Tuolsung:
MDC election hmun tum tuma inbeituonaah mi 6 an hliem
CCPUR: June 1, 2015 khan Manipur tlangram district CCPur, Sadar Hills, Ukhrul, Senapati, Chandel le Tamenglong District haiah 5th MDC election 2015 nei a ni a, Polling station thenkhat haia buoina um sienkhawm election zo thei a ni a, hmun iemanizat­ah repoll nei ning a tih.
    
Vote thlakna hi zing dar 7:00AM a tan a ni a, polling station iemanizat haia chun vote thlak hmain Pastor in tawngtaina in hun an hawng a, zantieng 4:00PM chenin vote thlak a nih. CCPur District­a Polling station iemanizatah buoina a suok a, sienkhawm buoina suok leia mihriem thina tuok em chu an um nawh.
    


15­ Hiangtam Lamka DCC hnuoia Phungkhothang Govt. H/S a chun vote thlak hma zing dar 6  velin BJP volunteer le Independent candidate hai inkara buoina a suok a, lunga indeng tuona le inbeituona a tlung a, hi huna hin BJP volunteer 2 le Independen candidate volunteer 1 in hliemna an tuok. Haijang khuo a khawm mi 2 in hliemna an tuok. Chun, 14­Tuibuong DCC a Hmarveng­ah Independent candidate Paokholal Haokip a nuhmei (wife) Muanching chu Congress volunteer han an vuok hliem a, Town area sunga Polling station  iemanizat­a khawm buoina neu neu le insuolna hai a tlung zeu zeu a, sienkhawm security tiengpang hmalakna leiin buoina sukre a nih.
    

L. Mangkhogin Haokip,IPS, SP, CCPur chun buoina umna hmun hai a hnawtzui pei leiin an virbuoi ve nasa hle. Buoina neu neu um leiin Candidate iemanizat re­poll nei dinga hnina/ngenna petu khawm an um a, Polling station tamlem haia ballot box hai chu DC CCPur Office hung phurtlung an nitawl tah.
    
Hmun tum tuma candidates hai thlawptuhai inbeituona leia hliem mi 6 District Hospital­a admit hai chu­ Muangching w/o Paokholal of Tonglal Veng,; Lunsuanlal (27) s/o (L) Nangkhamung of Mualveng, Hiangtam Lamka; Henkam (35) s/o (late) Tongmang of Gelmuol; Ngamsuon (48) (L) Chongjam of Gelmuol;Nohmang (35) h/o Phalneichong of Kingkin village le  Paosat (34) h/o Nengneikim of S. Haijang  hai an nih.

4­-Chongkhojou BJP candidate in a hrilfie
CCPUR: June 1, 2015 nia MDC election neia uma 4 ­Chongkhojou DCC a BJP candidate Hauneilal chun zani zantieng khan a chengna In D. Phailian­ah Press/media hai an hmupui a, Chongkhojou DCC hnuoia Polling Stations 6­a Ballot box le ballot paper hmelhrietlo han an lakhmangna thu a hrilfie. June 30, 2015 khan Munpi lal a nina angin zan huna security tam tak a chengna ina bu fa dingin an um a, ama khawm election agent ding buoipuia a buoi leiin  hmelhrietlo han polling station 6 haia ballot box le ballot paper an lakhamang thu chu security haia inthawk a hriet chau a ni thu  a hril. Christian ramah hiengang thil a tlung chu pawi a ti thu hrilin hmatieng hiengang thil tlung nawk talo a, mipui han zalen taka vote an thlak thei a nuom thu a hril. A chengnainah security le polling officer tukhawm in riektir lovin Community hall­a an riektir vawng a ni thu a hril bawk.

Paukholal Haokip in INC booth capture in an tum
CCPUR:  Mr Paukholal Haokip, Independent candidate 14­Tuibuong DCC chun June 1, 2015 nia MDC election nei le inzawm khan hi ni zantieng a chengnain Tonglal Veng­ah tuolsung chanchinbumihai an hmupui a, 14­Tuibuong Polling station 15 haia INC in volunteer an siem el chau ni lovin Village Chief/Village Authority le Youth Club hai kuomah 70% (per poll both) vote demand in an vau tiin a hril. Voter 894 umna 14/1 Bijang Polling Station, 1098 voter umna 14/12 Hmar Veng Polling Station, 1113 voter um na 14/13 Lhangjol le voter 930 umna 14/3 B. Aijalon Polling Station haiah INC volunteer tilo midang  inluttir anni nawna thuah Re­poll  thaw dingin ziekin DC kuomah complain a pek thu  Paukholal chun a hril.
    

