Responsive Ad Slot

Hmasawnna Thar | 07 June, 2015

Sunday, June 7, 2015

/ Published by Simon L Infimate
Tuolsung
Kangmei suokin In pakhat a kang
CCPur: Zani zantieng 4:30PM vel khan Mission Veng le Gangte Veng inrina Mission Veng, CCPur­ah Mr Ngaka s/o Khampau chengnain a inthawk kangmei a suok a, insunga thuomhnaw, bur le bel iengkhawm laksuok hman um lovin a kangsiet vawng. Fire Brigade le thenum khawveng mipui han kangmei suok hi darkar khat vel an beihrawn hnungin an thelmit.   Kangmei suok intanna tak hriet ninaw sienkhawm electric short circuit lei ni dinga ringhla a nih.
   
Kangmei suokin In a kang lai hin naupang kum 3 mi Ngakgoulun s/o Joy Lalmuan chu a khat chau insungah a um a, sienkhawm thenum khawveng han him takin an sansuok hman. Hi thil tlung huna hin a in neinu Momoi chu tuichawi dinga suok a nih.

Security khau tak hnuoia Re­poll nei a nih
CCPur: June 1, 2015 nia ADC CCPur hnuoia MDC seats 24 haia inthlangna nei huna thil felnaw umna Polling stations 15 haia chun zanikhan security khau tak hnuoiah inthlang thatna (re­poll) nei a nih. Zani zantieng 7:00PM chen khan 5/5 Thanlon, 6/7 Taithu, 6/8 Parbung (E/W) & 6/9 Parbung (S/W) le 6/10 Parbung (W/W) Polling station haia Ballot box hai ti lo hmun danga Ballot Box hai DC Office, CCPur hung phurtlung an ni tah.
           
Hi thu ei sut chena report ei hmu Polling stations haia Vote tlak dan chu­ 4/11 Tuilumjang (87 %), 12/13 T. Boljang (69 %), 13/2 Tollen (82.88 %), 13/3 Khengjang/Toupokpi (94 %), 14/1 Bijang (79.86 %), 14/13 Lhangjol (72 %), 20/1 Siden­Changpikot (73 %), 2/13 Teijang (84 %) le  3/10 Bungkot (83.12%) an nih.

DC in ARSH Clinic a hawng
CCPur: Pu Lunminthang Haokip, IAS, DC, CCPur chun zanikhan District Hospital, CCPur­ah Adolescence Reproductive & Sexual Health (ARSH) Clinic a hawng. Hi Clinic­a hin doctor 3 le Counsellor 1 um an ta, Mental & Sexual Health problem nei Adolescence 10­19 years hai ta dingin 9AM­1PM sungin nitin pan thei ning an tih tiin Seiboi Mate, DPM/NHM chun a hril.
    DC, CCPur chun, hiengang Clinic District Hospital­a hawng theia a um chu lawmum a ti thu hrilin ama tienga inthawk thangpui theina a um chun a thangpui ding thu a hril. Clinic hawngna hi Dr Kim Simte, Dy. Medical Supdt, Dist. Hospital le Medical Superintendent hai khawmin an uop.

DTF­IM  Special meeting nei
CCPur: Zani 11:00AM khan CMO Mini Conference Hall, CMO Campus­ah Dr V.C. Pau Tonsing, DFWO/DIO, CCPur inrawinain Mission Indradhanush thuah District Task Force­Immunization (DTF­IM) committee member han Special DTF­IM meeting an nei. Meeting huna hin CHC le PHCs haia Medical Officer in­charge hai, Block tum tuma inthawka ASHA Facilitators, ANM/Nurses hai an thang a, Dr V.C. Pau Tonsing chun Mission Indradhanush (Round 3) thaw dan ding hrilhrietna a nei.

 Malaria team Panglian khuoah an fe
CCPur: Panglian khuoa Ms Lhingngaining (7) d/o Khenthang Malaria natna leia a thina le inzawmin State Malaria Office, Imphal le Malaria Department, CCPur team chu June 5, 2015 khan Panglian khuoah an hang fe a, thil umdan an enfel a, Malaria team chun Malaria outbreak um theina dinga ringhlana hai a hmuna fein investigation an thaw. Lhingngaining hi May 30, 2015 nia District Hospital­ hung phurtlung, May 31, 2015 nia damzo lova thi a nih. Hieng laizing hin Panglian khaw mi tho Vanlalnunnem (25) khawm tuhin Malaria leiin RIMS, Imphal hmuna enkawl mek a nih. Malaria Dept., CCPur chun tuhin DDT/Bed net ti lo Malaria vengna damdawi (Chloroquine etc) thangin an nei nawh.

