuiin an passed nawk. Zanita Demand passed hai chu, Education Rs. 1197,18,84,000/­ ; Agriculture Rs. 146,58,04,000/; Rural Development Rs 679,29,80,000/;PHED Rs.272,25,56,000/­; Minor Irigation Rs. 85,79,60,000/­; le State Academy of Training Rs. 5,02,88,000/­. hai an nih. Zanita Demands 6 passed­a um hai hi a rengin Rs 2386, 13, 72,000/­ a tling phak.

Torbung le Kangvai inkarah bomb hmu
BISHNUPUR: Zanikhan Bishnupur Police station huop sunga Torbung le Kangvai inkar, lamtlang tieng Improvised Explosive Device (IED) hmu a nih. IED hmua um hi pahni niin ei thu dawngna chun a hril. Army le Police han Bomb hmuna hmun hi an pan nghal a, iem an law ti ruok chu hi thu ei sut chena hin hrietna ei nei nawh.

Assembly hlukhum an tum; mi 8 an hliem
IMPHAL: Manipu­a Inner Line Permit System hmang nawk dinga ngentu JCILPS inrawina hnuoiah students han Manipur Assembly session nek mekah  Inner Line Permit bill phr dinga ngennain zanikhan Assembly hlukhum an tum a,Chingmeirong hmuna Police team leh an inbeituo a, Police han hmawl hmangin an hnawtdar tawl a, student iemanizatin hliemna an tuok.  Student 8 chu hospital­a admit an nih.

ATUM President chengnain silaia kap
IMPHAL: Zani hmasa zan dar 11:30 vel khan hmelhrietlo silai chawi han, Aimul Satu Village, Tengnoupal­a Aimol Tribe Union Manipur President S. Munthuirend chengna in silaiin an va kap. A va kaptu hai hin S. Munthuirend hi kodawk tumin a kawt an va kik a, sienkhawm a hawng pek nuomnaw leia silaia an kap niin ei thu dawngna chun a hril. Khawsung mi hai chun silai puok ri an hriet le inruolin electric ban vaw in darrang an vuok a, chu phing le hieng silai chawi hai hi an insaseng nia hril a nih. S. Munthuirend chun ram chungchang buoina thuah vawi tam tak vau a ni ta thu a hril.

Tamenglong­ah NSCN­K cadre 1 kap hlum
TAMENGLONG: Zani zingkar dar 5 vel khan Tamenglong district, Manipur­a Mukti Khullen village­ah Security Forces hai le NSCN­K helpawl hai an inkaptuo a, hi huna hin NSCN­K cadre pakhat Sath (20) s/o Chinguong of Tongtou village, Tousem Sub­Division, Tamenglong district chu kap hlum a ni a, a ruong umna bulah Rifle pakkhat hmu le man a ni bawk.

M.Okendro in a in a hrilfie
IMPHAL:Education Minister M. Okendro Singh chun, public interest­a Ramkrishna Mission Centre indin a ni theina dinga Bengali High School le Bengali Primary School sukbo tum a ni thu, hi School hin students 35 chau an um a, thuneitu hai chun hi school hi Moirangkhom tienga sawn dingin hma an lak mek a nih tiin zanikhan Assembly­ah a hril.

Others
Shillong­ah All Women Judges Court
SHILLONG: Meghalaya­ Shillong a District Court­a Judges 6 hai chu nuhmei vawng an nih.   District and Session Judge chu B. Mawrie a ni a, Asst. to Dist. & Session Court chu D.K. Kharbteng a nih. Mawrie hi Special Judge, Protection of Children from Sexual Offences, NDPS and CBI a nih. Nuhmei Judges dang hai chu Chief Judicial Magistrate KML Nongbri, Judicial Magistrate First Class­cum­Asst. to DC L. Kharshiing; Judicial Magistrate First Class­cum­Assistant to DC M.K. Lyngdoh le Judicial Magistrate First Class cum Assistant to DC R.M. Kharsyntiew hai an nih.