A hril peinaa chun, B.Aijalon lal le Presiding Officer thangruolin INC volunteer han B .Aijalon Polling station/booth “Logos English School” hmang lovin B. Aijalon Lalpa in (residence) an hmang a, hi lei hin INC candidate ta dingin  awlsam takin vote an capture a, written­a complaint a thaw khawmin Presiding officer in a hnawl niin a hril bawk.
    
Chun, 14/12 Hmarveng PS kawtkhar kalin INC volunteer han vote an capture a, security han an va tuokfuk leiin kawtkhar an hawng chau niin a hril a. Hi thua hin INC candidate inrawi INC volunteer han a nuhmei chu a money bag lapekin an vuok a. Beidawngin Army Helpline number hmangin SOS thaw a ni a, minute 2 sungin Army hai an hungtlung a, Army hai hi hung inhnu met hai sienla chu a nuhmei chu hring le dama a suok a ringnaw thu, a nuhmei Muanching chu hospital­a um tanaw sienkhawm khumbeta la um a ni thu; 14/1 Bijang PS a va sir huna khawm  INC volunteer han thingtum­lungtum hmangin an lo bei a, a car khawm nasa takin a sie a, a vengtu han blankfire khawm vawikhat an thaw hiel niin a hril bawk. Chun 14/13 Lhangjol PS ah BJP observer nuhmei pakhat hospital­a enkawl ti lo mi 3 In­a enkawl an nih tiin Paukholal chun a hril bawk.

Naute  dehawn hmu
CCPUR: Zani zingkar khan Chiengkon vadung­ah Royal Academy a kai student han naute  thisa an hmu. Naute thisa hmua um hi a laihrui  khawm a la um a, mi makti a hlaw hle. Police chun naute thisa hi lain an kawl a, thil umdan an suizui mek.

T.N.Haokip Foundation Award semna
CCPUR: Vawisun 11AM hin B. Vengnom Community Hall, CCPur­ah T.N. Haokip Foundation  11th Meritorious Award, 2015 semna um a tih. Hi huna hin Chief Guest in Kh. Debendro Singh, MLA, Guest of Honour in Lunminthang Haokip, DC, CCPur le Special guest in Vanlallien Haokip, Principal, Salt  Brook School hai thang an tih.

Imphal
Re­poll neina dinghai vawisun puonglang a ni ding;
June 4-ah CCPur District a Polling stations 6 haiah Re-scheduled election a um ding
IMPHAL: June 1, 2015 nia ADCs 6 haia inthlangna u m a Tamenglong, Ukhrul, Senapati le Churachandpur District haia hmun hla le kilkhawra Polling officials le ballot boxes hai a la tlungkim naw leiin repoll neina dingzat official­a puonglang thei a la ninaw a, vawisun hin puonglang theia a um beisei a nih tiin State Election Commission thusuok chun a hril. Chandel, Ukhrul, Tamenglong, Senapati, Sadar Hills le CCPur District haia polling stations 40 chuong haiah repoll nei a tul el theia hril a nih.
    
June 1, 2015 khan CCPur District sunga 4­Chongkhozou DCC sunga Polling stations 6 haia Polling personnel hai chu a hmun an tlung zonaw leiin State Election Commission, Manipur chun 4/5­Nungsai LP School; 4/6­ Santing Government L.P. School; 4/7­ Santing Chongchin L.P. School; 4/8­ Saichang L.P.;  4/9­ Lailong (S) L.P. School; 4/12­ Kawnpi Mission School Polling station haia chun June 4, 2015 a Re­Schedule Election nei dingin June 1, 2015 khan Notification an suo.
    
Hi thu ei lakkhawm chena ei hriet thei china chun repoll neina dingzat hi Polling stations 12 ni thei dingin an lang. Repoll neina dinga hril rik hai chu 6­Parbung DCC sunga 6/7­ Taithu, Parbung (A), Parbung (C); 8­Senvawn DCC ­a 8/9­ Leisen; 8­Chongkhozou DCC a 4/11­Tuilumjang;5­ Thanlon DCC­a 5/5­Dailon; 13­Kholmun DCC­a 13/2­Tollen le 13/3­Khengjang/Toupokpi le 14­Tuibuong  DCC a 14/1­Bijang le 14/13­Lhangjol Polling  Station hai an nih.
    