Banquet­ah Rs. 60,000 an hmu
CCPur:  ICI Central Choir in an rawngbawlnaa hmang ding Bus project­a dinga zanita Rengkai Community Hall, CCPur­a Banquet an huoihawta chun Rs. 60,000/­ an hmu phak. Tuchena Bus inchawkna dinga sum an hmusuok chu Rs. 3,86,300/­ a tling tah niin ei thu dawngna chun a hril.

Headline:
Helpawlhai le inbiek dingin sawrkarin kawt a hawng zing; sienkhawm ralthuom an peklut hmasak a tul: O.Ibobi Singh
Imphal: Zani zingkar khan Tulihal Airport, Imphal hmunah June 4, 2015 a Paraolon, Chandel District a 6­ Dogra Regiment hai helpawl han an lambun huna sipai thi hai ruong an khuo senga phur anni hmain State sawrkarin inzana le inthlana hunser a nei a. Hi zova Manipur CM O.Ibobi Singh in Chanchinbumihai an hmupuinaa chun, helpawlhai inbiekpui dingin sawrkarin kawt a hawng zing. Sienkhawm helpawlhai le sawrkar an inbiek ding chun helpawl han an ralthuom hai sawrkar kutah an peklut phawt a tul. Inbiek dinga a thara fielna siem a tul naw a, inbiek an nuom a ni phawt chun sawrkar chu inbiekna nei dingin an peizing a nih tiin a hril.
    
Chandel district, Manipur a chun helpawlhai tukdawlna dingin Army le Assam Rifles han operation an thawzing a, hi operation hi “People friendly” operation ning a tih tiin General Officer Commanding 3 Corps Lieutenant General Bipin Rawat chun zanikhan a hril. Helpawlhai chunga operation thawa um hi la fe pei a tih. Muongna le himna a um theina dinga hi lai hmuna hung kan nih. Thisuol thawtuhai man le hrem anni theina dinga operation hi thaw a nih. Chun, hieng misuolhai thangpuia lo thlawptuhai hrietsuok ngei dinga zawng ning an tih tiin Lt.  General Rawat chun a hril.
            
Lt. Gen. Rawat chun operation hi an nem zawng le people friendly a thaw ning a tih tiin hril sienkhawm Army­hai operation thaw tiin Paraolon, Moltuk, Libung le Duithang khaw mihai chun an In le lo hai maksanin hima an inngaina hmun hai an pan tawl a, khawsungah mi 5/6  bak an um nawh tiin ei thu dawngna chun a hril.

Nuhmei thisa ruong hmu; Tuolthattu ni dinga ringhla man
Imphal: Zani zingkar khan Thoubal district sunga Heirok Higher Secondary School bul hnaia leileta tuiluongkawr­ah nuhmei pakhat a thisaa hmu a nih. A hnungin mithi hi Heirok Part­III a cheng N. Rebika Devi (25) d/o (L) L. Ingo a nih ti hriet a ni a. Hi thina le inzawma tuolthattu ni dinga ringhla mi 3 hai laia  pakhat chu Police  han an man tah. Mipui lu ngsen chun Rebika Devi suolluia thattu ni dinga an ringhla mi 3 h ai chengna In hai chu zanikhan an raw pek. Rebika Devi suolluitu le thattu nia ringhla hai chu Tekcham Yaima Singh (24) s/o T. Shyam Singh, N. Bishe Singh le Kokngang hai anni a, an pathum hin Wangjing Tekcham Leikai mi vawng an nih. Yaima le Rebika hai hi an inngaizawng nia hril a nih. Rebika hi a ringah rakna be hmu a ni leiin suollui hnunga that ni dinga ring a nih.


Sipai thihai an khuo sengah
Imphal: June 4, 2015 nia Paraolon, Chandel district­a Helpawl han 6 Dogra Regiment hai an lambunnaa thi sipai 18 hai laia 17 hai ruong chu zani zingkar dar 8:45 vel khan Tulihal Airport, Imphal hmuna an khuo senga phur dinga inthla liem le military salute pek an nih. Hi zo hin mithiruonghai hi Special vuongna hmangin an khuo sengah thak anni tah. Hi hunsera hin Manipur Governor Dr Syed Ahmed; CM O.Ibobi Singh; Dy. CM Gaikhangam; Manipur DGP Saheed Ahmed; 3 Corps  GOC Lt. Gen. Bipin Rawqat, GoC 57th Mountain Division Major General P.N. Rao; Inspector General Assam Rifles (South) V.S. Srinivas le official danghai an thang. Sipai thi ruong pakhat chu zani hmasa khan an khuo tieng phur a ni tah.

