Responsive Ad Slot

Hmasawnna Thar | 21 June, 2015

Sunday, June 21, 2015

/ Published by VIRTHLI
Tuolsung
Food & Nutrition Security Programme hmang
CCPUR: June 19, 2015 khan FNS/DD­RPC NEI le Community Devp. Committee, Jolzam le Muolvom hai thangruolin Jolzam khuoah Food and Nutrition Security programme hmang a nih. Programme hi session 3­ a hmang a ni a, a hmasa tak 6AM in Devp. Dept. RPC NEI huoihawtna hnuoia Farmers Club indin a ni a, Interim period a dingin thuoitu ding thlang nghal a nih. Session 2, 10:30AM­2:00PM inkarin “Facilitating Farmers on pest control for increasing quality product” thupui hmangin programme hmang a ni a, hi huna hin Muolvom le Jolzam Village a inthawk Farmers 50 an thanga, Shri S. Shyamjai Singh,Horti. Dev. Officer, CCpur.le Mr. Ramneithang PC. ICDP/CCpur FNS DD­RPC NEI hai resource person in an thang.
    



Zantieng 3:00PM in “Introduction and Promotion of HYV: seeds, Saplings and Animal Husbandry” thupui hmangin programme hmang nawk a ni a, a, mipui 120 chuong an fekhawm a, hi huna hin Mr. S. Muana FC FNS DD­RPC NEI chun High Yielding Variety Seeds, Saplings le Pesticides abikin hi programme huna a semdawk ding hai chungchang hrilhrietna a nei a, ICAR, KVK le DD­RPC NEI thangruol in Famer 21 kuoma RCM­10 (Buchi) le Mango sapling hai Introduced le peksuok a nih. Hi huna hin Rev. Edwin Darsanglur Director DD­RPC NEI le Mr. Joseph L. Infimate Manager, ICDP/CCpur DD­RPC NEI hai chu Chief Guest le Functional President in an thang a, infuina thucha tha tak tak hai hrilin Bu chi, theikak le Pesticides hai semna an nei. DD­RPC NEI in lungril lien tak neia hiengang hun a buotsai na thua mipui chun lawmthu an hril.

CT Lian MDC tling lawmna
CCPUR:  Zani 10:30AM khan Lametna mun, Bungmual­ah ADC Election 2015­a CCPur ADC hnuoia New Lamka West biela MDC dinga thlangtling Chintwahlian @ CT Lian lawmpuina hun hmang a ni a, Rev G.Paumuanthang chun CT Lian ta dinga tawngtaipekna a nei. Hi huna hin thilpek inhlanna hun hmang a ni bawk.
      

CT Lian chun, insung harsa taka inthawka lo seilien ve a ni thu; lekha thiem thei ninaw sienkhawm fail ngailo hrim hrim a ni thu a hril a, a tumruna leia London chena lekha lo inchuk thei a ni thu a hril. Mi tam tak chun sum nei lova election­a tling thei ni lovin an ngai a, sienkhawm chu ngaidan chu tuta tum hin inthlakthlengin sum lei nisien tukum MDC election­a a tlingnaw ding thu; London­a a um lai a sum hmusuok 20% pei siethlaa thangpui ngaihai thangpui hlak a ni thu, tukhawm hin hi thil hi a la sunzawm zing thu a hril. A biel sunga a thei tawpa thangpui ngai hai a thangpui ding thu a hril. Zantieng MDC tling lawmnain Bawng 1 le Vawk 4 thatin ruoi an the.

S.Vaiphei, IAS CCPur­ a hung
CCPUR: Pu S. Minlianthang Vaiphei, IAS, Director, Tribal Affairs and Hills and SC le Managing Director,MTDC, Govt. of Manipur chu Churachandpur­ah a hung in zin a, Tuibuong Peace Ground­a MTDC hnuoia bawl mek Mini­Stadium ngirhmun a hung enfel. Hi baka hin Tuibuong­a TD Office le District Council Office hai khawm a sir bawk.

Manmasi Digest a suok nawk tah
CCPUR: Manmasi Digest May- June, 2015 issue chu tiem thei dinga semdar a ni ta a, Lekhabu zawrna tum tum le Agent hai kuoma inthawk hmu thei ning a tih. A sungah thu tiemnuom um tak tak­ Mizoram Home Minister le a keihnawi; Martyrs Day report, Tuikuol Ram report; Hmar Khuo suosam le a dang dang tam tak tiem ding a um.

