Tuolsung
Digital India hnuoia thil thaw dan ding an hriltlang
CCPUR: June 27, 2015, 11:30AM khan DC Office­a BRGF Resource Centre­ah Mr Lunminthang Haokip, DC, CCPur inrawinain MGNREGS & IWMP hnuoia sinthawna le inzawmin Digital India thuah meeting nei a ni a, hi huna hin SDOs/BDOs hai bakah SO/Technical Asst. hai, Manipur sawrkara inthawk MGNREGA Monitoring Cell representative hai; Planning Deptt­ hai; DRDA official hai le NIELIT/CCPur a inthawk DIO/NIC hai an thang.
    

Digital India hi CCPur District­ah July 2, 2015 a hmang dinga tan ding, NGO, govt official hai bakah mipui laia awareness nei ding thu hai; Broadband highway thu, village tina WLL, Mobile connectitivity inumtir ding, E­Governance thu, E Kranti (Electronic delivery thaw ding thu), E­Education, E.­Health,E­.Farmers, E­Security, E.­Justice hmang ding, Information for all sukpuitling ding, IT Job thu, Early harvest chungthu hai hriltlang a nih. MGNREGS thua chun Digital Literacy, Digiltal A/C, Digital Life Certificate, JAL Kranti Abhyan hnuoia tui harsat zuolna bik khuo pakhat BDO han thlangsuok a, mipui kuoma tui pek ding, Job Card holder han Aadhar Card an nei ding ti le thupawimaw dang dang hai hi huna hin hriltlang a nih.
    


Hi meeting­a hin Imphal a inthawk Devjoy Yumnam, State Level Monitoring/Co­ordinator MGNREGA Convergence; Ksh. Ibochouba Singh, State Level Training Coordinator, RD & PD Deptt le Kh, Baoji, IWMP/SLNA, Planning Deptt han MGNREGS, IWMP le Digital India  chungthu an hril.

Children’s Home Manager Pu Hmanga Khawlum ruong vawisun vui ding
CCPUR: Children’s Home, Saikawt Manager ni lai mek Pu Hmanga F. Kholum (64) s/o (L) L. Rokung, Ex­MLA chu zanikhan RIMS, Imphal­ah khawvel rinum maksanin chatuon ram a lo inlawi
tah. A ruong inthlana programme vawisun (June 28, 2015) hin Children’s Home, Saikawt hmuna hmang ning a ta, Lamka thlanmuol (Hiangtam Lamka ­Upper) ah a ruong vuiliem ning a tih.
    
Pu Hmanga Khawlum hi ram le hnam le Kohran le khawtlang ta dinga mi tangkai takel, mi taima, sina ringum, mi inngaitlawm takel a ni a. Taksa bawrsawmnain a tlakbuok hnung chen khawma hnam thil thawna hai ralthlir el lova a taksa ngeia va uopmawi hlaktu a nih.
    
Kum 1990-­1995 inkar sung khan HYA General Hqrts. –ah General Secretary lo chel ta bakah kum 1980­-1982 inkar sung khan Churachandpur­a inthawka insuo English Bi­Weekly news ‘The Frontier Beacon’ ah Editor sin a lo chel bawk a nih. HYA­ah a kul a taia an hmang tanaw hnung khawma HYA tlawmngaina bansan chuong lova a nuna hmang zing tu, entawntlak tak a nih.
    
Kum 1993­-2008 inkar sung khan Children’s Home Saikawt­ah Superintendent sin a chel a, kum 2009 a inthawk a thi chen khan Manager Children’s Home Saikawt sin a chel a nih. Children’s Home Saikawt hi fahra le chanhai tam tak ta dinga hadamna hmun niin kum 1980 a indin tan a ni a, hi Home­a inthawk hin kum 2014 chen khan naupang 924 umin Pastors, technicians le line dang danga graduates tam tak a lo ser suok ta a nih.
            
