~ LRS Puruolte


Mi ṭhenkhat chun District Council hi chuong el a nei thei ni dingah an ring naw a, Hmarhai khawmin thisen leh an suol khawmin an suol dawk zo ta naw a dam an lo ngai hlak. Thil harsa tawpkhawk ah an ngai a nih. Chu ngaidan khawm chu thil um thei tak a ni ve tho. Sienkhawm hi ngaidan hi ngaidan indiklo hulhuol a nih. India Constitution Sixth Schedule Paragraph 1 Sub-Para (3) a chun hiengang hin a hril- District Council nei thei dan a’n ziek a, chutaka a’nziek dan chun Governor in: (i) Khawlai area khawm nisien District Council-ah an um tir/an kawp tir thei a, (ii) Khawlai area khawm District Council ainthawkin a peithlak/a peihmang thei a, (iii)  A thar hlawk khawmin District Council a siem thei a, (iv) District  Council area a suklien thei a, (v) A sukchin thei bawk a, (vi) District Council pahni amani a neka tam amani khawm pakhatah a suikhawm thei bawk a, (viii) a hming khawm a thlak thei bawk a nih. Amiruokchu, (iii) – (vi) chen hai hi thaw ding chun Commission Report angin a thaw ding a nih a, chuongang takin Commission siem theina chu Paragraph 14-na ah chieng takin a’nziek a nih.

District Council siemtheitu chu Governor a nih a, Governor hai hi State khat a chun a lutak, State neitu, State tina India President aiawtu an nih a, chuongang pei chun Central sawrkara President-in Power a nei tak tak nawna chin a um ang bawkin Governor hai khawm hin anni khat elin Power tak tak chu an nei naw hle. Council of Ministerhai/Cabinet thurawn ang angin thil an thaw a ni deu tak hlak. Ei hrietthiem dan dingin- Pa ṭha tak, a ngam naw nuhmei var tak le fel tak nei, iengkhawm thuneina ta tak neilo, a hminga pa tak nina chang ve ringawt, (Mi thaibawi bek bek)  ang chauh hi an ni deu tak awm! President Rule puong kawnga bak chu State sawrkarna cheltuhai thu selkalin an hnawlthlak ngai mang nawh. Chuleiin District Council thar siem khawm hi Governor Power ni angin um ve bawk sienkhawm Ministry (Sawrkarna cheltu) thu thu a nih.

Chuleiin mipuiin District Council thar siem ei nuom tak tak a ni chun Sawrkar kuomah ngen ei ta, sawrkarin District Council thar siem ṭul a ti thu le siem a nuom thu Governor kuomah intlun a ta, ama’n Commission indin a ta, chu Commission Report ang chun Governor-in a siem el ding a nih. Chuonglaizing chun hi hi hriet ding a nih. Mipuiin nasataka ei ngen naw chun ieng Ministry/Sawrkar khawmin District Council thar siem belsa hi dit/remti mei mei ngai naw ni hai… Asanchu, an thuneina tam tak hi District Council in a lak hmang pek ding a ni leiin a nih. An Power sukhnuoina a ni leiin mipuiin ei ngen nasat hle a ngai ding a nih. “District Council hi chu a ṭhalo, Mizoram ṭhendarna a ni. A neisa tawh te pawh saw ngaimawh tawh nak a laiin” ti hi an ṭawngkam ding reng le mipui hmin an tumna a nih. Khawlai State a khawm nisien Sixth Schedule hnuoia District Council ei hni/demand a thieng. Chuchu, India danpuiin a khuo-le-tui ṭhahai a mi tiem/offer a lo ni ve tlat.

Post a Comment

Powered by Blogger.