Intl. Yoga Day hmang ding
CCPUR: June 21, 2015, 1:30PM khin NYK/CCPur; 54­Bn BSF le 32­Bn CRPF hai thangruola huoihawtnain NHPC Community Hall, Loktak Project­ah International Day of Yoga 2015, Dist. Youth Convention­cum­Yuva Kriti hmang ning a tih. Hi huna hin Mr Lunminthang Haokip, IAS, DC/CCPur khuollien ning a ta, Vidur Bhardwaj, CO 54­Bn. BSF/Loktak guest of honour in thang a tih. Sadu Khoiroi Cultural Troupe, Choruikhullen Cultural Troupe han lam inentir an ta, Guru Nehru Singh inrawinain Yoga demonstration um a tih.
            

Chun, Vawituk 7:00AM hin National Cadet Corps, 14 (M) Bn. NCC, Imphal inrawinain Rayburn College Campus­ah International Day of Yoga hmang ning a ta, hi huna hin CCPur Govt H/S; Bethany Christian College le Rayburn college a NCC hai thang an tih. Hi ding le inzawm hin zani zingkar khan NYK/CCpur le NCC thangruolin Yoga practice/rehearsal nei a nih.

In pakhat a kang
CCPUR: Zani zantieng inthim hnung khan B.Vengnom, CCPur­a Pu Hempao Haokip chengna in chu kangmei suokin a kang a, a sunga thuomhnaw iengkhawm laksuok hman um lovin a kang siet vawng niin ei thu dawngna chun a hril. In kang huna hin In neitu hai tukhawm an um naw a, Imphal­a damdawi pana fe niin ei thu dawngna chun a hril bawk.

HSLC le Class XII pass hai lawmpuina
CCPUR: Mualkoi a Covenant Children’s Home chun zani 7:00AM khan CoHSEM hnuoia  Class XII le HSLC Exam, 2015 a Class X pass hai lawmpuina ‘9th High School Graduation  Ceremony 2015” an hmang. Hi huna hin Rev. Khen P. Tombing, Director, Covenant Children’s Home chun Class XII  pass mi 19 hai capping a thaw bakah Rev. M. Khamlianmang, Secy. Managing Board chun Class XII pass mi 19 le Class X passed mi 27 hai ta dinga tawngtaipekna a nei.

Imphal
Ti leia tlansie hai an kir nawk tawl mek
IMPHAL: June 4, 2015 nia NSCN (K) han Chandel District, Manipur­a Paraolin hmuna Army patrolling­a fe hai an lambun huna Army 18 zetin thina an tuokna le inzawma Army han Operation an thaw huna sipai kut tuor ti leia an khuo hai rausana tlansie Paraolon, Moltuh, Kottal Khuntak le Challong khaw mi hai chu an khuo haiah an kir tan nawk tawl ta niin Chandel DC Robert Khetrimayum chun a hril. Hieng khuoa cheng mipui a tamlem hai chu Pallel, khaw lien deu le hmun hima an ngaina hmuna an sung hai bela tlansie an ni tawl. Hieng khuo haia cheng han an tlansan an ran vai hai chu rannung humhalna tienga NGOs han an lo va enkawl pek niin official thusuok chun a hril.(PTI)

P.Vaiphei in phalna la hmasa lova buotsai lo dingin
IMPHAL: Mr P. Vaiphei, Commissioner, Dept. of Hr. & Tech. Edn. Manipur chun, Private technical institutions hai chu Department phalna le remtina la hmasa lovin Educational festival le counseling buotsai lo dingin an hriettir. Hi thu hi Directorate in DM College­a ni 3 sung aw ding Educational counseling hawngna huna a hril a nih.

ZUF in darkar 72 Bandh thaw an tum
IMPHAL: Zeliangrong United Front (ZUF) chun June 24, 2015 zanril­a inthawk khin Zeliangrong State ngenna le inzawmin Manipur­a Zeliangrong mi hai chengna biel sunga National Highways, National projects le inter­district road hai kharin darkar 72 sung bandh an thaw ding thu an puong. Zeliangrong hnam han state hran an ngenna India sawrkarin a ngaisak nawh ti leia bandh hi thaw an tum niin an hril.