Pu Hmanga Khawlum hi ei Chanchinbu Hmasawnna Thar ta dinga thahnem ngai em em a ni bawk a nih. Lusun sungkuo hai ei chanchinbu chun a sunpui hle.

Life Café ah Campaign Musical Concert
CCPUR: June 27, 2015, 6:30 PM khan Coalition on Environment and Natural Resource (CENRs) chun Life Café JJ Plaza, Rengkai Road, CCPur­ah “ Protection of indigenous peoples land and resources” ti  thupui hmangin Musical Concert an huoihawt. Concert in a thil tum tak chu ei ram le ei rohlu hai humhal a nih. Hi huna hin mimal le Band insitumlo tak tak, Miss Christina Shakum, Semikah Band, Sinlung Express (Band) le Beauty ‘N’ Beast (Band) haia inthawk hla mawi tak tak ngaithlak a nih. Fiela um hai khawm an kim tha hle a. Huoihawttuhai chun refreshment/snacks khawm tuihnai tawk takin an lo hrai tawl a nih. Hi hun hi Mr. Emmanuel Infimate MPS, SDPO; CCPur, Media tum tum, Social le Church Activist hai khawmin a uop. Pu David Buhril, Pu Simon Hrangchal, Pi Mary Beth Sanate le a dang dang khawmin thuhrilna hun an hmang tawl. Mr. Joseph R. Joute Director, One Life; Life Café enkaitu chun hiengang hun eini laia huoihawt a a um chu tha a ti hle thu hrilin ramdang thangpuina ringawt nghak le beisei lo a hienganga ngaituona neituhai chu an pak hle thu a hril. Huoihawttuhai chun fiel a um ngaipawimaw a fekhawmhai kuomah lawmthu an hril. (LRS)

PTC Raising Day le MDC lawmna
CCPUR: Paite Tribe Council (PTC) chun zani 10:30AM khan Hiangtam Lamka YPA Gen. HQ Hall­ah 66th Raising Day le interaction program an hmang. Hi huna hin Improvement of Education amongs the Paite tribe ti thupui hmangin Thangzamuan Tombing, Secy. (internal) le Lianzapau Samte, President, SSPP GHQ han thu an hril a, hi zo hin open discussion nei a ni a, IAS, IPS, IRS, MCS le a dang danga mi tamlem an lut theina dinga coaching center indin dan ding le student hai laia awareness tamlem thaw dan ding hai an hriltlang.
    

Hi huna hin MDC tling thar hai lawmpuina thilpek an inhlan bawk. Chun, “Practice of Mouvanken amongst the Paite Society” ti thupui hmanga thuhrilna le open discussion hai nei a ni bawk.

BJP CCPur Dist. Office hawng:
BJP in HPA a zawm thei ding a ni nawh: J. Haokip
CCPUR: Mr J. Haokip, President, BJP CCPur District chun zani zantieng 3:00PM khan Hmarveng­a BJP CCPur District Office hawngna a nei. A hmaa BJP Office hlui Chungkhosei campus sunga um chu hmang a ni tanaw ding a nih. Hi huna hin J. Haokip, President, BJP CCPur inrawinain member thar 42 (2014­15) han party hmalak pei dan ding an hriltlang.
    


Pu J. Haokip chun, National Party BJP in Alliance Party Hill Peoples Alliance (HPA) a zawm ding ti chu thil ni thei lo a ni a, HPA in BJP a zawm lem chu thil ni dan ding a nih tiin reporter hai indawnna dawnin a hril.