Votes a tla tha thei hle a, CCPur District­a 2­Leimatak DCC a 12/13­Teijang Polling station le 12­Lanva DCC a Salva Lhanbung (Lenglakot) Polling station haiah votes 100­ah 100 a tla ve ve. CCPur District­a Vote tla percent inhnuoi deuna chu 8­Senvawn DCC hnuoia polling station hai an nih. Votes 612 umna 8/3­Sipuikawn Polling station­ah votes 285 a tla a, vote tla percentage 47 a nih. Vote tla tlawmna tak dawttu a nih. Vote tla tlawmna tak chu 7/6­Sartuinek a ni a, votes 612 umah votes 251 a tla a, votes tla percentage 41 a nih. Tuchena votes tla percentage chu Hmasawnna Thar Office­a khawm en thei a nih.

Assembly constituencies 3 a ruokin
IMPHAL: Trinamool Congress MLAs 3, Kh. Joykishan, Th. Bishwajit le O.Lukhoi hai Manipur Legislative Assembly Speaker in a disqualified ta leiin Assembly Secretariatchun Thangmeiband A/C, Thongju A/C le Wangoi A/C hai chu a ruok tiin thusuok a siem. Assembly constituencies 3 a ruoka puong a ni thu hi Chief Electoral Officer, Manipur chun June 1, 2015 khan Election Commission of India kuomah an hriettir tah. Assembly seats 3 ruoka byelection hi tuta inthawka thla 6 sunga nei beisei a nih. Hieng laizing hin disqualified a um MLA 3, Kh. Joykishan, Th. Biswajir le O.Lukhoi hai chun BJP an zawm ta a, lawmlut le BJP a laklut anni thu Th. Chaoba, President, BJP Manipur Pradesh in a puong.

AR 2 an hliem, Army Hospital panpui
IMPHAL: June 1, 2015, 1:30PM khan Ukhrul district a Kasom Police station huop sunga Makhan le Ahsang Khullen inkara 44 Assam Rifles patrolling a fe hai chu PLA ni dinga ringhla  han an lo lambun a, Assam Rifles Jawan pahni, Rakesh (26) le Mustakin (26) hai an hliem a, Helicopter hmangin 184 Military Hospital, Leimakhong panpui an nih.

Diploma Course inchuk thei
IMPHAL: Manipur puotieng le  Govt. Polytechnic, Imphal haia Academic Session 2015­16 sunga Diploma in Civil/Electrical/Mechanical/Electronics & Communication Engineering le Pharmacist inchuk nuomhai ta dingin June 12, 2015 a inthawk Application Form Controller of Technical Education, Manpur office­ah lak thei le June 17, 2015 chena peklut thei a nih.  Thiemna Class X le XII a tul. Entrance test June 21, 2015 ah nei ning a tih.

B.Sc (Forestry) inchuk thei a nih
IMPHAL: Academic Session, 2015­16 a Forest Department, Manipur tira B.Sc (Forestry) inchuk nuomhai ta dingin June 21, 2015 khin Entrance Test um a tih. Application  Form June 4­9, 2015 inkar sung lak thei le fill up zovin June 10­12, 2015 inkar sung Principal Chief Conservator of Forest, Sanjenthong, Imphal­ah lak thei ning a tih. Seats umzat chu 6 a nih.

Sericulture Course training thei
IMPHAL: Sericulture Training Institute, Kwakta a Sericulture tiengpanga thla 12 sunga dinga Diploma Course 2015­16 Academic Session sunga training nuomhai ta dingin June 15, 2015 chenin hnina lekha Directorate of Sericulture, Manipur Sericulture Project, Sangaipat, Imphal East ah peklut thei a nih. Application form June 8, 2015 chenin Directorate office a hin lak thei ning a tih. Seats 150 (ST­15)

Others:
Garo Autonomous Council pek dingin
GUWAHATI: Assam CM Tarun Gogoi chun Assam state a um Garo hnam hai chu Garo Autonomous Concil pek dingin June 1, 2015 khan Garo National Union (GNU) palai 12 han a office­a Memorandum an pek huna thu a lo tiem. GNU thuoituhai hi an Advisor, Dr M.S. Sangma in an rawi a, Tarun Gogoi kuomah Garo Autonomous Council pe vat ta dinga ngenna lekha (Memorandum) an pek a nih.