DESAM thuoitu man hai insuo an ni tah
IMPHAL: June 16, 2015 nia St. Joseph School­a teacher in a student class VI inchuklai a vuok leia student vawtu Democratic Students Alliance of Manipur (DESAM) President M. Angamba thanga DESAM hotu man le hrentanga um 18 hai chu zanikhan Court hmaah inlangtir an ni a, JMIC, Imphal Judge Alex Muivah chun surety bond Rs. 10,000 seng chawiin an suo.

KCP in St. Joseph School Ultimatum an pek
IMPHAL: Kangleipak Communist Party (Poirei Meitei) chun, St. Joseph School thuneitu hai chu an Computer Science teacher Gurumayum Rupachandra Sharma chu ni 3 sung ngeia a sina inthawk ban dingin Ultimatum an pek. Mr Rupachandra chu ni 3 sunga an kuta inpe dingin an inhriettir bawk. Mr Rupachandra hin hi school­a kai Class VI student a vuok leia ban dinga an phut a ni a. Hun tiem sunga ban a ninaw chun School hi an khar ding thu le darkar 12 sung aw ding Manipur pumpui huopin bandh an thaw ding thu Malemnganba, Meitei, Publ. Secy. KCP (P) thusuok chun a hril.

Congress a inthawk an ban:Ukhrul­ah NPF
CHANDEL/UKHRUL: ADC Election nei zo hlima Chandel district­a 22­Sugnu biela MDC dinga thlangtling Ngamkholal Baite chun zanikhan Indian National Congress (INC) a inthawk inbanna a pek.
      
Ukhrul district­a chun Naga People’s Front (NPF) chun Independent MDCs hai thlawpna in  sawrkar an siem  an tum. NPF chun Ukhrul ADC a hin seats 17 an lak a nih.

Dzuko thuah BJP team New Delhi­ah
IMPHAL: Manipur le Nagaland inrina Dzuko valley­a ramri buoina thu le inzawmin BJP Manipur team hai chu Central­a thuneitu hai inhmupui dingin vawisun hin New Delhi an pan ding niin BJP Manipur President Th. Chaoba Singh chun zanikhan a hril.

MLA disqualification hearing nei hun
IMPHAL: Trinamool Congress MLA K. Sharat le LJP MLA K. Shyam hai disqualification case­a hearing zani 10AM khan nei a ni a, July 16, 2015 a hearing nei ding nawk dingin Speaker, Tribunal, Manipur Legislative Assembly chun a rel. Chun, MSCP MLAs 5 Nemcha Kipgen, RK Imo, P Brojen, Zanghelung Panmei le K Thamarjit hai disqualification case­a hearing chu July 20, 2015 a nei dinga ti a ni bawk. Hieng MLAs 5 hai hin INC an zawm leia MSCP chief Adim Panmei in disqualify dinga petition a pek an nih. Tuta hma khan Trinamoll MLA 3 – K. Joykishan, Th. Biswajit le O.Lukhoi hai chu speaker in a lo disqualify ta bawk a nih.

Headline
Vawisun khawvel pumpuiah International Yoga Day hmang ding;
India rama chun hunpui tak Rajpath hmuna hmang ning a tih
NEW DELHI: Vawisun hin khawvel rambung tum tum haia chun a vawikhatna dingin International Yoga Day hmang ning a tih. New York­a United Nations a hi ni hmangnaa thang dingin External Affairs Minister Sushma Swaraj chun zanikhan New Delhi suoksanin New York a pan. New York­a chun Mrs Swaraj le UN Chief le UNGA President hai chu Times Square­a hi ni hmangnaa hin va feng an tih. Hi hmuna hin mipui 30,000 velin Yoga thawng an ta, Yoga thaw lai hi live­a pekdawk ni dingin ei thu dawngna chun a hril. Internatonal Yoga Day hi khawvel rambung tum tum 192 haia khawpui 256 haia (first annual day of Yoga) hmang ni dingin India’s Permanent Representative to the UN, Ambassador Asoke Mukerjee chun a hril.
      
India rama chun hun pui tak New Delhi Rajpath hmuna International Yoga Day hi vawituk 7AM­7:35AM sunga nei ning a ta, hi huna hin students, NCC volunteers le government officials hai thangin mi 35,000 chuongan thang beisei a ni a, hi hun huoihawttu Ministry of AYUSH chun hmun pakhata Yoga a ruola thaw tam tienga Guiness World Records siem a tum a nih.
      