Workshop­cum­ career councelling
CCPUR: TKSU GHQ/Manipur; TECHCHAPAZ (New Delhi), NYDO (Saikul), NECTAR (Shillong), Bethseda Youth Centre, Dimapur le pawl dang dang hai huoihawtnain zani 10:30AM khan M. Songngel Community Hall­ah “Inspire IAS, 2015 for Civil Services Aspirants, IAS Workshop­cum­ TECHCHAPAZ career Councelling” nei a ni a, program hi Thangkhopau Ngaihte, IAS (Retd) in a hawng. L. Mangkhogin Haokip, IPS, SP/CCpur; Michael; Paotinlen Chongluoi, Chief O’ TECHNOWLOGIZ; Lunminthang Haokip, IAS, DC/CCPur han thupui tum tum hmangin thu an hril bakah Shokhongam Baite, MCS (Topper among ST) le Ginzamuan Ngihte, MCS (Second Topper STs) han hlawtlingna thuruk ti thupui hmangin thu an hril bawk.

Friendly match ding thul
CCPUR: Zanita Public Ground, CCPur hmuna CDSA le Ex­CNLA society hai thangruola huoihawtnaa (L) Generala Tunkhopum Baite hrietzingna dinga District Outside Player le CCpur Dist. Player han football friendly match an nei dinga ti chu ruosur leia field a pawr taluo leiin thul a ni a, 29, 2015 a inkhel dinga hun ruot thar a nih.

Education meeting
CCPUR: June 29, 2015, 1:00PM khin Mr Lunminthang Haokip, DC, CCPur inrawinain a Office chamber­ah New Education Policy meeting um a tih. Hi huna hin Ms Mannuamching, CEO/ADC; T. Goukhomang, ZEO/CCPur; DIO/NIC CCPur le SDOs hai thang an tih.

SYO Road le Oxygen set hawngna
CCPUR:  Zani zingkar 7:30AM khan Simveng­a Simte Inn ah SYO GHQ hmalaknain SYO Road hawngna le M. Gouzamang Guite, MDC in SYO kuoma Oxygen set 2 a pek hai inhlanna le hawngna programme hmang a nih. SYO road hi Jamchinthang MDC Thanlon in a hawng.


Headline
NITI Aayog Sub­Group Meeting nei;
CSS 72 a inthawk 30 a suktlawm an remtitlang
NEW DELHI:  National Institution for Transforming India (NITI) Aayog Sub­Group meeting chu  an Convenor Shivraj Singh Chouhan, Chief Minister Madhya Pradesh inrawina hnuoiah zanikhan New Delhi­ah nei a nih. Chief Minister’s Sub­Group a member­hai chu Madhya Pradesh (Convener); Arunachal Pradesh, Jammu & Kashmir, Jharkhand, Kerala, Manipur, Nagaland, Rajasthan, Telangana, Uttar Pradesh le Lt. Governor of Andaman & Nicobar Islands hai anni a, sienkhawm NITI Aayog Sub­Group meeting a hin Madhya Pradesh, Rajasthan, Kerala, Uttar Pradesh, Nagaland, Manipur  CM­hai chau an thang.
            
Zanita NITI Aayog Sub­Goup meeeting chun Centrally Sponsored Schemes (CSS) 72 ni hlak chu 30 a suktlawm an remtitlang. Chun, flexi funds share 10 percent ni hlak chu 25 percent a sukpung dingin an recommended. Hi Committee members (CMs) hai po po remtinain hi recommendations hi July 5, 2015 a sukfel a, chu zova PM Narendra Modi kuoma peklut ning a tih tiin Shivraj Singh Chouhan chun a hril. CSS a hin MGNREGA, Swachh Bharat Mission, Midday Meal hai a thangsa a nih.

Imphal
Khawhriin students 4 an sawisak a hril
IMPHAL: Bishnupur district a Kumbi Assembly Constituency sunga um Saiton Government High School a kai student 4 hai chu khawhriin a sawisak leiin an school hi haptakar khat khar ni tain ei thu dawngna chun a hril. Khawhriin a sawisak student 4 hai laia pahnihai chu an insuol a, hi lai hmuna hin temple bawl an ngen niin ei thu dawngna chun a zieklang. Student 4 hai hi Class VIII inchuklai vawng an nia hril a nih.