Car eksiden­ah Hema Malini a hliem, kum 2 mi a thi
NEW DELHI: July 2, 2015 zan dar 9PM vel khan veteran actress le BJP MP Ms Hema Malini (66) chuongna Car chu Rajasthan­a inthawka km. 50 vela hla Dausa an tina hmuna Maruti Alto Car leh an inbaw a, Ms Hema Malini chu a hliem bakah nuhmei naupang kum 2 mi pakhat a thi. Ms Hema hi Mercedez car­a chuonga Mathura a inthawk Jaipur pan lai mek a nih. An car le inbaw Maruti Alto car­a chuong midang 4 hai khawm an hliem leiin Dausa hmuna hospital­ah admit an nih. Hema hi a bawk (forehead) bakah a ke le hnungzang hai na a ti hle a hril a nih. Hema chuongna Car khaltu (driver) chu motor a khal hrat taluo lei le a fimkhur nawna leiin  man le case siem khum a nih.

NDFB (S) ralthuom dapdawk
GUWAHATI: Zanikhan Army le Assam Police han Assam state sunga Chirang district­a Shantipara hmuna NDFB(S) hai inbikrukna hmun hlukhumin an dap a, ralthuom iemanizat an dapdawk. Ralthuom an dapdawk h ai lai 9mm Pistol 1, Uzi Sub­Machine Pistol le a Silencer,  9mm mu 60, Radio sets 2 le hriemhrei dang dang bakah lekha pawimaw thenkhat a thang.

NSCN cadre hlui Police han an man
TURA: Meghalaya­a Tura Police chun zani hmasa khan NSCN helpawl hlui Peirau Hau (40) le a sangpa Keba Hau (30) hai chu Tura town­a Chandmari hmuna an man. Peirai Hau le a sangpa Keba Hau hai hi kum iemanizat Tura hmuna lo khawsa ta an ni a, Liberation of A’Chik Matgrik Army (LAMA) helpawl hai kuoma ralthuom supply­naa inrawlna nei nia intum an nih. Peirei le Keba hai hi Nagaland­a Peren district sunga Hkungwla mi ve ve an nih.
    
Peirei Hau chun, NSCN(IM) a lo thang hlak, sienkhawm a hnunga NSCN(K) zawm a ni thu, NSCN(K) a recruiting officer incharge sin lo thaw a ni thu Police kuoma an puong. Nundan pangngaia khawsa nawk a nuom leia NSCN(K) in an inchawltir, Tura mi nuhmeia a nei kum 2009 a inthawka hi hmuna cheng nia hril a nih.

Assam Congress sunga buoina
GUWAHATI: Assam­a Congress party sunga buoina chu a la re naw zing a, Congress party laka hel hai chun regional party thar indin an tum nia hril a nih. Hieng laizing hin ni 2 vel liemta khan AICC General Secretary CP Joshi le Congress thuoitu hai chun Assam a Congress MLA hel hai laia an hotu Himanta Biswa Sarma chu Delhi hmuna an inhmupui. Congress party sunga buoina um lai zing hin BJP chun theitawp suoin hma an lak ve zing a nih. 

Nestle in Maggi Noodles thawndawk nawk
NEW DELHI: Nestle India chun Maggi noodles ramdanga thawndawk nawk ta dingin hma a lak tan mek. Maggi noodles hi Central Food Safety regulator FSSAI in pawl ding zat neka tam lead le monosodium glutamate (MSG) a pawl tia a hril leia India rama chun June 5, 2015 a inthawka kha ban (khap) tan a ni a. Amiruokchu, zani hmasa laia Bombay High Court in Maggi noodles thawndawk sunzawm thei ni ta dinga a hril leia Maggi noodles thawndawkna sin hi tan nawk tum a nih tiin Nestle India official thusuok chun a hril. India rama ban a nina ruok chu hlip a la ni nawh. Canadian Food Inspection Agency chun Maggi noodles an enfelnaa fak dingin a him tawk niin an hril.