Hi huna hin Prime Minister Narendra Modi hi huna fekhawm mipui hmaah thu hril a tih. Foreign missions 152 haia diplomats hai thang dinga fiel an ni a, hi hun sîm ve dinga beisei celebrities hai lai Amitabh Bachchan, Cricketer Virat Kohli le Wrestler Susheel Kumar hai khawm an thang.
      
Mipui tam takin live­a an en theina dingin Rajpath hmuna chun sawrkarin digital cinema screens lien 2,000 inthut a tum. Hi hun sim ve dinga beisei celebrities hai lai Amitabh Bachchan, Cricketer Virat Kohli le Wrestler Susheel Kumar hai khawm an thang.
       
Rajpath le a se vel hai chu security personnel companies 30 velin venghimna sin thawng an ta, Yoga neina hmun hi Delhi Police thangin ralthuom chawi sipai 5,000 in an veng ding a nih.
      
India ram state tum tum haia khawm hmang ning a ta, Nagpur a chun Union Minister  for Transport and Shiping; Nitin Gadkari le Maharashtra Chief Minister Devendra Fadnavis  han hmangpui an ta, Lucknow chun  Home Minister Rajnath Singh in hmangpui a tih.
      
Manipur­a chun Vawisun hin Imphal­a IMA Conference Hall, Lamphel­ah State Level in International Yoga Day hmang ning a tih. CCPur District sunga AYUSH Doctor hai chu hi hun hmangnaa ma thei lova thang dingin Dr O.Ibomcha Singh, Mission Director, State Health Society, Manipur chun an hriettir.

Tuta inthawk EVM haiah Candidates hai thlalak, hming le symbol inchuon a ni ta ding
AGARTALA:  Election huna voters han candidates hai awlsam taka an thlierhrang le an vote ding tak harsatna nei lova an vote theina dingin tuta inthawk chun Electronic Voting Machines (EVMs) haiah candidate hai thlalak(lim), hming le an party symbols hai inchuon ta dingin Election Commission chun hma a lak mek. Hi system hi Kerala, Madhya Pradesh, Meghalaya, Tamil Nadu le Tripura haia June 27, 2015 nia Assembly byelection nei huna a hmasatakna dingin hmang tum a nih. Hi thil hi Supreme Court thupek anga  Election Commission in hmang dinga a rel a nih tiin Election Commission Secretary, K.N. Bhar chun a hril. Candidate thlalak chu party symbol le hming inkar­a inchuon ning a ta, hi system hi tuta inthawk Assembly elections le Parliament election haia hmang ni tang a tih tiin Mr Bhar chun a hril bawk.
      
June 27, 2015 hin Tripura­a Assembly Constituency 2 le state dang 4 haia Assembly constituencies 1 seng haia byelection nei a ni ding a ni a. Hieng election neina ding state hai Chief Electoral Officers le concerned officials hai chu hi system thar hmang seng dinga inhriettir an ni ta, EVM a candidate hai thlalaka chun lukhum le mitvar an bun ding a ni naw a, color le black&white hmang thei ve ve ning a tih tiin EC thusuok chun a hril.
      
EC thupek angin Tripura chun hi system hmang dingin hma a lak tan mek tiin Tripura Addl. Chief Electoral Officer Debashish Modak chun a hril.
      
Candidate hai thlalak hi security personnel le election officials hai ta dingin postal ballot a khawm inchuon ning a tih tiin Bhar chun a hril. Ziek le tiem theilo le mimawl han candidate hai  hriet hran harsa an ti rawp hlak bakah candidate hming inang an um hlak leia an lim a inthawk thlierhran thei an nina dinga hi system hi thaw tum a nih.

Others:
Zu thalo dawn leia thi mi 87 an tling tah
MUMBAI: Maharashtra state­a Zu thalo dawn leia mi thina tuok chu 87 an tling ta a, tuhin midang 36 vel thihmun suolin hospitals tum tum haia enkawl mek an nih tiin Mumbai Police thusuok chun a hril. Zu thalo dawn leia thi hai laia a tam lem chu Rickshaw drivers, hmunhnawk lakhawmtu mipasie an nih. Zu thalo hi Laxmi Nagar slum area Malad hmuna plastic bag­a inthun June 17 le 18, 2015 zan le zingkar haia kha an dawn a nih. Hi thil le inzawm hin Malwani Police station in­charge, senior Police Inspector Prakash Patil thangin Police personnel 8 hai chu an sin thawhne lova intumin suspended an ni tah tiin Mumbai Police Commissioner Rakesh Maria chun a hril. Chun mi 3 mana um Raju Langda, Donald Patel le Gautam Harte hai chu June 26, 2015 chen Police Custody­a um phawt dinga an chungthu rel a nih.