Trucks iemanizat Mao Gate bulah an intang
IMPHAL: ATSUM in an Economic Blockade thaw an sukkhau zuol leiin Manipur le Nagaland inrina Mao Gate bulah Imphal pan ding thuomhnaw phurtu Truck iemanizat an intang niin ei thu dawngna chun a hril. ATSUM Volunteers han an economic blockade thaw bawsetuhai chungah action na taka lak dinga inthina an siem leiin security escort um khawma Imphal hung pan ngamlo Truck an um niin ei thu dawngna chun a hril.

KMC meeting sukchawl dingin
IMPHAL:  Kumbi Municipal Council (KMC) in Special meeting an nei chu sukchawl dingin June 25, 2015 khan High Court of Manipur chun thu a pek. KMC Chairperson Moirangthem Bineshwor Singh chungah no­confidence motion putlut dinga rel an tum a. Amiruokchu, M. Bineshwor Singh le Councilors 2, Khagembam (O) Pratima Devi of Ward No. 2 le Wahengbam(O) Indubala Leima of Ward No.9 han Court­a petition an pek leia Court in hi thupek hi an suo a nih.

Legal aid petu ding Advocates 11
IMPHAL:  New Delhi a Manipur mi han hnam thila sawisak le harsatna an tuok changa legal aid petu dingin Advocates 11 ruot an nih tiin Nungshitombi Athokpam, Joint Secretary (Law), Govt. of Manipur chun Order an suo. Legal Aid petu dinga ruot Advocate­hai chu N. Kalyani Devi; Lenin Hijam; Nidhiram Sharma; Gaichangpou T. Gangmei; A Rohen; Potsangbam Boyboy; Maibam Nabaghanashyam; David Ahongsangbam; Ramesh Pukhrambam; Premjit le Henry Ahanthem hai an nih.

Adimjati Girl’s Hostel an va sir
IMPHAL:  Dy. CM, TA/Hills and SC Mininister Pu Gaikhangam le Pu S. Minlianthang Vaiphei, IAS, Director TA/Hills and SC hai chun zanikhan Chingmeirong, Imphal­a Adimjati Girls Hostel an va sir a. Hostel fencing le water supply siemthat dan ding bakah Dining Hall siemthat dan ding hai an enfel. Hi huna hin Ex­ MP le Adimjati Girl’s Hostel Managing Board Chairman Rishang Keising khawmin a zui.

Others
Ramsa sawnin a kap hlum
AIZAWL: June 25, 2015, 6:30 vel khan Mr Lalhriatchhunga (38) of Tualte khuo chun sa kap dinga ramsuok ve tho Malsawmdawngtlunga (36) s/o Thanghluna, Tualte khuo ve tho chu ramsa sawnin a kap a, Malsawmdawngtluanga hi iengkhawm hril hman lovin a hmuna a thi nghal. Lalhriatchhunga le Malsawmdawngtluanga hai hi a hran ve vea sa kap dinga ram riek a fe an nih. Lalhriatchhunga hi thu indawn dingin Police han an hrentang.

HPC­D man hai chungah chargesheet thelut
AIZAWL:  Mizoram Police chun April 16, 2015 a Silchar a an man HPC­D mi pathum hai chunga Chargesheet chu Court ah an thelut. HPC­D hotu Mr. Lalropui Famhoite, Mr. Norbar Sanate le Mr. Ngurthantluanga Sante hai chunga Mizoram Police hai chun IPC Section 387 a thawluina hmanga mi pawisa dawl, vauna le buoina siem pekna le inzawm’n Court ah thubuoi (case) siemkhumin an thelut a nih. Mizoram Police chun Mr. Lalropui Famhoite le Mr. Norbar Sanate hming hin vawi tamtak Mizoram Hmartlangdunga khuo dang dangah HPC­D haiin phutlui Sie (Tax) an khawn hlak thu le mipuihai vauna an pek hlak niin an hril a, manna um pathum hai chunga hin thubuoi dang khawm an la siem sa tum thu an hril. Mizoram Police hotu hai chun March 28, 2015 a HPC­D ha’n MLA hai inzin an lambunna khan anni hai hi an inrawl ve ngei niin an hrila, kha inlambuna kha Mr. Lalropui Famhoite thupekna ngeia lambun an nih tiin an hril. (input virthli)