Electric in mi 14 a man hlum
JAIPUR: Zanikhan Rajasthan­a Baseri an tina hmuna electric high tension hrui tla thla in School Bus a hlap fuk a, school naupang 13 le nupui pakhat electric in a man hlum. Mi 5 na takin an hliem bawk. June 16, 2015 khawm khan Tonk hmuna high tension electric hrui tla tla in   molawma fe hai chuongna Bas a dengfuk leiin mi 16 zet electric in a lo man h lum ta a nih. Hi thil tlung hi suizui dingin Energy minister Pushpendra Singh chun Order an suo.

Bihar­ah Primary teachers 1,400 an inban
PATNA: Bihar­a chun Certificates lem hmanga Teacher sin thawa intum Primary Teachers 1,400 chuong an sin haia inthawk an inban. Court thupek dungzuiin Bihar sawrkar chun Certificate lem hmanga teacher sin thaw hai chu karkhat sunga inban dingin June 29, 2015 khan thupek an suo a, hun pek sunga inban lo hai chunga action lak dingin Order an suo a nih. July 9, 2015 chena teachers tam tak an lan ban beisei a nih tiin Vinodanand Jha, OSD to Principal Secretary, Education Department chun a hril. Court thupek dungzui chun Certificate lem hmanga teacher sinthaw hun tiem sunga inban lo hai chunga action na taka lak ding le hlaw an lo lak ta hai an thungkir ding ti a nih. Bihar state a hin Primary teachers 3.5 lakh vel an um a, hieng hai lai hin certificate lem hmang tam tak an um nia hril a nih.

Mi 11 damsung lungin intang dingin
BALLIA: June 11, 2015 a Theihai (Mango) lona le inzawma hnam pahni hai inkara inbeituona tlunga pawl pahni hai laia pakhat tieng Abhay Singh bakah a pawl dang tienga mi Pintu Verma le Ashok Verma hai thina thuah mi 11 hai chu damsung lungin intang dingin Additional Session Judge, Ashwini Kumar Singh chun zanikhan theimnaw an changtir. Hieng mi 11 hai hi Court chun Rs. 20,000 seng chawi dingin a rel bawk.

A Ui Aadhar Card a siem pek leiin man
BHIND: Madhya Pradesh­a pasal pakhat Azam Khan (35) chun tulaia inlar em em Aadhar Card a Ui vai ta dinga a siem pek tia intum a ni leiin Police han an man. Azam Khan hi Umri town­a Aadhar Enrolment agency­a Supervisor sinthaw a nih. Complaint um leia Azam Khan hi an man a ni thu Bhind SP Navneet Bhasin chun a hril a, hi Ui Aadhar Card a hin Ui hming chu ‘Tommy Singh’, s/o Sheru Singh, date of birth 26/11/2009 le sex­ah Male ti an ziek nia hril a nih.
    
Mi tam takin Aadhar Card neina dinga harsatna nasa tak an tuok laia Ui ta dinga Aadhar Card siem a nih ti an hriet hnunga mipui lungawilo han Umri Police Station­a complaint hi an thelut a nih. Azam Khan hin hiengang Aadhar Card hi siem a nei le neinaw zuizui mek a nih.

MNP a taka sukpuitling a ni tah
NEW DELHI: Zanikhan India ram pumpuia hmang thei dingin Mobile Number Portability (MNP) chu a taka tan le sukpuitling a ni tah. MNP dungzui hin Mobile hmangtu hai chun mani number pangngai hmang zingin Mobile Operator/company dangah insawn thei a ni ta ding a nih. MNP hi a hma chun hmang thei nisienkhawm state pakhat sung annawleh telecom circle sunga chau hmang thei a ni a, tuta mi ruok hi chu government ‘One nation, One number’ plan hnuoiah India ram pumpuia hmang thei a ni ta ding a nih. India rama hin Telecom services circles/ areas 22 a the a nih. MNP hi India rama chun November 2010 khan a hmasakna dingin Haryana hmuna hawng a ni a, a hnungin circle dang dang haia hung thaw pei a nih.

