Responsive Ad Slot

Einihai chun Birth Control/Family Planning ei la mamaw nawh!

Tuesday, July 14, 2015

/ Published by VIRTHLI
World Population Day (July 11 – 24, 2015) le inzawmin ka’n vawi zawng;
Einihai chun Birth Control/Family Planning ei la mamaw nawh!
(A lo thaw hlak hai khawm an insir!! Muslim/Mosolman haiin an thaw ve si naw leiin an la thawfuk pei ding a nih).

-LRS Puruolte

Khawvel lien lem thlirin World Population Day le inzawmin ka’n vawi zawng hung share ka ti aw; Einihai chun Birth Control ei la mamaw nawh! A lo thawhai khawm an insir!! Hihi thil mak a ni naw a. Thil thar a ni bawk nawh. Chuleiin mani sie-le-tha hrietna hmang thiem a ngai hle a nih. In hrilhriet hran ngai ta loin ei chengna India ram ngei khawm khawvela mihriem tamna tak ram China dawttu ei nih. Hun sawt raklo ah khawvela mihriem tamna tak ram ei ni vat dinga beisei ei lo ni tah. India rama retheina hlakin inkiengzai pawngapuiin a rel el thei si naw lei le kawng hran hran a harsatna um titthawngna lei chu ni ngei a ta. India Sawrkar nulepahai chun an varna le remhrietna po po sengin Birth Control hi an hung hril mawi rawp hlak. Sienkhawm, eini a bikin iengzatkhawm nilo (Rail lampuia kutdaw zat khawm nilo ei ti hlak) hai te hin Birth Control hi ei lo thaw ve vei an chun ei du ei mei nawin, ei la va sietpui awm de!  “Nga’n an tam an thi pui a, mihriemin an tam an dampui,” ti ei pi-le-puhai hun lai le Kristien khawm an la ni hma daih, thingbul-lungbul an biek laia inthawka hre tah hnam hai ei lo ni kha hre zingin. Hmalak dan ding chu ei hriet seng ring a um lai zingin hei hril met inla.

Khawvela hnam le sakhuona a khawm inlar tak el Muslim/Mosolman-hai hin Birth Control hi an lo uor ve si naw leiin khawvel hi an la hluosip tak tak ding chu a ni awm hih! Tuhin khawvela rambung changkanga ei ngaihai kha an bei a dawng tan mek.

Mipui pung tlawm taluo hin khawsak dan a kei hnuoi hret hret lem a lo nih!: Kum 2007 kuma Europe rama nau an hring tlawmzie lo thlir vak ei tih: France 1.8, England 1.6, Germany 1.3, Italy 1.2, Spain 1.1, European Union pumpuia ram 31-ah: 1.3 a nih! Chuongchun, Birth Control-na hmangruo hrang hrang- naupai theilona dinga insiem, indang, nausukkhat, nausukthlak le a dang dang (add) an uor taluo leiin kokir thei ruolloin Europe ram mipui an kiem tiel tiel a, tuta inthawka hun sawtnawte ah Europe ram ropui ei lo ti le hriet rawp hlak ang hi a tawp hmak thei ta ding a nih. Sienkhawm hi mipui umsa an kiem lai hin hnawsiptu an nei tlat el! Chu chu ieng thil am ning a ta? In pem lut an nih. Mosolman-hai an in pem lut zut zut el. 1990 a inthawka Europe mihriem pung dan chu, pieng pungbelsa chu niloin puitlingsa inpemlut an nih.

France rama sungkuo tina naupang 1.8 chau a ni laiin, Mosolman pungna chu 8.1 zet a ni thung. France simtieng khu khawvela Kristien um bubitna taka hril a ni hlak a. Tuhin chu Kristien biekin nekin Mosolman biekin a tamlem tah! Naupang kum 20 hnuoitieng za peia 30 chu Muslim vawng an nih. An ram khawpui lien thenkhat , entirna’n Nice le Paris a Muslim thalaihai chu za peiah 45 lai an ni thung. AD 2027 a chun French mipui 5 laia 1 Muslim ning an tih. Tuta inthawka Kum 39 sungin France ram chu Mosolman ram (Islamic Republic) a lo ni hman hiel ding a nih.  

Great Britain a chun kum 30 liemtah khan Muslim 82,000 an um a,  tuhin chu a let 24 zet, maktaduoi 2 an lo tling der tah. Sapram ei ti tak le ei lo ngaisang em em Great Britain a chun Mosolman biekin  1,000 lai zet a um tah a, a tamlem chu kristien biekin hlui a la ni nawk nghal a!!
Kristien bubitna ram ni hlak Netherland a chun nau pieng zatve (50%) Muslim naute vawng an ni tah a. Tuta inthawka kum 15 hnunga chun Netherland (Holland) mipui zatve zet chu Muslim an la hung ni thei ding a nih.

Russia ram ah Muslim maktaduoi 23 zet an um a. Chuchu Russia mipui 5 peiah 1 ang a nih.  Kum sawtnawte sungin Russia sipai zaah 45 hai chu Muslim an la ni bawk ding a nih.
Tulai Belgium mipui zaah 20 le nau piengthar zaah 50 lai chu Muslim nia hril a ni a. Belgium sawrkar thusuokin a hril danin AD 2025 a chun nau pieng po po laia hmun 3-a the a hmun khat (1/3rd) hai chu Muslim nau an ni ding a nih.