Helpawl ni dinga ring 3 kap hlum
JAMMU: Jammu and Kashmir­a Kupwara district a chun LoC kan­a India rama hung lut ruk tum helpawl ni dinga ringhla mi 3 Army han an kap hlum. Line of Control­a Machil Sector hmuna  India ram hung lut ruk tum hai Army han zani zingkar khan an hnawt a, chu huna inkaptuona tlunga mi 3 hai hi kap hlum an nih. Sipai tieng chu thi le hliem an um thu hriet a ni nawh.

Ruolbanlo nupa tuok 15 an innei
BHOPAL: Madhya Pradesh­a Barwani district sunga Sendhwa hmuna chun zani hmasa khan Mukhyamantri Kanyadan Yojana hmalaknain mass marriage function nei a ni a. Hi huna hin piengphunga ruolbanlo tuok 15 hai chu nupa ni dingin an innei. Hi function hi Minister for labour, backward classes and minorities welfare Antar Singh Arya khawmin a uop ve. Mukhyamantri Kanyadan Yojana hnuoiah nupaa insiem hai chu fixed deposit Rs. 10,000/­ seng le an inenkawlna ding  Rs.7000/­ bakah thil/thuomhnaw Rs. 5000/­ manhu pek an ni hlak a nih. Hi baka hin pawl tum tum hai chun nupa innei thar hai hi insung hmangruo chi tum tum an pek bawk.

WB in hospitals haiah khum 17,000
KOLKATA: West Bengal sawrkar chun a state sunga health care system suk hmasawnna dingin  a state sunga hospitals hai chu kum 2015­16 sung hin Rs. 2,600 crores sengin damnaw khum 17,000 siem belsa a tum tiin Health Secretary Malay De chun zanita CII huoihawtnaa health care event nei huna chanchinbumihai kuoma a hril. Tuhin West Bengal state­a Hospitals haia chun damnaw khum 63,000 aum mek a, khum 17,000 siem belsa a ni chun damnaw khum an nei zat chu 80,000 a hung tling ta ding a nih.

Ashram Bapu bail ngenna hnawl pek
JODHPUR: Nuhmei kum tlinglo a suollui tia intum leia September 2013 a inthawka Jail­a intang self­styled ‘godman’ Ashram Bapu (73) in bail a ngenna chu zanikhan Additional District and Session Judge Manoj Kumar Vyas chun a hnawlpek. Tuta tum hi Bapu in bail a ngen hnawl peka a um vawi 6­na a ni tah. Bapu hi a Ashram­a nuhmei kum tlinglo pakhat a suollui tia intum leia man le jail­a khum a nih.

Kolkata­a bomb puokah mi 1 a hliem
DUM DUM: Zanikhan North 24 Parganas district sunga Missionary school playground­ah bomb hrat rak lo a puok leiin mi pakhat a hliem. Hi field­a hin inkhel um ding leia an thielfai huna mi pakhatin ball ang deu plastic­a infun a hmu a, a zuk deng leh hi thil fun hi a hung puok leia mi pakhat hin hliemna a tuok a nih tiin Barrackpore Police Commissionerate a Commissioner of Police Nirad Singh chun a hril. Hliemna tuok hi Johnny Halder (21) a ni a, hospital­a enkawl mek a nih.

Mizoram­ah Party
AIZAWL: Mizoram­a chun zanikhan Political Party thar ‘Revolutionary Democratic Party (RDP) indin a nih. Hi party a President chu Robert Hrangdawla IAS (Rtd); Vice President : Hmingthanzami M.A.; General Secretaries : C. Lalthanmawia M.A.,; Vanlalhruaia M. Sc(Phy)  hai an nih