Nuhmei nau pawm hai ta dingin room hran
CHENNAI: Tamil Nadu Chief Minister J. Jayalalitha chun,Tamil Nadu State Road Transport Corporations hnuoia Bus terminals haia chun nuhmei naute pawm lai nei hai ta dingin an nau hai nene pekna dingin rooms hran siem pek an ni ding thu zanikhan a puong. Hi thil hi August 1, 2015 nia World Breastfeeding Week nei huna tan ni dingin Jayalalitha chun a hril bawk.

Boko Haram han mi 100 chuong an that
BORNO: Nigeria rama Borno state sunga khuo pathum haia chun Boko Haram helpawl ni dinga ringhla han mi 100 chuong an that bakah in tam tak an raw niin official thusuok chun a hril.  Boko Haram helpawl hai hin tukum April thlaa Chibok hmuna School pakhata inthawka an thuoihmang school naupang 219 thangin nuhmei le naupang tam tak an la hrentang mek niin ei thu dawngna chun a hril.
---------------------------------------------------------------------------------------------------
VAWISUN THUPUI
Pathienin titna thlarau a mi pek nawh a, thilthawtheina le hmangaina le lungril feltak neina thlarau a mi pek lem a ni sih a. ­~  2 Timothe 1:7

Editorial: Pumkhata umdan lampui dap a hun

Tlangmi hnam tum tum han hrat taka kal ei pen theina ding le khawvel hmasawn dungzuia hma ei sawn ve theina ding, ei dam khawsuok theina dinga pawimaw umsun chu ‘inthuruolna le thangruolna’ a nih. India ram rila Rel station­a kuli umzat number khawm tling lo tribal han mani hnam bing chita inlahrana, politics ei khel hin ram ropui a min tlunnaw dingzie chu thil thlir thei chin hai chun ei hriet seng ring a um. Hnam thuoitu le Politicians hai khawma puipung nikhuo haia an hril rawn tak chu unau sulkhat suok, nuhmei le pasala innei pawl, sulkhat kuol ei ni leiin tukhawm inlahran lova inthuruol ding ei ni thu hi a nih. Ei hril rawn ang hu ruok chun tlangmi han inthuruolna kawnga hma ei sawn naw hle a, ei karah hnuoikak a lien deu deu niin an lang a. Tawngbau chauin inthuruolna le thangruolna thu ei saksuok a, a taka hmang ei tumnaw chit leia hi thil hi hung um niin an lang.
    
Ei tam tawknaw leia state sawrkar le sawrkar thlungpuiin ngaisak tlaka a mi ngainaw lai zinga a chibing le hnambing zawnga hma ei la hang lak nawk lem hi chu sawrkar ta ding chun nuizat um khawp chau ei nih. Thaw theia inngaia Economic blockades, bandh le helna dang dang ei hang nei hlak chun a tuortu midang ni lo, mani le mani inrek ei ni nawk a, a beidawng thlak hle. Ni danga Manipur Tribal student po po huop, thilthaw thei takel le tribal mipui han pressure group hrat taka ei hmang All Tribal Student Union (ATSUM) hlak pawl pahni in an the phawk a. ATSUM pawl khat chun June 22, 2015 a inthawk khan Economic Blockade an thaw a, sienkhawm an hotu mana um hai inthlasuok sawrkarin a remti bakah Assembly Session fe lai mek zo a ni hnunga inbiekna tan dinga sawrkarin a remti leiin ni 8 sung National Highways haia  Economic blockade an thaw hnungin July 11, 2015 chena dingin an lo hlip nawk tah. ATSUM pawl khatin Economic blockade an thaw khan iemanichenah Manipur mipui mamaw phurlutna sukbuoi sienkhawm Student pawl tam lemin an thlawpnaw leiin harsatna taluo an tlun nawh.  ATSUM thil ngen hai kha Tribal hai ta ding chun a tha hlie hlie a, thlawp khawm an awm hle. Sienkhawm Pawl pahnia ei inthe leiin ei thil ngen le nawr hai khawm sawrkarin ngaisak tlak tak takin a ngainaw bakah sawrkarah nawrdawk mumal an nei thei ta naw a ni hi.
    