Repol buoina taluo u m lova zo
Imphal: Zanita ADC 6 hnuoia Polling stations 74 haia repoll neia um chu buoina taluo um lovin zo fel a ni a, votes a tla tha tlangpui a, vote tla hai hi a tlangpuiin 70% le a chungtieng a nih tiin ei thu dawngna chun a hril. Votes tla hai hi June 10, 2015 khin tiem le result puong nghal ning a tih.

Peace Rally­cum Peace prayer
Imphal: Meitei Christians Community hai chun zanikhan Presbyterian House, Imphal War Cemetry, Dewlaland bu la inthawk Iboyaima Shanglen, Hapta Kangjeibung, Palace Gate chenin peace rally­cum­peace prayer an nei. Rally­a thang hi mi 1000 chuong anni ring a nih.

Secretary of Public Enterprises dingin Luikham
Imphal: Mr Ameising Luikham, Secretary North Eastern Council chu Secretary, Department of Public Enterprises, Govt. of New Delhi dinga ruot a nih. Ameising hi 1981 batch IAS Officer, Manipur cadre a nih. NEC Secretary sin hi May 7, 2013 a inthawka a chel tan a nih.

NIA team Manipur an tlung tah
New Delhi: Paraolon village, Chandel district, Manipur­a June 4, 2015 nia helpawl han 6 Dogra Regiment pawl an lambunna a Army 18 an thi le Army 11 an hliemna chungchang sui dingin National Investigation Agency (NIA) team chu Imphal, Manipur an hung tlung tah. NIA team hi Army le Manipur official team in an thangpu ding nia hril a nih.

Others:
Jayalalitha in rothil Rs. 117 crore
Chennai: R.K. Nagar A/C a nomination paper a file huna Tamil Nadu CM J. Jayalalitha in affidavit a peklut dungzuiin Rs. 117.13 crore zet rothil a nei. A thil neihai laia Rs. 45.04 manhu chu insawn thei le Rs. 72.09 core manhu chu laksawn thei lo niin ei thu dawngna chun a hril. Jayalalitha hin motors 9 a nei a, hienghai lai hin Toyota Prado SUV 2, 1980 model Contessa 1 a thang. Ms J.Jayalalitha hi hausa hle sienkhawm rohluotu ding neilo a nih.

Truck in mi 1 a baw hlum
Aizawl: June 5, 2015 zing dar 7:30 vel khan hmunhnawk phurtu LPK 407 Truck MZ01D­9776 in MacDonald Hill panna lampui chung taka inthawka tlan thla chun motor 5 le mihriem 5 a baw a, mi 5 hai laia Zoremliana Hauhnar (29) s/o Lalzarliana Hauhnar of Zarkawt chu a hliemna tuorzo lovin a thi. Motor a bawhai lai hin Celio Car 1, Maruti­800 1, Taxi 1 le Beat Car 1 a thang. Truck khaltu hi Manipur mi John Timothy Hmar of CCPur, Manipur mi a ni a, Police han an man. John Timothy Hmar hin a Truck hi a brake failed leia eksiden niin a hril.

Mizoramah Maggie laklut khap
Aizawl: Mizoram sawrkar chun State danga inthawk Mizoram sungah Maggie Noodles laklut le zawr a khap. Food Safety and Standard Authority of India (FSSAI) in Maggie Noodles hi mihriem hriselna tawkpawi thei nia a puong leia hi thil hi khap a nih tiin Lalsawma, Joint Director (Food and Drugs, Administration), Department of Health, Govt. of Mizoram chun a hril.

Sum le puona raltuhai chunga lawmthu a hril
Aizawl/CCPur: Date 8­5­2015 nia HC Malsawmkim thina chungah Pi Lalthanzo w/o (L) Malsawmkim chun Hmar mipuiin nasa taka an chawimawi na khelah sum le puon, tha le zung tam tak senga tuorpuituhai chunga lawmum le ropui a ti thu a hril a. A pasal thina le inzawma hmangaitu le lainatu hai popo Pathien iengkim thaw theiin a let tam taka rul le malsawm dingin ditsakna an hlan a, a pasal thina chun Hmar hnam lai inthuruolna intlun ngei sien ti hi ka tawngtaina a nih tiin a a hril.