Polio damdawi dawn zoin Naupang a thi
PATNA: Bihar­a Vaishali district­a chun zanikhan Naupang pakhat chu Polio damdawi indawntir a ni zo hnungin a thi bakah  naupang dang 6 an damnaw niin official thusuok chun a hril. Hi thil hi Vaishali district headquarters a inthawka km. 25 vela hla Shahpur village­a tlung a nih. Hi thil hi suizui dingin Vaishal Civil surgeon Ramashish Kumar chun order an suo a, naupang hi Polio damdawi indawntir a ni leia thi a ni le ninaw suichieng dingin officials hai an hriettir.

Nilekani Congress a inthawk a bang el thei
BENGALURU: Aadhar Chairman hlui le Infosys co­founder Nandan Nilekani chun  a nationwide education initiative –EkStep­a hun tamlem a hmang theina dingin Congress a inthawk a bang vat ta el thei niin ei thu dawngna chun a hril. Nilekani hin Congress party zawmin Lok Sabha eletion nuhnung taka khan Bangalore South­ah Congress ticket in a ngir a, sienkhawm BJP candidate HN Ananth Kumar chu hnezo lovin a hlawsam a nih.

States 5­a seats 6­ah byelection nei
NEW DELHI:  Zanikhan States 5 haia Assembly seats 6 haia byelection nei a nih. Byelection neina hmun hai chu AIADMK leader le Tamil Nadu CM J.Jayalalitha ngirna Dr   Radhakrishnan Nagar (Tamil Nadu); Chokpot (Meghalaya), Aruvikkara (Kerala), Pratapgarh le Surma (Tripura) hai le Garoth (Madhya Pradesh) hai an nih.

Vantlang hmuna inzun mi 109 Jail­a khum
AGRA: India rama a hmasatak dingin Government Railway Police, Agra division chun  vantlang hmuna inzun laia man 109 hai chu darkar 24 sung intang dingin Jail­ah an thun a, a hnungin an inzunna hmun izirin Rs. 100­500  inchawitir an ni hnungin insuo nawk an nih. Hi thil hi PM Narendra Modi hmalaknaa ‘Swachh Bharat’ campaign (Clean India Mission) hnuoia an thaw a nih.

Thing kau tliekin student 5 a del hlum
KOCHI: Zani hmasa zantieng 4:30PM vel khan Ernakulam district sunga Nellimattom, Kothamangalam hmuna school naupang hai chuongna Bus chu thingkau tliekin a del a, student 5 in thina an tuok. Hi bus a hin Vidya Vikas School­a kai naupang 15 an chuong a nih. Student 5 thihai chu Isha Sara Eldho (10), Amin Jabeer (9), Krishnendu (13), Gouri Punnakkal le Johan hai an ni a, student dang hai chu an him tiin hospital thuneitu hai chun an hril.

PM in IARI bawlna ding lungphumna
NEW DELHI: Prime Minister Narendra Modi chun vawisun hin Jharkhand­a Goriya Karma village­ah Indian Agriculture Research Institute (IARI) bawlna ding lungphumna nei a tih.  Hiengang institute hi eastern India a dinga a hmasatak ding a ni a, ram acres 1,00 a lien sunga bawl  ding le a bawlnaa sum seng dinga riruong chu Rs. 1,000 crore a nih.