US  Defence Secretary a hungtlung
NEW DELHI: India rama  ni 2 sung cham dingin US Defence Secretary  Ashton Carter chu zanikhan Vishakapattnam a hungtlung a, Shivalik Class Stealth Multi­role frigate, INS Sahyadri a va sir a, hi zo hin New Delhi a pan. Vawisun hin New Delhi­ah India PM Narendra Modi le Union Defence Minister Manohar Parrikar hai inhmupui a tih. Eastern Naval Command khawm sir a ta, top leader­hai leh inbiekna nei an tih. Ashton Carter New Delhi­a a cham sung hin India le US hai chun kum 10 a dingin Defence Framework ziek an tih.

CVC le CIC dinghai hming sukfel zo
NEW DELHI: PM Narendra Modi inrawina hnuoia Selection Panels chun June 1, 2015 khan New Delhi ah meeting an nei a, Central Vigilance Commissioner (CVC) le Chief Information Commissioner (CIC) sin chel dinghai hming an sukfel ta a, President Pranab Mukherjee pawmpui dingin hming list­hai thawn ning a ta, final list hi president in a puong ding a nih tiin Selection Panels member Malikarjun Kharge chun a hril. CIC post hi information Commissioner­hai laia a senior tak, Vijay Sharma in a chang el thei a, CVC post chu Central Board of Direct Taxes Chief hlui K.V. Chowdary in a chang el thei niin ei thu dawngna chun a hril.

Inkaptuonaah nuhmei naxal cadre kap hlum
RAIPUR: Zanikhan Chhattisgarh­a Bijapur district sunga ramhnuoi hmun tum tuma Special Task Force (STF), CRPF (Central Reserve Police Force) le CoBRA (Commando Battalion for Resolute Action) han dappui an thawnaah Naxalites helpawl haileh an inkaptuo a, inkaptuonaah Naxalites nuhmei cadre pakhat kap hlum a nih.Inkaptuona hmuna Wireless set 1, Hand Grenade 2, 315 bore rifle le thil dang dang dapdawkin security  Forces han an man.

Nupui 2 le an nauhai Class XII an pasitlang
DIBRUGARH: Tu kuma Assam Higher Secondary Council hnuoia Class XII examination, 2015 a khan nupui 2 le an nauhai chun Class XII an pasitlang seng. Iva Rani Saikia Borpattragohain (41) chun private candidate in Machkhowa Kendriya Mahavidyalaya, Lakhimpur district­a inthawk  marks 60.8% le Assamese ah letter marks hmuin first division (Arts) ah a pasi a, a nau pasalhai laia a naupang tak Tultul Joshi Borpatragahain (19) chun RD Junior College, Digboi a inthawk marks 67.2% (Sciene) hmuin 1st division ah a pasi. Chemistry ah letter mark a hmu thung. Chun, Nayanmoni Bora le a naupa Ankur Bora hai chu regular candidate ve vein Dibrugarh a inthawk an exam a, Nayanmoni Bora hin marks 69.8% (Arts) hmuin first division­ah a pasi a, Sociology­ah letter marks a hmu a. A naupa Ankur Bora chu third division­ah a pasi ve thung.

Ruosurna dingin pasal pakhat lu an tan
RANCHI: Jharkhand state a ruoo a sur tam theina ding, an bu le thlai ching hai a hung hlawtling theina ding ditna leiin Palamau biela cheng Orkas an tihai chun pasal pakaht Thapa Kharia an ti chu a luah tanbawngin an that a, pathien kuomah an inhlan niin Police chun an hril. Thapa Kheria (55) lu hi May 31, 2015 khan hmu a nih. Orkas an ti hai hi mi thata an pathien bieknaa an lo hmuna mihriem lu phum hlak an nih.

TDP MLA Rs. 50 lakh leh man
HYDERABAD: Telangana state a Telugu Desam party (TDP) MLA, Ravanth Reddy chu May 31, 2015 khan Secunderabad ah a vote inchawk tumna Rs. 50 lakh leh  Telangana Police hnuoia  Anti ­Corruption Branch han an man. Telangana state a hin June 1, 2015 khan Legislative Council seats 6 ah inthlangna an nei a, hi taka an party candidate­hai vote­tu ding inchawkna dinga Reddy hin Rs. 50 lakh hi a chawi nia intum a nih.