Thawluina hmanga sum dawltu mi 2 mipuiin an vuok hlum
TURA:Zani hmasa khan Meghalaya­a Rongjeng khuoa chun mipui kuoma thawluina hmanga sum dawltu mi 2 hai chu mipuiin manin an vuok hlum. Hi thil hi zani hmasa zantieng 1PM vela kha tlung a ni a, pawisa dawl dinga va fe hi mi 5 an ni a, anni laia mi 2 hai chu mana mipuiin an vuok hlum an ni a, midang 3 hai ruok chu himin an tlan hmang hman. Ni 3 vel liemta khan GNLA a inthawka surrendered ta sa mi pathum hai chu North Garo Hills­a Resubelpara bul lai mipuiin an lo vuok hlum ta bawk. Zani hmasaa mipuiin an vuok hlum hai chu Senstar Marak (23) of Rongjeng le Lakingbat Marak (23) hai an nih. Anni pahni hi Zu dawr le sumdawngtu dang dang hai kuoma silai leh chuktuoa sum ngen hlak an nih tiin tuolsung mi hai chun an hril. Senstar Marak hin AMEF helpawl a commander niin an hril hlak niin tuolsung mi hai chun an hril bawk. Nikum khawm khan suomhmang mi 5 zet Rongjeng village a hin mipuiin an lo vuok hlum ta bawk a nih.

Fukuoka prize dawng dingin Ramachandra
NEW DELHI: Indian Historian le author Ramachandra Guha chu Japan chawimawina inhnar um takel Academic category­a Fukuoka Prize dawng dinga thlang a nih. Tukuma hi prize dawng dinga thlang dang hai chu Thant Myint­U (Grand Prize) le Min Hanh (Art and Culture) hai an nih. Fukuoka prize hi Asia khawmuolpuia Academic, arts le culture tienga thaw hlawk hai kuoma inhlan hlak an nih. Award hi September 17, 2015 nia Fukuoka International Congress Centre­ah inhlan ning an tih. Guha hin September 19, 2015 khin “Gandhi, India and the World” ti thupui hmangin lecture a pek ding a nih.

NDFB(S) nuhmei cadre 1 man
BONGAIGAON: Zani hamsa khan Army le Police thangruol han Runikhata police station sung, Chirang district­a Bengtol area a Burijhar hmuna NDFB(S) nuhmei cadre Nijira Basumatary @ B.Nenai (24) d/o Alia Basumatary of Jiyaguri chu a chengnaina inthawk an va man. A kuta inthawk ralthuom le thil dang iengkhawm man ruok chu an nei nawh. Nijira hin kum 2012­a kha NDFB(S) a zawm, kum 1 sung Myanmar ram sunga training lo nei ta niin ei thu dawngna chun a hril.

EC in NPP symbol dingin ‘Book’
SHILLONG: Election Commission chun NPP chu a recognition suspended sien khawm June 27, 2015 nia byelection hung um dingah NPP candidate Chokpot Phillipole Marak chu symbol­ah ‘Book’ hmang a phal pek. NPP hi Lok Sabha election nuhnung taka election­a sum hmangna a peklut naw leia Election Commission in a recognition a suspended a nih.

China rama ruosur leiin mi 18 an thi
BEIJING: China rama chun tulai hin ruo le thli inthuoa nasa taka a sur le a hrang leiin mi 18 in thina an tuok ta bakah mi 4 hai chu an umna chin hriet lovin an inhmang niin Ministry of Civil Affairs thusuok chun a hril. Ruo le thli inthuoa a sur le hrang lei hin In tam tak a suksiet leiin mi tam tak chu chengna ding in nei lovin an um pha bawk. Mi thi hai hi In chimin a del hlum dam, tui­a tla hlum dam le Tekin a deng hlum dam an ni tawl. Mi thi tamna tak chu Hubei Province niin ruo le thli leia mihriem thi chu 10 an ni a, mi 664,000 velin harsatna an tuok pha bawk. Mi 5 dang thi hai chu Chongqing municipality hmuna thi an ni a, 2 dang hai chu Guizhou province­a thi le pakhat chu Anhui province­a thi an nih.

Mexico­a Beer Hall­ah mi 10 a kap hlum
MONTERREY: Zanikhan Mexico a Monterrey khawpuia Beer hall­ah silai chawi mi iemanizat an va lut a, silai a kap hrut leiin mi 10 zet a kap hlum. Mi 10 hai laia 7 chu a hmuna thi an ni a, midang 3 hai chu Hospital panpui an ni hnungah an hliemna tuorzo lova thi an nih tiin Nuevo Leon state security spokesman Jorge Domene chun a hril. Beer Hall silaia kap hruttu hai hi motor 2 a va fe an nih.
      