Sialsuk tlang­ah mi 2 an tla, pakhat a thi
AIZAWL: June 25, 2015  zan khan Sialsuk tlang rawl­ah Thanchampuii (25) of Thingsualthliah le Eddie Zorammawia of Ramthar North, Aizawl hai chu an tla a, Thanchampuii chu a hmuna a thi a, Zorammawia ruok chu  na takin a hliem. Hieng mi pahni hai hi Sialsuk tlang a waiting shed bul vela inthawka World Bank Road­a tla thla niin an inlang a, an tlakna hi metres 100 vela insang niin ei thu dawngna chun a hril. Hi lai hmuna va hmutu Sialsuk mi pa pakhat chun Zurui chatthla mei mei nia a ring leiin a fesan a, sienkhawm a hnungin ringhlana a nei leiin YMA hotu hai inpuna an va en huna Eddie Zorammawia hi hliema hmu le Thanchampuii hi a thiin an va hmu a nih.

India in NZ a High Commissioner a kokir
NEW DELHI: New Zealand­a India High Commissioner Ravi Thapar chu a nuhmei in an umpui thlaisuongtu (domestic help) thalo takin a sawisak tia intumna um le inzawmin New Delhi tieng kokir a nih. Intumna hi suizui ning a tih tiin zanita Ministry of External Affairs thusuok chun a hril.

US Supreme Court in nina inang innei a phal tah
WASHINGTON: US Supreme Court chun America ram pumpuiah nina inang  (mawngkawhur) hai dan ang taka innei a phal (legalized) tah. Hi thil hi America rama mawngkawhur hai ta ding chun chanchin lawmum a nih. America rama hin states 50 a um a, chu hai laia states 14 haia chun hiengang Gay marriage hi khap (ban) a ni a, sienkhawm tuhin chu a ram pumpuia Gay marriage hi Supreme Court chun a legalized ta a nih. Supreme Court thutlukna hi Justice Anthony Kennedy in zani hmasa khan puongin “for equal dignity in the eyes of the law. The Constitution grants them that right’ tiin thusuok a siem.
    
Hieng laizing hin Christian Conservatives hai chun US Supreme Court thutlukna hi nasa taka dodalin an ngaimaw hle a nih. America President Barack Obama chun hi thil hi ‘victory for America’ a nih tiin a hril. States 36 le District of Columbia haia chun nina inang Gay  le  Lesbian hai chu dan anga innei  theina phalna an lo nei tasa a nih.

SL Parliament a thiek; Aug. 17 ah General Election
COLOMBO: Sri Lanka President Maithripala Sirisena chun June 26, 2015 khan Sri Lanka Parliament chu a thiek (dissolves) a, General Election chu August 17, 2015 nia nei dingin a puong. Hi thua Gazette notification chu June 26, 2015 zan khan insuo a nih. General election a dinga nomination paper chu July 6­15, 2015 inkar in file thei ning a ta, Parliament thar chu September 1, 2015 ah inthung hman dinga ti a nih. Sri Lanka General Election a hin President hlui Mahinda Rajapaksa khawm ngir nawk a tum.
-----------------------------------------------------------------------------------------------------
VAWISUN THUPUI
Chuongchun, Pathien thu thuin um ro; amiruokchu, Diebol chu kal ro, chuongchun, tlanhmang san a ti cheu. Pathien hnai ro, chuongchun amain hnai a ti cheu. Misuolhai, in kuthai sawpfai  ro, lungril bulbal nei nawhai, in lungrilhai sukthieng ro.­Jakob 4:7­8

Editorial:Mikhuol le a dawngtu

Mihriem ei ni sung hin mikhuol ei ni lai amani, mikhuol dawngtu amani hi a um naw thei nawh. Mihriem hringnuna kawp tlat, Zohnathlak hai lem chun ei tawpsan thei lo, khawvela ei dam le um sunga ei dawng le tuok ding a nih. Phairama inthawkin thingtlanga ei inzin tul chang dam, thingtlanga inthawka phairama ei inzin tul chang a um tei tei hlak. Chu huna chun mikhuol amani annawleh mikhuol dawngtu ei ni hlak. Mihriemhai hi mani khata khawsa thei lo, inmamawtawn seng ei nih. Mikhuol hi nghawk le theida ding an ni naw a, ei ta dinga malsawmna intluntu an nih ti hi hriet tlat ding a nih. Ei Bible khawma mikhuol lawm rawp dingin a min fui a nih.
    