German sawrkar khawmin hiengang hin a mangangna thu a khek suok pui: “German mipui tlawm tiel tiel hi suktawp thei a ni ta nawh. A tla hnuoi pei khawm hi dangkir ruol a ni bawk nawh… AD 2050 a chun German ram hi Muslim ram a ni el ding chu an tah!” tiin German Federal Statistic Officer chun a kheksuok pui hiel a nih.

Libya ram Mosolman firfiek lalpa Muammar-Al-Gadaffi in “Allah hin kawlhnam chelek ngailoin, silai thangloin, sipai tha hratna hmanga hne khawm ngailoin, Europe khawmuolpui hi a mi pek ngei ding a nih ti sinsiena an lang kuou el,” a tih an ti chuh. “Terrorist ei mamaw nawh. Suicide bomber ei mawmaw hran nawh. Kum 20/30 sung chauin Europe rama Muslim mipui maktaduoi 50 chuong um hai ainthawk hin Muslim Continent-ah an changtir el ding,” a ti bawk. Germman sawrkar sut danin, kum 20 sung chauin maktaduoi 104 ah an kai tung dai ding a nih.

America ram ei thlir khawmin 1.6 bawk a nih a. Latin ram a inthawka  inpem an lut zut zut hlak bawk a, nau pieng zat khawm 2.11 laiin an kang hret a; sienkhawm hi hin pungna niloin, ngai aw ngar ngarna chau a kawk a nih. 1970 khan America rama Muslim 100,000 an um a; 2008 a chun 9,000,000 (a let 90) in an pung a ni chuh! Tuta ang zinga an pung hrat chun mithiemhai suisuok danin kum 5 – 7 sung chauhin Islam hi khawvela sakhuo lien tak a la ni thei el ding a nih!

Hril ding dang la tam vieu sienkhawm hienghai po ei hrilna a inthawk khawm hin Birth Control thatnawna inchûk thei a tam hle. Einihai rawi ta ding lem chun Medical thila lo theilo a ni ngawt naw chun in Control ei la ngai nawh. Ei tulna a um bawk nawh. Inner Line Permit (ILP) umnawna le hnam dang kara cheng hai ngat tading lem chun chimral thei zing ei nih. Tam nanana chun a thatna a tamlem mama a lo nih. Hi thu hi ka ngaituo mek lain ka lungril a hung inlang chu Mizoram Presbyterian Kohran nuhmei inkhawmpuilien thurelin nau a tam thei ang tak nei dinga inzirtirtna uor dinga an ti tah hai dam, Meghalaya State a Minister pakhatin mipuihai nau neiteu teu dinga an fui dam, Unau Zomi hotulien pakhatin birth control ei la mamaw nawh… tuta hma met a an lo ti hai dam kha ka hriet dawk a. An hmathlir a va seiin, an lo va var de âw… ka ti vâwng vâwng el a nih. Family planning/Birth Conrrol ei thaw chun ei la’n sirna hmakhuo a sei awm. Ngaituo chieng chu a ngai hle… Khawlai ram le hmun a khawm um inla khel thangderlo le Pathien thu kal derloa MP/MLA/MDC Election haiah ei hratna ding khawmin Electoral Roll a tam a ngai a. Delimitation le Assemby Constituency a lo infuk naw khawmin intamchil policy hi a pawimaw tak chu a la ni tho tho a nih. Kei a ziektu le hriltu khawm hi Tlangval tuipawllo ka la nih a. Nau neilo, Nuhmei la neilo in hieng ka hung invawi em em el hih, nau chawmlo le ka engthaw lei chu a ni bik der nawh; ama va tluk phak naw lang khawm Tirko Paula in nupa um dan ding a hril rawna papui le nuhmei nei ruok chu a ni nawh, Tlangval a nih ti ang deu kha ka ni awm. (Hehe…)

BirthControl: India dan el nilo Hippocratic Oath le Geneva Declaration (1948) hin nau sukthlak a khap tlat tih hi hriet ding a nih. Nau sukthlak tam leia India sawrkar ainthawka lawmman dawng thei khawpa Kristien zaah za inti ngam ngat Mizoram state sawrkarin thang a lo lak dam kha ‘Anti- Mizo Policy’ tium a tling a nih. Mizothangthar hung suok pei ding, ram suk mawia, suk hausatu ding, mi ditum tak tak dinghai chu a sang telin family planning (birth control) hmangin an lo suotrem tah a nih!! Diabolin a mi runna rapthlak tak, Kristien ram a khawm ei lo uor tawl der chu a lo ni tah, doctor ha’n  nau an sukthlak dan rapthlak zie hun remchang ah la’n hrilfie nawk ei tih. Rapthlak an ti bawk ning a tih. Nau sukthlak phalna dan siemtu US Supreme Court meu khawmin nau sukthlak khapna dan a lo passed nawk der el tah! Tuhin chu Family planning khawm  nau pieng suktlawm tieng ni taloin , umzie neia nau hring pung dinga hmalakna tiengah an her danglam mek tah a nih. Ienglei am? Ei hung hril a inthawk khin a chieng ta hle awm ram changkang Family Planing/Birth Control ching ramhaiah tar an tam deu deu a, naupang le thalai/thahratlai an tlawm deu deu leiin an hung buoisie pei tah bawk!! (Hriet ding- dan in a phal chin, a lo theilo medical case ei hrilsa nawh).

Don't Miss
© all rights reserved
made with by Simon L Infimate