India Ngamantu 15 man an nih
RAMESWARAM: Sri Lanka Navy han zanikhan Katchatheevu bula India Ngamantu 15 le an Lawng 3 hai chu an man a, Talaimannar Coast tieng an thuoi niin Police le Fisherman’s  Association President Emirit le Sesuraja han an hril. Sri Lanka Navy hai chun dan kala an ram tuipui sunga Nga an man leia India Ngamantuhai hi an man niin an hril.

PM in Gift Rs. 3.11 lakh  manhu
NEW DELHI: India PM Narendra Modi ramdang (foreign countries) a an zin  (thla 10) sunga gift a dawng chu 65 a tling ta a, Gift a dawng hi Rs. 3.11 lakh manhu a tling ta niin Foreign Ministry thusuok chun a hril. Gift a dawnghai laia a manto tak chu rangkachak le lunghlua siem Kutsebi a ni a, Rs. 75,000 manhu a nih tiin ei thu dawngna chun a hril.

Rielin mi 6 a deng hlum
PATNA: Zani hmasa zana ruo, riel le thlipui inthuo a sur le a hrang  huna khan Bihar state a Banka, Patna, Bhagalpur le Lakhisarai district haiah riel lien tak tak a tla a, mi 6 zet rielin a deng hlum niin ei thu dawngna chun a hril. Met Official record dungzui chun ruotui tam dan h i 65­70 kilometres per hour a nih.

Arunachal Governor tharin Rajkhowa
ITANAGAR: June 1, 2015 khan Assam Chief Secretary hlui Jyoti Prakash Rajkhowa chu  Arunachal Pradesh Governor 19­na dingin Darbar Hall, Raj Bhavan, Itanagar hmunah Gauhati High Court Chief Justice K. Sreedhar Rao hmaah sesamna a nei. Hi hunsera hin Arunachal Pradesh CM Nabam Tuki, a ministers, Parliamentary Secretaries, MLAs, Civil le Police tienga Officer lien hai an thang tawl.

Lawng tuoksietah mi 400 an thi
BANKURA: Zani hmasa zan khan China rama Yangtze vadunga mi 458 phurtu lawng tuoksiet tuokin a pil a, mi 400 an inhmang a, an thi ring a nih. Lawng hi zani hmasa zan dar 9:28 (China time) vela tlung niin Xinhua News Agency chun a hril. Lawnga chuonghai hi China khuolzinmi, kum 50 le 80 inkar anni tawl niin ei thu dawngna chun a hril.

“God’s Not Dead” ti film siemtu Russell Wolfe a thi
Kum 2014­a Film hit “God’s Not Dead” ti film produced tu le changtu Russell Wolfe chu Scottsdale, Arizona hmuna Amyotrophic lateral sclerosis) ALS) leiin kum 50 mi chau niin a thi. Russel Wolfe hin “God’s Not Dead 2” khawm a siem nawk mek a, kum 2016 vela release phak dinga riruong siem a nih. Wolfe hi Pure Flix production company a co­founder a ni a, a damnaw inenkawl zing puma God’s Not Dead 2 hi a buoipui a nih. Pure Flix production company hin Sakhuona tieng le inzawm films 100 deuthaw a lo produced ta a nih.  Film dang a produced le an chang hai lai “What If”, “In the  Blink of an Eye” le “Me Again” ti hai a thang.
---------------------------------------------------------------------------------------------------------------------
VAWISUN THUPUI
Chun, in thaw taphawt chu, thu hril amanih, thil thaw amanih, ama zârah Pa Pathien kuomah lâwmthu hril pumin Lalpa Isu hmingin thaw vawng ro. ­ Kolossa 3:17

Editorial
Sandamtu dingin ei dit, Lal dingin ei dit nawh

Manipur tlangram mihai chengna biela ADCs 6 haia MDC election chu June 1, 2015 khan ei nei a. Ei lo tung dan le nghakhla angin MDC election hi ei nei am ti chu a hretu seng ei nih. Ei  MDC election riva chu a na hle. Hmun thenkhatah election tluong taka nei a ni leiin hmun thenkhatah election tluong taka nei a ni leiin  inthlangthatna nei tul le hmabakin an  um ti ei hriet. Kristien intihai chengna biela hiengang lawm lawma inthlangna zalen lo, ralmuong lo le thienghlim lova a um el hi chu a pawi ei ti tlang seng ring a u m. Ringnawtu han iengang takin am an mi ngaiin an mi en ding ti hi ngaituo tham takel a nih.
    