Chuong laizing chun Sawrkar thlungpui le state sawrkar hai le Suspension of Operation (SoO) nei mek hnam sipai hai chun Manipur­a tribal hai ta dinga thaw ve ve, thiltum thuhmun ni siin UPF le KNO in ei hang um nawk a, State chite sungah pawl khatin Autonomous Hill State an ngen a, pawl pakhat lemin Kuki State an ngen a. Unau Naga tieng han Alternative Arrangement an ngen bawk a. Mi tlawmte, a hran hrana uma thil ei ngen hai hi sawrkarin a mi sukpuitling pek ei ring chie am le! Tu theida inchang nawsien, inthuruola zaikhata ei luong hmakhat chu a tu pawl pawl khawmin ei thil ngen hai hi khawvel tawp chen khawma ei hmu chu ring a um rak naw a nih. Ei inthuruol­a ei thawtlang a ni ruok chun Tribal hai culture, tradition le hnam nun hai humhalna dingin sawrkar chun lampui a mi dap pek rawi maw!
    
Hieng a ni lei hin tribal hnam tum tum hai hin inthuruola kal ei pentlang theina ding lampui ei dap a tul. ATSUM pawlhnia ei inthe ti tak lovah CCPur mipui le student community han innghatna tak le pressure group­a ei hmang rim tak Churachandpur District students Union (CDSU) khawm student organisation tamlem an inhnukdawk leiin thahrui nei lovin an um mek a nih.
    
Hiengang hi ei ngirhmun a ni leiin Hnam thuoitu, Kohran thuoitu le Politicians han inthuruol tak le pumkhata ei um nawk theina ding lampui dapa hma an lak a hun ta hle. Pawl khatin bandh annawleh helna an nei changin pawl thenkhatin an dodal hlak leiin hnam buoina a tlung vang vang chang hlak a bo nawh. ATSUM le CDSU sunga buoina hi tulai hnaia tlung a ninaw a, tuchena hnam thuoitu le Politicians han sukrem tuma hma an lak thu hriet a la ninaw khawm hi ngaituo tham tak a tling a nih.
    
Ei Politicians han an lo ngaisaknaw a ni khawmin Kohran thuoitu Church Leaders hai bek khawmin hma an lak a hun tanaw maw! Nawtchawk bawk khatin chappui a kang thei ang hin thil chite, ngaisak tham ni lova ei ngai lai zing hin, hun hung fe pei a ta,unau karah inhrietthiemnawna hung lien peiin buoina nasa tak a la hung intlun thei ding a nih ti hi ei hriet a, unau karah ei insukfel a hun tah. Eini sunga inthuruolna le inlungruolna a um theina ding hin Chalrang han lampui mi dap pek naw ni hai a, ei inthuruolnaw po leh an lawmna insang a ta, an hallelui ri a nasa ting el ding a nih.
    
Hnam thuoitu le Politicians hai chau ni lovin Kohran thuoitu hai khawma eini sunga inremnawna um hi chingfel a ni theina dinga hma ei lak vat vat a tul a nih. Mani insung buoina chingfel ding khawma hma ei lak theinaw a ni chun ei hmabak chu an thim hle ding a nih. Hi lei hin eini unau hnam sunga inremna, inlungruolna neia pumkhata ei um theina dinga hma ei lak tlang hi a hun ta takzet a nih. Student leaders hai khawmin thaw suol le hril suol ei lo nei haia  inngaidamtuo a, eini unau kara inlungruolna le inthuruolna a um theina dinga ei insiemthar a tul.


Post a Comment

Powered by Blogger.