Mikhuol ei nei thei lai hi ei that lai a nih ti hriet tlat ding a nih. Mikhuol nei thei ta lova ei um pha chun ienglei am a na ti hi ngaituo a ei um dan le mikhuol ei enkawl dan hai kha ennawn hlak ding a nih. Mikhuol han tlungna tlaka an mi ngai tanaw pha chun ei tlase ta hle annawleh mikhuol enkawl thiem lo le duot ngailo ei nih ti hriet ding a nih. Mi han tlungna tlak le beltlaka an mi ngai sung hin chu lawm hle ding a nih. Mikhuol hau le nei ngun leia pasie an um ei la hriet ngai nawh.
    
Mikhuol, Ui le ar ei insungah an hung indikdak tanaw pha chun ei tlase ta hle tina a nih. Thil mak takel pakhat chu, that lai le vang fe lai chun mihriem chau ni lovin Ui le ar hai khawmin an mi  bel nuom a. Nisienlakhawm, mihriemin siet  ei hung tuok ta hin chu a hrie ang elin Ui le ar hai khawmin an mi tinsan hlak. Mihriem hai anga sie le tha hrietna nei khawm ni lo, ranhai chenin an mi riel san ta chun ieng am suksuol le thaw suol ka nei a ti hi chik taka ngaituo chet chet ding a nih.
    
Khawlai lai amanih mikhuolin ei umin mihai inah ei tlung ve rawp ta ring a um. Chu huna chun inneitu ta dinga phurrik ni lo hram hram ding a nih. Pasal annawleh nuhmei ei lo ni khawma mikhuol ei ni sunga ei mawphurna le thaw ding kha hriet tlat ding a nih. Entirna’n  nuhmei chun insunga hmunphit, thleng sawp, tuichawi le a dang dang hai chu thaw rin lo a, mani ina ei thaw ang bawk khan thaw hlak ding a nih. Pasal khawm ni inla insunga thaw tul um hai chu thaw rin lo ding a nih. Chuongang mihai chu an tlungna taphawtah mi lawm, inpak anni a, an tla tlum phien hlak.
    
Mikhuol ei ni hin mihai ta dinga harsatna ei intlun hmasa tak chu an sungkuo nun bik (privacy) ei suk buoi phawt a, chu bakah an lo thaw thang tasa bu suong, hme siem, zal hmun siem sukdanglam, siem belsa amanih a hung ngai hlak. Hieng huna hin mikhuol ni chun dittui lova a awlsam dan ding taka um thiem ding a nih. Ei tlungin hai chu an hausa tam, an rethei tam, hme ding inchawk le hawn ve hi mikhuolhai ta dinga theinghil ngailo ding a nih. A bikin phairam le khawpui haia chuan iengkim el hi inchawk a ni ta si a.
            
Mikhuol ei ni lai chun tu khawma tawngbau tha lovin mi bie ngai naw ni hai a, hawihawk takin an mi dawngsawng ding a nih. Hi lei hin mikhuol chun  ei mawphurna, ei thaw ding le thaw lo ding hai hriet a tul hle. Tulai chu ei changkang ta a, ei tlungna in neituhai kha dumkhu hawp lo anni le ninaw dam hriet a, dumkhu hawp hlak ei ni chun fienriel pan a va hawp el ding a nih. Chun, mani fena le hungna ding hai hril ngei ngei hlak ding, midang inah bu ei fak ding lem chun hrillawk ngei ngei ding a nih. Chun, an fak ruola bu fak ngei ngei ding a nih. Mikhuol bengvar lo hi mikhuol dawngtuhai ta dinga phurrik anni hlak. TV en hun sung dam hi a chintawk hriet a tha.

Post a Comment

Powered by Blogger.