India hmarsak biel Assam, Meghalaya le Mizoram state haia Autonomous District Council (ADC) um han thuneina (power) an neihai ei ni le khaikhin chun an sang em em a, election  hnuna khawm an ngai ursun hle hlak. Manipur a ei ADC hai ruok chu Autonomy thang lo, ahminga ADC chau an nih ti ei hriet seng. Amiruokchu, hieng sa khawma hieng em em a ADC election ei lak run el hi ienglei am ning a ti aw ti hi ngaituo vang vang khawp a nih. Asan um ngei a tih. Autonomy thanglo hman hiengang khawpa ei inchu a ni chun Autonomy um ADC election nei inla lem chu election huna chet dan ding hi a rapthlak hle ring a  um.
    
Sum le thuneina (power) um lo tia MDC nilai zing hai an chier sup sup a, an leh iengleia candidate an la ni nuom pei am ning a ta? Sum chu a um ning a tih. MDC nia khawsakna inthang duok duok, motor le inhmun dit dit inchaw thei,building tha tak tak bawl dam, Chief Guest­ah thang a, a mawitawk sum pesuok thei dam anni leiin mipui chun MDC ninaah hin sum a um naw chu an ring der nawh. Sum le thuneina chu an nei  niin an lang. Hi lei hi ni ngei a tih MDC ni laizing hai khawma la ni nawk pei an nuom a, lekhathiem le khawsa thei tak tak, MDC ngir nuom lo dinga ei ringhai khawm tuta tum hin chu an ngir sup sup tawl a nih. Beisei ding sum um naw sienla chu sum le pai, tha le zung tam tak  sengin mihai hi MDC election a hin ngir nuom naw nihai.
    
Autonomy um lo tia hril ADC election a hman hieng lawma ei lak serious a ni chun MLA le MP election hung um nawk ding hi iengang lawmin am ei lak serious ding ti chu tu ta tuma MDC election hin a suklang chieng hle. Hi bakah hin Village A uthority annawleh Village  Council election hai khawm ei ngai serious pei ta ding niin an lang. Ni danga Lal Village chief le Village Authority tihai  hi ei lo ngai thupui tak tak ngai nawh. Amiruokchu, Dr Manmohan  Singh hun laia MGNREGS hung um tana inthawk khan Lal, Village Authority le a khawnbawl (members) nihai khawm ei hung inhawk pha ta a nih. Thenkhat lem chun khaw thar an satin an siem hiel a nih. Tangka sum hin chu thil a thaw thei a nih.
    
Theida naw inla, a tu tu khawm hin sum umna hi chu a hnawtin ei hnawt a nih. MGNREGS hung um hma khan chu Village Authority Secretary le members ni nuom le an hawk ei um meu  nawh. An ruotin ei in ruot deu tak a nih. An dik am, an dik naw am, a thienghlim am, a thienghlim naw am tihai hi chu ei ngaituo chet chet ta ngai nawh. Sum le power in ei mit a sukdel a, suokah a mi keilut el hlak a nih. An dem le an sawisel thei bik ding khawm um lo ei nih.
    
Hi lei tak hi a nih Pathien thu hriltu han Isu hi sandamtu dingin ei dit a, Lal ding ruok chun ei dit nawh an lo ti hlakna san chu!! Isu hi ei thlarau le ei taksa sukdamtu ding chun ei dit seng an nawm. Amiruokchu, Isu hi ei niah inlal dingin ei dit ngai nawh. Isu hin Lalna chang sienla chu, election a khawm hin ei nuna inlal a ta, thil indik naw hi thaw ngai nawng ei tih. Ei lungril haiah Isu’n inlalna a chang ngai naw leiin mithi sa vote dam ei thlak a, laibung thil le Kohran thil dam election huna hin a hung inlang hlak a nih. Isu neka thuneina le sum an lal lem sung hin chu ieng thaw hlak inlakhawm hlawtlingna tak tak chang ngai nawng ei tih.




Post a Comment

Powered by Blogger.