Helpawl ni dinga ringhla 3 kap hlum
Srinagar: Zani zingkar dar 3 vel khan Jammu & Kashmir a Kupwara district­a LoC bula Army han helpawl ni dinga ringhla mi 3 an kap hlum niin Army spokesman chun a hril. Helpawl ni dinga ringhla hai hin an mi hung kap hmasa a, chu taka inkaptuonaa kap hlum an ni a, Army tieng chu thi le hliem an um nawh tiin Army spokesman chun a hril. Thla hlui khan helpawl han LoC bulah Army 4 le civil mi 1 an lo kap hlum ta a nih.

Custom Inspector ama le ama an that
Kanpur: Custom Inspector, Satish Gautam chu zani hmasa zan khan Dada Nagar Colony, Lucknow hmuna a chengna insungah inkhai hlum saa hmu a nih. Satish Gautam hi Lucknow’s Amausi Airprot a posting lai a nih. Satish hi zu le drugs addict, a nuhmei Pramila vaw zing zing a ni a, hi leia a nuhmei le a naupa’n an maksan, an in tienga an umsan, chu beidawnga ama le ama inkhaihlum ni dinga an ringhla thu a sunghan an hril.

A nuhmei a vuok hlum der
Champhai: June 4, 2015 dar 10 vel khan Khuangthanmawii (38) of New Champhai chu  Champhai leileta tu pakhatah a thisaa hmu a nih. Hi thina le inzawm hin a pasal Angu Shahu chu Police han an man a, thu indawnna an nei naah, a nuhmei le hin an insel lungsen a, chu taka a nuhmei hi a bek taka bawngtuthlaw hmanga a vuok hlum niin an puong.

Kum 78 mi le kum 58 mi an innei
Kanpur: Hmangaina hi a mit an del el chau ni lovin, hmangaina chun upat taluo ti a nei nawh. Kanpur District sunga Metahapurwa village­a pasal pakhat, Gangaram (58) le pitar kum 78 zet mi Phoolan Devi hai chu an inngaizawng tlat leiin an hnam danin June 4, 2015 khan an innei a, an inneina hunsera hin mi 500 vel an thang. Gangaram farnu Jamuna chun an sil le bil, gift le ruoithenain Rs. 50,000 vel an seng niin a hril.

Andhra Pradesh State Capital thar
Hyderabad: Andhra Pradesh state capital thar dinga Amaravathi ruot a ni angin zanikhan Andhra Pradesh CM N. Chandrababu Naitu chun hi capital thar indinna ding lungphumna a nei.  Amaravathi hi Guntur district sunga Tullur khawpui bula um a nih.

Modi le Hasaina han an vai liem
Dhaka: India PM Narendra Modi le Bangladesh PM Sheikh Hasina hai chun zanikhan Bus service pahni, Kolkata­-Dhaka-­Agartala le Dhaka­Shillong­Guwahati Bus services hai an vai liem.  Chun, ramri buoi chingfelna ding thu thangsain zanikhan hieng rambung pahnihai hin Agreements 19 an ziek.

Malaysia rama simkhawlei inhning leiin mi 11 an thi
Kundasang: Zani hmasa khan Malaysia rama Mount Kinabalu bielah Simkhawlei richter scale 6 a hratin an hning a, mi 11 an thi bakah midang 8 an umna chin hriet lovin an um bakah tlanglawn mi 137 zet hai chu an umna a inthawka suokdawk thei lovin an intang mek a, ruosur nasat leiin sansuokna sin thaw hlei thei lovin a um niin Kundasang a official thusuok chun a hril.

Mauritius a nuhmei President
Port Louis: Ameenah Guribafakim chun June 5, 2015 a inthawk khan Mauritius President sin a chel tan. Ama hi Mauritius rama nuhmei President hmasa tak a nih. Ameenah Gurib­Fakim (56) hi World Bank international Institutions le Mauritius University haia sin lo thaw ta hlak a nih.