US State Department chun kum dang hai nekin kum 2014 sung khan khawvel hmun tum tum haiah terrorist hai chetna a pung niin a hril.


A nene sunga Cocaine 1.5kg thuprutu nupui man
BOGOTA: June 19, 2015 khan Colombia khawpui Bogota hmuna airport­ah nupui pakhat chun a nene sungah inruithei Cocaine tui 1.5kg (3.3lbs) a thupruk leiin man a nih tiin Police thusuok chun a hril. A nene sunga Cocaine thuprutu mana um nupui hi Paola Deyanira Sabillon (22) a ni a, Cocaine hi Spain rama phurlut a tum a ni a, sienkhawm a um danah Airport­a security han an ringhla leia X­rays hmanga an enfelnaah hi thil hi an hmudawk niin airport police Colonel Diego Rosero chun a hril. A nene sunga Cocaine thuprukna dinga surgery hi Colombia khawpui sunga Pereira clinic pakhata thaw ni a hril a ni a, a nene sunga Cocaine a thupruk hai hi Bogota hospital­ah lakdawk le hi hmuna hin enkawl mek a nih.

Bungmual YC in Zogal Memorial Champion Shield an lak
CCPUR: Zanikhan Public Ground, CCPur­ah Zogal Memorial Shield 2015 final Bungmual Youth Club le Zenhang Lamka Youth Club han an inkhel a, Bungmual YC chun Zenhang Lamka YC hnein Zogal Memorial football 2015 Champion Shield an lak. Bungmual YC hin lawmmanin Rs. 1,00,000/­ le Shield an dawng a, runner­up team Zenhang Lamka YC chun Rs. 50,000/­ le Shield an dawng.
      
Hi tournament nei huna 1st quarter final­a 1st quarterfinal Hero of the match chu Phungtanlian, ZLYC; 2nd Mong, MSYC; 3rd. Henry Gangte, GSC le 4th Minlun, UKP anni a, Semifinals­a 1st Hero of the match Malsawm, ZLYC 2nd. Jamkhansiam, BYC an ni a, Best Player Phungtanlian, ZLYC hai an nih.
      
Final match/closing ceremony a hin Vungzagin Valte, Hon’ble Parl. Secy., (Hort.Sc & CADA khuollienin a thang a, Langkhanpau Guite, Chairman(caretaker ADC CCPur) le M. Sheesei Zou, Chairman(caretaker) ADC, Chandel hai chu guest of honour le chief host in an thang.
---------------------------------------------------------------------------------------------------------------------
VAWISUN THUPUI
Naupanghai,  Lalpaa chun in nu le pahai thu zawm ro, chu chu thil indik a ni sih a. “I nu le pa chawimawi rawh,”  (Chu chu thupek tiem nei hmasa tak a nih). Chuongchun, i ta dingin thang a ta, hnuoiah dam sawt i tih.”
Ephesi 6:1­3

Editorial
International Day of Yoga

United Nations General Assembly in June 21 hi International Yoga Day annawleh World Yoga Day a hmang dingin December 11, 2014 –a a lo puong ta angin India ram chau ni lovin vawisun hin khawvel pumpuia chun Yoga Day hmang ning a tih. Official a chun hi ni hi UN International Yoga Day/ Yoga Day ti a nih. Hi thil hi India Prime Minister Narendra Modi in September 27, 2014 nia UN General Assembly­a thu a hrilna huna June 21 chu khawvel mipui po po ta dinga International Yoga Day a hmang dinga a hrilmawi hnunga United Nations in khawvel pumpuia hmang dinga a hung puong a nih.
    
Yoga hi mi tam tak chun Hindu sakhuo le inzawmna nei, Kristien sakhuona le inkal tlat nia ei ngai laiin mi then tamtak ruok chun Kristien sakhuona le inkalna bek um lovin an ngai thung. June 21 nia Yoga Day hmang dinga rawtna um le inzawm hin tulai hnai el khan Mizoram Kohran Hruaitu Committee (MKHC) chun Mizoram Chief Minister chu a Office­a inhmupuiin Yoga Day hi Kristien hai ni pawimaw Pathienni­a a ni leiin hmang tha an tinaw thu an intlun bakah Yoga hi hmang a ni ding chun inchuk­a hrietchieng hmasak phawt tul an ti thu Mizoram CM kuoma an lo intlun bawk a nih. Eini lai ruok chu Kohran tiengpanga inthawk sawiselna le dodalna iengkhawm riva hriet ding a um hri nawh.
    
