Responsive Ad Slot

Rema Punjee buoina le inzawma inhnamhnawi hai man an la ni nawh, inbiekna neiin inquiry thaw dinga sukthluk a nih

Thursday, June 18, 2015

/ Published by VIRTHLI
Hmarkhawlien, June 17,2015 (Virthli News): Tarik 12th June, 2015 ni a Rema Punjee buoina le inzawma Peace Rally Cachar sunga Hmar khuo 17 haiin Hmarkhawlien a inthawk Lakhipur SDO (Civil) a office chen an nei tuma SDO (Civil) kuoma nithum sung ngeia FIR a hming tarlanga um 6 hai man dinga ti chu nithum inkhel ta hnung khawma pakhat khawm man anla ni nawh. SDO chun hma la dinga a tiemkam chu ama tienga inthawk chun SDPO, Lakhipur le OC, Joypur hai chu dan ang taka hma la dingin ziek ngeiin lekha a thawn suok ta thu dawng a ni a, amiruokchu police tienga inthawk ruok chun man an la nei naw zing a nih.


Tarik 16th June, 2015 khan District Magistrate, Cachar chun hmalatu hnam thuoitu hai chu lekha thawn in, tarik 17th June, 2015 ah hi buoina chungchang a hriltlangna nei dingin Hmar le Khasi hai chu Silchar ah a ko a, a kona angin vawisun (17th June,2015) chawhnung dar 2:00 PM khan DC, Cachar Conference Hall ah District Magistrate Chair lakna hnuoiah Hmar hnam thuoitu le Khasi hai chun hriltlangna an nei a, hi huna hin boruok sukre dan ding le buoina chingfel dan ding hai Hmar le Khasi palai fekhawm hai chun hun iemanichen hriltlangna an nei a nih.

Inbiekna/Discussion na a chun Hmar tienga palai hai chun dittawkin thil umdan le ditdan hai chu an hril lang a, chu zova Khasi tieng haiin hieng ang hin an ngaidan le thil umdan hai chu an hril ve a nih. “Choto Kumpi Bracket sunga Rema Punjee, an ziekdan = Choto Kumpi (Rema Punjee) tia Headman lekha a in ziek hi khuo pakhat a ni naw a, khuo dang dang a nih. Rema Punjee hi Hmar hai khuo a ni a kan sawisel nawh. Rema Punjee hi Choto Kumpi a inthawk Kilometre 5 vela hla a ni a, 2003 Hmar-Dimasa buoina lei khan Hmar haiin an suoksan a, chun 2014 khan hung lut nawk in Rema Punjee ah um talo in Choto Kumpi ah an hung lut a nih. Tuta In le lo suksiet a um hai khawm hi Rema Punjee khuo nilovin Choto Kumpi khuo lem a nih. Hmar haiin Choto Kumpi ah hung lut in In le Lo an hung bawlo lem a nih. Buoina hi kan dit naw a, tuta In (house) suksiet a um hai khawm hi keini thaw a ni nawh. Khasi hai khawm hi group pahni in kan uma, Headman Hmasa Mr. Lewis in mi a nuom nuom Choto kumpi a ko lutin, mi alo in fuipawr hlak a, chu an fuipawr hai in an lo thaw khawm a ni el thei. Chuong hai chu anl o ni chun a pawi nawh, sawrkar khawmin man ngei raw seh. Choto Kumpi hi inhma in Karbi hai lo hlu a ni a, hi khuo hi Karbi haiin an suoksan hnung in keini Khasi haiin kan hlu a nih. Hmar hai nekin keini Choto Kumpi hi kan um hmasa lem a, kan um hnung in Rema Punjee a inthawk Choto kumpi hi an hung lut lem a nih. Rema Punjee chu Hmar khuo a nia, nisienlakhawm, Rema Punjee le Choto Kumpi hi khuo hmunkhat nilovin khuo dang dang a nih. Sawrkar in Inquiry nei sien la, Rema Punjee le Choto Kumpi ti hi khuo khat alo ni chun Choto Kumpi a inthawk keini khawm suokdawk kan ta, chuong ang bawkin Rema Punjee le Choto Kumpi hi khuo dang dang alo ni chun Hmar hai khawm tuta buoina hmun Choto Kumpi hi suoksan ve raw hai se" ti chu Khasi haia inthawka thuthluokna an siem chu a nih.

District Magistrate chun hi chungchang hi an rang thei angin inquiry thaw ning a ta, chun inquiry le Fact Finding thaw sung hin tukhawm hi buoina ram hi va del lo dingin a ti a, chun hi buoina bawzui sung hin tukhawm dan chu mani kuta lo kengkaw tum lo ding le hma la hmasa tu lem lem chu thiemnaw inchang in um an tih tiin a hrilsa bawk.

Hmar Palai fehai khawmin hi thuthluokna hi tha an ti a, an rang thei ang taka inquiry le hma sawrkar in hung la dingin an phut sa bawk a nih.

Khasi tieng pang a inthawkin palai 8 an thang a, Hmar tieng a inthawkin pali 12 an thang a nih. Hmar tienga inthawka palai hai chu hieng hai hi an nih; 1. T. Sangkhum, HNU Assam President 2. Lalhlimsang, HNU Assam Secy. 3. L. Thanmawia Pajamate, HIBV, Vice-President 4. Oliver Sungrohlun, Gen. Secy. HSABV 5. Hossana, Information Secy. HSABV 6. L. R. Thiek, Ex-President, HIBV 7. Rev. Lalhuoplien 8. Pastor Joe Sanghmingthang 9. Lalzawmlien, 10. Ex- EM NC Hills Autonomous Council 11. Laibatthang 12. V. L. Muonga Pudaite, Adviser, HSABV, 13. El Rejoy, Headman Rema Punjee.

Thu belsa: Hi buoina-ram lekha hi Khasi hai in document iengkhawm suklang ding an nei ve naw a, eini Hmar hai ruok chun Documents tha tawk tak ei nei a nih. Choto Kumpi le Rema Punjee hi khuo pakhat a nih ti sukchiengna ding (proof) lekha hai khawm Hmar hai chun ei nei bawk a nih. Tuhin sawrkar level a eiin nawr tan ding a ni a, thiem changna le hratna chu ei chang ngei khawm beisei a um bawk a nih. (input from Oliver S Khawbung)


Don't Miss
© all rights reserved
made with by Simon L Infimate