Pakistan rama tuilien leiin mi 16 an thi
Quetta: Tulai hin Pakistan rama Khuzdar District, Baluchistan Province ah ruo nasa taka a sur leiin tui a lien a, tuilien leiin nuhmei 14 thangsain mi 16 an thi pha ta niin official thusuok chun a hril.Tuilien hi a hrat hle a, tuilienin a fen hai sansuok tuma hmalak a ni a, sienkhawm tui hi a hrat taluo leiin hlawsam a nih tiin senior official thusuok chun a hril.
---------------------------------------------------------------------------------------------------------------------
VAWISUN THUPUI
Mi po po le inremna le inthiengna hnawt ro, chu inthiengna naw chun tukhawmin Lalpa hmu naw ni hai.  - ­ Hebrai 12:14

Editorial
Intelligence Network siem that le sukhrat
June 4, 2015 a Chandel District­a Tengnoupal Police station huop sunga Paraolon khaw bula helpawl han 6 Dogra Regiment hai an lambunna a Army 18 an thi le Army 11 an h liemna thu chun India sawrkar na a ver hle. Hi lei hin sawrkar thlungpui chun hi thil tlung suizuina sin chu National Investigation Agency (NIA) kutah a peksuok nghal bakah Search and destroy operation thaw zui nghal dingin thupek a siem nghal. Army han operation an thaw tak tak pha leh iengang harsatna am mipui han ei tuok ding ti hi ngaituo tham a tling. Army hai nunrawngna hlak ei pumpel thei awm si naw leiin hawphur um takel a nih.
    Paraolon a inlambunna hi ei hang ngaituo  chet chet chun Army han intelligence network an nei tha naw lei niin an lang. Intelligence network nei tha hai sienla chu hiengang bek beka thina, hliemna le sietna hi an tuok ring a um nawh. Army­hai nekin helpawl han intelligence network an nei thain an nei hrat lem am a ni ding aw ti thei khawpin a um. Intelligence network tha tawknaw lei le a hratnaw leiin Army, paramilitary Forces le Police hai hin sietna rapthlak tak tak  hi an tuok hlak niin an lang.
    
Ram le mipui venghimna sin thawtu Army, paramilitary Forces le Police hai hin inlaichinna tha lem le intelligence network sukhrat zuol a hung ni theina dinga an thangruol thil tul takel a nih. Paraolon inlambunna chungthua hin Army hai chun an intelligence network a chau le hlawsam a nih ti an pawm thei hi thiltha a ni a, insiem­thatnaa an hmang pha beisei a um. Silai, bomb le ralthuom tha tak tak nei inlakhawm intelligence network a chau tlat chun umzie nei ngainaw nih.
    
Manipur Police Department khawmin intelligence Network an nei tha bik naw a nih ti chu Imphal khawpui sung, security forces le Police tamna hmun haiah vawi tam tak helpawl han bomb an sukpuok a, pawitawk lo civil mi tam takin thina le hliemna an tuok pha hlak hin a sukchieng. Intelligence network thain hrat sienla chu security hratna hmun haiah helpawlhai hi inzing utin che thei ngai naw nihai. State Police Department hnuoia Intelligence pawlin thil an hriet huna hin chu a ni ding ang ang a niin, a tlungzo ta hlak. Hieng a ni lei hin state sawrkar le Police Department khawma intelligence network an siem that le sukhrat a tul takzet a nih.
    
Khawvela sawrkar ropiu taka ngai,venghimna tieng khawm uluk taka ngai USA meu khawmin thil suol thaw tum ngar ngar hai chu a dang thei bik nawh. Amiruokchu,an ram le mipui venghimna tieng an ngaipawimaw le an uluk leiin thil tha lo tlung ding tam tak an pumpel thei hlak. Ram le mipui himna ding a ni phawt chun sum le pai, tha le zung seng an pawiti der nawh. Hi lei hin sietna nasa lem, harsatna le buoina lien lem an pumpel hlak.

            
Ram ropui  hai leh inkhaikhin ruol chu ni nawng ei ta, sienkhawm ei chunga thil thalo tlung thenkhat hi chu ei inthlada le ngaisam lei a ni thei a, ni khawm a ni hlak ring a um. Khawvel umsung chun inlambun, indo, inthuoihmang, bomb sukpuok le thil ditum lo a tlung hlak ding a nih. Chuongang thil a tlung theina lakah chun ei inveng hmasak ve hi ei thaw ding a nih. Ei invenglawk theina ding le ei him theina dingin intelligence network ei nei that hi a tul a nih.
Don't Miss
© all rights reserved
made with by Simon L Infimate