Yoga hung intanna chu Hindu sakhuo a ni a, hi lei hin mi tam tak chun Hindu sakhuo le inzawm nia ngaina ei nei tlat a, a nina chin khawm a um ngei ring a um. Chulai zing chun tulai khawvel a chun khawthlang ram tieng han thawin inenkawlnain an hmang uor hle a nih. Yoga thiltum tak chu mani inhmuchiengna (self realization) neia, Pathien (Brahma, saptawngin ‘God’, Allah khawm sap­tawngin ‘God’ tho) le pumkhata insiem. Chu taka dinga taksa vawng thienghlimna dinga insawizawi, inthuok dan indik le hadam taka inthuok, lungril suk hadamna dinga ngaituona dîn vang vang (meditation) hmangruoa hmang a nih. Lungril, thluok le ngaituona bakah taksa sawizawina dingin Yoga hi a tangkai hle ni a hriet a ni a. Eini lai khawm mi tam tak chun zingkar inhma taka tho a Yoga thaw hmu ding ei um zeu zeu tah.
    
International Yoga Day thiltum chu Yoga hlutna mipui le khawvel inhriettir, hriselna dinga Yoga hlutna inhriettir, khawvela mipui hnam tum tum, sin tul le pawimaw tak tak nei hai taksa hriselna dinga nikhat sung hun inhmangkhawm tir; hmasawnna le inremna thu khawvel pumpuia thedar; hun harsa tak tuok le beidawng hai Yoga fethlenga an harsatna thawidam ti le a dang dang hai an nih. A sung­ril laimu tak iem ning a ta? ti ei hriet naw a, sienkhawm Yoga hi chi dang dang a um a, tam tak chu hmusuok thar le siem chawp anni a. Thenkhat chu a sakhuona lai  hnawl a, a exercise tiengpang uor taka fepui thei khawm a ni bawk. Khawthlang rama chun Asana le Pranayama hai hi an lar a, Asana hi body exercise tieng le Pranayama hi inthuok dan thunun tiengpang (breathing exercise) a ni thung.
    
Mi tam takin an sawisel a, Kristienna­a laklut tha an tinaw laiin thenkhat chun suk kristien a ni tah tiin thaw le hmang ve a pawi nawh tiin an hril ve thung a. Taksa insawizawina, thlarau tieng intuoitharna le lungril ngaituona sukhadamna dingin an hmang bakah mani inthununna nei theina ding damin an uor hle a nih. Thenkhat ruok chun Yoga thaw kher lovin lungril ngaituona dîn vang vang (meditation) ei ti hih Kristien han fienriel tawngtai le Pathien le inpawlna hun ei hmang thei ve tho leiin thaw ve kher hi tul in an hriet naw thung. Hi lei hin Philosophy le Theology tiengpang hrietna inthuk tak neilo eini mi naran hai ta ding chun Yoga hi thaw ve chi a ni le ninaw thua hin thutlukna le ngaidan siem thil harsa tak chu a ni ngei ding a nih. Yoga­a Asana le Pranayam hai hi taksa insawisawina ding le lungril ngaituona le taksa suk hriselna ding chun tha ngei a ta. Sienkhawm Yoga kher tul lovin exercise chi hrang hrang thaw thei tam tak a um a, lawn ringawt khawm hi exercise a nih ti chu mitin hriet a nih.
    
Hieng a ni lei hin khawvela sakhuo inruichil pawl a bik takin India rama RSS le VHP ei ti hai hin tharum thaw zawnga hma an lak rawpna chun mi an hne thei tak tak taknaw bakah an fepui zing thei tanaw leia hienganga an Culture fethlenga mi hne an tumna khawm a ni thei a, India PM Narendra Modi in hiengang khawpa Yoga a hrilmawi hin thu inphumruk a lo um el am? ti chu mitinin ei ngaituo seng dinga thiltha ning a ta. Ei lo thaw ve a ni khawmin a pawi chin le a pawinaw chin ei thlierhrang thiem chu thil tha ni ngei a tih.

Don't Miss
© all rights reserved
made with by Simon L Infimate